#كيوبيد
الجزء الاول:
اياد:ليش لهلا ما خلص الاكل و ليش ما كابة الزبالة و انت رايحة على شغلك اليوم ....شبك ساكتة ....ردي...حتى بلوزتي الزرقاء ما غسلتيا لهلأ!!!
الاء:خلص لهون وبس ,ما بقا قادرة اتحملك اكتر من هيك , تعبببت
اياد:انت جسمك عم يحكك و صار بدك قتلة
الاء:تعااا يلااا اضربني
اياد:جاااي طولي بالك علي
كنت واقفة بالمطبخ وعم فرم بصل للمجدرة,ركض علي متل التور الهايج و انا حسيت حالي فقدت السيطرة على اعصابي وانفجرت متل البركان ,كبت كل الست السنين طلع ب لحظة وحدة ,مسكت السكينة و شكيتا ببطنو,حسيت بشي سخن على يدي , شفت الدم و خفت ,سحبت السكينة من بطنو فورا و زتيتا بالارض ,رجعت لورا انا و عم اتفرج عليه و عم اطلع على ايدي,حط ايدو على بطنو
اياد:شششششووووو عملتي؟
الاء:اييياااد
وقع على الارض و هو عم ينزف و انا وطيت لعندو
الاء(تبكي):يا ربي ششو عملت !!!!!اياااد اياااد
غاب عن الوعي و انا عم اصفقو على وجهو ليصحى ,رن جرس بيتي,قمت انا و متوترة و مشيت فوق سكربينتي على دمو حتى انتبهت ,شلحتا و زتيتا ,اجت على راسو
الاء: نور ....يا ربي اجت نور من الروضة
سكرت باب المطبخ و ركضت على الباب انا و عم مسح الدم بتيابي و فتحتو انا و متوترة
الاء:اهلين ماما...فوتي ...تعي معي
اخدتا على غرفة النوم و دخلتا و سكرت الباب,رجعت على المطبخ و فتحت الباب,شفت اياد بعدو بمحلو و ما في اي ردة فعل منو لا حركة و لا صوت و لا حتى نفس و يعدو عم ينزف دم,رجعت ركض على غرفة النوم ,غيرت تيابي و نزلت الشنتاية من فوق الخزانة و بلشت ضب تيابي و تياب نور و اخدت كل اوراقي المهمة ودفتر مذكراتي , مسكت ايد بنتي و نزلت من البيت بدون ما ارجع التفت لوراي ابدا ,وقفت تكسي و طلعت انا و عم ارجف و مخطوف لوني
الاء:على كراجات البولمان اذا بتريد
كنت طول الطريق عم اتلفت وراي و كانو حدا عم يلحقني ,نزلت و انا و ماسكة بنتي من ايد و بالايد التاني شنتاية السفر ,فتت على مكتب حجوزات
الاء:اذا بتريد احجزلي مقعد
العامل:على وين ؟
الاء:.....لوين....شو البولمانات يلي طالعة هلا؟
العامل :في بولمان بعد عشر دقايق نازل على اللادقية و في واحد على حلب بعد نص ساعة
الاء:احجزلي على اللادقية
العامل :تكرمي
الاء:يعطيك العافية
طلعت من المكتب و فتت على الحمامات العامة ,غسلت وجهي ,و اطلعت على ايدي كانو بعدن عم يرجفو,غسلتن عشر مرات بالصابونة,كنت عم شم ريحة نتنة منن و كانو كنت ماسكة شي نجس بايدي بس ما استغربت ,دم اشباه الرجال ريحتو بشعة بحكم انو الندالة بتجري بمجرى دمن, طلعت من الحمام انا و بنتي نور يلي كانت عم تتفرج و ساكتة ,طلعت بالبولمان و قعدت بالمقعد و حطيت بنتي على حضني,كنت ما مصدقة ايمت يمشي البولمان حتى حس حالي اني صرت بامان,بلشت الناس تطلع فيه حتى تعبى و مشي ,ارتحت كتير ,طالعت موبايلي من جزداني و اتصلت بالاسعاف ....
الجزء التاني :
اعطيتن عنوان بيتي و كان بدي خبرن عن حالتو بس انتبهت انو اطلع فيني الرجال يلي كان قاعد جنبي و رجع دار وجهو ,تلبكت و سكرت الخط فورا و طالعت الشريحة و كسرتا انا و عم فكر اذا اياد ممكن يكون مات او سيارة الاسعاف رح تنقذو حتى سمعت صوت بنتي نور الناعم
نور :ماما انا جوعانة
الاء:هلأ ماما بس ننزل على اول استراحة مناكل
مجهول :تفضلي
الاء:لا يسلمو
مجهول :اذا بتريدي خديا ,لسا معي وحدة
الاء:شكرا الك
اخدت البسكوتة من الرجال يلي كان قاعد جنبي و اعطيتا لبنتي نور كان شاب بعمر ال 33 سنة تقريبا ,بنيتو ضخمة كان لابس قميص ابيض و بنطلون اسود و مسرح شعرو الاسود بطريقة مرتبة ,كان انيق بشكل ملفت للنظر
مجهول :شو اسمك يا حلوة
نور: اسمي نور
مجهول :عاشت الاسامي انا اسمي ليث,شو عمرك؟
نور:5 سنين
ليث:العمر كلو
اطاع فيني و ابتسم
ليث :الله يخليلك اياها
الاء:تسلم يا رب
ليث:انت من اللادقية الا الشام ؟
الاء:من الشام
ليث:انا من اللادقية
الاء:تشرفنا
بعد ساعتين نزلنا بالاستراحة ,فتت انا و نور على الحمام بعدين اطلعت اشتريت بسكويت و عصير و قعدنا على الطاولة شوي , كان قاعد ليث على صفنا , اطلع بنور وابتسم و مد ايدو و اعطاها بسكوتة تانية ,اخدتا نور و رجعت لعندي ,رجعنا قعدنابالبولمان و تابعنا رحلتنا على محافظة ما زرتا ولا مرة من قبل و لا بعرف فيا حدا ابدا
الاء:ممكن سؤال
ليث:تفضلي
الاء:بما انو انت من اللادئية,يعني انا صراحة هاي اول مرة بدي روح عليا و ما بعرف شي فيا ابدا ,بدي تعطيني اسم فندق رخيص
ليث:اي تكرمي
طالع ورقة و قلم من شنتايتو و كتبلي عليا قائمة باسماء الفنادق الرخيصة
ليث:تفضلي
الاء:يسلمو كتير
ليث: و كتبتلك رقمي باخرة الورقة بحال احتجتي اي شي ,فيكي تتصلي و تساليني
الاء:ماشي كلك ذوق
ليث:انت نازلة سياحة ؟
الاء:..ايه ...تقريبا و بدي شوف اذا لقيت شغل فيا رح اشتغل
ليث:ولله يعني احتمال تستقري هون
الاء:...ممكن
ليث:شو معك شهادة؟
الاء:...ما معي ...شهادة بكالوريا ادبي بس و ما كملت جامعة
ليث:اممم شو حابة تشتغلي؟
الاء:اي شي
ليث: طيب انا عندي وظيفة بس ما بعرف اذا بتناسبك و بتناسب الطرف التاني
الاء:شو هي ؟
الجزء التالت :
ليث:انا عندي ابن اختي عمل حادث من سنة تقريبا و الحادثة سببتلو رضوض بالنخاع الشوكي و هالشي عملو شلل برجليه ,يعني فيكي تقولي مقعد و بدو مين يعتني فيه
الاء:ايه؟
ليث:و تابع فترة على العلاج وتحسن شوي و صار بيقدر يتحكم بمثانتو و يحط شوية تقل على رجليه بس بعدين وقف علاج و انعزل عن العالم و حبس حالو بغرفتو و امو عم تحاول اطلعو من يلي هو فيه بس ما عم تقدر,و كل ما تجبلو حدا يساعدا فيه بتصيبو نوبات غضب ,و بقلا ما بدي حدا يشوفني هيك و يشفق علي
الاء:اووه الله يشفيه يا رب , بس اذا تحسن ليش وقف علاج؟
ليث: كانو عذبو ضميرو بس حس حالو انو ممكن يرجع يمشي و يتابع حياتو لانو الحادثة .....على كل حال انا ما بدي فوت بهيك تفاصيل هون ,بقا اذا انت بتشوفي حالك خرج تقومي بهالمهمة ,رقمي صار معك,حكيني و طبعا المنامة ببيت اختي ,بيتا كبير و طابقين
الاء:طيب بس انا يعني متل ما شايف معي بنت صغيرة ,ما بعرف اذا بناسبا لاختك هالشي
ليثء:انا رح خبرا عنك و انت فكري....
الاء:انا موافقة
ليث:طيب ممتاز معناها اعطيني رقمك
الاء:انا بحكيك بعد يومين و بشوف شو صار معك
ليث:اوك ماشي ,ما عرفت اسمك؟
الاء:اسمي ...اسمي...الاء
ليث:حضرتك متزوجة؟
الاء(مرتبكة):أي , لا , قصدي يعني كنت متزوجة,انا هلأارملة
ليث:اممم شو عمرك؟
الاء:27 سنة
ليث:العمر كلو انا 35 سنة وكنت متزوج ,انا مطلق حاليا
الاء:عندك اولاد؟
ليث:ايه ,عندي صبي واحد عمرو 10 سنين
الاء:الله يخليلك اياه ,هو معك الا مع امو؟
ليث:تسلمي يا رب,هو معي ,امو متزوجة برا البلد بس تركتو عند عمتو ميرفت بسفرتي على الشام,هاي وصلنا
صف البولمان و بلشو الناس ينزلو ,نزل ليث و انا نزلت وراه انا و بنتي نور,اخدت شنتايتي ومشيت ورا الناس حتى طلعت من الكراج,وصلت على الشارع الرئيسي و بدي اخد تكسي , لمحت ليث عم يسوق سيارة ,وقف جنبي و نزل ازاز الشباك
ليث :الاء ...اطلعي لوصلك بطريقي
الاء:لا شكرا باخد تكسي و بتابع لحالي
ليث:ماشي ,ناطر اتصالك
الاء:ماشي ,الله معك
وقفت تكسي و طلعت و قلتلو للشوفير اسم فندق من الورقة يلي اعطاني اياها ليث ,وصلت على الفندق ,حجزت غرفةلمدة يومين,حطيت تيابي بالغرفة و نزلت لاشتري سندويش لاكل انا و نور ,شفت محل فلافل ,اشتريت سندويشتين و انا راجعة فتت على محل موبايلات و اشتريت شريحة ,انا و واقفة عندو ,ضربت عيني على التلفزيون و شفت المذيعة عم تعطي نشرة الاخبار المحلية ا
المذيعة :زوجة تطعن زوجها بمنطقة البطن و تفر هاربة لتتصل بعد ساعة و تتطلب له سيارة الاسعاف ,مصادر من المشفى اطلعتنا على حالة الزوج الحرجة جدا ....
