#الجزء_الاول
بمخيم من مخيمات الاجئين السوريين في لبنان
بخيمة صغيرة مساحتها ٤مترمربع مصنوعة من شادر رقيق مصنوع من النايلون
رفيف مرى عمرا ٢٨ ساكنة بهي الخيمة هية وبنتا اسما سالي يلي عمرا ٥ سنين
اندق باب الخيمة ويلي هو عبارة عن لوح خشب رقيق ومن حيلا دفشة بيقلب
قامت بعبايتها السودة يلي لونها جارد من كتر مانها قديمة ولابسة حجاب فوقو
فتحت الباب وكانت جارتن ام عمر مرى خمسينية صاحبة دين كتير وقلبا اطيب من العسل
ام عمر : شو حبيبتي ام سالي مابدك تروح لنستلم توزيع الكراتين التغذية
رفيف : ليش اليوم في توزيع
ام عمر : اي ليش مامعك خبر
رفيف : لا والله
ام عمر : يلا مامشكلة هي انا عم خبرك امشي معي
رفيف صفنت شوي بعدين قالت لا خلص مابدي
ام عمر : لك ليش مابدك هاد حقك وانت بحاجة
رفيف : طيب بتقدري تجيبلي اياها انتي
ام عمر : لك ليش يابنتي وكمان مافيني لازم تكوني موجودة
رفيف : اصبح خلص بعوض الله
ام عمر : لك شو عم يصير معك لك بيتك عم ينفق ومافي شي يتاكل حرام جيبي شي لهل البنت تاكلو
رفيف : خالة خلص مابدي بعوض الله
فاتت وسكرت الباب
ام عمر : لا حول ولا قوة الا بالله العلي العظيم شو صاير لهل المخلوقة
راحت على خيمتا
ام عمر حبيبي محمود قوم معي لنجيب كرتونة غذائية لجارتنا
محمود : وماتقوم هية
ام عمر : خطي يا ابني قال ضهرا عم يوجعا
محمود : امري لالله .. امشي
ام عمر : الله يرضى عليك ويفرحني فيكي
محمود.: بكير ماما بكير كل عمري ١٤ سنة
ام عمر : تقبر قلبي امشي امشي
..........
قاعدة بزاوية الخيمة وعم تبكي قربت بنتا منها وحطت ايدا على كتفا
سالي : ماما شبك
رفيف : مافي شي حبيبتي فاتت برغشة بعيني
سالي : ماما جوعانة
رفيف : هلأ بقوم شفلك شي تاكليه
سالي : صرلي ساعة عم دور مالقيت شي
رفيف : شو رأيك اعملك اندومي
سالي : اي اي بس انتي شو بدك تاكلي الاندومي مابتكفي الي والك
رفيف : انا ماني جواعاني ياعمري
سالي : ماما انت يعني مابتاكلي قدي
رفيف : لا ماباكل قدك الكبار مابياكلو كتير
سالي : طيب عطيني روح جيب اندومي
طلعت من تحت الفرشة يلي قاعدة عليها قطعة معدنية وعطتا اياها وقالت : روحي شتري وحدة وتعالي
طلعت سالي فرحانة كتير
بعد شوي اجت لعندها ام عمر وابنها ومعون كرتونة غذائية
رفيف : شو هاد خالة
ام عمر : هاي الك
رفيف : كيف جبتيلي اياها
ام عمر : ما على كيفون فوتيها فوتيها
رفيف : يسلمو هالاين تفضلي تفضلي
فات ابن ام عمر حط الكرتونة وطلع
ام عمر : اي بنتي هلق روحي عملي فنجان قهوة وتعالي هلأ بدك تحكيلي قصتك
رفيف تبلكت وقالت : قصتي انا
ام عمر : اي قصتك انت بدي اعرف ليش انتي وحدانية
رفيف : طيب تفضلي
راحت رفيف عملت فنجان قهوة وهية شاردة وعم تفكر ......واجت قعدت مع ام عمر
ام عمر : يلا احكي بدي اسمع وبدي اعرف ليش ما رحتي جبتي كرتونة غذائية اليوم
رفيف : قصتي ياخالتي انو انا بنت وحدانية لاهلي واهلي ماتو من زمان وانا تزوجت واحد ابن حلال وجبت منو هالبنت وبالاحداث استشهد
ام عمر : الله يرحمو
رفيف : تعيشي وبيت عمي اهل جوزي صارو بدون يجوزني لسلفي فأنا رفضت صارو بدون ياخدو مني بنتي وانا هربت مع بنتي لهون ع اللبنان مشان مايوصلولي وهلأ انا عايشة هون لحالي ومختباي منون لحتى الله يفرجا
ام عمر : ياقلبي عليكي .. طيب حبيبتي من وين عم تصرفي
رفيف : والله عايشة من قلت الموت وع المساعدات عايشة الله وكيلك
ام عمر : لكن ليش ماقبلتي تروحي تستلمي اليوم
رفيف : ماهو عماد الكلب يلي متسلم المخيم طلب مني استغفر الله العظيم....... واذا ما بعطيه يلي بدو اياه معد يعطيني مساعدات وانا مابدي شي منو
ام عمر : الله لا يوفقو شو ابن حرام
رفيف : والله عم ضل طول الليل فايقة من خوفي لايفوت علي بهل الليل
ام عمر : طيب اشتكي عليه
رفيف : لمين بدي اشتكي قوليلي
ام عمر : سمعت انا بكرا جاي لجنة عالمخيم بدون يوزع مساعدات نقدية
رفيف : عنجد
ام عمر : اي والله جد ويمكن يتكفلو بالمخيم كلو علىطول اذا شفت المسؤول رح احكيلو قصتك وبخليه يساعدك
رفيف ؛ خالتي انتي شو عم تحكي بدك تفضحيني
ام عمر : اعوذ بالله بس قلو انو انك وحدانية وخيمتك مو لقيانة شي بركي بظبطلك اياها وبيدعمك
رفيف : اي الله يوفقك والله تلفت اعصابي انا كل يوم على هالحالة
ام عمر : خلص لاتاكل هم ونحنا كمان حدك اذا لاحظتي شي دغري اصرخي صوت
رفيف : ان شاء الله .. والله ياخالة ام عمر انتي الله بعتلي اياكي من السما عنجد معروفك مارح انساه
ام عمر : ولو يابنتي .. انتي والله صرتي بمثابة ولادي
رفيف : الله يخليك اياهن
ام عمر: تسلمي حبيبتي
............
