دائرة الظلم

بقلم_امل_احمد

(الجزء الاول)

بيت صغير.. صغير كتير.. غرفة وحدة ومطبخ صغير.. شبابيك مكسرة ..وباب تلفان..

جوا هالبيت بنت صغيرة غفيانة.. حدا اما يلي قداما كومة تياب وعم تطرز وتخيط..

هاد هو بيتنا.. انا مؤمن.. وهالبنت هي اختي اسيل.. عمري 16 سنة.. واختي14 سنة..

بداية قصتنا وقت كان عمري 6 سنين واختي 4 سنين.. كنت كل يوم شوفو لبابا وهو عم يضرب امي ..

امي: بترجاك خلص.. لك ارعبتن للولاد.. بكفيي بكفيي

ابي: لك بدي موتك انت وولادك واخلص منكن

امي: لك حرام عليك.. حرام

هالمشهد هاد كان كل يوم ببيتنا ..ابي كان من الصبح يطلع من البيت ليشتغل شي شغلة.. ويرجع ع البيت وهو معصب ومانو مشتغل شي ومن قهرو ينفش فينا نحنا وامي

امي: (تبكي) والله تعبت يا ام محمد تعبت

ام محمد: طولي بالك يا ام مؤمن.. هو من قهرو عم يعمل هيك لانو ما عم يلاقي شي شغلة ليصرف عليكن

امي: لك ونحنا شو ذنبنا.. ما بكفي متحملين القلة ..لك والله مشتهية شي يوم اطبخلن طبخة فيها لحمة.. لك ولادي محرومين كلشي وما عم نحكي شي

ام محمد: طولي بالك حبيبتي.. ربنا يفرجها عليكن

ام محمد هي جارتنا.. كانت متل اخت لامي.. امي وحيدة اهلا.. واما وبيا توفو سوا بنفس النهار بحادث سير من وهي صغيرة.. وربيت مع ستا يلي توفت.. يعني ما الا حدا..

بقيت حالنا هيك سنين.. وبيوم وفجاة ومن غير مقدمات ابي اختفى.. وما عرفنالو طريق..

ايام ونحنا نستنى ونسال..

ام محمد: لك شو بدكن فيه.. عيشو حياتكن من غيرو.. لك ناقصكن وجع قلب

امي: بس يا ام محمد من وين بدي اصرف ع ولادي

ام محمد: يلي بيسمعك بيصدق.. لك هو شو كان يعطيكن.. سمعي.. اختي بالشام عندا مخيطة ..وبيجيها طلبيات تطريز يدوي كتيرة.. انت فيكي تطرزي مو

امي: لك بعمل ايا شي.. دخيلك وصليني لالها

ام محمد: انت بتعرفي زوجي ابو محمد شغلو كلو بالشام وكل اسبوع بيجي لهون مرة.. انا رح حاكي ليجيب معو تياب للتطريز من عندا.. بس بالاول رح حاكيها

اميتبكي) ربي يجزيكي الخير.. والله انت ما في منك

ام محمد: يا ريت لو فيني ساعدك اكتر يا عمري

ومن هون امي بلشت تشتغل بالتطريز والخياطة.. ومن هالكام ليرة يلي بيطلعولا عم تصرف علينا انا واختي.. وهلا عمري 16 سنة ولساتنا ع حالنا

مؤمن: امي

امي: يا عيونا لامك

مؤمن: هلا انا صرت رجال.. موو

امي: واحلى رجال يا عيوني

مؤمن: صار لازم ترتاحي وانا اشتغل.. انا هلا رجال البيت

تركت العباية يلي بئيدا واطلعت علي بعصبية

امي: اوووعك تحكي هالحكي مرة تانية.. انت واختك بدكن تدرسو لو بوقف بالشارع وبمد ايدي للناس.. قبل لتخلص جامعتك ما في شغل.. فهمان

مؤمن: بس يا امي انت عم تتعبي كتير

فاقت اختي اسيل ع صواتنا..

اسيل: شبكن ..شو في

امي: تعي سمعي مؤمن تعي.. قال بدو يترك دراستو ويشتغل

مؤمن: امي ما رح اترك.. رح اشتغل وادرس سوا

امي: مستحيل.. لانو ما رح تلحق

اسيل: امي مؤمن معو حق.. تركيه يساعدك.. انت تعبتي كتير.. وشوفي كيف وضعنا.. بيتنا تلفان.. ويا دوب عم نامن احتياجاتنا

امي: انا رح زود شغلي.. انتو ريحو بالكن

قربت منا وضميتا وبوست دياتا..

مؤمن: امي حبيبتي.. بس سمعي شو بدي قلك

امي: اي

مؤمن: انا اليوم حاكيت ميكانيكي السيارات يلي براس الحارة.. واتفقت معو انو عاونو بعد المدرسة وهيك بنتعاون انا وياكي

اسيل: تركيه امي.. تركيه.. نحنا كبرنا ومصروفنا زاد

امي: بس بشرط

مؤمن: شرطي يا روحي

امي: رح جرب شهر.. ازا تراجعت بدروسك رح تترك فورا

مؤمن: لا تخافي.. ما رح اتراجع.. ورح ضل اول صفي

امي: ربي يكون معك يا ابني

ونزلو دموعا ع خدا.. قربت منا ومسحتن

مؤمن: لشو هالدموع يا امي.. بترجاكي لا تبكي

امي: الله لايسامح يلي كان السبب

ومن تاني نهار بلش شغلي مع المكانيكي.. ارجع من مدرستي ..غير تيابي وروح فورا ع شغلي

ومعلمي كتير مبسوط من شغلي.. وكل فترة وفترة يعطيني اكرامية ..

