#قصة_واقعية
(الجزء الاول)
وقت يكون القلب فاضي.. حياتنا بتكون ماشية بحلوها وبمرها .. ايام كتيرة بتمر وما بنحس عليها .. يمكن يمرق اسبوع كامل ويمكن شهر واكتر وما نحس عليه ..
بس وقت يندق باب القلب ونحب بنصير نعد الثواني من حياتنا .. بنبلش نحسب كل لحظة وكل وقت ..
بنوتين حلوين ماشيين سوا .. ياسمين صبية باول عمرا واختا لصغيرة رغد.. هني هيك ع طول .. ما في يوم غير بيطلعو ليتمشو بين الشجر بمنطقة بيتن .. هالمنطقة يلي بترد الروح..
ياسمين: رغودة حاج نطوطة اختي .. عطيني ايدك
رغد: ههههههه .. لك ياسمينة .. بحبك اختي كتير
ياسمين: اي تقبري قلبي .. وانا بموت فيكي
كانو ماشيين سوا ... وياسمين ماسكة ايدا لرغد وعم يحكو سوا .. وفجاة رغد هيك طارت لفوق وياسمين ماسكة ايدا .. وياسمين كردة فعل صرخت هداك الصوت ..
لفت وشا ع اختا وهي لساتا مرعوبة.. وما شافت غير سامي واقف وعم يتصفن فيها وهو مصدوم .. مانو مصدق انو هالصوت طلع من ياسمين..
ياسمين: س .. س.. سااامي
سامر: شبك .. ليش صرختي
حمرو خدودا لياسمين وصار وشا بالالوان .. وقلبا ع شوي رح ينط منا..
سامي: هههههههه .. اسف كتير ما كان قصدي نقزك
ياسمين: لاااا ولا يهمك عادي .. بس انو ما حسيت عليك ... ما بعرف شو تهيالي .. اضرب انا
وغطت عيونا بئديها التنتين لتخبي خجلتا...
سامي: ههههههههه .. يعني متلا تخيلتي رغد طارت مع الهوا .. اي صح رغودة متل الريشة بس ما رح تطير ..
كان عم يحكي ورغد بحضنو عم يكركرا ويلاعبا متل العادة ...
رغد: ههههههههههه .. سامي الحلوووو
زورتا ياسمين ... رغد!!
سامي: جد انا حلو
رغد: اي وبتجننن .. وبمووت فيك .. انت صديقي صديقي
وقت رغد قالتلو هيك فرط ضحك ...
سامي: صديقك .. لك انت احلا صديقة .. بدك ترجعي ع البيت
رفعت رغد كتافا وعبست..
رغد: انا ما بدي .. بس ياسمين بدا
سامي: اي لكن لازم تسمعي كلاما لياسمين
ياسمين: يالا رغد .. مشي
نزلت رغد من حضنو لسامي واشرتلو بئيدا .. ومسكت ايدا لياسمين ..
ياسمين مسكت ايد اختا وسحبتا بسرعة لتخبي خجلتا ..
ياسمين: بخاطرك
سامي: الله معكن
كانت ياسمين عم تمشي بسرعة لتقدر توصل البيت بسرعة .. فاتت ع البيت وركضت ع غرفتا .. حطت حالا ع تختا وهي كتير فرحانة ..
ياسمين: اوووووخ شو بحبك .. لك بعشقك
ياسمين .. بطلة قصتنا .. عمرا 17سنة .. بنت شاطرة بمدرستا .. محبوبة كتير من اهلا ورفقاتا ..
سامي بيكون جارا لياسمين .. شب راكز ومن عيلة محترمة .. عمرو 21 سنة .. ابو ميت وعايش مع امو واخواتو لتنين .. و بيكون رفيق اخوها لياسمين (عمر) .. ورفيقا لرغد .. اختا لياسمين لصغيرة .. يلي عمرا 5 سنين ..
************
لا تسالوني كيف حبيتو لسامي وايمت .. لانو انا ما بعرف .. كل يلي بعرفو هداك الشعور يلي كنت حس فيه وقت شوفو .. شي بيوجع بس حلو .. حلو كتير ..
شعور وقت تحس فيه اول مرة ما بتعود تقدر تستغنا عنو ولا يوم .. شي بيلاعب قلبك وبيحرك كل حواسك .. وبيرفع دقات قلبك ..
شي بيتغلغل بكل خلية من خلايا جسمك .. ووقت تتوجع منو بيبلش يدمر بهالخلايا ..
عشقك وله (الجزء الثاني)
حياتي من بعد ما حبيتو لسامي كتير تغيرت .. صارت كلا سامي .. وقت اكل فكر فيه .. وقت ادرس فكر فيه .. وقت كون لحالي فكر فيه .. وقت كون مع اهلي فكر .. وقت كون بالمدرسة فكر فيه .. ما عاد في شي تاني بحياتي غيرو .. بس سامي ..
اترصد اخبارو من كل حدا بعرفو..
ياسمين: عمر .. اخي
عمر: اي اختي
ياسمين: شو بدي قلك .. هلا رفيقك سامي
عمر: شبو سامي
ياسمين: كيف هو بالدراسة
اطلع عمر في وهو متفاجئ بسؤالي..
عمر: ولشو عم تسالي
انا وقتا كان رح يغط ع قلبي .. وحمرو خدودي..
ياسمين: هااا .. لا ولاشي .. بس كنت بدي عطيك سؤال .. قلت يمكن يقدر يحلو .. ما عم بقدر حلو انا
عمر: ايواااا .. هلا ببعت وراه اختي
وقت قلي هيك طرت من فرحتي .. يمكن ما شوفو .. بس مو مشكلة .. المهم حس بوجودو .. او اسمع صوتو ..
بقيت متل المجنونة قاعدة بغرفتي وعم انطر ..
ياسمين: اااخ .. هلا رح اسمع صوتو .. هلا رح يمسك دفتري .. رح يكتب فيه .. لك اااخ شو بحبووو .. ففففف .. طيب وبعدا .. شو رح اعمل وقت يرجع ع بيتو .. يا الله مني .. لك ليش انا هيك نكدية
وانا قاعدة وعم حاكي حالي ما شفت غير جرس الباب ندق .. وقلبي دق معو .. ونطيت من تختي وحطيت ادني ع الباب ..
ياسمين: واخيراااااا
سمعت صوتو من ورا الباب..
سامي: وينا اختك لصغيرة
عمر: رغد ههههه .. رغووووود .. تعي اختي تعي
رغد: ساااااامي
سامي: اهلا اهلا بصديقتي .. اهلا .. هههه
ياسمين: لك اااخ شو بحبك .. لك بعشق انا .. بعشقك
حبو لسامي كان عم يتغلغل بجسمي شوي شوي .. وكل يوم عم يكبر اكتر واكتر .. ووصلت لدرجة انو اسال رفقاتي عنو ..
ريم رفيقتي .. بتكون قرايبتو ..بتزكر يوما كنا راجعين سوا من المدرسة ..
ياسمين: لك ريم .. هاد قرايبك سامي
ريم: اي شبو سامي
ياسمين: يا الله شو بحسو هادي وراكز .. هو جد هيك
ريم: هههههه .. اي صح هو هيك
وبلشت تحكيلي عنو وانا كتير فرحانة ..
ريم: لك وكتير شاطر بدروسو .. لدرجة انو بيوم استازو غاب لمدة اسبوعين عن المدرسة .. ووقتا وكلو لسامي يشرح لرفقاتو لوقت يرجع
ياسمين: جد .. يا الله
ريم: ههههه .. اي .. بس هالمسكين لو تعرفي شو عملو في رفقاتو
ياسمين: اي هاتي حكيلي
ريم: لك قلب مسخرة لالن .. كان هو يشرحلن وهني يتمسخرو عليه ويمضو الوقت كلو ع ضحك ولعب ومسخرة .. ييي شو عملو فيه
ياسمين: ههههههه
وفجاة هيك ونحنا مسترسلين بالحكي ما نسمع غير هالصوت من ورانا ..
سامي: احم .. احم
لفيت وشي .. ووقت شفتو نشف الدم بعروقي .. وصار وشي ووشا لريم بالالوان وما عاد عرفنا شو نعمل .. بس متصفنين وفاتحين تمنا من لبكتنا وصدمتنا ..
سامي: كيفكن
انا كنت لساتني مصدومة .. وما فقت من صدمتي غير وقت قرصتني ريم بايدي..
ياسمين: هااا .. اي تمام .. تمام
سامي: شوو كنت مسخرة من شوي
ريم.. ياسمين: مممممممم
ما عرفنا شو نقلو .. وانا عم اصفر واخضر وازرق .. ما ضل لون وما تلونتو ..
سامي: لك ايييي .. لك والله كنت اعملون جو للشباب بالمدرسة وطالعن من جو الدراسة والكابة
وانا لحتى اطلع من خجلتي .. حاولت غير الموضوع..
ياسمين: اي .. شو بدي قلك .. كيفا امك .. سمعت انو تعبانة شوي
سامي: امي .. اي منيحة منيحة .. صارت احسن
ياسمين: سلامتا
سامي: الله يسلمك .. يالا بخاطركن
ولف حالو وراح .. انا اطلعت بريم ..
ياسمين: يالا .. الى الوراااء درر .. حااج لليوم
ريم: هههههه .. والله كسحة مرتبة
مع كل موقف كان يصير معي مع سامي كنت حبو اكتر وحسو دخل غرفة جديدة من غرف قلبي ..
سامي صار كل حياتي .. كلا بلا ايا منافس ..
عشقك وله (الجزء الثالث)
ومن بعدا تحول هالشعور لعزاب .. عزاب كبير .. صرت ما اشبع من شوفتو .. ووقت اسمع صوتو قلبي يدق بطريقة كتير غريبة .. ووقت يجي يوم وما شوفو مووت .. جنننن .. صير خانق كل يلي حواليي ..
صرت اترصدلو بس لالمحو او اسمع صوتو .. وقف ع البرندة او اطلع لبرا البيت اتمشى .. دور عليه بكل لحظة .. بدي ياه .. بدي شوفو ..
صارت حياتي متعبة كتير .. ما فيها غيرو .. لا عم بقدر اكل ولا اشرب ولا ادرس من غير ما يكون معي .. تعبت كتير وتعزبت .. لوقت ما عدت تحملت ..
كنت بحاجة لايا شخص لحتى فضفضلو .. لارتاح شوي .. اهلي ما كنت اتجرا خبر حدا فيهن .. ورفقاتي كنت خاف كتير صارحن ..
عشت ايام وليالي كلا مرار ووجع .. ليالي ما كنت نام بسبب هالحب يلي عم يقطع قلبي .. اغلب الايام كنت نام والدموع بعيوني ..
وصلت لمرحلة انو اصحى بالليل وادعي من ربي انو انساه وبطل حبو ..
ياسمين: (تبكي) يا ربي ساعدني لاقدر انساه .. ما عاد بدي شوفو ولا حبو ..
