علاقة ... شيطانية

صفا النعمان

الادارة
طاقم الإدارة
#مستوحاة_من_الواقع

الجزء الاول+ الثاني+ الثالث+ الرابع+ الخامس+ السادس.... انتهت
(الجزء الاول)
اسوأ وابشع انواع الظلم هو ظلم الذات.. انو تظلم نفسك بافعالك وخطاياك وتستمر فيها وما تتراجع ..
انا بلقيس.. بنت من عيلة بسيطة ..سمرا وعيوني عسليات.. بابا موظف حكومي وامي ست بيت.. اخوتي الشباب كلن دارسين وبشغلن ..واختي مطلقة وعايشة بالبيت معنا..
امي: بلقيس حبيبتي.. بدي تجهزي حالك المسا.. جاييكي خطاب يا زعرة
قرصت خدي وغمزتني..
بلقيس: وااو.. جد هههههههه رح بلش من هلا جهز حالي
امي: ههههه اي يالا.. بس ان شاء الله تزبط هالمرة هااا
بلقيس: اميييييي
امي: اي تمام ..ما حكينا شي
طلعت امي من الغرفة وانا بلشت ..نكتت الخزانة نكت لشوف احلا شي والبسو لاستقبل العريس الجديد..
اجا وقت المسا ووصل العريس واهلو.. كنت متشوقة كتير لشوف مين هالشب يلي تقدملي هالمرة..وكيف حيكون شكلو
دلال: اختي حبيبتي القهوة جاهزة.. تعي يالا
بلقيس: دلال حبيبتي كيف طالعة.. حلوة؟
دلال: لك بتجنني.. نيالو يلي اختي الحلوة من نصيبو
بلقيس: ربي يسعدك يا روحي
اخدت القهوة وطلعت.. كنت كتير متلبكة ...
بلقيس: السلام عليكم
ام مهند: تبارك الخلاق.. وعليكم السلام يا بنتي
كانت ست اكابر وجنبا ابنا يلي بشل ع قد مو حلو ومعن خالتو لمهند.. ضيفتن القهوة وقعدت مقابيلن...
كانت سهرة كتير حلوة.. حكين كلو اكابر ..ارتحتلن كتير وحبيتن وتمنيت هالشب يكون من نصيبي.. وهاد يلي صار..
*تاني نهار*
دلال: بلقيس تعي تعي
بلقيس: اي اختي
دلال: لك الجماعة جايين المسا ليتفقو مع بابا ع كلشي
ركضت لعندا لدلال وضميتا وانا نط ...
دلال: لك بكفي بكفي ههههههههه.. لك ايدي وليي جدبة
بلقيس: لك بحبك بحبك شووو اعمل مواااااه
دلال: لك كبري شوي ..هاي صرتي عروس
بلقيس: رح روح جهز حالي.. تعي ساعديني.. حبابة
دلال: ههههه.. امري لالله جاييييي
جهزت حالي ولبست وتربت لوقت ما وصلو... قعدو مع بابا واخوتي واتفقو ع كلشي وقرؤو الفاتحة...
بابا: الف مبروك يا بنتي
بلقيس: الله يبارك فيك بابا ويخليلنا اياك
بعد بشوي مهند طلب انو نقعد سوا.. قعدنا ع جنب انا وياه..
مهند: الف مبروك
بلقيس: الله يبارك فيك
مهند: ان شاء الله هاليوم يضل ذكرى حلوة ببالنا وماننساه ابدا
بلقيس: ان شاء الله
كان هو يحكي وانا جاوب.. بصراحة هو كان بعالم وانا بعالم تاني.. كنت سرحانة بشكلو بريحتو.. عم اطلع بئيديه.. كلشي فيه كان مميز ودخل لعقلي قبل قلبي..
تمت خطبتنا.. ومهند كل يوم يفاجئني بشي جديد..
مهند: مرحبا يا حلوة
بلقيس: اهلا
مهند: كيفو حبيبي اليوم
بلقيس: تمام منيحة
مهند: لك شبك هيك بتحكي
بلقيس: ما في شي ..بس ماالة كتير
مهند: بتملي وانا موجود.. بدي سهرك سهرة ع كيفي ليكني جاي لعندك ركض
بلقيس: جد .. يخليلي ياك
سكرت الخط معو ولبست احلا شي عندي لوقت ما اجا..
دق الباب وفتحلو اخي.. كان جاي ومعو سيديهات افلام ولاب توب وكيس كبير بوشار وشيبسات وشكلاتات..
بلقيس: ههههههه لك شو هاد
مهند: بدي اعملك سينما بالبيت هههههه.. يالا طفو الضو وتعو كلكن
اهلي كانو كتير يحبو لمهند.. الكل يصارو يضحكو وبالفعل طفينا الاضوية وقعدنا كلنا سوا نحضر بالفلم.. كان فلم اكشن ع رومانس حلو كتير.. كانت ليلة كتيير مميزة وما بتتنسا.. طول السهرة وانا قاعدة حدو لمهند وماسكة ايدو.. وراسي ع كتفو.. عم شم ريحتو يلي كلا حنان ودفا وحب.. كلن كانو بعالم وانا بعالم تاني.. العالم الخاص فيني انا ومهند..
