#الجزء_الاول
((سعد امي عسعدي جرى .. رح اكتفي بهي المقدمة لانو هالمتل هو ملخص هالقصة ))
بليل هادئ .. ببيت سوري تقليدي ... قاعدين عيلة مكونة من رجل وزوجتو وابنتن الصبية وابنن الصغير
الاب جلال : شو منيح هالبيت
الام ايمان :ماشي حالو بس ما متل بيتنا
جلال :شفتي بعينك البيت مهدوم ع الاخير
ايمان :مزالو مهدوم ليش ماخليتنا مستأجرين بنص البلد اقرب للولاد ع دوامن
جلال : هون احسن .. وكمان يلي ماعمل طلبة عودة لبيتو مارح يخلوه يفوت ع الحارة نهائيا .. قلت بنقعد بالحارة منو حارتنا وجنب بيتنا ومنو بكرا بيطلعنا تعويض ع البيت وبنرجع بنعمر البيت بأذن الله
ايهم :بابا يعني رح نعمر بيت جديد
جلال :اي بابا
ايهم :يسس
هبة :وعشو مبسوط .. بكرا بترجع بتعلق وبتجيه شي قذيفة
جلال :ان شاء الله لأ
ايمان :الله يسمع منك
هبة :ومين بدو ياخد ايهم ع المدرسة بكرا
ايمان :انتي
هبة :بس بتأخر عمحاضراتي مابكفي صرلي اسبوع معلطة
ايمان :طلعي بكير بتحلقي
هبة : معلش انزل شوي عالدكان يلي تحت جيب شوية غراض .. وكمان الغراض يلي وصيتني عليهن
امها :خدي اخوكي معك
هبة :ماشي .. ولا دب قوم
ايهم :يلا
مسكت ايد اخوها ونزلو ع الدرج .. ع باب البناية بيطلع شخص قدامن ( شب بالعشرينات قريب من ٣٠) .. بتزح مشان تفتلحو طريق هو بزح معا .. بتروح هيك بروح معا بتجي هيك يبجي معا وقفت وقالت :خلصنا مروق
رمقها بنظرة عدم اعجاب وفات
هبة :شو هالعالم هية .
جابت الغراض لامها وطلعت
ام هبة :جبتي الغراض كلن
هبة :اي هدول هنن بالكيس
هبة :ماما انا فايتة جهز غراضي مشان بكرا روح ع الجامعة
ام هبة :ماشي .. روحي الله يرضى عليكي
ايهم :ساعدك اختي
هبة :بشو بدك تساعدني بلله .. روح التهي بدورسك ايهم افندي
ايهم :ماعندي دورس
هبة :كذاب .. يلا جاي علمك انا روح طلع كتبك
ام هبة :الله يرضا عليكن ..
...........................
اخر الليل
قاعدة هبة بالغرفة يلي اختارتا تكون الها .. والها بلكون بطل ع الشارع .. حطت شالها الصوف وطلعت وقفت ع البلكون وصارت تتصفن بالقمر المتكمل وحواليه غيوم متفرقة .. ومن بيناتن عم تضوي النجوم .
هبة : سبحان الخالق .. ياريت لو اعرف ارسم .. كنت بس رسمت السما
رجعت عغرفتا وسكرت باب البلكون ..وراحت ع تختها وتمددت وغضت حالا منيح ونامت
...........................
تاني يوم جهزت هبة حالا لتروح ع الجامعة
هبة :ماما بدك شي
ام هبة :انتبهي ع اخوكي
هبة :حاضر ماما بوصلو ع مدرستو وانا بكمل ع الجامعة
طلع ابوها من الحمام وكان مغسل وجهو
هبة :صباحو بابا
راحت وضمتو وباستلو ايدو
ابوها :الله يرضا عليكي
هبة :تعال ولاه بوس ايد ابوك
قرب ايهم وباس ايد ابوه ..
طلع ابوهن من جيبتو مصاري وعطاهن مصروف
مسكت ايد اخوها وطلعو من البيت .. نزلو عباب البناية وشافت نفس الشخص يلي تصادفت معو مبارح .. حامل شنتةسودة اقترب من سيارتو ركبها ومشي .. وهبة عم تلحقو بعيونا .. عملت نظرة ع البناية يلي قاعدين فيها وكأنو عم تسال حالا هاد عايش هون..
