#لعنة_جمالي
#الجزء_الاول
كثيراً ما نسمع أن الجمال نعمة, وأن الله جميلاً ويحب الجمال, فإن كان ما حولك جميلاً ترى كل شيء بطريقة أجمل, ولكن ماذا إن تحول الجمال لبشاعة, وبدل أن يكون نعمة أصبح نقمة, ماذا أن تحول إلى لعنة أصاب بها صاحبته, بدلٱ أن يكون لها نعمة تتباهى وتتغنى بها, هذا ما نعرفه في قصتنا التالية #مريانا
بغرفة عبارة عن مكتب قاعدة صبية قدام المكتب وصبية تانية ورا المكتب .. وكأنها مقابلة عمل
الموظفة : السيفي حلو كتير واهم الشي هية اللغات يلي بتملكيها
انرسمت الابتسامة على وجه هايدي الصبية النحيلة كتير والوجه الشاحب بس هاد ابد ما بيخفي جمالها يلي مع ضعفها وشحوب وجها الا انها بتستحق لقب ملكة جمال .. بس اكيد هالوجه النحيل والجسم الضعيف وراه حزن اصلا مبين بعيونا لمعة حزن كبيرة ....
الموظفة : هاد اول شغل بدك تشتغليه
سكتت شوي بعدين حكت وقالت :اي هاد اول شغل
الموظفة : شو السبب
ماردت
الموظفة :اسفة اذا فيها احراج .. بس مؤهلاتك كتير عالية لتخليكي تتوظفي بأي شركة بدك اياها .. لانو بتملكي عدة لغات
هايدي : بصراحة ظروف خلتني ما اتوظف .. وهلأ صرت بحاجة شغل
الموظفة :امم ... طيب هلا رح عبي البيانات عندي وارفعا للمدير ويشوفا
هايدي :ايمت بدك تردو على خبر
الموظفة :فورا .. لانو المدير اليوم بالاوتيل
هايدي :وشو ممكن اتوظف هون
الموظفة :طبعا بالرسبشن لانو نحنا طالبين موظفة رسبشن وانتي بتمتلكي جميع المواصفات وبالاضافة لجمالك .. بس بتعرفي شو لو سمينة شوي بتطلعي بتجنني لانو وجهك مدور وماحلوة وانتي ضعيفة
هايدي ماعلقت ابدا على حديث الموظفة واكتفت بالشرود
الموظفة :اسمك الكامل وعمرك
هايدي :هايدي جمال الجمال .. العمر ٢٥
الموظفة عم تضرب باصابيعها على الكيبورد وتتطلع ع الشاشة .. وقفو اصابيع عن الكتابة ورفعتن عن الكبيبورد بصدمة
هايدي : في مشكلة
الموظفة اتطلعت بهايدي ورجعت اتطلعت بالشاشة
هايدي :لو سمحتي عم حكيكي
الموظفة سحبت السيفي وسكرتو ورجعتو لهايدي
هايدي :مشي الحال
الموظفة :للأسف .. لأ
هايدي :ليش
الموظفة :لقينا موظفة .. للأسف راحت عليكي
وقفت هايدي وقالت : شكرا .. وطلعت
ماشية اتجاه البوبة وحابسة دموعها بالزور ومن داخلها عم تحكي : كلن نفس الحكي ... كلللن .. بعد مابيكتبو اسمي ع الشاشة اللعينة بيصفنو وبقولولي نحنا بنعتذر .. مين يلي حاطط حطاي .. ولسه عم تفكري يا هايدي اكيد واحد من هدوك المغرورين .. بس شو لسه بدكن مني شووو .. بكفي يلي عملتوه معي بكفي ... زيلتوني دمرتوني شردتوني .. انا اليوم نايمة بالشارع لا محال ياربي تعبت .. شو اعمل
طلعت ع الرصيف وصارت تمشي .. وقفت جنبا تاكسي
:تاكسي يا مدام
هايدي : مشان الله حل عني ليش انا معي امشي خطوة بدي اركب بتاكسي
:شوقلتي يا مدام
هايدي :لا لا شكرا
تركها عم تمشي وراح .. وصلتها رسالة ع تلفونها .. طلعت تلفونها الصغير ابو الازرار يلي الو كشاف من راسو .. فتحتو وقرأت الرسالة : كيفك هايدي ليكي انا وعلوشي بالحديقة اذا بدك تجي تشوفيه .. لا تطولي
بان الفرح بعيونا من اثر هالرسالة .. كتبت يلا جاي
وكبست ع الارسال بس عطاها فشل ارسال الرسالة بسبب عدم توافر رصيد كافي
هرولت بمشتها لتلحق تروح ع الحديقة ..
____________________
بمكان تاني بأحدى الشركات السياحية بالبلد
قاعد دانيال على كرسيه الدوار ورا طاولتو ومادد رجليه على الطاولة .. انفتح الباب ودخلت صبية طويلة حلوة
دانيال بسخرية: اهلين.. اهلين بمرت ابن عمي
روز : دانيال بلا غلاظتك
دانيال : له له هلأ انا عم اتمسخر
روز : لكن شو بتسميه هاد
دانيال : شوبدك ليش جاي لعندي
روز : في مشكلة وبدي تساعدني فيها
دانيال وهو عم يعاملها بأستخفاف : بخصوص شو
روز : لو سمحت نزل رجليك وحكيني باحترام
دانيال : (نزل رجليه وركز قعدتو ) وهي نزلت رجلي ..شبك
روز : انا بورطة
دانيال : شو هية
روز : اليوم كنت عند الدكتورة النسائية
دانيال :اييي
روز : قالتلي انو انا عقيم ومستحيل احمل وجيب ولد
دانيال :ايي .. وليش جاي لعندي .. شو شايفتيني قالبها دكتور نسائي
روز : لا مو هيك .. بس اذا بيخبر يعرب بطلقني والله
دانيال :واذا خبر انك عندي كمان رح يطلقك مشان هيك قومي فرقيني بريحة طيبة لانو انا مابقدر ساعدك بشي
روز : بترجاك دانيال مالي غيرك
دانيال: لك بشو بدي ساعدك .. بشووو ... وكمان اطمني يعرب مارح يطلقك .. صح هو حقير ولئيم بس مابيعملا
روز :بس بيتزوج علي
دانيال : اي عادي يتزوج حقو
روز :دانيال بترجاك ساعدني متل ما ساعدتني اتزوجو
... انا والله بحبو ليعرب ومابقدر اتخيل حياتي بدونو او ممكن وحدة غيري تشاركني فيه
دانيال :اولا انا ما ساعدت حدا .. وتانيا كل يلي صار انا كنت عم انتقم وانتي استغليتي الفرصة لصالحك
روز :يعني شوو
دانيال :ايم سووري
روز : بس انت لازم تساعدني
دانيال :ماني متطر
روز :لأ متطر .. ورح خبرو شو عملت مع هايدي
دانيال :اي عادي خبريه اصلا انا ويعرب من يوم يومنا مابنطيق بعض وهيك تصرف رح يلاقيه عادي مني .. وكمان مارح يستغرب لانو هايدي بالاصل كانت حبيبتي .. بس انتي فكرتي بالنتائج .. اول مايعرف رح يروح ويجيبها وينزلها عليكي ضرة
روز بخوف :بيعملا ؟
دانيال :ههههه هو يلي بيعملا .
روز :مشان الله عطيني شي طريقة هلأ .. راسي كتير مشوش وماعم يطلع براسي شي فكرة
دانيال : روحي عبيتك شربي فنجان قهوة مع سيجارة وتركي كيدك يعطيكي طريقة
روز :مافي وقت لشغل كيدي هلأ .. يعرب بيعرف انو رايحة ع الدكتورة وكل شوي عم يتصل
دانيال :قوليلو عملت تحاليل وبدها وقت لتطلع
روز : وهو هيك .. بس انت اذا لقيت شي خطة خبرني
دانيال : مااشي هففف
لفت ضهرا وطلعت وهو حكي : تضربي منك الو ..
_____________________
هايدي عم تركض شوي وتمشي شوي .. وتحافظ على هدوئها بين العامة يلي ماشية على الطريق ... وهية عم تمشي بخطوات سريعة وصلتا رسالة .. وقفت وفتحتها .. ومكتوب فيها : هايدي شو وينك جاي ولا لأ ردي علي خبر .. لانو اتأخرت وامي عم تبعتلي
هايدي :ياربي كيف بدي رد عليها هي .. سكرت التلفون ورجعت تمشي
______________________
بمدرية العامة للسياحة .. وبمكتب المدير العام تحديدا
قاعد ورا المكتب شب تلاتيني .. شب طويل اسمراني ومبين عليه الحزم طبعا لانو مدير عام وفي لوحة صغير على مقدمة الطاولة مكتوب عليها المدير العام يعرب الشعار .. رفع تلفونو وطلب رقم مرتو .. بس ماردت
يعرب : شو صاير معا هي .. اوووف .. بس يلا رح اتفضالا منيح بس بالاول لحتى امن ع الوزارة
اندق الباب
يعرب : ادخل
دخلت صبية حلوة متل العارضات وهية السكرتيرة .. طبعا هيك بنات حلوين بنقوهن تنقاية ..
جوى: استاذ في شوية وراق بدك توقع عليهن
يعرب :هاتيهن ..
قربت وبلشت تعطيه الوراق .. ورقة ورقة
جوى:: استاذ اجانا فاكس من روسيا وفي مندوبين جايين يعملو استطلاع ع المناطق السياحية عنا بالبلد ..
يعرب :يعني ؟؟
جوا :استاذ بأعتبار حاليا مافي وزير .. الوزارة بعتت طلب انو انت تتكفل هالمهمة وتقوم بأستقبالن
يعرب : قريبا رح يتعين وزير ويحل كل هالمشاكل يلي محدا عم يعرف يحالها
جوى : وانا كلي ثقة انك رح تكون قد هالمنصب
يعرب :شكرا يا جوى
خلصت الوراق واخدتن .. وقالت :بدك شي هلأ استاذ يعرب
يعرب : لا مابدي شي .. بس خبريني شو الاخبار
جوى : اااه صح كنت رح انسى خبرك
يعرب : شو
جوى: المترجم الخاص بحضرتك اخد اجازة طويلة الامد
يعرب : اجازة شوو .. وبعدين هلأ وقت اجازاتو ؟؟
جوى : للأسف طلع معو هداك المرض وهلأ دخل المشفى ليتعالج
يعرب (بأسف ): ييي .. الله يشفيه ..
جوى :آميين
يعرب :لكن علاجو كلو رح يكون عحسابنا
جوى :عحساب المديرية ولا من حساب شركتك
يعرب :لا عحساب شركتي يعني حسابي الخاص
جوى : بتأمر استاذ
يعرب : ونزلتو اعلان عن مترجم ؟
جوى :مبلى نزلنا وعم يجو موظفين كتير .. واخر الشي بختار انا الكفؤ وببعتن لعندك مشان تختار انت
يعرب :منيح
جوى :بس للأسف يلي عم يجو مكسيمون معن لغتين غير العريبة
يعرب : شو هنن اللغات
جوى :انكليزي وفرنسي .. انكليزي وروسي .. انكليزي وتركي .. انكليزي وصيني .. طبعا الانكليزي عند الكل لانو لغة متداولة بين البلدان
يعرب سكت شوي وهو عم يفكر ..
