همس النديم اللي يـعاتب نديمه
قلت المطر قالت من الـيوم ديمه
ما به رعد لا برق ماغير هتان
عشق جمع ما بين قـاع وغيمه
سيّل علي صدر الثري دمع الامزان
همس النديم اللي يـعاتب نديمه
صوت المطر كنّه تعاتيب خلان
تبسّمت لاجل اللـيالي القديمه
وقالت تذكّر قلت يابنت نسيان
نقض الجروح اللي تشافت ظليمه
ما عاد به وصل ولا عاد هجران
ما للرجا في بعض الاحوال قيمه
و ما للعمي صبح ولو بات سهران
لو للزمن عن نيّة الغدر شيمه.
ما فرّق احباب ولا بعّد اوطان
لاشك وينك يالقلوب السليمه
اللي تجازي عن خطا الخل غفران
كلن خصيم وذاق لوعة خصيمه
واللي خصيم الوقت يا بنت خسران