صار كل يلي بالمحل يضحكو على الخبر
-لا حنونة قتلتو للزلمة و بعدين طلبتلو الاسعاف
-هدول النسوان ما الن امان ,بيطعنوك اول ما تبرملن ضهرك
اختنق صوتي,اخدت الشريحة و طلعت بسرعة من المحل ,وقفت سندت على الحيط انا و عم ابكي و خايفة انو يموت اياد و انلقط و اتحاكم مؤبد, رجعت على الفندق و بقيت فيه ما كنت اطلع منو الا اذا بدي اشتري اكل , كنت كل يوم حط راسي على المخدة بالفندق , اتذكر اياد و كيف قتلتو و كيف اطلع فيني هو و عم يتوجع و كيف وقع على الارض و تذكرت ايامي انا و اياه اول ما خطبنا و اول ما تزوجنا ,كنت قوم من نومي و افتح دفتر مذكراتي و اكتب , ليش وصلنا لهون و كيف وصلنا ما بعرف, يمكن الغلط مني او منو , قعدت مع حالي انا و عم راجع حساباتي مع حالي و احسب انا شو عطيت بهالزواج و شو اخدت ,و اتذكر مواقف كتيرة بيني و بين اياد يلي كان كل سنة عن سنة عم يصير اسوأ و يعاملني متل الجارية و انا اتحمل و اصمت الصمت القاتل, كان فترة الاسبوع كفيلة الي بانو اعرف انو صمتي الو يد بالمعاملة يلي صار اياد يعاملني اياها و خاصة بالسنوات الاخيرة ,بتذكر نصائح امي الذهبية يلي متوارثتا من اما و اجدادا وقت قعدت معي قبل عرسي بيومين
ام كريم: يا بنتي لازم تصبري على زوجك بالحلوة و المرة و ما طالبيه ابدا فوق طاقتو و حاولي تصوني قرشو و ما تقصري اتجاهو ابدا حتى لو مرضتي ما تبينيلو ابدا انك مريضة و الرجال بحب المرة يلي بدللو ما يلي بتدلل عليه اوعى ترفعي صوتك و ما تسمعي الناس فيكيو ما تخالفيه بالراي , على كل شي قليلو امرك تاج راسي,اذا عصب ما تردي بوجهو ابدا , و معلش سايريه بالكلمة الحلوة و ما تخليه ينام زعلان منك و ما غلط انك تتنازلي و تراضيه حتى لو الحق معك بالاخير ما في كرامة بين المرة و زوجا
مافي كرامة بين المرة و زوجا هيدي كانت اخطر نصيحة اعطتني اياها امي و ودتني للهلاك او يمكن الغلط مني اني اسات فهم كل هالنصائح يلي طبقن بحياتي الزوجية و زيادة ,كنت بعشقو لاياد و بتنفسو و لو حتى قلي اللبن لونو اسود كنت رح قلو اسود من الليل , و رغم انو كانت امو تتحكم فيني كيف بدي عيش و ايمت فيق و ايمت نام حتى تفرض علي خدمتا 7 ايام بالاسبوع , كنت نفذ من تم ساكت كرمال زوجي بس بعد ما حبلت ببنتي نور و كان وحامي صعب , خفت زياراتي لعندا و و علقت انا و اياد من ورا هالموضوع و ضربني لاول مرة و جبرني روح و اعتذر من امو , سكتت و رجعت اشتغل بخدمة حماتي , بس رجع بعد فترة ضربني مرة تانية ليش ما رحت لعند اختو و ساعدتا بعزومة بيت احمى بنتا و انا كنت ولدانة من شهر و نص بس , صار يضربني بكل مرة بتكون فيها حماتي او حدا من بنات حماي ما رضيانين علي, و انا اسكت و سامح و ساير على حسابي و كرمال بنتي ,باالسنة التالتة من زواجي مر زوجي بظروف مادية صعبة و انكسر و صار عليه ديون وبعتلو دهبي و ما كفاه , تبرعت بانو ادينلو من اهلي بعد ما كل اهلو سحبو ايدن و رفضو يدينوه, وبقي سنتين يماطل بدين اهلي مع انو وضعو تحسن و وقف على رجليه و طالبتو كتير و اكلت ضرب كتير كرمال هالموضوع حتى قررت اشتغل و سدن مع انو هو ما بحب شغل المرة بس وقت خبرتو انو رح اشتغل لسد دينك وافق فورا, صرت اشتغل بمحل حلويات حتى سديتن لاهلي كل دينن على مدة سنتين , بعد السنتين بقيت عم اشتغل و حط كل راتبي على البيت و شاركو بدفع فواتير الهاتف و الكهربا و المي ,حتى بلش يسحب ايدو من كل شي حتى اتبرى من مسؤولية البيت و اعطالو و متطلباتو , كان أي شي يعطل بالبيت اركض صلحو فورا بدون ما ادخل بنقاش معو, حتى اللمبة المحترقة و جرة الغاز كنت انا بدلن و ,وصلت لمرحلة صرت كب الزبالة وقت بنزل على شغلي الصبح كرمال ما يوسخ ايديه و يخرب منظرو , بعد كل هالشي يلي عملتو كرمالو اكتشفت انو عم يخوني مع صبية عمرا 20 سنة و وقت واجهتو ,اول جملة قلي اياها
اياد:ليش انت معتبرة حالك انثى ههههههههه, انت محسوبة علينا
بعد كل شي قدمتو, بعد كل هالتنازلات ,بعد كل هالتعب , اتهمني بانوثتي و خاني, كنت غبية بجدارة , لعبت دور ما الي و دعست على حالي و كرامتي و كرمال شو ؟ كرمال يقول عني زوجة مثالية و بطلة , كرمال يزقفلي و يثني على قوتي و قدرة تحملي او لانو كرمال عبي محلو الفاضي , بقيت هالجملة يلي كانت متل الكف على وجهي عم طن بداني لحد هلأ, لحد الوقت يلي انفجرت فيه و طلعت عن صمتي و قتلتو, قتلتو حقد و كره سنين حابستن بقلبي , تركت القلم و اطلعت على ايدي و رجعت رفعت راسي , اطلعت على الشوارع و الناس , فتحت الشباك و تنفست ,حسيت حالي ما زعلانة من فكرة انو اياد ممكن يكون ميت هلا بس كنت خايفة انو انحبس و اترك نور لحالا بلا ام و بلا اب , التفت على نور و شفتا نايمة , بكيت كتير بعدين لبست علي و نزلت على السوبر ماركت القريبة من الفندق
الاء: ممكن الهاتف شوي
حطيت السماعة على داني انا و متوترة و مترددة و عم اضرب باصابعي على السماعة و عم ارجف و ايدي التانية على قلبي يلي عم يخفق بسرعة و اتصلت فيه ,كنت خايفة اسمع صوتو بس كنت بتمنى اسمعو حتى ارتاح .......
الجزء الرابع:
رد علي بصوتو المقزز
اياد: الوو.....الو....ردو ...مين معي
سكرت الخط بوجهو و انا عم ابتسم
الاء: متل القط بسبع ارواح
انبسطت كتير انو بعدو عايش , اطلعت على الفندق انا و حاسمة امري و اتصلت ب ليث كرمال اسالو عن الوظيفة
ليث:اهلين الاء كنت ناطر اتصالك ,انا حكيت اختي و ما عندا مشكلة
الاء:منيح ,ايمت بقدر بلش؟
ليث:ايمت ما بدك ,اذا بدك بكرا بجي باخدك على البيت , بيت اختي صاير بالريف تقريبا ما بنص البلد
الاء:اي احسن ,...انا ما بحب زحمة البلد
ليث:ماشي موعدنا بكرا انشالله
تاني يوم اجا ليث بسيارتو و طلعت انا و نور ,بعد 45 دقيقة وصلنا ,نزلنا من السيارة ,نزل ليث و حمل شنتايتي
ليث:تفضلي من هون
كان البيت عبارة عن طابقين و حولين البيت شجر برتقان و زيتون
نور:ماما وين نحن؟
الاء:نحن جاين زيارة عند خالتو رح نقعد هون فترة
فتت على البيت انا و متلبكة ,استقبلتني من الباب مرة اربعينية ,بيضا,عيوناعسليات فاتحين وممشوقة القامة مرتبة شعرا بطريقة ناعمة و بسيطة
ميرفت:تفضلي اهلا و سهلا ,انا اختو ل ليث ,اسمي ميرفت
الاء:اهلين فيكي انا الاء و هاي بنتي نور
فتت قعدت على الكنباية بالصالون و انا عم اطلع حولي , حط الشنتاية ليث و استأذن و راح
ميرفت:انا حابة احكي معك عن وضعو لزين قبل ما تتعرفي عليه حتى تعرفي كيف تتعاملي معو
الاء:تفضلي بس انا عندي فكرة بسيطة من ليث
ميرفت:تمام , ابني زين حساس كتير و بعد ما صار معو هالحادثة و الكل تعاطف معو ,حس حالوا نو صار موضع شفقة للعالم و الشي يلي تعبو اكتر انو معتبر حالو هو المسؤول عن وفاة ابوه لانو هو يلي كان سايق السيارة و نفسيتو بتهمني لانو النفسية الا دور كبير بالعلاج و انا امو حاولت كتير لطلعو من اكتئابو حتى جبت ناس مختصين نفسيين بس رفض يتعاطى معن و يقعد معن ,الو ما يقارب الشهرين ما طلع من غرفتو
الاء:الله يرحمو لزوجك, البقية بحياتك
ميرفت:تعيشي,لهيك انا بدي منك طولي بالك عليه
الاء:رح حاول بيلي بقدر عليه بس ممكن اعرف شو مهمتي بالضبط؟
ميرفت:بدي تعتني فيه ,انا ما كل الوقت بالبيت لانو بعد ما مات زوجي انا استلمت الشغل من بعدو و طبعا ما رح تكوني لحالك ,في ابو وفيق يلي بشتغل بالارض و هو يلي بفوتو عالحمام و في مرتو ام وفيق هيدي مهمتا البيت و الطبخ , انت بس بدي تعطيه ادويتو بانتظام وتبقي جنبو بحال لزمو شي , و تسايريه لانوا كيد عم يعاني من الوحدة
الاء:ماشي
ميرفت:بالنسبة للراتب ...
