معشوقتي ... المسخ

[صفا النعمان]

(الجزء الاول)

انا قيس..عمري 24 سنة.. حياتي كلا معقدة.. ابي وامي مطلقين.. وتنيناتن متزوجين.. وعيت ع هالشي.. يلي سببلي عقدة نفسية بحياتي...اغلب الايام بقضي النهار مع رفقاتي وبنام عندن كمان..

ما بحب الخلطة بالناس كتير.. من يوم تركتني حبيبتي كرهت الناس كلا.. ومن شهر وانا ليلة ليلة عم اسهر ع شط البحر.. وببقى لوقت الفجر

قيس: سوسن انت عم تحكي جد

سوسن: طبعا جد.. هالموضوع ما في مزح

قيس: وليييه.. ليه بدك تتركيني.. لك شو عملت انا

سوسن: قيس حبيبي.. انت ما في منك.. وانا لساتني بحبك بس ما فيني ابقى ناطرتك.. نحنا سوا من سنة ولسا ما انجزت شي

قيس: لك انا عم اشتغل وربي عم اشتغل بس انت لا تتسرعي وتعملي هيك

سوسن: اسفة ما فيني انطر اكتر.. تقدملي دكتور وعندو بيت وسيارة ما فيني ارفضو وضيع ع حالي هيك فرصة

قيس: هيك لكن.. اي الله معك

تركتها ومشيت ..مشيت والدموع بعيوني.. سوسن كانت الشي الوحيد بحياتي الحلو

كنت كل ما حس بانو الحياة داقت علي احكي معا او روح لعندا.. بس هي تركتني.. متلن كلن

وبليلة كنت قاعد ع الشط وعم فكر بسوسن واتزكر بايامي معا.. وبلحظاتنا الحلوة سوا.. طلع من نص البحر نور ..نور كبيييير.. وبعدا سمعت صوت ولا احلا ولا اجمل من هيك صوت..

فلتسهر العيون.. ولتذرف الدموع.. فليصمت الجميع.. وليسمع ما اقول...
انا التي كنت ملاكة القلوب.. انا التي كنت اميرة الاحلام.. انا التي كنت وكنت وكنت...
وانا التي اخترت الجحيم...من اجل العشق الذي لا يكون.. ايا معجزات السماء اقتربي.. ايا معجزات الكون انقذي القلب المكسور..

وقفت لشوف لمين هالصوت ..وشو سر النور..بس فجأة وحدة كلشي اختفى...

بقيت هيك ليلة ليلة لمدة شهر كامل.. كل يوم وبنفس الموعد هالنور يطلع وبعدو الصوت.. وفجاة وحدة يختفي...

تعلقت بهالشي المجهول.. وعشقت هالصوت يلي ما بعرف صاحبتو.. صرت روح ع الشط بس لاسمع هالصوت.. و كنت ارتاح كتير وقت بسمعو

وبيوم قررت انو بدي اعرف لمين هالصوت يلي بيدخل القلب من غير استئذان..
رحت للبحر قبل الموعد بنص ساعة وركبت قارب ورحت لمكان ما النور بيطلع ووقفت بالقارب ..

بعد بشي خمس دقايق.. الموج بلش يتحرك حدي .. وشفت نور من تحت المي.. وشوي شوي طلع لفوق..

كان النور بعيوني وما قدرت شوف صاحبة الصوت.. غنت نفس الغنية وبعدا اختفت متل كل يوم..

بس انا ما يئست رجعت تاني نهار كمان قبل نص ساعة وركبت القارب ورحت لنفس المكان.. وكمان طلعت وغنت وما شفتا لانو النور بعيوني.. كل يوم عن يوم كان عشقي لهالمخلوق يزيد ..وكان تعلقي بهالصوت يزيد.. كنت طول النهار ضل فكر فيه وانطر بالدقيقة وقت طلوع هالصوت..

بقيت ع هالحالة اسبوع كامل..

(الجزء الثاني)

واليوم يلي بعد الاسبوع... كنت قاعد جوا القارب وعم اسمع صوتا وانا كتير فرحان ..

بلش النور يقرب مني شوي شوي.. والموج يتحرك حد القارب بقوة .. بقي الموج يتحرك هيك شي خمس دقايق وبعدا هدي وكلشي اختفا..

تاني نهار نفس الشي.. ويلي بعدو كمان نفس الشي.. من بعد ما تخلص غني يتحرك الموج حد القارب بقوة كبيرة ومن بعدا كلشي يختفي...

وباليوم الرابع.. كان الموج يتحرك بقوة اكبر.. وقلب القارب فيني ووقعت بالمي..

كنت عم اختنق وماني حسنان اتنفس ..كل شريط حياتي مر قدام عيوني.. امي وابي وسوسن ووحدتي وعذابي.. وبعدا غميت ...

فقت كنت تحت شجرة كبيرة كتير كلا اضوية بتجنن بالوان مختلفة.. وقفت وانا مصدوم ..بدي اعرف وين انا وشو هالمكان هاد يلي انا فيه.. وفجأة طلعت بوشي مخلوق مسخ مرعب..

