#أحببت_ازعر
#الجزء_الاول
لو حبنا غلطة تركنا غلطانين .. ما زال عشقانين .. مع بعض مرتاحين ... مين الي الك مين ... مين الي الك مين ... عن حبنا غلطة
بضيعة حلوة وصغيرة وببيت من هالبيوت
في عالم مجتمعة بهل الغرفة وكلها زلم .. وكانو مجتمعين لشي مهم ... تعو نقرب لنسمع عم شو عم يحكو ...
بكر ابو ناصر :تفضلو ياجماعة شربو قهوتكن
المختار : قبل مانشرب القهوة .. قلنا يا ابو ناصر شو قلتو
ابو ناصر اتطلع ع شب من الموجدين بنظرة كره وحكي : مستغرب يامختار كيف جاي جاها مع هيك واحد
المختار :الشب قصد الله وقصدني وهو رايد هالبنت مشان هيك وفق بيناتن وخلينا نجمعن مع بعض بالحلال ... ومجد شب معدل ومنيح
حكي ناصر : اذا هاد معدل ومنيح .. شو خليتو للمنيح
ابو ناصر :ابني انا عم احكي
ناصر :حاضر ابي
ابو ناصر :مع احترامي الك يا مختار بس هاد شب فلتان وازعر وانا مستحيل اعطيه بنتي لو تطبق السما ع الارض
مجد : بس انا بحبها
ابو ناصر :يحبك برص انت واياها .. اسماع ولاه انا والله متحملك مشان المختار وهالوجوه الطيبة .. والله لولاهن مابخليك تعتب عتبة هالباب عم تفهم .. والله حلوة اخر هالزمان ناسب مجد الازعر حرامي الجاج
وقف مجد معصب وقال: اسمااع ابو ناصر انا تحملتكن كتير وتحملت حكيكن علي .. بس لهون بكفي .. والله يلي لسه بدو يقول حرامي الجاج لطالع لسانو من حلقو
ابو ناصر :شي حلو .. تعال اقتلني .. قوم تعا ليش قاعد
رفع اصبعو بوجهو وقال :والله لو مانك ابوها كنت مانطرت لهلأ ... بس يكون بعلمك هالبنت الي واصلا انا معد بدي اياها برضاكن رح اخدها خطيفة .. انتو يلي جنيتو ع حالكن
ابو ناصر :والله بقوصها قدام عيونك ولاتحلم تحصل عليها
المختار :ياا مجد .. شو هالحكي .. نحنا جايين معك جاها هيك عم تخجلنا قدام الرجل
مجد : مختار حقك علي انت وهالرجال ... بس مانك سامعو لك ماخليت جاها بالبلد الا وجبتا .. ماخليت محاولة الا وجبتا وهو كل مرة بقلعني تقلعية الكلاب وانا عم اسكت كرمال هالبنت وبس والله لولاها مابرحم كل واحد بيحكي علي حرف واحد ها مو كلمة .. لسه حرامي الجاج وحرامي الجاج .. هالشي مر عليه عامات وسنين وهنن ما على لسانن غير هالكلمة
ابو ناصر :الحرامي بضل حرامي
مجد :فشرت
ابو ناصر :الي عم تقلي فشرت ياكلب
مجد :فشرت مليون مرة
هجم ناصر عليه بس مسكوه بسرعة قبل مايوصل
ناصر وهو عم يهدد :عم تقول لابي فشرت يا واطي يا ابن الحرام .. لك تركوني عليه لهل الكلب خليني امسح فيه الارض
مجد : اي انتبه لايطقلك شي عرق يا حضرة المهندس
ناصر : لك ولسه واقف قدامي بكل عين وقحة .. تفوو عليك وعلى شرفك
المختار : اي والله تفووو عليك .. لك الحق علي يلي طاوعتك وجيت معك .. ياعيب الشوم بس .. روح انقلع من هالبيت ولاااه .. لانو وجودك عم يدنث هالمكان
مجد :حتى انت يا مختار
المختار :لك انا من الاول ماني طايقك ولا حدا بهل الضيعة بحبك لا الك ولا لأهلك بس لانك دخلت علي قلت رح اجي معك وماخجلك .. وعرفان مليون بالمية انو ابو ناصر مارح يعطيك ... والله انا لو عندي كلبة مابعطيك اياها
ابو ناصر :لك لساااك وااقف .. انقلع ولااه
قربو هالزلم وصارو يدفشوه لمجد لبرا لحتى قلعوه برات البيت وطبشو الباب بوجهو
ضل واقف مكانو بقمة غضبو ومقهور .. كان رح يجن ليش هيك عاملووه .. بدو يفش قهرو .. صار يتطلع حواليه بدو يكسر بدو يخرب ..
اتطلع ع جنب كان في كم كرسي محطوطين فوق بعضن .. قرب منن ورفسهن برجلوو .. وعلى حرف المسطبة مصفوف اصص زريعة وفيها ورد
سحب كرسي وصار يضربن بالكرسي ليوقعو ع الارض وتكسرو ...
هنن جوا سامعين صوت التكسير والتخريب بس ماحدا تجرأ يطلع ويوقفو عند حدو .. كان متل المجنون .. صوت انفاسو وهو عم يلهث من الغضب وكأنو شي ذئب وكشر عن انيابو .. ما فش قهرو لسا .. سحب المسدس وصار يقوس ع دواليب السيارات والمتورات .. لحتى قوس عليهن كلن .. وصار يصرخ ع ملااات صوتو لينفث عن غضبو ..
مجد :عاااااااااااااااااااا .... ياااكلاااب ... انا بفرجيكن ..
رجع المسدس ع جنبو وراح ركب سيارتو . دورها وصار يشفط بدواليبها قدام البيت لحتى ريحت الدواليب عبقت بالمكان .. وبعدها انطلق والغبار وراه بيعمي
__________________
جوا
بكر :هاد هو الشب يلي جايين معو جاها يامختار
المختار :مشان الله لاتواخذنا يا ابو ناصر والله حقك علينا
قعد بكر وبدنو مهزوز وقال : تفضلو يا رجال لاتواخذونا
حكي زلمة :انت لاتواخذنا يا ابو ناصر
بكر :بس مستغرب كيف جيتو معو ..ونزلتو مستواكن لهيك واحد
حكي زلمة:لاتواخذنا مرة تانية .. واستر ماشفت منا
بكر :والله ماشفت منكن الا كل خير .. قاعدين ع وين رايحين
زلمة : شفناكن بخير
طلعو الرجال وبكر وابنو طلعو وراهم واتفاجئو بالخراب يلي سببو مجد
بكر :الله يكسر اديه .. الله يشلّون
ناصر :بس لو تركتوني عليه لهل الواطي
حكي زلمة :لاحول ولاقوة الابلله .. عم نقول شو هالقواس طلع مقوس ع الدواليب
قربو كلن من آلياتن وهنن عميقلبو كفوفهن بقهر
المختار :خلص ياجماعة عندي ولا يهمكن .. انا يلي طاوعتو وجيت وجبتكن معي وانا يلي رح اتكفل بتصليحن
:ولايهمك يامختار عرضية .. يلا بالاذن ياجماعة
مشو وراحو كلن ع بيوتن .. بس المختار ضل واقف وماراح
المختار : بدي احكي معك كلمتين على انفراد لو سمحت
ابو ناصر :طبعا .. تفضل تفضل يا مختار .. ناصر قلن يعملولنا شاي
ناصر :حاضر ابي
دخل ناصر لعند اهلو يلي قاعدين بغرفة تانية وهنن عبارة عن بنتين وامن ... واول مافات وقفو بوجهو الا بنت كانت قاعدة وضاربة بوز ..
ام ناصر :قلي شوصاير برا وشو هالقواس
ناصر :مين غيرو حرامي الجاج
واتطلع ع اختو يلي قاعدة ومتجاهلتن : عاجبك هيك ضحى خانم .. شقفةازعر مابيسوا فرنكين بسوق الغلا عم يهينا بقلب بيتنا .. وخرب الدنيا برا .. لك مقوس ع دواليب السيارات يلي جاي معو .. والعالم رجعت مشي .. هاد هو يلي بدك ترتبطي فيه
ضحى: ولييش عم تحاسيني الي انااا شو دخلني
امها هلا :الله لايوفقك .. كلو من تحت راسك بدك تفضينا انتي
اختها ندى: طولو بالكن شوي .. يعني ضحى شو دخلها .. شقفة مهووس
ناصر :من وين بدا تجي طولة البال وهالكلبة هديك مالقت غير هالعرصا لتجبلنا اياه صهر
ضحى :لك ليش ماعم تفهمو انوو مادخللني وماقلتلو يجي
ناصر :خرسي .. لو مانك عاطيته الضو الاخضر مابيجي بهل الوقاحة
تركتن وفاتت غرفتها
ناصر :عملولنا شاي
ندى :مين ضل
ناصر :المختار .. يلا لاتطولو
ورجع لعند ابوه والمختار
المختار : قلك يا ابو ناصر هالكلمتين وماتزعل
ابو ناصر :احكي مختار احكي
المختار :المستورة بنتكن بتحبو وهية يلي عم تعطيه الضو الاخضر ليجي يعني لو مانو ماخد الموافقة من البنت مابيجي بهل الجرأة .. وانا شوف عيني شفت بنتك معو .. قلت مزال رايدين بعض بالحلال خلينا نسعى معو احسن مايصير شي يغضبك ويغضب رب العالمين
ابو ناصر وقف : شووو عم تحكي يامختار
المختار :مشاان الله اهدى وروق
وقف ناصر وقال :الكلبة الحقيرة والله لاشرب من دمها
المختار وقف قدام الباب يلي بودي ع البيت وقال اقسم بلله مابتمرقو من هالباب الا عجثتي
ابو ناصر :مشاان الله يامختار بعد من قدامي .. لانو معد استحمل بدي اقتلا واخلص منها
المختار :حلفتك بالله انو مابتقرب عليها
ناصر :عمي مشان الله بعد
المختار :جاير عليكن الله انو محدا بحكيها
تراجع ابو ناصر لورا وقال :الله يقصف عمرا .. الله ياخدا ويريحني منها
قرب منو المختار وقعدو ع الارض لانو المد عربي ومانو كنبايات
ابو ناصر : الله ياخدا ويريحني منها
ناصر :ابي انا يلي رح اخدلا روحا طول بالك علي
المختار :شوو حكينا يا ناصر
ناصر :لك الكلبة بنسألا بتقول مادخلني ومابعرفو
المختار :لكن شوبدا تقول ..
ابو ناصر :بس فشرت تاخدو .. والله لخليها العمر عندي ولابجوزا لواحد متلو فلتان ابن حرام سكرجي ابن سكرجي حرامي .. لك شوووفي صفات منيحة لحتى الواحد يعطيه شووفي
ناصر : بابا طول بالك .. كلشي بينحل
ابو ناصر : لك كيف بدو ينحل وهالكلبة هية يلي عم تقولو يجي .. وانا بقول ليش مانو عم يزوق ع دمو وكل مرة بيبعتلنا عالم لحتى يخطبها
المختار :طيب شي مرة سألتوها اذا بدا او لأ
ابو ناصر :لا ولامرة .. كل مرة نقلعو بدون ما نسالها لانو انا بنفسي ماني رضيان بدك اياني اسألها
المختار : ابو ناصر بدي منك تهدى وتطول بالك .. والبنت ماعملت شي غلط لحتى تتهورو فيها ..