الاء:ست ميرفت خليني جرب بالاول بعدين منحكي بالراتب
ميرفت:ماشي حياتي ,تفضلي معي على غرفة زين
اطلعت ببنتي نور
الاء:ماما خليكي هون شوي و برجع
ميرفت : هيدا اسنسير , عملناه كرمالو , بحال بدك تنزليه لتحت
الاء: اي
الجزء الخامس:
طلعت انا و الست ميرفت على الطابق التاني ,دقت دقتين على الباب و فتحتو ,انا فتت وراها
ميرفت:زين...زين
وقفت جنب ميرفت و ضربت الشمس بعيني , غمضت عيوني شوي و شفت هيئة شاب قاعد على كرسي متحرك و عاطينا ضهرو و انا كنت مفكرتو صبي عمرو بال 17 سنة
ميرفت :في حدا حابب يتعرف عليك
زين :ما بدي اتعرف على حدا ,خديه و اطلعي لبرا
اشرتلا بايدي لست ميرفت تطلع و تسكر الباب وراها و تتركني لحالي معو ,لبت رغبتي ميرفت بعد تردد مخيف ما عرفت سببو الا بعد لحظات قصيرة
زين : اغبيا
الاء:احم احم
زين : مين هون ؟
الاء:مين بدك يكون هون ؟ا
زين :ماااااا بدي حدا
الاء : معناها اعتبر انو ما في حدا
رحت قعدت على تختو انا و ساكتة و هو بقي داير ضهرو و صافن بالمنظر يلي ورا ازاز البرندا , بقينا على هالحالة نص ساعة حتى قمت انا و وقفت وراه حتى اتفرج على المنظر يلي سارح فيه
الاء:اللللله يا سبحان الخالق , هاي اول مرة بشوف هيك منظر حلو كتير , كيف اشعة الشمس ضاربة على سطح البحر ,بتعرف انو نعمة البصر هي النعمة يلي ما فينا بلاها
زين : ا طلعي برا
الاء: انا ما واقفة هون كرمالك , انا عم اتفرج على البحر , هاي اول مرة بشوفو , عمري 27 سنة و من قبل هاي اللحظة ما كنت شايفة البحر الا بالصور بس الواقع مختلف
زين: اطلعي شوفيه برا غرفتي
الاء: بظن انك انت اخد الاطلالة الافضل بالبيت
زين : عم قلك اطلعي لبرااااا , انقلعي
فتل لعندي و وجهو احمر ,و دفشني بعيد عنو هو و عم يصرخ فيني , مسك كاسة المي يلي كانت جنبو على الطاولة و ضربا بالحيط جنبي , نزلت على الارض متكسرة , انا ارتعبت و رجعت لورا بعد هيك تصرف مفاجىء من زين , اطلعت عليه انا و ما قادرة فتح عيوني من االشمس وطيت على الارض و قمت قطعة ازازة مكسورة و حطيتا بين ايدي و ضغطت عليا انا و عم قرب لعندو , كان شاب بعمر ال 23 سنة تقريبا, شعرو دهبي مصفف لورا و جمال عيونو زمرد ما فرقو عن جمال المنظر يلي كان سارح فيه و كانو عيونو اية بالجمال , ما ممكن حدا يطلع فين و ما يبقى اسير بسحرن
الاء: اطلع فيني منيح ,انا كل وضعك ما بهمني , مشلول اعمى اخرس شو ما كنت , انا ما اخصائية نفسية و ما معي شهادات ولا فتت جامعات و ما بعرف اصلا كيف برفعو من معنويات الشخص المكتئب و المجروح لانو انا اصلا مكتئبة و مجروحة , بس انا موجودة هون لاشتغل و اخد مصاري و عيش و عيش بنتي يلي ما الها غيري,يعني مضطرة اتحمل غضبك الطفولي حتى لو قلعتني مية مرة انا رح ابقى هون و للمرة الالف ما كرمالك , كرمال بنتي و ماطالبة منك تسايرني و تشفق علي لانو انا قوية كتير وما بدي شفقة حدا لدرجة بجرح حالي بايد و بداويها بالايد التانية
فتحت ايدي و تركت الازازة توقع مني و الدم عم ينزل على الارض و هو عم يطلع فيني مذهول
الاء: ... اسمي الاء
مديت ايدي لسلم عليه , مد ايدو بعد تردد و سلم
---------------------------------------------------------------------------------------------
سلمنا على بعض بالدم و كانو اتحدنا و صرنا جسم و روح وحدة ,غبش نظري حطيت ايدي على وجهي و بكيت بحرقة و وجع , هبت ريح قوية و انفتح الشباك ,مسحت دموعي و ضحكت
---------------------------------------------------------------------------------------------
الاء: و هلا عن اذنك , بدي غسل ايدي و لفا
برمت ضهري و فتحت الباب , شفت خيال الست ميرفت و بعدين سمعت صوت دعسات رجليا عم تنزل لتحت , لحقتا انا و شادة على ايدي , شفتا قاعدة جنب نور
الاء: بس وين الحمام ؟
ميرفت : من هون , خير شبا ايدك؟
الاء: وقعت الكاسة من ايدي و انا عم لم الازاز جرحت حالي
ميرفت ؛ سلامتك , رح جبلك شاش تلفيا
فتت غسلت ايدي و لفيتا ,بعدين طلعت لميت الازاز المكسور , كان زين بعدو بمحلو
الاء: بتوقع من جنتلمان متلك انو يعتذر مني على الشي يلي عملو معي من شوي
زين: ما عملت معك شي, انت يلي جرحتي ايدك بايدك
الاء: بس انت رميت الكاسة بوجهي و كنت رح تصيبني لو ما بعدت على جنب
زين: لا انا رميتا على الحيط
الاء: ما تبرر ,قول انك اكبر من انو تعتذر لوحدة بتشتغل عنكن
زين: لاا انا ما بفكر هيك
الاء : اممم واضح
زين: طيب , انا... بعتذر
الاء: حصل خير
مسحت الدم و نزلت , دلتني ميرفت على غرفتيي يلي كانت جنب غرفة زين ,فتت ضبيت تيابي و تياب بنتي نور ,بعدين انزلت لتحت و شفت رجال اربعيني اسمو ابو وفيق و معو صبي صغير اسمو معاذ و عرفت بعدين انو بكون ابنو ل ليث
ابو وفيق:فوت يلا غسل ايديك
الاء:يعطيك العافية
ابو وفيق: الله يعافيكي ,انت الاخصائية النفسية الجديدة؟
الاء: لا , يعني انا موجودة هون كرمال زين , بس ماني اخصائية
ابو وفيق : اهلا و سهلا فيكي
التفتت على صوت معاذ عم يحكي مع بنتي نور
معاذ: شو اسمك انت ؟
نور : نور
ابو وفيق: هاي بنتك
الاء: ايه
ابو توفيق:لله يخليلك اياها , هاي يا معاذ اجتك رفيقة تلعب معا و تحل عني شوي , ما عاد الك حجة لتروح معي على الارض
ميرفت : انا لازم روح , الاء ... زين صار مسؤوليتك طلي عليه كل شوي و شوفي شو لازمو , و هدول ادويتو ,و هاي ورقة مكتوب علين مواعيد الدواء, ما بدي وصيكي و ابو وفيق قول انت بتعرف شولازم تعمل
ابوفيق : اكيد اكيد
الاء: ما تاكلي هم
ميرفت:و بالنسبة لنور اذا بتحبي تحطيا بروضة ما في مشكلة
الاء: انشالله لتستقر اموري هون
ميرفت : يلا سلام
طلعت الست ميرفت من البيت و راحو نور و معاذ مع ابو وفيق مشوار على المزرعة و انا طلعت لعند زين , دقيت الباب دقتين و فتت ,كان ماسك قلم و قدامو دفتر,فكرتو عم يرسم , قربت عليه و شفتو عم يكتب , اطلع فيني نظرة عابرة و رجع حط عينو بالدفتر , فتحت باب البرندا ووقفت اتفرج على البحر
الاء: بتروح مشوار على البحر؟
زين:.....
و انا واقفة , شفت نور و معاذ و ابو وفيق عم يقطعو الشارع و رايحين على البحر , نادتلا صوت لنور و اشرتلا بايدي , ضحكت و ركضت هي و ماسكة ايد ابو وفيق ,رجعت فتت لجوا
الاء: اذا بتريد بدي كرسي , وين بلاقي ؟
زين : ليكو قدامك ما شايفتيه
الاء : اه عفوا ما انتبهت
اخدتو و حطيتو بالبرندا و قعدت بما يقارب الساعة الكاملة انا و شاردة و عم فكر بشغلي الجديد و باياد و باهلي و ردة فعلن على اختفائي لمدة اسبوع ,رجعت التفتت على زين , شفتو صافن بالبحر , انتبه علي ,انا ابتسمت و هو دار وجهو فورا
الاء: عم دايقك بقعدتي هون
زين: لا
الجزء السادس:
قمت وقفت و قربت لعندو و سحبت الورقة من بين ايديه
زين: اذا بتريدي هاتيا لهون
الاء: لحظة ...بس اقرأ .....
زين : هاتي الورقة لهون ....هاي خصوصيات , باي حق بتتصرفي هيك
قرب بكرسيه علي لياخد الورقة و انا رجعت فيا لورا انا و عم اضحك , وقت حسيتو عصب
الاء: طيب رح اعطيك اياها , بس توعدني اقرا يلي عم تكتبو باقرب فرصة لانو انا كمان بكتب
اعطيتو الورقة
زين : شو بتكتبي ؟
الاء: مذكراتي بس , ما يروح بالك للشعر والخواطر و هيك شي , هدول اكبر من امكانياتي
زين : بس تقرأيني مذكراتك , بقرأك كتاباتي
الاء: .........