المسا قاعدة رفيف عم تلمس على شعرات بنتا وبأيدها هاتفا الصغير يلي مكسرة نص شاشتو
حكتا رفيقتا من ضعيتا
مرح : مرحبا رفيف
رفيف : هلا وغلا ..كيفك انتي
مرح : تمام الحمد لله
رفيف : شوفي مافي
مرح : والله اخبار مو حلوة
رفيف : خير شوفي اهلي واخواتي صايرلن شي
مرح : لا اطمني صحتون كتير منيحة بس اخوكي عدنان نزل على اللبنان يدور عليكي
رفيف : شووووو
مرح : والله متل ماقلتلك وحالف مايرجع ليقتلك ويغسل العار
رفيف : لك اي عار اقسم بالله ماعملت شي بالحرام .. ورجب الله يرحمو هو وقف جنبي وساعدني لانو عرف انو ماغلطت وستر علي وتزوجني
مرح : الله يرحمو
رفيف دموعو عيونا وقالت : آمين .. عنجد ماشفت احسن منو رجال على وجه الكرة الارضية اااخ شو اشتقتلو
مرح : بعينك الله .. هو مابروح غير المنيح
رفيف : اي والله ... والله كسرلي ضهري لما مات الله يرحمو ويجعل مثواه الجنة
مرح : آمين .. اي المهم كيفا سوسو الامورة
رفيف : والله قلبي عم يتقطع عليها بتشوف هالولاد عم ياكلو ويشترو ويلبسو وهية ياحرام بتزعل ع الفاضي ومابتحكي شي
مرح : اماني رفيف ابعتلك مصاري
رفيف : لا انتي والله ماقصرتي بس معد غلبك معي اكتر من هيك الا الله مايفرجا
مرح : الحمد لله .. وهاد صاحب المخيم الزفت بعدو عم يدايقك
رفيف : والله ماعم اخطي خطوة برات الخيمة مشان ماشوفو بس من انهارين كتر مانو حقير شايف سالي بالطريق وقلاسلميلي على امك
مرح : الله لا يوفقو
رفيف : اي والله الله يخلصني من هالحياة وارتاح والله تعبت
مرح : خلص طولي بالك الا الله مايفرجا
رفيف : والنعم بالله ... بس الله لا يسامحو ولا يوجهلو الخير
مرح : مين رئيس المخيم
رفيف : لا ليلي وصلني لهون ...سامر
مرح : اي والله كلو منو الله لايوفقو شو عمل فيكي بس لاتخافي الله مابينسى حدا
رفيف : اااخ بس لو شوفو لنتفو بسناني دمرلي حياتي الله لا يوجهلو الخير وين ماراح
مرح : آمين ..
رفيف : بس انا هلا انشغل بالي بموضوع اخي
مرح : والله مابعرف لازم تلاقي حل
رفيف : خلص عم يقولو يمكن بكرا جاي لجنة جديدة عالمخيم بركي بقدر قلون ينقلوني عمخيم تاني وبغير اسمي مشان اذا اجا ودورو علي مايلاقوني
مرح : والله ياريت وكمان بتخلصي من الزفت يلي عندك
رفيف : اي والله ... خلص انا لازم لاقي حل
مرح : ان شاء الله ... المهم حبيبتي انا بدي سكر بدك شي
رفيف : سلامتك ياعمري بس اماني لاتجيبي سيرة لحدا انك عم تحكي معي
مرح : اعوذ بالله مسحيل حطي اديكي ورجليكي بمي باردة
سكرت رفيف التلفون وطبت على رجليها وغمضت عيونا وصارت تتذكر كيف كانت عايشة وكيف صارت عيشتا
وصار يمرق قدام عيونا كيف كانت مدللة عند اهلا وكلمتا ماتصير تنتين وكيف اما كانت تشتريلا احلا التياب وكيف كانت مشنشلة بالدهب واتذكرت غرفتا كانت اكبر من هي الخمية على عشر مرات وفجأة وهية مغمضة وعم تتذكر اياما الحلوة طلع بوجها سامر وهو عم يتضحك
فتحت عيونا بسرعة
رفيف : لك ليش بعدك عم تطلعي ليش .. الله يلعنك ... معقول بحبو ... لأ لأ مستحيل كون بحبو مستحيل حب الشخص يلي ضحك علي واخد مني كلشي .. الشخص الوحيد يلي لازم حبو هو رجب وبس... الله يرحمك يارجب ليش رحت وتركتني .. ااااه يارب اااه لك وين كنت ووين صرت
قامت طلعت دفتر وقلم يلي عم تكتب فيهن قصت حياتا وكانت كاتبة حياتا عند اهلا وكانت مبلشة بلقائها مع سامر
من اول السطر
كالفراشة تطير بين الزهور عندما التقيت بذاك الشاب الجميل لكن لم تتقن هذه الفراشة ان هذا الشخص ليس من فصيلت الفراشات بل كان دبور من الدبابير الحمراء الذي لسعته من اقوى اللسعات وابرته مليئة بالسم المميت وكان متنكر بذي الفراشات
التقيت به وكأنه اجمل وارق انسان على وجه هذه الكرة الارضية...... واول جملة قالها لي : ممكن ان كون حبيبك
راحت بذاكرتا لقبل اعوام
#####فلاااااش#بااااااااك####
كانت بعرس بنت خالتلا كانت فاردة شعرا الطويل ولابسة فستان سهرة توتي لقوق الركبة منفوشة وتحتو سكربينة كعب عالي
كان شعرا متل الحرير عم يلوح يمين وشمال بعيونا الخضر وبشرتا الشقرا الناعمة
فاتت وحدة من المعزيم وقالت اجا العريس والنسوان بلشت تلبس لانو عرس داخلي واكتر الموجودين محجبين
بلشت رفيف متل المجنونة تدور على عبايتها يلي كانت على كرسيها وماكانت تلاقيها
رفيف ؛ مرح مشان الله وين عبايتي
مرح : مابعرف
رفيف : لك ماني عم لاقيها رح يفوتو اهل العريس
مرح : لك ليكي كانو بلشو يفوتو
رفيف : ياربي ياربي شو اعمل
مرح : فوتي فوتي ع الحمام بسرعة
راحت رفيف بسرعة على الحمام وهية مقهورة كتير
رفيف : بس بدي اعرف مين هي يلي اخدتلي عبياتي.. ياربي والله كانت ع الكرسي .. ياربي يعني مارح شوف العريس والعروس وهنن عم يبلدو المحابس ولا رح شوف الحنة .. ياربي لااا وبلشت تضرب رجلا بالارض من القهر
سمعت حدا جاي بتجاه الحمام بسرعة فاتت على تواليت وسكرت على حالا الباب
وبلشت تسمع صوت شب طالع من برا
سامر : بدي اعرف مين هالفهمانة يلي حاطة قطعت الكيك على الكرسي هلأ كيف بدي اطلع وعلى بنطلوني مي والله بنفضح وبصيرو يقولو سامر ابن عم العريس عاملها على تيابو وماشالله كلون لسانون مابفوت على تمون
رفيف عم تسمع من جوا وحاطة ايدا على تما مشان تكتم ضحكتا بس كانت صوت نفسها ظاهر
وسامر سمعهاوسكت وبلش يقرب شوي شوي من باب التواليت وهية بعدا عم تضحك ومانا منتبهة انو عم يقرب من باب التواليت وفجأة فتح عليها الباب
هية انصدمت وجمدت مكانا وعلقت عيونا عليه وهو صفن فيها وصار يتطلع عليها من فوق لتحت ....وهية فاقت من الصدمة ولقتو عم يتطلع عليها ولاحظت انها مانا مسترة وبسرعة مسكت الباب وسكرتو وهو بعدو واقف مكانو وكأنو بحلم معقول هي يلي شافها حقيقة ولا حلم ... رجع دق الباب دقتين ناعمين
رفيف: لك انت مابتستحي اطلاع لبرا ماعندك شرف كيف بتفتح علي الباب اطلاااع لبرا
هو بعدو مصدوم وطلع بسرعة وصار يتطلع ع الصالة وكانت عم تعم بالضجة والناس كلا ملتفة حول العروس والعريس بس هو رغم هالضجيج حس كأنو لحالو وكأنو بعالم تاني كمل بطريقو على السيارة يلي هية للعريس كان جاي فيها فتح الباب وركب وحط ايدو على شباك السيارة وحطا تحت دقنو وصفن
بعد شي ساعة طلعو اهل العريس وركبو بالسيارات
( ملاحظة العرس عندن حفلة العروس لحال والعريس لحال بيجي العريس بالحنة ساعة وبيرجع بروح على حفلتو وتاني يوم بيجي بياخدا بعد ماتكون خلصت الحفلة عند العروس وبتبلش الحفلة عند العريس )
ركب العريس وكانت مبتسم
سامر : شو ماطولتو
العريس : خلص وقتنا وكمان بدون يكملو الحفلة والنسوان بدا تاخد راحتا .. انت وينك معد لقيتك
سامر : لك قعدت على كرسي كان محطوط عليه قطعة كيك واندهبو تيابي ورحت عالحمام مسحتون وجيت لهون مشان مايبين شي على تيابي
العريس : لكن دور خلينانمشي الكل صارو بالسيارات
سامر : انا تذكرت عندي شغلة ضرورية بهي المنطقة امسك مفاتيح سيارتك وانا سلام
العريس : سامر على وين
سامر : بعدين بعدين
نزل سامر والعريس ركب ورا دركسيون ومشو
.......................
