أفتقدك ياا صديقي

[صفا النعمان]

(الجزء الاول)
رضى: لك امسكا قبل ليشوفك الاستاز
بهاء: هههههه ..لك من تحت الدرج مو من هون
رضى: ههههههه.. خلص مسكتا مسكتا
انا رضى.. ورفيقي بهاء ..طلاب بالبكالوريا.. علاقتنا تعدت الرفقة للاخوة.. النا عالمنا الخاص بالمدرسة.. نحنا وعمر وعلي..
عمر: لك بس افهم كيف بتمررو الورق من غير ما ينتبه عليكن الاستاز.. لك انا ازا تنفست بيعيط علي
رضى.. بهاء: ههههههههه
رضى: اي لانك اجدب ..مو متلنا
علي: بس شو عم تكتبو عليهن هههههههه
حط بهاء ايدو ع كتفي وغمزني..
بهاء: هاد سر بيني وبين رضى
علي: اييي تعا تعا عمر.. صرنا هلا غرب نحنا
عمر: ههههه.. لك شو بدن يحكو غير عنا لحبيبة القلب
بهاء: خراااس ولااا
رضى: لك شبك... عم يمزح
بهاء: اي وانا عم امزح ههههههه
كانت رفقتنا كتير حلوة.. وكنا مميزين بمدرستنا ... خلصنا البكلوريا وسجلنا ببلاد برا.. انا سجلت لادرس هندسة وبهاء وعلي سجلو ليدرسو طب ..وعمر ما حالفو الحظ ورسب ..
وبيوم دق تلفوني وكان المتصل بهاء
رضى: هلا شريك
بهاء: مصيبة يا رضى مصيبة
رضى: خير شو صاير
بهاء: والله قلبي بدو يوقف
عدلت قعدتي وقلبي زاد نبضو..
رضى: لك شبك.. شو صاير
بهاء: (ببكي) ياسمين يا رضى.. ياسمين خطبت لابن عما
رضى: شو عم تحكي.. يا ربيييي
بهاء: ما عم استوعب يا رضى.. لك كيف هيك عملت فيني
رضى: الله يلعنا
بهاء: الليلة حفلة خطبتن.. بدي روح ع الحفلة
رضى: لااااا.. انت اكيد جنيت... رح اجي لعندك انا والشباب.. سلام
بهاء: ماشي سلام
دقيت لعمر وعلي وقلتلن يجو لعند بهاء ضروري ..وصلنا سوا لعندو..
عمر: شبكن... شو صاير
كانت حالة بهاء تقطع القلب.. تعبان كتير ومحطم.. ومانو عرفان كيف يداوي هالجرح..
رضى: ياسمين انخطبت
علي: يخرب بيتااااا
عمر: هالشيطانة
بهاء: بربكن سكتووو.. ماني متحمل.. انا ضروري روح ع حفلتا
عمر: انت جنيت شي
بهاء: بدي شوفااا.. بدي اطلع بعيونا وشوف شو بدن يقولو.. بدي شوفن سوا ماسكين ادين بعض لحتى ما ارجع فكر فيها ابدا وانساها
علي: والله انت بتفهم.. انا معك
رضى: لك والله مالو داعي.. خلص راحت الله لا يردا.. ما بتستاهل بنزين السيارة
عمر: لك بنروح ومنو بنعمل فتلة بسيارتو الجديدة
رضى: لك سكووت انت
بهاء: صدقوني رح احتفل معكم ورح فتلكم بالسيارة.. رح طالعا من قلبي وحياتي..
كان عم يحكي وعيونو كلن دموع.. وصوتو مخنوق
(الجزء الثاني)
جهزنا حالنا كلنا لسهرة غير شكل..