زين : ما عجبك الاقتراح ؟
الاء: عجبني بس غير منصف , اذا قرات مذكراتي يعني صرت متل الكتاب المفتوح قدامك و بتعرف عني كل شي , ماضيي و حاضري و مستقبلي
زين : نفس الشي بالنسبة الي , كتاباتي رح تعريني قدامك
الاء: .....بفكر شي نهار
اطلعنا ببعض نحن و ساكتين , بعدين نزلت راسي و كسرت الصمت
الاء: جعت الا لسا ؟
زين : لا
رجع بالكرسي لمحل ما كان , و انا وقفت عم اطلع فيه , كان شكلو و بياضو الناصع اشبه بملاك الو جناحين , اشبه بضو الشمس , سمعت صوت بنتي نور
الاء : اجت نور
طلعت من الغرفة و ناديتلا صوت تطلع لعندي
الاء: فوتي هيدا زين , رح تصيري انت و اياه رفقات و رح تصيري تلعبو مع بعض
رد على حكيي زين بدون ما يلتفت لعنا
زين: ما بصير نكذب على الصغار و نوعدن بشغلات ما رح تصير حتى ما يخيب املن و نفقد ثقتن فينا
الاء: ما عم كذب , انا واثقة من يلي عم قولو
زين : احيانا الثقة الزايدة بتودي لعالم وردي ما بتشوفيه الا باحلام اليقظة
الاء: ماما روحي سلمي عليه
قربت نور لعندو و هي عم تطلع بالكرسي يلي قاعد عليه , فتل لعندا و اطلع فيا شوي , مدت ايدا نور , و سلمت عليه و باستو
الاء: في شبه بيني و بينا ؟
زين : ...كل الصغار بشبهو بعضن , البراءة بتوحد ملامحن , وين ابوا ؟
الاء: .... مسافر..... و ما رح يرجع ابدا, يلا خلينا ننزل ناكل ما جعتي
نور : ايه ..كتير كتير هالقد
الاء: زين شوي و برجع
زين : ما ترجعي
تجاهلت كلامو و نزلت , اكلو نور و معاذ بالمطبخ و انا حطيت الاكل لزين بصنية و طلعت لعندو
االاء : تفضل
زين : قلتلك ما جوعان هلا
االاء : طيب ,انا باكلو
طلعت على البرندا و حطيت الصنية على حضني و بلشت اكل
الاء : طيب كتير , ام وفيق طباخة ماهرة
اطلع علي و بعدين نزل نظرو على الصنية
زين : غيرت رايي , بدي اكل
قرب لعندي و اخد الصنية مني و حطا على حضنو , رجعت اخدتا منو
الاء : هاي صارت الي , بس خلص اكل بطلعلك وحدة
رجع سحبا مني و انا مسكتا , هو يشدا لجهتو و انا شدا لجهتي
زين : هاي جاي على اسمي
الاء : و انت دللت و انا اخدتا , طيب خلص خدا و انا بنزل باكل بالمطبخ
زين : خلص كلي معي , انت خدي معلقة الشوربة و انا معلقة الفريكة
الاء: .....طيب , أي ساعة بترجع امك من الشغل؟
زين : ما بطول , المعمل قريب من هون
الاء: معمل شو؟
زين: معمل علب عصير فريش , اكيد انتبهتي على شجر البرتقان انت و فايتة لهون
الاء: أي لفتولي نظري بس ليش انت ما بتروح مع امك على المعمل؟
غص بالاكل و صار يسعل , ركضت جبتلو مي , شرب الكاسة و اعطاني اياها بدون ما يطلع فيني و كانو عم يتهرب من الاجابة , انا سكتت و ما رجعت طالبتو باي توضيح ,كملنا اكل نحن و ساكتين , خلص اول نهار الي بالشغل , على الساعة 8 اجا ليث لياخد ابنو معاذ
ليث : كيف شفتي الوضع ؟ انشالله مقبول؟
الاء: ايه ,لحمدلله , ماشي الحال لحد الان
ليث: اخد و اعطى معك ؟
الاء: أي شوي
اخد ليث ابنو و راح و انا فتت على غرفتي نيمت نور و فتت لعند زين لشوف اذا لازمو شي, شفت ابو وفيق عندو ,رحت لزبطلو تختو لينام , كان في سلسلة نازلة من السقف لفوق التخت , خمنت اانو بيستخدما زين ليرفع حالو و يجلس قعدتو
الاء: يعطيك العافية ابو وفيق, انا بكمل
قربت لعندو
الاء : حط ايدك على كتفي كرمال وصلك على التخت
زين : وين امي ؟
الاء: عم تعمل شوية حسابات للشغل و بعدين هالشغلات صارت من مهامي و أي شي بدك اياه اطلبو مني , انت بمثابة اخي الصغير , ييلا ...اذا بتريد ....اكلنا من نفس الصحن ما في داعي لترسم حواجز بيناتنا
قربت الكرسي على التخت ,بعد تردد , حط ايدو على كتفي و استند علي
االاء: اممم منيح فيك تحط تقل على رجليك
زين :ايه شوي
حسيتو عم يضغط على حالو كتير و اول ما قربنا على التخت , انرمى عليه و هدى فيني و شدني , وقعت فوقو , قمت عنو انا و عم اضحك و هو متلبك , حاولت اخد الموضوع بروح رياضية حتى ما يدايق , حط ايد على التخت و مسك بايدو التانية السلسلة و جلس قعدتو انا و عم ساعدو
الاء: ما بدك تنام ؟
زين : لا ما هلا , روحي نامي انت
الاء: ماشي , أي شي لزمك دقلي على الحيط المشتركة بيناتنا
انا و طالعة من عندو , شفت الست ميرفت
ميرفت : ممكن نحكي شوي ؟
الاء: أي تفضلي
نزلنا على الصالون
ميرفت:كيف شفتيه لزين؟
الاء:هلا انا ما مختصة نفسيا حتى اقدر قيم و ما بفهم بهيك امور بس زين ما بدو حدا يعاملو على انو مريض ما بدو حدا يتعاطف معو او يشوف الشفقة بعيون الناس ,.ما بدو يحس حالو عالة على حدا او يلبك حدا فيه
ميرفت : انا جبت مختصين من قبل و كان يرفض يتعامل معن و يصرخ و يقلعن , و انا حسيت انو انت من اول يوم قدرتي انو تتعاملي معو
الاء : أي تقريبا
ميرفت :هو نفد من هالحادثة باعجوبة , انا ما رح اطلب منك تنامي معو بنفس الغرفة ما بدي احرجك بس لو بطلي عليه كل ساعتين بالليل اذا لزمو شي و هو لازم يغير نومتو كرمال ما يصير ضغط على جنب واحد , عرفتي لهيك بتمنى ...
الاء: ولايهمك, تكرم عيونك , هاي شغلتي
ميرفت: ماشي
بعد يومين من شغلي , فتت لعند زين بهدوء على الساعة 2 بالليل حتى اتفقدو , شفتو حاطط ايديه تحت راسو و صافن بالسقف
الاء:مسالخير
زين : مسالنور
الاء: توقعتك نايم
زين: ما جايني نوم و انت شو مفيأك ؟
الاء: كمان ما اجاني نوم
قربت و قعدت على الكرسي
الاء: انا ...لمحت عكازات بخزانتك , ليش ما بتستخدمن ؟
زين : ما بحبن و صعب المشي فين
الاء: كل شي بكون اولو صعب و بعدين الواحد بيتعود
زين : انت من هون ؟
الاء: لا انا من الشام
سحبت الكرسي و قعدت قبالو
زين : اممم و ليش جاي لهون من شو هربانة ؟
الجزء السابع:
الاء(متلبكة):......انا ...ولا من شي
زين : ليش تغير وجهك ؟
نزلت نظري على الارض
الاء: شو عرفك انو هربانة من شي؟
زين : من عيونك , في خوف بعيونك , كل ما بطلع فيكي بتهربي بنظرك و كانك خايفة اقراك
جلس قعدتو و لف ايديه على صدرو
الاء:....... بتهيالك
زين : طب ركزي بعيوني وما ترمشي
ركزت بعيونو و انا عم اضغط على اعصابي , نزلو دموعي و بعدين درت وجهي على باب البرندا و انا عم مسح عيوني بايدي
زين :......من شو خايفة؟
الاء: انت يلي خايف , أنت يلي حابس حالك بغرفة و خايف تطلع تواجه العالم يلي برا بكرسي بدولابين , وو انت يلي هربان من انك تواجه حالك و خايف تمشي خطوة بالعلاج ...
زين : صح .....صح ...نحن الاتنين منشبه بعض ,نحن الاتنين خايفين
الاء:......
زين :...
الاء: زين الاعاقة ما بتكون بالجسم بس , في ناس افكارن معاقة و عم يعيقو حياة غيرن, صدقني انا مر بحياتي ناس كتير عندن هالنوع من الاعاقة و هي اخطر نوع لانو بتأذي الغير , صح انا خايفة وهربانة بس هربانة لعيش حياة فيا كرامة , كرامتي يلي فقدتا من سنين و تاخر الوقت كتير لاخدت هالقرار و هربت , ما ندمانة انو انا هون بهالبيت و بهالغرفة و قاعدة على هالكرسي قبالك ,بس ندمانة على الطريقة يلي وصلت فيا لهون اما انت هربان من الحياة و حاطط حالك بحبس , اطلع و شوف الدنيا , شوفا من عيونك متل ما المفروض تشوفا و ما تشوفا من رجليك
زين : .....من مين هربانة ؟
الاء: هربانة من الظلم و الاستغلال و الضعف و الصمت , شوف اطلع علي (تقف) ليكني بقدر اوقف و امشي على رجلي بس انا كنت ضعيفة كتير و حركتي مشلولة كنت متل االمقيدة كنت متلك ,ما قادرة امشي خطوة لقدام , كل ما فكر امشي كنت خاف و احسب حساب حكي الناس و نظرتن الي , اكيد رح ينظرولي على اني ناقصة
زين :و هلا انت شايفة حالك قوية , الهروب ما قوة , الهروب من المواجهة ضعف
الاء: ....يمكن , صح انا ضعيفة , هاي عم اعترف بهالشي و انت اعترف انك ضعيف و اعترف انك مريض و بحاجة لعلاج , اعترف انو يلي صار معك ما بايدك و انو الحادثة قضاء و قدر , و انو ابوك خلص عمرو بيومو ,و انت ما دخلك
بعد نظرو و شرد بالحيط قبالو و دمعو عيونو
الاء: اكيد ابوك ما رضيان عن حالتك هيك , لازم تكون قوي و تتعالج و تكمل حياتك و تستلم شغلو و اضل محافظ على اسمو , امك لحالا ما بتقدر تقوم بكل هالمسؤولية لحالا و حتى لو ما مشيت , فيك تكمل حياتك هيك , انا ما عم اضغط عليك و حملك شي فوق طاقتك لانو هالشي انت بتقدر عليه .....
زين :الحكي سهل , انت ما بتعرفي شو يعني تكوني بالمشفى و يخبروكي انو صرتي مقعدة و ابوكي مات , خبرين بنفس اليوم و الحقيقة الابشع انو انا يلي كنت سايق السيارة , هو ما كان بدو اياني سوقا لانو كنت لسا عم اتعلم ....هو ما كان بدو يموت .....انا قتلتو ...(يبكي)..هو مات و انا بقيت عم اتعذب ....االشعور بالذنب و الندم عم ياكلني كل يوم ....عم اشتقلو ...كان رفيقي واخي و ابي ...خسرت كل العالم وقت خسرتو .... ما بدي عيش بلاه ...ما اعطوني وقت ازعل عليه , خنقوني بالادوية و الاجهزة فورا
قربت لعندو و قعدت جنبو على التخت و لفيتو و طمر راسو بحضني و انفجر بالبكا
زين : هاي اول مرة ببكي عليه من قلبي .... ما عم اقدر اطلع بوجه امي ...حتى ما عم اقدر اطلع بوجهي بالمراية ....ما عم اقدر كمل حياتي و انا هالقد تعبان و حامل كل الهم بقلبي.....انا تعبان تعبااااان و تعبت الناس يلي حولي
الاء: .........
زين : راح و تركني على كرسي ...بقدر عيش كل العمر بلا رجلين بس ما بقدر عيش بهالذنب , قطع كل شهيتي للحياة , موتني و انا بعدني عم اتنفس
بقي زين عم يحكي و يبكي لساعة و اكتر , حتى تعب و نام , غطيتو بالحرام و انا عم اطلع عليه , كان متل الولد الصغير , سكرت الضو و طلعت, رجعت بعد ساعتين كان نايم
...........يتبع غدا بمنشور جديد
انا بكل مرة بقدم المرة كيف بتقدر تحتوي زوجا و تصلحو , بهاي القصة قدمت العكس ,كيف المرة بتنزع اخلاق زوجا بالسكوت عن اغلاطو و لعب دور الرجل , و كل هالتراكم و الكبت بيودي للانفجار غير المحمود .