ابو ناصر:....
المختار :عم تسمعني يا ابو ناصر
ابو ناصر : اي عم اسمعك .. بس اول ماقلتلي فار دمي شوي بس اطمن شو ماكان مارح ائذي بنتي .. لانو مابتفهم ولابتعرف مصلحتا
المختار : طول عمري مابقول عنك الاانك زلمة محترم وبتفهم ... وانت ياناصر
ناصر : منت علينا عمي المختار .. ومتل ماقال ابي حيوانة ومابتفهم .. ونحنا رح نوعيها
المختار :عفارم عليك .. بس هي كلمة حيوانة ماحبيتها منك .. انت شب متعلم وفهمان وصرت مهندس قد الدنيا وبينرفع الراس فيك بهل الضيعة
ناصر :تسلم يا عمي
المختار :انا صار لازم روح .. بس بدي توعدوني انو ماتقربو ع البنت
ابو ناصر : لاتوصيني ع بنتي يا مختار
المختار :قبل ماروح بدي تعطوها الامان
ابو ناصر : خلص لا تفكر .. وياسيدي عليها الامان هيك منيح
المختار :كتير منيح .. وانت يا ناصر
ناصر :عليها الامان .. لاتقلق عمي .. مابصير الا يلي بيرضيك
المختار :والنعم منكن والله .. يلله انا بالاذن
________________________
ضحى رايحة جاي بغرفتها وبايدها موبايلا عم ترن عليه
ضحى :لك رد يا مجد .. رد ... لييش عملت هيك .. قلتلك لاتجي ... اووووف
رمت التلفون ع التخت بعد محاولات اليائسة انها تتواصل معو
دخلت ندى وقالت : تعي بدو يحكي معك البابا
ضحى :جيت .. تفضلي قدامي (وبقلبا:الله يجعلو خير)
راحت مع اختها ع غرفة القعدة .. لقت اهلها قاعدين ع الارض .. قربت وقعدت معن
ضحى :اي بابا قلي
بكر : ايمت بدنا نخلص من هالواطي
ضحى :انا مادخلني ومابعرف
بكر :حاولنا معو كتير .. شي نقلعو وشي نشتكي عليه وهو كل مالو بزيد عنادو وجحشتنو ..
ضحى :.......
بكر : يعني واحد متل هاد جينا معو بكل انواع التهديد وهو متل التور الهايج لا عم يزوق ولابيعرف شو جنسو للزوق
ضحى :وشو الحل
بكر :قررنا نجي معو ونسايرو
لا اراديدا انرسمت ابتسامة على وجه ضحى والكل انتبهلا بس بسرعة مسحتا ..
بكر :انا قررت اعطيه .. شو رأيك انتي بتقلبي فيه
اطلعت بوجوه الكل .. والكل صامت
ضحى :متل مابدك بابا .. اذا هالشي لتخلصو من وجع الراس فأنا موافقة
وقف ناصر وانقض على شعرها ومسكها منو وصار يقول :سمعتت .. سمعت يا بابا .. قال موافقة .. قاال مووافقة
ضحى: لك شوووفي تركني
ناصر :ولسه عم تقولي شوووفي ياكلبة ياحقيرة .. لك جبتيلنا العار يا وسخة
قامت امها لتفكها .. بس بكر مسكها من ايدا ورجعا لمكانا
بكر :لك الله يغضب عليكي .. طلع حكي المختار مظبووط
امها :ايوو حكي .. شووفي
بكر :بنتك عم تطلع وتفوت مع هالازعر قدام كل اهل الضيعة وماضل حدا الا وعم يحكي عليها
امها :شووووو .. يا فلتانة وطيتي راسنا ..
قامت بسرعة لعندها وصارت تضربها بأديها التنتين .. عاديها يلي عم تخبي فيهن وجها وتبكي
ندى :حرراام عليكن خلينا نسمع منها
ناصر :شوو لسه بدك تسمعي .. ماسمعتيها عم تقوول موافقة
امها :لك الله يحرق البنات ..الله يحرقن .. لك اذا ماجابت العار والمعيار بتجيب العدو لباب الدار .. لك الله يخلصني منك
رفعت راسا ضحى وشعرا لساتون بقبضة ناصر وقالت :اي اي .. بحبو وبدي اياه وغيرو ماباخد .. دبحوني قطعوني .. غيييروووو مابدييي .. عم تفهمووو .. انا بحبو بحبووووو
ماشافت حالا الا راحت تتمردغ ع الارض من الكف يلي اجاها من اخوها ...
ناصر :يحبك برص انت واياه ..
نزل عليها وصار يضربهامتل المجنون .. مافي غير ندى تشجعت وقربت تبعدو عنها بس ما قدرت ...
ندى : لك تركهاا حررام عليك رح تموت بين اديك
بكر :تركيه يربيها ...تركييه
ندى : لك حررام عليكن ..
ناصر : يحرم جلدا عن عضما لهل الفلتانة .. وانا قول ليش كل مابيجي عريس بتاكل هوا بتقول بدي كمل دراستي .. لك ايو دراسة يا فاجرة ايوو دراااسة
ومع كل كلمة يجيها كف على وجها
فجأة وقف وهو مبحلق فيها
ناصر :ضحى
كانت فاقدة الوعي بين اديه والدم عم يطلع من تمها وانفها ..
صار ينكعها :ضحى ... يا ضحىىى
قامو بسرعة عليها وصارو يصحوها .. بس هية ماعم تحس نهائيا
امها زمرد: لك شوو صابا البنت .. يا ابو نااصر البنت مدري شبهاا
ندى :ضحىى اختييي
بكر خايف وماعم يحكي
ندى :لك قتلتا .. قتلتا ..
قرب بكر منها ورفعها وقرب من وجها لقاها عم تتنفس
بكر :عايشة .. اتصل باخوك يحيى بسرررعة ... بسررعة
قام ناصر بسرعة واتصل باخوه .. وهو متوتر وعيونو على اختو يلي عم يحاولو يصحوها وماعم تفيق
ناصر :الووو يحيى .. تعاال بسرعة .. ضحى مدري شبها
________________//______
يحيى كان قاعد على كرسي بغرفتو بالمشفى وبايدو فنجان شاي .. لما قلو هيك .. نفخ الشاي من تمو ووقف على رجليه وقال :شووو .. شبا
ناصر :لك .. انااا ضربتا
يحيى :حيووان ليش لتضربااا
ناصر :قصة طويلة .. المهم شو نعمل
يحيى :شووو شو تعمل .. بسرعة جيبوها ع المشفى انا ناطركن
ناصر : مافي شي نجيبها فيه
يحيى :وين سيارتك او سيارة ابوك
ناصر :مبنشرين
يحيى:لك شووو صاير عنكن
ناصر : ماوقتو اخي .. شووو الحل .. تعال
يحيى :رح ابعتلكن سيارة اسعاف يلا يلا سكر
سكر الخط وطلع يركض بكوريدو المشفى
______________________
مجد وصل بسيارتو يلي هية بيك اب شفر ليه لقدام قهوة بضيعة تانية .. فتح الباب ونزل لعند شبين قاعدين على طاولة
مجد :تحسين قوم
تحسين :ع وين
مجد :بدي اشرب
تحسين :شوبدك بالشرب هلأ ... قعود اشرب معنا فنجان قهوة .. وروق دمك
مجد :مابدي روق شي دمي .. بتروح معي ولا لأ
تحسين :شو صاير معك .. قعود ولوو
مجد :خلص بلا بلا
تركو ولف ضهرو .. بس تحسين مسكو من ايدو
تحسين :ع وين رايح
مجد :اشرب سم الهاري بشي مكان
تحسين :ما عأساس بدك تبطلو
مجد :اي بدي بطلو بس هو ماعم يبطلني
تحسين :ههههه .. تعا معي لقلك
مجد :ع وين
تحسين : لعنا ع البيت
مجد.: مالي مراق
تحسين :امشي ولااه .. وبعدين ابي قلي بدو يشوفك
مجد :ابوك ؟؟شوبدو فيني
تحسين : مابعرف هو قلي بدي اتعرف عرفيقك مجد
مجد :وابوك شو عرفو فيني
تحسين :انا خبرتو عنك
مجد :الله لايعطيك العافية ايه ..
تحسين :لك ليش
مجد : اكيد بدو يطرقني شي بهدلة ويقلي بعد عن ابني
تحسين :وليش ليقلك الك مايقلي الي
مجد :مابدو يكسرلك شوكتك
تحسين :دخيل شوكتك انا .. يلا امشي قدامي
مجد :وحد الله يا زلمة
تحسين :لا اله الا الله .. شبك
مجد: لك ابوك شيخ عشيرة شوبدو من واحد ازعر متلي
تحسين : بشرفك بلا حكي الزعرنة هاد .. وامشي قدامي قال ازعر قال
مجد :مانك مصدق
تحسين :لا .. لانك مو ازعر
مجد :لانك بتحبني عم تقول هيك
تحسين :فشرت حب واحد متلك
مجد :مزال مابتحبني ليش ماشي معي
تحسين :لانك ازعر
مجد :تضرب بهالشكل ايه
تحسين :امشي .. امشي
مجد :لك ع وين
تحسين :الشيخ ناطرك
مجد : الله يمضي هالليلة على خير .. تفضل مشينا
مشو جنب بعض
تحسين :ليش متشائم وكأنو ابي بدو يدبحك
مجد : لك انا ولاد ضيعتنا مابطيقوني وبسبو علي .. بدك تقنعني انو ابوك الشيخ نمر بجلالة قدرو بدو يشوفني ومابدو مني شي .. لك انا اصلا مستغرب انو انت كيف مرافقني
تحسين :هههه لانك ازعر ...واهل ضيعتكن بجم مابيفهمو ... مليون مرة قلتلك جيب عليتك وتعو سكونو عنا مارضيت
مجد : لا بدي ضل بضيعتي احسن بدي ضل شوكة بحلقن لاهل هالضيعة الكلاب
ركبو سيارة مجد وانطلقو
تحسين :بدك تضل مشان تكون شوكة بخلقن ولا مشان الغوالي
مجد :ايو غوالي وايو هوا ..
تحسين :اوف .. اوف .. وين راح كلامك انو بدي حارب الدنيا كرمالا ومارح اخد غيرها
مجد :معد عندي صبر ياصاحبي ... مليت منها ومن اهلها ومن اهل الضيعة كلا
تحسين :لك شو صاير احكيلي
مجد :كنت عندن اليوم
تحسين :تخطبا ؟؟
مجد :اي .. واخدتلن جاها طويلة عريضة
تحسين :وتقلعت كالعادة ماهيك ؟
مجد :لك يضرب هالعمر .. مابس تقلعت الجاها قلبو ضددي .. اصلا هنن من الاول مابطيقوني .. بس انو عم يجاملوني .. بس بين وجهن الحقيقي لما بهدلوني وقلعوني برات البيت .. لك اااخ بس اااخ .. لولا هالنتفة عقل يلي ضالين براسي كنت قوست عليهن كلن .. بس والله خوفي من الله مامن شي تاني
تحسين :اي بدك تهدي ..