جوى :انا رح ابحث عن شخص بيملك ٣ لغات ع الاقل غير العربية .. منيح هيك
يعرب :خلص لاتدوري انا عندي مترجم
جوى : عم تحكي جد استاذ ..طيب وين هو خلينا نراسلو ؟؟
يعرب : انتي بس خبري ريان وقوليلو يجيب هايدي ع الشركة عايزها
جوى :هايدي ماغيرها .. يلي كانت خطيبتك
يعرب :اي هية.. روحي بلا كتر اسئلة
جوى:حاضر
_______________________
هايدي بعدها عم تركض بالطريق لتوصل ع الحديقة
هايدي وهية عم تلهت ياربي ليش بعيدة كل هالقد
وصلها مسج ع الموبايل .. استندت ع الحيط وحطت ايدها على صدرا لتهدي انفاسها المتسارعة ... اخدت الموبايل وفتحتو وقرأت الرسالة : هايدي انا رجعت ع البيت .. لاتعذبي حالك نطرتك كتير ومعد فيني اتأخر اكتر من هيك.. شكلك ماعم تشوفي الرسائل عكل حال لما تشوفيهن ردي علي خبر وبنحدد موعد تاني .. سلام
هايدي :صارت تبكي وتقول والله شفتن .. والله شفتن وكنت جااي .. ليش هيك حظي ليييش
نزلت وقعدت ع الرصيف وصارت تبكي وتتنشوء .. وتمسح دموعا بكم بلوزتها متل الولاد الصغار .. طبعا لانو مامعها محارم تمسح فيهن
__________________________
بعد الضهر
بشركة سياحية صاحبها يعرب ..
واقف بمكتبو على الشباك وشارد قدامو ومعو فنجان قهوتو عم يشرب منو ..
دخلت جوى لعندو بعد مادقت الباب
طبعا جوى سكرتيرتو الخاصة وموجودة معو بكل اشغالو .. لانو هية الوحيدة يلي بتفهم عليه ومنظمتلو وقتو
جوى :استاذ يعرب فاضي
بعدو سارح قدامو قال: فاضي شوفي عندك
جوى :بخصوص ريان
يعرب :اجو
جوى :لا.. بس يلي فهمتو من ريان انو هايدي من زمان مانها بالفيلا
التفت عليها وقال :كيييف
جوى :هيك قلي
يعرب :وسليم كمان مانو بالفيلا
جوى :مين سليم ؟؟
يعرب :شو قلك ريان بالظبط
جوى :قال جاي ورح يشرحلك كلشي
يعرب :اتصلي فيه واستعجليه بسرعة
جوى :حاضر .. حاضر
لفت ضهرا وطلعت بسرعة
حط اديه بجيابو وسرح قدامو وصار يتذكر
###فلااااااش_باااااااك#####
ماشي يعرب بكريدور مشفى .. والشرار عم يتطاير من عيونو .. وكلشي عم يطلع قدامو يضربو ليبعدو عن طريقو ..وصل للغرفة المقصودة .. فتح الباب بدون استئذان .. وماحملو عقلو من المنظر يلي شافو .. شافها ساندة ضهرها ع الحيط ومعها واحد لابس مريول ابيض والظاهر انو دكتور محاوطها بأديها ايد ع الحيط والايد التانية كانت عند رقبتها ... لما فتح الباب دفشتو عنها بسرعة ...
هايدي :يعرب ... يعرب .. هو .. هااد .. هاااد .. كاان
يعرب (بغضب وبصوت مزلزل ): عم تخونيني ياكلبة
هايدي دموعها نزلو بسرعة وقالت :والله لا .. والله لاء .. يعرب سمعني
معد شاف شي قدامو وكأنو في غباشة .. من الغضب يلي سيطر عليه .. قرب من الدكتور وصار يضربو بكل قوتو لحتى الدكتور انهار بين اديه واغمى عليه .. وهايدي واقفة بالزاوية عم ترجف من الخوف واديها ع تهما وعم تبكي وكأنها تبلكمت ..
لما انهار بين اديه رماه ع الارض وفتل لعند هايدي يلي هبط قلبها من نظرتو الها .. قرب منها مسكها من شعرها بطريقة الخطف .. وصار يجرها وراه وكأنها شي دابة طلعو من باب الغرفة وكان شب طول بعرض وشكلو بادي جارد حكاه يعرب وقال :نضفلي جوا منيح
سليم :حاضر يعرب بيك
رجع كمل مشي وهو جاررها وهية عم تصرخ وتبكي وتقول يعرب بترجاك سمعني .. والله يلي شفتو غلط ... يعرررب .. يعرررب .. تركني عم توجعني
طبعا صارو فرجة لكل المشفى بس محدا قرب او تجرأ وقرب منهن .
#####بااااااااااااك#####
فاق من شرودو ع رنة تلفون المكتب .. حملو وقال :شو
جوى :يعرب بيك ريان ع الطريق
يعرب :خليه روح ع البيت
ورجع السماعة عمكانها بهدوء غاضب
__________________________
(لمحة عن شركات السياحة والعلاقة بين يعرب ودانيال .. يعرب ودانيال ولاد عم وابائهم هنن يلي اسسو هالشركة وورثوها لولادن .. يلي فصلو هالشراكة من وقت ما بعيد .. هالشركات شغلها هية السياحة بشكل اساسي داخل وخارج البلاد .. وكمان متعاقدين مع شركات سياحية باغلب البلدان العربية والغربية ... يعني بيستقبلو وبيرسلو سياح .. وبالاضافة انو شركتهن من الشركات المشهورة .. لجودتها وجودة التعامل مع السياح وبالاضافة لمرافقة من الحرس للسياح لحمايتهم.. وباسعارهن المدروسة .. طبعا الشركتين نفس الميزات والناس مابتعرف انن منفصلين مفكرين انن شركة وحدة وكل شركة فرع تابع للتانية .. ومع تكبير شغلن صارو يبنو ويشترو الاوتيلات يلي بالبلد .. وبالاضافة لبناء قريات سياحية كمان داخل البلد .. يعرب حب يكبر شغلو ويكبر اسمو كمان .. ودخل بالدولة طبعا هو دارس ومعو شهادة ماجستير .. وعن طريق تعبو وجهودو المالية طبعا واسمو يلي معروف .. قدر يحصل على منصب مدير عام لدائرة تابعة للسياحة والاثار وهلأ عم يسعى للوزارة .. اما دانيال بقي عم يشتغل خفيف نضيف ومابدو يدخل مع الدولة ووجعة الراس .
_______________________
بشركة دانيال
بمكتبو في طاولة بلياردو بزاوية المكتب ..
ماسك دانيال العصا ومنحني على الطاولة وعم ينيشن على طابة .. رجعها شوي لورا وضربها .. لحتى ضربت بالطابات وطشو على الطاولة بطريقة عشوائية ..... انفتح الباب وفاتت مرى خمسينية مبينة من الطبقة المخملية .. وحاطة جاكيت على كتافها بدون ما تلبسو ورافعة راسها لفوق .. قربت وقعدت على الكرسي يلي قدام الطاولة ولفت رجل ع رجل بغرور وحكت :انت هون عم تلعب بلياردو ويعرب بعد كم يوم رح يصير وزير
رما العصا ع الطاولة وراح قعد مقبالها وقال : اهلين امي
امو : لا اهلين ولا سهيلن ..
دانيال :امي شوبدك هلأ .. روح اخد الوزارة من يعرب لترتاحي
امو : هه ليش بتقدر
دانيال :مزال بتعرفيني مابقدر .. ليش قالبة خلقتك فيني وعم تبهدلي فيني
امو :بدي اياك تكون متلو .. بتعرف شو يعني يعرب يصير وزير .. يعني سيط وشهرة والكل بيحسب حسابو
دانيال :وانا هدول مابدي اياهن
امو :حرام شوف حالي فيك يعني
دانيال :ليش هيك مانك شايفة حالك فيني
امو :بتفرق كتير لو ابني وزير .. ولا قلك مابدي وزير مدير عام قبلانة
دانيال : امي العلقة مع الدولة مو علقة .. مفكرة يعرب عم يتشاطر ... بكرا حدا بينقهر منو بيكتب فيه تقرير .. بشلحوه الوزارة .. والاموال الخاصة والعامة وبيرجع ع الحديدة تحت مسمى من اين لك هذا .. خلصنا امي خلصنا .. اذا هو جحش ماني متطر كون جحش متلو .. وبعدين انشالله مفكرة حصل ع الوزراة بتعبو وشهاداتو .. دفع كتير وكتير كتير لحتى وصل حالو لهون
امو :يعرب اكيد بكون حاسبها صح .. واكيد بدو يطعمي التسعة لياكل العشرة
دانيال :انا لابدي طعمي ولا بدي اكل .. هيك عم اشتغل لحالي احلالي
امو :دخيلك انت
وقفت بغرور وركزت الجاكيت يلي عكتافها ومشت وقالت : الحديث معك مابجيب نتيجة ابدا .. سلام
دانيال :سلااام ههههه
_____________________
بحارة شعبية .. ببيت عربي .. بالطابق التاني
انفتح باب غرفة ودخلو نسوان تنتين اعمارن بين وحدة خمسين والتانية حوالي ٧٠.. والمرى الكبيرة ام ٧٠ عم تنقل نظرها بالمكان وتتفحصو
حكت الاولة: شو ان شاءالله عجبتك الغرفة
التانية :وين منتفعاتا هي الغرفة
الاولة : جواتها .. هداك الباب في وراه مطبخ صغير وحمام
قربت وفتحت الباب وكان مطبخ صغير متر بمترين .. في مجلى صغير ورفين وغاز سفير وباب تاني بطل ع الحمام
: كأنو هالغرفة مسكونة
: اي مسكونة بس اليوم بدها تطلع .. الله لايوفقا علت قلبي وماعم تعرف تدفعلي هالاجار .. صرلي مقعدتا عندي ٣ اشهر ببلاش بس وبعدين .. معد اتحمل .. كمان انا مرى كبيرة وبدي مصروف
: مين ساكنها هي الغرفة
: صبية باول التلاتين يمكن .. والله مابعرف شو قصتها يمكن هربانة من اهلها .. شفقت عليها وقعدتا .. وكل يوم بتقلي رايحة دور ع شغل وبتجي عم تخفق بأديها .. لك حتى حق اكل مامعها تاكل اذا ما جبتلا انا شي سكبة بتضل جمعة بلا اكل ..
: طيب ماحرام تطالعيها .. وين بدا تروح
: تدبر حالها .. شو فاتحتلا سبيل انا .. هي استحملتا تلت اشهر .. بس والله يا اختي معد اقدر .. اي صحي ماتعرفنا شو اسمك اختي
:ناديلي الحجة امون
: وانا بناودلي ام العبد
امون :تشرفت فيكي
ام العبد :الله يزيدك شرف .. شو اعتمدتي ؟
امون :الغرفة عجبتني ورح استأجرها
ام العبد : اي والله بتنوري .. بس بدك تعذريني بدي تدفعي سلف لانو معد امن بسبب هالمغضوبة هايدي
امون :اسمها هايدي
ام العبد :اي
امون :لا تاكلي هي ..
فتحت جزدانا وطلعت مبلغ وقالت :وهي لستة اشهر
ام العبد خطفت المصاري من ايدها وقالت : اهلا وسهلا .. اهلا وسهلا ..
امون :بس انا بدي اسكن فورا
ام العبد :تكرمي .. تكرمي .. خلال ساعة زمان بتلاقي الغرفة جاهزة وغراض هي المغضوبة بكونو براتها
امون :طيب ممكن فنجان قهوة لبين ماتخلصيها
ام العبد :اكيد .. اكيد تفضلي لننزل لتحت جنب الزريعة بتشربي اطيب فنجان قهوة
نزلت ام العبد قدامها وامون نزلت ع الدرج ببطئ .. كانت عم تتأمل كل زاوية بهاد البيت ..
هالمخلوقة شكلها غريب .. هادية كتير .. لابسة تيابة سودة .. متحجبة بحجاب اسود كمان .. وصلت ع ارض الدار .. كانت ام العبد مجهزة القهوة وطالعة فيها
ام العبد :والله نورت هالدار
امون :منورة بأهلها ..
ام العبد :حجة .. بلا صغرة بس انتي ماعندك غراض ؟
امون :مبلى .. هلأ بجبلي اياهن واحد من ولادي
ضيفتها القهوة وقالت : مشالله عندك ولاد .. ليش مابتقعدي معن ؟؟
رشفت من القهوة وماردت ع السؤال
ام العبد بأحراج :انا طالعة نضف الغرفة
_____________________
بفيلا كبيرة اشبه بالقصر ومحاوطة بالحرس من كل الجوانب ..
وداخل هالفيلا رايحة جاي روز وعم تاكل اضافيرها بتوتر ..