فيسو كنت مراقبتو ع طول .. اترصد ايا تعليق منو او بوست .. بدي عيش تفاصيل حياتو واعرفا كلا .. ما بدي يبقى شي .ما اعرفو ..
وبيوم.. اجتني فكرة انو اعمل حساب تاني وحاكيه بس لريح قلبي شوي .. وبالفعل عملت حساب تاني باسم بنت اجنبية وبعتلو طلب صداقة...
ياسمين: معقول يقبلو .. يااا رب يقبلو .. يااا رب
وبالفعل قبل الطلب... حسيت قلبي صار يرقص رقص من فرحتي ومباشرة بعتلو ع المسنجر ..
ياسمين: مرحبا .. كيفك
سامر: اهلا مين معي ؟؟؟؟:؟؟؟:
ياسمين: انا صبية عايشة باميركا .. بس اصولي سورية .. بحب اهل سوريا كتير .. وحابة كون رفيقتك ... ممكن
سامي: اهلا .. تشرفت فيكي
ياسمين: وانا بالاكتر
ما حكينا كتير .. بس هالكلمتين يلي حكيتن معو كان كافيين ليشعلو نااار بقلبي .. نار عم جر حالي جواتا .. مو لاني بدي احرق حالي .. بس لانو هالنار صارت جزء مني وما فيني بعد عنا ...
صرت كل يوم حاكيه واكتر من مرة ..
ياسمين: بتعرف شي سامي .. رح خبرك سر
سامي: سر شو ؟؟
ياسمين: ممممم.. انا بعرف صبية بتحبك
سامي:
ياسمين: ههههه .. شبك
سامي: يعني انو انت باميركا .. كيف رح تعرفي بنت بتحبني .. ومين هالبنت
ياسمين: هههه .. بنت من عندكن بسوريا .. ولقلك اكتر هي من منطقة .......
بوقتا قلتلو اسم منطقتنا .. وما بشوفو غير عصب وبلش فيني ..
سامي: لك انا قبلت صداقتك قلت بقوي لغتي .. بس طلعتي بنت اللهم عفنا يا الله
حكالي هالكلمتين ومباشرة عملي بلوك ..
ياسمين: يا الله .. لك ليش يا سامي ليييييش .. لك ليش حظرتني .. يا ربي شو رح اعمل هلا .. شو اعمل
عشقك وله (الجزء الرابع)
من بعد ما حظرني رجعت نفسيتي تعبت وقررت انو جد خلص هالمرة رح انساه .. ما عاد بدي ياه ولا بدي حبو .. ونمت وانا عم اطلب من ربي انو يشيلو من قلبي ..
وتاني نهار فقت وطلعت من البيت لروح ع المدرسة وما بشوفو غير بخلقتي ..
صار قلبي يدق وحرارتي رتفعت ..
ياسمين: لك يااا ربي .. لك كل ما قرر انو انساه بيطلع بخلقتي .. لك ليش .. لييييش
مرت الايام .. ومواقفي مع سامي ما عم تخلص ..
بتزكر بيوم كان وقتا اخي عمر وابي متخانقين كرمال دراستو لعمر .. وبوقتا ابي قرر انو يعاقبو لعمر بانو يقفل غرفة الالعاب يلي عنا لحتى ما يدخلا عمر ..
ابي: ياسمين يابي .. بدي منك شغلة
ياسمين: من عيوني بابا
ابي: يرضى عليكي .. سمعي هلا بتروحي بسرعة بتشوفي مين بغرفة الالعاب وبتقفليها وبتجيبي المفتاح لعندي
ياسمين: اي يالا
نطيت ركيض ع الغرفة .. فتحت الباب ما كان في حدا .. قفلتو ورحت لعند ابي ..
ياسمين: تفضل بابا .. هاي المفتاح
ابي: مين كان بالغرفة
ياسمين: ما في حدا
بعد بشوي دق تلفون ابي ..
ابي: الوووو .. هلا
المتصل: يعني ازا متخانق انت وابنك رفيقو شو دخلو لتقفل الباب عليه .. ابنك مانو بالغرفة.. وابني محبوس هنيك
اطلع في ابي هديك النظرة يلي بتوقف القلب .. وانا ماني فهمانة شي .. قفل الخط وبلش فيني .. فش كل نارو فيني ..
ابي: وهلا بلا ما عصب بزيادة .. مسكي المفتاح وبسرعة روحي فتحي الباب
ياسمين : حاضر بابا
اخدت المفتاح ورحت لافتح وشوف مين هالسلال يلي كان متخبي بالغرفة وما شفتو ..
فتحت الباب وكانت عتمة .. ضويت الضو واطلعت ونصدمت بيلي شفتو .. كانو كل قرايبيني بالغرفة .. لك ابن عمي يلي ما بطيقو كمان بالغرفة ..
وقفت اطلع فيهن .انا مصدومة .. وهني عم يضحكو ويصرخو .. كل عام وانت بخير يا حلوة
واكتشفت انن عاملين حفلة لذكرى ميلادي .. انا وقتا طرت من فرحتي .. وانا وقت بفرح باااااكل .. باااكل من غير وعي ..
ما عرفت كيف طفيت الشمع .. بسرعة طفيتن لبلش اكل جتوه .. كنت عم اكل بشفافي وبخدودي كمان .. تمي كان كلو شكلاه .. وما بشوف غير حدا من وراي عم يحاكيني ...
سامي: كل عام وانت بخير
لفيت وشي وياااا ربي ع هديك العلقة .. لك هاد سامي .. قلبي رح يوقف من فرحتو.. بس تمي .. لك تمي ووشي مليانين شكلاه .. لك كلشي فيني شكلاه..
اطلعت بالارض .. وانت بخير شكرا
واطلعت بماما بطرف عيني .. امي بدي محرمة .. امي
بس امي ما انتبهتلي ..
سامي: هالحفلة كتير حلوة
ياسمين: شكرا كتير .. امي .. امي
امي: اي ماما
ياسمين: محرمة
امي: هههههه .. لك لساتك متل لصغار بتاكلي
اطلعت فيها واشرتلا بعيوني ع سامي .. وهي فرطت ضحك ..
سامي: ههههههههه .. صار لازم روح .. العمر كلو
ياسمين: شكرا كتير
هالليلة كانت كتير حلوة وما بتنتسى .. اللقاء يلي بيجي وانت مانك حاسبلو حساب بيكون احلا ووقعو ع قلبك اكبر ..
ونمت وانا عم فكر فيه ودور ع شي طريقة تريح قلبي وتخفف وجعو ..
عشقك وله (الجزء الخامس)
سبحانو ربي ما بتديق على انسان الا ويبعتلو منفس يتنفس منو .. وهاد يلي صار معي .. كنت تايهة وماني عرفانة كيف اتصرف .. كنت عم اتعزب وابكي يوم يوم .. لحتى ربنا بعتلي رفيقة تعرفت عليها ع الفيس ..
بنت ما بتعرفني .. ولهيك تجرات وخبرتا عن قصتي ..
ياسمين: ليال .. فيني خبرك سر
ليال: اي طبعا حياتي .. تفضلي
ياسمين: هلا انت كيف تزوجتي لزوجك .. يعني كانت بينكن علاقة حب الا زواج تقليدي
ليال: هههههه .. لا تقليدي .. نحنا ما عنا هيك شي وبحبو لزوجي كتير .. اكتر ما بتتخيلي
ياسمين: ممممم .. هلا كيف هو الحب
ليال: كيف يعني .. انت حابي شي؟
ياسمين: اي .. بس حب من طرف واحد .. يعني يلي بتقولولو حب فاشل
ليال: وشو عرفك انو من طرف واحد .. يمكن هو كمان بيحبك
ياسمين: لااا .. مستحيل
ليال: اي ومين بيكون .. حكيلي لشوف
ياسمين: هو جاري ورفيق اخي .. لهيك كتير خايفة من هالحب وعم حاول انو طالعو من قلبي .. قولتك بحسن طالعو
ليال: ممممم .. بصراحة وقت بتحبي من قلبك صعب تنسي .. وكمان هو جارك ورفيق اخوكي .. يعني رح يضل بوشك ع طول .. ما حتقدري
ياسمين: والحل
ليال: خبري اخوكي .. حكيلو .. او امك
ياسمين: وليييي .. والله بيدبحوني اهلي .. لك امي وقت عرفت انو عم احكي مع رفيقي بالمدرسة جنت وحبستني بغرفتي .. يمكن هالمرة تدبحني .. لااا مستحيل
كانت هالبنت هي المنفس الوحيد لالي .. وع طول خبرا شو عم يصير معي .. ووقت شوفو ووقت يغيب عني .. وبيوم ..
ليال: ياسمين انت عم تعزبي حالك هيك
ياسمين: اي بعرف .. بس الموضوع مانو بئيدي
ليال: سمعي لالك .. احسن شي تعترفيلو للشب وتريحي حالك
ياسمين: لك ليال انت شو عم تحكي
ليال: لكن رح تضلي هيك .. بكرة بتجني .. خبريه واعترفيلو بحبك ومن بعدا خلص لا تحاكيه .. بس المهم تشيلي هالحمل عنك
ياسمين: بخاف من ردة فعلو .. يمكن يخبر اهلي ويمكن يرفضني .. ويمكن يعتبرني بنت وسخة
ليال: هلا يخبر اهلك ما بتوقع .. لانو ما بيعملا غير شب ندل .. وحسب ما قلتيلي الشب شهم ومحترم .. وانو يرفضك بكون ما بحبك وما بدو ياكي وهيك انت بتريحي حالك وبتعرفي انو انتو مو لبعض وخلص
ياسمين: اوووووف .. لك تعبت .. تعبت كتير .. انا عم موووت .. وربي عم موت .. لك دموعي ما عادو نشفو .. لك ع طول خناقات مع اهلي ع شي وع ولا شي .. تعبااانة يا ليال تعبااانة
ليال: حبيبة قلبي .. اي لهيك عم قلك عترفيلو
ياسمين: وكيف رح حاكيه
ليال: بسيطة .. عملي حساب تاني وخبريه بكلشي بصراحة .. وانو انت مانك طالبة منو شي بس انو بدك تريحي حالك وخلص
ياسمين: اووووف يا ربي ..ماشي .. بشوف
عشقك وله (الجزء السادس)
ترددت كتير وخفت .. كتير اشيا كانت براسي ..
كنت خايفة كتير من ردة فعلو .. خايفة يخبر اخي .. خايفة يخبر اهلو واهلي .. خايفة من نظرتو لالي .. خايفة يحظرني .. خايفة من كلشي .. كلشي .. بس بنفس الوقت كنت حابة اقدر اوصلو وفضفضلو .. لهيك قويت قلبي وعملت حساب جديد وبعتلو طلب صداقة ..
