تقاليد الهوى .. قصة واقعية

[صفا النعمان]

الجزء الاول
كيف فيكي تتصرفي وقت قلبك يدق لانسان مستحيل تكوني لالو .. كيف فيكي تكملي بحبك وقت يكون هالحب مصيرو الموت او .. او .. يبقى مخبى بزاوية من زوايا قلبك ومكتمة علي ..

هاد يلي صار معي انا .. انا هند البنت يلي ما بقي شب بيعرفني وما طلبني لكون زوجتو .. يمكن بسبب جمالي الشرقي الاصيل .. او .. او يمكن لروحي المرحة وشخصيتي القوية ..

بلشت حكايتي وقت كنت سنة تانية جامعة .. بتزكر بوقتا كنت كتير تعبانة من دوام الجامعة وراجعة ع البيت وانا هلكانة من جوعي .. وطلع بوشي فادي ابن خالتي ..

فادي: مرحبا

هند: ااه فادي .. هلا

فادي: كيفك

هند: تمام الحمد لله .. انت كيفك وكيف البكلوريا معك
فادي: مو منيحة .. مو منيحة ابدا

هند: لااا .. لا تقولا ... شبك فادي .. شو صاير معك

فادي: هند .. انا تعبان كتير

هند: لك شبك .. والله خوفتني عليك .. حكيلي مو انا رفيقتك

فادي: هههه رفيقتي!!

هند: فادي .. شو صايرلك

فادي: ولاشي .. سلامتك .. بخاطرك رح روح

هند: لك لوين .. فادي .. فاااادي

ومشى فادي وهو كتير مزعوج ..

هند: شوبو هاد .. شو صاير معو .. اوووف يا ربي .. رح ارجع ع البيت هلا وبعدا بفكر شو رح اعمل معو

رجعت بوقتا ع البيت وانا بالي كتير مشغول ع فادي .. فادي شب كتير راكز وعقلو اكبر من عمرو بكتير .. ومن شي سنة وهو ع طول بيحاكيني وقت يكون متدايق من شي وحابب يفضفض ..

غيرت تيابي بوقتا واكلت وصليت وفتت ع غرفتي لريح شوي .. حطيت راسي ع المخدة وغمضت عيوني .. ومباشرة اجت صورة فادي قدام عيوني وهو متدايق ..
فتحت عيوني ومسكت جوالي لحاكي ع الواتس ..

هند.. كيفك فادي

بعتا وبعد ثواني بعتلي ..
فادي.. مو منيح ابدا

هند.. خير فادي شو صاير معك

فادي.. انا عم موت يا هند .. عم موت

هند.. سلامتك فادي .. الف سلامة .. شبك خبرني

فادي.. هند انا حابب بنت كتير وعشقانا لدرجة الجنون

هند.. ايييي

فادي.. بس المشكلة هالبنت مالا حاسة فيني ولا عم تستوعب

هند.. طيب يعني انت خبرتا ؟

فادي.. لا ما خبرتا .. خايف كتير خبرا واخسرا للابد

هند.. انا برئيي خبرا .. وشو ما كانت ردة فعلا فهو افضل لاللك

فادي.. كيف هيك

هند.. يعني ازا البنت بتحبك .. او ع الاقل تقبلت حبك بتكون كسبت حبا وقلبا .. وازا الببتت ما تقبلت بتكون ما نطرتا ع امل مو موجود اساسا

فادي.. بس ما عندي الجراة لخبرا

هند.. شبك فادي .. انت عم تحكي هيك !! انت قدا .. ريح شوي وخود نفس وفكر منيح كيف رح تخبرا

فادي.. يسلمو كتير هند .. انا ما بعرف شو كنت بدي اعمل لولا وجودك بحياتي

هند.. لا تقول هيك فادي .. انا موجودة بايا وقت بدك ياني

فادي.. ممممم ماشي يسلمو كتير

سكرت جوالي وحسيت بغصة كبيرة بقلبي .. حسيت بشي من جواتي عم يغلى غلي ..

هند: فففففف شبني .. شو صرلي انا .. اي ويحب شو بدي في انا

تقاليد الهوى (الجزء الثاني)

مشت الايام ولسا حكي فادي براسي ما عم يروح من بالي .. شي من جواتي عم يوجعني كتيرر .. ما عم بعرف كيف بدي اوصفو .. خوف من خسارة فادي .. او .. او .. ما بعرف بالزبط شو هو ..

كل ما تقدملي شب كانت صورة فادي هي اول شي يجي ع بالي .. ودائما كنت ارفض بحجة انو ما بدي هلا لخلص دراستي ..