روز :ياربي شوبدي قلوو .. لك هو كل الولاد ماكان سأل عنن .. كل الحق علي .. ضليت نق فوق راسو لحتى وافق .. ولما وافق طلعت انا مابجيب ولاد .. اخدت تلفونها من على الطاولة وفتحتو .. ورجعتو ع مكانو
روز:منيح معد اتصل .. بس شوو بدي قلوو .. شوو
دخلت عليها خادمة ومعها عصير ليمون
الخادمة :دخيلك يا ست روز خدي هالليمون وهدي حالك
روز :كيف بدي هدي حالي ياخديجة كييف .. وانا واقعة بمصيبة
خديجة :مصيبة شوو .. خبريني لساعدك
اخدت كاسة العصير وقعدت : الدكتورة اليوم خبرتني انو مستحيل كون ام .. مستحيل .. يعني انا عقيم ياخديجة عقيم
شهقت خديجة وحطت ايدا عتما وقالت :والله زعلتني عليكي .. خلص لاتنقهري وتزعلي حالك خليها ع الله
روز :مو هوون المشكلة .. المشكلة شوبدي قلو ليعرب
خديجة :ليش مانك ناوية تخبيره
روز :لأ طبعا .. بدك اياه يطلقني او يجبلي ضرة .. من عيدا شي هو عايش معي بالزور
خديجة : والله مشكلتك عويصة
روز : بترجاكي ياخديجة لاقيلي حل
خديجة : الحل موجود
روز :شو هو دخيلك
خديجة : حطي المشكلة فيه
سكتت روز مع صفنة
وكأنو عم تفكر بالموضوع
________________________
انفتحت بوابة فيلا يعرب ويدخلو ٣ سيارات سود غطس مع فيميه .. وقفوا قدام البوابة الداخلية ونزل الشوفير يلي بالسيارة التاني يعني يلي بالنص .. وقرب من الباب الخلفي وانحنى وفتحو .. نزل من السيارة يعرب بكل غرور .. ودخل ع الفيلا
كانت سفرة الغدا يلي حاملة جميع الاصناف ناطرتو وبأستقبالو روز بكل اناقتها مع ابتسامة على وجها
شلح جاكيتو وقربت بسرعة اخدتو منو
روز :يعطيك العافية ياروحي
يعرب :تغدي انتي ماني جوعان . وراح قعد ع الكنبة
لحقتو روز وقعدت ع الكنبة يلي جنبو والجاكيت بعدو بحضنا وقالت :شبك حبيبي .. ليش معصب
يعرب :مافي شي
روز :بس مايكون لانو مارديت عليك .. بصراحة هو..
يعرب :اناا ماسألتك شي .. خرسي وقومي من وجهي
روز :حاضر .. حاضر لاتعصب
وقفت لتمشي .. بس رجع وقفها وقال : هايدي وسليم وينن
تجمدت مكانها وماعرفت شو ترد
يعرب :شبك انخرستي
روز : مابعرف .. بس سليم صرلي فترة ماشفتو قول هايدي بالاصل محدا كان يشوفا.. اكيد تركو الفيلا
يعرب : ومين يلي سمحلن يتركو الفيلا .. اكيد حدا عطاهن موافقة
روز :ما انا والله ..
هز براسو وقال :مافي غيرو ريان
روز :مظبوط شفت ريان مع سليم قبل ما يختفى .. بس انافكرت انت يلي امرتو
يعرب :لك كيف هيك ماحسيت .. قريب السنة وهنن برات الفيلا وانا مامعي خبر .. كيف صار هيك
روز رجعت قعدت مكانا وقالت :اي يروحو شوبدك فيهن
يعرب :شو شوبدي فيهن .. ليش انا خلصت منن ليروحو هيك لا احم ولا دستور
روز :شو لسه بدك منن .. خلص راحو .. وانت حلك تنسى
يعرب :الخيانة مستحيل اغفرا
روز :بس يلي عملتو فيها عقاب كبير ..
يعرب : انا لسه ماعاقبت حدا .. كنت مأجلها بس لخلص من اشغالي
روز :يعني والله مابدا كل هالقد .. بالنهاية هية كانت خطيبتك .. يعني لو مرتك نص مصيبة
ضحكة ضحكة جانبية وقال:مين قلك انها ماكانت مرتي
روز بتلبك وصدمة: شو ..شوو .. شووو
يعرب :بتعجبني الثقة يلي عم تعيشيها
روز :لا ماكانت مرتك .. انت عم تحكي هيك مشان تقهرني ماهيك ..
يعرب : وليش لحتى اقهرك بلا سبب عم احكيلك الحقيقة
روز :اي اي فهمت عليك .. قصدك ع عقد القران انت صح كنت كاتب كتابك عليها .. هيك قصدك بمرتك ..ماهيك ؟
يعرب :لك انتي ماعم تستوعبي عم قلك مرتي .. مرتي نظامي
روز (دمعو عيونا وقالت ): نمت معها ؟
يعرب : ههههههه
روز :يعرب لاتضحك .. لاتضحك وتلعب بأعصابي
هجمت عليه ومسكتو من تيابو وصارت تصرخ وتقول :يعرب لاااتضحك .. لاتضحك يعرررب
مسكلا اديها ورمها ع الكنبة عم تبكي وقال :اذا اجا ريان بتخبريني فورا .. تركها وطلع ع غرفتو
فتح الباب واول ما اجت عينو على التخت اجت ذكرى على راسو
####فلاااااااش_باااااك#####
دخل يعرب من باب الفيلا ومعو شنتة سفروالظاهرجاي من سفرة.. وطلعت خادمة بوجهو وقالت :اهلين يعرب بيك الحمد لله عسلامتك
يعرب : الله يسلمك ياعيشة
عيشة :بتحب حضرلك الغدا
يعرب :لا لا .. هايدي عم تجي لهون شي
عيشة :اي كل يوم بتجي شوي وبتروح عم تظبط عم شغلة بالبيت
يعرب :اليوم اجت شي
عيشة : لا لسه
يعرب :طيب روحي عشغلك
عيشة :ماشي
دخل وقعدع الكنبة وحمل موبايلو واتصل فيها
ردت بدون مايحكي :يعررب .. حبيبي انت بالبلد
يعرب :ههههه اي بالبلد .. هي وصلتي
هايدي : وليش ماخبرتني اطلع لاقيلك بالمطار
يعرب :ياروحي انا سفراتي كتار .. معقول كل مابدي سافر يومين عزبك تنطريني بالمطار
هايدي :احب على قلبي .. لانو بتمنى شوفك اول وحدة
يعرب : المهم هلأ انا مشتقلك كتير حملي حالك وتعي لعندي مشتقلك كتييير
هايدي : بعتلي شوفير بكون جهزت حالي
يعرب :عدي للعشرة الشوفير بكون عندك
هايدي : لكن سكر هلأ هههه
يعرب :ناطرك هههه
....................
دخلت هايدي من باب الفيلا والفرحة على وجها .. طلعت بوجها عيشة
هايدي :مرحبا عيووش
عيشة :هلا بالحلو
هايدي :وينو مدرينا المحترم
عيشة : طلع عغرفتو يعمل شاور
هايدي :اممم .. لكن رح انطرو هون ليخلص
عيشة :بس قال تطلعي لعندو فورا
هايدي : ... خلص رح انطرو هون .. بتعرفي انتي ماحلوة اطلع وهو عم يتحمم
ابتسمت عيشة وقالت :متل مابدك .. خبرتك يلي قلي اياه وعملت يلي علي .. بالاذن
ومشت اتجاه المطبخ
اجا صوت يعرب من الطابق التاني: هايدييي تعيي
غمضت عيونا بخوف بسيط وابتسامة على وجها
وطلعت لعندو .. دقت ع الباب دقتين خفاف
يعرب: فوتي
فتحت الباب وفاتت .. كان ببرنس الحمام
هايدي :رح انطرك برا لتخلص لبس( لفت لتمشي .. بس ايدو مسكتا من دراعا وجابها على حضنو .. وضمها بقوة كبيرة وشغف .. ماقدرت تقاومو لانو هية كمان مشتاقتلو
ضامم راسها على صدرو وعم يلمسلا شعرا وقال :اشتقلللللك
هايدي :وانا كمان اشتقلللك كتير
بعدت عنو وقالت يلا لبيس تيابك وانا ناطرتك برا
كان صافن بعيونا والابتسامة ع وجهو ..
هايدي :شو .. فيني شي . وصارت تلمس ع وجها
يعرب :فيكي كلشي
مسكها من كتافا وسحبا لعندو ....
بعدت عنو وقالت بترجي :يعرب خلص بلاها
يعرب :ههههههه ماحزرتي
هايدي :والله مابصير هيك كل مرة بتضحك علي بكلمتين وبتعمل يلي بدك اياه
يعرب :شبك يابنت انتي مرتي
هايدي :بس مو قدام العالم
يعرب :اخر همي العالم
هايدي :طيب لسه شهرين وبنتزوج قدام الكل ... صبور شوي
يعرب : خلصتي
هايدي :قبل ما اجي لعندك كنت عم احكي مع ماما
يعرب :اها .. وكيفا
هايدي :منيحة .. بس كانت عم تنبهني انو ماضل مخفقة رايحة جاي لعندك .. لانو مابصير وعيب وقد ماكان نحنا مخطوبين مو متزوجين
يعرب: ما قلتيلي كيفا وكيفو عمي وابن عمي
هايدي :يعرررب
صار يضحك .. ومشي لعند الباب وحط ايدو ع المفتاح وفتلو لينقفل الباب
هايدي : طيب هلأ بتأخر ع السكن ومابفوتني
يعرب : بتنامي هون
هايدي :صايرين عم يحطولي انزارات
يعرب :يضربو هنن وهالسكن معن .. منيح هيك
هايدي :يعني مافي مهرب
ابتسم وهز براسو انو لأ
حطت اديها على خصرا وقالت : بعدين تعا لهون انت جبتلي شي هدية معك
يعرب :جبتلك انا مامنيح
ضربت برجلا بالارض وقالت اوووف .. ياربي منك
مشي لعندا ومسكها من ايدا وسحبا ع التخت وهية مشت وراه مستسلمة
#######باااااااااك#####
فاق من شرودو ع دقة الباب .. كان بعدو واقف مكانو التفت وفتح الباب
روز ببرود :ريان تحت عم ينتظرك
مارد عليها وطلع ليقابل اخوه
وصل لعندو وريان قام ووقفلو
يعرب اتطلع فيه نظرة طويلة مليان غضب ولوم وعتب
ريان :اخي سمعني
يعرب :سؤال ورد غطاه سليم وهايدي وينن
ريان سكت
يعرب :وينننن
ريان :الجواب مانو كلمة او كلمتين .. خلينا نقعد ونحكي
قرب يعرب وقعد بقهر وقال :كييف بتتصرف هيك كييف .. لك كل هالاشهر وانت عم تضحك علي وتخدعني
ريان : اخي ما خدعتك
يعرب :لكن شوو بتسميه هاد .. شووو ... قلتلك يا ريان بتخلي عينك عليهن وكل يوم بدي تقرير مفصل عن حياتن وانت قلتلي عندي .. ولأء والانكى من هيك كل يوم عم يجبلي اخبارن .. من وين عم تخترع هالاخبار ... ولا شفت انشغالي بالوزارة وانت مشيت المي من تحت رجلي .. انت بتعرف لو انا متفضي كنت كشفت كذبتك من زمان
ريان :.......
يعرب :يا امة الله رجع يسكت .. لك احكيي .. مانك جاي لتحكي ... احكييي
ريان : كيف بدي احكي وانت هيك معصب ... بدك تروق لتفهم علي اكتر
يعرب :حدا قلك انو لما بكون معصب ببطل افهم
ريان :موو هيك والله .. بس اهدى خليني اعرف من وين بدي بلش
يعرب : وهي هديت انقبر احكي
ريان : رح احكي .. بس قلي من وين بدي بلش
يعرب :ليش هربتن
ريان :والله مشانك .. لانو انت عم تعاقب حالك ما عم تعاقب هايدي
يعرب :مادخلك انت بهاد الموضوع .. جاوب عقد السؤال
ريان :هي وحدة خاينة .. خاينة .. وما مستاهلة توسخ اديك فيها ... الخيانة عم تمشي بدمها ... قبل ماتخونك خانت دانيال ورجعت خانتك .. وبعد ماخانتك رجعت خانتك مرة تانية
يعرب بعدم تصديق : كييف .. كيف ..