مرح فاتت ع الحمام مالقت حدا
مرح : رفيف .. رفيف
رفيف : اي اي انا هون
فتحت الباب وطلعت
رفيف : شو راحو اهل العريس
مرح : اي راحو اطلعي
رفيف : يلا جاي امشي قدامي
مرح : شبك ليش هيك لونك مخطوف
رفيف بتلبك : اناا
مرح : اي انتي شبك
رفيف : لأ لأ مافي شي انسي
طلعو واول ماطلعت لقت عبايتها وشالها محطوطين على كرسي
رفيف : ليكون تيابي بس وين كانو
مرح : مابعرف .. بركي حدن كان قاعد عليهن
رفيف الله يلعنو مين ماكن يكون حرمني شوف الحفلة
مرح : طولي بالك مو مستاهلة يلا تعالي نرقص.....
خلصت الحفلة وطلعو وهية كانت حاطة ايدا بأيد اما وطلعو وهو اول ماشافا بسرعة عرفها مع انو كان الجو شبه عتم
طلعو بتاكسي وراحو وهو طلع وراهن وعرف وين بيتا ورجع على بيتون
تاني يوم الحفلة بتكون بالنهار والبنات كلا متحجبة لانو رح يروحو يحضرو الحفلة عند العريس وما وقت يشلحو ويلبسو
كانت لابسة فستان طويل للأرض وفوقو جلي فرو لانو الجو كان برد وحجاب على نفس اللون كعب عالي وكانت طالعة كتير حلوة
رقصو شوي ورقصو مع العروس وبلشو يسمعو اصوات الزمامير
واول شي تذكرتو رفيف الشب يلي شافا ليلة مبارح
فاتو اهل العريس وكان سامر ماشي ورا العريس ولابس طقم رسمي.... رفيف اول ماشافتو حست قلبا صار يدق بسرعة مليون يمكن خجلت منو ومن الموقف يلي صار معون
رفيف : شبك ليش هيك متوترة اكيد مانو متذكرني او مارح يعرفني لانو مبارح شافني بلا حجاب بس شاف وجهي... لازم ماخليه يلتقي فيني ......ولي على امتي على هالموقف يلي صار معي
وهو كان عم يدور بعيونو عليها لحتى شافا وصار يراقبا بنظراتو وين ماتروح وهية لاحظت عليه هالشي وخجلت كتير وصارت تحاول تخبي حالا بين المعازيم
قام سامر اخد وردة من بوكيه جنبو وخباها بجيبتو
مضت الحفلة وهنن متل القط والفار هية تحاول تهرب من نظراتو.... خلصت الحفلة عند العروس والعالم بلشت تطلع مشان تركب بالسرافيس ويروحو على حفلة العريس ومنون يرجعو على بيوتن
وهنن طالعين الكل من باب الصالة دفعة وحدة قرب منا بدون محدا ينتبه ومسكلا ايدا وحطلا الوردة بأيدا ومشي من دون ولا كلمة .. هية وقفت مكانا وضلت خمس دقايق على نفس الوقفة لتستوعب الصدمة شافت الوردة بايدا رمتا وكملت
كانت بدا تروح تحضر عند العريس بس غيرت رأيا وراحت على بيتا
مرق لسبوع على العرس ورفيف ماكانت تشوفو وحكت لرفيقتا مرح شو صار
وهية خلال هالاسبوع نسيت شو صار واعتبرتا انو حدا عاكسا وانتهت القصة
بلش يوم جديد ...رفيف رايحة عالجامعة واقفة لحتى تنطر السرفيس وقفت ع الطريق هية ومرح
رفيف : شكلنا رح نتأخر
مرح : لا ان شاء الله بنوصل عالوقت
رفيف : انا الحق علي اخي علي من الصبح فيقني وقلي قومي لوصلك بسيارتو وانا قلتلو بروح لحالي
مرح : لك حدا بصرلو يروح بسيارة مكيفة وهدوء لحالك بتفرضي مشان تتشنططي بالسرافيس
رفيف : قلت بكسب ساعة نوم .. هاه ليكي اجا السرفيس قرب السرفيس ووقف حدون وهنن عم يركبو اجا متور ( دراجة نارية ) وقف وكان راكب عليه تنين واحد عم يسوق والتاني راكب وراه وهو سامر ....نزل سامر وركب بالسرفيس
رفيف وسامر شافو بعض وتفاجئو بس رفيف ماحبت تعطي اهمية وتجاهلتو هو ركب وراهن
بس رفيف طول الطريق منها مرتاحة لانو حست عيون سامر عليها ومافارقتا . "وهو كذالك "
وصلو البنات على جامعتون ونزلو وسامر ماوجهلون اي كلمة وكمل السرفيس
رفيف ماحبت تبين لرفيقتا انها مهتمة وما قالتلا شي عن سامر لانو اعتبرت شي ماضي ومالو اي قيمة لتحكي فيه .. خلصو الجامعة وهية طالعة لقتو واقف ومبين انو ناطرا لانو كان مستند على حيط ولما شافا وقف ومشي لعندا قرب وصار مقابيلها تماما
وقال : ممكن كون حبيبك
رفيف : شووو
سامر : ممكن كون حبيبك
رفيف : سمعت بس انو شو هاد يلي عم تطلبو انت اكيد مجنون
سامر : اي مجنون وخديني على قد عقلي ممكن نحب بعض
رفيف : لأ ما ممكن
سامر : ماعلى كيفك
رفيف : هههه شكلك واثق من حالك
سامر : كتييير
رفيف : طيب واثاق بحالك قد مابدك بس بعد عن طريقي لو سمحت
سامر : مابدي
رفيف : انت مجنون بعد عن طريقي احسن مالم كل الجامعة عليك
سامر: خالينا نحكي على رواق
رفيف: لك عن اي رواق عم تحكي
سامر: عجبتيني وبدي اياكي
رفيف: بيت اهلي مفتوح
صفن شوي وقال :انا حاليا ماني قدران اخطب لانو وضعي تحت الصفر
رفيف : وشو اعملك شو رأيك روح انا اخطبك
سامر : ممكن تفهميني وتروقي انتي عنجد اخدتيلي عقلي وقلبي وعلى طول عم فكر فيكي... وماني حابب تروحي لغيري بس عنجد وضعي مابيسمح اخطب هلأ لانو عنجد مافي معي ولا ليرة
رفيف، شو المطلوب مني
سامر، بس اذا اجاكي عريس رفضيه بس شهرين ما اكتر
رفيف، بس انا ماني متطرة انطر حدا
سامر، صدقيني انا حبيتك من قلبي الا اذا في حدا بحياتك
رفيف، لا مافي حدا
سامر، بترجاي بس شهرين
رفيف، ......