هيك كان مهند ..كان عفوي وبسيط وابسط الاشياء كان يحولها لشي خيالي حلو كتير ...
اجا يوم زواجنا.. ما خلا شي الا وجبلي ياه.. من دهب للبس لمكياجات لاثاث بيت.. كلشي بنفسي جابو واكتر كمان..
مهند: بلقيس حبي.. شو بقي.. صرلي من الصبح عم اتزكر ...
بلقيس: لك ليش انت خليت شي بالسوق هههههههه
مهند: كلو كرمال هالعيون العسلية بيهون
ومسك ايدي وحطا ع خدو وباسا..
بلقيس: ربي ما يحرمني منك ولا من حنيتك.. بحبك كتير
حفلة عرسنا كانت باحلى صالة بمنطقتنا... كان مجهزلي الصالة ..كلا قلوب وورد جوري احمر.. بكل زاوية من زواياها .. الكل حكا بحفلة عرسنا قديش هي حلوة ومميزة..
(الجزء الثاني)
كل يوم مر علي مع مهند كان متل الحلم الحلو يلي ما بدي اطلع منو ابدا وبدي عيدو بكل يوم وكل لحظة.. حولي بيتي وحياتي لجنة..
مهند: مسا الخير
بلقيس: مسا الورد
قرب مني وضمني..
مهند: كيفا مرتي الحلوة اليوم
بلقيس: مشتاقة
مهند: يسعدلي البا المشتاقة انا.. جهزي العشا بسرعة رح ناكل ونطلع نتمشى
بلقيس: انت جنيت شي.. الدنيي مطر
مهند: لك ليش في احلا من المشي تحت المطر مع حبيبة قلبي
بلقيس: ههههه يسعد قلبك.. رح جهز العشا فورا.. غير تيابك
تعشينا وضبيت السفرة وطلعنا تحت المطر..
كنا ماشيين وهو ماسك بئيدي وضاممني لحتى يدفيني.. ريحتو لوحدا كانت عالم تاني.. عالم كلو حب ودفا وحنان.. ما بتذكر شي يوم بردت وانا حدو.. ولا مشاعري بردت.. كنت حس حالي احلا انثى
مهند: تعي تعي هالمشوار بدو ذرة سخنة
بلقيس: اي والله صح
مهند: مرحبا عمو
غريب: اهلا يا ابني
مهند: عطينا تنين ذرة سخنين زكاتك
غريب: اي مو تكرم.. تفضل يا ابني.. هاي لالك وهاي للحلوة يلي معك
مهند: بربك عمو شفتلي بحياتك احلا منا لمرتي
غريب: هههههه الله يهنيكن يا ابني ويرزقكن الذرية الصالحة
مهند: امييييين
بلقيس: ههههههههههه
اكلنا الذرة ورجعنا ع البيت.. كانت من احلا الليالي مع مهند.. ليلة بسيطة بمحتواها ..بس المشاعر والدفا والحنية يلي فيها كانت كتير كبيرة..
مهند: بكرة رح اخدك مشوار غير شكل
قربت منو وحطيت راسي ع صدرو ومسكت ايدو وبستا..
بلقيس: ربي يخليلي ياك.. انت احلا هدية من ربي.. اوعك شي يوم تتغير او تبطل تحبني ..ما بدي حبنا يتغير او ينقص بدي يكبر اكتر واكتر وبدي حبك اكتر واكتر
مهند: لك يا قلبي انت.. لك انا بدي بطل حبك.. انت نبض قلبي.. ازا بطلت حبك قلبي رح يوقف وموت..
بلقيس: بحبببك
مرت الايام من حلو لاحلا ومفاجاتو لمهند ما تخلص ابدا.. يوم مشي تحت المطر ويوم سهرة ع راس الجبل ويوم عشى بشي مطعم شعبي ويوم.. ويوم...
ما كان يخلي شي الا ويعملي اياه..
انا بهالفترة كنت مقدمة لاكتر من شركة لاشتغل فيها..
وبعد زواجي بست شهور نقبلت بشركة..
بلقيس: مهند حبيبي باركلي
مهند: حامل!!!