رضى: امي.. انا طالع مع رفقاتي.. يمكن اتاخر
امي: رضى سهراتكن كترانة ..مو حلوة هيك
رضى: لك يا روحي كلو اسبوع وكل واحد منا رح يروح لبلد..والله اعلم ازا رجعنا لتقينا او لا
امي: الله يحميكن يا امي
رضى: اي تعي لبوس راسك.. حبيبة قلبي.. موااه
امي: ههههههه لك خلص خلص.. بعد هيك
تركتا وطلعت.. والتقينا كلنا ..
عمر: مين بدو يركب بالكرسي يلي قدام
رضى: اي اكيد انا.. ما في نقاش
بهاء: خلصوني.. مو وقت مناقرتكن هلأ.. ركاب رضى
ركبنا كلنا.. بهاء شفير.. وانا حدو.. وعمر وعلي بالكراسي الخلفية
طول الطريق ونحنا عم نحاول نعمل جو حلو كرمالو لبهاء.. لحتى نخفف عنو ..وهو عم يحاول يجاملنا..
علي: لك بهاء.. هلا نحنا الاربعة بنخطفو لعريسا وبنهرب فيه.. ههههههههه
عمر: هههههههههه
رضى: ههههههه.. وشو بدك تعمل فيه
بهاء: رح قطعو 100 شقفة .. هالندل الكلب
رضى: سكتووو.. هاي امي.. الووو.. اي امي
امي: وينكن يا امي
رضى: بنص الطريق امي
امي: وقت تصلو حاكيني
رضى: حاضر يا روحي
بهاء: ههههههههه.. لك مستحيل تتركنا الحجة ابدا
امي: قلو لبهاء يسكت ويركز بسواقتو
رضى: هههههههه حاضر امي
امي: ربي يرضى عليكن يا امي.. قرؤو قران ع حالكن ولا تلهو لبهاء
رضى: حااااااضر امي
عمر: خاااااالتوووو.. لا تخافي نحنا بينخاف منا ما بنخاف علينا
امي: ههههههههه... ربي يسعدكن.. مع السلامة امي
سكرت الخط مع امي.. ورجعنا ع النكت والضحك والهبل ..وكل واحد فينا عم يخطط كيف بدو يسافر وشو بدو يدرس وشو بدو يعمل...
عمر: اي وانا.. حتتركوني وحيد هون
رضى: لك يلي بيسمعك بقول انو رح نكون نحنا سوا.. كل واحد فينا ببلد شكل
بهاء: رضى.. شغللي هالمسجلة لروق شوي
رضى: من عيوني حب
شغلنا المسجلة وبلشنا نغني كلنا بصوت واحد ونحنا عم نضحك ونلعب
وبعد مشوار طويل وصلنا لبلدا لياسمين..
( الجزء الثالث)
وجهو لبهاء بلش يتغير وصوتو ما عاد طلع.. كان ماسك جوالو بئيدو وهي عم ترجف..
رضى: بهاء انت منيح
بها: هاا.. اي اي منيح
عمر: بهاء.. بلالك هالفوتة
علي: تعا لنروح شي مشوار نغير جو ..شو بدنا فيهن
بهاء: عم قلكن انا منيح.. ضروري شوفا لحتى ما فكر حنلا ..ولحتى كل ما قلبي دقلا يرجع يتزكر شكلا وهي ماسكة ايد غيري.. بدي شوف الحب يلي بعيونا وين راح.. بدي شوف نظرتا لالو.. بدي هني ع هيك انسانة منافقة وملونة..(ببكي)
رضى: خلص شريك.. طول بالك.. عطوني المي من عندكن
علي: مسيك
فتحتلو قزازة المي وعطيتو ياها.. تنهد ومسكا وشرب.. تنفس شوي ونزلنا كلنا من السيارة..
دخلنا الحفلة.. وشفناهن سوا.. ياسمين وخطيبا.. تبسم بهاء وقت شافن..
بهاء: الله يلعنكن تنيناتكن
رضى: هاي شفتن.. يالا بكفي
مسكت ايدو وشديتو لنرجع.. سحب ايدو من ايدي بعصبية واطلع فيني..