سامر، ماني طالب منك شي غير شهرين وبوعدك بعد هالشهرين يلا بتلاقيني جيت خطبتك يا معد تشوفي وجهي وبوعدك انو ما ازعجك ابدا من هون لشهرين لانو انا والله رايدك بالحلال... شو قلتلي؟؟
رفيف، بفكر وبكرا بردلك خبر يا اي يا لأ
سامر، ناطر على احر من الجمر
تركتو ومشت وهية من جوا كانت رح تطير من الفرح حكت لرفيقتا مرح شو صار
مرح، مبين نيتو شريفة
رفيف، وانا كمان هيك عم قول
مرح، طيب انتي الشب عاجبك
رفيف، بكذب عليكي اذا قلتلك لأ...عاجبني بكلشي فيه بجرائتو وبشخصيتو وحتى بصراحتو
مرح : لكن مابدا تفكير بكرا عطيه الموافقة بس بشرط ما يقرب منك لوقت ما يجي ويخطبك
رفيف : وانا كمان عن قول هيك
تاني يوم شافتو على باب الجامعة كان ناطرا .. قربت منو
رفيف : مرحبا
سامر : هلا
رفيف : انا فكرت..... ورح اربط حالي فيك لمدة شهرين ... بس من هون لشهرين مابدي تزعجني نهائيا
سامر: وانا موافق
رفيف : بالاذن
سامر : لحظة مابدك تعرفي اسمي
رفيف : ااااه صح شو اسمك
سامر : ههههه اسمي سامر
رفيف : تشرفت بمعرفتك ... وانا
سامر : رفيف
رفيف : من وين بتعرف اسمي
سامر : معقول اتقدم لوحدة وما اعرف شو اسما
رفيف : امم .. وشو بتعرف كمان
سامر : بعرف كلشي
ابتسمت رفيف وقالت : انا صار لازم امشي بشوفك بعد شهرين ببيت اهلي
تركتو ومشت
هو ضل واقف مكانو مبتسم
......................................
المسا ببيت سامر قاعد بين عيلتو عم يتعشى خلص وقام
ام سامر : عوين ماما
سامر : رايح لعند رامي اسهر بدك شي
ام سامر : لا روح الله يرضى عليك
سامر : يلا سلام
لبس وراح ركب متورو وراح لعند رامي
ببيت رامي
رامي : وهلأ شو بدك تشتغل
سامر : والله مابعرف
رامي : يعني كيف بتوعد البنت بعد شهرين وانت مافي بجيبتك ولا ليرة حتى لو اشتغلت شغل شهرين مابخطبوك
سامر : مابعرف هيك طلع معي وكمان اذا لقيت شغل بتدين وبصير سدد الدين
رامي : يعني هلأ حليتا
سامر : مابعرف كمان ببيع المتور
رامي : ههههه شو عندك هلأ هالرنج كلو متور يادوب حقو ٣٠ الف
سامر : لك انا جيت لعندك لحتى ترفعلي معنوياتي وانت عم تحبطني
رامي : طيب شو بدي قلك .... وكمان مالقيت غير هالبنت انت كمان
سامر : ليش شبا رفيف
رامي : لك البنت مافي منا .. بس قصدي مالقيت غير من هالعيلة لك هدول مليانين يعني اذا بدك تشتغل ليل مع انهار مارح تقدر تعيشا متل مانها عايشة عند اهلا
سامر : اذا بتحبني بتعيش معي بأسوء ظروفي
رامي : ههههه لك ليش لحقت تحبك ويمكن قالتلك هيك انها رح تنطرك مشان تجبر بخاطرك ما اكتر
سامر : لأ هية معجبة فيني ورح تحبني ... كمان مانها متطرة تجبر بخاطر حدا كانت قالتلي لا تنطر وخلصنا
رامي : اكيد انت صرت تترجاها ورح تبكي قداما لحتى وافقت
سامر انقهر : العمى بقلبك قال معتبرك صديقي وعم احكيلك وافتحلك قلبي عنجد تضرب من بين الرفقات
قام مشان يطلع
رامي : سامر لحظة .. سامر .. انا اسف خلص معد عيدا
سامر : حل عني يازلمة ..
تركو وطلع
..............................
رفيف كانت عم تدرس بعدين صفنت وحطت القلم بين شفافا وسرحت بخيالا وصار تفكر بسامر
رفيف : معقول حبيتو بهل السرعة .....اي يمكن .. لكن ليش بقلولو حب من اول نظرة
لاحكي مع مرح
مسكت موبايلا ودقت لمرح
مرح : هلا رفيف
رفيف : زعجتك
مرح : لا انا سهرانة
رفيف : عم فكر ..
مرح : وبشو دخلك
رفيف : بسامر
مرح : شو حبيتيه ؟
رفيف : هيك يمكن
مرح : نقول مبروك
رفيف : ههه مابعرف بس في جواتي خوف
مرح : خوف شو
رفيف : خايفة اغلط
مرح : ان شاء الله مابصير هيك شي .. بس ماتكوني عطيتيه رقمك
رفيف : لا لا
مرح : لكن لاتخافي
رفيف ،: ان شاء الله
............................
######بااااااااك######
القلم بأيدا وبعدا عم تكتب
كان يمثل بطريقة فظيعة حتى انا الى الان لم استطع تصديق انه كان كاذب .. لماذا صدقته لماذا لم استطع التميز بين الحقيقة والكذب .. هل يعقل انه كان صادق
وانا فهمته غلط ... لا لا كيف يكون صادق وهو ... (وقفت الكتابة )
رفيف : لا بكير لحتى اكتب هدول .... لحتى صير عندن بالكتابة بكتبن .. مسحت شو كتبت اخر سطرين
سكرت الدفتر وكان الفجر عم ياذن قامت توضت وصلت والشمس بلشت تطلع وهية امنت وحطت راسا مشان تنام كم ساعة
يتبع .......