قيس: لك شو هاد

وركضت لاهرب منا... بس ديلا الكبير وقفني ورجعني لعندا...

المسخ: لوين بدك تروح

وقت حكت انا تفاجئت كان صوت كتييير حلو وناعم.. وقفت مصدوم وماني عرفان جاوب..

المسخ: شبك.. انت شو بدك مني.. ليش كل يوم بتجي لعندي

قيس: كيف!! انت يلي.... كل يوم.... ب.. ب ...

المسخ: اي انا يلي كل يوم بغني

قيس: انا بس كنت بدي اعرف مصدر النور والصوت

المسخ: وهاي عرفت.. انا مصدر النور واسمي نور

ضحكت: نور

نور: ليه عم تضحك.. لانو اسمي مانو لابق لشكلي

قيس: بعتزر منك..بس انو تفاجأت مو اكتر

نور: (بعصبية) كلكن هيك..تافهين.. ما بهمكن غير الشكل

قيس: مين نحنا

نور: لرجال..كلكن سطحيين وما بيجذبكن غير الشكل والمظهر

قيس: معك حق.. بس انا جد حبيتك من سوطك وتفاجات شوي بشكلك.. صرلي شي شهر ونص عم اسمعك..

نور: مانو مهم.. تعا هلا ركاب بالقارب لرجعك ع الشط قبل ليطلع الضو.. هاي عرفت لمين هالصوت.. ولا عاد ترجع لهون.. لانو المرة الجاية رح اتركك تغرق

قيس: لا.. لا.. ما بدي روح.. بدي ابقى هون.. هالمكان كتير حلو

نور: متاكد

قيس: اي متاكد

نور: بس يمكن ما اقدر رجعك بعد هيك

قيس: مو مشكلة.. ما في شي هونيك لخاف عليه وارجع كرمالو... رح ابقى هون بهالمكان هاد

(الجزء الثالث)

وهيك بقيت حدا لنور.. بهالمكان الحلوو.. كان المكان اشبه بجزيرة.. كانت وساع كتير والشجرة مغطيتا كلا متل الخيمة... مشيت لشوف هالمكان يلي بيسحر.. كان كلو نباتات وورد بكل الالوان وشكلا كتير غريب.. انوار واضوية بكل مكان شي احمر وشي اصفر وشي بنفسجي.. شي بيجننن وبريح النفسية..

كنت عم امشي وانا كتير مصدوم بانو في هيك شي بالكون ..طلعت وراي ما لقيتا لنور...

رجعت للمكان يلي تركتا فيه..كانت قاعدة ع صخرة كبيرة الوانا بتجنن.. بنفسجي ع زهر ع مدري شو.. شي متل قصص الخيال..

وقفت وراها وهي مانا منتبهة.. كانت صفنانة ودموعا عم ينزلو ع خدا..

قيس: مرحبا.. فيني اجي لعندك

مسحت دموعا بئيدا واطلعت فيني

نور: اي تعا

طلعت لعندا ع الصخرة وقعدت حدا..

قيس: هلأ شو هاد المكان.. يعني جد انا مو مصدق بانو في هيك شي بالكون

نور: هههههههه ..لا صدق.. هاي انت شايف بعيونك.. هالجزيرة اسما جزيرة الجنة.. وما حد بيقرب منا لانو معروف بانو هالجزيرة لحوريات البحر

قيس: فيني اسالك كمان سؤال

نور:اي سال

قيس: ليه انت حزينة

نور: قصتي طويلة وما بحب احكيها

قيس: يعني ما رح تحكيلي ياها

نور: ما بعرف.. يمكن يجي شي يوم واحكيلك ويمكن لا.. وهلا انت حكيلي ..ليه ما بدك ترجع.. ما الك اهل

قيس: اهل؟ ههههه امي وابي مطلقين وكل واحد فيهن متزوج وتنيناتن غرقانين بعيلتن الجديدة وانا صفيت بلا عيلة...
وكان الي حبيبة تنسيني كل همومي.. بس طلعت متلن تركتني كرمال دكتور... ههههه مانو مهم.. المهم انو انا هلا بهالمكان هاد.. جد شي بيسحر

بقيت مع نور ع الجزيرة هاي فترة ما بعرف قديش هي.. كنا كل يوم نفيق سوا وانام سوا وناكل سوا.. ونحكي سوا.. تعلقت فيها لنور.. شكلا المسخ ما منع ابدا بانو حبا.. حبيت برائتها وطيبة قلبها.. حبيت الحزن المدفون جوا عيونها.. حبيت كلشي فيها..

قيس: نور......

نور: اي

قيس: انا ....انا.... انا بحبك

نور: ما عم اسمع.. شو حكيت

قربت منا ومسكتلا ايدا لاول مرة..

