اغتصاب بالحلال

[صفا النعمان]

#سلسلة_غصة_قاصر

#قصة_واقعية

(الجزء الاول)
بنت حلوة كتير متل فلقة القمر لساتا باول طلعتا.. عم تتمشى ع الاسطوح وهي مشلبكة اديها ببعضن .. عم تسرح بخيالا وتعيش حياتا الخاصة وامنياتا بهالسكون والهدوء ..

رفعت راسا واطلعت بالنجوم ..
زهر: يا ترى شو عم يعمل كرم هلا .. فيكن توصلولو سلامي .. خبرو قديش بحبو وعم اتمنى كل ليلة كون الو ويكون الي .. خبرو قديش مرة خبرتكن عنو وشكيتلكن حب مغروس فيني

دمعو عيونا وهي عم تحكي .. نزلت عيونا للارض وفركت اديها ببعضن .. (اوووووو برررد .. خلص بكفي .. رح انزل ع البيت )

وهي نازلة ع الدرج ورايحة لبيتا .. نصدمت من يلي شافتو .. وقفت وشهقت وهي مفتحة عيونا ع وسعهن وخدودا صارو حمر من الخجلة ..

وقت شافوها هني كمان تلبكو .. عدلو وقفتن وبسرعة لارا حطت حجابا ع راسا وبعدت عنو لكرم ..

حطت زهر عيونا بالارض ونزلت ركض ع الدرج من غير ما تحاكيهن ولا كلمة .. وراحت ع بيتا...

-------------------

انا زهر .. بهالوقت كان عمري 14 سنة .. ومتل ما عرفتو انو انا حلوة كتير .. .احلا وحدة ببنات العيلة ..
كرم هو ابن عمي .. شب بيحمل كل الصفات يلي بتحلم فيها ايا بنت .. بحبو كتير وبعشقو ..
لارا هي بنت عمي التاني .. وحيدة اما .. لهيك اما معطيتا راحتا بزيادة .. وع طول برا البيت ..

وقت شفتا هي وكرم ع الدرج نصدمت .. كانت شالحة عن راسا.. وكرم عم يلعبلا بشعرا ويلمس وشا .. حسيت بجسمي كلو تكهرب وقت شفتن ..

هالليلة كانت كتير صعبة علي .. قضيتا بالبكي ... بكيت من حزني لانو عرفت بانو كرم ولارا ع علاقة .. وبكيت من خوفي من يلي شفتو قدام عيوني ..

مشت هالليلة بصعوبة كبيرة .. فقت تاني نهار ومشى يومي كالعادة .. ووقت قرب لغروب ومتل كل نهار لبست حجابي ..

زهر: اميي .. طالعة ع الاسطوح لشوف لغروب

امي: لك ما بتملي منو لهالغروب .. كل يوم .. كل يوم

زهر: ههههههه .. ليش في اجمل من الغروب .. سلام

امي: لا تتاخري

زهر: ماشي.. ماشي

طلعت ع الاسطوح .. وانا ماشية ع الدرج وصلت للدرجة يلي شفت لارا وكرم عليها .. حسيت دقات قلبي زادت وتخيلتن قدام عيوني..

بعدت نظري بسرعة وركضت لابعد عن هالدرجات وطلعت ع الاسطوح .. قعدت وسرحت بجمال خلق الله وبالهدوء والسكون ..

لوقت اجاني صوتو وقطع هالاجواء..

كرم: كيفك

التفت عليه وانا قلبي عم يدق بسرعة ..

زهر: هلا كرم

كرم: شو عم تعملي هون

زهر: و.. ولاشي .. قصدي يعني عم اتفرج ع الغروب

كرم: مممممم .. حلو كتير

زهر: ......

سكت كرم شوي وتصفن بالغروب ولف وشو علي ليحاكيني ..

كرم: زهر .. شو بدي قلك

زهر: اي

كرم: يعني .. كرمال يلي شفتي مبيرح .. يعني بقول .. لا تخبري حدا لو سمحتي

حمرو خدودي وحسيت قلبي رح يوقف وحطيت عيوني بالارض..

زهر: ماشي .. ماشي ولا يهمك

كرم: اكيد

زهر: اي اي اكيد .. بالازن منك

كرم: شكرا الك

تركتو ونزلت ع البيت ركيض وانا قلبي عم يدق .. فتحت باب بيتنا ودخلت بسرعة ..

امي: لك شبك امي .. ليش هيك وشك

زهر: هااا .. ولاشي امي

امي: اي وشبك نزلتي

زهر: بردت شوي .. عن ازنك

تركتا عم تطلع فيني وفتت ع غرفتي وبلشت بكي .. قلبي لصغير كان عم ينحرق ..

اغتصاب (الجزء الثاني)

ومن بعد هالحادثة هاي صرت حاول ع طول انو شيلو لكرم من بالي ومن قلبي .. وصرت حاول ع قد ما فيني بعد عن لارا يلي كانت تغار مني كتير .. بس هالمرة انا يلي غرت منا لانو قدرت تسرق قلب الشخص يلي بحبو ..

ورغم بعدي عنن وتجاهلن الا انن ما تركوني .. اسطوح بيتنا كان ع اسطوح بيتو لكرم ..

امي: زهر امي .. هاي لارا اجت لعندك

استغربت كتير وقت قالتلي انو لارا اجت ..