بمخيم من مخيمات الاجئين السوريين في لبنان
بخيمة صغيرة مساحتها ٤مترمربع مصنوعة من شادر رقيق مصنوع من النايلون
رفيف مرى عمرا ٢٨ ساكنة بهي الخيمة هية وبنتا اسما سالي يلي عمرا ٥ سنين
اندق باب الخيمة ويلي هو عبارة عن لوح خشب رقيق ومن حيلا دفشة بيقلب
قامت بعبايتها السودة يلي لونها جارد من كتر مانها قديمة ولابسة حجاب فوقو
فتحت الباب وكانت جارتن ام عمر مرى خمسينية صاحبة دين كتير وقلبا اطيب من العسل
ام عمر : شو حبيبتي ام سالي مابدك تروح لنستلم توزيع الكراتين التغذية
رفيف : ليش اليوم في توزيع
ام عمر : اي ليش مامعك خبر
رفيف : لا والله
ام عمر : يلا مامشكلة هي انا عم خبرك امشي معي
رفيف صفنت شوي بعدين قالت لا خلص مابدي
ام عمر : لك ليش مابدك هاد حقك وانت بحاجة
رفيف : طيب بتقدري تجيبلي اياها انتي
ام عمر : لك ليش يابنتي وكمان مافيني لازم تكوني موجودة
رفيف : اصبح خلص بعوض الله
ام عمر : لك شو عم يصير معك لك بيتك عم ينفق ومافي شي يتاكل حرام جيبي شي لهل البنت تاكلو
رفيف : خالة خلص مابدي بعوض الله
فاتت وسكرت الباب
ام عمر : لا حول ولا قوة الا بالله العلي العظيم شو صاير لهل المخلوقة
راحت على خيمتا
ام عمر حبيبي محمود قوم معي لنجيب كرتونة غذائية لجارتنا
محمود : وماتقوم هية
ام عمر : خطي يا ابني قال ضهرا عم يوجعا
محمود : امري لالله .. امشي
ام عمر : الله يرضى عليك ويفرحني فيكي
محمود.: بكير ماما بكير كل عمري ١٤ سنة
ام عمر : تقبر قلبي امشي امشي
..........
قاعدة بزاوية الخيمة وعم تبكي قربت بنتا منها وحطت ايدا على كتفا
سالي : ماما شبك
رفيف : مافي شي حبيبتي فاتت برغشة بعيني
سالي : ماما جوعانة
رفيف : هلأ بقوم شفلك شي تاكليه
سالي : صرلي ساعة عم دور مالقيت شي
رفيف : شو رأيك اعملك اندومي
سالي : اي اي بس انتي شو بدك تاكلي الاندومي مابتكفي الي والك
رفيف : انا ماني جواعاني ياعمري
سالي : ماما انت يعني مابتاكلي قدي
رفيف : لا ماباكل قدك الكبار مابياكلو كتير
سالي : طيب عطيني روح جيب اندومي
طلعت من تحت الفرشة يلي قاعدة عليها قطعة معدنية وعطتا اياها وقالت : روحي شتري وحدة وتعالي
طلعت سالي فرحانة كتير
بعد شوي اجت لعندها ام عمر وابنها ومعون كرتونة غذائية
رفيف : شو هاد خالة
ام عمر : هاي الك
رفيف : كيف جبتيلي اياها
ام عمر : ما على كيفون فوتيها فوتيها
رفيف : يسلمو هالاين تفضلي تفضلي
فات ابن ام عمر حط الكرتونة وطلع
ام عمر : اي بنتي هلق روحي عملي فنجان قهوة وتعالي هلأ بدك تحكيلي قصتك
رفيف تبلكت وقالت : قصتي انا
ام عمر : اي قصتك انت بدي اعرف ليش انتي وحدانية
رفيف : طيب تفضلي
راحت رفيف عملت فنجان قهوة وهية شاردة وعم تفكر ......واجت قعدت مع ام عمر
ام عمر : يلا احكي بدي اسمع وبدي اعرف ليش ما رحتي جبتي كرتونة غذائية اليوم
رفيف : قصتي ياخالتي انو انا بنت وحدانية لاهلي واهلي ماتو من زمان وانا تزوجت واحد ابن حلال وجبت منو هالبنت وبالاحداث استشهد
ام عمر : الله يرحمو
رفيف : تعيشي وبيت عمي اهل جوزي صارو بدون يجوزني لسلفي فأنا رفضت صارو بدون ياخدو مني بنتي وانا هربت مع بنتي لهون ع اللبنان مشان مايوصلولي وهلأ انا عايشة هون لحالي ومختباي منون لحتى الله يفرجا
ام عمر : ياقلبي عليكي .. طيب حبيبتي من وين عم تصرفي
رفيف : والله عايشة من قلت الموت وع المساعدات عايشة الله وكيلك
ام عمر : لكن ليش ماقبلتي تروحي تستلمي اليوم
رفيف : ماهو عماد الكلب يلي متسلم المخيم طلب مني استغفر الله العظيم....... واذا ما بعطيه يلي بدو اياه معد يعطيني مساعدات وانا مابدي شي منو
ام عمر : الله لا يوفقو شو ابن حرام
رفيف : والله عم ضل طول الليل فايقة من خوفي لايفوت علي بهل الليل
ام عمر : طيب اشتكي عليه
رفيف : لمين بدي اشتكي قوليلي
ام عمر : سمعت انا بكرا جاي لجنة عالمخيم بدون يوزع مساعدات نقدية
رفيف : عنجد
ام عمر : اي والله جد ويمكن يتكفلو بالمخيم كلو علىطول اذا شفت المسؤول رح احكيلو قصتك وبخليه يساعدك
رفيف ؛ خالتي انتي شو عم تحكي بدك تفضحيني
ام عمر : اعوذ بالله بس قلو انو انك وحدانية وخيمتك مو لقيانة شي بركي بظبطلك اياها وبيدعمك
رفيف : اي الله يوفقك والله تلفت اعصابي انا كل يوم على هالحالة
ام عمر : خلص لاتاكل هم ونحنا كمان حدك اذا لاحظتي شي دغري اصرخي صوت
رفيف : ان شاء الله .. والله ياخالة ام عمر انتي الله بعتلي اياكي من السما عنجد معروفك مارح انساه
ام عمر : ولو يابنتي .. انتي والله صرتي بمثابة ولادي
رفيف : الله يخليك اياهن
ام عمر: تسلمي حبيبتي
............