مشت لاول الشارع وقفت سرفيس وركبو
__________________
بالجامعة فايتة عم تركض بدا تلحق محاضراتا .. دفشت باب القاعة .. وتفاجئت بنفس الشخص واقف قدام اللوح وعم يشرح .. ولما انفتح الباب كلن سكتو واتطلعو عليها
رفع ايدو بغرور وشاف الساعةوقال :الساعة ٨ ونص
هبة :بسس
:لبراا
هبة نزلت راسا بخيبة امل وطلعت
وهو رجع يكمل محاضرتو
طلعت وقعدت على مقعد بحديقة الكلية وهية مقهورة
هبة :من وين طلعلي هاد هلأ .. الله لايوفقو .. وكمان من ايمت بدرس عنا هاد .. اوووف ياربي مابكفي صرلي اسبوع معطلة واليوم راحت علي المحاضرة
وهية قاعدة طلعو طلاب قاعتا من البناء وقربو منها بنتين
نهى :هبووشي ..
وقفت وسلمت عليهن
هبة بحزن :كيفكن
نهى :مشتاقيلك
صباح : والله قلنا هي معد تجي ع الكلية
هبة :ليش
نهى : .. كلن بقولو رح نغيب جمعة ونرجع وبروحو يا امابسافرو يا اما بيتزوجو
هبة :اصلا هية هالظروف يلي عم تجبرنا وتمشينا متل مابدا
صباح : اي والله معك حق .. انتي وين هالغيبة
هبة :منطقتنا رجعت امنة وعملنا مصالحة لنرجع عبيوتنا
نهى : صار بعيد عليكي ماهيك
هبة :اي والله مشان هيك هاد الدب مادخلني الله ينتقم منو
صباح :شيلنا منو هلأ واحكيلنا رجعتو عبيتكن
هبة :لا بيتنا مدمر ع الاخير .. بالحي التاني استأجرنا بيت
نهى :مزال بيتكن مهدوم .. ليش رجعتو ليش ماضيلتو هون .. عالقليلة قريبة من الجامعة
هبة :ليش انا يلي بدي ارجع هاد بابا .. قال بدو يضل بالحارة .. وكمان مشان يسجل البيت ويعطونا تعويض ويرجع يرممو.. بدي اعرف شو بدو يرمم ليرمم
صباح :يلا على خير والله يهدي هالوضع
هبة :امين .. المهم هلأ حكوليلي مين هاد الدكتور .. وايمت صار يدرسنا كل يلي غبتن جمعة
صباح :اولا هاد مو دكتور هاد معيد .. وتعيين بهل الجمعة يلي غبتيها
هبة :مبين عليه لئيم ماهيك
نهى :عادي ..بس بفهم كتير بالشرح
هبة :الله لايسامحو روّح علي المحاضرة..
صباح :ولا يهمك هلأ بعطيكي دفتر المحاضرات تبعي
هبة :شكرا كتير حبيبتي .. اي صحي شو اسمو
صباح : أُسيد (بضم الالف)
هبة : أُسيد حلو هالاسم .. بس هو لأ
نهى : والله حلو ومهضوم
هبة : لك شفتي مأحقرو .. لك شافني لما طلعت ع القليلة يقدر وضعي انو بيتي بعيد .. هو شو عبالو معو سيارة
صباح :كيف شافك لما طلعت
هبة :يمكن ساكن بنفس البيت يلي مستأجرين فيه .. شفتو مبارح واليوم
صباح :بيت ؟؟
هبة :هو لابيت ولا بناية .. بيت من ٣ طوابق يمكن هو ساكن بالطابق الارضي .. ونحنا فوقن
صباح :اصبح لازم تتعرفي عليه مشان يدعمك وغمزتا
هبة :يضرب بشكلو .. مانك شايفتيه شو لئيم
نهى :خلص شيلونا من سيرتو وخلونا نقوم نشرب شي
هبة :اي والله .. وانسخ المحاضرات كمان
____________________
خلص الداوم وراجعة هية واخوها ع البيت وعباب البناية رجعت التقت بأسيد
رمقتو بنظرة كره وفاتت .. وهو بادلا نفس النظرة
دخل البيت وكانت امو بأنتظارو
امو : اهلين حبيبي .. تعال الاكل جاهز
قرب وقعد ع الطاولة وحط شتنو ع الكرسي يلي جنبو
امو : ليش ماغسلت
اسيد : والله نسيت
قام غسل ورجع ع السفرة
امو : يلا سمي بلله
اسيد :بسم الله . اخد صحن وسكب فيه وصار ياكل منو
اسيد :صحي ماما .. مين هدول يلي فوقنا
امو :مستأجرين جدد
اسيد :اي
امو : ليش عم تسأل
اسيد : لا مافي شي .. بس شفت حدا منن طالع .. قلت بسألك
امو : والله بدي روح اعملن زيارة واتعرف عليهن
اسيد : اي
وكمل اكلو
_________________
عند هبة
قعدت هية واهلا عسفرة الاكل وصارو ياكلو
ابوها : ليش الاكل مالح
ام هبة اكلت لقمة وقالت :والله مافي شي .. انت هيك عطول مابيعجبك العجب
ابوها :لكن هاد بتسميه اكل
اما :لكن شوو اسمو هاد مانو اكل ..
