ليلة زواجي

القصه كاملة
#ليلة_زواجي
(الجزء الاول
زوجوني غصبن عني .. انا ما بدي اتزوج .. لسه باول عمري ومشواري طيل .. عمري لسه 18
نفسي مثل اي بنت اعيش حياتي ..
نفسي ادرس وادخل جامعه ..

نفسي احمل كتبي واروح من الجامعه بسرعه ادرس ع اختبار بكرا ..

ذبحوا احلامي ..
وسيطروا ع حياتي ..
البنت للزواج مش للدراسه ..

خاصه لما يكون الاب ظالم والاخ لئيم ..
ببيعوا وباخدوا الفلوس ..
والبنت مثل السلعه لا راي ولا اهتمام ..

جهزوني .. ورتبوا امور العرس كلها وحكولي خلص اليوم يوم زواجك ..

اجا العريس وابوي حكى هذا عريس مناسب ..

روان : يا بابا ما بدي مشان الله لا تجبرني ..

ابو روان : لما اسالك رايك احكي .. اخرسي ..

روان : حرام عليكم ..

سراج : يحرم جلدك عن عظمك .. كلام ابوي بدو يمشي ..

روان : انا مو عدوتكم انا بنتكم ..

سراج : خليكي ساكته زواجك ترتبت اموره .. لا تفضحينا ..

ابو روان : شو تفضحنا والله بقطع رقبتها ..

ام روان : خلص يجماعه وحدوا الله .. ما بدنا مشاكل ..

ابو روان : اسكتي انتي .. انتي السبب .. انتي الي وصلتيها لهون بدلالك الها ..

طيب وين الحفله .. وين الزفه .. وين الناس ..
كيف هيك .. فستان ابيض بس !!

هدا مو حلمي ..
حلمي روب التخرج .. وشهاده ادخل فيها الحياه ..
بس امري مو بايدي ..
ورايي مو مسموع ..

اجا العريس الي عمره 50 سنه ..
يالله شو قرفت منه ..
عريس بكرش كبير ..
بمشي بصعوبه من النصاحه ..
نص راسه اصلع ..نظراته بتخوف
هذا مو عريس هذا وحش بشكل انسان ..

دخل سلم ع ابوي ..
كنت انا جالسه ع الكرسي خايفه .. لابسه فستان ابيض غالي وحلو بس ما حبيته ..

قرب عندي وسلم علي .. خفت امد ايدي اسلم عليه ..
ما اعطاني مجال قرب وسحب ايدي .. شد عليها بقوه ..
قوة مافيها حب
فيها استعباد واستملاكً..

خفت من نظرة عينيه .. انكمشت ع حالي من الخوف .. رجعت لورا ..

انا برجع وهو بقرب مني .. حسيت بانفاسه قريبه مني ..
ماحبيت انفاسه ..
ما حبيت لمساته ..
ما حبيت حضوره ..
ما حبيت نظراته ..
ما حبيت شي فيه ..

عيني بدهم ماما ..
ماما المغلوبه ع امرها ..
من هناك اجا اخوي سراج : مبروك يا عربس ..

ابو سامي : يبارك فيك ..

سراج : جيزة الدهر ..

ابو سامي : ههههه .. بس وصي اختك علي !!

بابا : يلا يا عريس خذ عروستك ..

ابو سامي : اه والله بدي اخدها ونروح ..

خفت كثير انا .. وين بدي اروح مع هالوحش ..

قرب ابو سامي من بابا اعطاه ظرف .. هالظرف بعدين عرفت انه كان فيه فلوس .. ثمن بيعتي ..

اجت ماما حضنتني بحب .. دموعها حضنوا دموعي ..
ودعنا بعض غصبن عنا ..
مسكت بملابس ماما متل البنت الصغيره الي خايفه تترك امها ..
شدني ابو سامي من ايدي بقوة واخدني ..

كانت سيارته الفخمه بتستنى فينا برا ..
فتح باب السياره وركب ..
خلاني واقفه ..
اجا اخوي سراج فتح الباب ودفشني بقوة ..