مجد :معد بدي هدي خلص .. هديك الضيعة ويلي فيها معد يعنوني بشي .. بس ماني طالع بس مشان ضل شكوة بحلقن ما اكتر
تحسين :وضحى ؟؟ عم تحكي جد بخصوصها
مجد :اي والله جد .. معد بدي اياها .. نزليت كتير كرمالها ... كرامتي صعبت علي ... انا علمت يلي علي ودافعت عن هالحب بكل طاقتي .. بس ماضل طاقة تحمل
تحسين :خدها خطيفة
مجد : مابتقبل راسها كبير ..
تحسين :طيب اخر محاولة
مجد :مابعرف ... هلا تركني ظبطها بعقلي بالاول .. لك اي وين صار بيتكن
تحسين : اي اي بوجهك
_________________________
ع طراف ضيعة مجد
في مزرعة كبيرة وبقلب هالمزرعة في بيت كبير
واقفة صبية من عمر ضحى على الشباك بمرقة سيارة الاسعاف طالعة من الضيعة ..
زينة : مدري شوفي بالضيعة
امها من وراها : شوفي
راحت وقعدت جنب امها ع الارض ع المد العربي الفخم .. وقالت :ماسمعتي سيارة الاسعاف
امها نجوى :ما انتبهت ..
زينة : اي كانت طالعة من الضيعة .. معقول مجد قاتل شي حدا
نحوى :هههه بيعملا .. بس اخوكي اذا قتل شي حدا بيسعفو .. صحي ازعر ومشكلجي بس قلبو طيب
زينة : اي والله ..
نجوى :خطي وحظ ما الو
زينة :اييه .. بيفرجها الله .. وينو مراد
نجوى : بالخيمة مع الشغيلة .. عم يسهرو
(الخيمة هية عبارة عن خيمة مصنوعة من قصب مكونة من غرفة وحدة .. عاملينها الشباب ليسهرو فيها بالصيف .. وممدودة مد عربي وبالنص في منقل نحاس وعدة قهوة المرة .. يعني عقد مو حلوة مابتبين انها خيمة من الداخل ) وتقريبا متل هي الخيمة موجود ببعض بيوت الضيعة والضيع المجاورة .. مشان الشباب يلي بسهرو وبأركلو .. وبضلو بعاد عن البيت وخصوصا اذا فيه حريم
_________________________
بالمشفى
وقف يحيى جنب اختو يلي بلشت تفيق .. فتحت عيونا وقالت : انا وين .. شوفي
يحيى :كيف صرتي اختي
اتطلعت بحيى واتطلعت بالغرفة .. واتذكرت شو صار معها
ضحى : ......
يحيى :انتي منيحة ..لاتخافي
اجت ترفع حالا وهية عم تستند ع ايدها صرخت صوت
ضحى:ااااخ ايدي
يحيى :من وين
مسكت ايدها من عند معصم وقالت هاد .. هون
يحيى :يمكن مفكوشة لاتخافي ع المفصل مابكون في كسر .. بس هلأ بنده للدكتورة ياسمين تشوفك
ضحى : شفت اهلك شو عملو معي
يحيى : انتي ليش عملتي هيك
نزلت راسا وهية عم تبكي وتقول : بحبو .. بحبو
يحيى :مالقيتي غير هاد تحبيه يا اختي
ضحى : لك مجد مو متل مانك شايفينو .. مجد منيح كتير
يحيى :انتي لانك بتحبيه شايفته منيح .. بس هو لأ بالعكس مانو هيك ابدا .. لك شو جابو الك .. انتي متعلمة ومثقفة هو الحرف مابيعرف يفكو .. انتي بنت اهم عيلة بهل الضيعة .. هو ابوه كان قمرجي وسكرجي .. وامو الله اعلم مين هية .. واحد حرامي ازعر فلتان .. بدك ترتبطي بهيك واحد .. هاد هو الاب يلي اخترتيه لولادك
ضحى :مابهمني لا ابوه مين كان ولا امو مين بتكون .. يلي بهمني هوو.. وكمان والله مانو حرامي يا اخي
يحيى :انتي مابتعرفيه .. لك من كم سنة بس كان ميت من الجوع .. بين يوم وليلة صار معو مصاري مابتاكلا النيران واشترى اراضي ومزارع .. من وين اجو هدول ااه .. قوليلي من وين اجو
ضحى :قلي ورتة
يحيى :هههههههه وانت صدقتي .. من وين بدا تجيه الورتة اذا ابوه كان وحيد .. لاهلو
ضحى :انت من وين بتعرف
يحيى :اسألي اي واحد كبير بهل الضيعة بيحكيلك ..
ضحى :وينن اهلي
يحيى :برا .. انا ماخليتن يفوتو قلتلن بدي احكي معك لحالنا .. بركي بتقتنعي مني ... اي قوليلي اقتنعتي
ضحى سكتت
يحيى :هههه راسك كبير ... ليكي هلأ اهلك رح يفوتو لاتعصبيهن وشو ماقالولك قولي اي وماشي ... ماشي
ضحى :ماشي
راح لعند الباب وفتحو .. وطلع بوجهو اهلو
يحيى : فوتو بس لاتحكوها شي .. انا حكيت معا وانشالله تقتنع
زمرد :ماشي ماما .. بعدلنا هيك خلينا نشوفا
فاتو لعندا ..ابوها واخوها ناصر وندى وامها ..
نزلت راسها ضحى بتجاهل
زمرد (بعتب) : كيف صرتي
ضحى: من الله بخير
ناصر :لسه بدك اياه لهادك الواطي ولا تعلمتي درس
ضلت ساكتة
بكر :ما وقتو هالحكي هلأ ..
قربت ندى من اختها وحطت ايدها على خدها وقالت :كيف صرتي ياحبيبتي
ابتسمت ابتسامة مجاملة وقالت :منيحة .. لاتقلقي علي
____________________
بغرفة تانية بالمشفى
دق يحيى الباب وفات .. كانت دكتورة متحجبة حلوة كتير بل اكتر من حلوة قاعدة ورا مكتبها .. ولابسة نضارات ومعها كتاب سكرتو لما اندق الباب
ياسمين :اهلين يحيى
يحيى : شو عم تعملي حبيبتي
ياسمين : يحيى بترجاك بلاها هي حبيبتي
يحيى : طيب ليش ماعم تخليني قرب منك
ياسمين : قلتلك وضعي ووضع ابي
يحيى : انا مستعد روح اخطبك .. بس انتي يلي ماعم تخليني
ياسمين : ماعم خليك لانو مابتقدر على شروط بابا .. يحيى اسمعني انا بحبك وبموت فيك .. بس خايفة مانكون لبعض ويكون حبنا عذاب للتنين .. مشان هيك خلي مسافة بينا .. انا بابا هلأ اذا بجبلي اي واحد وبقلي هاد رح يكون زوجك مارح اعترض اصلا مارح استرجي اعترض ..
يحيى :طيب شو هية شروط ابوكي .. بركي بقدر عليها
ياسمين :لك انا محدا عم يتجرا ويطلبني بسبب المهر بس .. بابا حاطط مهري ٥٠٠ ليرة دهب
يحيى سكت
ياسمين :ما تفاجئت ؟
يحيى :لا .. لانو بنت متلك متعلمة ودكتورة وبنت شيخ عشيرة واجمل مرى بشوفا بعمري ... ٥٠٠ ليرة قليل عليكي
ياسمين : شكرا هاد من زوقك
يحيى :بس انا مابظن ابوكي يكون عم يحكي جد بهل الخصوص
ياسمين :والله مابعرف .. المشكلة مابسترجي اسألو بهاد الموضوع نهائيا .. انا بقول هاد الشرط لحتى بيعد عني الجبناء والطماعين .. ويمكن اذا لقى الشخص المناسب يطيعني اياه بلا مهر
يحيى :وانا
ياسمين :انتي اكتر شخص مناسب بالنسبة الي .. وياريت ابي يقبل فيك
يحيى : طيب خليني جرب شو خسرانة
ياسمين : واذا قلك بدي مهرها ٥٠٠ ليرة دهب .. من وين بدك تجيبن
يحيى : سكت
ياسمين : صح بابا يمكن هي خدعة عاملها .. بس يمكن تطلع جد .. والله مابعرف انا .. انا هي الشغلة رح تسببلي عقدة نفسية .. مشان هيك ماشية متل مابقلي امشي .. وعم حاول قد مافيني ما اتعلق فيك لانو هو يلي بدو يحددلي طريق حياتي .. بابا عطاني الحرية طول عمري وهو يلي وصلني لهون .. الا قصة الزواج هي الشغلة الوحيدة يلي بدو يتحكم فيها .. مو بس انا .. انا وكل اخواتي الشباب
سحب الكرسي وقعد وهو مقهور
ياسمين :لاتزعل الا الله مايفرجها .. او انا شي يوم اتشجع واحكيلو
يحيى : خليها على الله .. وانا رح اعمل جهدي اجمع مهرك .. ورح اطلبك لتصيري ملكي
ياسمين : عم تحكي جد
يحيى :والله جد .. انتي بتستاهلي اكتر من هيك بكتير .. ويلي لازم يحصل عليكي لازم يتعب
_________________________
ببيت ريفي اشبه بالقصر .. داهل غرفة كبيرة عبارة عن مضافة .. طولها حوالي العشرة امتار وممدودة مد عربي بس من افخم الانوع من حيث الالقماش ومن حيث التفصيل ومن حيث السجاد يلي بيدعس عليه بتغرق الرجل جواتها.. قاعدة بالصدر رجل ستيني .. لابس كلابية من الحرير وفوقها عباية كمان من الحرير .. قاعد وقدامو لابتوب وعم يتفرج عليه .. بنقرب من اللابتوب .. بكون ظاهر من الشاشة ياسمين ويحيى يلي قاعدين وعم يحكو
ياسمين :اي قلي كيفا اختك
يحيى :منيحة .. اي نسيت .. بدي قلك تشوفيلها ايدها عم توجعها عند المعصم
ياسمين: مين عامل فيها هيك
يحيى :قصة طويلة
ياسمين :حكيلي
.......................
اندق باب المضافة .. والشيخ سكر اللابتوب وقال :فوت
انفتح الباب ودخل تحسين ومجد
تحسين :السلام عليكم
مجد :السلام عليكم
جلس قعدتو وقال :وعليكم السلام ورحمة الله وبركاته
قربو صافحوه وهو قاعد وقعدو جنبو
تحسين : ابي هاد مجد
مجد ابتسم وهز براسو
الشيخ نمر ابو خالد (ابتسم) : اهلين يا ابني .. حكالي عنك تحسين كتير .. قلت لازم اتعرف عليك
مجد ضحك وقال :مابشرفك تتعرف ع واحد متلي
ضحك الشيخ وقال :هههه ليش
الشيخ وجهو ضحوك ومانو عصبي متل ماعم تتخيلوه
مجد: انا معروف بكل المنطقة بالازعر او حرامي الجاج
الشيخ : هلأ اكيد مانن جايبين هالألقاب من الفضى
مجد :وانا ماعم انكر .. مشان هيك عم قلك مابشرفك
الشيخ :ههه لا لا .. بشرفني وزيادة .. لانك رجال بتعرف ليش .. لانو الرجال ببين بالموقف الانسانية .. كمان شغلة السرقة بعرف انك بطلتا من زمان
مجد :مظبوط .. الحمد لله الله غناني عنها .. هههه بس لسه شغلة الزعرنة مابطلتا
الشيخ :هههههه حتى هي ما اسمها زعرنة .. هي بتدل على شجاعتك وانك مابتهاب حدا
مجد :والله مابعرف شو قلك .. بس اذا انت شايفني منيح فهي شهادة بعتز فيها
الشيخ :قلي تحسين انك بتحب بنت واهلا ماعم يعطوك
مجد : اي والله
الشيخ :مشان سمعتك؟
مجد : في اكتر من هيك ..