ابوها :والله لونو مانو نعمة لقوم ارشقو بنص خلقتك
امها : يعني انت عطول هيك مستحيل تهنينا بشي .. عكلشي بدو يعلق .. كل هالزلم بتاكل ومابتحكي شي الا عندي .. ولسه داوشنا بطبخ امو
ابوها :ولا بيطلعلك تطبخي متلا
امها :الله ياخدك لعندا لكن
جلال :عم تدعي علي بالموت
ايمان : لانو والله هالعيشة معك معد تنطاق
هبة وايهم قاعدين وخايفين
جلال :ليش انا يلي طايقا ..
ايمان :كلو امي كلو .. شوبدكن فيه
جلال :لانو انا مجنون .. كلو شوبدكن فيه .وقف وقلب هالطاولة والاكل كلو صار ع الارض .. هبة قامت بسرعة هية واخوها وقفوا بالزاوية وضمو بعض وهنن خايفين من ابوهن
ايمان : لاحول ولاقوة الابلله .. هيك انت بدك تمضي هالعمر .. الولاد صار عندن عقدة نفسية من ورا جنانك
جلال عصب وقال: انا مجنون يابنت الكلب
رفع ايدو وضربها كف .. وقعت ع الارض ونزل وصار يضرب فيها .. هجمت عليه هبة وايهم يبعدوه عن امون
هبة عم تبكي :مشاان الله يا بابا.. مشان الله تركها
وتشدو من ايدو دفشها لورا وقام وفات وسكر عحالو الباب
نزلو لعند امون ضموها وصارو يبكو وهية تبكي معن
وهنن عم يبكو انفتح الباب يلي دخل عليه جلال وطلع ومرق من قدامن وصار يرفس صحون الاكل برجليه وضل طالع
ايمان :الله لايردك .. ان شاء الله بجيبولي اياك محمل
هبة وهية عم تبكي :ماما مشان الله لاتحكي هيك ..
ايمان :طول عمرو حقير وجحش
هبة :ماما مشاان الله حاج
ايمان : قومي بالطنجرة ضل شوية اكل اسكبيهن لاخوكي ..
هبة :يلا قايمة
قامت ع المطبخ سكبت لاخوها صحن وندهلتو ع المطبخ يروح ياكلو وجابت مكنسة وصارت تكنس مكان الاكل وتجمع الازاز
هبة :ماما قومي عن الارض هلأ بتاخدي برد
قامت ايمان بهدوء وقعدت على كرسي والدمعة عالقة على خدا
خلصت هبة .. وقعدت حد امها وحزينة عليها وقالت :طيب انتو ليش هيك .. الصبح ماكان فيكن شي .. ليش بتضلو نقار نقار .
ايمان :ماشفتيه متل المجنون بس بدو كلمة يقب
هبة :كمان الحق عليكي .. يعني ماضروري تجائريه كل كلمة بكلمتا
ايمان :ماني ناقصتك قومي انقلعي من وجهي
هبة : والله ماقصدي .. بس بدكن تضلو هيك طول عمركن
ايمان :كل هالزلم شايفة نسوانا ومانا مصدقة الا عندي بضل معصب ع الطالعة والفايتة .. الله وكيلك بنت عمتي نجوى طبخا ما بيتاكل وجوزا شايفا ومانو مصدق .. بس الله الي بالني .. هنن بيت عمي كلن هيك من عمي وجر .. والله ابي بحياتو ماسمعا لامي كلمة تزعجا .. مع انون اخوة .. بس عمي شيطان وابي ملاك قدامو .. الله يسامحكن يا اهلي قلتلكن مابدي اياه .. جبروني اتزوجو قال ابن عمك ومنا وفينا .. ومن هالحكي .. الله يسامحن ويرحمن ..