زهر: لارا !! شو القصة مالا بالعادة

امي: يمكن بدا شي .. تعي شوفيها امي

زهر: جايي امي جايي

طلعت لعندا وانا براسي الف سؤال وسؤال..

زهر: كيفك لارا

لارا: مشتاقيتلك كتير .. انت كيفك

زهر: تمام

لارا: تعي لنروح ع الاسطوح .. شو رايك

زهر: اي ماشي .. بس لالبس

طلعنا بوقتا ع الاسطوح .. ووقت وصلنا دقت لارا لكرم ..

لارا: اي كرم .. اي .. اي .. نحنا ع الاسطوح

انا تميت ساكتة وما عرفت شو بدي احكي ..

لارا: زهر حبيبتي .. هلا كرم رح يطلع ع الاسطوح لشوفو ويشوفني .. ممكن بس تراقبيلنا وازا اجا حدا تحكيلي

زهر: هااا .. اي ماشي تكرمي

باستني ع خدي وضحكت .. وبعد بشوي اجا كرم .. شفتن وهني عم يحكو سوا .. قلبي كان عم يتقطع من شوفتن سوا ..

وصارو ع طول يعملو هيك .. صرت انا الحارس لالن ولحبن ..

وبيوم كنا كل بنات العيلة عاملين جمعة متل العادة ببيت عمي ابو لكرم .. (كرم عندو اخوات تنتين .. فطوم ويلي هي رفيقتي .. ويسرى يلي هي رفيقة لارا) .. كنا نجتمع كلنا ع غني وضحك ولعب طول لنهار ..
بيوما ونحنا قاعدين ما شفت غير اجت فطوم ووشا احمر كتير ..

زهر: شبك !!

فطوم: لك .. لك الله يلعنن تنيناتن

زهر: مين هني .. شو صاير

فطوم: لك رحت ع غرفة كرم لاعطي كاسة شاي .. ووقت فتت لعندو شفتن هو ولارا متسطحين حد بعض ع التخت

انا نشف الدم بعروقي .. شهقت وضربت ع وشي ..

زهر: شو هالحكي

فطوم: لا وما خجلو مني .. لك عصب علي كرم وخانقني وع شوي رح يضربني .. قال ما صار شي بينا .. بس كنا متسطحين

زهر: هدي حالك حبيبتي .. تركيهن يسطفلو

لارا كانت حلوة وبيضا ومتل ما قلتلكن وحيدة اهلا وحالتن المادية منيحة .. بس كرم اهلو كانو فقرا .. وبعد بشي شهر من هالشي كرم طلبا للارا بس اهلا ما وافقو .. او بالاحرى اما ما وافقت لانن اهلو فقرا .. ..

اغتصاب (الجزء الثالث)

وقت اهلا للارا ما وافقو ع كرم فرحت من جواتي كتير .. بس بنفس الوقت كنت موجوعة لانن ع علاقة .. وعلاقتن ما انتهت وكرم ضل عم يتواصل معا للارا..

بهالفترة كنت صف تامن .. وبيوم ندق باب بيتنا .. ركضت لافتح الباب .. ووقت فتحتو كان شب ع الباب هو وعمي .. ووقت شافني نزل نظرو بالارض وبعد عن الباب ..

عمي: كيفك زهر

زهر: الحمد لله تمام

عمي: وينو ابوكي .. ندهيلي ياه

زهر: اي يالا

وبعد بيومين كنت قاعدة انا وماما واجا كرم لعنا وهو عم يتبسم..

امي: اهلا كرم ابني

كرم: جاييكن بخبر حلو

امي: خير ان شاء الله

كرم: خير خير .. جبتلك عريس لزهر

امي: والله هههه .. ومين هالعريس

كرم: ابن رفيقو لعمي

انا ما عرفت بوقتا شو اعمل .. تلبكت كتير ويلي زاد لبكتي هو كرم .. حسيت بسكين عم تقطع فيني من جواتي .. الشب يلي بحبو بدو يخطبني لشب غيرو..

هالشب كان اسمو رامي .. كان كتير حاببني .. كل يوم يجي لعند كرم ويسالو انو شو صار معنا .. وانا كل مين يسالني قلو ما بعرف ..

وطلب حسابي لسكايب ليحاكيني .. كان طول لنهار يبعتلي وما رد عليه .. ما حبيتو ابدا ولا دخل لقلبي.. كرم كان محتلو لقلبي ومانو رضيان يطلع .. بس كنت كتير متدايقة كرمالو للشب لانو كتير كان متلهف وحاببني ..

وبعد بعشر ايام اجا لعنا كرم ليحاكيني..

كرم: يعني شو .. بدك ياه او لا

زهر: لا .. ما بدي ياه .. بس خايفة عليه

كرم: اي لا تخافي ما بيصرلو شي

ووقف كرم ليروح ويقلو انو ما في نصيب ..

زهر: كرم

كرم: اي

زهر: لا تقلو ياها دج .. مهدلو شوي

تبسم كرم وهو عم يطلع فيني..

كرم: ماشي .. رح مهدلو

زعل رامي كتير وقت قلنالو ما في نصيب وزعلت عليه كتير .. بس ما كان بئيدي ما قدرت حبو ولا دخل لقلبي ..