الشيخ :والبنت بتحبك
مجد : هههه هية الوحيد يلي بتحبني من كل هالضيعة.. مشان هيك انا متمسك فيها
الشيخ : لانها شافتك متل ماشافك تحسين وانعجب فيك واجا وحكالي عنك .. وانا هلأ عم شوفك بنفس النظرة
مجد : هاد من لطفكن
الشيخ : وشوبدك تعمل هلأ
مجد: اهلها رافضين نهأئيا بسبب مسموعياتي ومسموعيات ابي ..
الشيخ : مابتجوز عليه غير الرحمة
مجد :بتعرفو ؟
ابتسم الشيخ
مجد : بس مايكون عمل معكن شي فصل ناقص
ابتسامة الشيخ صارت ضحكة
مجد :هههههه عالزمة شو عامل معكن
الشيخ : فصل
مجد : قلبي حسني من اول ما ابتسمت
اندق الباب وفات شب بعمر ١٥ معو شاي ..وشكلو اخوه لتحسين .. ضيفن وطلع
الشيخ :لاتفكر بالموضع .. مضى وراح
مجد :الله يحرق صفحتو .. الله وكيلك كلشي صار معي بحياتي هو سببو .. انا شو الي خلاني اسرق جاج وغيرو وصير حرامي .. او صير ازعر و فلتان
الشيخ : قلنالك مابتجوز عليه غير الرحمة ..
مجد :الله يرحمو مع انها ماطالعة من قلبي
الشيخ :والله انك ابضاي .. بس طبعا مانك طالع لابوك .. بتكون طالع لخوالك
ضحك مجد بس ماحكي
الشيخ تابع حكيو وقال :العرب قديما كانو لما يسألو عن شب .. اول شغلة كانو يسألو عليها احزر شو هية
مجد :عن شو
الشيخ :لا عن مسموعياتو ولا عن اهلو او ابوه .. ولا عن وضعو المادي
مجد : لكن عن شو بيسالو
الشيخ :بيسألو مين خوالو .. لانو شو بقول المتل .. الولد لو بار تلتينو للخال
مجد :اي مظبوط
الشيخ :اي يامجد قلي مين خوالك
مجد : بتصدق ياشيخ اذا قلتلك انا امي مابعرفا ولا بعرف مين بتكون
الشيخ : اي بتذكر انو ابوك كان يتزوج المرى فترة قصيرة بس هية كانت تطفش منو وتهرب ..ماوحدة تحملتو
مجد :في خالتي تحملت وقعدت
الشيخ :عندها بنت ماهيك
مجد :اي
الشيخ :يمكن مشان بنتها .. البنت غير الشب ..
مجد : اي مظبوط .. هية كانت تقول عطول انو تحملت ابوكن مشان هالبنت وبس .. ولو ولد كنت تركتها وطفشت
الشيخ :كم اخ انتو
مجد : ٣ .. شبين وبنت .. وكل واحد من ام
الشيخ : ابوك تزوج بحياتو اكتر من ٣
مجد :هههه بعرف بس هدل التلاتة بزرو منو ♧♧
خالتي قالتلي انو عحسب حكي اهل الضيعة .. انو امي ضلت عند ابي جمعة .. واجو اهلها اخدوها .. قال بوقتا امي كانت حامل فيني .. واول ماولدتني اخواتها جابوني ورموني لابي ..بهل الوقت ابي كان عندو امو لمراد وكانت كمان حامل ع وجه ولادة .. ولدت مراد وتركتلو اياه وطفشت .. وصار يتزوج ويطلق لحتى اجت خالتي نجوى وحبلت بهل البنت وضلت ربتنا
الشيخ : ماعندك فضول تعرف مين هية امك
مجد : اي لكن .. اكيد عندي ..معقول في حدا مابحب يعرف مين هية امو
الشيخ : مانك حاقد عليها
مجد : ابدا .. ومابلومها .. لانو عحكي العالم ابي ماكان بينحمل .. واكيد تعذبت معو
الشيخ :قلتلك انك رجال .
مجد :ههه تسلم
الشيخ :اي وشو قررت تعمل مع البنت يلي بتحبا
مجد :خلص قررت اتركها
الشيخ :بهل البساطة
مجد :لا والله مابهل البساطة .. بس خلص تعبت ومليت
الشيخ :انت هلا معصب .. ولاتاخد قرار وانت معصب .. هي نصيحة من النصايح يلي كان حقها جمل
مجد : بس انا ماني معصب
الشيخ :مبلى معصب وكتير .. مشان هيك لاتحكي شي وبكرا تتراجع عنو
رن تلفون مجد .. سحبو من جيبتو وكان مكتوب العقيد
مجد :بالاذن بدي رد ع المكالمة
الشيخ :احكي براحتك
مجد :الو .. اهلين سيادة العقيد .
العقيد :كيفك حبيبنا
مجد :تمام .. قلي في شي
العقيد : ضحى
مجد :شبها
العقيد :بالمشفى .. اخوها ضاربها
وقف مجد وقال :شوووو
العقيد : بس هية منيحة اطمن
مجد :منيحة منيحة ..ولا في شي مابدك تخبرني
العقيد :لا منيحة لاتخاف ..
مجد :الكلاب عم يتقاوا عليها
العقيد :اي هدي ولاتضوج شغلة مو محرزة
مجد :وكيف عرفت
العقيد :شو هالسؤال حبيبنا .. نحنا بنعرف كلشي
مجد :عراسي والله .. ومشكور
العقيد : بدنا خدمة تحرز شريك
سكر مجد وقعد
تحسين :شوفي
مجد :اهلها ضاربينا .. وهلأ هية بالمشفى
تحسين :لاحول ولاقوة الابلله
مجد : عأساس عيلتها متعلمة وبتفهم
الشيخ :اهدى ابني .. اهدى .. العلم مو كلشي .. وكمان الفهم فضلوه ع العلم
مجد :اقسم بلله جاي عبالي روح طحبشن كلياتن ..
الشيخ :شو شايف انقهرت عليها
مجد :معقول ما انقهر عليها وهي قلبي
الشيخ : صغيرة .. بتكون فورة غضب
مجد : وبركي رجعو ضربوها .. انا مابسمح تتأذى بسببي
الشيخ :لا مارح يضربوها .. ولو بدن ياذوها اكتر من هيك ما بياخدوها ع المشفى
تحسين :كلام ابي مظبوط ..
مجد : لازم شوفها واطمن عليها
الشيخ :بتطمن عليها .. بس هلأ روق
مجد :من وين بدو يجي الرواق
تحسين : مين يلي حكي معك
مجد : العقيد سليمان
الشيخ بصدمة :العقيد سليمان .. رئيس فرع الامن بالمحافظة ؟؟
مجد :اي هو
تحسين :العما شو انك داهية وشو وصلك لرئيس الفرع .. لك لو رئيس مخفر هون بالضيعة كانت انبلعت بس العقيد سليمان ماغيرو عم يتصل ويطمنك عن حبيبتك
ضحك مجد
الشيخ :شو وصلك لألو
مجد :اشتريتو
الشيخ :ليش
مجد :بيلزمني
الشيخ :ومنلك المصاري لحتى اشتريتو
ابتسم تحسين وماحكي .. يمكن بيعرف سر رفيقو
مجد : ورتة هههههه
الشيخ :ورتة ؟؟؟
مجد :اي .. من عمتي يلي بفانزويلا
~ ~ ~
• • •
الشيخ وتحسين ضحكو ضحكة عالية :هههههههههههههه
وقف مجد وقال : انا بدي استأذن
الشيخ : ع المشفى ؟
ابتسم وحك دقنو
الشيخ :خود تحسين معك .. تحسين خلي اختك ياسمين تتصرف وتخليه يشوفا
تحسين :ماشي
ركبو السيارة ومشو ..
مجد :اول مرة بقابل ابوك
تحسين :وشو لقيت
مجد : هههه يلي لقيتو شي عظيم .. عنجد ابوك شيخ .. بس يلي كنت متخيلو انو ممكن لاقي رجال حرس لك ع القليلة خادم صبيب قهوة ... انو عقد مابسمع عن ابوك هيك فكرت
تحسين :ابي عفوي .. ومابحب البروظة .. يعني هي شغلة الرجال والحرس مابتلزمو .. نحنا ولادو ورجالو وخدمو .. بس وقت الجد بينصف رتل من الرجال قدامو
مجد:والله والنعم من هيك رجال ...
تحسين :والنعم منك
مجد: استغربت مانك مخبرو عن موضوع المصاري .. لانو مشالله عنك مخبرو كلشي عني
تحسين :هههه والو يا صاحبي ما دافنينو سوا
مجد :قصدك مطالعينو سوى
تحسين :هههههههه .. اي قلي شوبدك تقول لحبيبة القلب
مجد : مابدي قلا شي بس بدي شوفا من بعيد واطمن عنها ..
تحسين :لاتقلي لساك متنح عند قرارك
مجد :اي والله .. خلص كل واحد من طريق
تحسين :ااخ منك
مجد : لك صحي ابو قلك اختك ياسمين .. ليش اختك بتشتغل بالمشفى ؟
تحسين :اي دكتورة عظمية
مجد : هلأ انت كم عندك اخت
تحسين : بس وحدة
مجد :الله يخليها
تحسين :تسلم ..
مجد :هلأ سؤال والو كان مو بمكانو بس بدي اسألو .. واذا بدك تعصب عصب
تحسين :هههه لا مارح عصب احكي
مجد :والله اختك متل اختي .. اصلا انا مابعرفا بالشكل .. بس عنجد متل مابقول عنها بالمنطقة .. انو مافي بنت بجمالا ..
تحسين : هلأ بتشوفا وبتعرف
مجد :والله ماقصدي شي .. بس انو اختك عنجد عمينضرب فيها المثل بضيعتنا .. فهمت كيف
تحسين : هههههه .. اي فهمت .. لك هنن العالم بتكبرا .. مع انو بلاقيها انا عادية
مجد : ويمكن لانها بنت شيخ
تحسين :مظبوط ..
مجد :الله يستر عليها ويحرسا
تحسين : تسلم
مجد :وعنجد ابوك طالب مهرها ٥٠٠ ليرة دهب
تحسين :هههه اي .. بس بالحقيقة مو هيك .. ابي قال هيك مشان يخترلا رجال عن حق وحقيق والمصاري كلا مجرد كلام .. مشان هيك محدا عم يتجرأ ويطلبها .. بيسمعو بالمصاري بينجلطو
مجد : لك ياريت اهلها لضحى يطلبو مهرها متل مهر اختك والله لادفعلن الف بدال الخمسمية ..
تحسين :الله كريم .. وان شاء الله هالبنت مابتكون غير الك
مجد: ان شاء الله ..
يتبع ......