ياسمين: ليال .. كتير خايفة .. رح موت رعبة
ليال: لك لييش .. شو عملتي
ياسمين: عملت حساب جديد وبعتلو طلب .. بس ليقبل
ليال: اي كتير منيح .. لا تخافي .. ههههههه
ياسمين: ليش عم تضحكي
ليال: لك اول مرة بحياتي بشجع ع هيك علاقة .. ما بعرف ليش
ياسمين: هههههه
بقيت ع اعصابي لوقت وافق ع الطلب .. وقتا حسيت بقلبي عم يدق وكانو حدي .. فرحت من جواة قلبي .. وبعتلو ..
ياسمين: مرحبا
سامي: اهلا
ياسمين: كيفك سامي
سامي: هلا .. تمام
ياسمين: بصراحة بروفايلك عجبني .. وبوستاتك حلوة .. فيني كون رفيقتك وحاكيك
سامي: تسلمي كلك زوء .. اي ليش لا
حكينا بوقتا ودردشنا .. ومن سيرة لسيرة ..
سامي: انا موجوع هالفترة كتير
ياسمين: له له .. سلامتك .. ليش
سامي: البنت يلي كنت حبا ماتت من يومين بحادث سير
مدري شو صرلي وقت قلي هيك .. ولا عرفت افرح ولا احزن ..
ياسمين: العمر الك ان شاء الله
سامي: تسلمي
ومن بعد هالمحادثة تلخبطت اكتر من اول .. وما عدت عرفت شلون لازم اتصرف .. وحسيت انو مو مناسب صارحو بحبي الو هالفترة .. وقررت انو ضل حاكيه لوقت شوف فرصة مناسبة وحاكيه ..
نفسيتي كانت من سيئ لاسوا .. ما عم بقدر خبي عليه .. وخايفة اعترفلو .. وصلت لدرجة انو طلعت من البيت من غير ما خبر حدا .. جدران البيت كانت عم تخنقني .. هوا الحارة يلي هو فيها عم يعزبني .. طيفو يلي بكل ركن من هالحارة عم يقتلني .. نبرة صوتو وصداه يلي عم يرن بادني ..
كلشي بيتعلق بسامي تحول لعزاب .. يا الله ما اصعب هالشعور .. تمنيت مليون مرة لو اقدر شيلو من قلبي وعقلي وفكري .. بس ابدا ما فيني .. هو وصل لمرحلة انو ما بينتسى .. وهالشي هو يلي خلاني اترك البيت من بعد ما حاكيتو .. بوقتا طلعت من البيت لقيتو بخلقتي.. جمدت بارضي من لخوف ..
سامي: مرحبا .. كيفك
ياسمين: منيحة .. تمام .. انت كيفك
سامي: تمام الحمد لله
كنت عم اهرب بعيوني .. خفت ليلتقو نظراتنا ويفهم علي .. ويعرف قديه بحبو ..
ياسمين: بخاطرك .. رح روح
سامي: الله معك
تركتو لسامي وركضت .. كنت عم امشي بالشارع وحاول اسحب نفس .. وكانو ما ضل هوا لاتنفسو .. مخنوقة وتعبانة وتايهة ..
بوقتا امي جنت .. لاول مرة بطلع من البيت من غير ما خبرا.. صارت تدور علي بكل مكان .. وراحت لعند اهلو لسامي وسالتو لسامي عني ..
امي: الله يرضى عليك يا ابني .. ما شفتا لياسمين او حاكيتا
سامي: شفتا راحت من هالطريق هون .. بس ما حاكيتا ..وما بعرف لوين راحت
بعد بشي ساعة .. كنت صرت هديانة شوي رجعت ع البيت ..
امي: لك وينك انت يا امي .. وينك خوفتيني عليكي
ياسمين: امبييي.. وين بدي روح .. رحت لعند رفيقتي ريم
امي: لك ما بقي حدا وما سالتو عنك .. اوووعك تعيديها
ياسمين: اسفة امي .. بس كنت بدي منا تشرحلي مسالة مهمة للفحص
امي: الله يرضى عليكي ويقويكي يا امي
رجعت المسا حاكيتو لريح قلبي،شوي.. وبقينا فترة ونحنا نحكي سوا انا وسامي...
ياسمين: هلا ازا قلتلك انو بعرف بنت بتحبك .. شو بتكون ردة فعلك
سامي: هههههه .. ولاشي .. يعني عادي ... بس اكيد رح اسالك مين
ووقت قلي هيك متت رعبة وسكرت وما عدت حكيت معو ..
وبعد شي اسبوع ...
ياسمين: تعبت يا ليال .. تعبت كتير
ليال: ليش يا قلبي .. ما عم تحكو سوا
ياسمين: بعتلي كتير .. بس ما بدي رد .. خلص غيرت رايي .. بدي انساه
ليال: ههههه اي ازا فيكي نسيه
ياسمين: هلا مو احسن انو انساه .. خلص رح انساه .. ما عاد بدي حاكيه
عشقك وله (الجزء السابع)
صح قررت انساه .. بس متل كل مرة ما قدرت انساه .. وكانو قلبي كان عم يتحداني بكل مرة عم حاول شيلو منو ..
سامي: مرحبا
وينك
ردي
من زمان عنك
ليه ما عاد حاكيتيني
شبك عم تقرئي وما بتجاوبي
هاي كانت رسائلو .. وانا عم اقرا وما رد .. عم حارب حالي وحارب قلبي لطالعو منو .. عزاب كبير ووجع اكبر ..
بقيت ع هالحالة يومين ..
ليال: لك انت ليش عم تعزبي حالك
ياسمين: لانو خايفة .. خايفة كتير يرفضني
ليال: اي لهيك عم قلك عترفيلو .. وازا بدو يرفضك بتكوني عرفتي انو ما في مجال لعلاقة معو .. وما بتضلي تفكري فيه .. شو ما كانت ردة فعلو اريح لالك .. انت عم تعزبي حالك هيك
ياسمين: اي والله يا ليال .. انا عم موت
ليال: اي لكن عترفيلو وريحي قلبك
ياسمين: خلص هلا رح افتح وحاكيه .. ورح اعترفلو واخلص ... دعيلي
ليال: ربي يريح قلبك
فتحت الرسائل لحاكيه .. وهون كانت الصدمة .. فتحت عيوني ع وسعن .. وبلشت اقرا وانا ماني عرفانة شو اعمل .. لك ما كنت مصدقة عيوني ..
سامي: ليش ما عم تردي
انا بعرف انو انت ياسمين جارتي
ياسمين انا بحبك وبموت فيكي
لك ليش ما عاد حكيتي
حاكيني هلا ضروري
من قوة الصدمة .. ضليت فترة بس عم اطلع فيهن للرسائل ... انو شو هالمعجزة .. يعني مو معقول .. لك كيف هيك صار .. لك كيف صار يحبني .. وحبيبتو يلي ماتت ومدري شو .. لك كان عارفني من اول ...
ياسمين: اهلين سامي
سامي: ليه ما عم تردي
ياسمين: ممممم .. ما بعرف
سامي: كنت عرفان انو انت من اول .. وما حبيت قلك لتضلي تحاكيني .. بس وقت ما عدتي رديتي ما قدرت الا انو حاكيكي
ياسمين: كنت خايفة كتير
سامي: من شو خايفة
من ردة فعلك
ردة فعلي ع شو .. منحنا كنا نحكي سوا
لا .. انا .. انا بحبك ومن زمان .. صرلي سنين ما عم نام بسببك .. انا بعشقك سامي
ههههه .. لك مو معقول .. وانا يلي كنت مفكر انو ما عم تبادليني مشاعري .. لك انت مغروسة بقلبي غرس .. لك حياتي شو فرحتيني
يعني ما رح تقول عني بنت وسخة .. والله مو بئيدي
ليش لقول عنك هيك .. انت ما عملتي شي
خلصت حكي معو وانا لساتني مو مستوعبة يلي صار ..
ياسمين: يعني انا هلا رح نام وانا عم اضحك .. رح نااام ... اييي رح نااام ..
لاول مرة من سنين بنام وبالي مرتاح .. بس سبحانو ريي ما في شي بيكمل ..
تاني نهار فقت ع رسالة من رقم مجهول ..
الرسالة .. يلي عم تفكري فيه مستحيل .. واهلك صار عندن خبر
عشقك وله (الجزء الثامن)
وقت شفتا للرسالة متت رعبة .. وما عرفت شو اعمل..
ياسمين: يا ربي دخيلك .. مين بدو يكون .. لك ما حدا بيعرف غير انا وهو .. شو يلي صار
بعتت فورا لسامي ..
ياسمين: مرحبا سامي .. بدي خبرك شي مهم .. حاكيني
حبست حالي بالغرفة .. خفت واجه اهلي .. خفت كتير من ردة فعلن ..
رجعت بعد بشي ساعة بعتلو .. وما رد ولا فتح الرسائل ع غير عادتو ..
كنت متسطحة ع السرير وخايفة بايا لحظة تقوم حرب بالبيت .. وعم فكر شو بدي جاوب .. ندق الباب وحسيت قلبي رح يوقف مع دقتو ..
رغد: ياسميييين .. لك لساتك نايمة اختي
ياسمين: شو بدك اختي .. لك اليوم اجاازة .. مو رايقتلك .. روحي من هون
رغد: تعي .. بابا بدو ياكي
وقف قلبي وقت حكتلي هيك .. وشو بدو بابا
رغد: ما بعرف .. هو بغرفتو هو وامي .. روحي لعندن
ياسمين: لك اااخ .. لك شو بدي قلن .. يا الله
رغد: اختييي .. عم تحاكي حالك انت
ياسمين: رغد روووحي من هون .. ليكني جاي
رحت لعندن واجر تقدم واجر تاخر .. دقيت الباب ودخلت ..
امي: تعي امي تعي .. قعدي حدي
قعدت ع التخت حدا لامي وانا منزلة راسي بالارض ..
ابي: شو يا ياسمين .. شو يلي سمعناه .. شو يلي بينك وبين سامي
ياسمين: .............
بلعت ريقي وما حكيت ولا كلمة ..
ابي: احكي .. خجلانة مووو .. لك يا عيب الشوم عليكي .. يا عيب الشوم .. لك انت اخر وحدة كنت متوقع منا هيك تصرف
كان ابي عم يحكي وانا ابكي وعيوني بالارض .. سكت بابا بعد ما خلص وانا لساتني ع حالي ..
امي: وليش ما خبرتيني يا امي .. مو نحنا رفقات .. ليش لتخبي عني
ياسمين: اسفة ماما .. اسفة كتير .. خفت من ردة فعلك .. والله خفت
امي: خفتي !! لك خفتي مني .. لك انا امك
زدت بالبكي لدرجة ما قدرت اتنفس منيح .. وانخنق صوتي ..
ضمتني امي .. خلص اهدي امي .. اهدي
ابي: والله وصرتي صبية يا ياسمين .. الله يهديكي يا بنتي ويحميكي
بقيت بغرفتن وامي تهدي فيني لرتحت شوي .. ورجعت ع غرفتي ونمت .. ما بعرف قديه ساعة نمت.. ووقت فقت شفت الرسائل يلي بعتن ..
ياسمين: لك شبو هاد .. لك ليه ما عم يرد
بقيت طول اليوم وانا عم ابعتلو وهو ما يجاوب ..