بهاء: بدي روح سلم عليهن
رضى: لك انت جنيت
عم قول تركني ..وراح لعندن.. شفنا من بعيد وهو عم يسلم عليهن ويضحك..
رجع من عندن ووشو احمر وعيونو كلن دموع..
بهاء: مشو
طلعنا من الحفلة ورحنا ع السيارة..
عمر: تعا تعا رضى..ممنوع تركب حدو لبهاء.. انا رح اركب
رضى: بالله شووو.. كل واحد بيطلع مكانو ههههه
فتلنا تنيناتنا ع السيارة كان علي راكب حدو لبهاء وفارط ضحك هو وبهاء كمان ...ركضت لعندو لافتح الباب بس قفلو ..
عمر: هههههه انا بورجيك ولااا
علي: ههههههههه
ركبنا بالسيارة..
بهاء: لك والله رفقتكن بتسوا ياسمين وكل عيلتا.. ربي ما يحرمني منكن
شغل السيارة ومشينا.. كنا عم نضحك.. بهاء كان عم يضحك.. بس التعب والقهر باين بعيونو.. ونحنا ماشيين بالسيارة فجأ وحدة طلعت بوشنا قاطرة كبيرة.. وهاد اخر شي بتذكرو..
هالقاطرة صدمت سيارتن للشباب.. والسيارة دخلت تحت القاطرة.. كان من ابشع الحوادث يلي صارت.. الناس كلا التمت.. والسيارات كلا وقفت.. سواق القاطرة نزل وبلش يصرخ..
السواق: لا اله الا الله... لا اله الا الله.. الشباب راحووو الشباب راحوووو.. يا عالم ساعدني.. دقوووو للاسعاف.. ساعدوني الشباااااب ماتووووو
عمر بهاللحظة فتح عيونو.. شافن لرفقاتو وهني كلن دم.. شافو لبهاء كيف راسو صار عجين قدام عيونو.. شاف كيف شعرو كلو ودمو عم ينزل ع رضى.. شافو لعلي يلي مو مبين من جسمو شي غير الدم.. شافن كلن قدام عيونو.. ما عم يقدر يحكي شي.. دموعو عم ينزلو.. رفقاتو عم يموتو قدام عيونو.. ويمكن هو بايا لحظة يلحقن..
بس بهاللحظة رضى فتح عيونو.. اطلع بعمر..
رضى: عمر.. ش.. ش... شو صار
عمر: حادث.. صار حادث..
ورجع رضى غمي ...
(الجزء الرابع)
الكل جن من المنظر يلي كانو الشباب فيه.. بهاء كان ع الاكيد ميت.. راسو كان متل العجينة..
وصلو الاسعاف وطيارات الهيلوكبتور.. والشرطة.. كل مين بيقدر يساعد اجى.. لعلى وعسى يقدرو يساعدو ايا حد فيهن..
نقلوهن للشباب ع المستشفى..
عمر: رفقاني.. ماتو.. ماتوووووووووو (ببكي)
المسعف: طول بالك اخي ..طول بالك
عمر: راحووو ..خلص.. راحووو
الناس شافو هوياتن وارقام اهاليهن بجوالاتن واتصلو باهلن..
غريب: الوو.. مرحبا
ابو رضى: اهلين يا هلا
غريب: حضرتك ابو رضى
ابو رضى: نعم يا اخي
غريب: والله يا اخي ما بعرف شو بدي قلك.. بس ابنك عمل حادث وما بعرف اذا بتلحقو او لا
ابو رضى: حسبنا الله ونعم الوكيل.. انا لله وانا اليه راجعون
ام رضى: رضى.. ابني.. شو صاير ..لا تقلي رضى ماات لا تقلي
ابو رضى: وحدي الله.. ما بنعرف شي.. عمل حادث هو ورفقاتو
بلشت ام رضى تصرخ وتبكي وتضرب ع وشا..