#الجزء_الاول
لو حبنا غلطة تركنا غلطانين .. ما زال عشقانين .. مع بعض مرتاحين ... مين الي الك مين ... مين الي الك مين ... عن حبنا غلطة
بضيعة حلوة وصغيرة وببيت من هالبيوت
في عالم مجتمعة بهل الغرفة وكلها زلم .. وكانو مجتمعين لشي مهم ... تعو نقرب لنسمع عم شو عم يحكو ...
بكر ابو ناصر :تفضلو ياجماعة شربو قهوتكن
المختار : قبل مانشرب القهوة .. قلنا يا ابو ناصر شو قلتو
ابو ناصر اتطلع ع شب من الموجدين بنظرة كره وحكي : مستغرب يامختار كيف جاي جاها مع هيك واحد
المختار :الشب قصد الله وقصدني وهو رايد هالبنت مشان هيك وفق بيناتن وخلينا نجمعن مع بعض بالحلال ... ومجد شب معدل ومنيح
حكي ناصر : اذا هاد معدل ومنيح .. شو خليتو للمنيح
ابو ناصر :ابني انا عم احكي
ناصر :حاضر ابي
ابو ناصر :مع احترامي الك يا مختار بس هاد شب فلتان وازعر وانا مستحيل اعطيه بنتي لو تطبق السما ع الارض
مجد : بس انا بحبها
ابو ناصر :يحبك برص انت واياها .. اسماع ولاه انا والله متحملك مشان المختار وهالوجوه الطيبة .. والله لولاهن مابخليك تعتب عتبة هالباب عم تفهم .. والله حلوة اخر هالزمان ناسب مجد الازعر حرامي الجاج
وقف مجد معصب وقال: اسمااع ابو ناصر انا تحملتكن كتير وتحملت حكيكن علي .. بس لهون بكفي .. والله يلي لسه بدو يقول حرامي الجاج لطالع لسانو من حلقو
ابو ناصر :شي حلو .. تعال اقتلني .. قوم تعا ليش قاعد
رفع اصبعو بوجهو وقال :والله لو مانك ابوها كنت مانطرت لهلأ ... بس يكون بعلمك هالبنت الي واصلا انا معد بدي اياها برضاكن رح اخدها خطيفة .. انتو يلي جنيتو ع حالكن
ابو ناصر :والله بقوصها قدام عيونك ولاتحلم تحصل عليها
المختار :ياا مجد .. شو هالحكي .. نحنا جايين معك جاها هيك عم تخجلنا قدام الرجل
مجد : مختار حقك علي انت وهالرجال ... بس مانك سامعو لك ماخليت جاها بالبلد الا وجبتا .. ماخليت محاولة الا وجبتا وهو كل مرة بقلعني تقلعية الكلاب وانا عم اسكت كرمال هالبنت وبس والله لولاها مابرحم كل واحد بيحكي علي حرف واحد ها مو كلمة .. لسه حرامي الجاج وحرامي الجاج .. هالشي مر عليه عامات وسنين وهنن ما على لسانن غير هالكلمة
ابو ناصر :الحرامي بضل حرامي
مجد :فشرت
ابو ناصر :الي عم تقلي فشرت ياكلب
مجد :فشرت مليون مرة
هجم ناصر عليه بس مسكوه بسرعة قبل مايوصل
ناصر وهو عم يهدد :عم تقول لابي فشرت يا واطي يا ابن الحرام .. لك تركوني عليه لهل الكلب خليني امسح فيه الارض
مجد : اي انتبه لايطقلك شي عرق يا حضرة المهندس
ناصر : لك ولسه واقف قدامي بكل عين وقحة .. تفوو عليك وعلى شرفك
المختار : اي والله تفووو عليك .. لك الحق علي يلي طاوعتك وجيت معك .. ياعيب الشوم بس .. روح انقلع من هالبيت ولاااه .. لانو وجودك عم يدنث هالمكان
مجد :حتى انت يا مختار
المختار :لك انا من الاول ماني طايقك ولا حدا بهل الضيعة بحبك لا الك ولا لأهلك بس لانك دخلت علي قلت رح اجي معك وماخجلك .. وعرفان مليون بالمية انو ابو ناصر مارح يعطيك ... والله انا لو عندي كلبة مابعطيك اياها
ابو ناصر :لك لساااك وااقف .. انقلع ولااه
قربو هالزلم وصارو يدفشوه لمجد لبرا لحتى قلعوه برات البيت وطبشو الباب بوجهو
ضل واقف مكانو بقمة غضبو ومقهور .. كان رح يجن ليش هيك عاملووه .. بدو يفش قهرو .. صار يتطلع حواليه بدو يكسر بدو يخرب ..
اتطلع ع جنب كان في كم كرسي محطوطين فوق بعضن .. قرب منن ورفسهن برجلوو .. وعلى حرف المسطبة مصفوف اصص زريعة وفيها ورد
سحب كرسي وصار يضربن بالكرسي ليوقعو ع الارض وتكسرو ...
هنن جوا سامعين صوت التكسير والتخريب بس ماحدا تجرأ يطلع ويوقفو عند حدو .. كان متل المجنون .. صوت انفاسو وهو عم يلهث من الغضب وكأنو شي ذئب وكشر عن انيابو .. ما فش قهرو لسا .. سحب المسدس وصار يقوس ع دواليب السيارات والمتورات .. لحتى قوس عليهن كلن .. وصار يصرخ ع ملااات صوتو لينفث عن غضبو ..
مجد :عاااااااااااااااااااا .... ياااكلاااب ... انا بفرجيكن ..
رجع المسدس ع جنبو وراح ركب سيارتو . دورها وصار يشفط بدواليبها قدام البيت لحتى ريحت الدواليب عبقت بالمكان .. وبعدها انطلق والغبار وراه بيعمي
__________________
جوا
بكر :هاد هو الشب يلي جايين معو جاها يامختار
المختار :مشان الله لاتواخذنا يا ابو ناصر والله حقك علينا
قعد بكر وبدنو مهزوز وقال : تفضلو يا رجال لاتواخذونا
حكي زلمة :انت لاتواخذنا يا ابو ناصر
بكر :بس مستغرب كيف جيتو معو ..ونزلتو مستواكن لهيك واحد
حكي زلمة:لاتواخذنا مرة تانية .. واستر ماشفت منا
بكر :والله ماشفت منكن الا كل خير .. قاعدين ع وين رايحين
زلمة : شفناكن بخير
طلعو الرجال وبكر وابنو طلعو وراهم واتفاجئو بالخراب يلي سببو مجد
بكر :الله يكسر اديه .. الله يشلّون
ناصر :بس لو تركتوني عليه لهل الواطي
حكي زلمة :لاحول ولاقوة الابلله .. عم نقول شو هالقواس طلع مقوس ع الدواليب
قربو كلن من آلياتن وهنن عميقلبو كفوفهن بقهر
المختار :خلص ياجماعة عندي ولا يهمكن .. انا يلي طاوعتو وجيت وجبتكن معي وانا يلي رح اتكفل بتصليحن
:ولايهمك يامختار عرضية .. يلا بالاذن ياجماعة
مشو وراحو كلن ع بيوتن .. بس المختار ضل واقف وماراح
المختار : بدي احكي معك كلمتين على انفراد لو سمحت
ابو ناصر :طبعا .. تفضل تفضل يا مختار .. ناصر قلن يعملولنا شاي
ناصر :حاضر ابي
دخل ناصر لعند اهلو يلي قاعدين بغرفة تانية وهنن عبارة عن بنتين وامن ... واول مافات وقفو بوجهو الا بنت كانت قاعدة وضاربة بوز ..
ام ناصر :قلي شوصاير برا وشو هالقواس
ناصر :مين غيرو حرامي الجاج
واتطلع ع اختو يلي قاعدة ومتجاهلتن : عاجبك هيك ضحى خانم .. شقفةازعر مابيسوا فرنكين بسوق الغلا عم يهينا بقلب بيتنا .. وخرب الدنيا برا .. لك مقوس ع دواليب السيارات يلي جاي معو .. والعالم رجعت مشي .. هاد هو يلي بدك ترتبطي فيه
ضحى: ولييش عم تحاسيني الي انااا شو دخلني
امها هلا :الله لايوفقك .. كلو من تحت راسك بدك تفضينا انتي
اختها ندى: طولو بالكن شوي .. يعني ضحى شو دخلها .. شقفة مهووس
ناصر :من وين بدا تجي طولة البال وهالكلبة هديك مالقت غير هالعرصا لتجبلنا اياه صهر
ضحى :لك ليش ماعم تفهمو انوو مادخللني وماقلتلو يجي
ناصر :خرسي .. لو مانك عاطيته الضو الاخضر مابيجي بهل الوقاحة
تركتن وفاتت غرفتها
ناصر :عملولنا شاي
ندى :مين ضل
ناصر :المختار .. يلا لاتطولو
ورجع لعند ابوه والمختار
المختار : قلك يا ابو ناصر هالكلمتين وماتزعل
ابو ناصر :احكي مختار احكي
المختار :المستورة بنتكن بتحبو وهية يلي عم تعطيه الضو الاخضر ليجي يعني لو مانو ماخد الموافقة من البنت مابيجي بهل الجرأة .. وانا شوف عيني شفت بنتك معو .. قلت مزال رايدين بعض بالحلال خلينا نسعى معو احسن مايصير شي يغضبك ويغضب رب العالمين
ابو ناصر وقف : شووو عم تحكي يامختار
المختار :مشاان الله اهدى وروق
وقف ناصر وقال :الكلبة الحقيرة والله لاشرب من دمها
المختار وقف قدام الباب يلي بودي ع البيت وقال اقسم بلله مابتمرقو من هالباب الا عجثتي
ابو ناصر :مشاان الله يامختار بعد من قدامي .. لانو معد استحمل بدي اقتلا واخلص منها
المختار :حلفتك بالله انو مابتقرب عليها
ناصر :عمي مشان الله بعد
المختار :جاير عليكن الله انو محدا بحكيها
تراجع ابو ناصر لورا وقال :الله يقصف عمرا .. الله ياخدا ويريحني منها
قرب منو المختار وقعدو ع الارض لانو المد عربي ومانو كنبايات
ابو ناصر : الله ياخدا ويريحني منها
ناصر :ابي انا يلي رح اخدلا روحا طول بالك علي
المختار :شوو حكينا يا ناصر
ناصر :لك الكلبة بنسألا بتقول مادخلني ومابعرفو
المختار :لكن شوبدا تقول ..
ابو ناصر :بس فشرت تاخدو .. والله لخليها العمر عندي ولابجوزا لواحد متلو فلتان ابن حرام سكرجي ابن سكرجي حرامي .. لك شوووفي صفات منيحة لحتى الواحد يعطيه شووفي
ناصر : بابا طول بالك .. كلشي بينحل
ابو ناصر : لك كيف بدو ينحل وهالكلبة هية يلي عم تقولو يجي .. وانا بقول ليش مانو عم يزوق ع دمو وكل مرة بيبعتلنا عالم لحتى يخطبها
المختار :طيب شي مرة سألتوها اذا بدا او لأ
ابو ناصر :لا ولامرة .. كل مرة نقلعو بدون ما نسالها لانو انا بنفسي ماني رضيان بدك اياني اسألها
المختار : ابو ناصر بدي منك تهدى وتطول بالك .. والبنت ماعملت شي غلط لحتى تتهورو فيها ..