بلقيس: هههههه لك لاااا شو حامل.. الشركة يلي قدمتلا قبلتني واخيرا
مهند: اي الف الف مبروك.. بس لو تسمعي مني وبلالك هالبهدلة حبيبتي.. انا بدي ياكي معززة مكرمة ببيتك متل الاميرات وكلشي يجي لعندك
بلقيس: مهند يا روحي انا بدي ساعدك اولا وثانيا بدي اتسلا.. ما بحب ضل بالبيت
مهند: اي براحتك حبيبتي.. ما بدك تزوري اهلك
بلقيس: لك والله بحسك بتحب اهلي اكتر من اهلك ههههه
مهند: اهلي واهلك نفس الشي يا عمري... اهلي هني نبض قلبي.. واهلك يلي عطوني اجمل شي بحياتي هني نبضي التاني.. لك بموت فيكي وبكل شي بيتعلق فيكي
بلقيس: مهند والله هيك كتير.. لا تخليني ابكي
مهند: هههههه خلص رح اسكت ..ما عاد احكيلك شي
بلقيس: اي بدبحك هههههه
توظفت بالشركة..وكان معي بغرفتي صبية وشب.. مها وامجد..
وباول يوم الي بدوام الشركة..
بلقيس: صباح الخير
مها.. امجد: صباح النور.. اهلا وسهلا
بلقيس: اهلا فيكن.. انا بلقيس.. تشرفت فيكن
قربو مني ليسلمو علي..
مها: وانا مها.. اهلا وسهلا
امجد: امجد.. اهلا وسهلا.. تفضلي..هاي مكتبك
بلش دوامي بالشركة يلي كان ينتهي مع دوام مهند.. وكنا نرجع للبيت بنفس الوقت..
بلقيس: مسا الخير حبيبي.. راجع ع بكير اليوم
مهند: لا ..هلا وصلت.. شبك ليه هيك وشك اصفر
بلقيس: بصراحة ما بعرف.. تعبانة كتير وماني حسناني وقف
مهند: لكن تعي ..تسطحي ع الكنبة
تسطحت ع الكنبة وهو ما خلا شي ما عملي ياه...
مهند: حبي بلقيس.. فيقي لتاكلي
بلقيس: يسلمو دياتك يا روحي.. لك شو كل هاد
مهند: الشوربة مهمة.. والحليب مهم والفواكة مهمة.. يعني كلن مهمين.. لهيك بدك تخلصيهن كلن
بلقيس: ههههههه ما فيني حبيبي
مهند: هلا بطعميكي بئيدي هاا
بلقيس: لا خلص ..انا باكل
قعدت اكل وهو دق لامي..
مهند: مرحبا مرت عمو
امي: اهلا يا ابني
مهند: مرت عمو بدي منك خدمة
امي: عيوني الك يا ابني.. تفضل
مهند: يسلمولي عيونك مرت عمو.. بلقيس تعبانة كتير.. وانا بصراحة هلكان.. فيكي تجي لعنا
امي: بس هيك.. جايي فورا انا ودلال.. بس شبها بلقيس
مهند: والله ما بعرف.. يمكن لانو مو متعودة ع ضغط الشغل
امي: اي هلا بجي يا ابني
بعد بشي نص ساعة اجت امي واختي دلال لعندي..
امي: شبك يا روحي
بلقيس: والله ما بعرف يا امي.. كتير تعبانة
دلال: ههههه اختي والله باينتك رح تصيري ام
امي: يااا رب.. الله يسمع منك يا امي
بلقيس: معقول امي.. رح جيب التست هلا.. ما فيني اصبر
ناديتلو لمهند ...
بلقيس: مهند بدي تست حمل
مهند: انت حامل ..بربك حامل
بلقيس: لك مهند والله ما بعرف
راح مهند للصيدلية ركض وجبلي التست .. عملت الفحص ..
بلقيس: شو اختي.. لك ورجيني ليه اخذتي مني
دلال: لك الف الف مبروك يا عمري
دمعو عيوني وضميتا لدلال وانا ابكي... ومهند طار عقلو وقت عرف
(الجزء الثالث)
تاني نهار كنت بالشركة ..دق تلفوني
بلقيس: اي مهند حبيبي
مهند: انا ناطرك تحت.. نزلي
بلقيس: باقي نص ساعة ع الدوام
مهند: اي نزلي . بلاهن
بلقيس: هههههه ما فيني
سمع امجد المحادثة.. اشرلي انو معليه.. نزلي وبدبرا
بلقيس: اي ماشي ماشي رح انزل
نزلت.. وقفت ع درج الشركة وصرت دور عليه بين العالم ..ما شفتو.. سمعت صوت سيارة ...اطلعت جواتا كان مهند.. كانت سيارة بتجنن ..ومزينة بالورد الجوري يلي بحبو..
نزلت ركض ع الدرج.. وما شفت غير مهند بسرعة الريح نزل من السيارة واجا لعندي..
مهند: لك لا تركضي يا مجنونة.. انت حامل حامل
بلقيس: ههههه لك والله نسيت
مهند: لك شو نسيتي .. تعي تعي
مسكلي ايدي ونزلنا ع السيارة...
مهند: هاي هديتي الك ..بس بدي تنتبهي ع ابني
ضميتو ...
بلقيس: بتشكرك يا قلبي.. يسلموووو كتير
مشت ايام حملي بصعوبة كبيرة.. وبيوم كانت رفيقتي بالمكتب مانا موجودة وامجد وانا بالمكتب.. يوما تعبت كتير وما عرفت كيف غميت..