وبعد بيومين اجت لعنا مرت اخو لكرم .. وقعدت معا انا وامي ..

مرت اخو: بصراحة يا ست زهر .. كرم بدو ياكي وطلب مني اجي وقلكن قبل ليبعت امو واخواتو .. فشو رايك يا حلوة
(امو لكرم بتكون خالتي)

وانا من غير وعي قلتلا (اي)
صارت هي وامي تضحك .. وعيت بوقتا ع حالي واطلعت بامي ..

زهر: شو رايك انت امي

امي: بضل ابن خالتك يا امي واولا من الغريب .. وبنعرفو وبيعرفنا وكمان بتضلي حدي

ونحنا عم نحكي اجا كرم .. اطلع بمرت اخو وهو عم يتبسم (ها .. طمنيني .. حكيتي بالموضوع )

مرت اخو: الف مبروك يا عريس

كرم: جد عم تحكي .. اي هاد احلا خبر

كان عم يحكي وهو عم يطلع فيني ويتبسم .. وانا كان قلبي من جوا عم ينط من فرحتو ..

وبنفس لنهار اجت خالتي وبناتا لكبار وطلبوني .. اجا ابي لعندي ليسالني ..

ابي: شو رايك يا بنتي

زهر: ما بعرف .. متل ما بدك بابا

بس من جواتي كنت طيراني وبدي صرخ وقلو اييييييييييييييي .. واخيرا حكون لكرم ..

ابي: لكن ع بركة الله .. توكلنا ع الله..

فرحو كلن وقامت خالتي وصارت تبوس فيني وتباركلي ..

اغتصاب (الجزء الرابع)

بعد بشي اسبوع اجا كرم واهلو كلن ليقرؤو الفاتحة .. كنت طيرانة من فرحتي وكرم نفس الشي ..

عملتلن بالاول شاي وحطيتلو بكاستو ملح .. عطيتو ياها وهو ما كان بيعرف انو فيها ملح .. وقت شرب منا واكتشف انو فيها ملح صار يطلع فيني ويتبسم وشربا كلا وصرت انا واخواتو نضحك عليه ..

رجعت عملت قهوة وحطيتلو بفنجانو ملح .. صار يشرب شوي شوي ويطلع علي ويتبسم .. وبعد بشوي ابن عمتي خربط بفنجانو وشرب منو ..

ابن عمتي: يييع .. لك شو هاد .. كيف عم تشربو

كرم: ههههههههه .. اي ع قلبي احلا من العسل

وكلن صارو يضحكو عليه .. كانت السهرة كتير حلوة .. الكل كان مبسوط .. كلن كانو عم يحكو وانا كرم بس عم نطلع ببعض وساكتين .. عيوني وقلبي كانو عم يودولو رسائل ..

كنت بدي قلو واخيرا صرت الك .. بعد هالفترة من العزاب صرت حلالك .. انا بموت فيك ومن زمان يا كرم ..

بس ع طول كان في خوف بقلبي .. او تانيب ضمير ما بعرف .. لارا من بعد ما تمت قراية الفاتحة صارت ع طول تلبس وتتزين وتتمكيج وتقضي اغلب وقتا عندن .. كنت انخنق وانزعج كتير وقت ادرى انو هي عندن ..

ما كانت تفوت ايا فرصة لتزعجني .. واول لقاء كان بينا بعد الخطبة كانت جانة ورح تنجلط ..

لارا: لك ع شو مبسوطة يا جدبة .. لك خطبني قبل ليخطبك .. بس هاد مستواك .. فضلتي هههههه

زهر: عيب عليكي لارا .. ما بصير هالحكي .. ومو زنبي انو امك ما بدا تعطيكي ياه ولا زنبو

لارا: ههههه اي بعرف بعرف حبيبتي .. تتهني

ويلي كملا معي وقت اجت اختو فطوم لعندي وحكتلي يلي حكتو ..

فطوم: زهر .. رح قلك شي

زهر: خير فطوم .. شبك

فطوم: هلا انت ليش قبلتي باخي .. لك رامي احسن منو بكتير .. تركيه شو بدك فيه .. وكمان ...

زهر: شو كمان

فطوم: بصراحة هند بتحبو لكرم .. واجت لعندي وهي جانة وعم تبكي وحلفت مليون يمين ما رح تاخد غيرو

(هند بنت عمي وكمان بتحبو لكرم )

زهر: فطوم شو هالحكي .. ليش عم تحكيلي هيك .. حرام عليكي .. بدك اترك كرم كرمال هند

ووقفت وطلعت من غرفتا ..

كرم: شبو حبيبي .. ليش مزعوج

زهر: ما في شي

كرم: لك عم تبكي .. شو صاير

زهر: (تبكي) لك انت ليش خطبتني .. هااا ليش .. انا ما عاد بدي ياك روح خطبا لهند روووح

وتركتو واقف ومصدوم ورجعت ع بيتنا ركض .. وهو بعد ما انا رحت راح وسالا لفطوم وخبرتو كلشي صار .. وجن جنانو عليها ومنعا تحاكيني .. وبعدا اتصل فيني ..