ام رضى: والله قلبي كان حاسسني.. والله يا ربي والله
مسكا ابو رضى من اديها التنتين...
ابو رضى: لك شو عم تعملي انت.. جنيتي.. اوووعك.. بدك تكوني قوية شو ما صار.. وقفي ..وقفي
سندا ابو رضى ووقفا وضما وعيونو كلن دموع وقلبو ع شوي رح يوقف..
ابو رضى: ما بدي شوفك منهارة لو شو ما صار.. لبسي بسرعة
جهزو حالن وراحو ع المشفى ..اول ما فاتو.. كان رضى لساتو بالممر باب غرفة الطوارئ.. كان ع السرير مسطح.. وجسمو كلو دم.. وراسو ووشو كلو شعر..
ام رضى: ابنييييييييي.. رضى.. لك ماااااات.. ابني مااااااات
قربو منو ليشوفو ..
ام رضى: ابني عايش.. لساتو عايش ما ماتت (تبكي)
ابو رضى: لك ليش ابني لساتو هون.. ليش ما اسعفتووو ليش
الدكتور: طول بالك عمي.. دخول وشوف الطوارئ..كل الاسرة مليانة.. تلت حوادث الليلة
قعدت ام رضى حد ابنها.. حطت ايدا ع وشو ..بدا تشوف وش ابنا حبيبا.. يلي كلو دم.. مسحت الدم بئيدا.. وصارت تلم بالشعر يلي ع وشو وتحطو بالمحرمة يلي معا..
ام رضىتبكي) رضى.. حبيبي يا امي.. يا عمري ويا سندي.. فتح عيونك يا امي.. فتحن يا قلبي.. اوعك تتركني يا امي.. والله بموت يا روحي والله.. يا ترى يا امي هالشعر شعر مين فيكن يا قلبي .. يااا ربي يااا ربي.. دخيلك ساعدو لابني ولا تبتليني يا الله
(الجزء الخامس)
المستشفى كلا كانت ضايجة بهالشباب يلي متل الوردة.. واهلن كلن وصلو.. والكل عم يبكي ويدعي ربو.. امو لبهاء وابو واقفين وعم يستنو.. الكل كان عرفان بانو بهاء خلص مات.. بهاء يلي ما كان الو غير اخ واحد واختين.. كلن واقفين وبيستنو بخبر اخوهن ..
طلع الدكتور من الطوارئ ..ركض ابو بهاء لعندو..
ابو بهاء: شو يا دكتور.. حكيلي ابني منيح.. بترجاك
الدكتور: لا حول ولا قوة الا بالله... ربك اعطى وربك اخد..
الكل انهار.. كل يلي بالممر انهار واصوات البكي عبت المشفى.. بهاء كان ابنن كلن.. وكانو عم يستنو الدكتور ليقلن متل ما قال لابو بهاء..
ابو بهاءيبكي) انا لله وانا اليه راجعون
ام بهاء وقعت ع الارض ..
ام بهاء: لك لاااااااا.. انتو غلطانين.. اي غلطانين.. مو ابني يلي مات.. بترجاك ياا دكتور بترجاك.. رجاع فحصو عميل ايا شي.. لك بهاااااااء يا امي.. يااا عمرا لامك.. لك اخوكن راااح
قرب منا قيس اخو لبهاء..
قيس: امي يا عمري.. قدر ربنا ..وحدي الله
ام بهاء: لا اله الا الله.. لاااااا اله الااااا الله
اخواتو البنات ما استوعبو الخبر ابدا: بهاااء.. اخي.. تعااا... طلاع.. تعا يا عيون اختك تعااا.. اخي تعاا يا ضو عيني تعاااا.. انت ما بتتركني.. ما بتتركا لاختك.. لك مين بدو يسندني من بعدك يا عمري يا اخي.. ياااا ربي دخيلك يا الله..
كانت ليلة سودا ع الكل.. والكل عم يستنا خبر ابنو..