فقت كنت مسطحة ع الارض ووشي كلو مي وامجد قاعد حدي وصفنان في..
انا نقزت من نظراتو ووقفت..
بلقيس: شو صار
امجد(تلبك): غميتي واسعفتك
بلقيس: اي يسلمو..
وقفت ورتبت تيابي وطلعت من المكتب وقلبي عم يدق..
من بعد هاليوم بلش امجد يطلع فيني نظرات جديدة.. نظرات كلا اعجاب وحب.. وانا الشيطان بلش يشتغل فيني.. صرت البس لبس لالفتلو انتباهو.. واستقصد اعمل حركات اغريه فيها وخلي عيونو ع طول علي. . عملت اشيا بخجل كتير انو احكيها...
ويوم ع يوم.. ووقت شاف امجد حركاتي.. وكاي رجال بالدنيي بشوف يلي مقابيلو بتتمادى بلبسا وحركاتا قدامو.. هو بلش يتمادى معي..
امجد: بلقيس.. فيني اشرب معك قهوة بالكافتيريا
بلقيس: اي ليش لا
رحنا يوما ع الكافتيريا شربنا قهوة.. ونحنا قاعدين ..
امجد: بلقيس..... بصراحة انا معجب فيكي وبشخصيتك.. انت كتير ملفتة وجذابة
تبسمت بوشو وانا كتير فرحانة من حكيو..
بلقيس: شكرا كتير الك
هاد كان بداية علاقتي الشيطانية معو.. من هون بلشت وما وقفت ابدا.. تاني لقاء لالنا مسكلي ايدي وانا ما قاومتو ابدا.. بالعكس كنت اعمل ايا شي لخلي يرجع يمسكا مرة وتنين وتلاتة.. كنت استقصد اعمل حركات لخلي ايدي تلمس ايدو
وما وقفت لهون علاقتنا ..وصرت كل يوم ما نام الا بمسج منو...
مهند: بلقيس حبيبتي.. مع مين عم تحكي
بلقيس: اختي دلال.. في شي
مهند: لا ابدا.. بس ما بعرف.. حاسك هالفترة كتير متغيرة
بلقيس: لا يا روحي.. بس يمكن هرمونات الحمل ماثرة فيني
مهند: ازا كان هيك بسيطة.. تعي لضمك لاحسن نام
بلقيس: لااااا.. بنخنق ما فيني
مهند: بلقيس حبيبتي.. انت ما كنت تحسني تنامي غير بحضني.. شبك.. انا مزعلك شي
بلقيس: لك لااا.. بس بنضغط من حملي
مهند: اي ماشي براحتك
بلقيس: زعلت ..موووو.. خلص رح اجي
مهند: لا حبي ما بدي دايقك
بلشت بعد عن مهند شوي شوي وقرب من امجد.. تركت القلب الطاهر والعلاقة الطاهرة وركضت ورا القلب النجس والعلاقة الشيطانية...
اجا يوم ولادتي.. يلي كان من اسعد ايام حياتي.. واجا ابني مجد ع الدنيي.. اي مجد.. سميتو مجد تيمنا بامجد.. الشيطان كان متملكني لدرجة ما بتنوصف.. عميت عيوني وقلبي...
مهند: الحمد لله ع سلامتك يا قلبي
بلقيس: الله يسلمك
كان بئيدو علبة صغيرة مغلفة بفضي وعليها فلل صغيرة ورد من كل الاتجاهات..
مهند: بعرف لو جبلك كنوز الدنيي ما بعوضك عن تعبك.. بس هاي شي رمزي لام ابني ام المجد
بلقيس: يسلمو دياتك ..ربي يسعدك
امي: ربي يعطيك يا ابني ليرضيك
كان جواة هالعلبة اسوارة دهب..
اخدت من بعدا اجازة من شغلي وقعدت بالبيت.. وبلش الشيطان يوسع بشغلو معي.. وصرت يوميا قضيها بالساعات حكي مع امجد.. ما عدت شفت بعيوني غيرو.. تعلقت فيه وحبيتو كتير.. وكل حبي لمهند راح واختفى...
امجد: بلقيس.. انا ما عاد فيني اصبر.. لازم تطلقي بكفي
بلقيس: لك مستحيل مهند يطلقني.. مهند بيحبني
امجد: لك لا تجننيني.. بدك تطلقي بايا طريقة.. عمليلو مشاكل.. ايا شي
وهاد يلي صار.. صرت كل يوم اعملو مشكلة شكل.. وع طول نق وخناق معو..
مهند: لك شو صرلك انت.. لك لشو هالمشاكل كلا.. ما صار شي لتعملي كل هالمشاكل.. ما صار شي
بلقيس: انا تعبت منك ومن حياتك.. لك تعبت
صرت نام بغرفة وهو بغرفة تانية.. الغرفة يلي بكون فيها اطلع منا.. ما عاد خليتو يقرب مني او يلمسني..