وبلشت الاحداث وتوفى ابي واضطرينا نترك بيتنا .. وسكنا ببيت اهلو لفادي .. بشقة فوق بيتن .. وصرت اقرب ع فادي
فادي: هيك ما رح اضطر حاكيكي واتس ههههه

هند: ههههه هيك رايك

فادي: اي طبعا .. ورح تساعديني بدروسي كمان

هند: اي ماشي ماشي .. فادي

فادي: اي

هند: شو صار معك .. مع البنت يلي .. يلي بتحبا

فادي: لسا ناطرا .. عم حاول افهم نظرة عيونا وقت بتطلع فيني

هند: كيف يعني ؟؟ انت بتلتقو ؟

فادي: يعني .. مو كتير .. قلبي عم يقلي انو هي مخبية مشاعر جواتا .. بس ما بعرف يمكن كون غلطان

هند: مممممم .. موفق .. رح روح انا

فادي: شبك انزعجتي هيك

هند: انا ؟؟ لا لشو لانزعج .. بس تعبانة شوي

فادي: اااخ .. لك هند .. انت عمية شي .. بربك فتحي عيونك منيح .. فتحيهن

هند: شو قصدك فادي .. ما عم افهم

فادي: هند .. انا .. انا بحبك انت .. بحبك يا مجنونة

ما بعرف وقت قلي شو صار فيني .. دمعو عيوني ورجف جسمي .. ووقفت مباشرة من غير ولا كلمة وركيض ع البيت ..

فادي: هند .. هند .. لك وقفي لوين رايحة .. هند

فتت ع البيت وانا لساتني بحالتي ..

امي: هند .. شبك امي .. شو صاير معك .. ليش هيك وشك

هند: ااه .. ت.. تعبانة امي .. تعبانة كتير .. رح روح ع غرفتي

امي: ماشي يا روحي ماشي

فتت ع غرفتي وانا مو مصدقة يلي صار معي .. معقول !!! فادي بيحبني لالي ..
ما بعرف لازم كون مبسوطة او زعلانة .. فادي شب بتتمنى كل بنت .. كامل من كلشي .. بس فادي اصغر مني بسنتين ..

اسئلة كتيرة براسي .. نظرة المجتمع لهيك حب .. اهلي .. اهلو .. نظرة الكل لالي باني سرقت شب اصغر مني ..

كيف فيني اتخطى كل هاد .. انا بحبو لفادي .. هلا تاكدت من هالشي .. بس شو مصيرو لهالحب !!؟

مضت نص ساعة وانا عم فكر وفكر لوقت سمعت صوت رسالة وصلت لجوالي ...

مسكتالجوال وفتحتا وكانت منو .. من فادي .. اخدت نفس .. (شو اعمل يا ربي .. افتحا . او لا .. لك طيب شو رح قلو انا .. دخيلك يا ربي ساعدني )

فتحتا للرسالة .. (هند .. شو صرلك .. انا بعتزر منك كتير .. بترجاكي ما بدي اخسرك .. انسي كلشي قلتلك ياه .. بس خليكي حدي وما تتركيني بترجاكي )

نزلو دموعي بالغصب وقت شفتا وكتبتلو بئيدي يلي عم ترجف .. (فادي ما تقول هيك . . انا بس تفاجات بيلي قلتو .. يعني ما كنت متوقعة )

-(ليش ما كنت متوقعة ... هند انت كلشي بالنسبة لالي . صدقيني مستحيل ارتاح غير وقت حاكيكي .. انت سكينتي وفرحتي يا هند )

-(بس فادي .. انا اكبر منك بسنتين )

-(اي ووين المشكلة)

-(فادي ما حدا رح يتقبل هالشي .. لا اهلي ولا اهلك ولا المجتمع )

-(ما بهموني .. كلن ما بهموني .. انت الوحيدة يلي بهمني رايا .. بس انت )

-(فادي .. ما بعرف شو بدي قول )

-(قولي يلي بقلبك هند .. خبريني هالمشاعر متل مشاعري او لا .. شو نظرتك لالي )

-(فادي انت شب بتتمناك اي بنت .. راكز ومحترم .. وايا بنت بتعرفك رح تحبك )

-(ما بدي كل البنات وما بهموني .. انت يلي بتهميني .. هند بتحبيني ؟.. بترجاكي بدي جواب . ما تعزبيني اكتر )

هند: يا ربي شو اعمل بحالي

كل جسمي بلش يرجف . وحسيت ببرد .. برد كتير عم يمشي بجسمي ودموعي ما عم توقف ..