الجزء الاول:
اياد:ليش لهلا ما خلص الاكل و ليش ما كابة الزبالة و انت رايحة على شغلك اليوم ....شبك ساكتة ....ردي...حتى بلوزتي الزرقاء ما غسلتيا لهلأ!!!
الاء:خلص لهون وبس ,ما بقا قادرة اتحملك اكتر من هيك , تعبببت
اياد:انت جسمك عم يحكك و صار بدك قتلة
الاء:تعااا يلااا اضربني
اياد:جاااي طولي بالك علي
كنت واقفة بالمطبخ وعم فرم بصل للمجدرة,ركض علي متل التور الهايج و انا حسيت حالي فقدت السيطرة على اعصابي وانفجرت متل البركان ,كبت كل الست السنين طلع ب لحظة وحدة ,مسكت السكينة و شكيتا ببطنو,حسيت بشي سخن على يدي , شفت الدم و خفت ,سحبت السكينة من بطنو فورا و زتيتا بالارض ,رجعت لورا انا و عم اتفرج عليه و عم اطلع على ايدي,حط ايدو على بطنو
اياد:شششششووووو عملتي؟
الاء:اييياااد
وقع على الارض و هو عم ينزف و انا وطيت لعندو
الاء(تبكي):يا ربي ششو عملت !!!!!اياااد اياااد
غاب عن الوعي و انا عم اصفقو على وجهو ليصحى ,رن جرس بيتي,قمت انا و متوترة و مشيت فوق سكربينتي على دمو حتى انتبهت ,شلحتا و زتيتا ,اجت على راسو
الاء: نور ....يا ربي اجت نور من الروضة
سكرت باب المطبخ و ركضت على الباب انا و عم مسح الدم بتيابي و فتحتو انا و متوترة
الاء:اهلين ماما...فوتي ...تعي معي
اخدتا على غرفة النوم و دخلتا و سكرت الباب,رجعت على المطبخ و فتحت الباب,شفت اياد بعدو بمحلو و ما في اي ردة فعل منو لا حركة و لا صوت و لا حتى نفس و يعدو عم ينزف دم,رجعت ركض على غرفة النوم ,غيرت تيابي و نزلت الشنتاية من فوق الخزانة و بلشت ضب تيابي و تياب نور و اخدت كل اوراقي المهمة ودفتر مذكراتي , مسكت ايد بنتي و نزلت من البيت بدون ما ارجع التفت لوراي ابدا ,وقفت تكسي و طلعت انا و عم ارجف و مخطوف لوني
الاء:على كراجات البولمان اذا بتريد
كنت طول الطريق عم اتلفت وراي و كانو حدا عم يلحقني ,نزلت و انا و ماسكة بنتي من ايد و بالايد التاني شنتاية السفر ,فتت على مكتب حجوزات
الاء:اذا بتريد احجزلي مقعد
العامل:على وين ؟
الاء:.....لوين....شو البولمانات يلي طالعة هلا؟
العامل :في بولمان بعد عشر دقايق نازل على اللادقية و في واحد على حلب بعد نص ساعة
الاء:احجزلي على اللادقية
العامل :تكرمي
الاء:يعطيك العافية
طلعت من المكتب و فتت على الحمامات العامة ,غسلت وجهي ,و اطلعت على ايدي كانو بعدن عم يرجفو,غسلتن عشر مرات بالصابونة,كنت عم شم ريحة نتنة منن و كانو كنت ماسكة شي نجس بايدي بس ما استغربت ,دم اشباه الرجال ريحتو بشعة بحكم انو الندالة بتجري بمجرى دمن, طلعت من الحمام انا و بنتي نور يلي كانت عم تتفرج و ساكتة ,طلعت بالبولمان و قعدت بالمقعد و حطيت بنتي على حضني,كنت ما مصدقة ايمت يمشي البولمان حتى حس حالي اني صرت بامان,بلشت الناس تطلع فيه حتى تعبى و مشي ,ارتحت كتير ,طالعت موبايلي من جزداني و اتصلت بالاسعاف ....
الجزء التاني :
اعطيتن عنوان بيتي و كان بدي خبرن عن حالتو بس انتبهت انو اطلع فيني الرجال يلي كان قاعد جنبي و رجع دار وجهو ,تلبكت و سكرت الخط فورا و طالعت الشريحة و كسرتا انا و عم فكر اذا اياد ممكن يكون مات او سيارة الاسعاف رح تنقذو حتى سمعت صوت بنتي نور الناعم
نور :ماما انا جوعانة
الاء:هلأ ماما بس ننزل على اول استراحة مناكل
مجهول :تفضلي
الاء:لا يسلمو
مجهول :اذا بتريدي خديا ,لسا معي وحدة
الاء:شكرا الك
اخدت البسكوتة من الرجال يلي كان قاعد جنبي و اعطيتا لبنتي نور كان شاب بعمر ال 33 سنة تقريبا ,بنيتو ضخمة كان لابس قميص ابيض و بنطلون اسود و مسرح شعرو الاسود بطريقة مرتبة ,كان انيق بشكل ملفت للنظر
مجهول :شو اسمك يا حلوة
نور: اسمي نور
مجهول :عاشت الاسامي انا اسمي ليث,شو عمرك؟
نور:5 سنين
ليث:العمر كلو
اطاع فيني و ابتسم
ليث :الله يخليلك اياها
الاء:تسلم يا رب
ليث:انت من اللادقية الا الشام ؟
الاء:من الشام
ليث:انا من اللادقية
الاء:تشرفنا
بعد ساعتين نزلنا بالاستراحة ,فتت انا و نور على الحمام بعدين اطلعت اشتريت بسكويت و عصير و قعدنا على الطاولة شوي , كان قاعد ليث على صفنا , اطلع بنور وابتسم و مد ايدو و اعطاها بسكوتة تانية ,اخدتا نور و رجعت لعندي ,رجعنا قعدنابالبولمان و تابعنا رحلتنا على محافظة ما زرتا ولا مرة من قبل و لا بعرف فيا حدا ابدا
الاء:ممكن سؤال
ليث:تفضلي
الاء:بما انو انت من اللادئية,يعني انا صراحة هاي اول مرة بدي روح عليا و ما بعرف شي فيا ابدا ,بدي تعطيني اسم فندق رخيص
ليث:اي تكرمي
طالع ورقة و قلم من شنتايتو و كتبلي عليا قائمة باسماء الفنادق الرخيصة
ليث:تفضلي
الاء:يسلمو كتير
ليث: و كتبتلك رقمي باخرة الورقة بحال احتجتي اي شي ,فيكي تتصلي و تساليني
الاء:ماشي كلك ذوق
ليث:انت نازلة سياحة ؟
الاء:..ايه ...تقريبا و بدي شوف اذا لقيت شغل فيا رح اشتغل
ليث:ولله يعني احتمال تستقري هون
الاء:...ممكن
ليث:شو معك شهادة؟
الاء:...ما معي ...شهادة بكالوريا ادبي بس و ما كملت جامعة
ليث:اممم شو حابة تشتغلي؟
الاء:اي شي
ليث: طيب انا عندي وظيفة بس ما بعرف اذا بتناسبك و بتناسب الطرف التاني
الاء:شو هي ؟
الجزء التالت :
ليث:انا عندي ابن اختي عمل حادث من سنة تقريبا و الحادثة سببتلو رضوض بالنخاع الشوكي و هالشي عملو شلل برجليه ,يعني فيكي تقولي مقعد و بدو مين يعتني فيه
الاء:ايه؟
ليث:و تابع فترة على العلاج وتحسن شوي و صار بيقدر يتحكم بمثانتو و يحط شوية تقل على رجليه بس بعدين وقف علاج و انعزل عن العالم و حبس حالو بغرفتو و امو عم تحاول اطلعو من يلي هو فيه بس ما عم تقدر,و كل ما تجبلو حدا يساعدا فيه بتصيبو نوبات غضب ,و بقلا ما بدي حدا يشوفني هيك و يشفق علي
الاء:اووه الله يشفيه يا رب , بس اذا تحسن ليش وقف علاج؟
ليث: كانو عذبو ضميرو بس حس حالو انو ممكن يرجع يمشي و يتابع حياتو لانو الحادثة .....على كل حال انا ما بدي فوت بهيك تفاصيل هون ,بقا اذا انت بتشوفي حالك خرج تقومي بهالمهمة ,رقمي صار معك,حكيني و طبعا المنامة ببيت اختي ,بيتا كبير و طابقين
الاء:طيب بس انا يعني متل ما شايف معي بنت صغيرة ,ما بعرف اذا بناسبا لاختك هالشي
ليثء:انا رح خبرا عنك و انت فكري....
الاء:انا موافقة
ليث:طيب ممتاز معناها اعطيني رقمك
الاء:انا بحكيك بعد يومين و بشوف شو صار معك
ليث:اوك ماشي ,ما عرفت اسمك؟
الاء:اسمي ...اسمي...الاء
ليث:حضرتك متزوجة؟
الاء(مرتبكة):أي , لا , قصدي يعني كنت متزوجة,انا هلأارملة
ليث:اممم شو عمرك؟
الاء:27 سنة
ليث:العمر كلو انا 35 سنة وكنت متزوج ,انا مطلق حاليا
الاء:عندك اولاد؟
ليث:ايه ,عندي صبي واحد عمرو 10 سنين
الاء:الله يخليلك اياه ,هو معك الا مع امو؟
ليث:تسلمي يا رب,هو معي ,امو متزوجة برا البلد بس تركتو عند عمتو ميرفت بسفرتي على الشام,هاي وصلنا
صف البولمان و بلشو الناس ينزلو ,نزل ليث و انا نزلت وراه انا و بنتي نور,اخدت شنتايتي ومشيت ورا الناس حتى طلعت من الكراج,وصلت على الشارع الرئيسي و بدي اخد تكسي , لمحت ليث عم يسوق سيارة ,وقف جنبي و نزل ازاز الشباك
ليث :الاء ...اطلعي لوصلك بطريقي
الاء:لا شكرا باخد تكسي و بتابع لحالي
ليث:ماشي ,ناطر اتصالك
الاء:ماشي ,الله معك
وقفت تكسي و طلعت و قلتلو للشوفير اسم فندق من الورقة يلي اعطاني اياها ليث ,وصلت على الفندق ,حجزت غرفةلمدة يومين,حطيت تيابي بالغرفة و نزلت لاشتري سندويش لاكل انا و نور ,شفت محل فلافل ,اشتريت سندويشتين و انا راجعة فتت على محل موبايلات و اشتريت شريحة ,انا و واقفة عندو ,ضربت عيني على التلفزيون و شفت المذيعة عم تعطي نشرة الاخبار المحلية ا
المذيعة :زوجة تطعن زوجها بمنطقة البطن و تفر هاربة لتتصل بعد ساعة و تتطلب له سيارة الاسعاف ,مصادر من المشفى اطلعتنا على حالة الزوج الحرجة جدا ....