دخلت وركبت جنبه ..
اطلع ع سراج وودعه .. ابتسم مع سراج .. كنت اطلع عليه ..

يالله بهاللحطه شو اشمئزت منه ..
ابتسامته مو حلوه ..
اسنانه لونهم اصفر .. شو هالانسان ..

ابتسم معي ابتسامه كبيره .. حسيت حالي بدي استفرغ ..
حسيت الدنيا عتمه كثير ..
والكون مافي حد .. لو في خير بالدنيا كان ما انصفني القدر مع ابو سامي ..

ابو سامي الرجال الاكبر مني باكثر من 30 سنة ...

ابو سامي الي احفاده قراب من عمري ..
متزوج تنتين غيري .. بشتري الكل بفلوسه ..

مشى بالسيارة كان مبسوط كثير .. حتى فرحته مو حلوه ..
كنت خايفه منه .. وقاعده باخر الكرسي ..

حكى كتير ما سمعت اي شي من كلامه ..
مد ايدو بدو يمسك ايدي .. بعدت ايدي بسرعه .. انكمشت ع نفسي اكتر ..

ضحك ضحكه بصوت عالي مو حلوه .. ضحكة عاليه .. حسيت فيها تحدي الي ..

وصلنا للبيت .. نزل وحكالي يلا انزلي ..
نزلت وانا الخوف بقطع بقلبي ..

(الجزء الثاني)

دخلنا البيت كان مافي ولا ضوء .. البيت عتمة كثير ..
وقفت وانا كل جسمي برتعش ..
كنت خايفه منه كثير ..

شغل ضو الصالون .. هلأ بس شفت البيت .. البيت كان كبير .. وفيه عفش فخم .. بس هذا كله ما لفت انتباهي ..

سحبني من ايدي وجلسني جنبه عالكنابه ..
هون زاد الخوف جواي .. كان نفسي اخذ سكينه واحطها بقلبه ..

بعدت عنه لاخر الكنابه ..
بس كانت لسه ايدي بايده .. حاولت اسحب ايدي من ايدو بس كان ماسك ايدي بقوة .. ضاغط عليها بعنف ..
زاد الخوف جواي
حسيت حالي مخنوقه
حسيت رغم الضو بعتمه مخيفه

قرب مني اكثر ..حسيت بكل جسمه قريب من جسمي ..
خفت منه .. برجع لورا بس ما ضل مجال ابعد اكتر ..
وجهه كان قريب كتير من وجهي ..

ابو سامي : مبروك يا عروس ..

انا ما رديت لانه مابدي

ابو سامي : بحكي مبروك

وهون شد عايدي اكثر .. شفت عيونه كانت مثل الجمر .. بتخوف
حسيت عيونه بدهم يطلعو من راسه ..
رجع حكى : مبروك .. يا روان

خفت منه ورديت : الله يبارك فيك

ابتسم ابتسامته البشعه ..
الابتسامه الي ما حبيتها .. الابتسامه الي كلها شرور

قام وقف .. انا ضليت قاعده .. سحبت ايدي من ايدو ..
وتنفست بعمق انو بعد عني ..

راح عالمطبخ .. فتح خزانه وطلع منها علبه ..جاب كاستين وقعد ..

انا اول شي فكرتو عصير ..اطلعت منيح بالعلبه ..
يا ويلي شو هذااا !!!
مستحيل ..هذا خمر
وجايبلي كاسه ؟؟
بدو اياني اشرب خمر .. رجع قعد جنبي فتح العلبه .. صب الكاسات خمر وحط عليهم ثلج .،

اعطاني كاسه ..لفيت وجهي عنه..
مسك وجهي ولفه عليه بطريقه وحشيه ..

ابو سامي : خذي تسممي ..

انا : ما بدي .. مابشرب ..

ابو سامي : معي كل شي بصير .. مفهوم

انا : بس هذا حرام ..

ابو سامي : انا بحكي معي كلشي بصير .. معي مافي حرام ..
انت من اليوم من ضمن املاكي الخاصه ..
مفهوم ؟؟

انا ساكته وخايفه ..
صار مخي يشتغل مثل الكومبيوتر بسرعه بسرعه .. شو بدي اعمل
وكيف بدي اطلع من هالورطه ..

ابو سامي : سمعتي الكلام ؟؟

انا : اه مفهوم .. مفهوم

اعطاني الكاس وطلب مني اشربه .. بهاللحظه رن تلفونه راح يرد عليه ..
بسرعه وبدون تفكير كبيت الخمر من ورا الكنابه ..

رجع وشاف الكاس فاضي ..

ابو سامي : شربتيه ؟

انا : اه شربته ..

ابو سامي : يلا قومي غيري اواعيكي ..

انا : وانت وين بدك ..

ابو سامي : بدو افوت اخد شاور

هون انا فرحت وحسيت انه الفرج اجاني ..
مستحيل اضل مع هالوحش ..لازم اهرب .. فوق كل صفاته البشعه بسكر كمان ..
راح اهرب .. بدي اهرب باي وسيله .. بدي اهرب شو ما كلف الامر ..

انا : اوك ادخل تحمم وانا راح اغير ملابسي..

ابو سامي : اه غيري .. ما بتاخر انا ..

بسرعه دخلت غرفة النوم قبل ما يدخل الحمام عشان استغل الوقت .. فتحت الخزانه طلعت بنطلون وقميص وخليتهم تحت السرير ..

دخل عندي .. طلع روب الحمام اخدو وراح عالحمام .. فتح باب الحمام ورمى بنطلونه ..

سمعت صوت المي بالحمام ..
اخدت الملابس ولبستهم بسرعه طلعت عالصاله برا مديت ايدي ع جيبته واخدت فلوس .. حطيتهم بجيبة قميصي...

اخدت شي يكفي اوصل بيت اهلي ..
رحت افتح الباب واهرب منه .. يالله على هالحظ .. المفتاح مو بالباب .. شو بدي اعمل هلأ ..
الوقت بمر .. توترت صرت ارجف ..رحت عالطاوله الي عندها دخانه كان في مفتاح سيارته .،

وين ممكن يكون المفتاح شو بدي اعمل .. اكيد بجيبته .. اخدت جاكيته وفتشت فيه ..
اول جيبه مافيها .. تاني جيبه مافيها
ولا جيبه فيها ..
حسيت دقات قلبي بزيد .. بدات دموعي تنزل ..

ممكن يكون بجيبة بنطلونه .. ركضت ادور بجيبة البنطلون الي كان بغرفة النوم ..
حمدالله ..حمدالله المفتاح بجيبة بنطلونه .. اخدت المفتاح .. وطلعت بسرعه .. بهاللحظة سمعت صوت باب الحمام بفتح ..

ركضت عالباب حطيت المفتاح بالباب ..

ابو سامي : روان .. روان

فتح باب غرفة النوم شافني واقفه بفتح بالباب .. ركض لعندي بسرعه ..
هون تلبكت انا ما عرفت شو اعمل ..

صرت اركض بالبيت وهو وراي ..مسكني من كتفي بقوة .. بوحشيه ..
لف وجهي عليه .. ضربني اول كف .. حسيت كل خدي تورم ..
ضربني كف ثاني .. حسيت الدنيا بتلف فيي ..

مسكني وهزني بعنف ..
ولك بدك تهربي ؟؟ والله غير اربيكي واعلمك الاصول ..

(الجزء الثالث)

رماني عالكنبه .. وراح جاب علبة الخمر صب كاسه .. وقرب مني .. بدو يشربني بالغصب .. قاومت بكل قوتي ..
قاومت بقوة ما بعرف من وين اجتني ..

رفعت اجري وضربته فيها بقوة عجيبه .. كانت ضربه قويه وقع لورا ..

قمت بسرعه فتحت الباب سمعته بهدد وبنادي وحسيت بحركته وراي .. انا مافي شي وقفني ركضت بكل سرعتي ..

وقفت اول تاكسي كان ابن حلال بس شاف حالتي حزن علي كثير ..
اعطيته عنوان اهلي ورحت عندهم .. كانت الساعه تقريبا 12 بالليل ..

وصلت بيت اهلي وانا ارجف وخايفه ...
دقيت عالباب بايدي الثنين وانا اصرخ وانادي ع ماما ..

فتح سراج : ولك مالك شو في ..

بابا : ولك ليش راجعه هيك .. شو صاير ..

ماما : شو في يا بنتي .. شو في ؟؟

سراج : ولك لا بكون ..

انا : اسكت خلص انا هربت منه هدا بسكر .. والله ما بتزوجه ..

بابا : ولك انتي شو طينتكً؟

بهاللحظه رن التلفون كان ابو سامي سمعت بابا بتاسف منه .. اخر شي حكاله الصبح انا بجيبلك اياها والله لاربيها ..

سكر الخط واجا عندي ..
ضربني .. وحكالي بدك ترجعي بالغصب ..

سراج : والله بموتها اذا ما بترجع ..

روان : والله لاموت حالي ..مستحيل ارجعله .. بنتحر وما برجعله ..

وقف سراج وطلعوا عينيه من راسه .. ركض عالمطبخ وجاب حبل ..
وقف بابا معه .. واخد الحبل منه ..
ربطوا ايدي ورجلي
وجاب سيخ .. حطوا السيخ ع النار لحتى صار سخن نار ..

ما خطرلي شو ممكن يعملو في .. ما خطرلي انهم راح يحرقوني ..

انا : شو بدكو تعملو في . ارحموني ..

ابو روان : مش بدك تموتي حالك !!

ام روان : لا يا رجال شو هالحكي ..

سراج : راح افرجيكي الموت عالبطئ..

انا : يا ربي والله ماعملت شي ..

ابو روان : والله لاعلمك كيف تعرفي تحكي ..

ام روان : يا ربي دخيلك ..

ابو روان : جعل ربك ياخدك انتي ..

سراج : يمه ادخلي عالغرفه وسكري الباب ع حالك ..

ام روان : اعطوني بنتي بدخل انا واياها ..

سراج : يمه روحي لا تخلني ازعلك ..

ابو روان : انتي بدك تجلطني .. روحي والا بحطك جنبها ..

انا : يا بابا سامحني والله مابعيدها ..

سراج : لازم تتربي ..

ابو روان : سراج هات السيخ ..

سراج : بعد يابه هذا شغلي ..

ام روان : ببوس رجلكم بعدو عن البنت ..

مسك ابو روان امها وشدها بوحشيه .. دخلها الغرفه وسكر الباب عليها ..

قرب من روان من بنته .. الي بهديك اللحظة اجردت منه كل مشاعر الانسانيه ..

مسك سراج اخته .. وهي تصرخ وتترجى فيهم ..
حط ايدو ع ثمها ..
السيخ كان سخن كتير ..
رفع عن رجلها قريب من ركبتها حط السيخ عليها ..حفر رجلهاحفر

اخ يا وجع
اخ يا الم
اخ يا بابا انا بنتك
اخ يا سراج انا اختك
ارحموني ..
سمعت صوت جلدها انشوى وشمت ريحته ..
متل العصفور المذبوح تالمت ..
ما رحموها ..
يمكن ثواني دقيقه او اقل خلوا المسمار عليها هالثواني كانت كفيله انه تركت جرح وعلامه طول العمر ..

علامه لانها حكت لاء
علامه لانها بدها تتحدا الظروف
لانها بدها تعيش ..

تركوها تبكي وتتالم ..
قامت تمشي بوجع عند امها ..
مسكتها امها ضمتها ..
بكيت ع بكائها ..
شافت ركبتها .. صرخت صرخة وجع .. وبكيت بحرقه ..

ام روان : يا ويلكم من الله ..

سراج : بتستاهل ..

ام روان : انت مو اخ انت عدو ..

ابو روان : اسكتي والا مصيرك مثل مصيرها ..

روان بتبكي وبتتالم : يا ماما اسكتي خلص منشان الله اسكتي ..

ام روان : حسبي الله ونعم الوكيل ..

نمت هديك الليله وانا بتوجع .. نمت ع وجع من ابوي اخوي ..

قمت الصبح ع صوت ابوي : ولك روان قومي تحركي ..

روان ما بتصحى ..

ام روان : خليها نايمه مش بكفي اللي عملتوه فيها ..

ابو روان : انتي لو تسكتي الدنيا بخير ..

قرب ابو روان يصحيها .. حط ايدو عليها .. روان كان سخنه نار ..
جسمها بغلي غلي ..

ابو روان :اوووف شو مالها هاي ..

ام روان : مالها .. شو فيها

ركضت عليها امها .. قربت منها .. حطت ايدها عليها ..
البنت نار .. بتغلي غلي .. انفاسها بتطلع بصعوبه ..

ام روان : يعمري يا بنتي .. شو صار فيكي ..

ابو روان : روحي جيبي ثلج حطي عليها ..

(الجزء الرابع)

ام روان : انتو السبب .. شو عملتو فيها . حدا بعمل عملتكم ..

ابو روان : تحركي جيبي ثلج ..

راحت ماما عالمطبخ فتحت الثلاجه وايدها بترجف .. اخدت صحن وحطت فيه ثلج .. الثلج اختلط بدموعها ..

راحت عالغرفه كنت بتنفس بصعوبه ..
حرارتي عاليه ..
بس حطت الثلج ع جبيني انتفض كل جسمي ..

انيني زاد .. وجعي بزيد
قربت ماما مني هزتني بقوة : روان .. روان .. مالك يا بنتي ..

كنت مو صاحيه مو حاسه بشي .. فتحت عيناي بصعوبه .. كانت الدنيا مثل الضباب ..

حطيت ايدي ع رجلي وصرخت ..
قربت ماما مني اكتر .. رفعت عن رجلي .. صرخت باعلى صوتها ..
صرخة خوف والم و وجع ..

صرخت وحكت : دبحتوها شو عملتو برجل البنت ..

كانت رجلي ملتهبه التهاب كبير ومنفوخه لونها احمر والحرق واضح ..مكان السيخ محفور حفر ..

ماما بس شافت المنظر اغمى عليها ..
صحيت ع مي بارده ع وجهها ..
قامت تضرب بوجهها
وتصرخ ع باباوسراج ..

ماما : بسرعه عالمشفى .. البنت راح تروح فيها ..

بابا : شو بدك نحكي بدك تروحينا فيها انتي ..

ماما : والله مابحكي شي .. بس ناخد البنت ..

سراج :هي السبب .. هي الي وصلتنا لهون ..

ماما : مو وقت هالحكي خلينا ناخدها عالمشفى ..

وهم بحكو رن جرس الباب ..فتح سراج كان ابو سامي ..
دخل والشر بعينه ..

ابو سامي :وينها .. وينها الفاجره ..

سراج : هدي حالك ..

ابو سامي : كيف اهدى ومرتي هربت من عندي بليلة زواجنا ..

طلع بابا عالصوت : اهلا ابو سامي ..

ابو سامي : لا اهلا ولا سهلا ..

بابا : خير مالك ؟

ابو سامي : بنتك ما بدها تنستر ..

بابا : ما بتكون غير راضي ..

ابو سامي : خليها تيجي ..

بابا : للمسا بجيبلك اياها ..

ابو سامي : لا هلأ بدي اياها .. ما بطلع من هون الا وهي معي ..

بابا : بس .. بسسسس

ابو سامي : وينها ؟ ما اجت هون ؟!

بابا : لا شو هالحكي .. البنت جوا ..

ابو سامي : لا في شي مخبينه علي .. بعدوا عني
وهجم عالغرفه وفتح الباب ..
شاف روان نايمه قرب منها .. شاف منظر رجلها ..رجع لورا
شو هذا شو هذا
بدكم تبلوني فيها .. تخلصوا منها .. انا من اول شاكك فيكم ..

طلع برا وهو يهدد بابو روان .. وقف عند الباب طلقها وطلع ..

ماما : يلا عالمشفى بلاش البنت تروح من بين ايدينا ..

سراج : بناخدها بس لا جيبي سيرة للي صار ..

ماما : والله مابفتح ثمي..

بابا : اي حرف بموتها ..

ماما : حاضر .. حاضر .. بس يلا

قامو اخذوني عالمشفى كانت حرارتي عاليه كتير ونفسي بقطع ..

وصلو عالمشفىً بس الدكتور شاف حالتي حكى لازم عمليه عطول رجلها كلها ملتهبه .. والالتهاب بزيد ..
لازم نقطع رجلها باسرع وقت ممكن ..

ماما : لا مستحيل شو نقطع رجلها !!

الدكتور : رجلها راح يصير فيها غرغرينا لازم بتر ..

ماما : يا ويل قلبي عليكي يا بنتي .. اخ من الظلم ..

الدكتور : لازم كمان نطلب الشرطه ..

بابا : لشو الشرطه ..

الدكتور : في اشتباه بجريمه ..

بابا : شو جريمه يا دكتور .. شو هالحكي ..

الدكتور : هذا الي ظهر معي ..

ماما : الله يستر عليك استر علينا .. البنت بس تصحى بتحكيلك كل شي ..

سراج : هي حاولت تنتحر لانها ما بدها تتزوج ..

بابا : ايوا هي حاولت الانتحار .. لا تفضحنا يا دكتور ..

الدكتور : الله يستر عالجميع
هلأ لازم عمليه ..

بابا : توكل عالله

دخلوني غرفة العمليات .. دخلوني المكان الي غير كل مجرى حياتي ..
قطعوا رجلي .. وصرت برجل واحده .. صرت انسانه مو كامله ..

طلعت من غرفة العمليات انسانه ناقصه ..

دخلوني غرفه ثانيه .. دخلت ماما معي رفعت الغطا وشافت رجلي .. ما كان في رجل ..
كنت برجل واحده ..
بكيت باعلى صوتها
وقفت عالشباك ورفعت ايديهاوقالت يا رب الطف ببنتي ..
يا رب خد حقي من الي ظلمها
يا رب هون علي مصيبتي
يا ويل قلبي عليكي يا بنتي
البنت الحلوه الي لسه باول عمرها الي كانت الارض مفروشه بورد لها صارت عاجزه ..

(الجزء الخامس)

سراج و بابا برا كل واحد بلوم الثاني ع عملته ..

ماما عندي بالغرفه .. دموعها روا الارض ..
بعد تقريبا ساعتين بدات اصحى من البنج .. اول شي صحيت ع حرارة دمعة ماما عايدي ..

فتحت عيني حاسه الدنيا بتلف .. مو شايفه شي .. كلشي متل الخيال ..

ماما شافت عيني فتحوا ..قربت مني ..حضنتني .. صارت تبوس في .. انا مو حاسه بشي ..

كنت احكي مشان الله ارحموني .. ما بدي اتزوجً واحد اكبر من بابا .. ارحموني بدي اعيش حياتي ..

بابا بعيش خدامه عندك بس لا تزوجني ابو سامي ..

صرخت بصوت اعلى وحكيت ما بدي ابو سامي هادا رجال متزوج وعنده اولاد .. لا تدفنوا شبابي ..مابدي فلوس ..

ماما رجعت تبكي .. انا مو بوعيي ما بعرف شو بحكي ..

علي صوتي...
مره احكي ومره اصرخ .. اجت النيرس عصوتي ..
اعطتني ابره بعدها نمت ماعرفت شو بصير بالدنيا ..

ضليت على هالحال يومين .. انام واصحى وعالابر .. ماما جنبي .. ما تركتني ولا لحظه ..

ثالث يوم صحيت كنت بوعيي ..
كنت بوعيي بس لسه مو عارفه اني برجل واحده !!

صحيت وفتحت عيناي ناديت ع ماما ..
كانت جنبي عطول ردت علي مسكت ايدي وحكت حمدالله حمدالله ..

فرحت بوجودها جنبي ..

انا : ماما عطشانه ..

ماما : يلا يا روحي هلا بشربك ..

كنت عطشانه كتير كتير

انا : حاسه جسمي مخدر .. بدي قوم امشي ..

ماما : ممم مممم خليكي مرتاحه
ماما هون عرفت انو لسه ماحسيت انه ماعندي رجل تانيه ..

انا : حاسه ناقصني شي ..

ماما : يعمري حمدالله ع سلامتك حمدالله انك لسه عايشه وبوعيك ..

انا :شو الي صار معي ..
بهاللحظة حاولت اتحرك .. حسيت بعجز .. حسيت بشعور غريب ..
حسبت بجسمي من تحت خفيف ..

رفعت الغطا عن جسمي بحركه سريعه .. شفت اسوأ منظر بحياتي ..
انصدمت .. كانت صدمة عمري
صرخت صرخه عاليه
بهاللحظة اجوا بابا وسراج بس شفت وجوههم ذكرت كل شي صار ..

انا : اطلعوا برا مابدي شوفكم .. انتم شوهتو حياتي .. انتو مجرمين

بابا راح ع باب الغرفه وسكره .. قرب عندي ومسكني من شعري .. ما همه وضعي ..

حكالي : اسمعي ولك كل الي صار بسبب طيشك وتسرعك ..
بتحكي للدكتور حاولتي تنتحري .. لا زيدي بالحكي والا بموتك ..

سراج : اذا بتحكي غير هيك بقطع رجلك الثانيه ..

ماما : الله اكبر عالظلم ..

بابا : انتي وبنتك مصيركم الموت اذا بزيدوا كلمه ..

سكتت ع الظلم .. سكتت غصبن عني ..

بعد يومين الدكتور كتبلي خروج .. وحكى انو تحسنت .. وبقدر اركب وجل صناعيه ..

وفعلا طلعت من المشفى .. وبكل صراحه قلبي كان كرهان بابا وسراج ..
عرفت من ماما انو ابو سامي طلقني .. بهاللحظه ما كان هامني شي ..

كان وضعي صعب مو قادره اخدم حالي بشي ..ونفسيتي صعبه..
كنت مو متقبله الوضع .. دائما بغرفتي .. انعزلت عن كل شي ..
لكن مع الايام وتشجيع ماما بدأت نفسيتي تتغير ..

قررت اواجه الصعوبات .. واتحدا كل شي ..
قدمت توجيهي علمي .. جبت معدل عالي .. دخلت كلية الطب بمنحه دراسيه ..

كنت الدكتوره المقعده ..
الدكتوره الي برجل واحده ..
بالسنه التانيه من الجامعه قررت اركب رجل صناعيه واتعود عليها ..
فعلا ركبتها ومع الايام تعودت عليها وكان وضعي شبه طبيعي ..

مرت الايام وماما جنبي بكل المواقف وبكل الظروف ..
بابا بمره وهو مروح من الشغل صار معه حادث مات عطول...

سراج للاسف صار معه سرطان وكان وضعه صعب جدا .. صارع المرض كتير وتعب وبعد سنه مات ..

انا تخرجت دكتوره بامتياز .. اشتغلت بافضل مشفى بالبلد ..
وتزوجت من دكتور حبني وحبيته وتقبل ظروفي و وضعي ..

اخدت ماما عاشت معي .. ربت اولادي وكانت سندي و كل حياتي بكل لحظات حياتي ..

الحياه فيها سلبيات كتير بس الايجابيات اكتر ..
راح نتعرض لظروف صعبه تكسرنا بس هالكسر بدو قوة واراده ومواجهه .. بالاراده القويه راح نهزم الصعاب .. العجز مو عجز بالجسم
العجز عجز البشر عن حب بعضهم .. وعدم وجود الانسانيه..