بلش حالنا يتحسن شوي عن قبل.. وبلشت جمع ليرة ليرة لحتى زبط شبابيك غرفتنا وبابا.. هاد يلي حسنت انو اعملو..

وبيوم امي كانت غفيانة اجت لعندي اسيل..

اسيل: اخي انا تعبت من حالنا هاد.. والله تعبت

مؤمن: يا عمري انت.. والله وانا تعبان.. بس ما فيني اعمل شي اكتر من يلي بعملو

اسيلتبكي) لك والله بخجل قدام رفقاتي.. لبسن واكلن والله ما بعرفو

مؤمن: اختي حبيبتي بدك تصبري كرمال امي.. وركزي بدروسك.. بكرة وقت تنجحي وتدرسي جامعة بتتوظفي وبتحسني من وضعك

اسيل: لك بدي اصبر لوقتا

مؤمن: ما باليد حيلة اختي.. انا رح اعمل المستحيل لتدرسي وتتوظفي كمان

اسيل: ربي يخليلي ياك اخي ..بس كنت عم قول انو ليه ما بتروح انت ع الشام وبتسال عن بابا

مؤمن: لك انت اكيد جنيتي.. لك شو بدنا فيه.. لك رجال ترك مرتو وعيلتو بغرفة ما الها شباك ..تركن ما الن معيل.. لك شو بدنا فيه.. لك هو بالاصل مانو رجال.. ما بدنا ياه ولا بدنا نتعرف عليه

اسيل: والله يا اخي من وجع قلبي عم احكي

مؤمن: سلامة قلبك اختي. لا عاد تجيبي سيرتو ابدا.. كرمال امك يلي افنت شبابا كرمالنا

(الجزء الثاني)

مرت الايام من صعب لاصعب.. انا وامي عم نتعاون ع مصرفي انا واسيل.. يلي زاد بعد ما انهيت البكالوريا.. بس الحمد لله المجموع يلي اخدتو عطاني منحة.. وانتقلت ع الشام لادرس..

امي: الحمد لله يا امي يلي اجا هاليوم وشفتك بالجامعة.. انتبه ع حالك منيح.. رح ابعتلك كل اسبوع مع جارنا ابو محمد كام ليرة لتصرف فيهن ع حالك

مؤمن: ربي يخليلي اياكي يا امي

بوست اديها وضميتا ودموعي ع خدودي.. قلبي عم يوجعني عليها وع اسيل.. رح اتركن بلا رجال.. وبلا معيل ورح حملا فوق طاقتا بالمصروف..

اسيل: (تبكي) رح اشتقلك اخي

مؤمن: لك لا تبكي ..انتبهي ع امك منيح

اسيل: ولا يهمك اخي

ودعتن لامي واختي وسافرت ع الشام وانا قلبي عم يغلى غلي..

من اول نهار الي بالجامعة ومن بعد ما خلصت دوامي.. رحت تفتلت بالشوارع من محل لمحل ومن مكان لمكان عم اسال عن شغل لساعد امي بالمصرف.. وحطيت ببالي انو جيبن لعندي ع الشام لريح بالي..

اول اسبوع الي بالجامعة تعبت كتير.. نفسيتي كانت محطمة.. ماني متعود بعد عن امي واختي.. وقلبي غليان عليهن كتير..

بعد اول اسبوع قررت انو بدي اشتغل ايا شي.. فكرت كتير لحتى بيوم اقترح علي رفيقي انو اعطي دروس للطلاب وساعدن.. والحمد لله ذكائي ساعدني كتير ..وبلشت بطالب واحد عم ياخد معي محاضرات مع رفيقي يلي اقترح علي هالاقتراح ..

خالد: جد فيك تعطيني دروس

مؤمن: جرب وازا ما عجبك لا تكمل معي

خالد: ماشي.. رح جرب اسبوع

مؤمن: موافق

بلشت بخالد ورفيقنا اعطيهن دروس.. خالد كان من عيلة غنية كتير ..وكان بيعرف من البداية انو انا بدي اعطي دروس لساعد امي بمصروفي..

خالد: مؤمن انت جد انسان مميز.. لك انا بعمري ما فكرت شو عم اصرف.. وغير هيك وربي عم افهم عليك اكتر من الدكتور.. رح حاكي رفقاتي وجمعن لناخد دروس عندك كلنا

مؤمن: بكون ممنونك كتير

وهيك بلشت اعطي دروس لخمس شباب وصبية.. وكلن من اغنياء الشام وكنت عم طلع مبلغ كتير منيح..

ابو محمد: كيفك يا ابني

مؤمن: تمام عموو

ابو محمد: تفضل.. هدول بعتتن الست الوالدة معي

مؤمن: خليهن معك عمو ..انا حاكيتا لامي هلا.. وخود هدول معك عطيها ياهن.. زكاتك

ابو محمد: ما شاء الله عليك يا ابني.. ربي يزيدك ويكرمك

بلشو شباب الجامعة يعرفوني اكتر واكتر والكل عم يحمد فيني ... ودخلي بلش يزيد اكتر واكتر..

امي: لك يا امي لشو بعتن هدول كلن

مؤمن: امي صرفو ع حالكن.. دروسي كل مالا عم تزيد وماني بحاجة هالمبلغ كلو

امي: بس دروسك يا امي اووعك تهملن

مؤمن: لا تخافي امي.. مستحيل اهمل دروسي

تاني نهار بالجامعة..