المسا قاعدة رفيف عم تلمس على شعرات بنتا وبأيدها هاتفا الصغير يلي مكسرة نص شاشتو
حكتا رفيقتا من ضعيتا
مرح : مرحبا رفيف
رفيف : هلا وغلا ..كيفك انتي
مرح : تمام الحمد لله
رفيف : شوفي مافي
مرح : والله اخبار مو حلوة
رفيف : خير شوفي اهلي واخواتي صايرلن شي
مرح : لا اطمني صحتون كتير منيحة بس اخوكي عدنان نزل على اللبنان يدور عليكي
رفيف : شووووو
مرح : والله متل ماقلتلك وحالف مايرجع ليقتلك ويغسل العار
رفيف : لك اي عار اقسم بالله ماعملت شي بالحرام .. ورجب الله يرحمو هو وقف جنبي وساعدني لانو عرف انو ماغلطت وستر علي وتزوجني
مرح : الله يرحمو
رفيف دموعو عيونا وقالت : آمين .. عنجد ماشفت احسن منو رجال على وجه الكرة الارضية اااخ شو اشتقتلو
مرح : بعينك الله .. هو مابروح غير المنيح
رفيف : اي والله ... والله كسرلي ضهري لما مات الله يرحمو ويجعل مثواه الجنة
مرح : آمين .. اي المهم كيفا سوسو الامورة
رفيف : والله قلبي عم يتقطع عليها بتشوف هالولاد عم ياكلو ويشترو ويلبسو وهية ياحرام بتزعل ع الفاضي ومابتحكي شي
مرح : اماني رفيف ابعتلك مصاري
رفيف : لا انتي والله ماقصرتي بس معد غلبك معي اكتر من هيك الا الله مايفرجا
مرح : الحمد لله .. وهاد صاحب المخيم الزفت بعدو عم يدايقك
رفيف : والله ماعم اخطي خطوة برات الخيمة مشان ماشوفو بس من انهارين كتر مانو حقير شايف سالي بالطريق وقلاسلميلي على امك
مرح : الله لا يوفقو
رفيف : اي والله الله يخلصني من هالحياة وارتاح والله تعبت
مرح : خلص طولي بالك الا الله مايفرجا
رفيف : والنعم بالله ... بس الله لا يسامحو ولا يوجهلو الخير
مرح : مين رئيس المخيم
رفيف : لا ليلي وصلني لهون ...سامر
مرح : اي والله كلو منو الله لايوفقو شو عمل فيكي بس لاتخافي الله مابينسى حدا
رفيف : اااخ بس لو شوفو لنتفو بسناني دمرلي حياتي الله لا يوجهلو الخير وين ماراح
مرح : آمين ..
رفيف : بس انا هلا انشغل بالي بموضوع اخي
مرح : والله مابعرف لازم تلاقي حل
رفيف : خلص عم يقولو يمكن بكرا جاي لجنة جديدة عالمخيم بركي بقدر قلون ينقلوني عمخيم تاني وبغير اسمي مشان اذا اجا ودورو علي مايلاقوني
مرح : والله ياريت وكمان بتخلصي من الزفت يلي عندك
رفيف : اي والله ... خلص انا لازم لاقي حل
مرح : ان شاء الله ... المهم حبيبتي انا بدي سكر بدك شي
رفيف : سلامتك ياعمري بس اماني لاتجيبي سيرة لحدا انك عم تحكي معي
مرح : اعوذ بالله مسحيل حطي اديكي ورجليكي بمي باردة
سكرت رفيف التلفون وطبت على رجليها وغمضت عيونا وصارت تتذكر كيف كانت عايشة وكيف صارت عيشتا
وصار يمرق قدام عيونا كيف كانت مدللة عند اهلا وكلمتا ماتصير تنتين وكيف اما كانت تشتريلا احلا التياب وكيف كانت مشنشلة بالدهب واتذكرت غرفتا كانت اكبر من هي الخمية على عشر مرات وفجأة وهية مغمضة وعم تتذكر اياما الحلوة طلع بوجها سامر وهو عم يتضحك
فتحت عيونا بسرعة
رفيف : لك ليش بعدك عم تطلعي ليش .. الله يلعنك ... معقول بحبو ... لأ لأ مستحيل كون بحبو مستحيل حب الشخص يلي ضحك علي واخد مني كلشي .. الشخص الوحيد يلي لازم حبو هو رجب وبس... الله يرحمك يارجب ليش رحت وتركتني .. ااااه يارب اااه لك وين كنت ووين صرت
قامت طلعت دفتر وقلم يلي عم تكتب فيهن قصت حياتا وكانت كاتبة حياتا عند اهلا وكانت مبلشة بلقائها مع سامر
من اول السطر
كالفراشة تطير بين الزهور عندما التقيت بذاك الشاب الجميل لكن لم تتقن هذه الفراشة ان هذا الشخص ليس من فصيلت الفراشات بل كان دبور من الدبابير الحمراء الذي لسعته من اقوى اللسعات وابرته مليئة بالسم المميت وكان متنكر بذي الفراشات
التقيت به وكأنه اجمل وارق انسان على وجه هذه الكرة الارضية...... واول جملة قالها لي : ممكن ان كون حبيبك
راحت بذاكرتا لقبل اعوام
#####فلاااااش#بااااااااك####
كانت بعرس بنت خالتلا كانت فاردة شعرا الطويل ولابسة فستان سهرة توتي لقوق الركبة منفوشة وتحتو سكربينة كعب عالي
كان شعرا متل الحرير عم يلوح يمين وشمال بعيونا الخضر وبشرتا الشقرا الناعمة
فاتت وحدة من المعزيم وقالت اجا العريس والنسوان بلشت تلبس لانو عرس داخلي واكتر الموجودين محجبين
بلشت رفيف متل المجنونة تدور على عبايتها يلي كانت على كرسيها وماكانت تلاقيها
رفيف ؛ مرح مشان الله وين عبايتي
مرح : مابعرف
رفيف : لك ماني عم لاقيها رح يفوتو اهل العريس
مرح : لك ليكي كانو بلشو يفوتو
رفيف : ياربي ياربي شو اعمل
مرح : فوتي فوتي ع الحمام بسرعة
راحت رفيف بسرعة على الحمام وهية مقهورة كتير
رفيف : بس بدي اعرف مين هي يلي اخدتلي عبياتي.. ياربي والله كانت ع الكرسي .. ياربي يعني مارح شوف العريس والعروس وهنن عم يبلدو المحابس ولا رح شوف الحنة .. ياربي لااا وبلشت تضرب رجلا بالارض من القهر
سمعت حدا جاي بتجاه الحمام بسرعة فاتت على تواليت وسكرت على حالا الباب
وبلشت تسمع صوت شب طالع من برا
سامر : بدي اعرف مين هالفهمانة يلي حاطة قطعت الكيك على الكرسي هلأ كيف بدي اطلع وعلى بنطلوني مي والله بنفضح وبصيرو يقولو سامر ابن عم العريس عاملها على تيابو وماشالله كلون لسانون مابفوت على تمون
رفيف عم تسمع من جوا وحاطة ايدا على تما مشان تكتم ضحكتا بس كانت صوت نفسها ظاهر
وسامر سمعهاوسكت وبلش يقرب شوي شوي من باب التواليت وهية بعدا عم تضحك ومانا منتبهة انو عم يقرب من باب التواليت وفجأة فتح عليها الباب
هية انصدمت وجمدت مكانا وعلقت عيونا عليه وهو صفن فيها وصار يتطلع عليها من فوق لتحت ....وهية فاقت من الصدمة ولقتو عم يتطلع عليها ولاحظت انها مانا مسترة وبسرعة مسكت الباب وسكرتو وهو بعدو واقف مكانو وكأنو بحلم معقول هي يلي شافها حقيقة ولا حلم ... رجع دق الباب دقتين ناعمين
رفيف: لك انت مابتستحي اطلاع لبرا ماعندك شرف كيف بتفتح علي الباب اطلاااع لبرا
هو بعدو مصدوم وطلع بسرعة وصار يتطلع ع الصالة وكانت عم تعم بالضجة والناس كلا ملتفة حول العروس والعريس بس هو رغم هالضجيج حس كأنو لحالو وكأنو بعالم تاني كمل بطريقو على السيارة يلي هية للعريس كان جاي فيها فتح الباب وركب وحط ايدو على شباك السيارة وحطا تحت دقنو وصفن
بعد شي ساعة طلعو اهل العريس وركبو بالسيارات
( ملاحظة العرس عندن حفلة العروس لحال والعريس لحال بيجي العريس بالحنة ساعة وبيرجع بروح على حفلتو وتاني يوم بيجي بياخدا بعد ماتكون خلصت الحفلة عند العروس وبتبلش الحفلة عند العريس )
ركب العريس وكانت مبتسم
سامر : شو ماطولتو
العريس : خلص وقتنا وكمان بدون يكملو الحفلة والنسوان بدا تاخد راحتا .. انت وينك معد لقيتك
سامر : لك قعدت على كرسي كان محطوط عليه قطعة كيك واندهبو تيابي ورحت عالحمام مسحتون وجيت لهون مشان مايبين شي على تيابي
العريس : لكن دور خلينانمشي الكل صارو بالسيارات
سامر : انا تذكرت عندي شغلة ضرورية بهي المنطقة امسك مفاتيح سيارتك وانا سلام
العريس : سامر على وين
سامر : بعدين بعدين
نزل سامر والعريس ركب ورا دركسيون ومشو
.......................