مهند: مرت عمي انا تعبت.. بلقيس جنت.. ع طول نق وخناق
امي: طول روحك يا ابني.. يمكن من النفاس.. عمل معا حالة نفسية.. طول بالك
مهند: لك ما عم تهدى ابدا.. بحملا قلت من حملا وهلا من نفاسا وبعدا شو
امي: رح حاكيها انا.. بس انت طول بالك
حاكتني امي ...
بلقيس: وعم يشكيلك كمان.. لك ما عم طيقو ما بدي اياه بكرهووو
امي: لاااا.. انت جد جنيتي.. لك الرجال ما بعمرو زعلك بشي ولا حتى بكلمة وحدة
بلقيس: امي خلصنا ..ما بدي اياه.. كرهتووووو
امي: اي مو بكيفك.. هلا رح اتركك لتريحي شوي.. وبنكمل حكي ..
(الجزء الرابع)
ركبت راسي ومشيت ورا شيطاني وورا امجد.. سكرت عيوني واداني.. ما بدي شوف شي ولا بدي اسمع.. بس بدي شوف امجد واسمع لامجد...
امجد: لسا ما عرفتي تتركيه
بلقيس: لك ما عم ينفع معو شي.. كل يوم بعملو خناقة شكل.. وطول النهار والليل ع نق وما بخلي يلمسني.. بس هو لسا متمسك فيني...
امجد: لكن اعترفيلو بانك بتحبيني
بلقيس: انت اكيد جنيت.. والله بيدبحني
امجد: اي انت حرة.. بس لا عاد تحاكيني
بلقيس: امجد... امجد
برمت ضهري ..انصدمت وبلش قلبي يدق وحرارتي تعلى وتلبكت كتير وخفت... كان مهند واقف ع الباب وعم يسمع..
اطلع فيني نظرة قرف واشمئزاز...
مهند: لكن لهيك عم تعمليلي خناقات ومشاكل ع الطالعة والنازلة.. لهيك ما بدك المسك.. لك انت وحدة ساقطة.. ما بتستاهلي نظرة وحدة مني.. انت وحدة شيطانة وبميت وش.. ما نفع معك العلاقة الطاهرة.. ركضتي ورا العلاقات الوسخة الشيطانية.. لمي تيابك بسرعة رح ابعتك لعند اهلك وبعدا خدي راحتك معو لكلبك
كنت واقفة وقلبي يرجف من الخوف.. وقت حكالي رح يبعتني لعند اهلي خفت.. ما خفت كرمالو ولا كرمال العشرة يلي بيناتنا ولا تذكرت ولا لحظة حلوة بيناتنا.. خفت من ردة فعل اهلي بس.. وبنفس الوقت فرحت لانو حققت يلي بدي ياه..
ونحنا بالسيارة..
مهند: لك شو يلي عملتو انا لتخونيني.. شو عملت.. لك بشو قصرت معك.. لك ما في ولا بنت عايشة متلك ولا مدللي متلك .. لك ليش لتعملي هيك.. ستغليتي حبي الك ..استضعفتيني.. بس يكون بعلمك انا فيني هلا اخدك ع شي حاوية وادبحك وكبك للكلاب لتاكل لحمك ..بس حتى الكلاب رح تقرف منك وما رح تقرب عليكي.. انا ما رح وسخ اديي فيكي.. رح اتركك لاهلك ولربك.. هني اخبر فيكي
هالحكي يلي حكا بيهزو ايا انثى وايا انسان.. بس انا بوقتا ما اثرو فيني ابدا.. كل هالحكي يلي حكاه وانا ساكتة وعم خطط شو بدي احكي لاهلي وكيف بدي فرحو لامجد..
وصلنا بيت اهلي..
مهند: نزلي
ما حكيت ولا كلمة ..مسكت ابني بايد وبالايد التانية جريت شنتاية التياب.. اجت عيني بعينو.. شفتن لدموعو مجمعين بعيونو... ومع هيك ما اثرو فيني..
تركتو بدموعو وبوجع قلبو وبغصتو وبكرامتو يلي انمحت.. تركتو وما اطلعت فيه ولا نظرة ولا حاولت برر شي ولا قول شي ..
دقيت الباب وفتت..
بابا: بسم الله.. خير يا بنتي.. صاير شي لزوجك لتجي بهالوقت
ما حكيت ولا كلمة.. ودخلت لعند اختي.. اجت امي ركض لعندي..
امي: بلقيس.. وينو زوجك.. وينوووو..
قربت مني وهزتني من كتافي واختي وابي ناطرين لاحكي شي..
امي: لك حكي حكي.. حكي قبل لادبحك باديي حكي... لك وينوو زوجك شو صااار
بعدت اديها عني بعصبية وصرخت..