هيا: صباح الخير

مؤمن: هلا صباح النور

هيا: مؤمن.. موو

مؤمن: اي ..تفضلي

هيا: سمعت عنك كتير وعرفت انو كل الطلاب يلي بتدرسهن عم يستفادو منك كتير

مؤمن: الحمد لله

هيا: بصراحة انا بدي اطلب منك خدمة وبتمنى ما تخجلني

مؤمن: تفضلي

هيا: اختي لصغيرة.. هي صف تاني وكتير متاخرة بدروسا.. وما خلينالا استاز او انسة والا جربنا.. وما في فايدة.. كنت بقول بلكي بتستفاد منك

مؤمن: اي تكرمي.. بس كيف بدي اعطيها

هيا: بكون ممنونتك ازا بتوافق تجي لعنا ع البيت وتعطيها

مؤمن: ممممممممم

هيا: بترجاك.. امي كتير تعبانة من هالقصة.. ورح نعطيك يلي بدك ياه.. بس وافق

مؤمن: خلص اتفقنا.. اليوم بعد الدوام بجي معك لاعرف مكان بيتكن واتعرف عليها

هيا: عن جد يسلمووو.. بتشكرك كتير

مؤمن: العفو

كملت دوامي بالجامعة يلي كان لاخر النهار.. والبريك يلي كان بين المحاضرات عطيت فيه مجموعة من الطلاب دروس...

طلعت من اخر محاضرة كانت هيا واقفة وعم تدور علي بعيونا.. ووقت شافتني اجت لعندي ركض..

هيا: اااوف مؤمن.. والله فكرتك مانك هون.. كتير تدايقت.. ما بدك تجي معي

مؤمن: اي رح اجي.. مشي

هيا بنت كتير ناعمة وهادية.. ملامحها كلا ناعمة وبشرتا صافية وعيونا وساع وسود ومن وشا باين عليها كتير حبابة ومرحة..

مشينا سوا انا وهيا.. وكان السواق عم ينطرا ع باب الجامعة..

هيا: تفضل

ركبنا سوا بالسيارة.. ونحنا ع الطريق..

مؤمن: هيا.. انت بتشبهي صبية غالية كتير ع قلبي لهيك رتحتلك فورا

هيا: جد.. ومين هاي.. حبيبتك؟؟

مؤمن: هههههههه حبيبتي.. لا.. ما الي بهيك قصص.. اختي.. كتير بتشبيهها.. يا الله شو شتقتلا

هيا: جد.. الله يخليكن لبعض.. بس وينا هي

مؤمن: مو هون..هي بالضيعة ساكنة

هيا: اهاااا

وصلنا لباب بيتن.. او فيلتن ...كانو تنين حرس ع الباب من برا.. فتحو الباب الحديد ودخلنا ع الفيلا..

شي لاول مرة بحياتي بشوفو.. ساحة كتييير كبيرة. .. ع جنابا كلو ورد بكل انواعو.. ولجوا شوي كلو شجر ..شي زينة وشي مثمر.. وفيلا كتييير حلوة..

اطلعت وانا مصدوم من يلي شفتو..

هيا: عجبتك الفيلا؟

مؤمن: هاا.. اي ما شاء الله.. كتير حلوة

هيا: هلا رح تشوفا من جوا كمان.. تفضل

دخلنا لجوا.. وكان شي خيالي بالنسبة لالي.. كل قطعة اثاث كانت احلا من التانية.. ونظام وهدوء وجمال

هيا: رح ناديلك ماما

مؤمن: ماشي

(الجزء الثالث)

بعد بشوي اجت ست كبيرة العز والجاه باين عليها.. وباين قديه بتهتم بحالا.. عمرا يمكن من عمر امي بس كان الفرق واضح بيناتن.. امي يلي الشيب ماكل راسا وعيونا منفخين من شغل التطريز والخياطة..

هدى: مرحبا يا ابني

مؤمن: اهلا خالة

هدى: اهلا وسهلا فيك.. فدوى.. جيبي شي لنشربو

فدوى: حاضر مدام

قعدت بكل اكابرية ع الكنبة يلي مقابيلي..

هدى: رح فوت معك بالموضوع من غير مقدمات.. اكيد خبرتك هيا انت ليش هون

مؤمن: اي خبرتني

هدى: كتير منيح.. ازا تحسنت بنتي ع ايدك طلوب وتمنى.. يلي بدك ياه رح اعطيك اياه شو ما كان

مؤمن: رح اعمل جهدي ولا يهمك

هدى: رح ناديلك ياها.. اسمى ماسة

اجت ماسة.. بنت قمة بالجمال بس كان باين عليها من اول ما شفتا انو عندا مشكلة بالتركيز..

ماسة: مرحبا عمو

مؤمن: اهلا بالامورة.. تعي لعندي

قربت مني وبوستا وقعدتا حدي

مؤمن: شو اسمك انت

ماسة: اسمي ماسة

مؤمن: عاشت الاسامي يا امورة.. بايا صف انت

ماسة: تاني

مؤمن: واكيد شاطرة لانو بنوتة هيك حلوة ضروري تكون شاطرة

نزلت راسا بالارض وزعلت وحكت بهمس: لا مو شاطرة

مؤمن: له له ولييش

ماسة: ما بعرف

مؤمن: لا تقلقي ..انا رح ساعدك لتصيري اشطر بنوتة

ماسة: جد عموو

مؤمن: اي جد.. رح بلش معك من بكرة

هدى: ايمت رح تجي.. ايا وقت

مؤمن: بس خلص محاضراتي بجي فورا

هدى: كتير منيح.. رح خلي السواق يجيبكن سوا انت وهيا

مؤمن: اي اتفقنا

وصلني السواق للغرفة يلي كنت ساكن فيها.. ومباشرة دقيت لامي

مؤمن: مرحبا امي.. كيفك

امي: اهلا يا ابني.. انت كيفك

مؤمن: كتييير فرحان.. اليوم نفتحتلي طاقة الفرج

امي: ياا رب.. خير يا امي.. طمني

وحكيت لامي كلشي صار

امي: بس يا ابني هيك كتير عليك والله كتير

مؤمن: لا مو كتير ابدا

بلشت من تاني نهار اعطي دروس لماسة ..يلي عزبتني كتير.. كنت كل يوم روح معا لهيا بسيارتهن وبعد ما خلص يوصلني السواق لغرفتي ...