حبست حالي بغرفتي .. ما كنت قدرانة شوف حدا او حاكي حدا .. وبقيت هيك لتاني يوم المسا ..
ما قدرت اتحمل اكتر .. رحت لعند اخي .. مو عمر رفيقو لسامي .. اخي التاني احمد ..
ياسمين: احمد .. اخي رصيدي خالص .. فيك تعيرني تلفونك لاحكي مع رفيقتي
احمد: تفضلي اختي .. بس مو تخلصيلي الرصيد ها .. احكي بسرعة وبالمختصر
ياسمين: اي اي اخي .. ماشي
دخلت ع غرفتي ودقيتلو لسامي .. كان قلبي عم يدق مع كل رنة للتلفون .. حسيت هالرنات ما رح يخلصو ابدا ..
سامي: الوو
وقت سمعت صوتو مدري شو صرلي .. ما قدرت احبس دمعتي وفرطت بالبكي .. وصوت شهقاتي كلا بالتلفون ..
سامي: الووو .. لك مين .. ياسمين .. ياسمين .. لك ياسمين هاي انت .. ردي علي .. لك ليش عم تبكي .. ياسمين
ياسمين: ليش هيك عم تعمل فيني .. لك ليييش
سامي: روقي ياسمين .. شبك
ياسمين: شبني !!! لك من يومين وانا عم ابعتلك .. ليش ما عم ترد علي .. ليش .. ليه عم تعزب فيني لييييه
تنهد سامي وانخنق صوتو ..
سامي: ياسمينتي .. حبيبتي .. والله غصب عني .. ما بعرف شو رح قلك .. بس صارت معي ظروف .. المهم هلا انت لا تزعلي وحقك علي
ياسمين: كيف ما بدك ياني ازعل .. لك رح موووت انا
سامي: سلامة قلبك يا روحي .. لك انت ما بيلبقلك الزعل .. انت بس للفرح .. ياسمينة قلبي وكل حياتي
ياسمين: طلاع لكن ع البرندة .. بدي شوفك
سامي: ياسمين .. انا مو بالبيت .. انا عند رفيقي حبيبتي .. ويمكن ما ارجع اليوم ع البيت
ياسمين: اي ماشي متل ما بدك
سامي: يااااسمين .. لا تزعلي حياتي .. والله ما فيني ارجع اليوم
ياسمين: سامي .. مبارح وصلتني رسالة من رقم ما بعرفو .. انو يلي بتحلمي فيه مستحيل واهلك صار عندن خبر .. صرلي من وقتا عم ابعتلك
سامي: اووووووووف يا ربي .. سمعي ياسمين
ياسمين: لك ليش عصبت علي .. لك لييش
سامي: لك مو عليك عصبت .. سمعيني .. انا .. انا تخانقت مع امي كرمالك .. وطلعت من البيت .. وانا هلا عند رفيقي يامن
ياسمين: كيف؟؟ ما فهمت .. كيف كرمالي يعني
سامي: ياسمين .. انا خبرتا لامي انو بدي ياكي .. بس امي رفضت لانو انت صغيرة .. ووقت اصريت انا اشتد الحكي بينا وتركت البيت ليوافقو ويغيرو راين
رجعت فرطت بالبكي من غير وعي ..
سامي: لك شبك هلا كمان
ياسمين: لك ليش هيك نصيبي انا.. لك لسا ما لحق قلبي يفرح .. رجعت لوجع القلب مرة تانية
سامي: لا تقلقي حبيبتي .. ما رح اتركك ولا اتخلى عنك
وانا عم حاكيه ندق الباب واجى اخي احمد.. لك ياسمين ... خلص الرصيد..
سكرت الخط فورا .. يالا اخي خلصت
مسحت الرقم وعطيتو تلفونو .. ومضيت هديك الليلة بالبكي والوجع ..
عشقك وله (الجزء التاسع)
تاني نهار رجعت من المدرسة وتفاجات وقت لقيت امو عنا بالبيت ..
بدلت تيابي ورحت لسلم عليها .. ووقت شافتني حسيتا كانو لقيت شي لقية .. عيونا كانو منفخين من البكي ..
ياسمين: كيفك خالة
ام سامي: اهلين يا بنتي .. دخيل عينك لا تخبي عني .. والله من تلت ليالي ما نمت .. قلبي رح يوقف
انا قعدت وانا مصدومة .. انو شو عم تحكي .. كنت عم اطلع فيها وساكتة ..
ام سامي: وينو ابني دخيلك .. انا بعرف انك بتعرفي وينو .. واكيد خبرك بيلي صار .. بعرف اني قسيت عليه .. دخيلك قليلي وينو
وقت شفتا بهالحالة وعم تترجى فيني قلبي وجعني عليها .. وما قدرت انو ما خبرها ..
ياسمين: خالة .. هو .. هو عند رفيقو يامن
ام سامي: متاكدة ؟
ياسمين: اي متاكدة .. هو عندو
ام سامي: ربي يسعدك ويحميكي يا بنتي
وقربت مني وضمتني وهي عم تبكي .. انا لا شعوريا ضميتا ونزلو دموعي ..
ياسمين: اسفة كتير خالة انو تسببتلكن بهالمشكلة
ام سامي: انا يلي لازم اعتزر منك .. الله يحميكي يا بنتي .. رح اطلب منك من بعد ازنا لامك .. حاكيه لسامي ليرجع ويلي بدو ياه بيصير
امي: ولا يهمك .. توكلي بالله
وبعد ما هديت وراقت رجعت ع بيتا ..
امي: ياسمين .. نحنا شو اتفقنا .. ليش حاكيتي من غير ما اعرف
ياسمين: امي شو بدي قلك .. والله كنت قلقانة كتير عليه .. وكمان كنت بدي اعرف مين يلي بعتلي الرسالة
امي: ايا رسالة
ياسمين: هاي
وفتحت التلفون وورجيتا الرسالة ..
امي: يخرب بيتا الهي .. لك هاي عمتك سندس .. هي يلي خبرتنا انا وابوكي .. شايفتك اكتر من مرة عم تحاكيه ع البرندا .. ووقت تخانق مع امو سامعة صواتن وعرفت كل شي .. واجت خبرتنا ..
ياسمين: هيك لكن .. ماشي امي .. من بعد ازنك بدي حاكيه كرمال امو حرام
امي: كرمال امو قلتيلي .. ههههه ماشي امري لله
دخلت ع غرفتي ودقيتلو من جوالي ..
سامي: ياسمينتي .. حياتي
ياسمين: كيفك
سامي: كتيير منيح بسماع صوتك
ياسمين: ساامي .. امك كانت عنا بالبيت
سامي: شو عم تحكي .. وشو عملت .. شو حكت لاهلك .. يا الله منك يا امي
ياسمين: لك هدي شوي شبك
سامي: هديت .. هاتي لشوف
ياسمين: كانت عم تبكي ومنظرا ببكي الحجر وسالتني عن مكانك وخبرتا
سامي: لك ااخ منك انت لك .....
ما خليتو يكمل حكيو وكملت انا ...
ياسمين: وطلبت مني انو حاكيك وقلك ترجع ع البيت ويلي بدك ياه بيصير
سامي: عم تحكي جد
ياسمين: هههههه .. اي والله جد
سامي: لك ياسمين .. لك بحبك .. لك بموووت فيك .. لك بعشقك .. المسا بتجهزي حالك .. رح جيب اهلي واجي
ياسمين: هههههه لك طول بالك
سامي: لااا .. خلص ما رح اصبر اكتر
سكرت الخط معو وانا لساتني عم اضحك .. ورحت فورا لعند امي وخبرتا ..
امي: لك شو بدن يجو يعملو .. ابوكي مستحيل يوافق تخطبي هلا
ياسمين: ليش يا امي ليش
امي: لك شو ليش .. قبل البكلوريا ممنوع هالشي
ياسمين: فففففففف يا ربي خدني وريحني
امي: وليي .. لك شو هالجيل هاد .. لك ستحي شوي بنتي
تركتا لامي .رحت ع غرفتي وانا كتير مدايقة ..
ووقت المسا اجا سامي واهلو لعنا وطلبوني من ابي..
ابي: بدي اعتزر منكن .. انا ما بخطبا لبنتي قبل لتقدم بكلوريا .. بس هي الكن ان الله راد
سامي: الله يخليك عمي .. لكن ع القليلة خلونا نقرا الفاتحة
ابي: اي ماشي. .. بس هالشي بيضل بيناتنا .. ما بدي تعطو خبر لحدا لوقت الخطبة الرسمية
ام سامي: تكرم اخي ولا يهمك
قرؤو الفاتحة واجت امي لعندي ع الغرفة وخبرتني وباركتلي..
ياسمين: عم تحكي جد امي
امي: اي طبعا جد .. الف مبروك يا امي
ياسمين: الله يبارك فيكي يا احلا ام .. تعي لضمك
امي: اي تعي تعي يا زعرة .. والله وصرتي عروس .. بدلي تيابك وتعي سلمي عليهن
ياسمين: حاضر امي
عشقك وله (الجزء العاشر)
بدلت تيابي وطلعت لعندن .. من وقت دخلت وعيون سامي ما نشالو عني لدرجة انو خجلت كتير من اهلي ..
سلمت عليهن وقعدت معن .. كانت السهرة كتير حلوة .. كنت قاعدة ع الكنبة يلي حدو لسامي .. دقات قلبي كانت عم تعلا وتعلا كل ما شفت نظراتو لالي .. يلي كلا حب ..
خلصت السهرة وودعناهن ورجعو ع بيتن ..
دخلت غرفتي بعد ما ساعدتا لامي بترتيب البيت وجلي الضيافة .. وكان سامي باعتلي شي خمسين رسالة ..
ياسمين: هههههه لك شو هاد
رديت ع رساءلو وبقينا طول الليل عم نحكي سوا ..
بقينا ع هالحالة سنة ونص .. كانت علاقتنا يوم عن يوم عم تقوى .. طول النهار عم نحكي سوا ..
كنا نتلاقى الصبح وهو بطريقو لشغلو وانا بطريقي لمدرستي .. والعصر كان يطلع ع البردا ويحاكيني وانا عم اطلع عليه ..
وهلا انا لابسة فستان سواريه احمر بجنن .. وقاعدة حدو لسامي يلي لابس قميص احمر وجينز وماسكين ادين بعض وعيون الكل علينا ..
اي اي .. لك واختي رغد قاعدة ع جنب وعم تبكي .. رح روح شوفا ..
ياسمين: رغد .. شبك اختي
رغد: لا تحاكيني .. فهمانة
ياسمين: لك ليش حبيبتي
رغد: لانك سرقتي لسامي مني .. سامي صديقي انا مو انت
ياسمين: ههههههههه .. لك يا زعرة .. لا تخافي رح يبقى رفيقك .. انا رح صير مرتو وانت رح تبقي رفيقتو .. شو رايك
رغد: عم تحكي جد
ياسمين: اي طبعا جد .. تعي تعي
انتهت
(الجزء الاول)
وقت يكون القلب فاضي.. حياتنا بتكون ماشية بحلوها وبمرها .. ايام كتيرة بتمر وما بنحس عليها .. يمكن يمرق اسبوع كامل ويمكن شهر واكتر وما نحس عليه ..