بلقيس: لك خلصنااااااا.. ما عاد في شي اسموو زوجي ماااا في.. ما بدي ياااه.. فهمي بكرهووووو.. انا بكرهوو.. ما بدي ياه...
جمدو كلن بارضن.. ما قدرو يستوعبو يلي عم يسمعو.. انو بلقيس ومهند خلص خلصت علاقتن كان شي كتير كبير وخيالي..
دلال: اختي ..انت بعقلك شي
بلقيس: اي بعقلي.. وبكل عقلي كمان.. خلص انا ومهند خلص
دلال: اختي انت جنيتي اكيد ..لك زوجك بيحبك ..لشو تركتيه
بلقيس: ما دخلكن.. ليكك انت تطلقتي وما حاكيتك شي.. لا عاد تحاكوني بالموضوع
دلال: لك اختي انا وضعي كتير بيفرق عن وضعك
بلقيس: لا ما بيفرق.. انت كرهتي لزوجك وهاي انا كرهتو.. خلصنا ما عاد بدي ياه
بابا: والله يا بنتي انت مانك طبيعية ابدا.. حطي عقلك براسك.. مو كرمالك..كرمال هالولد يلي بئيدك
امي: الله يهديكي يا بنتي.. الله يهديكي
تركوني بابا وماما وبقيت انا ودلال.. دلال ما حاكتني ابدا.. اخدتو لمجد من ايدي وضلت تلعب معو لغفي بحضنا..
بلقيس: دلال... اختي
دلال: اي
بلقيس: بعتزر منك.. ما كان قصدي حاكيكي هيك.. بس انا مضغوطة هالفترة
دلال: ما علي حبيبتي.. نامي لترتاحي والصبح بنحكي
بلقيس: تصبحي ع خير
ما قدرت نام ابدا قبل لاحكي مع امجد.. ضليت اتقلب لحاكيتو..
بلقيس: الوو.. كيفك
امجد: اهلا
بلقيس: لك شبك.. ما رح تصدق شو رح احكي
امجد: اييي
بلقيس: انا ببيت اهلي.. مهند سمعنا ونحنا نحكي سوا
امجد: اي كتير حلوو
بلقيس: ما عم صدق انو الامور رح تمشي متل ما بدنا
امجد: اي بس انت ناسية اخواتك
بلقيس: لك ما دخلن.. انا حرة
امجد: اي بس ابقي ع موقفك
بلقيس: اي طبعا
تاني نهار فقت ع صوت بابا وهو يقرا قران.. شي من جواتي وجعني كتير.. غطيت راسي ورجعت نمت
صحيت ع صوتا لدلال عم تلاعبو لمجد..
دلال: يالا فيقا لماما..ابكي شوي ابكي
بلقيس: فايقة اختي فايقة بس لا تخليه يبكي هلا ما رح يوقف ازا بلش
طلعت لبرا لقيتن كلن متجمعين ع الفطور..
بلقيس: صباح الخير
احمد.. عمر.. صادق: صباح النور
صادق: اهلين اختي
قعدت وفطرت معن ..حكيت معن لاخواتي شوي وسالوني عن سبب مشكلتي مع مهند..
بلقيس: ولا شي.. انا تعبت منو.. ما عاد بدي ياه
احمد: كيف يعني ما عاد بدك ياه.. نحنا عم نلعب شي لتملي وتتركي بيتك
بلقيس: اخي هاي حياتي.. انا ما عم اتدخل بحياتكن لا تدخلو بحياتي
(الجزء الخامس)
جن جنانن لاخواتي من حكيي يلي حكيتو..
عمر: اي اختي.. بس هاي كمان حياة مهند ومجد.. مو حياتك لوحدك
بلقيس: اخي تركوني بحالي.. لا عاد تحاكوني ابدا بهالموضوع..
سكرنا ع الموضوع شي اسبوع.. ومن بعدا بليلة كنت عم احكي مع امجد وسمعتني دلال وانا حاكيه ..
دلال: انت مع مين عم تحكي
بلقيس: كيف.. ما عم احكي
دلال: مين امجد يلي حاكيتيه
بلقيس: ما دخلك.. بعدي هيك
دفشتا بئيدي وغطيت وشي ونمت..
تاني نهار من الصبح ..فقت وطلعت لبرا كانت امي متسطحة ع الكنبة وتعبانة وابي حدا هو واختي دلال..
بلقيس: صباح الخير.. شبك امي شو صاير هون
بابا: لك ايا خير هاد.. لك ايا خير
امي: الله لا يسامحك يا بلقيس.. لك خربتي بيتك وتركتي رجال متل السكرة لتمشي ورا وهم ..لك شو انت بس بدي افهم شووووو.. لك والله ما عم صدق والله
دلال: خلص امي حبيبتي لا تعملي بحالك هيك
اطلعت فيها لدلال بعصبية..
بلقيس: لك انت ما بدك تبطليها لهالعادة ..ما بدك
بابا: خرسي ولي... والك عين كمان تحكي معا.. روحي من وشي بلا ما كسرن لسنانك.. لك روووووحي
تركتن ودخلت لغرفتي لاحكي مع امجد ولا كانو في شي عم يصير حولي...