ابو علي: دكتور كيف وضعو لابني
الدكتور: ما بدي خبي عليك.. ابنك مخطر.. وضروري نحولو ع مستشفى تاني
حولو لعلي ع مشفى تاني..
ابو رضى: كيفو ابني.. طمنا
الدكتور: ابنك نجا من الموت باعجوبة.. بس كمان لسا ما بنعرف شو بصير ..ابنك عندو كسر بالجمجمة.. غير الضربات التانية.. ويمكن يفقد الذاكرة
ام رضى: انا قبلانة.. بس المهم يعيش
الدكتور: توكلي ع الله خالة.. توكلي ع الله
الكل اعصابو مشدودة ..اهلو لبهاء عم يجهزو لاستلام جثة ابنن.. اهلو لعلي عم يجهزو لنقل ابنن ع مشفى تاني.. اهلو لرضى عم يستنو بمصير ابنن.. واهلو لعمر بهداك الوقت كان اخف شي.. عمر كان مجرد ضربة بئيدو وكدمات بس..
مرت هالليلة متل العلقم عليهن كلن..
وتاني نهار تشيع جثمانو لبهاء ..ووضعو لرضى بلش يستقر... وعلي سافر ع غير منطقة للعلاج..
عمر: ما فيني شي.. لك ما فيني شي.. تركوني بدي روح ع جنازتو لبهاااء ..بعدوو عني
عمر دخل بحالة نفسية.. تعب كتير.. كل رفقاتو ع الموت سوا.. ما قدر يتحمل هيك شي..
*بعد باسبوع من الحادث*
ام رضى ع سجادة الصلاة ماسكة القران ودموعا ع خدا بينزلو بكل حرقة..
ام رضى: صدق الله العظيم.. يا ربي انت القادر.. تحيي العظام وهي رميم.. رجعلي ابني ع حضني سالم معافى يا الله
دق تلفونها.. مسكتو بلهفة ..
ام رضى: اي ابو رضى.. لك ليش تاخرت.. تعا خدني
ابو رضى: طولي بالك.. رضى فاق
ام رضى: عم تحكي جد.. الحمد الك يا ربي
ابو رضى: رح اجي اخدك لتشوفيه.. جهزي حالك
جهزت ام رضى لوقت ما اجا ابو رضى وراحو سوا ع المشفى...
دخلو المشفى وهني متلهفين ليشوفو ابنن ويطمنو عنو.. وقبل ليدخلو ..
الدكتور: ابنكن فاقد الذاكرة.. مانو متذكر ايا شي من الاحداث يلي صارت خلال هاي الفترة
ام رضى: الحمد لله ع كل حال.. بس كيف فينا نعالجو
الدكتور: ع الاغلب يلي عندو فقدان ذاكرة مؤقت.. مع الوقت بيرجع بس الله اعلم قديش بدو
دخلو امو وابو لرضى عندو.. كان متسطح والاجهزة لساتها عليه.. قربت منو امو ودموعها بعيونها...
ام رضى: رضى.. انت عارفتي؟
رضى: لا ..ما بعرف
(الجزء السادس)
بقي رضى ع هالحالة 3 ايام.. مانو متزكر شي واهلو قلبن عم يغلا غلي.. ومن دكتور لدكتور عم يسالو ليطمنو ع ابننن..
بهالوقت كان علي تحت رحمة الباري.. حالتو كانت لسا مخطرة.. ووضعو ما استقر..
وعمر كانت جروح جسمو بكل لحظة بتذكرو برفقاتو وهني كلن دم.. بتذكرو ببهاء.. بضحكة بهاء.. وبجثة بهاء..
بعد 3 ايام من حالة فقدان الذاكرة يلي عاشون رضى.. فاق بيوما الصبح..
رضى: اميي.. وينكن.. بدي شاي
اطلعت امي فيني وهي مصدومة..
ام رضى: رضى.. امي.. انت منيح
رضى: شبكي امي.. اي منيح.. شو صاير معي.. شو هاي الجروح كلا
وقتا امي ضمتني وصارت تبكي من كل قلبا..