مرح فاتت ع الحمام مالقت حدا
مرح : رفيف .. رفيف
رفيف : اي اي انا هون
فتحت الباب وطلعت
رفيف : شو راحو اهل العريس
مرح : اي راحو اطلعي
رفيف : يلا جاي امشي قدامي
مرح : شبك ليش هيك لونك مخطوف
رفيف بتلبك : اناا
مرح : اي انتي شبك
رفيف : لأ لأ مافي شي انسي
طلعو واول ماطلعت لقت عبايتها وشالها محطوطين على كرسي
رفيف : ليكون تيابي بس وين كانو
مرح : مابعرف .. بركي حدن كان قاعد عليهن
رفيف الله يلعنو مين ماكن يكون حرمني شوف الحفلة
مرح : طولي بالك مو مستاهلة يلا تعالي نرقص.....
خلصت الحفلة وطلعو وهية كانت حاطة ايدا بأيد اما وطلعو وهو اول ماشافا بسرعة عرفها مع انو كان الجو شبه عتم
طلعو بتاكسي وراحو وهو طلع وراهن وعرف وين بيتا ورجع على بيتون
تاني يوم الحفلة بتكون بالنهار والبنات كلا متحجبة لانو رح يروحو يحضرو الحفلة عند العريس وما وقت يشلحو ويلبسو
كانت لابسة فستان طويل للأرض وفوقو جلي فرو لانو الجو كان برد وحجاب على نفس اللون كعب عالي وكانت طالعة كتير حلوة
رقصو شوي ورقصو مع العروس وبلشو يسمعو اصوات الزمامير
واول شي تذكرتو رفيف الشب يلي شافا ليلة مبارح
فاتو اهل العريس وكان سامر ماشي ورا العريس ولابس طقم رسمي.... رفيف اول ماشافتو حست قلبا صار يدق بسرعة مليون يمكن خجلت منو ومن الموقف يلي صار معون
رفيف : شبك ليش هيك متوترة اكيد مانو متذكرني او مارح يعرفني لانو مبارح شافني بلا حجاب بس شاف وجهي... لازم ماخليه يلتقي فيني ......ولي على امتي على هالموقف يلي صار معي
وهو كان عم يدور بعيونو عليها لحتى شافا وصار يراقبا بنظراتو وين ماتروح وهية لاحظت عليه هالشي وخجلت كتير وصارت تحاول تخبي حالا بين المعازيم
قام سامر اخد وردة من بوكيه جنبو وخباها بجيبتو
مضت الحفلة وهنن متل القط والفار هية تحاول تهرب من نظراتو.... خلصت الحفلة عند العروس والعالم بلشت تطلع مشان تركب بالسرافيس ويروحو على حفلة العريس ومنون يرجعو على بيوتن
وهنن طالعين الكل من باب الصالة دفعة وحدة قرب منا بدون محدا ينتبه ومسكلا ايدا وحطلا الوردة بأيدا ومشي من دون ولا كلمة .. هية وقفت مكانا وضلت خمس دقايق على نفس الوقفة لتستوعب الصدمة شافت الوردة بايدا رمتا وكملت
كانت بدا تروح تحضر عند العريس بس غيرت رأيا وراحت على بيتا
مرق لسبوع على العرس ورفيف ماكانت تشوفو وحكت لرفيقتا مرح شو صار
وهية خلال هالاسبوع نسيت شو صار واعتبرتا انو حدا عاكسا وانتهت القصة
بلش يوم جديد ...رفيف رايحة عالجامعة واقفة لحتى تنطر السرفيس وقفت ع الطريق هية ومرح
رفيف : شكلنا رح نتأخر
مرح : لا ان شاء الله بنوصل عالوقت
رفيف : انا الحق علي اخي علي من الصبح فيقني وقلي قومي لوصلك بسيارتو وانا قلتلو بروح لحالي
مرح : لك حدا بصرلو يروح بسيارة مكيفة وهدوء لحالك بتفرضي مشان تتشنططي بالسرافيس
رفيف : قلت بكسب ساعة نوم .. هاه ليكي اجا السرفيس قرب السرفيس ووقف حدون وهنن عم يركبو اجا متور ( دراجة نارية ) وقف وكان راكب عليه تنين واحد عم يسوق والتاني راكب وراه وهو سامر ....نزل سامر وركب بالسرفيس
رفيف وسامر شافو بعض وتفاجئو بس رفيف ماحبت تعطي اهمية وتجاهلتو هو ركب وراهن
بس رفيف طول الطريق منها مرتاحة لانو حست عيون سامر عليها ومافارقتا . "وهو كذالك "
وصلو البنات على جامعتون ونزلو وسامر ماوجهلون اي كلمة وكمل السرفيس
رفيف ماحبت تبين لرفيقتا انها مهتمة وما قالتلا شي عن سامر لانو اعتبرت شي ماضي ومالو اي قيمة لتحكي فيه .. خلصو الجامعة وهية طالعة لقتو واقف ومبين انو ناطرا لانو كان مستند على حيط ولما شافا وقف ومشي لعندا قرب وصار مقابيلها تماما
وقال : ممكن كون حبيبك
رفيف : شووو
سامر : ممكن كون حبيبك
رفيف : سمعت بس انو شو هاد يلي عم تطلبو انت اكيد مجنون
سامر : اي مجنون وخديني على قد عقلي ممكن نحب بعض
رفيف : لأ ما ممكن
سامر : ماعلى كيفك
رفيف : هههه شكلك واثق من حالك
سامر : كتييير
رفيف : طيب واثاق بحالك قد مابدك بس بعد عن طريقي لو سمحت
سامر : مابدي
رفيف : انت مجنون بعد عن طريقي احسن مالم كل الجامعة عليك
سامر: خالينا نحكي على رواق
رفيف: لك عن اي رواق عم تحكي
سامر: عجبتيني وبدي اياكي
رفيف: بيت اهلي مفتوح
صفن شوي وقال :انا حاليا ماني قدران اخطب لانو وضعي تحت الصفر
رفيف : وشو اعملك شو رأيك روح انا اخطبك
سامر : ممكن تفهميني وتروقي انتي عنجد اخدتيلي عقلي وقلبي وعلى طول عم فكر فيكي... وماني حابب تروحي لغيري بس عنجد وضعي مابيسمح اخطب هلأ لانو عنجد مافي معي ولا ليرة
رفيف، شو المطلوب مني
سامر، بس اذا اجاكي عريس رفضيه بس شهرين ما اكتر
رفيف، بس انا ماني متطرة انطر حدا
سامر، صدقيني انا حبيتك من قلبي الا اذا في حدا بحياتك
رفيف، لا مافي حدا
سامر، بترجاي بس شهرين
رفيف، ......