كرم: لساتك معصبة

زهر: لا .. ماني معصبة

كرم: لك من كل عقلك عم تسمعي كلامن .. لك انا لو بدي ياهن كنت خطبتن لالن .. بس انا اخترتك انت مو هني

زهر: اي ولارا

كرم: شبها لارا .. ع فكرة انا ما حبيتا .. لارا كانت تسلاية وبس .. انا ما حبيت غيرك

حكينا شي ساعتين لوقت رقت .. بس ابدا هالهاجس ما راح ... وكنت اتحايد احكي معو ع قد ما فيني .. وتميت شهر وانا هيك .. كان يبعتلي وما رد عليه .. وما اقبل شوفو غير وقت يكون مع اهلو لبيوم كانو اهلي مو بالبيت .. واجت عندي مرت اخو ..

اغتصاب (الجزء الخامس)

زهر: اهلا وسهلا .. تفضلي

مرت اخو (منى) : ما بدي فوت .. جاي لاخدك نتمشى شوي نحنا وكرم .. شو رايك

زهر: مممممممم

منى : لك شبك .. لبسي لبسي

زهر: هههه ماشي

لبست وطلعت معا .. مشينا نحنا من طريق وكرم من طريق كرمال عيون الناس ولحتى ما يحكو علينا لانو لسا ما تمت خطبة رسمية وتلبيس محابس ..

ونحنا ماشييين ..

منى : زهر شبكن انت وكرم .. يعني ليش ما عم تحكو سوا

زهر: لا ولاشي .. بس بابا ما بدو لتم خطبة رسمية

منى : يعني ما في شي تاني

زهر: لا ابدا

منى : ان شاء الله .. كرم بموت فيكي وبعشقك .. خليكي حدو ولا تخسريه

زهر: ان شاء الله

صح قلتلا هيك .. بس كنت من جوا كتير عم اتعزب .. كنت عم حس بتانيب الضمير كرمال لارا وهند .. وكنت خايفة يرجع ع علاقة بلارا بعد زواجنا .. كان عندي خوف كبير انو امورنا ما تمشي ..

التقينا من بعدا بمطعم بعيد شوي عن منطقتنا

منى: رح اتركن لتاخدو راحتكن انا .. يالا سلام

تركتنا سوا وراحت .. كنت كتير ملخبطة .. من جهة بدي كرم وبدي عيش معو احلا قصة حب .. ومن جهة تانية خايفة منو ومو مطمنة ع مستقبل هالحب

كرم: كيفك

زهر: الحمد لله .. تمام

كرم: ليش ما عم تطلعي فيني

زهر: ........

مجرد وجودي جنبو كان كفيل بانو يحرك كل خلية حسية بجسمي .. ويرفع حرارتي .. وكانن هالحواس عم يعلنو حرب جواتي .. عم يصيحو فيني ويقلولي مسكي اديه .. اطلعي بعيونو .. دوبي فيهن .. عترفيلو بالحب يلي عم ياكلك ويعزبك...

كرم: شبك زهر .. ليش ما عاد حاكيتيني ولا رديتي علي

زهر: هاا .. لا ما في شي

اطلع في بنظرات لاول مرة بشوفا بعيونو .. خلا جسمي يتكهرب منا .. وما قدرت ضل اطلع فيه .. وبعدت عيوني عنو

كرم: زهر شو صاير .. احكي

زهر: بصراحة كرم انا خايفة من لارا .. وخايفة تتسببلنا بمشاكل بعد الزواج .. لانو بعرف انو علاقتكن كانت قوية من قبل

كرم: كيف يعني قوية .. انا قلتلك من قبل انا كنت اتسلا معا

اطلعت بالارض وكملت

زهر: اي ويوم كنتو متسطحين سوا ع تختك .. شو صار

تلبك وحمر وشو .. (مين خبرك انت)

(مين ما كان .. جاوبني هلا.. بصراحة ما كنت بعرف انو واصلة معكن لهون )

(اي وهلا غيرتي رايك فيني يعني)

(......)

(سمعي زهر .. انا قلتلك وبرجع بقلك لارا كانت تسلاية وبس .. وما صار شي بينا .. فلا تحطيها سبب بينا)

حكينا كتير ومن بعدا رجعنا ع البيت وانا لساتني متل ما انا .. ما قدرت اطمن ولا ارتاح .. وموعد كتب لكتاب والعرس عم يقرب .. فقررت انو اعمل استخارة .. وبالفعل اعملت استخارة .. ومضيتا طول الليل عم اتقلب .. وشفت منام كتير زعجني .. فقررت انو خلص انهي كلشي معو

ومن تاني نهار دقيتلو وقلتلو يجي لانو بدي حاكيه بموضوع .. وبعد نص ساعة كان عندي

كرم: شوفي.. شو صاير

زهر: بدي حاكيك بموضوع بس خايفة انو تعصب

كرم: شو صاير

زهر: .......

كرم: احكي .. ما عاد بدك ياني مو

زهر: اي

حمر وشو ودمعو عيونو واطلع في بعيون كلن حب وعتاب

مع دخلة امي ع العرفة .. ووقت شافتو

امي: شو صاير .. شبكن

كرم: بنتك ما عاد بدا ياني

جنت امي واطلعت في .. (ليش مفكرة نحنا عم نلعب .. شو صاير لحتى ما عاد بدك ياه)

كرم: شو عملتلك انا وبشو غلطت معك .. عم تحاسبيني ع ماضي يا زهر

وقت شفتو هيك قلبي وجعني كتير عليه وقلت بيني وبين حالي ما رح اخسرو كرمال ايا حدا ..