ريان :اي اخي.. هية حية ..عقربة .. من برا حلوة ومن جوا كلها سم ...
يعرب :كيف عرفت بموضوع دانيال انت ؟
ريان : دانيال خبرني اول ما اعلنت خطوبتك عليها ..
يعرب :المهم هلأ بدي سبب مقنع ليش هربتن
ريان :القصة هية انو ...........
____________________________
وصلت هايدي ع البيت .. وهية متوقعة التقليعة ..
اول مادخلت من الباب اجت عينا على شناتيها .. تقدمت بخطوات بطيئة لتاخد غراضها .. اول ماوصلت لعندن طلعت بوجها ام العبد
ام العبد : واخيرا شرفتي .. لو متأخرة شوي كنت رح ارميلك اياهن برات البيت ع الشارع
هايدي :يكتر خيرك
ام العبد : اكيد ماشغلوكي
هايدي ماردت عليها .. انحنت لعند الشناتي حملتن واجت لتطلع
مشت خطوتين ورجليها خانوها وراسها فتل عليها .. استندت على الشناتي ونزلت ع الارض
ام العبد: حاج تمثيل .. وقومي انقلعي
هايدي :مشان الله بس خليني ارتاح شوي
ام العبد :شقد شوي
هايدي : شوي .. والله بس شوي
ام العبد :طيب بس شوي ..
هايدي (تبكي ): وين بدي روح انا هلأ
ام العبد :مامشكلتي
هايدي :خليني نام هون بترجاكي .. هون بأرض الدار
ام العبد :لاء .. يعني لاء
هايدي :خلص بوعدك اخر ليلة والله
ام العبد :لسه كل يوم بتقلي بس هالليلة .. حاج تضحكي علي
هايدي : لك والله مالي محل روح عليه
ام العبد :مامشكلتي
هايدي :اعتبريني بنتك .. والله انتي حنونة
ام العبد :مابدي بنت تكون متلك .. وكمان قلبي قسيتو
هايدي :الدنيا صارت ليل .. وين بدي نام ..
ام العبد :بالشارع
هايدي :الشارع مابيرحمني .. وانا بنت وحدانية
ام العبد :روحي لعند اهلك .. ماعندك اهل .. ماعندك قراييبن روحي لعندن وحلي عني .. بكفي تحملتك كتير
هايدي :اهلي اذا بشوفوني رح يدبحوني
ام العبد :يعني ع الزمة يلي متلك الموت ما احسنلو
هايدي : اي احسنلو .. بس مابقدر موت ..
ام العبد :هههههه بتقدري واذا بدك انا بساعدك
هايدي :لاحول ولاقوة الابلله .. خلص والله رايحة.. بس خليني ارتاح شوي .. لانو رجلي معد حملوني
ام العبد :مااشي .. انا فايتي كمل الطبخة .. بتكوني انقبرتي رحتي
هايدي :يكتر خيرك
لفت ضهرا ومشت .. وهايدي طبت على رجليها وصارت تبكي بحرقة
(شو صعب انو مايكون الك حدا .. شو صعب تكون جوعان وماتلاقي اكل .. شو صعب تتمنى الموت وماتقدر تموت ... شو صعب انك تشتهي البكي وماتلاقي حضن حنون يضمك )
: لسه الك جلادة تبكي
رفعت راسا وكانت الحجة امون
هايدي :مين انتي
امون :انا الي استأجرت مكانك
مسحت دموعا براحة كفها وقالت :اهلين .. انا قاعدة شوي ورايحة
امون :ماجاوبتيني عسؤالي ؟
هايدي :ايو سؤال ؟
امون :لسه الك جلادة تبكي
هايدي :مافهمت
امون :صار معك كتير شغلات وبتبكي الصخر .. يعني شغلة متل هي مابدها كل هالدموع
هايدي :مين انتي ؟
امون :ولا هي دموع مكبوتة ..
هايدي :مين انتي ؟؟
امون :بتعرفي انا لو محلك وصاحبة البيت قلعتني بلاقيها عادي .. ماحلك تتعودي ع الصدمات .. والخوازيق
هايدي :انتي بتعرفيني صح ؟
امون :ولابعمري شفتك
وقفت هايدي وقالت :حدا باعتك ماهيك
امون :هئ ابدا
هايدي :منين بتعرفي عني هالشغلات
امون :انا بقرأ الافكار والقلوب
هايدي :وشو قريتي
امون :قلب مكسور ... لا كلمة مكسور قليلة .. قلب محطم ..مدمر.. رماد
هايدي :وشو كمان
امون :ظلمتي وانظلمتي
هايدي :ماظلمت حدا .. هنن يلي ظلموني .. وشو بتعرفي كمان
امون :عرفت كتير بس ما اكتر من يلي بدك تحكيلي اياه
هايدي :ماعندي شي احكيه
امون :مبلى .. انت بحاجة تحكي
هايدي : مابوثق بحدا
امون :حتى لو ماحكيتي انا بقرأ افكار
هايدي :وشو قريتي
امون :بيلي عم تفكري فيه
سكتت ومعد ردت
امون :هههه عم تحاولي توقفي التفكير مشان ما اعرف بشو عم تفكري
هايدي :ميين انتي .. وشوبدك مني
امون :بقولولي الحجة امون .. ومابدي شي .. بس وثقي فيني انا مابأذي حدا
هايدي : انا بدي روح
امون : وين بدك تروحي ومالك حدا
هايدي :بنام بالشارع .. معد فرقت عندي
امون : شو رأيك تشاركيني الغرفة
هايدي :لأ .. شكرا .. قلتلك مابوثق بحدا .. وكلامك كلو ما اقتنعت فيه
لفت ضهرا لتمشي .. امون قلك شي عم تفكري فيه جواتك لتقتنعي
هايدي :ماني متطرة
امون :صرلك يومين مشتهية الفراريج المشوية
هايدي :كل العالم بتحبون هدول وخصوصا ع الجوع
امون : رح تمشي ٣ خطوات وتوقعي ع الارض .. رجيلكي بيخزلوكي
هايدي بخوف اتطلعت ع رجليها .. وصارت تمشي ببطئ .. اول خطوة .. والتاني .. التالتة خارت قواها ع الاخير ووقعت ع الارض
اتطلعت ع امون بخوف وقالت :ميين انتي
امون :قلتلك الحجة امون
هايدي : انتي مابس بتقري افكار
امون :انا بحس
هايدي :شوبدك مني
امون :ساعدك
هايدي :بشو بدك تساعديني
امون :وقف جنبك .. مابدك حدا يوقف جنبك ويعطيكي نصائح
هايدي :.......
امون :كم يوم صرلك بلا اكل
هايدي : مابظن في داعي جاوب لانك اكيد بتعرفيه للجواب
امون :هههههههه قومي يابنتي قومي
مدتلا ايدا وهايدي حطت ايدها بأيد الحجة ووقفت
طلعت ام العبد من المطبخ قبل ماتحكي شي حكت امون : ام العبد هايدي رح تشاركني الغرفة
ام العبد :الغرفة غرفتك .. اهلا وسهلا فيكي
امون :تعي يابنتي تعي
طلعت هايدي معها وهية مصدومة وعم تتطلع عليها بقلق
امون :شبك ليش عم تطلعي فيني هيك
هايدي :كيف عرفتي اسمي
امون :ههههههههه لاتسألي هالسؤال مرة تانية
دخلو ع الغرفة وقعدو
هايدي قعدت بهدوء بدون ما تنطق بحرف .. اندق الباب عليهن
قامت هايدي وفتحت .. كانت ام العبد
ام العبد :عامل الديلفيري جاب هدول للحجة امون
امون من جوا :اي هاتيهن يا ام العبد .. دخلت ام العبد ومعها كياس اكل
طلعت امون مصاري وعطتها لام العبد
امون :زكاتك هدول عطيهن للعامل
ام العبد :تكرمي
اخدتن ام العبد ونزلت
امون :هدول الك قومي كلي
هايدي :الي ؟؟
امون :اي الك ..
قامت هايدي بتردد فتحت الكياس وكان فروج مشوي كبير وحباشاتو ومعو تنكة ببسي
هايدي :وانتي ؟؟
امون :مابحبو .. وكمان اكلت قبل مااجي
هايدي :بس...
امون :كلي .. كلي لازمك غذا .. وكمان بعد ماتخلصي بدك تقعدي وتحكيلي قصتك
هايدي ماقدرت تقاوم الاكل وريحة الاكل وقعدت وصارت تاكل بشراهة وعنجد متل ماقالو الجوع كافر
اكلت كل الفروج وبعدها جهزو القهوة وقعدو يشربو .. الدنيا صارت ليل
خلصو شرب قهوة وكانو عم يتبادول اطراف الحديث عن القعدة بالغرفة وعن ام العبد وعن الجيران
هايدي :ام العبد والله قلبها طيب .. بس انا تقلت عليها
امون :اي عرفت انو قلبها طيب .. انا اول ماجيت وحسيت الغرفة مسكونة ..و قلتلا تطالعلك غراضك لبرا
هايدي :ليش خليتها تعمل هيك .. وبعدين رجعتيني
امون :انا مابعلم بالغيب .. بس لما بشوف الشخص بحكم عليه من عيونو ونظرتي بالانسان بعمرا ماخابت
قلت اذا شفتك وارتحتلك رح خليكي تجي تقعدي معي
اخدت امون فنجان وطبتو
هايدي :بدك تبصريلي ؟؟
امون :اي
نشف الفنجان واخدتو امون وصارت تقرأ فيه
امون : اااخ يا هايدي شو حواليكي سواد
هايدي :شي مفروغ منو
امون :في عيوان عم تراقبك
هايدي :بعرف .. واقفين بطريقي ماعم يخلوني اعرف عيش .. كل مابروح عمكان لحتى اتوظف بيرفضوني فورا بعد مايعرفو اسمي
امون :مين هنن
هايدي :واحد من تنين يا اما يعرب يا ابن عمو دانيال
امون :مين هدول
هايدي :سبب دماري .. ما انتي بدك تسمعي قصتي خلصي الفنجان لاحكيلك
امون : طيب ماشي .. وين صرنا
هايدي :عند العيون
اتطلعت ع الفنجان وقالت :اي صح.. بس هالعيون عيون وحدة ما واحد
هايدي :وحدة ؟؟
امون :هيك مبين معي
هايدي :مابعرف
امون :وحدة كبيرة شوي بالعمر
هايدي :ماعندي اعداء نسوان وكبار بالعمر
امون : يمكن مايكونو اعداء
هايدي : وشو كمان
امون : في حدا عم بدو يدور عليكي
هايدي : معقول يعرب .. مبين موصفاتو او اذا رجل او مرة
امون :شب .. وحواليه هالة
هايدي :شو يعني
امون :يعني انو شي مهم
هايدي :اكيد يعرب .. مامبين شوبدو
امون : غضبان كتير
هايدي : ياربي دخيلك .. وشو كمان
امون :رح تلاقي رزقتك بس لاتعلي كتير
٠هايدي : كيف يعني
امون :عم تدوري ع الشغل بالاماكن الغلط
هايدي :وين بدي دور لكن
امون :حاولي تشتغلي شغلة بسيطة .. مثلا محل البسة مطعم هيك شي
هايدي : بس انا بدي اشتغل بأختصاصي
امون :اختصاصك صعب .. لانو واقفين بطريقك
هايدي :طيب اذا دورت بمكان بسيط رح لاقي
امون :ان شاء الله
هايدي :وشو كمان
امون : بس هدول .. يلا حكيلي قصتك
هايدي : رح غسل وجهي وارجع
يتبع .......