سامر، ماني طالب منك شي غير شهرين وبوعدك بعد هالشهرين يلا بتلاقيني جيت خطبتك يا معد تشوفي وجهي وبوعدك انو ما ازعجك ابدا من هون لشهرين لانو انا والله رايدك بالحلال... شو قلتلي؟؟
رفيف، بفكر وبكرا بردلك خبر يا اي يا لأ
سامر، ناطر على احر من الجمر
تركتو ومشت وهية من جوا كانت رح تطير من الفرح حكت لرفيقتا مرح شو صار
مرح، مبين نيتو شريفة
رفيف، وانا كمان هيك عم قول
مرح، طيب انتي الشب عاجبك
رفيف، بكذب عليكي اذا قلتلك لأ...عاجبني بكلشي فيه بجرائتو وبشخصيتو وحتى بصراحتو
مرح : لكن مابدا تفكير بكرا عطيه الموافقة بس بشرط ما يقرب منك لوقت ما يجي ويخطبك
رفيف : وانا كمان عن قول هيك
تاني يوم شافتو على باب الجامعة كان ناطرا .. قربت منو
رفيف : مرحبا
سامر : هلا
رفيف : انا فكرت..... ورح اربط حالي فيك لمدة شهرين ... بس من هون لشهرين مابدي تزعجني نهائيا
سامر: وانا موافق
رفيف : بالاذن
سامر : لحظة مابدك تعرفي اسمي
رفيف : ااااه صح شو اسمك
سامر : ههههه اسمي سامر
رفيف : تشرفت بمعرفتك ... وانا
سامر : رفيف
رفيف : من وين بتعرف اسمي
سامر : معقول اتقدم لوحدة وما اعرف شو اسما
رفيف : امم .. وشو بتعرف كمان
سامر : بعرف كلشي
ابتسمت رفيف وقالت : انا صار لازم امشي بشوفك بعد شهرين ببيت اهلي
تركتو ومشت
هو ضل واقف مكانو مبتسم
......................................
المسا ببيت سامر قاعد بين عيلتو عم يتعشى خلص وقام
ام سامر : عوين ماما
سامر : رايح لعند رامي اسهر بدك شي
ام سامر : لا روح الله يرضى عليك
سامر : يلا سلام
لبس وراح ركب متورو وراح لعند رامي
ببيت رامي
رامي : وهلأ شو بدك تشتغل
سامر : والله مابعرف
رامي : يعني كيف بتوعد البنت بعد شهرين وانت مافي بجيبتك ولا ليرة حتى لو اشتغلت شغل شهرين مابخطبوك
سامر : مابعرف هيك طلع معي وكمان اذا لقيت شغل بتدين وبصير سدد الدين
رامي : يعني هلأ حليتا
سامر : مابعرف كمان ببيع المتور
رامي : ههههه شو عندك هلأ هالرنج كلو متور يادوب حقو ٣٠ الف
سامر : لك انا جيت لعندك لحتى ترفعلي معنوياتي وانت عم تحبطني
رامي : طيب شو بدي قلك .... وكمان مالقيت غير هالبنت انت كمان
سامر : ليش شبا رفيف
رامي : لك البنت مافي منا .. بس قصدي مالقيت غير من هالعيلة لك هدول مليانين يعني اذا بدك تشتغل ليل مع انهار مارح تقدر تعيشا متل مانها عايشة عند اهلا
سامر : اذا بتحبني بتعيش معي بأسوء ظروفي
رامي : ههههه لك ليش لحقت تحبك ويمكن قالتلك هيك انها رح تنطرك مشان تجبر بخاطرك ما اكتر
سامر : لأ هية معجبة فيني ورح تحبني ... كمان مانها متطرة تجبر بخاطر حدا كانت قالتلي لا تنطر وخلصنا
رامي : اكيد انت صرت تترجاها ورح تبكي قداما لحتى وافقت
سامر انقهر : العمى بقلبك قال معتبرك صديقي وعم احكيلك وافتحلك قلبي عنجد تضرب من بين الرفقات
قام مشان يطلع
رامي : سامر لحظة .. سامر .. انا اسف خلص معد عيدا
سامر : حل عني يازلمة ..
تركو وطلع
..............................
رفيف كانت عم تدرس بعدين صفنت وحطت القلم بين شفافا وسرحت بخيالا وصار تفكر بسامر
رفيف : معقول حبيتو بهل السرعة .....اي يمكن .. لكن ليش بقلولو حب من اول نظرة
لاحكي مع مرح
مسكت موبايلا ودقت لمرح
مرح : هلا رفيف
رفيف : زعجتك
مرح : لا انا سهرانة
رفيف : عم فكر ..
مرح : وبشو دخلك
رفيف : بسامر
مرح : شو حبيتيه ؟
رفيف : هيك يمكن
مرح : نقول مبروك
رفيف : ههه مابعرف بس في جواتي خوف
مرح : خوف شو
رفيف : خايفة اغلط
مرح : ان شاء الله مابصير هيك شي .. بس ماتكوني عطيتيه رقمك
رفيف : لا لا
مرح : لكن لاتخافي
رفيف ،: ان شاء الله
............................
######بااااااااك######
القلم بأيدا وبعدا عم تكتب
كان يمثل بطريقة فظيعة حتى انا الى الان لم استطع تصديق انه كان كاذب .. لماذا صدقته لماذا لم استطع التميز بين الحقيقة والكذب .. هل يعقل انه كان صادق
وانا فهمته غلط ... لا لا كيف يكون صادق وهو ... (وقفت الكتابة )
رفيف : لا بكير لحتى اكتب هدول .... لحتى صير عندن بالكتابة بكتبن .. مسحت شو كتبت اخر سطرين
سكرت الدفتر وكان الفجر عم ياذن قامت توضت وصلت والشمس بلشت تطلع وهية امنت وحطت راسا مشان تنام كم ساعة
يتبع .......