قيس: انا بحبك.. جد بحبك

نور: ههههههه وكيف فيك تحب مسخ

قيس: انت صحيح شكلك كان باول مرة شفتك مو حلو.. بس انت هلأ بعيوني احلا مخلوق بالكون ..واحلا من كتير ناس طبيعيين.. يمكن روحك الحلوة او البراءة يلي بعيونك هي يلي خلتني حبك وشوفك احلا من ايا شي بالحياة

نور: (تبكي) انت جد حبيتني

قيس: والله بحبك وبموت فيكي كمان

نور: وشو نهاية الحب هاد.. يعني رح تبقى هون.. رح تقدر تتاقلم مع هالحياة هاي وتعيش باقي عمرك معي

قيس: ما بهمني شو النهاية.. يلي بهمني كون حدك ..وضل شوفك واسمعك كل يوم.. انا تعلقت فيكي.. وما فيني اتركك ابدا

ضحكت بكل براءة ووقفت ..

وفجأة ما شفت غير نوور كتييير قوي طلع منا .. وضوا كل الجزيرة.. غمضت عيوني من قوتو ...وبعد بشوي حسيت بانو هالنور اختفى.. فتحت عيوني ...

وشفت شي ما بعرف كيف اوصفو..
ملاك ..حورية جنة.. جد جد ما بعرف اوصف.. انسانة بحياتي ما شفت بجمالا.. انسانة ما فيها ولا غلطة وحدة.. انسانة قمة بالروعة..

قيس: لك..لك.. مين انت.. وينا نور.. نووووور

ضحكت بكل براءة ونعومة واطلعت فيني..

قيس: نوور.. انت نور.. لك والله نور.. هالضحكة ضحكتها

نور: اي نور.. انا نور

قيس: كيف هيك صار

نور: انا هلا رح احكيلك قصتي.. انا متل مو شايف انسانة بقمة الجمال.. ما في رجال في يقاوم جمالي.. تعبت كتير من هالشي ومن نظرات الرجال الي.. بيوم كنت هربانة من العالم يلي بدا تاكلني بعيونا وسهرانة ع شط البحر.. وعم ابكي ..طلعت من البحر حورية..

الحورية: ليش عم تبكي

انا انصدمت....

الحورية: لا تخافي.. بدي ساعدك

نور: انا مشكلتي بجمالي..امي وابي ميتين.. وما الي مين يحميني ويدافع عني.. و الرجال كلا بدا اياني ..بدن جمالي

الحورية: وانت شو بدك هلا

نور: بدي شخص يحبني حب حقيقي.. ما بدي ياه يشوف جمالي بدي يشوف قلبي وروحي.. بدي ياه يكون سندي ويحميني من الكل

الحورية: فيكي تتحملي يلي بدي اعملو

نور: اي ..ازا بدو يحللي مشكلتي بتحمل

الحورية: لكن غمضي عيونك

غمضت عيوني وفقت وانا ع هالجزيرة هاي..

قيس: يعني الحورية مسختك

نور: اي حطت علي لعنة المسخ يلي ما بتنشال غير بحب صادق وعشق قوي.. وانت بحبك لالي فكيت هاللعنة

قيس: انا بحبك كتير.. وبحبا لحوريتك هاي ههههه

نور: انا بموت فيك.. انت انسان بكل معنى الكلمة

قربت مني نور وضمتني وبعدا ما حسيت ع شي..

(الجزء الرابع) والاخير

فتحت عيوني كنت نايم ع سرير كبير ومغطا بشراشف بيضا.. قمت عن السرير ..كانت فيلا كبيرة كتير.. جمال ورتابة واناقة..

ما كنت عم استوعب شو يلي عم يصير.. فتحت الباب.. ونزلت ع الدرج..

شفتا لنور.. باحلا وارقا طلة.. متل اميرات قصص الخيال.. خدودا الموردة وطولا وقسما وعيونا ولبسا.. ما كان فيها ولا غلطة وحدة..

نور: فقت

قيس: نور ..شو صار.. وين نحنا

نور: انت رجعتني لشكلي القديم بعشقك وحبك.. وما عاد في لزوم نضل بالجزيرة.. هالبيت لالي.. وعندي شركة كبيرة واراضي واملاك كلا لالي.. بابا وماما ماتو وتركولي كل هاي الاملاك.. وانا كنت مسلمتا لرفيقو لبابا..

بعتت وراه هلا بيجي ..من اليوم بدي ياك تستلم الشغل معو ..لنعيش انا وانت سوا...

قيس: انو انا عم احلم او لا

نور: لا.. انت بارض الواقع.. ارض الخيال خلص خلصنا منا

قربت منا وضميتا بكل حب..

قيس: نور انت اكبر نعمة ربنا بعتلي ياكي

اطلعت في بعيونا يلي بيسحرو..

نور: انت يلي اكبر نعمة.. قلبك الطيب وانسانيتك هني يلي جابوك لعندي.. وهني يلي رجعوني لشكلي الطبيعي... بحبك

انتهت
بتمنى تعجبكن.. حبيت اطلع شوي من القصص المالوفة وجيب شي جديد