هبة :يعني انتي ماكنتي بتحبي ابي
ايمان :هه ابوكي بدو ينحب .. ومين هي المجنونة يلي بدا تحبو لابوكي .. بس نصيب يلعن ابو هالنصيب
هبة :وابي ماكان يحبك
ايمان :ههههه ابوكي لا بحب ولابيعرف يحب .. حتى هو تزوجني غصب عنو .. ومضينا هالعمر متل مانك شايفة عكل شغلة بقوم بيضربني .. وبتقوليلي سايريه .. انا بالزمنات كنت ساير كنت اكل قتل اكتر من هلأ .. بعدين قلت معد اسكت القتلة بدي اكلا بدي اكلا ...
هبة :خلص ماما طولي بالك ..
ايمان : وكمان انتي ياحسرتي عليكي حظك بدو يطلع متل حظي .. قاريين فاتحتك ع ابن عمك حاتم قال
هبة : ليش شبو حاتم
اسمان :لسه اجحش من ابوكي وعمك .. هادك حمار نظامي .. ان شاء الله بتجيه شي رصاصة وبموت ومابنشوف خلقتو
هبة :حرام ماما تدعي عليه
ايمان :استغفر الله العظيم .. استغفر الله العظيم .. يارب سامحني .. يارب سامحني .. بس والله من حرقة قلبي عليكي انو يصير فيكي متل ماصار فيني .. بس مابكون اسمي ايمان اذا بخلي هالشي يصير
هبة خافت من جواها من حديث اما
هبة :شوبدك تعملي
ايمان :مرت عمك درويشية وبينضحك عليها بكلمتين .. بكرا بدي روح لعندا وقلا انو عم يجي عرسان كتير لهبة .. وحاتم الله يردو بخير وسلامة محدا بيعرف عنو شي ولا حتى عم يخبرو شي .. من وقت راح ع الجيش وانفقد وانو هالبنت بدا تضل تستنا .. واكيد رح تحكي مع عمك وعمك يحكي مع ابوكي اذا اجا نصيبك مايوقفك ... اصلا هو بكون مدفوس من زمان
هبة :ماما حرام عليكي
ايمان :ياربي .. سامحني .. اااخ من هالعيلة رح تجنني
هبة :وبابا وين بكون راح
ايمان :اطمني هلأ بيجي
هبة :مشان الله ياماما طولي بالك ولاتعصبيه اذا اجا والله نحنا مابنحبكن تتقاتلو .. والله عم خاف كتير اذا انا عم خاف شو حالة ايهم
مسحت دموعا وقالت انا فايتة ارتاح .. اهتمي بأخوكي
قامت فاتت عغرفتا وسكرت الباب وهبة قامت لعند ايهم كان مخلص اكلو وحامل الصحن وعم يرفع رجليه ليطول المجلى ويحط الصحن بالمجلى .. ابتسمت على برائة اخوها وراحت اخدت منو الصحن وحطتو بالمجلى
ايهم :اجا بابا
هبة :لا .. تعال نام شي ساعة
اخدت اخوها عغرفتو ونميتو عتختو .. وراحت عغرفتا
السرد بصوت هبة : مابعرف ليش خفت من حديث امي ..معقول كون انا متل امي .. واتزوج واحد ع اي غلطة يضربني .. وحاتم انا ليش ماكنت فكر فيه مع انو بعرف من زمان انو مقرية فاتحتي عليه .. بس هالموضوع ماكنت فكر فيه نهائيا وكأنو مابخصني
.. فكرت فيها منيح .. وقلت انا ليش خايفة ع الفاضي .. اصلا حاتم مفقود ومحدا بيعرف عنو شي من وقت راح ع الجيش ..ليش بدي خاف من شي مجهول .. وحتى لو رجع اذا ماعجبني رح ارفض ابي مرة قلي انو مارح اجبرك على شي بحياتك .. صح بابا عصبي وبتطلع خلاقو بسرعة وبيضرب .. بس بيحترم قرارتنا وبخلينا نحنا يلي نمشي بالطريق يلي بدنا اياه .. طبعا بحدود
_____________________
الصبح فاقت هبة .. وطلعت من غرفتها وشافت ابوها قاعد وعم يقرا الجريدة اليومية .. وامها طالعة من المطبخ حطتلو فنجان القهوة على الطاولة وبرمت ضهرا لتمشي
جلال :ليش مانك جايبة فنجان الك
ايمان :مابدي
جلال : اي يلا روحي جيبي فنجان قهوة وتعي .. قهوة الصبح مابتحلى الا معك
ايمان : هه رح صدق ..