اطلعت فيه واضحكت (كزبة نيسان)

اطلع في وحمر وشو اكتر وبعدا سحب نفس وهدي شوي (اي ماشي ست زهر الك وحدة)

ومشت الايام وخلصت فترة الخطبة وبلشنا نجهز للعرس .. واجت خالتي امو لكرم ورحنا ع السوق لنشوف طقم النوم .. حاولت كتير انو اتهرب منن واجل اكتر واكتر بس بالاخير ما قدرت .. كنت عم انخنق .. كل الحب يلي كان الو بقلبي صار يخنقني ويكتم ع نفسي ..

ورجعت بعتت وراه مرة تانية ..

زهر: كرم انا خلص ما عاد فيني .. عم شوفا للارا بمنامي .. صارت متل خيالي مرافقتني

كرم: لك انا خبرتك هاد شي وراح وانا هلا بحبك انت .. انت وبس

زهر: ........

كرم: شبك سكتي .. يعني خلص هيك

زهر: اي خلص

وقف وهو كتير متدايق واطلع فيني ..(هاي حياتك وما فيني اجبرك .. بخاطرك)

تدايقت عليه .. بس بنفس الوقت حسيت بحمل كتير تقيل وانشال عني ..

وبالمسا ما شفت غير خالتي اجت لعنا ..

خالتي: لك هلا لتزكرتي انو ما بدك ياه .. لك بشو غلط معك هااا .. بشو

طبعا اهلي لوقتا لعرفو انو انا فسخت خطبتي معو ..

وصارت خالتي تبهدل في وهي كتير معصبة وبعدا عصبت ع اهلي .. (لك انتو ليش لتردو عليها .. لك لساتا صغيرة وما بتعرف مصلحتا)

امي: بس نحنا ما بنجبر بنتي ع شي .. هاي حياتا

قام خالتي عصبت بزيادة وبهدلتا لامي وطلعت من عنا ..
وبعد ما راحت امي ضربتني وبهدلتني .. (لك ما زالك ما بدك ياه ليش ما قلتي من اول هاا .. لييش )

هي كانت عم تصرخ وانا ساكتة وما حكيت ولا كلمة..

اغتصاب (الجزء السادس)

وبعد ما فسخت خطبتي من كرم تقدملي عريس عن طريق اما للارا .. كان الشب ابن اختو لجدي .. اجو امو واخواتو لعنا شافوني وعجبتن .. واخدو موعد من اهلي واجو تاني نهار والشب معن ..

عملت قهوة ودخلتا .. كان شب كتير طويل .. ووقت فتت صار يطلع فيني نظرات تفحص .. كانو عيونو كبار وحلوات .. بس الو دقن طويلة وهامل حالو ..
وقت اطلع فيني اجت عيني بعينو خجلت كتير وضيفتن القهوة وطلعت ..

لحقتني امو ..(لك شبك يا بنتي ليش ما قعدتي معنا تعي تعي .. ترا هاد ابني حنون وكويس وشغيل وبيصلي وبخاف الله.. تعي لتشوفيه ويشوفك)

انا خجلت منا وما عرفت شو بدي قلا .. ورحت معا وقعدت .. ووقت قعدت صار يطلع فيني هو واختو ويتهامسو ويضحكو .. قمت قعدت شوي وطلعت ..

لحقتني امي .. (شبك امي .. عجبك الشب .. الجماعة عم يحكو فيكي)

(ما بدي ياه امي .. ما حبيتو )

دخل علينا جدي .. (شو يا زهر .. عجبك الشب)

(بدي فكر جدي)

(لك اختي ما في منا .. والجماعة مناح ودينين .. والشب عين الله عليه .. شو بعد بدك اكتر .. توكلي ع الله)

(تركوني فكر جدي .. وكمان انا ما شفتو)

(اي بسيطة .. هلا بنورجيكي ياه)

قعدنا بغرفة انا وامو وامي .. وهو كان مقابيلي بالغرفة التانية .. كنت عم اطلع فيه ..

امي: شو يا امي .. شو رايك .. موافقة

اطلعت بامي وهمست بادنا (امي ما بدي ياه .. كتير هامل حالو)

قام سمعتني امو .. (اي والله جاي من شغلو .. شحطتو شحط .. قال ما بدو يتزوج .. بس هلا عجبتي وطار عقلو فيكي .. والك علي لخليه يقصا لهالدقن ويرتب حالو)

زهر: قديه عمرو

امو: 42

وما شفت غير اجا هو واختو ع الغرفة يلي نحنا فيها .. وطلعو كلن وتركونا لحالنا لنتعرف ع بعض ..