-(هند .. احكي .. ما رح ازعل منك .. احكي بترجاكي)

-(اي فادي .. اي)

-(شو اي .. احكي )

-(انا بحبك وكتير )

-(هند .. يا روحي .. والله دموعي عم تنزل .. ما فيني اوصفلك مشاعري)

ومن هون بلشت قصة حبنا انا وفادي .. او قصة معاناتنا ..

تقاليد الهوى (الجزء الثالث)

كانت ايام من اجمل ايام حياتي .. كل يوم كنت حبو لفادي اكتر من يلي قبلو .. غمرني بمشاعرو وبحبو لالي ..

فادي.. طلعي ع الدرج

هند.. شو في

فادي.. لك طلعي . ما رح اكلك

طلعت ع الدرج وكان في علبة صغيرة مغلفة جواة كيس ..

هند: هههه ما رح تخلص مفاجاتك انت

اخدتا للعلبة ودخلت لجوا .. فتحتا وانا متلهفة لشوف شو جواتا . ..

هند: ههههههه اااخ منك يا فادي

كانت مليانة شكلاتات ومعن وردة حمرا .. وعلبة عطر صغيرة ..

فتحت الجوال وبعتلو ..

هند.. يسلمو كتير ع الهدية

فادي.. عجبتتك ؟؟

هند.. كتير عجبتني .. بس لا عاد تعيدا ... بكرة رح بطل اطلع من الباب بسبب شكلاتاتك

فادي... اي عادي . انا بحبك بكل حالاتك

هند... فادي

فادي.. عيونو

هند.. انا كتير خايفة من هالعلاقة

فادي... لا تخافي يا روحي ... ولا تفكري بشي .. فكري بس بلحظاتنا الحلوة سوا

كنت لسا عم حاكي وقت امي دقت الباب وفاتت لعندي .. سكرت الجوال بسرعة ..

امي: شو يا روحي .. شو عم تعملي

هند: ولا شي .. رح ادرس شوي

امي: هند .. من وقت مات ابوكي وانت شايفة وضعنا .. الكل عامل علينا حسيب ورقيب .. وانا خايفة عليكي يا امي

هند: ما تخافي امي .. انا فيني دافع عن حالي واحمي حالي .. ما تاكلي همي

امي: والله يا امي ما بعرف شو بدي قول .. بس عم قول يعني انت كل يوم عم يتقدملك شب .. وافقي ع شي شب يا امي خليني اطمن عليكي

هند: اميييي .. انا هلا ما عم فكر بالزواج .. كل همي خلص جامعة

امي: بس يا امي الحمل كتير تقيل علي

هند: امي حبيبتي .. وكلي ربك .. وكلشي مكتوب رح نشوفو

وبلشت العيون تتفتح علي اكتر وكل يوم طلاب شكل .. واغلبن من قرايبيني .. وصارت مشاكل كتيرة معي ومع امي بسبب هالشي .. بنات العيلة ما خلو كلمة مو منيحة ما حكوها بحقي من غيرتن وداقت خلاقي وسودت الحياة بوشي .. بس ع طول كنت شد ع اعصابي واتحمل لوقت اجا هداك اليوم ..

امي: هند .. امي حاج عناد .. ليكك شايفة المشاكل يلي اجت ع راسي وراسك بسبب قرايبينا .. برضايي عليكي يا امي خلينا نسكتن

هند: وكيف بدك سكتن يا امي .. ما رح يسكتو شو ما عملت

امي: نضال ابن خالتك طلب ايدك .. وافقي بقى وخلصينا من هالقصة

(نضال اخو فادي)

وقت قالتلي هيك اجتني الجمدة وما حسنت احكي ولا حرف ..

امي: شبك .. شو صرلك

هند: امي .. انا .. يعني .. ما فيني امي .. مستحيل .. نضال مستحيل .. مستحييل

امي: وليش مستحيل .. نضال شب شهم ودارس واخلاقو ممتازة

هند: بس انا .. انا ما بدي من قرايبيني

امي: بس هاي خالتك .. ليكي كيف سكنونا ببيتن واهتمو فينا من وقت راح ابوكي

هند: اي وازا امي .. مستحيل .. ما باخدو

امي: الله يرضى عليكي يا امي .. حاج عناد

هند: خلص امي .. بوعدك اول شب بيتقدملي وضعو منيح رح وافق عليه

امي: اكيد؟؟

هند: اكيد امي اكيد .. ما تاكلي هم

تقاليد الهوى (الجزء الرابع)

طلعت امي من الغرفة وانا سكاكين وعم تضرب بقلبي .. ما عم استوعب شي .. ولاني عرفانة شو رح اتصرف بهالمصيبة ..