بس وقت يندق باب القلب ونحب بنصير نعد الثواني من حياتنا .. بنبلش نحسب كل لحظة وكل وقت ..
بنوتين حلوين ماشيين سوا .. ياسمين صبية باول عمرا واختا لصغيرة رغد.. هني هيك ع طول .. ما في يوم غير بيطلعو ليتمشو بين الشجر بمنطقة بيتن .. هالمنطقة يلي بترد الروح..
ياسمين: رغودة حاج نطوطة اختي .. عطيني ايدك
رغد: ههههههه .. لك ياسمينة .. بحبك اختي كتير
ياسمين: اي تقبري قلبي .. وانا بموت فيكي
كانو ماشيين سوا ... وياسمين ماسكة ايدا لرغد وعم يحكو سوا .. وفجاة رغد هيك طارت لفوق وياسمين ماسكة ايدا .. وياسمين كردة فعل صرخت هداك الصوت ..
لفت وشا ع اختا وهي لساتا مرعوبة.. وما شافت غير سامي واقف وعم يتصفن فيها وهو مصدوم .. مانو مصدق انو هالصوت طلع من ياسمين..
ياسمين: س .. س.. سااامي
سامر: شبك .. ليش صرختي
حمرو خدودا لياسمين وصار وشا بالالوان .. وقلبا ع شوي رح ينط منا..
سامي: هههههههه .. اسف كتير ما كان قصدي نقزك
ياسمين: لاااا ولا يهمك عادي .. بس انو ما حسيت عليك ... ما بعرف شو تهيالي .. اضرب انا
وغطت عيونا بئديها التنتين لتخبي خجلتا...
سامي: ههههههههه .. يعني متلا تخيلتي رغد طارت مع الهوا .. اي صح رغودة متل الريشة بس ما رح تطير ..
كان عم يحكي ورغد بحضنو عم يكركرا ويلاعبا متل العادة ...
رغد: ههههههههههه .. سامي الحلوووو
زورتا ياسمين ... رغد!!
سامي: جد انا حلو
رغد: اي وبتجننن .. وبمووت فيك .. انت صديقي صديقي
وقت رغد قالتلو هيك فرط ضحك ...
سامي: صديقك .. لك انت احلا صديقة .. بدك ترجعي ع البيت
رفعت رغد كتافا وعبست..
رغد: انا ما بدي .. بس ياسمين بدا
سامي: اي لكن لازم تسمعي كلاما لياسمين
ياسمين: يالا رغد .. مشي
نزلت رغد من حضنو لسامي واشرتلو بئيدا .. ومسكت ايدا لياسمين ..
ياسمين مسكت ايد اختا وسحبتا بسرعة لتخبي خجلتا ..
ياسمين: بخاطرك
سامي: الله معكن
كانت ياسمين عم تمشي بسرعة لتقدر توصل البيت بسرعة .. فاتت ع البيت وركضت ع غرفتا .. حطت حالا ع تختا وهي كتير فرحانة ..
ياسمين: اوووووخ شو بحبك .. لك بعشقك
ياسمين .. بطلة قصتنا .. عمرا 17سنة .. بنت شاطرة بمدرستا .. محبوبة كتير من اهلا ورفقاتا ..
سامي بيكون جارا لياسمين .. شب راكز ومن عيلة محترمة .. عمرو 21 سنة .. ابو ميت وعايش مع امو واخواتو لتنين .. و بيكون رفيق اخوها لياسمين (عمر) .. ورفيقا لرغد .. اختا لياسمين لصغيرة .. يلي عمرا 5 سنين ..
************
لا تسالوني كيف حبيتو لسامي وايمت .. لانو انا ما بعرف .. كل يلي بعرفو هداك الشعور يلي كنت حس فيه وقت شوفو .. شي بيوجع بس حلو .. حلو كتير ..
شعور وقت تحس فيه اول مرة ما بتعود تقدر تستغنا عنو ولا يوم .. شي بيلاعب قلبك وبيحرك كل حواسك .. وبيرفع دقات قلبك ..
شي بيتغلغل بكل خلية من خلايا جسمك .. ووقت تتوجع منو بيبلش يدمر بهالخلايا ..
عشقك وله (الجزء الثاني)
حياتي من بعد ما حبيتو لسامي كتير تغيرت .. صارت كلا سامي .. وقت اكل فكر فيه .. وقت ادرس فكر فيه .. وقت كون لحالي فكر فيه .. وقت كون مع اهلي فكر .. وقت كون بالمدرسة فكر فيه .. ما عاد في شي تاني بحياتي غيرو .. بس سامي ..
اترصد اخبارو من كل حدا بعرفو..
ياسمين: عمر .. اخي
عمر: اي اختي
ياسمين: شو بدي قلك .. هلا رفيقك سامي
عمر: شبو سامي
ياسمين: كيف هو بالدراسة
اطلع عمر في وهو متفاجئ بسؤالي..
عمر: ولشو عم تسالي
انا وقتا كان رح يغط ع قلبي .. وحمرو خدودي..
ياسمين: هااا .. لا ولاشي .. بس كنت بدي عطيك سؤال .. قلت يمكن يقدر يحلو .. ما عم بقدر حلو انا
عمر: ايواااا .. هلا ببعت وراه اختي
وقت قلي هيك طرت من فرحتي .. يمكن ما شوفو .. بس مو مشكلة .. المهم حس بوجودو .. او اسمع صوتو ..
بقيت متل المجنونة قاعدة بغرفتي وعم انطر ..
ياسمين: اااخ .. هلا رح اسمع صوتو .. هلا رح يمسك دفتري .. رح يكتب فيه .. لك اااخ شو بحبووو .. ففففف .. طيب وبعدا .. شو رح اعمل وقت يرجع ع بيتو .. يا الله مني .. لك ليش انا هيك نكدية
وانا قاعدة وعم حاكي حالي ما شفت غير جرس الباب ندق .. وقلبي دق معو .. ونطيت من تختي وحطيت ادني ع الباب ..
ياسمين: واخيراااااا
سمعت صوتو من ورا الباب..
سامي: وينا اختك لصغيرة
عمر: رغد ههههه .. رغووووود .. تعي اختي تعي
رغد: ساااااامي
سامي: اهلا اهلا بصديقتي .. اهلا .. هههه
ياسمين: لك اااخ شو بحبك .. لك بعشق انا .. بعشقك
حبو لسامي كان عم يتغلغل بجسمي شوي شوي .. وكل يوم عم يكبر اكتر واكتر .. ووصلت لدرجة انو اسال رفقاتي عنو ..
ريم رفيقتي .. بتكون قرايبتو ..بتزكر يوما كنا راجعين سوا من المدرسة ..
ياسمين: لك ريم .. هاد قرايبك سامي
ريم: اي شبو سامي
ياسمين: يا الله شو بحسو هادي وراكز .. هو جد هيك
ريم: هههههه .. اي صح هو هيك
وبلشت تحكيلي عنو وانا كتير فرحانة ..
ريم: لك وكتير شاطر بدروسو .. لدرجة انو بيوم استازو غاب لمدة اسبوعين عن المدرسة .. ووقتا وكلو لسامي يشرح لرفقاتو لوقت يرجع
ياسمين: جد .. يا الله
ريم: ههههه .. اي .. بس هالمسكين لو تعرفي شو عملو في رفقاتو
ياسمين: اي هاتي حكيلي
ريم: لك قلب مسخرة لالن .. كان هو يشرحلن وهني يتمسخرو عليه ويمضو الوقت كلو ع ضحك ولعب ومسخرة .. ييي شو عملو فيه
ياسمين: ههههههه
وفجاة هيك ونحنا مسترسلين بالحكي ما نسمع غير هالصوت من ورانا ..
سامي: احم .. احم
لفيت وشي .. ووقت شفتو نشف الدم بعروقي .. وصار وشي ووشا لريم بالالوان وما عاد عرفنا شو نعمل .. بس متصفنين وفاتحين تمنا من لبكتنا وصدمتنا ..
سامي: كيفكن
انا كنت لساتني مصدومة .. وما فقت من صدمتي غير وقت قرصتني ريم بايدي..
ياسمين: هااا .. اي تمام .. تمام
سامي: شوو كنت مسخرة من شوي
ريم.. ياسمين: مممممممم
ما عرفنا شو نقلو .. وانا عم اصفر واخضر وازرق .. ما ضل لون وما تلونتو ..
سامي: لك ايييي .. لك والله كنت اعملون جو للشباب بالمدرسة وطالعن من جو الدراسة والكابة
وانا لحتى اطلع من خجلتي .. حاولت غير الموضوع..
ياسمين: اي .. شو بدي قلك .. كيفا امك .. سمعت انو تعبانة شوي
سامي: امي .. اي منيحة منيحة .. صارت احسن
ياسمين: سلامتا
سامي: الله يسلمك .. يالا بخاطركن
ولف حالو وراح .. انا اطلعت بريم ..
ياسمين: يالا .. الى الوراااء درر .. حااج لليوم
ريم: هههههه .. والله كسحة مرتبة
مع كل موقف كان يصير معي مع سامي كنت حبو اكتر وحسو دخل غرفة جديدة من غرف قلبي ..
سامي صار كل حياتي .. كلا بلا ايا منافس ..
عشقك وله (الجزء الثالث)
ومن بعدا تحول هالشعور لعزاب .. عزاب كبير .. صرت ما اشبع من شوفتو .. ووقت اسمع صوتو قلبي يدق بطريقة كتير غريبة .. ووقت يجي يوم وما شوفو مووت .. جنننن .. صير خانق كل يلي حواليي ..
صرت اترصدلو بس لالمحو او اسمع صوتو .. وقف ع البرندة او اطلع لبرا البيت اتمشى .. دور عليه بكل لحظة .. بدي ياه .. بدي شوفو ..
صارت حياتي متعبة كتير .. ما فيها غيرو .. لا عم بقدر اكل ولا اشرب ولا ادرس من غير ما يكون معي .. تعبت كتير وتعزبت .. لوقت ما عدت تحملت ..
كنت بحاجة لايا شخص لحتى فضفضلو .. لارتاح شوي .. اهلي ما كنت اتجرا خبر حدا فيهن .. ورفقاتي كنت خاف كتير صارحن ..
عشت ايام وليالي كلا مرار ووجع .. ليالي ما كنت نام بسبب هالحب يلي عم يقطع قلبي .. اغلب الايام كنت نام والدموع بعيوني ..
وصلت لمرحلة انو اصحى بالليل وادعي من ربي انو انساه وبطل حبو ..
ياسمين: (تبكي) يا ربي ساعدني لاقدر انساه .. ما عاد بدي شوفو ولا حبو ..