وبيوم..

هدى: مؤمن ..رح اجي معك.. بدي مر ع رفيقتي

مؤمن: اي تمام

وصلني السواق لللغرفة يلي ساكن فيها.. وقبل لانزل..

هدى: انت هون ساكن

مؤمن: اي هون

نزلت من السيارة ومدام هدى كملت مشوارا...

تاني نهار ... بالجامعة

هيا: صباحووو

مؤمن: صباح الورد

هيا: مؤمن.. لك والله تشوقت اتعرف ع اختك ..شو كان اسما

مؤمن: اسيل.. اسما اسيل

هيا: حلو كتير اسما.. جيبا شي نهار لهون لاتعرف عليها

مؤمن: ان شاء الله

كانت هيا بالنسبة لالي متل الالعاب يلي كنت شوفن وانا صغير بئيد رفقاتي وما اقدر اشتريهن.. بلشت حبا واتعود على وجودا بحياتي.. بس هالشعور كان كتير يعذبني لانو بعرف انو شي مستحيل اوصلو.. لهيك ما كنت اسمح لحالي انو فكر فيها..

خلص دوامي بالجامعة وكالعادة رحنا سوا انا وهيا ع الفيلا.. خلصت درسي لماسة وبدي ارجع ع بيتي او غرفتي...

هدى: مؤمن.. بدي حاكيك بشي

مؤمن: تفضلي

هدى: هلا انت ليه ما بتسكن هون معنا

مؤمن: كيف بدي اسكن هون.. مستحيل

هدى: لك ليه مستحيل..انت ساكن بغرفة وحدة وانا رح اعطيك غرفتين ومطبخ يلي ع جنب.. ومدخلن منفصل ومعن حمام.. ما حد رح يدايقك.. والاجار يلي بتدفعو لغرفتك بخصمو من دروسك لماسة.. شو قلت

مؤمن: اذا كان هيك ليه لا

هيا: اووووه.. كتيير حلووو

هدى: هلأ بتجيب تيابك واغراضك وبتحاكي صاحب الغرفة وبترجع فورا.. انا حاكيتا لفدوى لتجهزلك الجناح.. وهو هلا جاهز

مؤمن: يسلمو كتير خالة

رحت ع الغرفة مع السواق جبت تيابي وكتبي وحاكيت صاحبا وعطيتو باقي حقو ورجعت مع السواق..

دخلت للجناح يلي عطوني ياه.. كان غرفتين ومعن مطبخ وحمام.. الحمام يلي كان فيهن اكبر من الغرفة يلي ربيت وكبرت فيها... كانت الغرفة يلي الي فيها سرير صغير مع خزانة ومكتب ..مرتبة كتير ونضيفة..

تسطحت ع التخت ورجعت بذكرياتي لورا.. وكيف وصلت لهون.. دمعو عيوني وانا عم اتذكرا لامي واتذكر كيف طول ليلا ونهارا عم تخيط بس لتوصلني لجامعتي...

ندق الباب...

مسحت دموعي.. مؤمن: تفضل

هيا: فيني فوت

مؤمن: تفضلي

سحبت كرسي المكتب وحطتا مقابيلي وقعدت..

هيا: انا كتير مبسوطة انو رح تكون معنا هون

مؤمن: ههههه

هيا: ممممم مؤمن.. انت بكيان شي

مؤمن: لاااا ..لاا

هيا: انت بكيان.. الدموع لسا بعيونك

مؤمن: لك بس دمعو عيوني وانا اتذكر بامي واختي.. شتقتلن بس

هيا: مؤمن.. فيني خبرك شي؟

مؤمن: طبعا.. تفضلي

هيا: حابة فشلك قلبي.. انت انسان كتير مريح.. قلبي انفتحلك من اول يوم شفتك فيه

مؤمن: تسلميلي

هيا: يمكن لاحظت بانو بابا مو موجود بالبيت

مؤمن: هههههههه ..اي صح لاحظت هالشي

هيا: وليش عم تضحك

مؤمن: بعتذر منك.. مو بقصدي.. بس غياب الاب عن البيت شي عادي ومالوف لالي

هيا: كيف يعني.. ما فهمت

مؤمن: قصة طويلة.. شو كنت بدك تقولي

هيا: بابا.. شتقتلو كتير.. وماني عرفانة كيف اتصرف

مؤمن: وينو هو

دمعو عيونا لهيا...

هيا: بابا بالسجن

مؤمن: بالسجن.. وليه

هيا: بابا قتل خالي... تخانقو كرمالا لامي وطالع مسدسو وقوصو قدام عيونا لامي

(الجزء الرابع)

مؤمن: وليه.. شو يلي صار

هيا: بابا اتهما لامي بشرفا..و ضربا ..وامي بعتت لخالي ووقت اجا تجادلو كتير وتخانقو.. وبابا بلحظة غضب قوصو لخالي.. وانا هلا كتير محتارة.. ما بدي زعلا لامي ومشتاقة كتير لشوف بابا

مؤمن: لا تزعلي حالك.. حاكيها لامك وهي اكيد رح تتفهمك

هيا: هيك قولتك

مؤمن: اي اكيد.. حاكيها ولا تخافي.. واذا بدك انا بحاكيها

هيا: يا ريت

مؤمن: لكن خلص.. انا بحاكيها بكرة

هيا: شكرا كتير لالك.. وهلا صار دورك.. حكيلي عن عيلتك

مؤمن: ما بنصحك تعرفي شي

هيا: والله حابة انو اتعرف عليهن

وبلشت احكيلا بحكايتنا...