صار كل يلي بالمحل يضحكو على الخبر
-لا حنونة قتلتو للزلمة و بعدين طلبتلو الاسعاف
-هدول النسوان ما الن امان ,بيطعنوك اول ما تبرملن ضهرك
اختنق صوتي,اخدت الشريحة و طلعت بسرعة من المحل ,وقفت سندت على الحيط انا و عم ابكي و خايفة انو يموت اياد و انلقط و اتحاكم مؤبد, رجعت على الفندق و بقيت فيه ما كنت اطلع منو الا اذا بدي اشتري اكل , كنت كل يوم حط راسي على المخدة بالفندق , اتذكر اياد و كيف قتلتو و كيف اطلع فيني هو و عم يتوجع و كيف وقع على الارض و تذكرت ايامي انا و اياه اول ما خطبنا و اول ما تزوجنا ,كنت قوم من نومي و افتح دفتر مذكراتي و اكتب , ليش وصلنا لهون و كيف وصلنا ما بعرف, يمكن الغلط مني او منو , قعدت مع حالي انا و عم راجع حساباتي مع حالي و احسب انا شو عطيت بهالزواج و شو اخدت ,و اتذكر مواقف كتيرة بيني و بين اياد يلي كان كل سنة عن سنة عم يصير اسوأ و يعاملني متل الجارية و انا اتحمل و اصمت الصمت القاتل, كان فترة الاسبوع كفيلة الي بانو اعرف انو صمتي الو يد بالمعاملة يلي صار اياد يعاملني اياها و خاصة بالسنوات الاخيرة ,بتذكر نصائح امي الذهبية يلي متوارثتا من اما و اجدادا وقت قعدت معي قبل عرسي بيومين
ام كريم: يا بنتي لازم تصبري على زوجك بالحلوة و المرة و ما طالبيه ابدا فوق طاقتو و حاولي تصوني قرشو و ما تقصري اتجاهو ابدا حتى لو مرضتي ما تبينيلو ابدا انك مريضة و الرجال بحب المرة يلي بدللو ما يلي بتدلل عليه اوعى ترفعي صوتك و ما تسمعي الناس فيكيو ما تخالفيه بالراي , على كل شي قليلو امرك تاج راسي,اذا عصب ما تردي بوجهو ابدا , و معلش سايريه بالكلمة الحلوة و ما تخليه ينام زعلان منك و ما غلط انك تتنازلي و تراضيه حتى لو الحق معك بالاخير ما في كرامة بين المرة و زوجا
مافي كرامة بين المرة و زوجا هيدي كانت اخطر نصيحة اعطتني اياها امي و ودتني للهلاك او يمكن الغلط مني اني اسات فهم كل هالنصائح يلي طبقن بحياتي الزوجية و زيادة ,كنت بعشقو لاياد و بتنفسو و لو حتى قلي اللبن لونو اسود كنت رح قلو اسود من الليل , و رغم انو كانت امو تتحكم فيني كيف بدي عيش و ايمت فيق و ايمت نام حتى تفرض علي خدمتا 7 ايام بالاسبوع , كنت نفذ من تم ساكت كرمال زوجي بس بعد ما حبلت ببنتي نور و كان وحامي صعب , خفت زياراتي لعندا و و علقت انا و اياد من ورا هالموضوع و ضربني لاول مرة و جبرني روح و اعتذر من امو , سكتت و رجعت اشتغل بخدمة حماتي , بس رجع بعد فترة ضربني مرة تانية ليش ما رحت لعند اختو و ساعدتا بعزومة بيت احمى بنتا و انا كنت ولدانة من شهر و نص بس , صار يضربني بكل مرة بتكون فيها حماتي او حدا من بنات حماي ما رضيانين علي, و انا اسكت و سامح و ساير على حسابي و كرمال بنتي ,باالسنة التالتة من زواجي مر زوجي بظروف مادية صعبة و انكسر و صار عليه ديون وبعتلو دهبي و ما كفاه , تبرعت بانو ادينلو من اهلي بعد ما كل اهلو سحبو ايدن و رفضو يدينوه, وبقي سنتين يماطل بدين اهلي مع انو وضعو تحسن و وقف على رجليه و طالبتو كتير و اكلت ضرب كتير كرمال هالموضوع حتى قررت اشتغل و سدن مع انو هو ما بحب شغل المرة بس وقت خبرتو انو رح اشتغل لسد دينك وافق فورا, صرت اشتغل بمحل حلويات حتى سديتن لاهلي كل دينن على مدة سنتين , بعد السنتين بقيت عم اشتغل و حط كل راتبي على البيت و شاركو بدفع فواتير الهاتف و الكهربا و المي ,حتى بلش يسحب ايدو من كل شي حتى اتبرى من مسؤولية البيت و اعطالو و متطلباتو , كان أي شي يعطل بالبيت اركض صلحو فورا بدون ما ادخل بنقاش معو, حتى اللمبة المحترقة و جرة الغاز كنت انا بدلن و ,وصلت لمرحلة صرت كب الزبالة وقت بنزل على شغلي الصبح كرمال ما يوسخ ايديه و يخرب منظرو , بعد كل هالشي يلي عملتو كرمالو اكتشفت انو عم يخوني مع صبية عمرا 20 سنة و وقت واجهتو ,اول جملة قلي اياها
اياد:ليش انت معتبرة حالك انثى ههههههههه, انت محسوبة علينا
بعد كل شي قدمتو, بعد كل هالتنازلات ,بعد كل هالتعب , اتهمني بانوثتي و خاني, كنت غبية بجدارة , لعبت دور ما الي و دعست على حالي و كرامتي و كرمال شو ؟ كرمال يقول عني زوجة مثالية و بطلة , كرمال يزقفلي و يثني على قوتي و قدرة تحملي او لانو كرمال عبي محلو الفاضي , بقيت هالجملة يلي كانت متل الكف على وجهي عم طن بداني لحد هلأ, لحد الوقت يلي انفجرت فيه و طلعت عن صمتي و قتلتو, قتلتو حقد و كره سنين حابستن بقلبي , تركت القلم و اطلعت على ايدي و رجعت رفعت راسي , اطلعت على الشوارع و الناس , فتحت الشباك و تنفست ,حسيت حالي ما زعلانة من فكرة انو اياد ممكن يكون ميت هلا بس كنت خايفة انو انحبس و اترك نور لحالا بلا ام و بلا اب , التفت على نور و شفتا نايمة , بكيت كتير بعدين لبست علي و نزلت على السوبر ماركت القريبة من الفندق
الاء: ممكن الهاتف شوي
حطيت السماعة على داني انا و متوترة و مترددة و عم اضرب باصابعي على السماعة و عم ارجف و ايدي التانية على قلبي يلي عم يخفق بسرعة و اتصلت فيه ,كنت خايفة اسمع صوتو بس كنت بتمنى اسمعو حتى ارتاح .......
الجزء الرابع:
رد علي بصوتو المقزز
اياد: الوو.....الو....ردو ...مين معي
سكرت الخط بوجهو و انا عم ابتسم
الاء: متل القط بسبع ارواح
انبسطت كتير انو بعدو عايش , اطلعت على الفندق انا و حاسمة امري و اتصلت ب ليث كرمال اسالو عن الوظيفة
ليث:اهلين الاء كنت ناطر اتصالك ,انا حكيت اختي و ما عندا مشكلة
الاء:منيح ,ايمت بقدر بلش؟
ليث:ايمت ما بدك ,اذا بدك بكرا بجي باخدك على البيت , بيت اختي صاير بالريف تقريبا ما بنص البلد
الاء:اي احسن ,...انا ما بحب زحمة البلد
ليث:ماشي موعدنا بكرا انشالله
تاني يوم اجا ليث بسيارتو و طلعت انا و نور ,بعد 45 دقيقة وصلنا ,نزلنا من السيارة ,نزل ليث و حمل شنتايتي
ليث:تفضلي من هون
كان البيت عبارة عن طابقين و حولين البيت شجر برتقان و زيتون
نور:ماما وين نحن؟
الاء:نحن جاين زيارة عند خالتو رح نقعد هون فترة
فتت على البيت انا و متلبكة ,استقبلتني من الباب مرة اربعينية ,بيضا,عيوناعسليات فاتحين وممشوقة القامة مرتبة شعرا بطريقة ناعمة و بسيطة
ميرفت:تفضلي اهلا و سهلا ,انا اختو ل ليث ,اسمي ميرفت
الاء:اهلين فيكي انا الاء و هاي بنتي نور
فتت قعدت على الكنباية بالصالون و انا عم اطلع حولي , حط الشنتاية ليث و استأذن و راح
ميرفت:انا حابة احكي معك عن وضعو لزين قبل ما تتعرفي عليه حتى تعرفي كيف تتعاملي معو
الاء:تفضلي بس انا عندي فكرة بسيطة من ليث
ميرفت:تمام , ابني زين حساس كتير و بعد ما صار معو هالحادثة و الكل تعاطف معو ,حس حالوا نو صار موضع شفقة للعالم و الشي يلي تعبو اكتر انو معتبر حالو هو المسؤول عن وفاة ابوه لانو هو يلي كان سايق السيارة و نفسيتو بتهمني لانو النفسية الا دور كبير بالعلاج و انا امو حاولت كتير لطلعو من اكتئابو حتى جبت ناس مختصين نفسيين بس رفض يتعاطى معن و يقعد معن ,الو ما يقارب الشهرين ما طلع من غرفتو
الاء:الله يرحمو لزوجك, البقية بحياتك
ميرفت:تعيشي,لهيك انا بدي منك طولي بالك عليه
الاء:رح حاول بيلي بقدر عليه بس ممكن اعرف شو مهمتي بالضبط؟
ميرفت:بدي تعتني فيه ,انا ما كل الوقت بالبيت لانو بعد ما مات زوجي انا استلمت الشغل من بعدو و طبعا ما رح تكوني لحالك ,في ابو وفيق يلي بشتغل بالارض و هو يلي بفوتو عالحمام و في مرتو ام وفيق هيدي مهمتا البيت و الطبخ , انت بس بدي تعطيه ادويتو بانتظام وتبقي جنبو بحال لزمو شي , و تسايريه لانوا كيد عم يعاني من الوحدة
الاء:ماشي
ميرفت:بالنسبة للراتب ...
