اذا المراجل لبسة شمـاغ وعقـال
قل للعـذاري يلبسـن العمايـم
ماعاد يفرق زول حرمة ورجـال
دام الفعايل تشبه البعـض دايـم
المرجلة ماهيـب كلمـة وتنقـال
وتروح ماراحت هبوب النسايم
ولا خشونة صوت اورفع الاثقـال
او رزة صدور وفعـل الزلايـم
ولاهي بعد مفتاح موتـر وجـوال
والا ردى لسانن حديثة شتايـم
المرجلة شيمه عن القيـل والقـال
رفيع نفسن حـر باجـو حايـم
المرجلة عقل وزن وزنـه جبـال
ودون العقل وش فرقنا والبهايم
يامسندي لومايل الوقت بـي مـال
ياولد أبويـه ياعظيـم العزايـم
يامعرب الجدين من العم والخـال
يانخوة المفزوع وقـت الهزايـم
المرجلة ياخوي هي طولة البـال
هي العزم هي الصبر فالظلايـم
فيها الكـرم عـزة دلـه وفنجـال
فيهاالكرامه عن ردى الطبع شايم
والدين لامنه خذا القلـب منـزال
مشى طريق الحق وابليس نايـم
ومن لاعرف ربه في طيب الحال
لابد وقت الضيق بالهـم هايـم
حتى صلاتك مع جماعات ورجال
في خيرها ياخوي نعم الغنايـم
ولامن نصف ليلك قم صفي البـال
ياعظم اجرك بين ساجد وقايـم
ولامن رفع ربي له كل الاعمـال
حسن الذكر لاقالوا فلان صايـم
وخلك شريف القصد ياطيب الفال
سوء المقاصد فالبيوت الهدايـم
واحذر تبيع النفس في دب الأنذال
وتتبع خوي ابليس راع النمايـم
النفس خيل لك اذا كنـت خيـال
ومن لاقوى نفسه قوته الهزايـم
ولاصرت ماتدري لوش انت رجال
والله خسارة فيك ذبـح التمايـم