هيا: يا ربي.. كل هاد مر بحياتك

مؤمن: هههههه واكتر من هيك

هيا: وامك لساتا بتشتغل بالخياطة

مؤمن: اي

هيا: مؤمن.. انت بتعرف شركة بابا لشو

مؤمن: لا

هيا: شركة بابا للنسيج.. وهلا خالي الصغير مستلما

مؤمن: حلو كتير

هيا: ليه ما تحاكي ماما لتشتغل امك فيها

مؤمن: لا ما بحب

هيا: اي براحتك.. انا نعست كتير ..رح روح.. تصبح ع خير

مؤمن: وانت من اهلو

طلعت هيا وانا فورا دقيتلا لامي وحاكيتا..

امي: ااخ يا امي.. كتير شتقتلك

مؤمن: وانا اكتر يا روحي

اسيل: اخي حبيبي.. كيفك

مؤمن: مشتقلك يا زعرة

اسيل: بحبك يا روحي

حاكيتن واطمنت عنن ونمت.. فقت تاني نهار ع صوت هيا فوق راسي..

هيا: فيق يا كسلان.. فيق

مؤمن: لك انت كيف دخلتي لهون

هيا: اي عادي من الباب

مؤمن: هههههه.. لا عاد تعيديها.. انا بتنرفز انو حد يفيقني

هيا: اي تمام.. بس هلا يالا فيق

قمت من تختي وغسلت وشي ولبست تيابي وطلعت لبرا..

كانو هيا واما وماسة قاعدين سوا بالحديقة عم يفطرو..

هدى: مؤمن.. تعا يا ابني.. تعا

مؤمن: صباح الخير

هدى: صباح الورد.. تعا افطر معنا.. ولا عاد تخجل انت هلا واحد منا.. تفضل

قعدت وفطرت معن..

هدى: مؤمن.. اليوم بتدق لامك وبتقلا تجهز حالا لحتى تجي لعندك هون وتسكن معك

اطلعت فيها وانا كتير متفاجئ واطلعت بهيا يلي كانت كاتمة ضحكتا..

هيا: ما دخلني.. لا تطلع فيني

مؤمن: اي بسيطة هيا.. العفو منك خالة.. بس صعب كتير امي تجي لهون

هدى: وليه صعب.. شو بقيلا هونيك لتبقى

مؤمن: ما رح توافق.. وغير هيك اختي لساتا بالمدرسة وصعب تترك

هدى: ازا ع اختك بنسجلا باحسن مدرسة هون.. وشغل امك جاهز.. رح سلما مشغل الخياطة..انا ما عم لحق وبدي مين يساعدني وما في اولا من امك.. وانت رح تكمل بدروس ماسة وتاخد اجارك ومنو بتدفع اجار سكنكن

مؤمن: ما بعرف.. رح شوف

هدى: ما بدى سؤال.. اقنعا بايا طريقة وجيبا لهون

مؤمن: تمام.. المسا بحاكيها

وطلعنا سوا انا وهيا بالسيارة لنروح ع الجامعة..

مؤمن: لك لسا ما لحقت قلك ..فورا قلتيلا لامك

هيا: ههههههه اسفة

مؤمن: اي بسيطة.. ما رح حاكيها كرمال تشوفي ابوكي

وبحركة عفوية مسكت ايدي بئيديها التنتين..

هيا: لا ولووووو.. بترجاك ما رح عيدا

انا توترت ..ما كان بدي انو تترك اديي ابدا.. سحبت ايدي بهدوء من اديها.. وهي انتبهت اطلعت في..

هيا: اسفة.. مو بقصدي

مؤمن: اي بعرف.. مو مشكلة

كملنا طريقنا للجامعة.. ومشي يومنا متل ايا يوم.. من محاضرات لدروس للطلاب.. ورجعنا سوا ع الفيلا.. وبالمسا..

مؤمن: مرحبا امي.. كيفك

امي: اهلا يا ابني.. والله قلبي ما عاد تحمل.. شتقتلك

مؤمن: امي.. شو رايك تجي لعندي

امي: يا ريت يا ابني.. بس انت بتعرف صعب اترك هون

مؤمن: وليه صعب

امي: حياتي كلا هون يا امي

مؤمن: عن ايا حياة عم تحكي.. حياة الذل والفقر والقهر.. تركي امي وتعي.. خالة هدى عندا شغل الك

امي: بس يا ابني هيك كتير

مؤمن: لا مو كتير.. انت رح تشتغلي

تناقشنا كتير انا وامي وبالاخر اقنعتا واتفقنا انو تجي لعندي بس لتخلص السنة الدراسية وتكون اسيل منهية 11..

وبالفعل بعد بشي شهر او اقل خلصت السنة الدراسية واسيل انهت دراستا وانا كملت السنة الاولى من دراستي ..وهيا كمان.. وبعتت لامي لتجهز حالا وتجي لعندي.. وهاد يلي صار..

اجت امي واختي اسيل لعندي..و استقبلتن الخالة هدى احسن استقبال ... ومن بعدا دخلنا سوا ع سكنا او جناحنا.. يلي كان قصر بالنسبة لالنا مقارنة بالغرفة يلي كنا ساكنين فيها..