![رواية لعنة جمالي - احداث حقيقية مشوقة]( "رواية لعنة جمالي - احداث حقيقية مشوقة")
#الجزء_الاول
كثيراً ما نسمع أن الجمال نعمة, وأن الله جميلاً ويحب الجمال, فإن كان ما حولك جميلاً ترى كل شيء بطريقة أجمل, ولكن ماذا إن تحول الجمال لبشاعة, وبدل أن يكون نعمة أصبح نقمة, ماذا أن تحول إلى لعنة أصاب بها صاحبته, بدلٱ أن يكون لها نعمة تتباهى وتتغنى بها, هذا ما نعرفه في قصتنا التالية #مريانا
بغرفة عبارة عن مكتب قاعدة صبية قدام المكتب وصبية تانية ورا المكتب .. وكأنها مقابلة عمل
الموظفة : السيفي حلو كتير واهم الشي هية اللغات يلي بتملكيها
انرسمت الابتسامة على وجه هايدي الصبية النحيلة كتير والوجه الشاحب بس هاد ابد ما بيخفي جمالها يلي مع ضعفها وشحوب وجها الا انها بتستحق لقب ملكة جمال .. بس اكيد هالوجه النحيل والجسم الضعيف وراه حزن اصلا مبين بعيونا لمعة حزن كبيرة ....
الموظفة : هاد اول شغل بدك تشتغليه
سكتت شوي بعدين حكت وقالت :اي هاد اول شغل
الموظفة : شو السبب
ماردت
الموظفة :اسفة اذا فيها احراج .. بس مؤهلاتك كتير عالية لتخليكي تتوظفي بأي شركة بدك اياها .. لانو بتملكي عدة لغات
هايدي : بصراحة ظروف خلتني ما اتوظف .. وهلأ صرت بحاجة شغل
الموظفة :امم ... طيب هلا رح عبي البيانات عندي وارفعا للمدير ويشوفا
هايدي :ايمت بدك تردو على خبر
الموظفة :فورا .. لانو المدير اليوم بالاوتيل
هايدي :وشو ممكن اتوظف هون
الموظفة :طبعا بالرسبشن لانو نحنا طالبين موظفة رسبشن وانتي بتمتلكي جميع المواصفات وبالاضافة لجمالك .. بس بتعرفي شو لو سمينة شوي بتطلعي بتجنني لانو وجهك مدور وماحلوة وانتي ضعيفة
هايدي ماعلقت ابدا على حديث الموظفة واكتفت بالشرود
الموظفة :اسمك الكامل وعمرك
هايدي :هايدي جمال الجمال .. العمر ٢٥
الموظفة عم تضرب باصابيعها على الكيبورد وتتطلع ع الشاشة .. وقفو اصابيع عن الكتابة ورفعتن عن الكبيبورد بصدمة
هايدي : في مشكلة
الموظفة اتطلعت بهايدي ورجعت اتطلعت بالشاشة
هايدي :لو سمحتي عم حكيكي
الموظفة سحبت السيفي وسكرتو ورجعتو لهايدي
هايدي :مشي الحال
الموظفة :للأسف .. لأ
هايدي :ليش
الموظفة :لقينا موظفة .. للأسف راحت عليكي
وقفت هايدي وقالت : شكرا .. وطلعت
ماشية اتجاه البوبة وحابسة دموعها بالزور ومن داخلها عم تحكي : كلن نفس الحكي ... كلللن .. بعد مابيكتبو اسمي ع الشاشة اللعينة بيصفنو وبقولولي نحنا بنعتذر .. مين يلي حاطط حطاي .. ولسه عم تفكري يا هايدي اكيد واحد من هدوك المغرورين .. بس شو لسه بدكن مني شووو .. بكفي يلي عملتوه معي بكفي ... زيلتوني دمرتوني شردتوني .. انا اليوم نايمة بالشارع لا محال ياربي تعبت .. شو اعمل
طلعت ع الرصيف وصارت تمشي .. وقفت جنبا تاكسي
:تاكسي يا مدام
هايدي : مشان الله حل عني ليش انا معي امشي خطوة بدي اركب بتاكسي
:شوقلتي يا مدام
هايدي :لا لا شكرا
تركها عم تمشي وراح .. وصلتها رسالة ع تلفونها .. طلعت تلفونها الصغير ابو الازرار يلي الو كشاف من راسو .. فتحتو وقرأت الرسالة : كيفك هايدي ليكي انا وعلوشي بالحديقة اذا بدك تجي تشوفيه .. لا تطولي
بان الفرح بعيونا من اثر هالرسالة .. كتبت يلا جاي
وكبست ع الارسال بس عطاها فشل ارسال الرسالة بسبب عدم توافر رصيد كافي
هرولت بمشتها لتلحق تروح ع الحديقة ..
____________________
بمكان تاني بأحدى الشركات السياحية بالبلد
قاعد دانيال على كرسيه الدوار ورا طاولتو ومادد رجليه على الطاولة .. انفتح الباب ودخلت صبية طويلة حلوة
دانيال بسخرية: اهلين.. اهلين بمرت ابن عمي
روز : دانيال بلا غلاظتك
دانيال : له له هلأ انا عم اتمسخر
روز : لكن شو بتسميه هاد
دانيال : شوبدك ليش جاي لعندي
روز : في مشكلة وبدي تساعدني فيها
دانيال وهو عم يعاملها بأستخفاف : بخصوص شو
روز : لو سمحت نزل رجليك وحكيني باحترام
دانيال : (نزل رجليه وركز قعدتو ) وهي نزلت رجلي ..شبك
روز : انا بورطة
دانيال : شو هية
روز : اليوم كنت عند الدكتورة النسائية
دانيال :اييي
روز : قالتلي انو انا عقيم ومستحيل احمل وجيب ولد
دانيال :ايي .. وليش جاي لعندي .. شو شايفتيني قالبها دكتور نسائي
روز : لا مو هيك .. بس اذا بيخبر يعرب بطلقني والله
دانيال :واذا خبر انك عندي كمان رح يطلقك مشان هيك قومي فرقيني بريحة طيبة لانو انا مابقدر ساعدك بشي
روز : بترجاك دانيال مالي غيرك
دانيال: لك بشو بدي ساعدك .. بشووو ... وكمان اطمني يعرب مارح يطلقك .. صح هو حقير ولئيم بس مابيعملا
روز :بس بيتزوج علي
دانيال : اي عادي يتزوج حقو
روز :دانيال بترجاك ساعدني متل ما ساعدتني اتزوجو
... انا والله بحبو ليعرب ومابقدر اتخيل حياتي بدونو او ممكن وحدة غيري تشاركني فيه
دانيال :اولا انا ما ساعدت حدا .. وتانيا كل يلي صار انا كنت عم انتقم وانتي استغليتي الفرصة لصالحك
روز :يعني شوو
دانيال :ايم سووري
روز : بس انت لازم تساعدني
دانيال :ماني متطر
روز :لأ متطر .. ورح خبرو شو عملت مع هايدي
دانيال :اي عادي خبريه اصلا انا ويعرب من يوم يومنا مابنطيق بعض وهيك تصرف رح يلاقيه عادي مني .. وكمان مارح يستغرب لانو هايدي بالاصل كانت حبيبتي .. بس انتي فكرتي بالنتائج .. اول مايعرف رح يروح ويجيبها وينزلها عليكي ضرة
روز بخوف :بيعملا ؟
دانيال :ههههه هو يلي بيعملا .
روز :مشان الله عطيني شي طريقة هلأ .. راسي كتير مشوش وماعم يطلع براسي شي فكرة
دانيال : روحي عبيتك شربي فنجان قهوة مع سيجارة وتركي كيدك يعطيكي طريقة
روز :مافي وقت لشغل كيدي هلأ .. يعرب بيعرف انو رايحة ع الدكتورة وكل شوي عم يتصل
دانيال :قوليلو عملت تحاليل وبدها وقت لتطلع
روز : وهو هيك .. بس انت اذا لقيت شي خطة خبرني
دانيال : مااشي هففف
لفت ضهرا وطلعت وهو حكي : تضربي منك الو ..
_____________________
هايدي عم تركض شوي وتمشي شوي .. وتحافظ على هدوئها بين العامة يلي ماشية على الطريق ... وهية عم تمشي بخطوات سريعة وصلتا رسالة .. وقفت وفتحتها .. ومكتوب فيها : هايدي شو وينك جاي ولا لأ ردي علي خبر .. لانو اتأخرت وامي عم تبعتلي
هايدي :ياربي كيف بدي رد عليها هي .. سكرت التلفون ورجعت تمشي
______________________
بمدرية العامة للسياحة .. وبمكتب المدير العام تحديدا
قاعد ورا المكتب شب تلاتيني .. شب طويل اسمراني ومبين عليه الحزم طبعا لانو مدير عام وفي لوحة صغير على مقدمة الطاولة مكتوب عليها المدير العام يعرب الشعار .. رفع تلفونو وطلب رقم مرتو .. بس ماردت
يعرب : شو صاير معا هي .. اوووف .. بس يلا رح اتفضالا منيح بس بالاول لحتى امن ع الوزارة
اندق الباب
يعرب : ادخل
دخلت صبية حلوة متل العارضات وهية السكرتيرة .. طبعا هيك بنات حلوين بنقوهن تنقاية ..
جوى: استاذ في شوية وراق بدك توقع عليهن
يعرب :هاتيهن ..
قربت وبلشت تعطيه الوراق .. ورقة ورقة
جوى:: استاذ اجانا فاكس من روسيا وفي مندوبين جايين يعملو استطلاع ع المناطق السياحية عنا بالبلد ..
يعرب :يعني ؟؟
جوا :استاذ بأعتبار حاليا مافي وزير .. الوزارة بعتت طلب انو انت تتكفل هالمهمة وتقوم بأستقبالن
يعرب : قريبا رح يتعين وزير ويحل كل هالمشاكل يلي محدا عم يعرف يحالها
جوى : وانا كلي ثقة انك رح تكون قد هالمنصب
يعرب :شكرا يا جوى
خلصت الوراق واخدتن .. وقالت :بدك شي هلأ استاذ يعرب
يعرب : لا مابدي شي .. بس خبريني شو الاخبار
جوى : اااه صح كنت رح انسى خبرك
يعرب : شو
جوى: المترجم الخاص بحضرتك اخد اجازة طويلة الامد
يعرب : اجازة شوو .. وبعدين هلأ وقت اجازاتو ؟؟
جوى : للأسف طلع معو هداك المرض وهلأ دخل المشفى ليتعالج
يعرب (بأسف ): ييي .. الله يشفيه ..
جوى :آميين
يعرب :لكن علاجو كلو رح يكون عحسابنا
جوى :عحساب المديرية ولا من حساب شركتك
يعرب :لا عحساب شركتي يعني حسابي الخاص
جوى : بتأمر استاذ
يعرب : ونزلتو اعلان عن مترجم ؟
جوى :مبلى نزلنا وعم يجو موظفين كتير .. واخر الشي بختار انا الكفؤ وببعتن لعندك مشان تختار انت
يعرب :منيح
جوى :بس للأسف يلي عم يجو مكسيمون معن لغتين غير العريبة
يعرب : شو هنن اللغات
جوى :انكليزي وفرنسي .. انكليزي وروسي .. انكليزي وتركي .. انكليزي وصيني .. طبعا الانكليزي عند الكل لانو لغة متداولة بين البلدان
يعرب سكت شوي وهو عم يفكر ..