ابو ناصر:....
المختار :عم تسمعني يا ابو ناصر
ابو ناصر : اي عم اسمعك .. بس اول ماقلتلي فار دمي شوي بس اطمن شو ماكان مارح ائذي بنتي .. لانو مابتفهم ولابتعرف مصلحتا
المختار : طول عمري مابقول عنك الاانك زلمة محترم وبتفهم ... وانت ياناصر
ناصر : منت علينا عمي المختار .. ومتل ماقال ابي حيوانة ومابتفهم .. ونحنا رح نوعيها
المختار :عفارم عليك .. بس هي كلمة حيوانة ماحبيتها منك .. انت شب متعلم وفهمان وصرت مهندس قد الدنيا وبينرفع الراس فيك بهل الضيعة
ناصر :تسلم يا عمي
المختار :انا صار لازم روح .. بس بدي توعدوني انو ماتقربو ع البنت
ابو ناصر : لاتوصيني ع بنتي يا مختار
المختار :قبل ماروح بدي تعطوها الامان
ابو ناصر : خلص لا تفكر .. وياسيدي عليها الامان هيك منيح
المختار :كتير منيح .. وانت يا ناصر
ناصر :عليها الامان .. لاتقلق عمي .. مابصير الا يلي بيرضيك
المختار :والنعم منكن والله .. يلله انا بالاذن
________________________
ضحى رايحة جاي بغرفتها وبايدها موبايلا عم ترن عليه
ضحى :لك رد يا مجد .. رد ... لييش عملت هيك .. قلتلك لاتجي ... اووووف
رمت التلفون ع التخت بعد محاولات اليائسة انها تتواصل معو
دخلت ندى وقالت : تعي بدو يحكي معك البابا
ضحى :جيت .. تفضلي قدامي (وبقلبا:الله يجعلو خير)
راحت مع اختها ع غرفة القعدة .. لقت اهلها قاعدين ع الارض .. قربت وقعدت معن
ضحى :اي بابا قلي
بكر : ايمت بدنا نخلص من هالواطي
ضحى :انا مادخلني ومابعرف
بكر :حاولنا معو كتير .. شي نقلعو وشي نشتكي عليه وهو كل مالو بزيد عنادو وجحشتنو ..
ضحى :.......
بكر : يعني واحد متل هاد جينا معو بكل انواع التهديد وهو متل التور الهايج لا عم يزوق ولابيعرف شو جنسو للزوق
ضحى :وشو الحل
بكر :قررنا نجي معو ونسايرو
لا اراديدا انرسمت ابتسامة على وجه ضحى والكل انتبهلا بس بسرعة مسحتا ..
بكر :انا قررت اعطيه .. شو رأيك انتي بتقلبي فيه
اطلعت بوجوه الكل .. والكل صامت
ضحى :متل مابدك بابا .. اذا هالشي لتخلصو من وجع الراس فأنا موافقة
وقف ناصر وانقض على شعرها ومسكها منو وصار يقول :سمعتت .. سمعت يا بابا .. قال موافقة .. قاال مووافقة
ضحى: لك شوووفي تركني
ناصر :ولسه عم تقولي شوووفي ياكلبة ياحقيرة .. لك جبتيلنا العار يا وسخة
قامت امها لتفكها .. بس بكر مسكها من ايدا ورجعا لمكانا
بكر :لك الله يغضب عليكي .. طلع حكي المختار مظبووط
امها :ايوو حكي .. شووفي
بكر :بنتك عم تطلع وتفوت مع هالازعر قدام كل اهل الضيعة وماضل حدا الا وعم يحكي عليها
امها :شووووو .. يا فلتانة وطيتي راسنا ..
قامت بسرعة لعندها وصارت تضربها بأديها التنتين .. عاديها يلي عم تخبي فيهن وجها وتبكي
ندى :حرراام عليكن خلينا نسمع منها
ناصر :شوو لسه بدك تسمعي .. ماسمعتيها عم تقوول موافقة
امها :لك الله يحرق البنات ..الله يحرقن .. لك اذا ماجابت العار والمعيار بتجيب العدو لباب الدار .. لك الله يخلصني منك
رفعت راسا ضحى وشعرا لساتون بقبضة ناصر وقالت :اي اي .. بحبو وبدي اياه وغيرو ماباخد .. دبحوني قطعوني .. غيييروووو مابدييي .. عم تفهمووو .. انا بحبو بحبووووو
ماشافت حالا الا راحت تتمردغ ع الارض من الكف يلي اجاها من اخوها ...
ناصر :يحبك برص انت واياه ..
نزل عليها وصار يضربهامتل المجنون .. مافي غير ندى تشجعت وقربت تبعدو عنها بس ما قدرت ...
ندى : لك تركهاا حررام عليك رح تموت بين اديك
بكر :تركيه يربيها ...تركييه
ندى : لك حررام عليكن ..
ناصر : يحرم جلدا عن عضما لهل الفلتانة .. وانا قول ليش كل مابيجي عريس بتاكل هوا بتقول بدي كمل دراستي .. لك ايو دراسة يا فاجرة ايوو دراااسة
ومع كل كلمة يجيها كف على وجها
فجأة وقف وهو مبحلق فيها
ناصر :ضحى
كانت فاقدة الوعي بين اديه والدم عم يطلع من تمها وانفها ..
صار ينكعها :ضحى ... يا ضحىىى
قامو بسرعة عليها وصارو يصحوها .. بس هية ماعم تحس نهائيا
امها زمرد: لك شوو صابا البنت .. يا ابو نااصر البنت مدري شبهاا
ندى :ضحىى اختييي
بكر خايف وماعم يحكي
ندى :لك قتلتا .. قتلتا ..
قرب بكر منها ورفعها وقرب من وجها لقاها عم تتنفس
بكر :عايشة .. اتصل باخوك يحيى بسرررعة ... بسررعة
قام ناصر بسرعة واتصل باخوه .. وهو متوتر وعيونو على اختو يلي عم يحاولو يصحوها وماعم تفيق
ناصر :الووو يحيى .. تعاال بسرعة .. ضحى مدري شبها
________________//______
يحيى كان قاعد على كرسي بغرفتو بالمشفى وبايدو فنجان شاي .. لما قلو هيك .. نفخ الشاي من تمو ووقف على رجليه وقال :شووو .. شبا
ناصر :لك .. انااا ضربتا
يحيى :حيووان ليش لتضربااا
ناصر :قصة طويلة .. المهم شو نعمل
يحيى :شووو شو تعمل .. بسرعة جيبوها ع المشفى انا ناطركن
ناصر : مافي شي نجيبها فيه
يحيى :وين سيارتك او سيارة ابوك
ناصر :مبنشرين
يحيى:لك شووو صاير عنكن
ناصر : ماوقتو اخي .. شووو الحل .. تعال
يحيى :رح ابعتلكن سيارة اسعاف يلا يلا سكر
سكر الخط وطلع يركض بكوريدو المشفى
______________________
مجد وصل بسيارتو يلي هية بيك اب شفر ليه لقدام قهوة بضيعة تانية .. فتح الباب ونزل لعند شبين قاعدين على طاولة
مجد :تحسين قوم
تحسين :ع وين
مجد :بدي اشرب
تحسين :شوبدك بالشرب هلأ ... قعود اشرب معنا فنجان قهوة .. وروق دمك
مجد :مابدي روق شي دمي .. بتروح معي ولا لأ
تحسين :شو صاير معك .. قعود ولوو
مجد :خلص بلا بلا
تركو ولف ضهرو .. بس تحسين مسكو من ايدو
تحسين :ع وين رايح
مجد :اشرب سم الهاري بشي مكان
تحسين :ما عأساس بدك تبطلو
مجد :اي بدي بطلو بس هو ماعم يبطلني
تحسين :ههههه .. تعا معي لقلك
مجد :ع وين
تحسين : لعنا ع البيت
مجد.: مالي مراق
تحسين :امشي ولااه .. وبعدين ابي قلي بدو يشوفك
مجد :ابوك ؟؟شوبدو فيني
تحسين : مابعرف هو قلي بدي اتعرف عرفيقك مجد
مجد :وابوك شو عرفو فيني
تحسين :انا خبرتو عنك
مجد :الله لايعطيك العافية ايه ..
تحسين :لك ليش
مجد : اكيد بدو يطرقني شي بهدلة ويقلي بعد عن ابني
تحسين :وليش ليقلك الك مايقلي الي
مجد :مابدو يكسرلك شوكتك
تحسين :دخيل شوكتك انا .. يلا امشي قدامي
مجد :وحد الله يا زلمة
تحسين :لا اله الا الله .. شبك
مجد: لك ابوك شيخ عشيرة شوبدو من واحد ازعر متلي
تحسين : بشرفك بلا حكي الزعرنة هاد .. وامشي قدامي قال ازعر قال
مجد :مانك مصدق
تحسين :لا .. لانك مو ازعر
مجد :لانك بتحبني عم تقول هيك
تحسين :فشرت حب واحد متلك
مجد :مزال مابتحبني ليش ماشي معي
تحسين :لانك ازعر
مجد :تضرب بهالشكل ايه
تحسين :امشي .. امشي
مجد :لك ع وين
تحسين :الشيخ ناطرك
مجد : الله يمضي هالليلة على خير .. تفضل مشينا
مشو جنب بعض
تحسين :ليش متشائم وكأنو ابي بدو يدبحك
مجد : لك انا ولاد ضيعتنا مابطيقوني وبسبو علي .. بدك تقنعني انو ابوك الشيخ نمر بجلالة قدرو بدو يشوفني ومابدو مني شي .. لك انا اصلا مستغرب انو انت كيف مرافقني
تحسين :هههه لانك ازعر ...واهل ضيعتكن بجم مابيفهمو ... مليون مرة قلتلك جيب عليتك وتعو سكونو عنا مارضيت
مجد : لا بدي ضل بضيعتي احسن بدي ضل شوكة بحلقن لاهل هالضيعة الكلاب
ركبو سيارة مجد وانطلقو
تحسين :بدك تضل مشان تكون شوكة بخلقن ولا مشان الغوالي
مجد :ايو غوالي وايو هوا ..
تحسين :اوف .. اوف .. وين راح كلامك انو بدي حارب الدنيا كرمالا ومارح اخد غيرها
مجد :معد عندي صبر ياصاحبي ... مليت منها ومن اهلها ومن اهل الضيعة كلا
تحسين :لك شو صاير احكيلي
مجد :كنت عندن اليوم
تحسين :تخطبا ؟؟
مجد :اي .. واخدتلن جاها طويلة عريضة
تحسين :وتقلعت كالعادة ماهيك ؟
مجد :لك يضرب هالعمر .. مابس تقلعت الجاها قلبو ضددي .. اصلا هنن من الاول مابطيقوني .. بس انو عم يجاملوني .. بس بين وجهن الحقيقي لما بهدلوني وقلعوني برات البيت .. لك اااخ بس اااخ .. لولا هالنتفة عقل يلي ضالين براسي كنت قوست عليهن كلن .. بس والله خوفي من الله مامن شي تاني
تحسين :اي بدك تهدي ..