بلال: كيفك

زهر: الحمد لله منيحة

بلال: شبك هيك حمرو خدودك .. هههههه برايي تلبسي خمار لاحسن احكي معك

زهر: هههههه

بلال: اي .. سمعت انو كنت مخطوبة .. ليش فسختي

زهر: اي لانو كان نسونجي

بلال: قديه عمرك

زهر: 15

بلال: العمر كلو .. ممممم .. طيب ما بدك تساليني شي

زهر: لايا صف دارس

بلال: سادس .. ما كنت شاطر بالمدرسة لهيك تركت

زهر: وقديه عمرك

بلال: 24

زهر: امك قالت 42

بلال: شو ههههه .. لا بتكون خربطت .. كل هالقد باين علي كبير

زهر: اي

بلال: ههههههههه.. طيب وهلا شو .. عجبتك والا لا .. معك تلت خيارات

زهر: شو هني

بلال: يا اي .. يا اي .. يا اي

زهر: ههههههه

واجا جدي ونحنا عم نحكي .. (اي يا زهر .. وهاي شفتي للشب .. ونحنا كلنا موافقين عليه .. قولي ع التياسير يا بنتي)

(ع التياسير)

وانا قلت هالكلمة وانا مفكرة انو معناها رح فكر .. بس ما بلاقيهن غير بلشو يقرؤو الفاتحة وانا لساتني مصدومة ..

وبعد بيومين اتصلو ع اهلي ليحددو موعد كتب لكتاب واهلي وافقو .. كانو كتير مستعجلين لانن بيعرفوني كتير عم اتقلب ..

اغتصاب (الجزء السابع)

وبعد بيومين اجو لنكتب لكتاب .. كنت بالصدفة فاتحة ع موبايلي انا جايي الليلة افرح فيكي .. كنت ماني عرفانة افرح او احزن .. تمكيجت ورتبت حالي لوقت وصلو .. ووقت سمعتن وصلو ركضت طفيت الموبايل وطلعت لعندن ..

وكنا عازمين قرايبينا .. ومنن خالتي وبناتا .. ما كانو يجو لعندي من وقت يلي صار .. بس بيوما اجو .. اجت خالتي وسلمت علي وبكيت ولفتني ..

خالتي: الله يسعدك يا بنتي

كانت مشاعري كتير ملخبطة .. كنت حابة افرح بس ماني قدرانة .. يمكن لانو كرم كان لساتو بقلبي .. او يمكن قلبي وجعني وقت شفت خالتي .. او لانو ماني مقتنعة فيه لبلال .. ما بعرف

كانت الحفلة بسيطة وحلوة .. كتبنا لكتاب ووزعو حلو .. وبعدا عملت قهوة ووزعت عليهن وقعدت حدو ..
اطلع في بكل حب .. (حليانة )

خجلت كتير ونزلت راسي .. (تسلم)

سهرنا سهرة ظريفة ولبسنا المحابس .. وتاني نهار رحت معن ع منطقتن وجهزت معن للعرس والدهب وكلشي .. قضيت معو لبلال اوقات حلوة كتير .. كان مرح كتير وع طول عم يضحكني ..

وبعدا بيومين رجعت ع البيت وعملت وداعة لرفقاتي .. لفيت شعري وكلشي .. واجا بلال ورقصنا سوا ..

تاني نهار فقت ع صوتا لامي ..

امي: يالا يا بنتي .. ما بدنا نتاخر عليهن

قمت وجهزت حالي ولبست وودعت اهلي وبنات عمومي وانا عم ابكي .. كنت كتير كئيبة وحزينة .. هالغصة كانت ملازمتني وما بدا تروح .. كانت عم تخنقني .. ركبنا بالسيارة واجت امي معي ومشينا وانا لسا عم ابكي ..

امي: خلص يا روحا لامك .. خاص يا عيوني

هالدموع ما حلا تخلص !! عم يزيدو كتير هالدموع ويهرو من غير وعي .. وكملت معي وقت صار يلي صار .. كنا بطريقنا وما شفنا غير الطيارة رمت قذيفة قدامنا .. وبلش لصريخ والغبرة .. والقذايف عم تزيد .. وانا من خوفي عم انتفض واستفرغ .. والطريق سكرت وما عادت تيسرت معنا ..

تعبت اعصابي اكتر منا تعبانة .. وبعد معاناة كبيرة قدرنا نوصل .. كانت تيابنا كلا غبرة ووسخ ..
دخلت مباشرة تحممت ولبست ولفيت شعري وطلعت لعندن .. وبلش الرقص والغني .. وبعد شي ساعة ..

حماتي: زهر تعي حبيبتي لنرتبلك مكياجك

زهر: ليش انتزع ؟؟

حماتي: اي اي حبيبتي

مشيت معن ودخلوني ع غرفتي .. وتفاجات وقت شفتو لبلال هنيك ..

زهر: انت هون

بلع ريقو واطلع علي .. (اي شبك متلبكة )

ووقف ليجي لعندي .. قمت انا من خجلتي طفيت الضو .. وهو فرط ضحك علي ..

بلال: لك شبك طفيت الضو

زهر: ........

بلال: طيب ماشي .. رح روح جيب كاسات للكولا

طلع من الغرفة وانا بسرعة ستغليت الفرصة وشلحت البدلة وقبل لالبس كان هو راجع .. وهون ما كان الي مهرب وصار يلي صار ..

بس للاسف ما تمت امورنا .. ما بعرف شو يلي صار معي .. كنت خايفة كتير ومتلبكة .. ووقت قرب علي حسيت بوجع بعمري ما حسيتو قبل هيك .. صرت صرخ باعلا صوتي .. وهو ما تركني ولا ريحني لوقت كنت رح يغمى علي من الوجع ..

تركني وقتا وصار يهدي فيني وانا ابكي .. جسمي بلش ينتفض من الخوف ومن الوجع ..