جوى :انا رح ابحث عن شخص بيملك ٣ لغات ع الاقل غير العربية .. منيح هيك
يعرب :خلص لاتدوري انا عندي مترجم
جوى : عم تحكي جد استاذ ..طيب وين هو خلينا نراسلو ؟؟
يعرب : انتي بس خبري ريان وقوليلو يجيب هايدي ع الشركة عايزها
جوى :هايدي ماغيرها .. يلي كانت خطيبتك
يعرب :اي هية.. روحي بلا كتر اسئلة
جوى:حاضر
_______________________
هايدي بعدها عم تركض بالطريق لتوصل ع الحديقة
هايدي وهية عم تلهت ياربي ليش بعيدة كل هالقد
وصلها مسج ع الموبايل .. استندت ع الحيط وحطت ايدها على صدرا لتهدي انفاسها المتسارعة ... اخدت الموبايل وفتحتو وقرأت الرسالة : هايدي انا رجعت ع البيت .. لاتعذبي حالك نطرتك كتير ومعد فيني اتأخر اكتر من هيك.. شكلك ماعم تشوفي الرسائل عكل حال لما تشوفيهن ردي علي خبر وبنحدد موعد تاني .. سلام
هايدي :صارت تبكي وتقول والله شفتن .. والله شفتن وكنت جااي .. ليش هيك حظي ليييش
نزلت وقعدت ع الرصيف وصارت تبكي وتتنشوء .. وتمسح دموعا بكم بلوزتها متل الولاد الصغار .. طبعا لانو مامعها محارم تمسح فيهن
__________________________
بعد الضهر
بشركة سياحية صاحبها يعرب ..
واقف بمكتبو على الشباك وشارد قدامو ومعو فنجان قهوتو عم يشرب منو ..
دخلت جوى لعندو بعد مادقت الباب
طبعا جوى سكرتيرتو الخاصة وموجودة معو بكل اشغالو .. لانو هية الوحيدة يلي بتفهم عليه ومنظمتلو وقتو
جوى :استاذ يعرب فاضي
بعدو سارح قدامو قال: فاضي شوفي عندك
جوى :بخصوص ريان
يعرب :اجو
جوى :لا.. بس يلي فهمتو من ريان انو هايدي من زمان مانها بالفيلا
التفت عليها وقال :كيييف
جوى :هيك قلي
يعرب :وسليم كمان مانو بالفيلا
جوى :مين سليم ؟؟
يعرب :شو قلك ريان بالظبط
جوى :قال جاي ورح يشرحلك كلشي
يعرب :اتصلي فيه واستعجليه بسرعة
جوى :حاضر .. حاضر
لفت ضهرا وطلعت بسرعة
حط اديه بجيابو وسرح قدامو وصار يتذكر
###فلااااااش_باااااااك#####
ماشي يعرب بكريدور مشفى .. والشرار عم يتطاير من عيونو .. وكلشي عم يطلع قدامو يضربو ليبعدو عن طريقو ..وصل للغرفة المقصودة .. فتح الباب بدون استئذان .. وماحملو عقلو من المنظر يلي شافو .. شافها ساندة ضهرها ع الحيط ومعها واحد لابس مريول ابيض والظاهر انو دكتور محاوطها بأديها ايد ع الحيط والايد التانية كانت عند رقبتها ... لما فتح الباب دفشتو عنها بسرعة ...
هايدي :يعرب ... يعرب .. هو .. هااد .. هاااد .. كاان
يعرب (بغضب وبصوت مزلزل ): عم تخونيني ياكلبة
هايدي دموعها نزلو بسرعة وقالت :والله لا .. والله لاء .. يعرب سمعني
معد شاف شي قدامو وكأنو في غباشة .. من الغضب يلي سيطر عليه .. قرب من الدكتور وصار يضربو بكل قوتو لحتى الدكتور انهار بين اديه واغمى عليه .. وهايدي واقفة بالزاوية عم ترجف من الخوف واديها ع تهما وعم تبكي وكأنها تبلكمت ..
لما انهار بين اديه رماه ع الارض وفتل لعند هايدي يلي هبط قلبها من نظرتو الها .. قرب منها مسكها من شعرها بطريقة الخطف .. وصار يجرها وراه وكأنها شي دابة طلعو من باب الغرفة وكان شب طول بعرض وشكلو بادي جارد حكاه يعرب وقال :نضفلي جوا منيح
سليم :حاضر يعرب بيك
رجع كمل مشي وهو جاررها وهية عم تصرخ وتبكي وتقول يعرب بترجاك سمعني .. والله يلي شفتو غلط ... يعرررب .. يعرررب .. تركني عم توجعني
طبعا صارو فرجة لكل المشفى بس محدا قرب او تجرأ وقرب منهن .
#####بااااااااااااك#####
فاق من شرودو ع رنة تلفون المكتب .. حملو وقال :شو
جوى :يعرب بيك ريان ع الطريق
يعرب :خليه روح ع البيت
ورجع السماعة عمكانها بهدوء غاضب
__________________________
(لمحة عن شركات السياحة والعلاقة بين يعرب ودانيال .. يعرب ودانيال ولاد عم وابائهم هنن يلي اسسو هالشركة وورثوها لولادن .. يلي فصلو هالشراكة من وقت ما بعيد .. هالشركات شغلها هية السياحة بشكل اساسي داخل وخارج البلاد .. وكمان متعاقدين مع شركات سياحية باغلب البلدان العربية والغربية ... يعني بيستقبلو وبيرسلو سياح .. وبالاضافة انو شركتهن من الشركات المشهورة .. لجودتها وجودة التعامل مع السياح وبالاضافة لمرافقة من الحرس للسياح لحمايتهم.. وباسعارهن المدروسة .. طبعا الشركتين نفس الميزات والناس مابتعرف انن منفصلين مفكرين انن شركة وحدة وكل شركة فرع تابع للتانية .. ومع تكبير شغلن صارو يبنو ويشترو الاوتيلات يلي بالبلد .. وبالاضافة لبناء قريات سياحية كمان داخل البلد .. يعرب حب يكبر شغلو ويكبر اسمو كمان .. ودخل بالدولة طبعا هو دارس ومعو شهادة ماجستير .. وعن طريق تعبو وجهودو المالية طبعا واسمو يلي معروف .. قدر يحصل على منصب مدير عام لدائرة تابعة للسياحة والاثار وهلأ عم يسعى للوزارة .. اما دانيال بقي عم يشتغل خفيف نضيف ومابدو يدخل مع الدولة ووجعة الراس .
_______________________
بشركة دانيال
بمكتبو في طاولة بلياردو بزاوية المكتب ..
ماسك دانيال العصا ومنحني على الطاولة وعم ينيشن على طابة .. رجعها شوي لورا وضربها .. لحتى ضربت بالطابات وطشو على الطاولة بطريقة عشوائية ..... انفتح الباب وفاتت مرى خمسينية مبينة من الطبقة المخملية .. وحاطة جاكيت على كتافها بدون ما تلبسو ورافعة راسها لفوق .. قربت وقعدت على الكرسي يلي قدام الطاولة ولفت رجل ع رجل بغرور وحكت :انت هون عم تلعب بلياردو ويعرب بعد كم يوم رح يصير وزير
رما العصا ع الطاولة وراح قعد مقبالها وقال : اهلين امي
امو : لا اهلين ولا سهيلن ..
دانيال :امي شوبدك هلأ .. روح اخد الوزارة من يعرب لترتاحي
امو : هه ليش بتقدر
دانيال :مزال بتعرفيني مابقدر .. ليش قالبة خلقتك فيني وعم تبهدلي فيني
امو :بدي اياك تكون متلو .. بتعرف شو يعني يعرب يصير وزير .. يعني سيط وشهرة والكل بيحسب حسابو
دانيال :وانا هدول مابدي اياهن
امو :حرام شوف حالي فيك يعني
دانيال :ليش هيك مانك شايفة حالك فيني
امو :بتفرق كتير لو ابني وزير .. ولا قلك مابدي وزير مدير عام قبلانة
دانيال : امي العلقة مع الدولة مو علقة .. مفكرة يعرب عم يتشاطر ... بكرا حدا بينقهر منو بيكتب فيه تقرير .. بشلحوه الوزارة .. والاموال الخاصة والعامة وبيرجع ع الحديدة تحت مسمى من اين لك هذا .. خلصنا امي خلصنا .. اذا هو جحش ماني متطر كون جحش متلو .. وبعدين انشالله مفكرة حصل ع الوزراة بتعبو وشهاداتو .. دفع كتير وكتير كتير لحتى وصل حالو لهون
امو :يعرب اكيد بكون حاسبها صح .. واكيد بدو يطعمي التسعة لياكل العشرة
دانيال :انا لابدي طعمي ولا بدي اكل .. هيك عم اشتغل لحالي احلالي
امو :دخيلك انت
وقفت بغرور وركزت الجاكيت يلي عكتافها ومشت وقالت : الحديث معك مابجيب نتيجة ابدا .. سلام
دانيال :سلااام ههههه
_____________________
بحارة شعبية .. ببيت عربي .. بالطابق التاني
انفتح باب غرفة ودخلو نسوان تنتين اعمارن بين وحدة خمسين والتانية حوالي ٧٠.. والمرى الكبيرة ام ٧٠ عم تنقل نظرها بالمكان وتتفحصو
حكت الاولة: شو ان شاءالله عجبتك الغرفة
التانية :وين منتفعاتا هي الغرفة
الاولة : جواتها .. هداك الباب في وراه مطبخ صغير وحمام
قربت وفتحت الباب وكان مطبخ صغير متر بمترين .. في مجلى صغير ورفين وغاز سفير وباب تاني بطل ع الحمام
: كأنو هالغرفة مسكونة
: اي مسكونة بس اليوم بدها تطلع .. الله لايوفقا علت قلبي وماعم تعرف تدفعلي هالاجار .. صرلي مقعدتا عندي ٣ اشهر ببلاش بس وبعدين .. معد اتحمل .. كمان انا مرى كبيرة وبدي مصروف
: مين ساكنها هي الغرفة
: صبية باول التلاتين يمكن .. والله مابعرف شو قصتها يمكن هربانة من اهلها .. شفقت عليها وقعدتا .. وكل يوم بتقلي رايحة دور ع شغل وبتجي عم تخفق بأديها .. لك حتى حق اكل مامعها تاكل اذا ما جبتلا انا شي سكبة بتضل جمعة بلا اكل ..
: طيب ماحرام تطالعيها .. وين بدا تروح
: تدبر حالها .. شو فاتحتلا سبيل انا .. هي استحملتا تلت اشهر .. بس والله يا اختي معد اقدر .. اي صحي ماتعرفنا شو اسمك اختي
:ناديلي الحجة امون
: وانا بناودلي ام العبد
امون :تشرفت فيكي
ام العبد :الله يزيدك شرف .. شو اعتمدتي ؟
امون :الغرفة عجبتني ورح استأجرها
ام العبد : اي والله بتنوري .. بس بدك تعذريني بدي تدفعي سلف لانو معد امن بسبب هالمغضوبة هايدي
امون :اسمها هايدي
ام العبد :اي
امون :لا تاكلي هي ..
فتحت جزدانا وطلعت مبلغ وقالت :وهي لستة اشهر
ام العبد خطفت المصاري من ايدها وقالت : اهلا وسهلا .. اهلا وسهلا ..
امون :بس انا بدي اسكن فورا
ام العبد :تكرمي .. تكرمي .. خلال ساعة زمان بتلاقي الغرفة جاهزة وغراض هي المغضوبة بكونو براتها
امون :طيب ممكن فنجان قهوة لبين ماتخلصيها
ام العبد :اكيد .. اكيد تفضلي لننزل لتحت جنب الزريعة بتشربي اطيب فنجان قهوة
نزلت ام العبد قدامها وامون نزلت ع الدرج ببطئ .. كانت عم تتأمل كل زاوية بهاد البيت ..
هالمخلوقة شكلها غريب .. هادية كتير .. لابسة تيابة سودة .. متحجبة بحجاب اسود كمان .. وصلت ع ارض الدار .. كانت ام العبد مجهزة القهوة وطالعة فيها
ام العبد :والله نورت هالدار
امون :منورة بأهلها ..
ام العبد :حجة .. بلا صغرة بس انتي ماعندك غراض ؟
امون :مبلى .. هلأ بجبلي اياهن واحد من ولادي
ضيفتها القهوة وقالت : مشالله عندك ولاد .. ليش مابتقعدي معن ؟؟
رشفت من القهوة وماردت ع السؤال
ام العبد بأحراج :انا طالعة نضف الغرفة
_____________________
بفيلا كبيرة اشبه بالقصر ومحاوطة بالحرس من كل الجوانب ..
وداخل هالفيلا رايحة جاي روز وعم تاكل اضافيرها بتوتر ..
روز :ياربي شوبدي قلوو .. لك هو كل الولاد ماكان سأل عنن .. كل الحق علي .. ضليت نق فوق راسو لحتى وافق .. ولما وافق طلعت انا مابجيب ولاد .. اخدت تلفونها من على الطاولة وفتحتو .. ورجعتو ع مكانو
روز:منيح معد اتصل .. بس شوو بدي قلوو .. شوو
دخلت عليها خادمة ومعها عصير ليمون
الخادمة :دخيلك يا ست روز خدي هالليمون وهدي حالك
روز :كيف بدي هدي حالي ياخديجة كييف .. وانا واقعة بمصيبة
خديجة :مصيبة شوو .. خبريني لساعدك
اخدت كاسة العصير وقعدت : الدكتورة اليوم خبرتني انو مستحيل كون ام .. مستحيل .. يعني انا عقيم ياخديجة عقيم
شهقت خديجة وحطت ايدا عتما وقالت :والله زعلتني عليكي .. خلص لاتنقهري وتزعلي حالك خليها ع الله
روز :مو هوون المشكلة .. المشكلة شوبدي قلو ليعرب
خديجة :ليش مانك ناوية تخبيره
روز :لأ طبعا .. بدك اياه يطلقني او يجبلي ضرة .. من عيدا شي هو عايش معي بالزور
خديجة : والله مشكلتك عويصة
روز : بترجاكي ياخديجة لاقيلي حل
خديجة : الحل موجود
روز :شو هو دخيلك
خديجة : حطي المشكلة فيه
سكتت روز مع صفنة
وكأنو عم تفكر بالموضوع
________________________
انفتحت بوابة فيلا يعرب ويدخلو ٣ سيارات سود غطس مع فيميه .. وقفوا قدام البوابة الداخلية ونزل الشوفير يلي بالسيارة التاني يعني يلي بالنص .. وقرب من الباب الخلفي وانحنى وفتحو .. نزل من السيارة يعرب بكل غرور .. ودخل ع الفيلا
كانت سفرة الغدا يلي حاملة جميع الاصناف ناطرتو وبأستقبالو روز بكل اناقتها مع ابتسامة على وجها
شلح جاكيتو وقربت بسرعة اخدتو منو
روز :يعطيك العافية ياروحي
يعرب :تغدي انتي ماني جوعان . وراح قعد ع الكنبة
لحقتو روز وقعدت ع الكنبة يلي جنبو والجاكيت بعدو بحضنا وقالت :شبك حبيبي .. ليش معصب
يعرب :مافي شي
روز :بس مايكون لانو مارديت عليك .. بصراحة هو..
يعرب :اناا ماسألتك شي .. خرسي وقومي من وجهي
روز :حاضر .. حاضر لاتعصب
وقفت لتمشي .. بس رجع وقفها وقال : هايدي وسليم وينن
تجمدت مكانها وماعرفت شو ترد
يعرب :شبك انخرستي
روز : مابعرف .. بس سليم صرلي فترة ماشفتو قول هايدي بالاصل محدا كان يشوفا.. اكيد تركو الفيلا
يعرب : ومين يلي سمحلن يتركو الفيلا .. اكيد حدا عطاهن موافقة
روز :ما انا والله ..
هز براسو وقال :مافي غيرو ريان
روز :مظبوط شفت ريان مع سليم قبل ما يختفى .. بس انافكرت انت يلي امرتو
يعرب :لك كيف هيك ماحسيت .. قريب السنة وهنن برات الفيلا وانا مامعي خبر .. كيف صار هيك
روز رجعت قعدت مكانا وقالت :اي يروحو شوبدك فيهن
يعرب :شو شوبدي فيهن .. ليش انا خلصت منن ليروحو هيك لا احم ولا دستور
روز :شو لسه بدك منن .. خلص راحو .. وانت حلك تنسى
يعرب :الخيانة مستحيل اغفرا
روز :بس يلي عملتو فيها عقاب كبير ..
يعرب : انا لسه ماعاقبت حدا .. كنت مأجلها بس لخلص من اشغالي
روز :يعني والله مابدا كل هالقد .. بالنهاية هية كانت خطيبتك .. يعني لو مرتك نص مصيبة
ضحكة ضحكة جانبية وقال:مين قلك انها ماكانت مرتي
روز بتلبك وصدمة: شو ..شوو .. شووو
يعرب :بتعجبني الثقة يلي عم تعيشيها
روز :لا ماكانت مرتك .. انت عم تحكي هيك مشان تقهرني ماهيك ..
يعرب : وليش لحتى اقهرك بلا سبب عم احكيلك الحقيقة
روز :اي اي فهمت عليك .. قصدك ع عقد القران انت صح كنت كاتب كتابك عليها .. هيك قصدك بمرتك ..ماهيك ؟
يعرب :لك انتي ماعم تستوعبي عم قلك مرتي .. مرتي نظامي
روز (دمعو عيونا وقالت ): نمت معها ؟
يعرب : ههههههه
روز :يعرب لاتضحك .. لاتضحك وتلعب بأعصابي
هجمت عليه ومسكتو من تيابو وصارت تصرخ وتقول :يعرب لاااتضحك .. لاتضحك يعرررب
مسكلا اديها ورمها ع الكنبة عم تبكي وقال :اذا اجا ريان بتخبريني فورا .. تركها وطلع ع غرفتو
فتح الباب واول ما اجت عينو على التخت اجت ذكرى على راسو
####فلاااااااش_باااااك#####
دخل يعرب من باب الفيلا ومعو شنتة سفروالظاهرجاي من سفرة.. وطلعت خادمة بوجهو وقالت :اهلين يعرب بيك الحمد لله عسلامتك
يعرب : الله يسلمك ياعيشة
عيشة :بتحب حضرلك الغدا
يعرب :لا لا .. هايدي عم تجي لهون شي
عيشة :اي كل يوم بتجي شوي وبتروح عم تظبط عم شغلة بالبيت
يعرب :اليوم اجت شي
عيشة : لا لسه
يعرب :طيب روحي عشغلك
عيشة :ماشي
دخل وقعدع الكنبة وحمل موبايلو واتصل فيها
ردت بدون مايحكي :يعررب .. حبيبي انت بالبلد
يعرب :ههههه اي بالبلد .. هي وصلتي
هايدي : وليش ماخبرتني اطلع لاقيلك بالمطار
يعرب :ياروحي انا سفراتي كتار .. معقول كل مابدي سافر يومين عزبك تنطريني بالمطار
هايدي :احب على قلبي .. لانو بتمنى شوفك اول وحدة
يعرب : المهم هلأ انا مشتقلك كتير حملي حالك وتعي لعندي مشتقلك كتييير
هايدي : بعتلي شوفير بكون جهزت حالي
يعرب :عدي للعشرة الشوفير بكون عندك
هايدي : لكن سكر هلأ هههه
يعرب :ناطرك هههه
....................
دخلت هايدي من باب الفيلا والفرحة على وجها .. طلعت بوجها عيشة
هايدي :مرحبا عيووش
عيشة :هلا بالحلو
هايدي :وينو مدرينا المحترم
عيشة : طلع عغرفتو يعمل شاور
هايدي :اممم .. لكن رح انطرو هون ليخلص
عيشة :بس قال تطلعي لعندو فورا
هايدي : ... خلص رح انطرو هون .. بتعرفي انتي ماحلوة اطلع وهو عم يتحمم
ابتسمت عيشة وقالت :متل مابدك .. خبرتك يلي قلي اياه وعملت يلي علي .. بالاذن
ومشت اتجاه المطبخ
اجا صوت يعرب من الطابق التاني: هايدييي تعيي
غمضت عيونا بخوف بسيط وابتسامة على وجها
وطلعت لعندو .. دقت ع الباب دقتين خفاف
يعرب: فوتي
فتحت الباب وفاتت .. كان ببرنس الحمام
هايدي :رح انطرك برا لتخلص لبس( لفت لتمشي .. بس ايدو مسكتا من دراعا وجابها على حضنو .. وضمها بقوة كبيرة وشغف .. ماقدرت تقاومو لانو هية كمان مشتاقتلو
ضامم راسها على صدرو وعم يلمسلا شعرا وقال :اشتقلللللك
هايدي :وانا كمان اشتقلللك كتير
بعدت عنو وقالت يلا لبيس تيابك وانا ناطرتك برا
كان صافن بعيونا والابتسامة ع وجهو ..
هايدي :شو .. فيني شي . وصارت تلمس ع وجها
يعرب :فيكي كلشي
مسكها من كتافا وسحبا لعندو ....
بعدت عنو وقالت بترجي :يعرب خلص بلاها
يعرب :ههههههه ماحزرتي
هايدي :والله مابصير هيك كل مرة بتضحك علي بكلمتين وبتعمل يلي بدك اياه
يعرب :شبك يابنت انتي مرتي
هايدي :بس مو قدام العالم
يعرب :اخر همي العالم
هايدي :طيب لسه شهرين وبنتزوج قدام الكل ... صبور شوي
يعرب : خلصتي
هايدي :قبل ما اجي لعندك كنت عم احكي مع ماما
يعرب :اها .. وكيفا
هايدي :منيحة .. بس كانت عم تنبهني انو ماضل مخفقة رايحة جاي لعندك .. لانو مابصير وعيب وقد ماكان نحنا مخطوبين مو متزوجين
يعرب: ما قلتيلي كيفا وكيفو عمي وابن عمي
هايدي :يعرررب
صار يضحك .. ومشي لعند الباب وحط ايدو ع المفتاح وفتلو لينقفل الباب
هايدي : طيب هلأ بتأخر ع السكن ومابفوتني
يعرب : بتنامي هون
هايدي :صايرين عم يحطولي انزارات
يعرب :يضربو هنن وهالسكن معن .. منيح هيك
هايدي :يعني مافي مهرب
ابتسم وهز براسو انو لأ
حطت اديها على خصرا وقالت : بعدين تعا لهون انت جبتلي شي هدية معك
يعرب :جبتلك انا مامنيح
ضربت برجلا بالارض وقالت اوووف .. ياربي منك
مشي لعندا ومسكها من ايدا وسحبا ع التخت وهية مشت وراه مستسلمة
#######باااااااااك#####
فاق من شرودو ع دقة الباب .. كان بعدو واقف مكانو التفت وفتح الباب
روز ببرود :ريان تحت عم ينتظرك
مارد عليها وطلع ليقابل اخوه
وصل لعندو وريان قام ووقفلو
يعرب اتطلع فيه نظرة طويلة مليان غضب ولوم وعتب
ريان :اخي سمعني
يعرب :سؤال ورد غطاه سليم وهايدي وينن
ريان سكت
يعرب :وينننن
ريان :الجواب مانو كلمة او كلمتين .. خلينا نقعد ونحكي
قرب يعرب وقعد بقهر وقال :كييف بتتصرف هيك كييف .. لك كل هالاشهر وانت عم تضحك علي وتخدعني
ريان : اخي ما خدعتك
يعرب :لكن شوو بتسميه هاد .. شووو ... قلتلك يا ريان بتخلي عينك عليهن وكل يوم بدي تقرير مفصل عن حياتن وانت قلتلي عندي .. ولأء والانكى من هيك كل يوم عم يجبلي اخبارن .. من وين عم تخترع هالاخبار ... ولا شفت انشغالي بالوزارة وانت مشيت المي من تحت رجلي .. انت بتعرف لو انا متفضي كنت كشفت كذبتك من زمان
ريان :.......
يعرب :يا امة الله رجع يسكت .. لك احكيي .. مانك جاي لتحكي ... احكييي
ريان : كيف بدي احكي وانت هيك معصب ... بدك تروق لتفهم علي اكتر
يعرب :حدا قلك انو لما بكون معصب ببطل افهم
ريان :موو هيك والله .. بس اهدى خليني اعرف من وين بدي بلش
يعرب : وهي هديت انقبر احكي
ريان : رح احكي .. بس قلي من وين بدي بلش
يعرب :ليش هربتن
ريان :والله مشانك .. لانو انت عم تعاقب حالك ما عم تعاقب هايدي
يعرب :مادخلك انت بهاد الموضوع .. جاوب عقد السؤال
ريان :هي وحدة خاينة .. خاينة .. وما مستاهلة توسخ اديك فيها ... الخيانة عم تمشي بدمها ... قبل ماتخونك خانت دانيال ورجعت خانتك .. وبعد ماخانتك رجعت خانتك مرة تانية
يعرب بعدم تصديق : كييف .. كيف ..