جلال : اذا مشان مبارح انا بعتذر .. بس مليون مرة قلتلك لما بكون معصب لاتردي بوجهي وتجائريني
ايمان :وهاد يلي عندي
جلال :طيب روحي جيبي فنجان قهوة وتعي .. يلا ولوو
هبة واقفة وعم تتطلع عليهن وتبتسم ابتسامة دافية .. وعم تترجا اما بعيونا انوو توافق .. هية امنية كل طفل او كل ولد بحب يشوف اهلو متفقين وما يدخل الزعل بيناتن
ايمان التفتت ناح هبة وشافتا واقفة ع الباب وعم تتفرج عليهن .. وشافت بعيونا كيف عم تترجها توافق تقعد مع ابوها ويتصالحو
ابتسمت هبة ابتسامة مع دمعة بعينا .. وايمان بادلتا ابتسامة حلوة
ايمان : هبة تعالي جيبلي فنجان قهوة من جوا
جلال : وينا هبة فاقت ( والتفت ليشوفا
قربت هبة وقالت :صباح الخير
جلال :صباح النور حبيبتي
ايمان :صباح النور
جلال :بابا الله يرضى عليكي روحي جيبي فنجان قهوة لامك وتعي
هبة :ماتكرم عيونك وعيون امي .. يلا ثواني
راحت بسرعة جابت فنجان قهوة وعطتولامها
ايمان :حبيتي جهزي الفطور
هبة :من عيوني
بلشت هبة تجهز الفطور وكل شوي تلقي نظرة على ابوها واما يلي قاعدين جنب بعض .. ورجعو يتصرفو طبيعي وكأنو ماصار شي مبارح
قعدو كلن عسفرة الاكل بعد ما فيقو ايهم
هبة :بابا ايو ساعة جيت مبارح .. ماحسيت عليك
جلال :تأخرت شوي
هبة : اممم
ايمان :كنت بدي قوم اقفل هالباب .. لانو يلي بيتأخر بالسهرة مالو فوتة على هالبيت
هبة : لاتصدق بابا مابتعملا .. بتذكر انو انا نمت وهية ضلت عم تستناك
ايمان :هبةة
هبة : عم احكي الصدق
جلال :صح امك هيك بتحكي .. بس بعرف قلبا طيب
هبة :وانت كمان قلبك طيب .. الله يخليلي اياكن ومايحرمني منكن
جلال : وانتو كمان الله لايحرمني منكن
خلصت هبة اكل وقالت :الحمد لله شبعت قوم ايهم لوصلك
جلال :لا ايهم في اوتوكار جاي ياخدو
هبة :عنجد ؟؟
جلال :اي
هبة :طيب منيح ..لكن انا لروح مشان لحق محاضراتي
طلع من جيبتو مصاري وعطاها وقال :خدي بابا
اخدتن وباستلو ايدو وطلعت
نازلة على الدرج والابتسامة على وجها .. هبة من النوع الحساس جدا .. وبتفرح لامور بسيطة .. وبتزعل من امور بسيطة لدرجة التفاهة
عباب شقة اسيد انفتح الباب وتصادفو مع بعض ع الباب .. ما وجهتلو اي كلمة وكملت لبرا وهو صار يتطلع عليها بطرف عينو .. سحب الباب وطبشو ونزل
ركب بسيارتو ومشي ليطلع من الشارع .. كانت واقفة وعم تأشر للسرافيس يلي عم تمرق .. بس محدا عم يوقفلا .. نفخت واتطلعت ع الساعة .. ورجعت مدت ايدا تأشر للسرافيس
هو مرق من جنبا .. وعلى وجهو ابتسامة جانبية
اسيد :ان شاء الله اليوم كمان تتأخري .. لانو مارح دخلك
ليش هيك عم يحس بالكره تجاها مابيعرف... مع انو ماعملتو شي
________________________
بالقاعة
دخل اسيد .. بكل غرور
اسيد :صباح الخير
الكل :صباح النور
عمل نظرة ع الطلاب ومالقاها
فجأة انفتح الباب .. وكانت هبة .. وقفت بدون ماتحكي
رفع ايدو ليشوف الساعة
هبة :شوو
اسيد :لبرا
هبة :والله جيت بكير
اسيد : متأخرة خمس دقايق
هبة : بس لسه مابلشت
اسيد : حتى والو ... متى مادخلت هاد الباب بيتسكر وراي وممنوع حدا يدخل
هبة عم تحبس الدمعة وحكت بغصة : والله مانو عدل .. وانت شفتني كيف واقفة عالطريق وماعم لاقي مركوب
اسيد :ما مشكلتي
هبة :الله لا يسامحك .. ومادتك معد احضرا وان شاء الله برسب فيها وخطيتي برقبتك
طلعت وطبشت الباب وراها
طالب :استاذ والله حرام .. ليش مادخلتا