كانت حرب بيني وبين اهلي.. اخواتي عرفو وكانو رح يضربوني ... بس انا ما تراجعت وبقيت ع موقفي..
ضلت هالمشاحنات شهر كامل... حكا بابا فيهن مع مهند وحاول انو يروقو شوي..
مهند: والله لو انو شفتى بس حاسة مجرد احساس بالزنب كنت سامحتا.. بس هي ما عم تعترف بغلطا ولا عم تتراجع.. انا خلص رح طلقا.. بكفي هيك
كان اجمل خبر بسمعو بحياتي وقتا.. وبالفعل من تاني نهار مهند طلقني.. وبعد باسبوع بلش دوامي بالشركة..كنت مضي وقتي كلو مع امجد وماني ساءلي عن ايا شي تاني..
ابني اهملتو ..كان لساتو صغير وعمرو بالاشهر ..تركتو لامي واختي دلال وانا مشيت ورا مشاعري الشيطانية..
امجد: الف الف مبرووك يا روحي.. واخيرا خلصنا منو
بلقيس: الله يبارك فيك.. كلا كام شهر وبنحقق مرادنا
مشيت اشهر العدة ع احر من الجمر.. كنت عدن باليوم لحتى خلصو..
بلقيس: امجد واخيرا خلصت العدة
امجد: تمام حبي.. هلأ حاكي اهلك لاجي واطلبك منن
بلقيس: اليوم رح حاكيهن
رجعت ع البيت غيرت تيابي واكلت وقعدت مع ماما ودلال يلي من يوم قصتي وهني مانن طايقين وجودي..
بلقيس: امي
امي: اي
بلقيس: امجد اليوم بدو يجي ليطلبني من بابا
ضربت امي بئيديها ع وشا وبلشت تصرخ...
امي: لك الله ياخدك.. لك الله يسطفل فيكي.. لك لسا اليوم لخلصت عدتك.. لك انت شو طينتك ..شووووو.. مستحيل تكوني بنتي يلي ربيتا ..مستحييييل.. لك مستحيل تكوني بشررر
دلال: اهدي شوي امي.. بلقيس انت جد جنيتي.. لك شوفي لمهند ليلة ليلة بيجي لعند اخواتك وبيسهرو سوا.. لك الرجال لساتو شاريكي.. حرام عليكي تعملي هيك.. لك فكري بابنك
بلقيس: اي ما بدي فكر بحد.. وهاي انا خبرتكن
امي وقت سمعت هالحكي غط ع قلبا وغميت...
دلال: اميييي.. امييي.. لك جيبي مي ولييي ..لك الله ياخدك
فيقناها لامي يلي فتحت عيونها وهي عم تدعي علي..
امي: قلبي وربي غضبانين عليك يا بلقيس يا بنتي.. قلبي وربي غضبانين عليك
ابي: شو صاير كمان.. شو حكيتيلا هالمرة
بلقيس: ..........
دلال: امجد بدو يجي ويخطبا
صادق: لك انت ما بتستحي ...لك روحي من وشي بلا ما انبلا فيكي.. روووووحي
بلقيس: انا خبرتكن ليكون زواجي منو بعلمكن وازا ما وافقتو رح اتزوجو من غير علمكن
حكيت هالكلمتين وتركتن اصواتن كلن طلعت ودخلت غرفتي قفلت الباب لحاكي امجد..
ما بعرف من وين اجتني كل هالقوة والجرأة .. وكيف كنت اتعامل معن بهالطريقة.. وكيف هني استحملوني وما دبحوني..
(الجزء السادس) والاخير
بقيت يومين وانا ما حاكيهن ابدا.. الصبح فيق واطلع ع الشركة وافطر مع امجد.. وقبل لخلص دوام اتغدا معو وبعدا ارجع ع البيت احبس حالي بغرفتي وما حاكيهن ابدا..
دلال: لك اختي لايمت رح تبقي هيك.. لك شوفي حالن لامك وابوك.. لك ع شوي رح يجنو.. لك شوفي ابنك كيف تراجعت صحتو من اهمالك.. اختي رجعي لزوجك والله مهند ما في منو
بلقيس: اي لكن تزوجي انت
حكيت هالكلمة وانا بارمة وشي عنا..
دلال: بكرة رح يجي يوم وتندمي ع كل تصرفاتك ..وتزكري هالشي بلقيس.. لانو ربك مستحيل يسمح بكل هاد الجبروت..
تركتني وطلعت من الغرفة ....
ما كان هاممني شي ابدا.. لا امي ولا ابي ولا ابني ولا مشاعر اختي.. ولا شي
بعد اسبوع ....