فيسو كنت مراقبتو ع طول .. اترصد ايا تعليق منو او بوست .. بدي عيش تفاصيل حياتو واعرفا كلا .. ما بدي يبقى شي .ما اعرفو ..
وبيوم.. اجتني فكرة انو اعمل حساب تاني وحاكيه بس لريح قلبي شوي .. وبالفعل عملت حساب تاني باسم بنت اجنبية وبعتلو طلب صداقة...
ياسمين: معقول يقبلو .. يااا رب يقبلو .. يااا رب
وبالفعل قبل الطلب... حسيت قلبي صار يرقص رقص من فرحتي ومباشرة بعتلو ع المسنجر ..
ياسمين: مرحبا .. كيفك
سامر: اهلا مين معي ؟؟؟؟:؟؟؟:
ياسمين: انا صبية عايشة باميركا .. بس اصولي سورية .. بحب اهل سوريا كتير .. وحابة كون رفيقتك ... ممكن
سامي: اهلا .. تشرفت فيكي
ياسمين: وانا بالاكتر
ما حكينا كتير .. بس هالكلمتين يلي حكيتن معو كان كافيين ليشعلو نااار بقلبي .. نار عم جر حالي جواتا .. مو لاني بدي احرق حالي .. بس لانو هالنار صارت جزء مني وما فيني بعد عنا ...
صرت كل يوم حاكيه واكتر من مرة ..
ياسمين: بتعرف شي سامي .. رح خبرك سر
سامي: سر شو ؟؟
ياسمين: ممممم.. انا بعرف صبية بتحبك
سامي:
ياسمين: ههههه .. شبك
سامي: يعني انو انت باميركا .. كيف رح تعرفي بنت بتحبني .. ومين هالبنت
ياسمين: هههه .. بنت من عندكن بسوريا .. ولقلك اكتر هي من منطقة .......
بوقتا قلتلو اسم منطقتنا .. وما بشوفو غير عصب وبلش فيني ..
سامي: لك انا قبلت صداقتك قلت بقوي لغتي .. بس طلعتي بنت اللهم عفنا يا الله
حكالي هالكلمتين ومباشرة عملي بلوك ..
ياسمين: يا الله .. لك ليش يا سامي ليييييش .. لك ليش حظرتني .. يا ربي شو رح اعمل هلا .. شو اعمل
عشقك وله (الجزء الرابع)
من بعد ما حظرني رجعت نفسيتي تعبت وقررت انو جد خلص هالمرة رح انساه .. ما عاد بدي ياه ولا بدي حبو .. ونمت وانا عم اطلب من ربي انو يشيلو من قلبي ..
وتاني نهار فقت وطلعت من البيت لروح ع المدرسة وما بشوفو غير بخلقتي ..
صار قلبي يدق وحرارتي رتفعت ..
ياسمين: لك يااا ربي .. لك كل ما قرر انو انساه بيطلع بخلقتي .. لك ليش .. لييييش
مرت الايام .. ومواقفي مع سامي ما عم تخلص ..
بتزكر بيوم كان وقتا اخي عمر وابي متخانقين كرمال دراستو لعمر .. وبوقتا ابي قرر انو يعاقبو لعمر بانو يقفل غرفة الالعاب يلي عنا لحتى ما يدخلا عمر ..
ابي: ياسمين يابي .. بدي منك شغلة
ياسمين: من عيوني بابا
ابي: يرضى عليكي .. سمعي هلا بتروحي بسرعة بتشوفي مين بغرفة الالعاب وبتقفليها وبتجيبي المفتاح لعندي
ياسمين: اي يالا
نطيت ركيض ع الغرفة .. فتحت الباب ما كان في حدا .. قفلتو ورحت لعند ابي ..
ياسمين: تفضل بابا .. هاي المفتاح
ابي: مين كان بالغرفة
ياسمين: ما في حدا
بعد بشوي دق تلفون ابي ..
ابي: الوووو .. هلا
المتصل: يعني ازا متخانق انت وابنك رفيقو شو دخلو لتقفل الباب عليه .. ابنك مانو بالغرفة.. وابني محبوس هنيك
اطلع في ابي هديك النظرة يلي بتوقف القلب .. وانا ماني فهمانة شي .. قفل الخط وبلش فيني .. فش كل نارو فيني ..
ابي: وهلا بلا ما عصب بزيادة .. مسكي المفتاح وبسرعة روحي فتحي الباب
ياسمين : حاضر بابا
اخدت المفتاح ورحت لافتح وشوف مين هالسلال يلي كان متخبي بالغرفة وما شفتو ..
فتحت الباب وكانت عتمة .. ضويت الضو واطلعت ونصدمت بيلي شفتو .. كانو كل قرايبيني بالغرفة .. لك ابن عمي يلي ما بطيقو كمان بالغرفة ..
وقفت اطلع فيهن .انا مصدومة .. وهني عم يضحكو ويصرخو .. كل عام وانت بخير يا حلوة
واكتشفت انن عاملين حفلة لذكرى ميلادي .. انا وقتا طرت من فرحتي .. وانا وقت بفرح باااااكل .. باااكل من غير وعي ..
ما عرفت كيف طفيت الشمع .. بسرعة طفيتن لبلش اكل جتوه .. كنت عم اكل بشفافي وبخدودي كمان .. تمي كان كلو شكلاه .. وما بشوف غير حدا من وراي عم يحاكيني ...
سامي: كل عام وانت بخير
لفيت وشي وياااا ربي ع هديك العلقة .. لك هاد سامي .. قلبي رح يوقف من فرحتو.. بس تمي .. لك تمي ووشي مليانين شكلاه .. لك كلشي فيني شكلاه..
اطلعت بالارض .. وانت بخير شكرا
واطلعت بماما بطرف عيني .. امي بدي محرمة .. امي
بس امي ما انتبهتلي ..
سامي: هالحفلة كتير حلوة
ياسمين: شكرا كتير .. امي .. امي
امي: اي ماما
ياسمين: محرمة
امي: هههههه .. لك لساتك متل لصغار بتاكلي
اطلعت فيها واشرتلا بعيوني ع سامي .. وهي فرطت ضحك ..
سامي: ههههههههه .. صار لازم روح .. العمر كلو
ياسمين: شكرا كتير
هالليلة كانت كتير حلوة وما بتنتسى .. اللقاء يلي بيجي وانت مانك حاسبلو حساب بيكون احلا ووقعو ع قلبك اكبر ..
ونمت وانا عم فكر فيه ودور ع شي طريقة تريح قلبي وتخفف وجعو ..
عشقك وله (الجزء الخامس)
سبحانو ربي ما بتديق على انسان الا ويبعتلو منفس يتنفس منو .. وهاد يلي صار معي .. كنت تايهة وماني عرفانة كيف اتصرف .. كنت عم اتعزب وابكي يوم يوم .. لحتى ربنا بعتلي رفيقة تعرفت عليها ع الفيس ..
بنت ما بتعرفني .. ولهيك تجرات وخبرتا عن قصتي ..
ياسمين: ليال .. فيني خبرك سر
ليال: اي طبعا حياتي .. تفضلي
ياسمين: هلا انت كيف تزوجتي لزوجك .. يعني كانت بينكن علاقة حب الا زواج تقليدي
ليال: هههههه .. لا تقليدي .. نحنا ما عنا هيك شي وبحبو لزوجي كتير .. اكتر ما بتتخيلي
ياسمين: ممممم .. هلا كيف هو الحب
ليال: كيف يعني .. انت حابي شي؟
ياسمين: اي .. بس حب من طرف واحد .. يعني يلي بتقولولو حب فاشل
ليال: وشو عرفك انو من طرف واحد .. يمكن هو كمان بيحبك
ياسمين: لااا .. مستحيل
ليال: اي ومين بيكون .. حكيلي لشوف
ياسمين: هو جاري ورفيق اخي .. لهيك كتير خايفة من هالحب وعم حاول انو طالعو من قلبي .. قولتك بحسن طالعو
ليال: ممممم .. بصراحة وقت بتحبي من قلبك صعب تنسي .. وكمان هو جارك ورفيق اخوكي .. يعني رح يضل بوشك ع طول .. ما حتقدري
ياسمين: والحل
ليال: خبري اخوكي .. حكيلو .. او امك
ياسمين: وليييي .. والله بيدبحوني اهلي .. لك امي وقت عرفت انو عم احكي مع رفيقي بالمدرسة جنت وحبستني بغرفتي .. يمكن هالمرة تدبحني .. لااا مستحيل
كانت هالبنت هي المنفس الوحيد لالي .. وع طول خبرا شو عم يصير معي .. ووقت شوفو ووقت يغيب عني .. وبيوم ..
ليال: ياسمين انت عم تعزبي حالك هيك
ياسمين: اي بعرف .. بس الموضوع مانو بئيدي
ليال: سمعي لالك .. احسن شي تعترفيلو للشب وتريحي حالك
ياسمين: لك ليال انت شو عم تحكي
ليال: لكن رح تضلي هيك .. بكرة بتجني .. خبريه واعترفيلو بحبك ومن بعدا خلص لا تحاكيه .. بس المهم تشيلي هالحمل عنك
ياسمين: بخاف من ردة فعلو .. يمكن يخبر اهلي ويمكن يرفضني .. ويمكن يعتبرني بنت وسخة
ليال: هلا يخبر اهلك ما بتوقع .. لانو ما بيعملا غير شب ندل .. وحسب ما قلتيلي الشب شهم ومحترم .. وانو يرفضك بكون ما بحبك وما بدو ياكي وهيك انت بتريحي حالك وبتعرفي انو انتو مو لبعض وخلص
ياسمين: اوووووف .. لك تعبت .. تعبت كتير .. انا عم موووت .. وربي عم موت .. لك دموعي ما عادو نشفو .. لك ع طول خناقات مع اهلي ع شي وع ولا شي .. تعبااانة يا ليال تعبااانة
ليال: حبيبة قلبي .. اي لهيك عم قلك عترفيلو
ياسمين: وكيف رح حاكيه
ليال: بسيطة .. عملي حساب تاني وخبريه بكلشي بصراحة .. وانو انت مانك طالبة منو شي بس انو بدك تريحي حالك وخلص
ياسمين: اووووف يا ربي ..ماشي .. بشوف
عشقك وله (الجزء السادس)
ترددت كتير وخفت .. كتير اشيا كانت براسي ..
كنت خايفة كتير من ردة فعلو .. خايفة يخبر اخي .. خايفة يخبر اهلو واهلي .. خايفة من نظرتو لالي .. خايفة يحظرني .. خايفة من كلشي .. كلشي .. بس بنفس الوقت كنت حابة اقدر اوصلو وفضفضلو .. لهيك قويت قلبي وعملت حساب جديد وبعتلو طلب صداقة ..
ياسمين: ليال .. كتير خايفة .. رح موت رعبة
ليال: لك لييش .. شو عملتي
ياسمين: عملت حساب جديد وبعتلو طلب .. بس ليقبل
ليال: اي كتير منيح .. لا تخافي .. ههههههه
ياسمين: ليش عم تضحكي
ليال: لك اول مرة بحياتي بشجع ع هيك علاقة .. ما بعرف ليش
ياسمين: هههههه
بقيت ع اعصابي لوقت وافق ع الطلب .. وقتا حسيت بقلبي عم يدق وكانو حدي .. فرحت من جواة قلبي .. وبعتلو ..