الاء:ست ميرفت خليني جرب بالاول بعدين منحكي بالراتب
ميرفت:ماشي حياتي ,تفضلي معي على غرفة زين
اطلعت ببنتي نور
الاء:ماما خليكي هون شوي و برجع
ميرفت : هيدا اسنسير , عملناه كرمالو , بحال بدك تنزليه لتحت
الاء: اي
الجزء الخامس:
طلعت انا و الست ميرفت على الطابق التاني ,دقت دقتين على الباب و فتحتو ,انا فتت وراها
ميرفت:زين...زين
وقفت جنب ميرفت و ضربت الشمس بعيني , غمضت عيوني شوي و شفت هيئة شاب قاعد على كرسي متحرك و عاطينا ضهرو و انا كنت مفكرتو صبي عمرو بال 17 سنة
ميرفت :في حدا حابب يتعرف عليك
زين :ما بدي اتعرف على حدا ,خديه و اطلعي لبرا
اشرتلا بايدي لست ميرفت تطلع و تسكر الباب وراها و تتركني لحالي معو ,لبت رغبتي ميرفت بعد تردد مخيف ما عرفت سببو الا بعد لحظات قصيرة
زين : اغبيا
الاء:احم احم
زين : مين هون ؟
الاء:مين بدك يكون هون ؟ا
زين :ماااااا بدي حدا
الاء : معناها اعتبر انو ما في حدا
رحت قعدت على تختو انا و ساكتة و هو بقي داير ضهرو و صافن بالمنظر يلي ورا ازاز البرندا , بقينا على هالحالة نص ساعة حتى قمت انا و وقفت وراه حتى اتفرج على المنظر يلي سارح فيه
الاء:اللللله يا سبحان الخالق , هاي اول مرة بشوف هيك منظر حلو كتير , كيف اشعة الشمس ضاربة على سطح البحر ,بتعرف انو نعمة البصر هي النعمة يلي ما فينا بلاها
زين : ا طلعي برا
الاء: انا ما واقفة هون كرمالك , انا عم اتفرج على البحر , هاي اول مرة بشوفو , عمري 27 سنة و من قبل هاي اللحظة ما كنت شايفة البحر الا بالصور بس الواقع مختلف
زين: اطلعي شوفيه برا غرفتي
الاء: بظن انك انت اخد الاطلالة الافضل بالبيت
زين : عم قلك اطلعي لبرااااا , انقلعي
فتل لعندي و وجهو احمر ,و دفشني بعيد عنو هو و عم يصرخ فيني , مسك كاسة المي يلي كانت جنبو على الطاولة و ضربا بالحيط جنبي , نزلت على الارض متكسرة , انا ارتعبت و رجعت لورا بعد هيك تصرف مفاجىء من زين , اطلعت عليه انا و ما قادرة فتح عيوني من االشمس وطيت على الارض و قمت قطعة ازازة مكسورة و حطيتا بين ايدي و ضغطت عليا انا و عم قرب لعندو , كان شاب بعمر ال 23 سنة تقريبا, شعرو دهبي مصفف لورا و جمال عيونو زمرد ما فرقو عن جمال المنظر يلي كان سارح فيه و كانو عيونو اية بالجمال , ما ممكن حدا يطلع فين و ما يبقى اسير بسحرن
الاء: اطلع فيني منيح ,انا كل وضعك ما بهمني , مشلول اعمى اخرس شو ما كنت , انا ما اخصائية نفسية و ما معي شهادات ولا فتت جامعات و ما بعرف اصلا كيف برفعو من معنويات الشخص المكتئب و المجروح لانو انا اصلا مكتئبة و مجروحة , بس انا موجودة هون لاشتغل و اخد مصاري و عيش و عيش بنتي يلي ما الها غيري,يعني مضطرة اتحمل غضبك الطفولي حتى لو قلعتني مية مرة انا رح ابقى هون و للمرة الالف ما كرمالك , كرمال بنتي و ماطالبة منك تسايرني و تشفق علي لانو انا قوية كتير وما بدي شفقة حدا لدرجة بجرح حالي بايد و بداويها بالايد التانية
فتحت ايدي و تركت الازازة توقع مني و الدم عم ينزل على الارض و هو عم يطلع فيني مذهول
الاء: ... اسمي الاء
مديت ايدي لسلم عليه , مد ايدو بعد تردد و سلم
---------------------------------------------------------------------------------------------
سلمنا على بعض بالدم و كانو اتحدنا و صرنا جسم و روح وحدة ,غبش نظري حطيت ايدي على وجهي و بكيت بحرقة و وجع , هبت ريح قوية و انفتح الشباك ,مسحت دموعي و ضحكت
---------------------------------------------------------------------------------------------
الاء: و هلا عن اذنك , بدي غسل ايدي و لفا
برمت ضهري و فتحت الباب , شفت خيال الست ميرفت و بعدين سمعت صوت دعسات رجليا عم تنزل لتحت , لحقتا انا و شادة على ايدي , شفتا قاعدة جنب نور
الاء: بس وين الحمام ؟
ميرفت : من هون , خير شبا ايدك؟
الاء: وقعت الكاسة من ايدي و انا عم لم الازاز جرحت حالي
ميرفت ؛ سلامتك , رح جبلك شاش تلفيا
فتت غسلت ايدي و لفيتا ,بعدين طلعت لميت الازاز المكسور , كان زين بعدو بمحلو
الاء: بتوقع من جنتلمان متلك انو يعتذر مني على الشي يلي عملو معي من شوي
زين: ما عملت معك شي, انت يلي جرحتي ايدك بايدك
الاء: بس انت رميت الكاسة بوجهي و كنت رح تصيبني لو ما بعدت على جنب
زين: لا انا رميتا على الحيط
الاء: ما تبرر ,قول انك اكبر من انو تعتذر لوحدة بتشتغل عنكن
زين: لاا انا ما بفكر هيك
الاء : اممم واضح
زين: طيب , انا... بعتذر
الاء: حصل خير
مسحت الدم و نزلت , دلتني ميرفت على غرفتيي يلي كانت جنب غرفة زين ,فتت ضبيت تيابي و تياب بنتي نور ,بعدين انزلت لتحت و شفت رجال اربعيني اسمو ابو وفيق و معو صبي صغير اسمو معاذ و عرفت بعدين انو بكون ابنو ل ليث
ابو وفيق:فوت يلا غسل ايديك
الاء:يعطيك العافية
ابو وفيق: الله يعافيكي ,انت الاخصائية النفسية الجديدة؟
الاء: لا , يعني انا موجودة هون كرمال زين , بس ماني اخصائية
ابو وفيق : اهلا و سهلا فيكي
التفتت على صوت معاذ عم يحكي مع بنتي نور
معاذ: شو اسمك انت ؟
نور : نور
ابو وفيق: هاي بنتك
الاء: ايه
ابو توفيق:لله يخليلك اياها , هاي يا معاذ اجتك رفيقة تلعب معا و تحل عني شوي , ما عاد الك حجة لتروح معي على الارض
ميرفت : انا لازم روح , الاء ... زين صار مسؤوليتك طلي عليه كل شوي و شوفي شو لازمو , و هدول ادويتو ,و هاي ورقة مكتوب علين مواعيد الدواء, ما بدي وصيكي و ابو وفيق قول انت بتعرف شولازم تعمل
ابوفيق : اكيد اكيد
الاء: ما تاكلي هم
ميرفت:و بالنسبة لنور اذا بتحبي تحطيا بروضة ما في مشكلة
الاء: انشالله لتستقر اموري هون
ميرفت : يلا سلام
طلعت الست ميرفت من البيت و راحو نور و معاذ مع ابو وفيق مشوار على المزرعة و انا طلعت لعند زين , دقيت الباب دقتين و فتت ,كان ماسك قلم و قدامو دفتر,فكرتو عم يرسم , قربت عليه و شفتو عم يكتب , اطلع فيني نظرة عابرة و رجع حط عينو بالدفتر , فتحت باب البرندا ووقفت اتفرج على البحر
الاء: بتروح مشوار على البحر؟
زين:.....
و انا واقفة , شفت نور و معاذ و ابو وفيق عم يقطعو الشارع و رايحين على البحر , نادتلا صوت لنور و اشرتلا بايدي , ضحكت و ركضت هي و ماسكة ايد ابو وفيق ,رجعت فتت لجوا
الاء: اذا بتريد بدي كرسي , وين بلاقي ؟
زين : ليكو قدامك ما شايفتيه
الاء : اه عفوا ما انتبهت
اخدتو و حطيتو بالبرندا و قعدت بما يقارب الساعة الكاملة انا و شاردة و عم فكر بشغلي الجديد و باياد و باهلي و ردة فعلن على اختفائي لمدة اسبوع ,رجعت التفتت على زين , شفتو صافن بالبحر , انتبه علي ,انا ابتسمت و هو دار وجهو فورا
الاء: عم دايقك بقعدتي هون
زين: لا
الجزء السادس:
قمت وقفت و قربت لعندو و سحبت الورقة من بين ايديه
زين: اذا بتريدي هاتيا لهون
الاء: لحظة ...بس اقرأ .....
زين : هاتي الورقة لهون ....هاي خصوصيات , باي حق بتتصرفي هيك
قرب بكرسيه علي لياخد الورقة و انا رجعت فيا لورا انا و عم اضحك , وقت حسيتو عصب
الاء: طيب رح اعطيك اياها , بس توعدني اقرا يلي عم تكتبو باقرب فرصة لانو انا كمان بكتب
اعطيتو الورقة
زين : شو بتكتبي ؟
الاء: مذكراتي بس , ما يروح بالك للشعر والخواطر و هيك شي , هدول اكبر من امكانياتي
زين : بس تقرأيني مذكراتك , بقرأك كتاباتي
الاء: .........