اسيل: اخي والله كانو انا بحلم.. كل هالعز بدنا نعيش فيه

مؤمن: اي حبيبتي.. رح نعيش بالعز هاد وننسى كل وجعنا

امي: والله يا امي ماني مرتاحة..حاسة غصة بقلبي

مؤمن: امي لا تبلشي بترجاكي

ومن تاني نهار فقنا ع دقة فدوى للباب..

فدوى: مدام هدى بدا اياكن ع الفطور

لبسنا وطلعنا لبرا.. كانو مجهزين فطور ملوكي..

امي: يسلم دياتك مدام هدى.. بس والله مالو لزوم

هدى: بزعل منك.. لا تقولي هيك.. تفضلو

قعدنا سوا وفطرنا..

هدى: هلأ مؤمن اكيد حاكاكي عن المشغل

امي: اي حاكاني

هدى: هالمشغل غالي ع قلبي كتير.. هو بداية هالعز يلي نحنا فيه.. بلشت فيه ومن بعدا زوجي الله يرحمو اسس الشركة هاي للنسيج

انا انصدمت وقت قالت الله يرحمو..

مؤمن: عفوا.. بس زوجك مو بالسجن

(الجزء الخامس)

اطلعت مدام هدى بهيا ..رفعت هيا كتافا انو عادي..

هدى: ههههههه ماشاء الله بنتي ما بتنبل الفولة بتما.. زوجي ابوها لهيا توفى وقت كان عمرا 5 سنين.. وبعد بشي سنة ربنا بعتلي زوجي ابوها لماسة يلي هلأ بالسجن.. تعرفت عليه عن طريق الصدفة.. كان كتير معتر وحالتو بتبكي.. وانا كنت بحاجة لرجال يوقف جنبي بعد موت زوجي.. وبالفعل شتغل حدي بالشركة وبالمخيطة.. وبعد شي سنتين تزوجنا.. بس للاسف كانت طباعو كتير سيئة شكاك كتير ..وع اقلا شي بيقلب الدنيي.. هاني كتير ومع هيك كنت اسكت لبيوم اتجارأ وضربني واتهمني بشرفي.. وقتا انا ما اتحملت وبعتت لاخي....

غصت ونزلو دموعا...

هدى: بعتت لاخي واجا لعنا وعلقو تنيناتن وطالع مسدسو وقوصو لاخي

امي: الله يرحمو ويفرجها عليكن

هدى: امين

مؤمن: والله وقت حكتلي هيا من طريقة حكيا ما تخيلت ابدا انو يكون زوج اما

هدى: الشي المنيح الوحيد يلي عملو هو معاملتو لهيا.. كان يعاملا متل بنت لالو.. حبا من كل قلبو وكان يناديلا اسيل.. هههههه لهيك هي حبتا لاسيل... وهيا تعلقت فيه كتير.. عرفتو اكتر ما عرفت بيها

مؤمن: بهالمناسبة.. من بعد اذنك.. بدي اطلب منك انو هيا تروح تزورو

هدى: ليه انا من ايمت منعتا.. تروح ايمت ما بدا بس شرط انت تكون معا... لانو ما بامن عليها مع غيرك

مؤمن: امري لالله

زورتني هيا بطرف عينا...

هدى: في كمان شي تاني بدي ياه منك

مؤمن: تفضلي

هدى: هلا انت بتدرس ادارة اعمال... موو

مؤمن: اي صح

هدى: هلا نحنا اجازة ..بدي اطلب منك تعاوني بالشركة.. بس لحتى يبلش دوامك

مؤمن: تكرمي.. ليه لا

هيا: اسيل.. تعي انت معي ع غرفتي وتركيهن بشغلن

اسيل: اوك

راحو اسيل وهيا سوا ع غرفة هيا ولحقتن ماسة.. وانا ومدام هدى وامي طلعنا سوا.. بالبداية رحنا ع المشغل..

هدى: هون رح يكون مكان شغلك.. بالبداية بدي اياكي تشتغلي معن ع الماكنات وبعد شي شهر لتتعودي عليهن بسلمك المشغل

امي: ربي يسعدك يا الله

تركنا امي بالمشغل ورحنا سوا ع الشركة.. يلي كانت رووووعة.. هيبة وفخامة وتنظيم

هدى: تفضل مؤمن.. شايف هالشركة هاي.. هاي تعب سنين وعمر.. ازا اتقنت شغلك رح ارضيك

مؤمن: ولا يهمك

هدى: هلا رح قلك كيف الشغل

قعدنا بالساعات وهي تشرحلي عن الشغل

اتفقنا انو بلش بشغل رسمي تاني نهار بعد ما رافقا لهيا ع السجن لعند بيا..

قضينا يوم متعب ومرهق وبنفس الوقت حلوو.. رجعنا ع الفيلا وكنت كتير مشتاقلا لهيا..

تعشينا كلنا سوا..

هدى: جد انتو نعمة من ربنا.. مليتو علينا الفيلا.. كنت كتير مخنوقة وهلأ انتو ريحتوني وحملتو عني اغلب حملي

امي: ربي يسعدك

خلصنا عشا ودخلنا ع جناحنا انا وامي واختي..

مؤمن: اسيل تعي تعي

اسيل: اي اخي

مؤمن: شو عملتو اليوم انت وهيا

اسيل: نعمممم.. وليه عم تسال.. بس ما تكون عشقانها اخي هههههه

حطيت ايدي ع تما وعصبت..