ياسمين: مرحبا
سامي: اهلا
ياسمين: كيفك سامي
سامي: هلا .. تمام
ياسمين: بصراحة بروفايلك عجبني .. وبوستاتك حلوة .. فيني كون رفيقتك وحاكيك
سامي: تسلمي كلك زوء .. اي ليش لا
حكينا بوقتا ودردشنا .. ومن سيرة لسيرة ..
سامي: انا موجوع هالفترة كتير
ياسمين: له له .. سلامتك .. ليش
سامي: البنت يلي كنت حبا ماتت من يومين بحادث سير
مدري شو صرلي وقت قلي هيك .. ولا عرفت افرح ولا احزن ..
ياسمين: العمر الك ان شاء الله
سامي: تسلمي
ومن بعد هالمحادثة تلخبطت اكتر من اول .. وما عدت عرفت شلون لازم اتصرف .. وحسيت انو مو مناسب صارحو بحبي الو هالفترة .. وقررت انو ضل حاكيه لوقت شوف فرصة مناسبة وحاكيه ..
نفسيتي كانت من سيئ لاسوا .. ما عم بقدر خبي عليه .. وخايفة اعترفلو .. وصلت لدرجة انو طلعت من البيت من غير ما خبر حدا .. جدران البيت كانت عم تخنقني .. هوا الحارة يلي هو فيها عم يعزبني .. طيفو يلي بكل ركن من هالحارة عم يقتلني .. نبرة صوتو وصداه يلي عم يرن بادني ..
كلشي بيتعلق بسامي تحول لعزاب .. يا الله ما اصعب هالشعور .. تمنيت مليون مرة لو اقدر شيلو من قلبي وعقلي وفكري .. بس ابدا ما فيني .. هو وصل لمرحلة انو ما بينتسى .. وهالشي هو يلي خلاني اترك البيت من بعد ما حاكيتو .. بوقتا طلعت من البيت لقيتو بخلقتي.. جمدت بارضي من لخوف ..
سامي: مرحبا .. كيفك
ياسمين: منيحة .. تمام .. انت كيفك
سامي: تمام الحمد لله
كنت عم اهرب بعيوني .. خفت ليلتقو نظراتنا ويفهم علي .. ويعرف قديه بحبو ..
ياسمين: بخاطرك .. رح روح
سامي: الله معك
تركتو لسامي وركضت .. كنت عم امشي بالشارع وحاول اسحب نفس .. وكانو ما ضل هوا لاتنفسو .. مخنوقة وتعبانة وتايهة ..
بوقتا امي جنت .. لاول مرة بطلع من البيت من غير ما خبرا.. صارت تدور علي بكل مكان .. وراحت لعند اهلو لسامي وسالتو لسامي عني ..
امي: الله يرضى عليك يا ابني .. ما شفتا لياسمين او حاكيتا
سامي: شفتا راحت من هالطريق هون .. بس ما حاكيتا ..وما بعرف لوين راحت
بعد بشي ساعة .. كنت صرت هديانة شوي رجعت ع البيت ..
امي: لك وينك انت يا امي .. وينك خوفتيني عليكي
ياسمين: امبييي.. وين بدي روح .. رحت لعند رفيقتي ريم
امي: لك ما بقي حدا وما سالتو عنك .. اوووعك تعيديها
ياسمين: اسفة امي .. بس كنت بدي منا تشرحلي مسالة مهمة للفحص
امي: الله يرضى عليكي ويقويكي يا امي
رجعت المسا حاكيتو لريح قلبي،شوي.. وبقينا فترة ونحنا نحكي سوا انا وسامي...
ياسمين: هلا ازا قلتلك انو بعرف بنت بتحبك .. شو بتكون ردة فعلك
سامي: هههههه .. ولاشي .. يعني عادي ... بس اكيد رح اسالك مين
ووقت قلي هيك متت رعبة وسكرت وما عدت حكيت معو ..
وبعد شي اسبوع ...
ياسمين: تعبت يا ليال .. تعبت كتير
ليال: ليش يا قلبي .. ما عم تحكو سوا
ياسمين: بعتلي كتير .. بس ما بدي رد .. خلص غيرت رايي .. بدي انساه
ليال: ههههه اي ازا فيكي نسيه
ياسمين: هلا مو احسن انو انساه .. خلص رح انساه .. ما عاد بدي حاكيه
عشقك وله (الجزء السابع)
صح قررت انساه .. بس متل كل مرة ما قدرت انساه .. وكانو قلبي كان عم يتحداني بكل مرة عم حاول شيلو منو ..
سامي: مرحبا
وينك
ردي
من زمان عنك
ليه ما عاد حاكيتيني
شبك عم تقرئي وما بتجاوبي
هاي كانت رسائلو .. وانا عم اقرا وما رد .. عم حارب حالي وحارب قلبي لطالعو منو .. عزاب كبير ووجع اكبر ..
بقيت ع هالحالة يومين ..
ليال: لك انت ليش عم تعزبي حالك
ياسمين: لانو خايفة .. خايفة كتير يرفضني
ليال: اي لهيك عم قلك عترفيلو .. وازا بدو يرفضك بتكوني عرفتي انو ما في مجال لعلاقة معو .. وما بتضلي تفكري فيه .. شو ما كانت ردة فعلو اريح لالك .. انت عم تعزبي حالك هيك
ياسمين: اي والله يا ليال .. انا عم موت
ليال: اي لكن عترفيلو وريحي قلبك
ياسمين: خلص هلا رح افتح وحاكيه .. ورح اعترفلو واخلص ... دعيلي
ليال: ربي يريح قلبك
فتحت الرسائل لحاكيه .. وهون كانت الصدمة .. فتحت عيوني ع وسعن .. وبلشت اقرا وانا ماني عرفانة شو اعمل .. لك ما كنت مصدقة عيوني ..
سامي: ليش ما عم تردي
انا بعرف انو انت ياسمين جارتي
ياسمين انا بحبك وبموت فيكي
لك ليش ما عاد حكيتي
حاكيني هلا ضروري
من قوة الصدمة .. ضليت فترة بس عم اطلع فيهن للرسائل ... انو شو هالمعجزة .. يعني مو معقول .. لك كيف هيك صار .. لك كيف صار يحبني .. وحبيبتو يلي ماتت ومدري شو .. لك كان عارفني من اول ...
ياسمين: اهلين سامي
سامي: ليه ما عم تردي
ياسمين: ممممم .. ما بعرف
سامي: كنت عرفان انو انت من اول .. وما حبيت قلك لتضلي تحاكيني .. بس وقت ما عدتي رديتي ما قدرت الا انو حاكيكي
ياسمين: كنت خايفة كتير
سامي: من شو خايفة
من ردة فعلك
ردة فعلي ع شو .. منحنا كنا نحكي سوا
لا .. انا .. انا بحبك ومن زمان .. صرلي سنين ما عم نام بسببك .. انا بعشقك سامي
ههههه .. لك مو معقول .. وانا يلي كنت مفكر انو ما عم تبادليني مشاعري .. لك انت مغروسة بقلبي غرس .. لك حياتي شو فرحتيني
يعني ما رح تقول عني بنت وسخة .. والله مو بئيدي
ليش لقول عنك هيك .. انت ما عملتي شي
خلصت حكي معو وانا لساتني مو مستوعبة يلي صار ..
ياسمين: يعني انا هلا رح نام وانا عم اضحك .. رح نااام ... اييي رح نااام ..
لاول مرة من سنين بنام وبالي مرتاح .. بس سبحانو ريي ما في شي بيكمل ..
تاني نهار فقت ع رسالة من رقم مجهول ..
الرسالة .. يلي عم تفكري فيه مستحيل .. واهلك صار عندن خبر
عشقك وله (الجزء الثامن)
وقت شفتا للرسالة متت رعبة .. وما عرفت شو اعمل..
ياسمين: يا ربي دخيلك .. مين بدو يكون .. لك ما حدا بيعرف غير انا وهو .. شو يلي صار
بعتت فورا لسامي ..
ياسمين: مرحبا سامي .. بدي خبرك شي مهم .. حاكيني
حبست حالي بالغرفة .. خفت واجه اهلي .. خفت كتير من ردة فعلن ..
رجعت بعد بشي ساعة بعتلو .. وما رد ولا فتح الرسائل ع غير عادتو ..
كنت متسطحة ع السرير وخايفة بايا لحظة تقوم حرب بالبيت .. وعم فكر شو بدي جاوب .. ندق الباب وحسيت قلبي رح يوقف مع دقتو ..
رغد: ياسميييين .. لك لساتك نايمة اختي
ياسمين: شو بدك اختي .. لك اليوم اجاازة .. مو رايقتلك .. روحي من هون
رغد: تعي .. بابا بدو ياكي
وقف قلبي وقت حكتلي هيك .. وشو بدو بابا
رغد: ما بعرف .. هو بغرفتو هو وامي .. روحي لعندن
ياسمين: لك اااخ .. لك شو بدي قلن .. يا الله
رغد: اختييي .. عم تحاكي حالك انت
ياسمين: رغد روووحي من هون .. ليكني جاي
رحت لعندن واجر تقدم واجر تاخر .. دقيت الباب ودخلت ..
امي: تعي امي تعي .. قعدي حدي
قعدت ع التخت حدا لامي وانا منزلة راسي بالارض ..
ابي: شو يا ياسمين .. شو يلي سمعناه .. شو يلي بينك وبين سامي
ياسمين: .............
بلعت ريقي وما حكيت ولا كلمة ..
ابي: احكي .. خجلانة مووو .. لك يا عيب الشوم عليكي .. يا عيب الشوم .. لك انت اخر وحدة كنت متوقع منا هيك تصرف
كان ابي عم يحكي وانا ابكي وعيوني بالارض .. سكت بابا بعد ما خلص وانا لساتني ع حالي ..
امي: وليش ما خبرتيني يا امي .. مو نحنا رفقات .. ليش لتخبي عني
ياسمين: اسفة ماما .. اسفة كتير .. خفت من ردة فعلك .. والله خفت
امي: خفتي !! لك خفتي مني .. لك انا امك
زدت بالبكي لدرجة ما قدرت اتنفس منيح .. وانخنق صوتي ..
ضمتني امي .. خلص اهدي امي .. اهدي
ابي: والله وصرتي صبية يا ياسمين .. الله يهديكي يا بنتي ويحميكي
بقيت بغرفتن وامي تهدي فيني لرتحت شوي .. ورجعت ع غرفتي ونمت .. ما بعرف قديه ساعة نمت.. ووقت فقت شفت الرسائل يلي بعتن ..
ياسمين: لك شبو هاد .. لك ليه ما عم يرد
بقيت طول اليوم وانا عم ابعتلو وهو ما يجاوب ..