حس انو غلط معا وقسي عليها .. وشفق عليها
اسيد :مشان تتعلم ما تتأخر .. لوشي مهم بتكون مزروعة من الصبح .. اما ع المحاضرات بتماطلو
صباح : بعتذر استاذ ع المقاطعة .. بس فيك تحكي عنا كلنا هيك معلش اما هبة لأ .. لانو هبة اكتر وحدة منتظمة بالوقت هون .. بس من جديد منتقلة عبيت جديد .. ولسه ماعرفت كيف طريقة المواصلات مشان هيك عم تتأخر
اسيد : خلص ماشي .. من بكرا بتخبريها بتجي تحضر المحاضرة .. بس انو تتأخر اكتر من عشر دقايق ممنوع
صباح :شكرا استاذ
اسيد :اي وين وصلنا مبارح
_________________
طلع اسيد من القاعة وشافا كانت قاعدة عكرسي جنب باب القاعة .. ولما شافتو طلع قامت ودخلت لتحضر المحاضرة التانية .. مشت من جنبو بتجاهل .. ومبين على عيونا بكيانة
ضل واقف شوي مكانو وحس بتأنيب الضمير عليها .. وكمل مشيو
فاتت وقعدت جنب رفقاتا صباح ونهى
هبة :الله لايوفقو
صباح لاحظت انو عيونا مورمين وسألتا :بكيانة
هبة :انا .. لا
نهى :كذابة
هبة :ماشفتي كيف احرجني قدام الطلاب ..
صباح :خلص طولي بالك مو مستاهلة
هبة :انا اي حدا بحكيني كلمة صغيرة بتقهر .. بتحز بقلبي ومابقدر مرقها عادي
نهى :شو بتعملي
هبة :ههه ببكي
صباح :لك تضربي .. بس نحنا حكيناه وقلنالو وضعك
هبة :ليش مابيعرف وضعي
نهى :المهم قال رح يسمحلك تدخلي بس بشرط ما تتأخري اكتر من عشر دقايق
هبة :لا عشر دقايق ولاساعة انا محاضراتو معد احضرا
صباح :لا تجني .. وكمان هي المادة صعبة وبدا شرح لتدخل ع الدماغ
هبة :بتدخل ولا عمرا ما تدخل.. انا على محاضرتو معد ادخل
نهى :مابطالعيها للمادة
هبة :وبلا ما طالعها .. خليني ارسب بكون احسن
صباح :بس ياهبة
هبة :انا حكيت كلمة ومابتراجع فيها .. ومو هبة يلي بترجع بكلاما
صباح :الله حيوو ابو شهاب
ضحكت وقالت :شكلين مابحكي
نهى :بس عنجد مارح تحضري .. ولا عم تمزحي
هبة :والله معد احضر .. بدك يقول عني رجعت بكلاما
صباح :يقول شو مابدو يقول .. المهم ترفعي المادة
هبة :خلص .. سكتو اجا الدكتور .. بنكمل حكينا بعدين
الدكتور:مرحبا
الكل :اهلين دكتور
______________________
طلعو وصارويتمشو بالحديقة .. هبة كانت ضامة الكتب عصدرها وماشية جنب صباح ونهى
صباح : اي هبوش .. شو قررتي
هبة :خلص انا قررت .. ومعد اتراجع بقراري
نهى :ياربي ع يباسة هالراس
هبة :طيب انتو شو بدكن مني
صباح :بدنا مصلحتك يا مجنونة
هبة :مصلحتي وبعرفا
اجت صبية لعندن مستعجلة :هبة منيح يلي لقيتك
هبة :اهلين اسماء .. شوفي ليش عم تدوري علي
اسماء :في مصيبة
هبة :مصيبة شوو
اسماء :بتعرفي الاء
هبة :مين الاء
اسماء :الاء الرافع
هبة : اي عرفتا شبا
اسماء : انتي لما غبتي اسبوع فكرناكي معد ترجعي
هبة :ايي
اسماء : هية البنت كانت تحب واحد .. بس اخر فترة صارت بدا تطفشو ..قام قالتلو انت مطلوب
هبة :انا ماعم افهم شي .. حدا عم يفهم شي ياصبايا
صباح :لا
اخدت اسماء نفس وقالت :لك خلونا نقعد ونحكي
هبة :هاد مقعد فاضي
راحو وقعدو عليه واسماء تابعت حديثا
اسماء : الاء بدا تطفشو .. قام قالتلو انو انت مطلوب وعم تشتغل مع الجيش الحر والمسلحين وانا معد فيني كمل معك .. طبعا الشب لا مطلوب ولا بيمشي مع حدا
هو هون بدو يسألا مين خبرك قام هية قالتلو رفيفتي وتذكرت انك معطلة وفكرتك معد ترجعي قام قالتلو رفيفتي هبة وعطتو اسمك الكامل
هبة :شوووووو