مؤمن: لك سكتي.. سكتي

شالت اسيل ايدي عن تما بالقوة..

اسيل: لك عم امزح معك.. وع فرض انو بتعشقا وين المشكلة

مؤمن: اسيل لا تعيدي هالكلام مرة تانية

اسيل: ايييى.. اسفة اخي.. بس انو عادي حكينا عن الدراسة والمدرسة واتفتلنا بالفيلا وقطفنا ورد.. واكلنا كتير شكلاتات... وبسسسس

مؤمن: اي روحي من وشي روحي

اسيل: هههههه

تاني نهار فقت ع بكير وانا متحمس لاخد هيا لتشوف ابوها بالسجن.. كنت حابب شوف الفرحة بعيونا وقت تشوفو...

مؤمن: صباح الخير

هدى: صباح الورد... فايق ع بكير

مؤمن: اي لحتى ما يروح الوقت علينا انا وهيا.. بدي اخدا ع السجن وارجع ع الشركة

هدى: هههههههه.. لك انتو من وين ربي بعتلي ياكن.. والله انتو نعمة

مؤمن: والله انت يلي نعمة.. ربي يسعدك خالة

هدى: ويسعدك يا ابني

نزلت هيا ع الدرج ركض...

هدى: لك ع مهلك.. ع مهلك.. هلا بتتفشكلي

هيا: صباحووووو

وقت بشوفا لهيا هيك فرحانة قلبي بيصير يرقص رقص..
مؤمن: صباح النور.. يالا مشي

هدى: لك لوييين.. فطرو قبل

هيا: امييييي.. بنفطر برا.. بااااي

هدى: هههههههه اي روحو روحو

(الجزء السادس) والاخير

طلعنا سوا انا وهيا...

هيا: مؤمن.. ممكن نتمشى.. ماني حابة اطلع بالسيارة

مؤمن: تكرم عيونك.. مشي

هيا: تسلملي عيونك

واطلعت في نظرة موتتني فيها...
مشينا سوا بالشارع.. كان الشارع لسا فاضي والدنيي الصبح والجو بيجننن..

هيا: ليش ساكت.. حكيلك شي

مؤمن: ممممممم.. عم استمتع بالجو الروااق

هيا: اي وهالجو الرواق ما حرك فيك شي

مؤمن: كيف يعني

قربت هيا مني ومسكت ايدي واطلعت بعيوني..

هيا: مؤمن.. انا كتيير بحبك.. وبموت فيك.. وبعرف انو انت بتحبني.. اسيل حكتلي كلشي.. كنت خايفة يكون حبي من طرف واحد

تلبكت وما عرفت شو بدي قول..

مؤمن: هيا خلينا نمشي.. بلا ما نتاخر

نزلت اديها بعصبية ومشت قدامي..

مؤمن: لك شبك.. ليه زعلتي

هيا: بعد عني

مسكتا من ايدا ووقفتا..

مؤمن: لك انا بموووت فيكي.. ما بدي قرب منك لانو ما فيني اتحكم بحالي.. انا بعشقك ومن زمان

هيا: ههههه لكن مشي

هزيت راسي وضحكت وكملنا مشي..

وصلنا للسجن.. وبعد انتظار دخلونا للغرفة يلي بدنا نشوف فيها ابو هيا.. او ابو ماسة..

وبهالوقت *بالفيلا*

هدى: ام مؤمن.. بدي احكيلك شي بس من غير زعل

ام مؤمن: تفضلي.. ولشو بدي ازعل

هدى: حابة انو اعطيكي قطعة تياب تلبسيها من عندي لوقت ما تشتري شي رسمي مناسب لشغل المشغل

ام مؤمن: ههههههههه.. بعرف انو مظهري ما بناسب مركزكن.. بس هيك ربنا حكم علي

هدى: لك لا تقولي هيك .. مو قصدي بس يلي بيشتغلو بالمشغل بيطلعو ع هيك شي وبينتبهو لانو شغلن كلو بالتياب

ام مؤمن: اي فهمت

هدى: لكن تعي معي ع غرفتي لاعطيكي شي يناسبك

طلعو سوا ع غرفتا لهدى.. دخلت ام مؤمن الغرفة ووقفت تطلع بالغرفة يلي بالنسبة الها قصر..خزانتا لهدى كانت قد الغرفة يلي عاشت عمرا كلو فيها.. وهي عم تتفتل بعيونا بالغرفة شافت صورتا لهدى مع زوجا .. وقفت مصدومة مانا عرفانة شو تحكي

هدى: شبك.. شو في.. لك هاد زوجي

ام مؤمن: هاد هو زوجك

هدى: لك اي هو.. شبووو

*بالسجن*

دخل ابوها لهيا ع الغرفة لعنا لنشوفو..

ابو هيا: هيا بنتي حبيبتي

هيا: بابا حبيبي.. شتقتلك (ضمتو وبوستو وهي عم تبكي).. ليك هاد رفيقي مؤمن

هو وقت سمع باسم مؤمن رجف قلبو..

انا وقفت مصدوم وماني عرفان شو بدي اعمل..

هيا: لك شبكووون.. مؤمن لك شو صرلك جمدت بارضك.. هاد بابا حبيبي

مؤمن: لك... لك..

ابو هيا: مؤمن ابني.. الحمد لله ربنا جمعني فيك (ونزلت دموعو)

وقفت هيا مصدومة ومانا فهمانة شي..