حبست حالي بغرفتي .. ما كنت قدرانة شوف حدا او حاكي حدا .. وبقيت هيك لتاني يوم المسا ..
ما قدرت اتحمل اكتر .. رحت لعند اخي .. مو عمر رفيقو لسامي .. اخي التاني احمد ..
ياسمين: احمد .. اخي رصيدي خالص .. فيك تعيرني تلفونك لاحكي مع رفيقتي
احمد: تفضلي اختي .. بس مو تخلصيلي الرصيد ها .. احكي بسرعة وبالمختصر
ياسمين: اي اي اخي .. ماشي
دخلت ع غرفتي ودقيتلو لسامي .. كان قلبي عم يدق مع كل رنة للتلفون .. حسيت هالرنات ما رح يخلصو ابدا ..
سامي: الوو
وقت سمعت صوتو مدري شو صرلي .. ما قدرت احبس دمعتي وفرطت بالبكي .. وصوت شهقاتي كلا بالتلفون ..
سامي: الووو .. لك مين .. ياسمين .. ياسمين .. لك ياسمين هاي انت .. ردي علي .. لك ليش عم تبكي .. ياسمين
ياسمين: ليش هيك عم تعمل فيني .. لك ليييش
سامي: روقي ياسمين .. شبك
ياسمين: شبني !!! لك من يومين وانا عم ابعتلك .. ليش ما عم ترد علي .. ليش .. ليه عم تعزب فيني لييييه
تنهد سامي وانخنق صوتو ..
سامي: ياسمينتي .. حبيبتي .. والله غصب عني .. ما بعرف شو رح قلك .. بس صارت معي ظروف .. المهم هلا انت لا تزعلي وحقك علي
ياسمين: كيف ما بدك ياني ازعل .. لك رح موووت انا
سامي: سلامة قلبك يا روحي .. لك انت ما بيلبقلك الزعل .. انت بس للفرح .. ياسمينة قلبي وكل حياتي
ياسمين: طلاع لكن ع البرندة .. بدي شوفك
سامي: ياسمين .. انا مو بالبيت .. انا عند رفيقي حبيبتي .. ويمكن ما ارجع اليوم ع البيت
ياسمين: اي ماشي متل ما بدك
سامي: يااااسمين .. لا تزعلي حياتي .. والله ما فيني ارجع اليوم
ياسمين: سامي .. مبارح وصلتني رسالة من رقم ما بعرفو .. انو يلي بتحلمي فيه مستحيل واهلك صار عندن خبر .. صرلي من وقتا عم ابعتلك
سامي: اووووووووف يا ربي .. سمعي ياسمين
ياسمين: لك ليش عصبت علي .. لك لييش
سامي: لك مو عليك عصبت .. سمعيني .. انا .. انا تخانقت مع امي كرمالك .. وطلعت من البيت .. وانا هلا عند رفيقي يامن
ياسمين: كيف؟؟ ما فهمت .. كيف كرمالي يعني
سامي: ياسمين .. انا خبرتا لامي انو بدي ياكي .. بس امي رفضت لانو انت صغيرة .. ووقت اصريت انا اشتد الحكي بينا وتركت البيت ليوافقو ويغيرو راين
رجعت فرطت بالبكي من غير وعي ..
سامي: لك شبك هلا كمان
ياسمين: لك ليش هيك نصيبي انا.. لك لسا ما لحق قلبي يفرح .. رجعت لوجع القلب مرة تانية
سامي: لا تقلقي حبيبتي .. ما رح اتركك ولا اتخلى عنك
وانا عم حاكيه ندق الباب واجى اخي احمد.. لك ياسمين ... خلص الرصيد..
سكرت الخط فورا .. يالا اخي خلصت
مسحت الرقم وعطيتو تلفونو .. ومضيت هديك الليلة بالبكي والوجع ..
عشقك وله (الجزء التاسع)
تاني نهار رجعت من المدرسة وتفاجات وقت لقيت امو عنا بالبيت ..
بدلت تيابي ورحت لسلم عليها .. ووقت شافتني حسيتا كانو لقيت شي لقية .. عيونا كانو منفخين من البكي ..
ياسمين: كيفك خالة
ام سامي: اهلين يا بنتي .. دخيل عينك لا تخبي عني .. والله من تلت ليالي ما نمت .. قلبي رح يوقف
انا قعدت وانا مصدومة .. انو شو عم تحكي .. كنت عم اطلع فيها وساكتة ..
ام سامي: وينو ابني دخيلك .. انا بعرف انك بتعرفي وينو .. واكيد خبرك بيلي صار .. بعرف اني قسيت عليه .. دخيلك قليلي وينو
وقت شفتا بهالحالة وعم تترجى فيني قلبي وجعني عليها .. وما قدرت انو ما خبرها ..
ياسمين: خالة .. هو .. هو عند رفيقو يامن
ام سامي: متاكدة ؟
ياسمين: اي متاكدة .. هو عندو
ام سامي: ربي يسعدك ويحميكي يا بنتي
وقربت مني وضمتني وهي عم تبكي .. انا لا شعوريا ضميتا ونزلو دموعي ..
ياسمين: اسفة كتير خالة انو تسببتلكن بهالمشكلة
ام سامي: انا يلي لازم اعتزر منك .. الله يحميكي يا بنتي .. رح اطلب منك من بعد ازنا لامك .. حاكيه لسامي ليرجع ويلي بدو ياه بيصير
امي: ولا يهمك .. توكلي بالله
وبعد ما هديت وراقت رجعت ع بيتا ..
امي: ياسمين .. نحنا شو اتفقنا .. ليش حاكيتي من غير ما اعرف
ياسمين: امي شو بدي قلك .. والله كنت قلقانة كتير عليه .. وكمان كنت بدي اعرف مين يلي بعتلي الرسالة
امي: ايا رسالة
ياسمين: هاي
وفتحت التلفون وورجيتا الرسالة ..
امي: يخرب بيتا الهي .. لك هاي عمتك سندس .. هي يلي خبرتنا انا وابوكي .. شايفتك اكتر من مرة عم تحاكيه ع البرندا .. ووقت تخانق مع امو سامعة صواتن وعرفت كل شي .. واجت خبرتنا ..
ياسمين: هيك لكن .. ماشي امي .. من بعد ازنك بدي حاكيه كرمال امو حرام
امي: كرمال امو قلتيلي .. ههههه ماشي امري لله
دخلت ع غرفتي ودقيتلو من جوالي ..
سامي: ياسمينتي .. حياتي
ياسمين: كيفك
سامي: كتيير منيح بسماع صوتك
ياسمين: ساامي .. امك كانت عنا بالبيت
سامي: شو عم تحكي .. وشو عملت .. شو حكت لاهلك .. يا الله منك يا امي
ياسمين: لك هدي شوي شبك
سامي: هديت .. هاتي لشوف
ياسمين: كانت عم تبكي ومنظرا ببكي الحجر وسالتني عن مكانك وخبرتا
سامي: لك ااخ منك انت لك .....
ما خليتو يكمل حكيو وكملت انا ...
ياسمين: وطلبت مني انو حاكيك وقلك ترجع ع البيت ويلي بدك ياه بيصير
سامي: عم تحكي جد
ياسمين: هههههه .. اي والله جد
سامي: لك ياسمين .. لك بحبك .. لك بموووت فيك .. لك بعشقك .. المسا بتجهزي حالك .. رح جيب اهلي واجي
ياسمين: هههههه لك طول بالك
سامي: لااا .. خلص ما رح اصبر اكتر
سكرت الخط معو وانا لساتني عم اضحك .. ورحت فورا لعند امي وخبرتا ..
امي: لك شو بدن يجو يعملو .. ابوكي مستحيل يوافق تخطبي هلا
ياسمين: ليش يا امي ليش
امي: لك شو ليش .. قبل البكلوريا ممنوع هالشي
ياسمين: فففففففف يا ربي خدني وريحني
امي: وليي .. لك شو هالجيل هاد .. لك ستحي شوي بنتي
تركتا لامي .رحت ع غرفتي وانا كتير مدايقة ..
ووقت المسا اجا سامي واهلو لعنا وطلبوني من ابي..
ابي: بدي اعتزر منكن .. انا ما بخطبا لبنتي قبل لتقدم بكلوريا .. بس هي الكن ان الله راد
سامي: الله يخليك عمي .. لكن ع القليلة خلونا نقرا الفاتحة
ابي: اي ماشي. .. بس هالشي بيضل بيناتنا .. ما بدي تعطو خبر لحدا لوقت الخطبة الرسمية
ام سامي: تكرم اخي ولا يهمك
قرؤو الفاتحة واجت امي لعندي ع الغرفة وخبرتني وباركتلي..
ياسمين: عم تحكي جد امي
امي: اي طبعا جد .. الف مبروك يا امي
ياسمين: الله يبارك فيكي يا احلا ام .. تعي لضمك
امي: اي تعي تعي يا زعرة .. والله وصرتي عروس .. بدلي تيابك وتعي سلمي عليهن
ياسمين: حاضر امي
عشقك وله (الجزء العاشر)
بدلت تيابي وطلعت لعندن .. من وقت دخلت وعيون سامي ما نشالو عني لدرجة انو خجلت كتير من اهلي ..
سلمت عليهن وقعدت معن .. كانت السهرة كتير حلوة .. كنت قاعدة ع الكنبة يلي حدو لسامي .. دقات قلبي كانت عم تعلا وتعلا كل ما شفت نظراتو لالي .. يلي كلا حب ..
خلصت السهرة وودعناهن ورجعو ع بيتن ..
دخلت غرفتي بعد ما ساعدتا لامي بترتيب البيت وجلي الضيافة .. وكان سامي باعتلي شي خمسين رسالة ..
ياسمين: هههههه لك شو هاد
رديت ع رساءلو وبقينا طول الليل عم نحكي سوا ..
بقينا ع هالحالة سنة ونص .. كانت علاقتنا يوم عن يوم عم تقوى .. طول النهار عم نحكي سوا ..
كنا نتلاقى الصبح وهو بطريقو لشغلو وانا بطريقي لمدرستي .. والعصر كان يطلع ع البردا ويحاكيني وانا عم اطلع عليه ..
وهلا انا لابسة فستان سواريه احمر بجنن .. وقاعدة حدو لسامي يلي لابس قميص احمر وجينز وماسكين ادين بعض وعيون الكل علينا ..
اي اي .. لك واختي رغد قاعدة ع جنب وعم تبكي .. رح روح شوفا ..
ياسمين: رغد .. شبك اختي
رغد: لا تحاكيني .. فهمانة
ياسمين: لك ليش حبيبتي
رغد: لانك سرقتي لسامي مني .. سامي صديقي انا مو انت
ياسمين: ههههههههه .. لك يا زعرة .. لا تخافي رح يبقى رفيقك .. انا رح صير مرتو وانت رح تبقي رفيقتو .. شو رايك
رغد: عم تحكي جد
ياسمين: اي طبعا جد .. تعي تعي
انتهت