ندق الباب واجت امي وحماتي ..

امي: شبك امي .. ليش عم تبكي

زهر: ...........

اطلعت حماتي ببلال .. (ما تمت اموركن)

بلال: لا امي

حماتي: اي مو مشكلة .. رتاحو هلا ولبكرة بتكملو

طلعو من الغرفة وهو ضمني وصار يهدي فيني ... كنت كتير خايفة منو .. ودوامة عم تلف براسي .. انو ازا كل هالوجع وما تمت امورنا كيف وقت اتم ..

اغتصاب (الجزء الثامن)

اجا تاني نهار وكان الكل عرفان بانو ما تمت امورنا .. وبلش الكل يحكي معي .. وسلايفي بلشو يخبروني عن دخلتن .. وانا زاد خوفي ومتت رعبة ..

بقيت ما خليه يقرب مني خمس ايام .. كنت شوف غرفتنا متل جهنم والتخت متل الجمر .. ما عدت اقبل يقرب مني بنوب .. وهو تاركني ع راحتي ..
وبعد الخمس ايام اجت حماتي وشحطتني من المطبخ وهي كتير معصبة ...

(ليش ما عم تخلي يقرب منك .. لسا بدك ابن عمك يعني )

(لا مرت عمي شو هالحكي)

(اي لكن دخلي ع غرفتك بسرعة ولبسي شي لزوجك ورتبي حالك .. اليوم كلشي رح يخلص .. فهمانة)

دمعو عيوني ورجف قلبي .. (لا ما بدي مرت عمي )

كنت لسا موجوعة من هديك الليلة ..
عصبت بزيادة وصارت تشدني وتقلي (امشي قدامي بسرعة )

كانت عم تشدني وهي عم تسب وتبهدل .. بهديك اللحظة حسيت حالي كرهتو وكرهت امو وكلشي بيتعلق فيه ..

دفشتني ع الغرفة .. وهو كان مسطح ع التخت واجت اختو ع سواطنا ..

زهر: تركيني مرت عمي بترجاكي (تبكي)

بلال: لك شو في

اختو: وعم تسال اخي .. اي خلصو كلشي حاجتكن

حماتي: هلا رح تنهو كلشي فهمااانة ولي

زهر: (تبكي) ما بدي .. مااااااا بدي .. تركوني

اختو: اي مو بكيفك ست زهر

زهر: مرت عمي تركيني

حسيت حالي متل يلي وقع بين الوحوش وما الو مهرب منن ..صرت اسحب حالي من ايدا وهربت ع البرندة .. (والله ازا ما تركتوني لزت حالي .. تركوني )

بلال: لك خلللص .. تركونا .. تركونااا

حماتي: لك الله يلعنك

وتركونا وراحو .. وقت شفتن راحو قعدت ع ارض البرندة وصرت ابكي ..

بلال: اي تعي .. ما رح قرب عليكي

دخلت لجوا وقعدت ع طرف لسرير .. (بلال طلقني .. ما بدي ياك )

قام هو عصب كتير علي (اي لا ما حزرتي ما رح طلقك )

زهر: انا ما رح كون الك .. فهمااان

بلال: وما زالك ما بدك ياني ليش وافقتي

زهر: ما وااافقت .. هني يلي وافقو .. انا ما بحبك .. مااا بحبك

عصب بزيادة وحمر وشو وتركني بالغرفة وطلع وضرب الباب وراه ..
حطيت ادي ع عيوني وزدت بالبكي .. وصرت فكر كيف رح اخلص من هالمصيبة .. وبسرعة طلعت من الغرفة وهربت ع بيت سلفي ..

نمت هديك الليلة عندن وما رضيت ارجع لعندو .. حبست حالي بالغرفة وضليت ابكي لتورمو جفوني ..

وتاني نهار الصبح اجت لعندي حماتي ..

حماتي: ليش هيك عم تعملي .. هاا .. لك انت فهمانة شو هاد بيعني يا جدبة ..

زهر: ........

حماتي: اي ضلك ساكتة .. لبسي بسرعة رح اخدك لعند الدكتورة

زهر: لشو عند الدكتورة

حماتي: اي لحتى تفحصك ونتاكد ازا كنت بنت او لا

دمعو عيوني وحسيت النار شعلت جواتي ..
(عم تشكو بشرفي .. بشرفي)

(انت يلي جبتيه لحالك .. لبسي بسرعة)

لبست وانا عم ابكي وبلال ما حاكاني ولا كلمة ..

زهر: عم تشك بشرفي يا بلال

بلال: .......

اخدني لعند الدكتورة .. دخلت حماتي لعندا حاكتها وانا قاعدة وعم ابكي ..

حماتي: يالا دخلي لتفحصك

دخلت وانا جسمي كلو عم يرجف ..

الدكتورة: شبك حبيبتي .. لا تخافي .. تسطحي ع التخت

ووقت فحصتني الدكتورة جنت .. اطلعت ببلال ..
(لك انت شو عامل فيها )

حماتي: شبها

الدكتورة : مجروحة جرح كتير كبير ويمكن يحتاج تقطيب .. منيح منا يلي متحملة .. ولساتا بنت متل ما هي

ضلو ساكاتين تنيناتن وانا عم اشهق وابكي ..
عطتني مسكنات وطلعنا من عندا .. وقت ركبنا بالسيارة ..