ام رضى: الحمد لله يا ربي شفيتلي ابني.. الحمد لله
انا وقتا كنت ماني فهمان شي.. كان راسي عم يوجعني كتير ..وايدي مجبرة.. ورقبتي ملفوفة ..
ما فهمت شي.. وبلشت حاول اتذكر.. بس ما تذكرت شي.. اخر شي بتذكرو هو ضحكة بهاء وقت طلعنا بالسيارة..
ابو رضى: ابني مانك متذكر شو صار معك
رضى: لا.. شو صار
ابو رضى: مانك متذكر الحادث يلي صار معكن انت ورفقاتك
رضى: ايا حادث؟؟؟؟ وشو صار؟؟ وينن رفقاتي ..شو صرلن؟؟؟
ابي وامي تنيناتن ما ثبتو دمعتن وصارو يبكو..
انا وقت شفتن هيك كنت رح جن..عرفت انو صاير شي مو منيح مع رفقاتي..
رضى: شو صرلن.. احكوو
ابو رضى: بهاء.. ..
رضى: شبو بهاء؟؟
ابو رضى: العمر الك يا ابني
رضى: لاا.. هههههههههه.. عم تمزح اكيد
ابو رضى: قدر ومكتوب يا ابني
ما بعرف كيف نزلو دموعي وصرت اضحك بصورة هستيرية..
رضى: هههههه بهاء مات.. لك انتو عم تمزحو.. لك بكرة رح يسافر ليدرس طب.. لك رح نسهر المسا اخر سهرة.. هههههه لك هيك اتفقنا
ام رضى: تعا يا روح امك.. تعا
ضمتني امي وهي عم تبكي.. ما استوعبت ابدا الخبر..ولا كنت بدي استوعبو..
رضى: والبقية.. شو صرلن
ابو رضى: علي لساتو مخطر وعم يتعالج.. وعمر هو الوحيد بيناتكن يلي ضربتو كانت خفيفة
ابو رضى: هلا بحاكيه لعمر وبقلو يجي لهون
بعد بشي ساعة اجا عمر.. اول ما شفتو تذكرت جمعتنا.. تذكرتو لبهاء.. تذكرت ضحكتو يلي اخر شي شفتو منو.. دمعو عيوني وضميتو وبكينا تنيناتنا..
عمر: كنت خايف اخسرك متل ما خسرتو لبهاء
رضى: ما عم صدق يلي صار ابدا
قعدنا سوا وحكالي عمر عن الحادث.. يلي شاف تفاصيلو كلا.. وكيف دخلت السيارة تحت القاطرة.. وكيف كان منظرو لبهاء.. وكيف اجا الاسعاف.. وكلشي بالحادث.. خبرني عن جنازة بهاء.. وعن امو لبهاء واخواتو يلي مانن مستوعبين القصة..
عمر: (ببكي) راسو لبهاء كان متل العجين.. ع طول كنتو حد بعض.. وحتى وقت مات رفض يكون غير حدك.. راسو كان ع راسك.. وشعرو هر ع وشك ..مات بحضنك يا رفيقي..
كانت ام رضى عم تسمع هالحكي وتبكي.. راحت ع غرفتا وجابت المحرمة يلي لمت فيها الشعر يلي كان ع وشو لرضى.. كانت لساتا محتفضة فيها..
ام رضى: (تبكي) هاد يلي بقي من رفيقك يا امي.. خدن خليهن ذكرى.. هاد شعرو يلي كان ع وشك
مسكتا للمحرمة وهرو دموعي ع خدودي.. بكيت من كل قلبي.. تذكرتو قديش كان يهتم بشعرو ..وقديش كنا نعلق عليه وقت يوقف قدام المراية..
(الجزء السابع) والاخير
كانت الناس شي طالع وشي داخل..
مضى ع الحادثة اسبوعين وقت اجاني الخبر..
