معلومات مهمة عن الجامعة للطلبة الجدد في سوريا

معلومات مهمة عن الجامعة للطلبة الجدد
الجامعة عبارة عن فصلين
فصل أول فيه حوالي 7 مواد بيخلص تقريبا بشي 20/2
وفصل تاني فيه حوالي 7 مواد بيخلص تقريباً بنص السابع
وفي أفرع ٦ مواد

الدوام ضروري بالكليات التطبيقية والهندسات والمعاهد والحضور عليه علامات....
وهدول فيهن مذاكرات عملية ....
باستثناء الاقتصاد

أما الكليات الأدبية فالدوام ما عليه علامات ...
بس كتير مهم أنكن تحضروا وتسجلوا شو عم يحكوا الدكاترة وتستفيدوا اكتر بس إذا بغير محافظة فيكن ما تجوا غير عالامتحان....
وهدول مافيهن مذاكرات عملية

إذا رسبت أكتر من 4 مواد فبترسب السنة كلها ووقتها اذا مسجل مثلا فرع بحلب ورسبت مافيك تنقل عدمشق اذا اذا نجحت ففيك تنقل...

إذا رسبت بشي مادة فصل اول فيك تقدمها فصل تاني ونفس الشي أذا رسبت بمادة فصل تاني فيك تقدمها بالفصل الأول....

شدوا همتكن كتير منيح المعدل مهم إذ بدكن تكفوا ماجستير ودكتوراه بعدين

الشغل أثناء الدوام أول فصل صعب كتير لهيك حاولوا ما تشتغلوا أول فصل لتتعرفوا عالمواد وجو الجامعة وكيف رح تداوموا وهيك....
بعدين وقتها ممكن تشتغلوا بدوام مسائي أو دوام صباحي عحسب دوامكن بس قبل أسبوعين أو اكتر من الامتحان اتركوا الشغل واقعدوا ادرسوا مشان ترفعوا موادكن منيح

في كليات أغلب امتحاناتها أتمتة (يعني اختر الإجابة الصحيحة) وفي كليات هيك وهيك يعني رح يكون نموذج أسئلة وامتحانات جديد

مشكورة اختي

تتمة لبعض المعلومات اللي تخص الجامعة

برنامج الدوام لكل كلية شكل بس غالباً بكون 4 أيام دوام وطبعا في كليات بتداوم 5 أيام بالاسبوع بس ما بكون مضغوط الوقت
وبيبدأ الدوام الساعة 8 الصبح وممكن ينتهي الساعة 5 عحسب البرنامج بس أغلب الأيام بكون بينتهي الساعة 2 هي كل كلية شكل

وقت تدخلوا عالجامعة في شي اسمو محاضرات ببيعوها بالمكاتب او فيكن تشتروا الكتب من الجامعة وهي الطريقة الافضل للي بداوم وتلخصوا ورا الدكتور او تسجلوا صوتو وأنا رح أحكي عن الفرق بين المحاضرات والكتب بالتفصيل

فيك تتوظف بشي مديرية أو وزارة او مؤسسة حكومية عشهادة البكالوريا ووقت تاخد شهادتك الجامعية تعمل تعديل وظيفي، أو فيك تتوظف بعقد مؤقت ع شهاظة البكالوريا مثلا لسنة، هي وقت يعنلوا المسابقات مننزل عنهن وبتقدم عليهن ومنحكي شروطهن

الفرع إذا صعب أو سهل أنت اللي بتقرر هالشي أكيد إذا رح تحضر وتداوم وتدرس أول بأول رح تلاقي الفرع سهل بعكس إذا خليت حالك لزنقة لقبل الامتحان (خزان مليان أحزان ضروري أتذكر )

أنت ما وصلت عهالمرحلة إذا ما كنت بتمتلك الإمكانيات المناسبة اللي بتخليك تتفوق وتتميز
أوثق دائما بحالك واشتغل على حالك لتتميز أكتر وأكتر

الرفقة كتيرة وبتلعب دور كبير بالجامعة من حيث التأثير على دراستك وشغلك وكتير شغلات فاختار المناسب وتأكد دائما أنو رفيق منيح أحسن من عشرة مو مناح

ما حدا أحسن منك ومانك أحسن من حدا خليك مشتغل عهالقاعدة
نصائح ومعلومات تانية بنزلكن ياها بعدين

#ضياء_ناصيف
Deaa Naseef