اسماء : والله هاد يلي صار وانا جيت حذرك لانو الشب حاطك ببالو وعم يدور عليكي لينتقم
هبة :لك انا شو دخلني .. واصلا هي الاء بحياتي ماوقفت معا .. ليش عم تتبلاني .. ياربي على هالمصيبة
صباح : وينا هي الاء هلأ .. لروح معصرا تحت رجلي
اسماء :راحت ومعد ترجع
نهى :مشان ماتنكشف
اسماء :لا سافرت عتركيا لتتزوج ابن عمتا
هبة :الله لايوفقك يا الاء .. لك انا من وين عم تجيني هالمصايب .. ياربي .. وشو الحل هلأ
نهى :نشوف الشب ونفهو القصة
هبة :مشان اذا ماكان متأكد يتأكد اكتر ..
صباح :انتي بتعرفيه للشب
اسماء :اي بعرفو .. اسمو لؤي من شوي شفتو بالكلية
هبة بخوف :شو كان عم يعمل
اسماء بحزن :عم يدور عليكي
هبة :لك انا شوو دخلني .. ياربيي ..
نهى : وماعرفتي.. شو بدو يعمل مع هبة
اسماء :مابعرف .. بس حاطط الشر بين عيونو .. وخصوصا بعد ماعرف انو الاء سافرت لتتزوج .. حاطط كل الحق على هبة
هبة :لك يضرب منو لألاء لحظي البهوي .. انا شوبدي اعمل بحالي هلأ .. اكيد بكون جانن وممكن يقتلني لتهدى النار جواتو
اسماء : احسن الشي .. تغيبي فترة عن الجامعة .. لحتى يهدى
هبة : طيب كيف بدنا نوصلو لهاد الشب
اسماء :بعطيكي اسمو ع الفيس
هبة :قولولي صبايا شو اعمل
صباح : حاليا خلينا نهدى .. بس اسماء عطينا اسمو
اسماء : ببعتلكن الرابط ع الفيس .. وانا اذا شفتو رح فهمو الموضوع بركي بصدق مني .. لانو انا رفيقتا لألاء
هبة :تضربي منك لألاء
اسماء :انا مادخنلي .. لما قالتلو هيك ماكنت موجودة انا
نهى :حصل خير
اسماء :انا رايحة هلأ .. بدكن شي
هبة :لا .. الله معك
رحت اسماء وهبة حكت : مشان الله يا صبايا قولولي شو اعمل
صباح : انا قلبي بارد اطمني ان شاء الله مايكون في شي
هبة : يارب
صباح شافت الساعة وقالت : رح نتأخر ع المحاضرة .. يلا قومو
هبة : مابدي مالي نفس
نهى : عرحتك
صباح : ليك التانية عم تقلا عراحتك ..قومي خلصينا
نهى :خلص تركيها اذا فاتت مارح تركز .. وبركي سألها شي الدكتور وهية مو منتبهة .. بيطردا برات القاعة
صباح :متل مابدكن انا رايحة يلي بدو يجي يلحقني
نهى :انا جاي
_________________________
بجنب تاني من الكلية .. واقف لؤي مع واحد
شافتو اسماء وراحت لعندو
اسماء :لؤي ..ممكن نحكي
لؤي :لقيتلي البنت
اسماء :قلتلك البنت مادخلا .. هي الاء كذبت عليك
لؤي :شو الدليل
اسماء :لك البنت مابتعرفك .. ولاحتى بتعرف الاء منيح .. بس الاء لزقت الكذبة فيها مشان تبعد عنك .. وكمان بالكلية كلا محدا معو خبر بشي .. يعني لو هبة حكيانة كنت لقيت كل الكلية بتعرف وماكنت ضليت لهلأ بالكلية
لؤي :وين بدي كون
اسماء :ببيت خالتك
سكت وكأنواقتنع بحكيا وقال :مامشكلة روحي
اسماء :يعني لسه بدك تأذيها للبنت
لؤي :بدي اتأكد بالاول
اسماء : اتأكد عمهلك بس البنت والله مادخلا
لؤي :خلص .. خلص روحي هلأ
اسماء :باي
لفت اسماء ضهرا ومشت
ولؤي رجع لعند رفيفو يلي كان واقف معو
رفيقو :شو بدا
لؤي :لك هي رفيفتا لألاء
:وشوبدا
لؤي :لك تضرب الاء ورفيقتا .. عنجد البنات بنص عقل
:ههه عنجد شوفي احكيلي
لؤي :الاء مفكرتني بحبا .. وانا كلا ماني شايلا من ارضا .. المهم حسب مافهمت جايها عريس بتركيا .. وبدا تلاقي طريقة تهرب .. قام قالتلي انو انت عم يحكو عليك بالكلية انو انا بطلع مع الجيش الحر وانا مطلوب .. وقال هية مافيها تكمل معي ..