مجد :معد بدي هدي خلص .. هديك الضيعة ويلي فيها معد يعنوني بشي .. بس ماني طالع بس مشان ضل شكوة بحلقن ما اكتر
تحسين :وضحى ؟؟ عم تحكي جد بخصوصها
مجد :اي والله جد .. معد بدي اياها .. نزليت كتير كرمالها ... كرامتي صعبت علي ... انا علمت يلي علي ودافعت عن هالحب بكل طاقتي .. بس ماضل طاقة تحمل
تحسين :خدها خطيفة
مجد : مابتقبل راسها كبير ..
تحسين :طيب اخر محاولة
مجد :مابعرف ... هلا تركني ظبطها بعقلي بالاول .. لك اي وين صار بيتكن
تحسين : اي اي بوجهك
_________________________
ع طراف ضيعة مجد
في مزرعة كبيرة وبقلب هالمزرعة في بيت كبير
واقفة صبية من عمر ضحى على الشباك بمرقة سيارة الاسعاف طالعة من الضيعة ..
زينة : مدري شوفي بالضيعة
امها من وراها : شوفي
راحت وقعدت جنب امها ع الارض ع المد العربي الفخم .. وقالت :ماسمعتي سيارة الاسعاف
امها نجوى :ما انتبهت ..
زينة : اي كانت طالعة من الضيعة .. معقول مجد قاتل شي حدا
نحوى :هههه بيعملا .. بس اخوكي اذا قتل شي حدا بيسعفو .. صحي ازعر ومشكلجي بس قلبو طيب
زينة : اي والله ..
نجوى :خطي وحظ ما الو
زينة :اييه .. بيفرجها الله .. وينو مراد
نجوى : بالخيمة مع الشغيلة .. عم يسهرو
(الخيمة هية عبارة عن خيمة مصنوعة من قصب مكونة من غرفة وحدة .. عاملينها الشباب ليسهرو فيها بالصيف .. وممدودة مد عربي وبالنص في منقل نحاس وعدة قهوة المرة .. يعني عقد مو حلوة مابتبين انها خيمة من الداخل ) وتقريبا متل هي الخيمة موجود ببعض بيوت الضيعة والضيع المجاورة .. مشان الشباب يلي بسهرو وبأركلو .. وبضلو بعاد عن البيت وخصوصا اذا فيه حريم
_________________________
بالمشفى
وقف يحيى جنب اختو يلي بلشت تفيق .. فتحت عيونا وقالت : انا وين .. شوفي
يحيى :كيف صرتي اختي
اتطلعت بحيى واتطلعت بالغرفة .. واتذكرت شو صار معها
ضحى : ......
يحيى :انتي منيحة ..لاتخافي
اجت ترفع حالا وهية عم تستند ع ايدها صرخت صوت
ضحى:ااااخ ايدي
يحيى :من وين
مسكت ايدها من عند معصم وقالت هاد .. هون
يحيى :يمكن مفكوشة لاتخافي ع المفصل مابكون في كسر .. بس هلأ بنده للدكتورة ياسمين تشوفك
ضحى : شفت اهلك شو عملو معي
يحيى : انتي ليش عملتي هيك
نزلت راسا وهية عم تبكي وتقول : بحبو .. بحبو
يحيى :مالقيتي غير هاد تحبيه يا اختي
ضحى : لك مجد مو متل مانك شايفينو .. مجد منيح كتير
يحيى :انتي لانك بتحبيه شايفته منيح .. بس هو لأ بالعكس مانو هيك ابدا .. لك شو جابو الك .. انتي متعلمة ومثقفة هو الحرف مابيعرف يفكو .. انتي بنت اهم عيلة بهل الضيعة .. هو ابوه كان قمرجي وسكرجي .. وامو الله اعلم مين هية .. واحد حرامي ازعر فلتان .. بدك ترتبطي بهيك واحد .. هاد هو الاب يلي اخترتيه لولادك
ضحى :مابهمني لا ابوه مين كان ولا امو مين بتكون .. يلي بهمني هوو.. وكمان والله مانو حرامي يا اخي
يحيى :انتي مابتعرفيه .. لك من كم سنة بس كان ميت من الجوع .. بين يوم وليلة صار معو مصاري مابتاكلا النيران واشترى اراضي ومزارع .. من وين اجو هدول ااه .. قوليلي من وين اجو
ضحى :قلي ورتة
يحيى :هههههههه وانت صدقتي .. من وين بدا تجيه الورتة اذا ابوه كان وحيد .. لاهلو
ضحى :انت من وين بتعرف
يحيى :اسألي اي واحد كبير بهل الضيعة بيحكيلك ..
ضحى :وينن اهلي
يحيى :برا .. انا ماخليتن يفوتو قلتلن بدي احكي معك لحالنا .. بركي بتقتنعي مني ... اي قوليلي اقتنعتي
ضحى سكتت
يحيى :هههه راسك كبير ... ليكي هلأ اهلك رح يفوتو لاتعصبيهن وشو ماقالولك قولي اي وماشي ... ماشي
ضحى :ماشي
راح لعند الباب وفتحو .. وطلع بوجهو اهلو
يحيى : فوتو بس لاتحكوها شي .. انا حكيت معا وانشالله تقتنع
زمرد :ماشي ماما .. بعدلنا هيك خلينا نشوفا
فاتو لعندا ..ابوها واخوها ناصر وندى وامها ..
نزلت راسها ضحى بتجاهل
زمرد (بعتب) : كيف صرتي
ضحى: من الله بخير
ناصر :لسه بدك اياه لهادك الواطي ولا تعلمتي درس
ضلت ساكتة
بكر :ما وقتو هالحكي هلأ ..
قربت ندى من اختها وحطت ايدها على خدها وقالت :كيف صرتي ياحبيبتي
ابتسمت ابتسامة مجاملة وقالت :منيحة .. لاتقلقي علي
____________________
بغرفة تانية بالمشفى
دق يحيى الباب وفات .. كانت دكتورة متحجبة حلوة كتير بل اكتر من حلوة قاعدة ورا مكتبها .. ولابسة نضارات ومعها كتاب سكرتو لما اندق الباب
ياسمين :اهلين يحيى
يحيى : شو عم تعملي حبيبتي
ياسمين : يحيى بترجاك بلاها هي حبيبتي
يحيى : طيب ليش ماعم تخليني قرب منك
ياسمين : قلتلك وضعي ووضع ابي
يحيى : انا مستعد روح اخطبك .. بس انتي يلي ماعم تخليني
ياسمين : ماعم خليك لانو مابتقدر على شروط بابا .. يحيى اسمعني انا بحبك وبموت فيك .. بس خايفة مانكون لبعض ويكون حبنا عذاب للتنين .. مشان هيك خلي مسافة بينا .. انا بابا هلأ اذا بجبلي اي واحد وبقلي هاد رح يكون زوجك مارح اعترض اصلا مارح استرجي اعترض ..
يحيى :طيب شو هية شروط ابوكي .. بركي بقدر عليها
ياسمين :لك انا محدا عم يتجرا ويطلبني بسبب المهر بس .. بابا حاطط مهري ٥٠٠ ليرة دهب
يحيى سكت
ياسمين :ما تفاجئت ؟
يحيى :لا .. لانو بنت متلك متعلمة ودكتورة وبنت شيخ عشيرة واجمل مرى بشوفا بعمري ... ٥٠٠ ليرة قليل عليكي
ياسمين : شكرا هاد من زوقك
يحيى :بس انا مابظن ابوكي يكون عم يحكي جد بهل الخصوص
ياسمين :والله مابعرف .. المشكلة مابسترجي اسألو بهاد الموضوع نهائيا .. انا بقول هاد الشرط لحتى بيعد عني الجبناء والطماعين .. ويمكن اذا لقى الشخص المناسب يطيعني اياه بلا مهر
يحيى :وانا
ياسمين :انتي اكتر شخص مناسب بالنسبة الي .. وياريت ابي يقبل فيك
يحيى : طيب خليني جرب شو خسرانة
ياسمين : واذا قلك بدي مهرها ٥٠٠ ليرة دهب .. من وين بدك تجيبن
يحيى : سكت
ياسمين : صح بابا يمكن هي خدعة عاملها .. بس يمكن تطلع جد .. والله مابعرف انا .. انا هي الشغلة رح تسببلي عقدة نفسية .. مشان هيك ماشية متل مابقلي امشي .. وعم حاول قد مافيني ما اتعلق فيك لانو هو يلي بدو يحددلي طريق حياتي .. بابا عطاني الحرية طول عمري وهو يلي وصلني لهون .. الا قصة الزواج هي الشغلة الوحيدة يلي بدو يتحكم فيها .. مو بس انا .. انا وكل اخواتي الشباب
سحب الكرسي وقعد وهو مقهور
ياسمين :لاتزعل الا الله مايفرجها .. او انا شي يوم اتشجع واحكيلو
يحيى : خليها على الله .. وانا رح اعمل جهدي اجمع مهرك .. ورح اطلبك لتصيري ملكي
ياسمين : عم تحكي جد
يحيى :والله جد .. انتي بتستاهلي اكتر من هيك بكتير .. ويلي لازم يحصل عليكي لازم يتعب
_________________________
ببيت ريفي اشبه بالقصر .. داهل غرفة كبيرة عبارة عن مضافة .. طولها حوالي العشرة امتار وممدودة مد عربي بس من افخم الانوع من حيث الالقماش ومن حيث التفصيل ومن حيث السجاد يلي بيدعس عليه بتغرق الرجل جواتها.. قاعدة بالصدر رجل ستيني .. لابس كلابية من الحرير وفوقها عباية كمان من الحرير .. قاعد وقدامو لابتوب وعم يتفرج عليه .. بنقرب من اللابتوب .. بكون ظاهر من الشاشة ياسمين ويحيى يلي قاعدين وعم يحكو
ياسمين :اي قلي كيفا اختك
يحيى :منيحة .. اي نسيت .. بدي قلك تشوفيلها ايدها عم توجعها عند المعصم
ياسمين: مين عامل فيها هيك
يحيى :قصة طويلة
ياسمين :حكيلي
.......................
اندق باب المضافة .. والشيخ سكر اللابتوب وقال :فوت
انفتح الباب ودخل تحسين ومجد
تحسين :السلام عليكم
مجد :السلام عليكم
جلس قعدتو وقال :وعليكم السلام ورحمة الله وبركاته
قربو صافحوه وهو قاعد وقعدو جنبو
تحسين : ابي هاد مجد
مجد ابتسم وهز براسو
الشيخ نمر ابو خالد (ابتسم) : اهلين يا ابني .. حكالي عنك تحسين كتير .. قلت لازم اتعرف عليك
مجد ضحك وقال :مابشرفك تتعرف ع واحد متلي
ضحك الشيخ وقال :هههه ليش
الشيخ وجهو ضحوك ومانو عصبي متل ماعم تتخيلوه
مجد: انا معروف بكل المنطقة بالازعر او حرامي الجاج
الشيخ : هلأ اكيد مانن جايبين هالألقاب من الفضى
مجد :وانا ماعم انكر .. مشان هيك عم قلك مابشرفك
الشيخ :ههه لا لا .. بشرفني وزيادة .. لانك رجال بتعرف ليش .. لانو الرجال ببين بالموقف الانسانية .. كمان شغلة السرقة بعرف انك بطلتا من زمان
مجد :مظبوط .. الحمد لله الله غناني عنها .. هههه بس لسه شغلة الزعرنة مابطلتا
الشيخ :هههههه حتى هي ما اسمها زعرنة .. هي بتدل على شجاعتك وانك مابتهاب حدا
مجد :والله مابعرف شو قلك .. بس اذا انت شايفني منيح فهي شهادة بعتز فيها
الشيخ :قلي تحسين انك بتحب بنت واهلا ماعم يعطوك
مجد : اي والله
الشيخ :مشان سمعتك؟
مجد : في اكتر من هيك ..