دق تلفوني وكان المتصل عمر..
رضى: اهلا عمر.. كيفك
عمر: (ببكي) علي راح.. راح يا رضى.. ما بدو يفارقو لبهاء... لحقو يا رضى لحقووووو
ما بعرف كيف فتل راسي.. فقدت توازني وغبشو عيوني.. ما قدرت رد عليه ولا احكي شي..
ام رضى: شو في يا امي.. شو صاير.. ليه هيك قلب وشك
اطلعت فيها وعيوني مغبشة وماني شايف منيح..
رضى: ع.. ع... علي.. علي امي.. علي
ام رضى: لا تقولا
رضى: اي امي ايي.. علي مات.. مات.. خلص مات وراح.. راااح يا امي راح
ام رضى: لا حول ولا قوة الا بالله العلي العظيم
جنازتو لعلي كانت خيالية.. ما ضل حد بكل المنطقة ما حضرا.. دخلت لشوفو لرفيقي.. اطلعت فيه وهو جثة وما قدرت استوعب..
كلمتو لابو ودمعتو محبوسة بعينو لهلأ عم ترن بداني..
ابو علي: الله يسهل عليك يابا.. الله يسهل عليك يا ضو عيوني
ما قدرت اتحمل ونزلو دموعي لحالن وقت سمعتو هيك حكا..
ما كنت قدران اتخيلو غير وهو عم يقفل باب السيارة ويتضحك وقت قعد مكاني..
هالموتة كانت لالي.. بس هو اخدا مني..
الناس كلا ماشية بالجنازة وعم تكبر وانا عم اتخيلن لرفقاتي.. واتخيل مزحن ولعبن.. وعم ابكي.. ماني قدران وقف دمعتي..
وصلنا لقبرو .. كنت ادعي لربنا انو هالشي يكون كابوس وانو فيق منو..
بس هالشي ما كان كابوس.. كان واقع ..واقع مر وانكتب علينا.. مسكو ونزلو للقبر وانا لساتني عم ابكي وماني قدران استوعب..
وقت بلشو ينزلو التراب عليه.. ما قدرت استوعب المنضر..
رضى: لك شو عم تعملوووو.. وقفوو.. هو عايش ..اكيد عايش.. افتحو كفنوو.. افتحووو..
كنت رح انزل لعندو ع القبر بس منعوني ..
الكل وقت شافوني هيك صارو يبكو وما قدرو يمنعو دموعن..
كان اسوأ يوم بشوفو بحياتي.. عم احكيلكن عنو وانا ماني قدران امنع دمعتي .. قلبي انحرق عليهن.. اليوم صرلا الحادثة 17 سنة.. بس عم اتخيلا وكانو امبيرحا صارت.. ودمعتي ع خدي نزلت..
كل ما اتزكرا لامو كيف لاقتني وقت شافتني اول مرة بعد وفاتو بينحرق قلبي عليها.. ضمتني وهي عم تبكي..
ام علي: تعا يا ريحة الغالي.. تعا خليني شم ريحتك ..علي راح راح يا رضى.. راح
ايام صعبة كتير ومستحيل تنتسا او تنمحى من ذاكرتي..
كنا بعمر الورد و الورد منا يغار ..
صابتنا نظرة حسد من عيون غداره...
قلبت ايام الزهر صارت كحل وغبار ...
فرقنا الموت و القهر والايام دواره..
مالي بين البشر صاحب ولا جار..
يسد الوجع ويجدد اخباره...
مر العمر وتجدد في قلب الام ورده والاشجار
الضنا يتعوض لكن خوي الروح منين اجيب بداله....
انتهت
صبايا هالقصة واقعية ..وصاحب القصة بعرفو معرفة شخصية.. وانا ضفتلا شوية تفاصيل وقت كان فاقد ذاكرتو.. وهالخاطرة يلي باخر القصة بقلم رضى.. ادعو للشباب بالرحمة والمغفرة