قصيدة للشيخ حمدان بن راشد ال مكتوم (فزاع) القصيدة يتغزل في النوق اعمار ونيران
يحن الرعد و بروق غيمه كما الأنوار == إلا نورت في انحا البلاد ومساكنها
وأنا أقول ليت الغيم يرسل من الأمطار == على الأرض لين الأرض تكشف محاسنها
يعم بخضاره كل زهره من الأزهار == لها لونها سبحان من هو ملونها
يسير الفرح في كل شبرٍ من الأشبار == يلين القلوب أكدارها تنجلي منها
على الأمن والآمان والعيش باستقرار == بعد نعمة الإسلام لله نعلنها
مساجد هل التوحيد تصدح بالاستغفار == وصداه يتردد في الفضا من مآذنها
وأنا أحب أذكر نعمة الله باستمرار == ولا اغتر في الدنيا لا كثرت مفاتنها
وأحب التواضع والتواضع سمة الأبرار == وأخفض جناح الذل والنفس ألينها
وأحب الرفيق الوافي اللي بدون أعذار == لو أقوله ارهن حياتك بيرهنها
وأحب الصبر والصبر راعيه ما ينهار == لو المشكلة كبر الجبال يتهاونها
يا ابن آدم الدنيا تراها سير و أخبار == مع إن السير قد تختلف لو نقارنها
ابن مجدك الخالد بتفكيرك الجبار == تكن سمعتك في أيسر الأرض و أيمنها
عرفنا من الآثار قصه هل الآثار == فنا عظمها وأمجادها سولفت عنها
والإنسان فوق الأرض مهما بلغ أو صار == ترا آخرته بيكون جثه وندفنها
ولا يأمن الدنيا ترا وقتها دوار == وكم نفس تفرحها وكم نفس تحزنها
مثل ما الفرح له يوم يحياه وبمقدار == يجي يوم تلعنه الليالي ويلعنها
يا شعار عندي عاصفة شعر يا شعار == تشد انتباه الشاعر اللي يخمنها
أقول الشعر حشمه ولا أقوله استهتار== وأرفع بيوته عن رجالٍ تشينها
خلاصة عصارة فكري الشامخ البيطار == سوى اللؤلؤ والألماس ماني بضمنها
بنات الفكر تلقح وتنجب من الأفكار == وأنا اخترت من أحسن تعابيري أحسنها
حلات القصايد بيت واحد كما التذكار == ولا ألف بيتٍ متحفظ واحدٍ منها
وعلى المركز الأول ربينا وحن صغار == مثل ما ربت شقر الحرار في مواطنها
وعلى المركز الأول نبا نموت موت كبار == والأجساد بالعز المخلد نكفنها
ونيران في ساحة هل الهجن شبت نار == ولا فيه شوطٍ بين الأشواط غابنها
سحابة نصر دايم مطر مجدها مدرار == إلا سمعت الآلي تزايد تجنهها
تجي كنها ترقص على صوت دقة زار == تفرعن طرب والناس تعشق تفرعنها
في شوطٍ من الأشواط يوم استوى المضمار == و جات الأصايل كل سابق ومعدنها
عليهن طغت نيران كنها تدور ثار == أصيله وصايف من قدمها لفرسنها
تحت غاربن ناشي لها يوف كنه غار== و هيه مضمره واليوف كبره مسمنها
ترشح رقم واحد قبل ينطلق الستار== لكن لنطلق فوق الثرا ماتعينها
تشابه لطيار التجسس بلا طيار== يدور لهن رادار ولا درى عنها
لو أنها مع مزاين أهل الظفره اللي صار == مزاين هل الظفره يسمى مزاينها
لكن مشكله نيران تجهل مقام إعمار == و هي معجزة تاريخ الأمجاد دونها
تسولف بوجه إعمار وتقول باستحقار== أنا اللي صفار الزعفران يتزينها
في ساحة هل الدوحة هل العز وأهل الكار== أنا الأوله في الشوط يا إعمار يوم أنها
وعليها ترد إعمار بفخر واستكبار== وتقول بأعلى صوت والمجد يسكنها
يا نيران في الدوحة يوم الشوط دمه حار== وهجن التحدي جاهزة في أماكنها
أنا اللي مسكت الشوط يوم احتمى المشوار== وسلمتك الفوز وقلبنا موازنها
و أنا اللي مدحني من ملك هيبته بإصرار== ونفسه على الاجواد ماهو يشينها
من الشعر افرد في مديحي فخر الأشعار == بيوتٍ ذعاذيع النسايم تلحنها
كتب فيني من الوصف مايلفت الانظار == وفزاع دامن قال كلمه يثمنها
في أجمل قصيده غنوا بيتوها سمار == تغنابها الأشجار و الغيم دندنها
على هونكم في الهجن بالله يأهل الدار == لاحد يسرف بهجنه إذا جا يمرنها
ترا التيم تيم إعمار والفوز فوز إعمار== مايكسره غير إعمار او بكرتن منها
كنها من التيمات يا أهل الهجن تختار== نعم قالها من عام والعام برهنها
ومدام الحقيقه واضحه ليه الاستفسار== أنا اللي تبين مجدها لين بينها
يا نيران أنتِ الاوله بس بالتكرار == أنا أم الأمجاد الكبيرة ومكمنها
ومع موجز الأخبار يا مدور الأخبار == ترا إعمار أو نيران في الشوط نضمنها
ولاء النصر في دبي مع حاكم المغوار == من أول ما راشد هيبة دبي كونها
ولا نعمه إلا نعمه الواحد القهار == له نفوسنا دايم بشكره نوطنها
ولا نعمه إلا نعمه الواحد الجبار == له نفوسنا دايم بشكره نوطنها