الشيخ :والبنت بتحبك
مجد : هههه هية الوحيد يلي بتحبني من كل هالضيعة.. مشان هيك انا متمسك فيها
الشيخ : لانها شافتك متل ماشافك تحسين وانعجب فيك واجا وحكالي عنك .. وانا هلأ عم شوفك بنفس النظرة
مجد : هاد من لطفكن
الشيخ : وشوبدك تعمل هلأ
مجد: اهلها رافضين نهأئيا بسبب مسموعياتي ومسموعيات ابي ..
الشيخ : مابتجوز عليه غير الرحمة
مجد :بتعرفو ؟
ابتسم الشيخ
مجد : بس مايكون عمل معكن شي فصل ناقص
ابتسامة الشيخ صارت ضحكة
مجد :هههههه عالزمة شو عامل معكن
الشيخ : فصل
مجد : قلبي حسني من اول ما ابتسمت
اندق الباب وفات شب بعمر ١٥ معو شاي ..وشكلو اخوه لتحسين .. ضيفن وطلع
الشيخ :لاتفكر بالموضع .. مضى وراح
مجد :الله يحرق صفحتو .. الله وكيلك كلشي صار معي بحياتي هو سببو .. انا شو الي خلاني اسرق جاج وغيرو وصير حرامي .. او صير ازعر و فلتان
الشيخ : قلنالك مابتجوز عليه غير الرحمة ..
مجد :الله يرحمو مع انها ماطالعة من قلبي
الشيخ :والله انك ابضاي .. بس طبعا مانك طالع لابوك .. بتكون طالع لخوالك
ضحك مجد بس ماحكي
الشيخ تابع حكيو وقال :العرب قديما كانو لما يسألو عن شب .. اول شغلة كانو يسألو عليها احزر شو هية
مجد :عن شو
الشيخ :لا عن مسموعياتو ولا عن اهلو او ابوه .. ولا عن وضعو المادي
مجد : لكن عن شو بيسالو
الشيخ :بيسألو مين خوالو .. لانو شو بقول المتل .. الولد لو بار تلتينو للخال
مجد :اي مظبوط
الشيخ :اي يامجد قلي مين خوالك
مجد : بتصدق ياشيخ اذا قلتلك انا امي مابعرفا ولا بعرف مين بتكون
الشيخ : اي بتذكر انو ابوك كان يتزوج المرى فترة قصيرة بس هية كانت تطفش منو وتهرب ..ماوحدة تحملتو
مجد :في خالتي تحملت وقعدت
الشيخ :عندها بنت ماهيك
مجد :اي
الشيخ :يمكن مشان بنتها .. البنت غير الشب ..
مجد : اي مظبوط .. هية كانت تقول عطول انو تحملت ابوكن مشان هالبنت وبس .. ولو ولد كنت تركتها وطفشت
الشيخ :كم اخ انتو
مجد : ٣ .. شبين وبنت .. وكل واحد من ام
الشيخ : ابوك تزوج بحياتو اكتر من ٣
مجد :هههه بعرف بس هدل التلاتة بزرو منو ♧♧
خالتي قالتلي انو عحسب حكي اهل الضيعة .. انو امي ضلت عند ابي جمعة .. واجو اهلها اخدوها .. قال بوقتا امي كانت حامل فيني .. واول ماولدتني اخواتها جابوني ورموني لابي ..بهل الوقت ابي كان عندو امو لمراد وكانت كمان حامل ع وجه ولادة .. ولدت مراد وتركتلو اياه وطفشت .. وصار يتزوج ويطلق لحتى اجت خالتي نجوى وحبلت بهل البنت وضلت ربتنا
الشيخ : ماعندك فضول تعرف مين هية امك
مجد : اي لكن .. اكيد عندي ..معقول في حدا مابحب يعرف مين هية امو
الشيخ : مانك حاقد عليها
مجد : ابدا .. ومابلومها .. لانو عحكي العالم ابي ماكان بينحمل .. واكيد تعذبت معو
الشيخ :قلتلك انك رجال .
مجد :ههه تسلم
الشيخ :اي وشو قررت تعمل مع البنت يلي بتحبا
مجد :خلص قررت اتركها
الشيخ :بهل البساطة
مجد :لا والله مابهل البساطة .. بس خلص تعبت ومليت
الشيخ :انت هلا معصب .. ولاتاخد قرار وانت معصب .. هي نصيحة من النصايح يلي كان حقها جمل
مجد : بس انا ماني معصب
الشيخ :مبلى معصب وكتير .. مشان هيك لاتحكي شي وبكرا تتراجع عنو
رن تلفون مجد .. سحبو من جيبتو وكان مكتوب العقيد
مجد :بالاذن بدي رد ع المكالمة
الشيخ :احكي براحتك
مجد :الو .. اهلين سيادة العقيد .
العقيد :كيفك حبيبنا
مجد :تمام .. قلي في شي
العقيد : ضحى
مجد :شبها
العقيد :بالمشفى .. اخوها ضاربها
وقف مجد وقال :شوووو
العقيد : بس هية منيحة اطمن
مجد :منيحة منيحة ..ولا في شي مابدك تخبرني
العقيد :لا منيحة لاتخاف ..
مجد :الكلاب عم يتقاوا عليها
العقيد :اي هدي ولاتضوج شغلة مو محرزة
مجد :وكيف عرفت
العقيد :شو هالسؤال حبيبنا .. نحنا بنعرف كلشي
مجد :عراسي والله .. ومشكور
العقيد : بدنا خدمة تحرز شريك
سكر مجد وقعد
تحسين :شوفي
مجد :اهلها ضاربينا .. وهلأ هية بالمشفى
تحسين :لاحول ولاقوة الابلله
مجد : عأساس عيلتها متعلمة وبتفهم
الشيخ :اهدى ابني .. اهدى .. العلم مو كلشي .. وكمان الفهم فضلوه ع العلم
مجد :اقسم بلله جاي عبالي روح طحبشن كلياتن ..
الشيخ :شو شايف انقهرت عليها
مجد :معقول ما انقهر عليها وهي قلبي
الشيخ : صغيرة .. بتكون فورة غضب
مجد : وبركي رجعو ضربوها .. انا مابسمح تتأذى بسببي
الشيخ :لا مارح يضربوها .. ولو بدن ياذوها اكتر من هيك ما بياخدوها ع المشفى
تحسين :كلام ابي مظبوط ..
مجد : لازم شوفها واطمن عليها
الشيخ :بتطمن عليها .. بس هلأ روق
مجد :من وين بدو يجي الرواق
تحسين : مين يلي حكي معك
مجد : العقيد سليمان
الشيخ بصدمة :العقيد سليمان .. رئيس فرع الامن بالمحافظة ؟؟
مجد :اي هو
تحسين :العما شو انك داهية وشو وصلك لرئيس الفرع .. لك لو رئيس مخفر هون بالضيعة كانت انبلعت بس العقيد سليمان ماغيرو عم يتصل ويطمنك عن حبيبتك
ضحك مجد
الشيخ :شو وصلك لألو
مجد :اشتريتو
الشيخ :ليش
مجد :بيلزمني
الشيخ :ومنلك المصاري لحتى اشتريتو
ابتسم تحسين وماحكي .. يمكن بيعرف سر رفيقو
مجد : ورتة هههههه
الشيخ :ورتة ؟؟؟
مجد :اي .. من عمتي يلي بفانزويلا
~ ~ ~
• • •
الشيخ وتحسين ضحكو ضحكة عالية :هههههههههههههه
وقف مجد وقال : انا بدي استأذن
الشيخ : ع المشفى ؟
ابتسم وحك دقنو
الشيخ :خود تحسين معك .. تحسين خلي اختك ياسمين تتصرف وتخليه يشوفا
تحسين :ماشي
ركبو السيارة ومشو ..
مجد :اول مرة بقابل ابوك
تحسين :وشو لقيت
مجد : هههه يلي لقيتو شي عظيم .. عنجد ابوك شيخ .. بس يلي كنت متخيلو انو ممكن لاقي رجال حرس لك ع القليلة خادم صبيب قهوة ... انو عقد مابسمع عن ابوك هيك فكرت
تحسين :ابي عفوي .. ومابحب البروظة .. يعني هي شغلة الرجال والحرس مابتلزمو .. نحنا ولادو ورجالو وخدمو .. بس وقت الجد بينصف رتل من الرجال قدامو
مجد:والله والنعم من هيك رجال ...
تحسين :والنعم منك
مجد: استغربت مانك مخبرو عن موضوع المصاري .. لانو مشالله عنك مخبرو كلشي عني
تحسين :هههه والو يا صاحبي ما دافنينو سوا
مجد :قصدك مطالعينو سوى
تحسين :هههههههه .. اي قلي شوبدك تقول لحبيبة القلب
مجد : مابدي قلا شي بس بدي شوفا من بعيد واطمن عنها ..
تحسين :لاتقلي لساك متنح عند قرارك
مجد :اي والله .. خلص كل واحد من طريق
تحسين :ااخ منك
مجد : لك صحي ابو قلك اختك ياسمين .. ليش اختك بتشتغل بالمشفى ؟
تحسين :اي دكتورة عظمية
مجد : هلأ انت كم عندك اخت
تحسين : بس وحدة
مجد :الله يخليها
تحسين :تسلم ..
مجد :هلأ سؤال والو كان مو بمكانو بس بدي اسألو .. واذا بدك تعصب عصب
تحسين :هههه لا مارح عصب احكي
مجد :والله اختك متل اختي .. اصلا انا مابعرفا بالشكل .. بس عنجد متل مابقول عنها بالمنطقة .. انو مافي بنت بجمالا ..
تحسين : هلأ بتشوفا وبتعرف
مجد :والله ماقصدي شي .. بس انو اختك عنجد عمينضرب فيها المثل بضيعتنا .. فهمت كيف
تحسين : هههههه .. اي فهمت .. لك هنن العالم بتكبرا .. مع انو بلاقيها انا عادية
مجد : ويمكن لانها بنت شيخ
تحسين :مظبوط ..
مجد :الله يستر عليها ويحرسا
تحسين : تسلم
مجد :وعنجد ابوك طالب مهرها ٥٠٠ ليرة دهب
تحسين :هههه اي .. بس بالحقيقة مو هيك .. ابي قال هيك مشان يخترلا رجال عن حق وحقيق والمصاري كلا مجرد كلام .. مشان هيك محدا عم يتجرأ ويطلبها .. بيسمعو بالمصاري بينجلطو
مجد : لك ياريت اهلها لضحى يطلبو مهرها متل مهر اختك والله لادفعلن الف بدال الخمسمية ..
تحسين :الله كريم .. وان شاء الله هالبنت مابتكون غير الك
مجد: ان شاء الله ..
يتبع ......
التعديل الأخير بواسطة المشرف:
