الفريسة لحامد زيد

smile

شخصية هامة
هذا الخطا اللي ماتوقعت يخطيه
شف كيف كشر طيب القلب نابه

أثر الحسد لاعشعش بصدر راعيه
يجعل من قلوب الحبايب ذيابه

اللي تعلم من سكوتي تماديه
علمني استقبل خطاه برحابه

والواجب انه لوجحد فزعتي فيه
مايجحد حقوق النسب والقرابة

وانا اللي يوم ان المصايب تبكيه
كنت اقرب إله بضيقته من ثيابه

اللي تعاف اوله ينعاف تاليه
وانا كفى صدري من الغيظ مابه

من لاوقف لي وقفة رجال مابيه
يغني عن حضور المقفي غيابه

من لافزع بالكايدة مع بني خيه
وقت الرخا مايحسب حساب لابه

علمت غيري كيف لاصد ماجيه
وانا تعلمت الصبر والصلابة

لأن الشجاع ان مالقى من يواسيه
ان مانشدته ما علمت بمصابه

مادام بعدي عن رفيقي بيرضيه
نذرعلي اني فلاطق بابه

عيب التفت في جاه مخلوق وادعيه
وللمبتلي ساعة دعا مستجابه

الضعف ماطيقه ولااطيق طاريه
والدمع لايرقى ولا ينرقابه

والحلم يغنيني عن الكبر والتيه
والظلم محصيني كآبه كآبه

ان ماجمعت اوجيه مافرق وجيه
ومن لابنيته ماسعيت بخرابه

وانا لو اني بلتفت بلتفت ليه
الرمح غالي والفريسة ذبابه

بدري على احسب له حساب واوجيه
وبدري عليه يشيلني من حسابه

كاني عتقته بأعتقه رأفة فيه
إلا الطلابة ماخشيت الطلابة

مهب على شانه ,عشان المشاريه
سامحت طيشه وابتليت بعذابه

اليا كسر في خاطرك شخص تغليه
حتى المعاتب تستحي من عتابه

اللي سكن صدري من الغيظ يكفيه
ملت تفاصيلي سكوت ورتابه

اللي بيدخل في مزاجي بأسويه
وبخاطب الفظ الغليظ بخطابه

مثل الغلا اللي باخذه منه بعطيه
ويسمع جوابي مثل ماسمع جوابه

لو كل شخص بيحتقر في باخاويه
ماكان حزت من المراجل مهابه

ياهيه مثلي مايقولون له هيه
مدري متى تتعلمون الذرابة

اللي معلمك الكتابة على يديه
لمحة بصر ويبعثرك من كتابه

ومثلي لامن قلت لك قول يوفيه
والقرم لامن وكد العلم جابه

سمه تحدي سمه اللي تسميه
بس الوكاد انه مهوب استجابه

اللي مهب قد المواجه يخليه
ومن لاقدرت تهيبه منك هابه

الله يعز وجيه ويطمن وجيه
وحنا بشر لكن بشر وسط غابه

ومن لافزع بالكايدة مع بنيخيه
وقت الرخا مايحسب حساب لابه
 
الوسوم
الفريسة حامد زيد
عودة
أعلى