زين : ما عجبك الاقتراح ؟
الاء: عجبني بس غير منصف , اذا قرات مذكراتي يعني صرت متل الكتاب المفتوح قدامك و بتعرف عني كل شي , ماضيي و حاضري و مستقبلي
زين : نفس الشي بالنسبة الي , كتاباتي رح تعريني قدامك
الاء: .....بفكر شي نهار
اطلعنا ببعض نحن و ساكتين , بعدين نزلت راسي و كسرت الصمت
الاء: جعت الا لسا ؟
زين : لا
رجع بالكرسي لمحل ما كان , و انا وقفت عم اطلع فيه , كان شكلو و بياضو الناصع اشبه بملاك الو جناحين , اشبه بضو الشمس , سمعت صوت بنتي نور
الاء : اجت نور
طلعت من الغرفة و ناديتلا صوت تطلع لعندي
الاء: فوتي هيدا زين , رح تصيري انت و اياه رفقات و رح تصيري تلعبو مع بعض
رد على حكيي زين بدون ما يلتفت لعنا
زين: ما بصير نكذب على الصغار و نوعدن بشغلات ما رح تصير حتى ما يخيب املن و نفقد ثقتن فينا
الاء: ما عم كذب , انا واثقة من يلي عم قولو
زين : احيانا الثقة الزايدة بتودي لعالم وردي ما بتشوفيه الا باحلام اليقظة
الاء: ماما روحي سلمي عليه
قربت نور لعندو و هي عم تطلع بالكرسي يلي قاعد عليه , فتل لعندا و اطلع فيا شوي , مدت ايدا نور , و سلمت عليه و باستو
الاء: في شبه بيني و بينا ؟
زين : ...كل الصغار بشبهو بعضن , البراءة بتوحد ملامحن , وين ابوا ؟
الاء: .... مسافر..... و ما رح يرجع ابدا, يلا خلينا ننزل ناكل ما جعتي
نور : ايه ..كتير كتير هالقد
الاء: زين شوي و برجع
زين : ما ترجعي
تجاهلت كلامو و نزلت , اكلو نور و معاذ بالمطبخ و انا حطيت الاكل لزين بصنية و طلعت لعندو
االاء : تفضل
زين : قلتلك ما جوعان هلا
االاء : طيب ,انا باكلو
طلعت على البرندا و حطيت الصنية على حضني و بلشت اكل
الاء : طيب كتير , ام وفيق طباخة ماهرة
اطلع علي و بعدين نزل نظرو على الصنية
زين : غيرت رايي , بدي اكل
قرب لعندي و اخد الصنية مني و حطا على حضنو , رجعت اخدتا منو
الاء : هاي صارت الي , بس خلص اكل بطلعلك وحدة
رجع سحبا مني و انا مسكتا , هو يشدا لجهتو و انا شدا لجهتي
زين : هاي جاي على اسمي
الاء : و انت دللت و انا اخدتا , طيب خلص خدا و انا بنزل باكل بالمطبخ
زين : خلص كلي معي , انت خدي معلقة الشوربة و انا معلقة الفريكة
الاء: .....طيب , أي ساعة بترجع امك من الشغل؟
زين : ما بطول , المعمل قريب من هون
الاء: معمل شو؟
زين: معمل علب عصير فريش , اكيد انتبهتي على شجر البرتقان انت و فايتة لهون
الاء: أي لفتولي نظري بس ليش انت ما بتروح مع امك على المعمل؟
غص بالاكل و صار يسعل , ركضت جبتلو مي , شرب الكاسة و اعطاني اياها بدون ما يطلع فيني و كانو عم يتهرب من الاجابة , انا سكتت و ما رجعت طالبتو باي توضيح ,كملنا اكل نحن و ساكتين , خلص اول نهار الي بالشغل , على الساعة 8 اجا ليث لياخد ابنو معاذ
ليث : كيف شفتي الوضع ؟ انشالله مقبول؟
الاء: ايه ,لحمدلله , ماشي الحال لحد الان
ليث: اخد و اعطى معك ؟
الاء: أي شوي
اخد ليث ابنو و راح و انا فتت على غرفتي نيمت نور و فتت لعند زين لشوف اذا لازمو شي, شفت ابو وفيق عندو ,رحت لزبطلو تختو لينام , كان في سلسلة نازلة من السقف لفوق التخت , خمنت اانو بيستخدما زين ليرفع حالو و يجلس قعدتو
الاء: يعطيك العافية ابو وفيق, انا بكمل
قربت لعندو
الاء : حط ايدك على كتفي كرمال وصلك على التخت
زين : وين امي ؟
الاء: عم تعمل شوية حسابات للشغل و بعدين هالشغلات صارت من مهامي و أي شي بدك اياه اطلبو مني , انت بمثابة اخي الصغير , ييلا ...اذا بتريد ....اكلنا من نفس الصحن ما في داعي لترسم حواجز بيناتنا
قربت الكرسي على التخت ,بعد تردد , حط ايدو على كتفي و استند علي
االاء: اممم منيح فيك تحط تقل على رجليك
زين :ايه شوي
حسيتو عم يضغط على حالو كتير و اول ما قربنا على التخت , انرمى عليه و هدى فيني و شدني , وقعت فوقو , قمت عنو انا و عم اضحك و هو متلبك , حاولت اخد الموضوع بروح رياضية حتى ما يدايق , حط ايد على التخت و مسك بايدو التانية السلسلة و جلس قعدتو انا و عم ساعدو
الاء: ما بدك تنام ؟
زين : لا ما هلا , روحي نامي انت
الاء: ماشي , أي شي لزمك دقلي على الحيط المشتركة بيناتنا
انا و طالعة من عندو , شفت الست ميرفت
ميرفت : ممكن نحكي شوي ؟
الاء: أي تفضلي
نزلنا على الصالون
ميرفت:كيف شفتيه لزين؟
الاء:هلا انا ما مختصة نفسيا حتى اقدر قيم و ما بفهم بهيك امور بس زين ما بدو حدا يعاملو على انو مريض ما بدو حدا يتعاطف معو او يشوف الشفقة بعيون الناس ,.ما بدو يحس حالو عالة على حدا او يلبك حدا فيه
ميرفت : انا جبت مختصين من قبل و كان يرفض يتعامل معن و يصرخ و يقلعن , و انا حسيت انو انت من اول يوم قدرتي انو تتعاملي معو
الاء : أي تقريبا
ميرفت :هو نفد من هالحادثة باعجوبة , انا ما رح اطلب منك تنامي معو بنفس الغرفة ما بدي احرجك بس لو بطلي عليه كل ساعتين بالليل اذا لزمو شي و هو لازم يغير نومتو كرمال ما يصير ضغط على جنب واحد , عرفتي لهيك بتمنى ...
الاء: ولايهمك, تكرم عيونك , هاي شغلتي
ميرفت: ماشي
بعد يومين من شغلي , فتت لعند زين بهدوء على الساعة 2 بالليل حتى اتفقدو , شفتو حاطط ايديه تحت راسو و صافن بالسقف
الاء:مسالخير
زين : مسالنور
الاء: توقعتك نايم
زين: ما جايني نوم و انت شو مفيأك ؟
الاء: كمان ما اجاني نوم
قربت و قعدت على الكرسي
الاء: انا ...لمحت عكازات بخزانتك , ليش ما بتستخدمن ؟
زين : ما بحبن و صعب المشي فين
الاء: كل شي بكون اولو صعب و بعدين الواحد بيتعود
زين : انت من هون ؟
الاء: لا انا من الشام
سحبت الكرسي و قعدت قبالو
زين : اممم و ليش جاي لهون من شو هربانة ؟
الجزء السابع:
الاء(متلبكة):......انا ...ولا من شي
زين : ليش تغير وجهك ؟
نزلت نظري على الارض
الاء: شو عرفك انو هربانة من شي؟
زين : من عيونك , في خوف بعيونك , كل ما بطلع فيكي بتهربي بنظرك و كانك خايفة اقراك
جلس قعدتو و لف ايديه على صدرو
الاء:....... بتهيالك
زين : طب ركزي بعيوني وما ترمشي
ركزت بعيونو و انا عم اضغط على اعصابي , نزلو دموعي و بعدين درت وجهي على باب البرندا و انا عم مسح عيوني بايدي
زين :......من شو خايفة؟
الاء: انت يلي خايف , أنت يلي حابس حالك بغرفة و خايف تطلع تواجه العالم يلي برا بكرسي بدولابين , وو انت يلي هربان من انك تواجه حالك و خايف تمشي خطوة بالعلاج ...
زين : صح .....صح ...نحن الاتنين منشبه بعض ,نحن الاتنين خايفين
الاء:......
زين :...
الاء: زين الاعاقة ما بتكون بالجسم بس , في ناس افكارن معاقة و عم يعيقو حياة غيرن, صدقني انا مر بحياتي ناس كتير عندن هالنوع من الاعاقة و هي اخطر نوع لانو بتأذي الغير , صح انا خايفة وهربانة بس هربانة لعيش حياة فيا كرامة , كرامتي يلي فقدتا من سنين و تاخر الوقت كتير لاخدت هالقرار و هربت , ما ندمانة انو انا هون بهالبيت و بهالغرفة و قاعدة على هالكرسي قبالك ,بس ندمانة على الطريقة يلي وصلت فيا لهون اما انت هربان من الحياة و حاطط حالك بحبس , اطلع و شوف الدنيا , شوفا من عيونك متل ما المفروض تشوفا و ما تشوفا من رجليك
زين : .....من مين هربانة ؟
الاء: هربانة من الظلم و الاستغلال و الضعف و الصمت , شوف اطلع علي (تقف) ليكني بقدر اوقف و امشي على رجلي بس انا كنت ضعيفة كتير و حركتي مشلولة كنت متل االمقيدة كنت متلك ,ما قادرة امشي خطوة لقدام , كل ما فكر امشي كنت خاف و احسب حساب حكي الناس و نظرتن الي , اكيد رح ينظرولي على اني ناقصة
زين :و هلا انت شايفة حالك قوية , الهروب ما قوة , الهروب من المواجهة ضعف
الاء: ....يمكن , صح انا ضعيفة , هاي عم اعترف بهالشي و انت اعترف انك ضعيف و اعترف انك مريض و بحاجة لعلاج , اعترف انو يلي صار معك ما بايدك و انو الحادثة قضاء و قدر , و انو ابوك خلص عمرو بيومو ,و انت ما دخلك
بعد نظرو و شرد بالحيط قبالو و دمعو عيونو
الاء: اكيد ابوك ما رضيان عن حالتك هيك , لازم تكون قوي و تتعالج و تكمل حياتك و تستلم شغلو و اضل محافظ على اسمو , امك لحالا ما بتقدر تقوم بكل هالمسؤولية لحالا و حتى لو ما مشيت , فيك تكمل حياتك هيك , انا ما عم اضغط عليك و حملك شي فوق طاقتك لانو هالشي انت بتقدر عليه .....
زين :الحكي سهل , انت ما بتعرفي شو يعني تكوني بالمشفى و يخبروكي انو صرتي مقعدة و ابوكي مات , خبرين بنفس اليوم و الحقيقة الابشع انو انا يلي كنت سايق السيارة , هو ما كان بدو اياني سوقا لانو كنت لسا عم اتعلم ....هو ما كان بدو يموت .....انا قتلتو ...(يبكي)..هو مات و انا بقيت عم اتعذب ....االشعور بالذنب و الندم عم ياكلني كل يوم ....عم اشتقلو ...كان رفيقي واخي و ابي ...خسرت كل العالم وقت خسرتو .... ما بدي عيش بلاه ...ما اعطوني وقت ازعل عليه , خنقوني بالادوية و الاجهزة فورا
قربت لعندو و قعدت جنبو على التخت و لفيتو و طمر راسو بحضني و انفجر بالبكا
زين : هاي اول مرة ببكي عليه من قلبي .... ما عم اقدر اطلع بوجه امي ...حتى ما عم اقدر اطلع بوجهي بالمراية ....ما عم اقدر كمل حياتي و انا هالقد تعبان و حامل كل الهم بقلبي.....انا تعبان تعبااااان و تعبت الناس يلي حولي
الاء: .........
زين : راح و تركني على كرسي ...بقدر عيش كل العمر بلا رجلين بس ما بقدر عيش بهالذنب , قطع كل شهيتي للحياة , موتني و انا بعدني عم اتنفس
بقي زين عم يحكي و يبكي لساعة و اكتر , حتى تعب و نام , غطيتو بالحرام و انا عم اطلع عليه , كان متل الولد الصغير , سكرت الضو و طلعت, رجعت بعد ساعتين كان نايم
...........يتبع غدا بمنشور جديد
انا بكل مرة بقدم المرة كيف بتقدر تحتوي زوجا و تصلحو , بهاي القصة قدمت العكس ,كيف المرة بتنزع اخلاق زوجا بالسكوت عن اغلاطو و لعب دور الرجل , و كل هالتراكم و الكبت بيودي للانفجار غير المحمود .