... قـصّـة مـهـا ...


في لـيـلةٍ .. ضاقت جميع التـدابـيـر
مـلـّيت فـيها .. كلّ صمتٍ وتعـبـيـر

دخلت لي شـاتٍ وأنا غـيـر مجـبــور
لكن فراغ .. وضيـق خاطـر وتغيـيـر

كلـّمت بنت وقلت علّ .. وعسى وليت
ألقى خـفـوق ٍ... فـيـه للحبّ تـأثـيـر

وبعـد التـعـارف والحكي والسـوالـيـف
صارت من أهـل العاصمة دولة الخـيـر

تـدعى هنـادي .. وعمرها دون عشرين
سـاعة عـطتني رقمها ... دون تأخـيـر

قلت اخـتـبـرها ... والليـال المقابيـل
لا بدّ ما تكشف .. ردى سـوير وعويـر

مـرّت ثـلاث ليال .. معها والأحــوال
صدّ وجـفـا .. مـن دون عذر ٍ وتبريـر

بين انتظار ... وبين مغلق ومـشـغـول
ذا حـالها صبح ومـسـا وحزّة عصيـر

حتّى كرهت أسلوب .. مـن مثلها صـار
دام الـوعـود أقفت .. محطـّات تزويـر

ما يسـتـوي فـ أطـهـر حـديثٍ لنا سيق
من هو يحمل المسك .. مع نافخ الكـيـر

ثمّ اتصلت بخـاطري .. كلمة عـتـاب
بـعـد الغـيـاب .. اللي بلـيّـة مـعـاذيـر

وردّت عليّه غـيـرها ... وقلت ياهـيه
بقـول لك كـلمة .. ومن بـاب تـذكـيـر

لا تحسـبيـني ... بنحني لك وأنـاديـك
واللي سـواتـك .. دون حـشمه وتوقـيـر

قالت : أنا ماني هنـادي ... وبـعـديـن
وش فيك متضـايق ! ومـتحـامل كثيـر

قلت : أختـك اللي ... كلـّمتني من أيّام
ذا علمها .. وما صار لا يمكـن يصيـر

قالت : تقبّل عـذري .. إن كان يرضيـك
لا يضيق لك خاطـر .. ترى بالزمن خير

قلت : العذر .. لا صـار منك أنت مقبول
بسّ الحـقـيقـة .. ما حصل منك تـقصيـر

لكن !! طـرى في بالي أنشـدك إذا كان
لك بالـهـوى يابنت .. رغـبة وتفكيـر

ردّت عليّ وقـالـت : أخـافـ لا أكــون
قصّة وهم .. ما شـافت ألا المخاسـيـر

قلت التجارب يامـهـا .. خير بـرهـان
لا تحـكمين ... بكـلمـةٍ قالهـا الـغـيـر

قالت : خلاص أجرّب الحـبّ وأشـوف
دام الهـوى الصّـادق على نهجه تسـيـر

قلت : أبشري عهـدٍ علي والعهـد ديـن
ومن خـان عهـد الله عساه بزمـهـريـر

قالت : بعـد ما قلته .. أعطيك ميثـاق
ما أخـون لو شـانت صدوف المقـاديـر

ثمّ ابـتـديـنـا .. واقـع دروب الآمـال
قصّـة غـلا غنّت من حـروفها الطـيـر

الشـوق فيها ... يـوم عـن يـوم يـزداد
بإحسـاس صـادق .. ترجمته التعـابيـر

ياللي لقيتـك .. صـدفـةٍ دون مـيـعـاد
من يـوم ما شفتك .. وأنا حالي بخـيـر

ياللي تربّع حـبّـك .. أقصى الشـراييـن
غلاك ما يحـتاج .. فـكـرة وتصـويـر

ما دام زينك .. حيّـر عـقـول وأذهــان
سـبحـان من خلاك .. تفـرق عن الغيـر

الزيـن .. منك وفيك .. يامنـبع الـزيـن
ياللي جمـالك .. كلّ من شـافـه يحـيـر

غنج .. ودلال وزين مظهـر .. ومنطوق
ومن زينها ... حـتّـى القمر منّها يغـيـر

مـن شافـها ... مـا والفت عينه الـنـوم
يسـهـر يناجي طيفهـا الصـبح وعصيـر

ومن نـال ذيك .. أمّ الرمـوش المظـاليل
في ذمّتي .. نـال الـفـرح .. والتباشـيـر

يـوم النصيب اللي .. جمع بالهـوى اثنيـن
فاضت .. مشـاعر حبّـنا .. عبر الأثـيـر

قصّة ومكتـوبة ... على كـفـوف الأيّـام
ما أظـنّـها تحتـاج .. شـيـخ ٍ وتـفسـيـر

حبّيت أترجمها ... على هـيـئة أبـيـات
عـشـان أوصّلها ... لـمن حـبّها غـيـر

حبّي لـ مها .. ماله ترى حـدود وقـياس
مـن قلب يغليهـا ... مـحـبّـة وتـقــديـر