حماتي: رح ناخدك لعند اهلك

زهر: ..........

وصلنا لعند اهلي ضميتا لامي وقت شفتا وزدت بالبكي ..

امي: خلص اهدي يا بنتي .. اهدي .. رح نحلا ان شاء الله

زهر: اي ما بدي ياه .. بكرهووو .. طلقونيبي امي بترجاكي

امي: زهر .. انت مستوعبة شو عم تحكي .. اهدي هلا بناخدك لعند شيخة لتقرا عليكي قران ومن بعدا رح ترتاحي

وبالفعل اخدوني لعند ست كبيرة شوي بالعمر لتقرا علي قران ..
كانت هي عم تقرا وانا دموعي عم يهرو متل الشلال .. ووقت خلصت حسيت حالي كتير رتحت

اغتصاب (الجزء التاسع)

امي: اي يا بنتي .. رتحتي!؟

زهر: اي امي رتحت

ركبنا انا وامي وحماتي مع بلال .. ولحقنا بابا بسيارتو .. واخدونا لعند بيت اختو .. كان بيت مطرف ..

ووقتا انا عرفت انو لحتى نتزوج هنيك .. جنيت وصرت صرخ .. (لك فهااام .. ما بدي ياك .. لك طلقني .. طلقنيييييي.. لك بكرهك)

اطلع في ببرود (هههههههه .. مو مشكلة )

وقت شفتو بالهبرود حسيت حالي رح جن .. كنت شايفتو شيطان ووحش .. ماني طايقتو ابدا .. شفت قنبلة بالسيارة مسكتا وكنت بدي افتحا .. قام هو بسرعة اخدا من ايدي وامي وحماتي بلشو يصرخو ..

بلال: لك يا مجنونة شو عم تعملي

زهر: لك بكرهك .. بككككرهك طلقنيييييييي

ما رد علي وكمل سواقة .. قمت فتحت باب السيارة وكنت رح زت حالي .. مسكني وصرخ علي ..

امي: (تبكي) لك ليش هيك عم تعملي يا بنتي ليش

صرت صرخ وابكي باعلى صوتي وهوعم يحاول يهديني لوقت وصلنا بيت اختو و نزل بابا من سيارتو وشافني بالحالة يلي كنت فيها ..

اطلع في بعصبية ..
بابا: لك نحنا غصبناكي عليه شي

زهر: لا

بابا: لك لكن ليش هيك عم تعملي ياا كلبة .. ليييييش

وضربني ع وشي ورفسني ع الارض..
(الله يسود وشك .. الله يسود وشك)

راح بابا لبرا وانا ما بعرف شو صرلي .. حسيت حالي عم اتكهرب .. اتشنج كل جسمي وخشبت ... كنت حاسة حالي متل المشلولة .. وعم اسمع صوات حدي .. بس ماني مركزة فيها ..
وقت هديت كانت امي لاففتني وعم تبكي وحماتي وبنت حماي قاعدين ع جنب .. وبلال قاعد حدي وصفنان في ..

صرت ابكي بحرقة ... هاي اول مرة بابا بيضربني ..

امي: الله يهديكي يا بنتي

وقت شفتن هيك عرفت انو ما الي مفر .. فوتونا ع غرفة النوم ..

بلال: زهر .. بربك خلص بكفي .. لك فضحتينا .. خلينا نخلص بربك

زهر: .............(تبكي)

مسك ايدي واطلع في .. (طيب اسمعي خلينا نصلي ركعتين .. اكيد رح ترتاحي .. متوضية انت؟)

زهر: اي

صلينا ركعتين وانا عم ابكي .. ومن بعدا تم الموضوع

بلال: الف مبروك يا عمري

زهرتبكي)الله يبارك فيك

قرب مني ومسحلي دموعي .. (خلص حاجتك بكي .. كلشي منيح .. البسي رح اطلع طمنن)

طلع بلال وخبرن و اجت امي وحماتي سلمو علي
ومن بعدا راحت امي هي وبابا ع بيتن ..
وتاني نهار اجو من الصبح .. كنت فرحانة لانو خلص هالكابوس انتهى .. وبنفس الوقت كنت كتير حزينة ع يلي مريت فيه ..
سلمت عليهن وبوست اديهن .. قام بابا لفني وصار يبكي ..
(الله يرضى عليكي يا بنتي)

هالفترة من حياتي مستحيل انو انساها .. كنت بعرف انو الموضوع لازم يتم .. بس هني باسلوبن كرهوني فيه لبلال وصرت شوفو شيطان ..

ولبعد سنة من زواجي لقدرت اتقبلو وحبو .. كان كتير عم يدللني ويخاف علي .. كلشي بدي ياه مجاب وما تركلي مجال غير اني حبو ..

بعد بسنة ونص من زواجنا لحبلت .. وجبت بنوتة بتجنن.. وهاي هي قصتي صبايا ..
نصيحتي لا تزوجو بناتكن صغار .. وازا صار واضطريتو لهالشي علموهن وفهموهن كلشي قبل دخلتهن ليكونو ع استعداد لكلشي .. متل مانو مو حرام ومو عيب يتزوجو بهيك سن كمان انتو مانو حرام ولا عيب تعلموهن وتفهموهن كلشي ..

انتهت