عمر: لك تركوها تتزوجو تضرب منها الو.. بدكن تتركوها هيك بخلقتي.. والله بدبحها وبخلص منا
احمد: وانا هيك رايي بابا.. لمهند ما رح ترجع.. مهند بيستاهل وحدة احسن منا.. هيك وحدة ما لازم تتزوج غير متل امجد..
امي: لا حول ولا قوة الا بالله
بعد باسبوع اجا مهند لعند اهلي وخبرن انو خطب ورح يعجل بزواجو..
امي: (تبكي) ربي يسعدك يا ابني ويعوضك عن كلشي شفتو مع بنتي
سهر معن مهند وشافو لابنو وراح ع بيتو..
بعدا نادولي ليخبروني ع امل انو مشاعري تتحرك شوي..
بابا: اي بلقيس.. مهند خطب ورح يتزوج
بلقيس: اي ممتاز الله يهنيه.. وهيك ما عاد الكن حجة بما انو رح يتزوج
وقت حكيتلن هيك كلن تصفنو فيني وما عرفو كيف يردو علي..
بعد يومين بابا قلي بانو حاكيه لامجد ليجيب اهلو.. وبالفعل اجا امجد واهلو يلي اهلي ما طاقوهن ابدا.. وتمت خطبتنا ومن بعدا باسبوع تم زواجنا...
امي: الوو.. بلقيس
بلقيس: اهلا امي.. كيفك
امي: انا منيحة.. بس ابنك يلي مو منيح.. لسا ما خلصتي ايام عسلك.. ابنك بدو اياكي
بلقيس: امي شو بدو فيني ابني.. امجد ما بدو ربي عندي.. بعتو لابو ليربي هو ومرتو الجديدة
امي: الله يسطفل فيكي
حكت امي هالكلمتين وسكرت الخط بوشي..
بعتو لابني لمهند ..بس كان كتير صغير ومهند واهلو ما قدرو لطلباتو ورجعو لامي..
ربي ابني بين اهلي.. كنت شوفو كل فترة وفترة.. ومشت الايام ومهند تزوج..
وانا حبلت ببنت... وبيوم ولادتي..
بلقيس: ااخ يا امجد.. تعباانة تعبااانة
امجد: تحملي حبي تحملي
بعد شي ساعتين اجت بنتي ماسة ع الدنيي.. بنت متل فلقة القمر بس.............
امي:(تبكي) لحتى تعرفي يا بنتي بانو ربك ما بينسى حدا.. خطية هالبنت برقبتك انت..
بلقيس:(تبكي) امي حرام عليكي لا تزيديها علي
اجت بنتي بلا ايد.. ايدها اليسار ما كانت كاملة .. خلقة من ربنا...
حسيت بغصة بقلبي ..وجعني قلبي ع هالبنت يلي بالفعل حسيتا عقاب من رب العالمين.. بس هالبنت شو زنبا لتعيش بلا ايد..
امي: لك يا بنتي لسا ما تعلمتي.. لك ربك ضربك بهالبنت .. عدلي من حالك عدلي
بلقيس: امي شو بدك اعمل
امي: لك خديه لابنك وحطيه بحضنك
بلقيس: امي امجد ما بدو
مشت الايام وابني مع امي.. كنت روح عندن واسمعو يقلا لامي ولاختي دلال ماما.. وانا يندهلي بلقيس..
وبيوم ووقت صار عمر بنتي سنة ونص فجاة وحدة ارتفعت حرارتها واسعفناها ع المشفى فورا..
بلقيس: يا ربي تحميها.. يا ربي لا تجازيني ببنتي ولا تحرقلي قلبي عليها
امجد: هدي شوي رح تصير منيحة
طلع الدكتور من الغرفة ووشو اسود..
بلقيس: طمنا دكتور.. قلي بنتي صارت منيحة قلي
كنت احكي معو وجسمي كلو متل نار وشاعلة فيه..
الدكتور: العمر الكن.. البنت ماتت
وقعت بارضي وصرت صرخ واضرب ع وشي..
بلقيس: ياااااا ربي.. لك انا يلي قتلتا انااااا.. ياااا ربي خدني لعندا ما بدي عيش ما بدي..
نزل امجد ع ركبو لعندي وهو يبكي...
امجد: خلص اهدي ..قدر ربنا قدر ربنا
بلقيس: نحنا يلي قتلناها نحنااااا.. زنوبنا هي يلي قتلتا يا امجد زنوبنا
وبالفعل زنوبي يلي قتلتا.. خيانتي لمهند وحرقان قلبو.. ابني يلي اهملتو وتركتو لامي لتربيه... كل هاد كان سبب كافي لاتعاقب ولينحرق قلبي..
هذه هي عدالة الرحمن.. كل الذنوب عنده مغفورة الا ظلم العباد للعباد وحرقة القلوب.. فما من انسان قد اوجع قلبا الا وسياتيه ما يوجع قلبه وبنفس القدر ...
انتهت
ربي يبعد عني وعنكن الخطايا ووجع القلب..
 
الوسوم
شيطانية علاقة
عودة
أعلى