هيا: لك شبكن.. احكوووو.. وانت من وين بتعرفو لمؤمن بابا

مؤمن: هيا ..بتتزكري الرجال يلي قلتلك عنو قديش هو ندل.. وكيف عذبا لامي ومن بعدا تركنا انا وامي واختي وهرب.. بتتذكري لهالرجال النذل

هيا: قصدك بيك.. شبوو

مؤمن: هاد هو.. يلي واقف هلا قدامك

نزلو دموعو لبابا وهيا وقفت مصدووومة

ابو مؤمن: والله ندمت يا ابني.. ما كان عندي خيار تاني.. ما كنت لاقي شغل لطعميكن.. ما كنت قدران اصرف عليكن

مؤمن: بتقوم بتتركنا.. ولاااا بتكمل حياتك وكانو ما في شي وراك.. وبتتزوج وبتربي بنت غيرك وبنتك ليالي عم تناما ودموعا بعيونا من شوقا الك.. لك امي انطفو عيونا من شغل الخياطة لتطعمينا.. لك انا كنت مشتهي شوفك شي يوم عندي بالمدرسة متل كل رفقاتي.. لك شتغلت بالسيارات طول النهار.. كنت روح اديي كلن زيت سيارات اسود ..رفقاتي عملوني مسخرة كل ما يشوفو اديي يبلشو ضحك ومسخرة.. لك من وقت دخلت الجامعة ما ارتحت.. عم اشتغل ليل مع نهار لحتى امن مصروفي وما تقلا اكتر ع امي ...
لك ما فكرت بايام الشتي شو رح يصير فينا.. ما فكرت بالشبابيك المكسرة يلي بتدخل المطر علينا.. ما فكرت بمرتك وما خفت شي واحد يدفش الباب المكسر ويدخل عليها.. لك ليالي ما نمتا من خوفي ع امي واختي.. انت واحد ندل واكتر من ندل كمان...

كنت عم احكي بكل قوة وحابس دموعي يلي ما بدي ورجي اياهن.. وهو كانو دموعو عم يشرو ع خدودو.. وهيا كانت واقفة ودمعتا بعينا وهي مصدومة..

ابو مؤمن: مؤمن يا ابني انا.....

مؤمن: اوووووعك تقول ابني.. انا ما الي اب ولا بيشرفني اب متلك.. انت هاي بنتك.. هاي يلي نيمتا بحضنك و تركتا لاسيل ليالي تبكي من شوقا لحضنك.. بس ربك كبير.. هاي اخدت جزاتك.. اصلا هاد مكانك المناسب..

مؤمن: هيا انا رح روح

برمت ضهري ورحت.. كان عم يحكي بس انا ما سمعت شو حكا.. كانت الدنيي عم تفتل فيني...

هيا: انا جد مصدومة فيك

تركتو هيا واجت ورايي

هيا: مؤمن.. بعتزر منك كتير.. انا جد مصدومة

مؤمن: ولشو عم تعتزري.. انت ما الك ذنب بشي

رجعنا سوا ع الفيلا ..

كانت امي وخالة هدى واسيل قاعدين سوا وامي واسيل عم يبكو بحرقة..

مؤمن: مرحبا.. شبك امي شو صاير.. اسيل حبيبتي ليش بتبكي

ام مؤمن: ههههههه زوجي بين واخيرا يا مؤمن

اطلعت فيها وانا عم حاول افهم كيف عرفت

ام مؤمن: يعني ما تفاجات امي.. ما بدك تعرف وينو؟

مؤمنغمضت عيوني وانا عم اتبسم) بالسجن امي.. بالسجن.. شفتو هلا يا امي شفتو.. نسيانة انو كنت مع هيا بزيارة لبيا؟؟!! هههههه

ام مؤمن: ربي يسطفل في.. تركنا وغط ..وما عرفنالو طريق.. طلع عم يحب ويتزوج وتاركلي ولادو.. الحمد الك يا ربي عطيتو يلي بيستاهلوو

هدى: اي هاد هو.. اخد يلي بيستاهلو
وقت عرفتو ما قلي شي عنكن.. قلي بانو هو عزابي وما الو حدا.. كانت حالتو بتبكي الحجر.. لميتو من الشارع وشغلتو بالمشغل ومن بعدا استلم فرع بالشركة وحبيتو وتزوجنا.. والباقي بتعرفو.. لك كان ما يناديلا لهيا غير اسيل.. ووقت كنت اسالو كان يقلي بحبو كتير لهالاسم

اسيل: منيح يلي متزكر اسمي.. ما رح سامحو بوجع قلبي وبدموعي.. ما رح سامحو ابدا

*بعد خمس سنين*

اسيل: هيا حبيبتي بربك شكلي زابط هيك

هيا: لك شبك.. سالتيني وقلتلك.. هههههه يلي بشوفك بقول عريسك رح يجي يشوفك

اسيل: لك هاد تخرج.. تخرج ..اهم من كل العرسان

اليوم هو حفل تخرجا لاسيل.. اسيل انهت دراستا.. انا خطبتا لهيا وقت كنا سنة تالتة جامعة وبعد تخرجنا تزوجنا.. وهي هلا حامل بالشهر التاني..
امي شوي شوي اتطورت بشغل المشغل وحاليا هي يلي مستلمتو.. وكلنا عايشين مع خالة هدى بالفيلا..
وابي لساتو بالحبس..

مؤمن: لك ما خلصتو لسا.. رح يبلش الحفل.. طلعي مع رفقاتك اسيل يالا

اسيل: اخي حبيبي.. بدي ضمك يا قلبي

مؤمن: لك ااخ شو بحبك

هيا: بالا شوووووو.. اي تعو تنيناتكن لهوون.. قال بيحبا قال ههههه

كان حفلا لاسيل بيجنن .... وحياتنا كل مالا بتحلا اكتر واكتر

انتهت