ولسا عم فكر بعتلي فادي ..
-(كيفك يا حلوة )

-(هلا فادي .. انت كيفك)

-(منيح بشوفة حروفك يا قلبي)

-(فادي .. رح حاكيك بشي مهم .. بترجاك تفهمني)

-(شو صاير هند)

-(فادي يلي بينا لازم ينتهي .. اساسا ما كان لازم نمشي بهالطريق .. طريقنا مسدود يا فادي .. حبنا مستحيل يعيش)

-(انت عم تمزحي مو ؟؟؟)

-(لا فادي ما عم امزح .. فادي مستحيل يلي حوالينا يتقبلو حبنا .. مستحيل )

-(هند لا تجننيني .. شو بدك فيهن .. انا ما بهموني كلن .. انت بلي بتهميني)

-(وانا ما فيني كون البنت يلي اخدت شب اصغر منا .. ما بحط حالي ولا بحط اهلي بهيك موقف )

-(هند عذرك موو مقبول ابدا )

-(فادي حاااج .. بترجاك حااج .. من وقت بلشت علاقتنا خبرتك حبنا ما حدا رح يتقبلو .. وانا ما فيني واجه المجتمع )

-(بس انا فيني .. انا مستعد واجه الكل كرمالك .. بس قولي اي)

-(فادي .. هالشي مستحيل )

-(ما في شي مستحيل .. لك انا بعشقك .. بتنفسك .. انا بموت بلاكي هند)

مسحت دموعي يلي بلشت تهر ورجعت بعتلو ..

-(فادي اليوم امك طلبتني .. لاخوك نضال )

-(انت شو عم تحكي )

-(هاد يلي صار فادي .. وامي عم تضغط علي من مدة بدا تخطبني لتريح راسا من الخطابين ولتسكت يلي حوالي .. وانا ما عم بقدر اجل الموضوع اكتر .. ووعدتا لامي اخطب اول شب بيتقدملي )

-(لك انت جنيتي !!!!!!)

-(حبنا يلي جنان .. نحنا ما فينا نواجه مجتمع كامل .. بتمنالك كل خير فادي .. انت ما في منك .. بترجاك حاج لهون)

-(شو يلي حاج لهون .. وايا خير يلي بتتمنيلي ياه بعيد عنك)

-(فادي بترجاك افهمني .. انا مضغوطة كتير .. المشاكل محاوطتني من كل مكان .. غير تانيب الضمير بسبب علاقتنا)

-(يعني بهالبساطة بتنهي كلشي)

-(انا رح سكر .. ما فيني امشي معك اكتر من هيك )

سكرت مع فادي وانهرت من البكي .. ما عم بقدر اتخيل اني رح عيش من غيرو .. كيف رح يمضى يوم من غير ما احكي .. كيف رح نام من غير ما اطمن عليه .. بس انا الغلطانة من البداية يلي سمحت لحبو يدخل قلبي وانا متاكدة انو هالحب ما رح يعيش . .

مشت الايام وانا عم حاول انساه لفادي وعم اتجاهل رساءلو .. واجا اليوم يلي كنت خايفة منو .. واتقدملي شب من غير قرايبيني ..

رياض شب كتير اكابر وفهمان .. وما قدرت حط في ولا علة .. ووافقت عليه لاهرب من جو المشاكل يلي معيشيني فيه قرايبيني ولريح امي ولاكد لفادي بانو كلشي خلص ..

وتمت خطبتي من رياض وكتب لكتاب وصار وقت نعمل حفلة ..

امي: رح نعمل اللمة ببيت اختي .. بيتنا صغير وما في مجال

رياض: تمام مرت عمي .. عملو يلي بريحكن

فتت لبيت فادي وانا عروس .. بس ما كنت عروس لفادي .. كنت عروس لغيرو ..
الكل كان فرحان كتير .. الكل عم يغني ويرقص .. وانا قلبي عم يتقطع .. ما عم بقدر فكر غير بفادي ..

فادي يلي حبس حالو بغرفتو وبلش بكي .. بكي ع حبنا يلي مات قبل ليكبر ..

خلصت الحفلة ورجعت ع بيتنا ووصلتني مسج من فادي ..

-(مبروك هند)

ترددت كتير قبل لافتحا .. صرلي فترة طويلة ما حكيتو .. كنت كتير بحاجة لاحكي .. كنت بحاجة لالو اكتر من حاجتي لاي انسان تاني بهالوقت ..
فتحت الجوال وبعتلو ..

-(الله يبارك فيك .. عقبالك)

-(واخيرا رديتي.. ما رح اكزب عليكي وقلك فرحتلك ..ولا رح قلك بتمنالك السعادة معو .. انت موتيني يا هند.. انا انتهيت)

هرو دموعي وكتبتلو بئيد عم ترجف..
-(فادي .. صدقني هيك احسن الي والك .. وبكرة رح نتجاوز هالشي )

-(لاااا .. يمكن يكون احسن الك .. بس الي لا .. انا خلص من هلا متت .. بخاطرك هند)

كتبلي هيك وسكر ..
كانت ليلة من اسوأ الليالي .. ما حسنت نام لوش الصبح .. غفيت عيني شوي .. وفقت ع صوات صريخ من بيت خالتي ..

هند: بسم الله شو صار

ركضت لبرا وشفتا لامي ..

هند: شو صاير امي

امي: ما بعرف .. ما بعرف

ونزلت ركيض انا وامي لبيت خالتي ..
وشفت شوفة مستحيل انساها بحياتي .. فادي ع الارض متسطح وادي كلن دم ..
كل اهلو حوالي وعم يبكو ويصرخو ..

فتل راسي وما بعرف كيف وقعت بارضي وانهرت ..
هند: فاااادي .. سااعدو بترجاااكن .. فادي

وبعد بشوي وصل الاسعاف .. اخدو لفادي ومعو خالتي وزوجا ..

هند: امي بترجاكي خلينا نلحقن (تبكي)

امي: شبك بنتي .. اهدي .. اهدي يا روحي (تبكي)

بقيت بالبيت ع نار .. خمس ساعات وانا عم انطر خبر عن فادي .. روحي كانت عم تطلع .. ما عدت حسيت ع شي .. دموعي ما وقفو ..

هند: انا السبب .. انا السبب .. شو رح اعمل ازا صار شي لفادي

وبعدا ما تحملت اكتر .. لبست تيابي وطلعت ..

امي: هند .. لوييين

هند: لعند فادي امي

امي: لك انت جنيتي

هند: رح جن ازا بقيت هون دقيقة وحدة

طلعت من البيت ومشيت للمشفى .. كنت ماشية وحاسة حالي عم امشي مطرحي .. الطريق ما بدا تخلص ابدا .. وصلت المشفى وطلعت بخطوات مهدودة ع الدرج .. لوصلت غرفتو لفادي

هند: خالتي .. طمنيني

خالتي: الحمد لله يا بنتي .. ربنا نجالي ابني

نزلو دموعي وما حسنت اوقف .. سندت حالي ع المقعد .. (الحمد لله .. الحمد لله ع سلامتو خالتي )

وبعد باسبوع .. رجع فادي ع بيتو ... وانا فورا حاكيتو ..

-(الحمد لله ع سلامتك .. حاكيتك صوت لحتى ما تعبك)

-(ليش لسا ما تعبتيني انت)

-(فاددي بترجاك حاج .. لك ليش هيك بتعمل بحالك وفيني .. ارحمني فادي (تبكي) .. شو كان رح يصير فيني لو صرلك شي )

-(انت عم تبكي هند .. لا تبكي..
هند ... سمعيني منيح .. رح ضل ناطرك لاخر العمر .. خليكي متزكري هالشي)

انخنق صوتي وما عرفت شو جاوبو ..

-(فادي .. انا هلا ع ذمة رجال تاني .. وما فيني خونو .. بتمنالك السعادة من كل قلبي )

-(بس انا سعادتي معك )

-(فادي .. رح تتجاوز هالشي .. رح تلتقي بيلي تنسيك هند وتلقى سعادتك معا.. حاج تعزبني)

-(ما عاش يلي بدو يعزبك .. بوعدك ما عاد ازعجك .. بس رح اطلب منك طلب)

-(روحي الك .. احكي)

-(خليكي حاكيني ع طول لاطمن عليكي )

-(حاضر .. رح حاكيك كل يوم)

ومن هاليوم صارت علاقتي بفادي كتير رسمية .. ع طول عم نحكي سوا .. ما تركني بنوب .. وع طول بيتبع اخباري وبيحاول يساعدني بكلشي .. وتزوجت ولساتو فادي ناطرني .. ما عم يستوعب انو كلشي خلص ..

كتير بنات حاولو يتقربو منو .. بس هو دفن حبي بقلبو وسكرو ..

هاي قصتي مع فادي .. حبيت شاركن فيها وشاركن وجعي ووجع فادي يلي ما الو سبب غير عادات وتقاليد هالمجتمع يلي كلنا عم نمشي فيها ولو حرقتنا ..

انتهت

 

[صفا النعمان]

تمتتت