ريان :اي اخي.. هية حية ..عقربة .. من برا حلوة ومن جوا كلها سم ...
يعرب :كيف عرفت بموضوع دانيال انت ؟
ريان : دانيال خبرني اول ما اعلنت خطوبتك عليها ..
يعرب :المهم هلأ بدي سبب مقنع ليش هربتن
ريان :القصة هية انو ...........
____________________________
وصلت هايدي ع البيت .. وهية متوقعة التقليعة ..
اول مادخلت من الباب اجت عينا على شناتيها .. تقدمت بخطوات بطيئة لتاخد غراضها .. اول ماوصلت لعندن طلعت بوجها ام العبد
ام العبد : واخيرا شرفتي .. لو متأخرة شوي كنت رح ارميلك اياهن برات البيت ع الشارع
هايدي :يكتر خيرك
ام العبد : اكيد ماشغلوكي
هايدي ماردت عليها .. انحنت لعند الشناتي حملتن واجت لتطلع
مشت خطوتين ورجليها خانوها وراسها فتل عليها .. استندت على الشناتي ونزلت ع الارض
ام العبد: حاج تمثيل .. وقومي انقلعي
هايدي :مشان الله بس خليني ارتاح شوي
ام العبد :شقد شوي
هايدي : شوي .. والله بس شوي
ام العبد :طيب بس شوي ..
هايدي (تبكي ): وين بدي روح انا هلأ
ام العبد :مامشكلتي
هايدي :خليني نام هون بترجاكي .. هون بأرض الدار
ام العبد :لاء .. يعني لاء
هايدي :خلص بوعدك اخر ليلة والله
ام العبد :لسه كل يوم بتقلي بس هالليلة .. حاج تضحكي علي
هايدي : لك والله مالي محل روح عليه
ام العبد :مامشكلتي
هايدي :اعتبريني بنتك .. والله انتي حنونة
ام العبد :مابدي بنت تكون متلك .. وكمان قلبي قسيتو
هايدي :الدنيا صارت ليل .. وين بدي نام ..
ام العبد :بالشارع
هايدي :الشارع مابيرحمني .. وانا بنت وحدانية
ام العبد :روحي لعند اهلك .. ماعندك اهل .. ماعندك قراييبن روحي لعندن وحلي عني .. بكفي تحملتك كتير
هايدي :اهلي اذا بشوفوني رح يدبحوني
ام العبد :يعني ع الزمة يلي متلك الموت ما احسنلو
هايدي : اي احسنلو .. بس مابقدر موت ..
ام العبد :هههههه بتقدري واذا بدك انا بساعدك
هايدي :لاحول ولاقوة الابلله .. خلص والله رايحة.. بس خليني ارتاح شوي .. لانو رجلي معد حملوني
ام العبد :مااشي .. انا فايتي كمل الطبخة .. بتكوني انقبرتي رحتي
هايدي :يكتر خيرك
لفت ضهرا ومشت .. وهايدي طبت على رجليها وصارت تبكي بحرقة
(شو صعب انو مايكون الك حدا .. شو صعب تكون جوعان وماتلاقي اكل .. شو صعب تتمنى الموت وماتقدر تموت ... شو صعب انك تشتهي البكي وماتلاقي حضن حنون يضمك )
: لسه الك جلادة تبكي
رفعت راسا وكانت الحجة امون
هايدي :مين انتي
امون :انا الي استأجرت مكانك
مسحت دموعا براحة كفها وقالت :اهلين .. انا قاعدة شوي ورايحة
امون :ماجاوبتيني عسؤالي ؟
هايدي :ايو سؤال ؟
امون :لسه الك جلادة تبكي
هايدي :مافهمت
امون :صار معك كتير شغلات وبتبكي الصخر .. يعني شغلة متل هي مابدها كل هالدموع
هايدي :مين انتي ؟
امون :ولا هي دموع مكبوتة ..
هايدي :مين انتي ؟؟
امون :بتعرفي انا لو محلك وصاحبة البيت قلعتني بلاقيها عادي .. ماحلك تتعودي ع الصدمات .. والخوازيق
هايدي :انتي بتعرفيني صح ؟
امون :ولابعمري شفتك
وقفت هايدي وقالت :حدا باعتك ماهيك
امون :هئ ابدا
هايدي :منين بتعرفي عني هالشغلات
امون :انا بقرأ الافكار والقلوب
هايدي :وشو قريتي
امون :قلب مكسور ... لا كلمة مكسور قليلة .. قلب محطم ..مدمر.. رماد
هايدي :وشو كمان
امون :ظلمتي وانظلمتي
هايدي :ماظلمت حدا .. هنن يلي ظلموني .. وشو بتعرفي كمان
امون :عرفت كتير بس ما اكتر من يلي بدك تحكيلي اياه
هايدي :ماعندي شي احكيه
امون :مبلى .. انت بحاجة تحكي
هايدي : مابوثق بحدا
امون :حتى لو ماحكيتي انا بقرأ افكار
هايدي :وشو قريتي
امون :بيلي عم تفكري فيه
سكتت ومعد ردت
امون :هههه عم تحاولي توقفي التفكير مشان ما اعرف بشو عم تفكري
هايدي :ميين انتي .. وشوبدك مني
امون :بقولولي الحجة امون .. ومابدي شي .. بس وثقي فيني انا مابأذي حدا
هايدي : انا بدي روح
امون : وين بدك تروحي ومالك حدا
هايدي :بنام بالشارع .. معد فرقت عندي
امون : شو رأيك تشاركيني الغرفة
هايدي :لأ .. شكرا .. قلتلك مابوثق بحدا .. وكلامك كلو ما اقتنعت فيه
لفت ضهرا لتمشي .. امون قلك شي عم تفكري فيه جواتك لتقتنعي
هايدي :ماني متطرة
امون :صرلك يومين مشتهية الفراريج المشوية
هايدي :كل العالم بتحبون هدول وخصوصا ع الجوع
امون : رح تمشي ٣ خطوات وتوقعي ع الارض .. رجيلكي بيخزلوكي
هايدي بخوف اتطلعت ع رجليها .. وصارت تمشي ببطئ .. اول خطوة .. والتاني .. التالتة خارت قواها ع الاخير ووقعت ع الارض
اتطلعت ع امون بخوف وقالت :ميين انتي
امون :قلتلك الحجة امون
هايدي : انتي مابس بتقري افكار
امون :انا بحس
هايدي :شوبدك مني
امون :ساعدك
هايدي :بشو بدك تساعديني
امون :وقف جنبك .. مابدك حدا يوقف جنبك ويعطيكي نصائح
هايدي :.......
امون :كم يوم صرلك بلا اكل
هايدي : مابظن في داعي جاوب لانك اكيد بتعرفيه للجواب
امون :هههههههه قومي يابنتي قومي
مدتلا ايدا وهايدي حطت ايدها بأيد الحجة ووقفت
طلعت ام العبد من المطبخ قبل ماتحكي شي حكت امون : ام العبد هايدي رح تشاركني الغرفة
ام العبد :الغرفة غرفتك .. اهلا وسهلا فيكي
امون :تعي يابنتي تعي
طلعت هايدي معها وهية مصدومة وعم تتطلع عليها بقلق
امون :شبك ليش عم تطلعي فيني هيك
هايدي :كيف عرفتي اسمي
امون :ههههههههه لاتسألي هالسؤال مرة تانية
دخلو ع الغرفة وقعدو
هايدي قعدت بهدوء بدون ما تنطق بحرف .. اندق الباب عليهن
قامت هايدي وفتحت .. كانت ام العبد
ام العبد :عامل الديلفيري جاب هدول للحجة امون
امون من جوا :اي هاتيهن يا ام العبد .. دخلت ام العبد ومعها كياس اكل
طلعت امون مصاري وعطتها لام العبد
امون :زكاتك هدول عطيهن للعامل
ام العبد :تكرمي
اخدتن ام العبد ونزلت
امون :هدول الك قومي كلي
هايدي :الي ؟؟
امون :اي الك ..
قامت هايدي بتردد فتحت الكياس وكان فروج مشوي كبير وحباشاتو ومعو تنكة ببسي
هايدي :وانتي ؟؟
امون :مابحبو .. وكمان اكلت قبل مااجي
هايدي :بس...
امون :كلي .. كلي لازمك غذا .. وكمان بعد ماتخلصي بدك تقعدي وتحكيلي قصتك
هايدي ماقدرت تقاوم الاكل وريحة الاكل وقعدت وصارت تاكل بشراهة وعنجد متل ماقالو الجوع كافر
اكلت كل الفروج وبعدها جهزو القهوة وقعدو يشربو .. الدنيا صارت ليل
خلصو شرب قهوة وكانو عم يتبادول اطراف الحديث عن القعدة بالغرفة وعن ام العبد وعن الجيران
هايدي :ام العبد والله قلبها طيب .. بس انا تقلت عليها
امون :اي عرفت انو قلبها طيب .. انا اول ماجيت وحسيت الغرفة مسكونة ..و قلتلا تطالعلك غراضك لبرا
هايدي :ليش خليتها تعمل هيك .. وبعدين رجعتيني
امون :انا مابعلم بالغيب .. بس لما بشوف الشخص بحكم عليه من عيونو ونظرتي بالانسان بعمرا ماخابت
قلت اذا شفتك وارتحتلك رح خليكي تجي تقعدي معي
اخدت امون فنجان وطبتو
هايدي :بدك تبصريلي ؟؟
امون :اي
نشف الفنجان واخدتو امون وصارت تقرأ فيه
امون : اااخ يا هايدي شو حواليكي سواد
هايدي :شي مفروغ منو
امون :في عيوان عم تراقبك
هايدي :بعرف .. واقفين بطريقي ماعم يخلوني اعرف عيش .. كل مابروح عمكان لحتى اتوظف بيرفضوني فورا بعد مايعرفو اسمي
امون :مين هنن
هايدي :واحد من تنين يا اما يعرب يا ابن عمو دانيال
امون :مين هدول
هايدي :سبب دماري .. ما انتي بدك تسمعي قصتي خلصي الفنجان لاحكيلك
امون : طيب ماشي .. وين صرنا
هايدي :عند العيون
اتطلعت ع الفنجان وقالت :اي صح.. بس هالعيون عيون وحدة ما واحد
هايدي :وحدة ؟؟
امون :هيك مبين معي
هايدي :مابعرف
امون :وحدة كبيرة شوي بالعمر
هايدي :ماعندي اعداء نسوان وكبار بالعمر
امون : يمكن مايكونو اعداء
هايدي : وشو كمان
امون : في حدا عم بدو يدور عليكي
هايدي : معقول يعرب .. مبين موصفاتو او اذا رجل او مرة
امون :شب .. وحواليه هالة
هايدي :شو يعني
امون :يعني انو شي مهم
هايدي :اكيد يعرب .. مامبين شوبدو
امون : غضبان كتير
هايدي : ياربي دخيلك .. وشو كمان
امون :رح تلاقي رزقتك بس لاتعلي كتير
٠هايدي : كيف يعني
امون :عم تدوري ع الشغل بالاماكن الغلط
هايدي :وين بدي دور لكن
امون :حاولي تشتغلي شغلة بسيطة .. مثلا محل البسة مطعم هيك شي
هايدي : بس انا بدي اشتغل بأختصاصي
امون :اختصاصك صعب .. لانو واقفين بطريقك
هايدي :طيب اذا دورت بمكان بسيط رح لاقي
امون :ان شاء الله
هايدي :وشو كمان
امون : بس هدول .. يلا حكيلي قصتك
هايدي : رح غسل وجهي وارجع
يتبع .......
??????