: ايي .. وبعدين
لؤي :انا ماني شايلا من ارضا .. بس لما سمعت هيك جن جنوني .. يعني حلو هالسيط ..
:بس لاتخاف لو في هيك شي ماكنت لهلا واقف معي
لؤي :نفس حكي اسماء
:مين اسماء
لؤي :هي يلي كانت معي .. عم تقلي كلا كذب ومحد خبر بهل الاشاعة
: وانا حكيي من حكيا
لؤي :امشي شوبدك فيهن بنات بنص عقل
__________________
المسا
هبة بغرفتا رايحة جاي وعم تفرك باديها بتوتر
هبة :ياربي شو اعمل .. بركي طلع عنجد مع المعارضة واجا خطفني .. ياربي شو اعمل
راحت قعدت على تختا وحملت موبايلا وفتحت ع اسم بالفيس .. وبعتتلو طلب صداقة الاسم كان لؤي المحمد
هبة : ياريت يقبل الطلب لحتى احكيلو الحقيقة .. وكمان ان شاء الله يصدقني
____________________
لؤي قاعد عم يدرس اجاه اشعار فيس .. فتح موبايلو ع الفيس
لؤي : هبة حمدان ؟؟.. مين هي .. وليش باعتلي طلب صداقة
دخل على بروفايلا وقعد وشاف صورتا وصار يتمعنا .. لؤي :مين هي .. والله حلوة .. اي دخيل هالعيون .. والشعر الخرنوبي .. وهي قبول
كبس على قبول الطلب
عمل قبول ودخل ع المنسجنر وبعتلا اشارة ترحيب
وهبة فورا ردت عليه : مسالخير
لؤي :هلا مسالنور
هبة :انا هبة
لؤي :وانا لؤي
هبة :قصدي انا هبة
لؤي :وانا كمان لؤي
هبة :انا هبة يلي قالتلك عليها الاء
لؤي :ايه .. ايه .. انتي يلي عم تحكي علي
هبة :لا والله ماعم احكي عليك في سوء تفاهم انا اصلا مابعرفك نهائيا لحتى احكي عليك
لؤي حكي وقال : لك حتى لو حاكية علي انا سامحتك .. لك يقبرني جمالك .. هي بنت والاء بنت .. لك ياعيني عليكي
هبة :وين رحت
لؤي :اي اي معك
هبة :صدقتني
لؤي :لأ .. اناصرت خاف امشي بالشارع بعد ما طلعت هالاشاعة علي .. واليوم اجاني انزار من الفرع
هبة :والله انا مادخلني .. صدقني يا اخي .. بترجاك تتفهمني .. والله انا ماحكيت شي .. الاء هية يلي حطت هالكذبة بضهري لانو كنت معطلة
لؤي :انا هالحكي مابيمرق علي .. انا الي جماعة بالفرع وهنن يلي خبروني انو في حكي .. يعني ممكن بكل بساطة حط اسمك عندن وبكرا بخليهن يجو يشحطوكي
هبة : مشان الله انت شو عم تحكي
لؤي :لكن انا تطالعو علي هالسيط .. وانا بمشي الحيط الحيط وبقول ياربي السترى
هبة :طيب شوبدك وانا جاهزة .. بس بترجاك بلاها فوتت الفروعا .. انا بنت وانت بتعرف شو يعني بنت تفوت ع افرع امنية .. مشان الله يا اخي .. والله انا مظلومة .. حط اختك محلي
لؤي :خلص .. خلص .. قطعتيلي قلبي
هبة :صدقت انو مظلومة
لؤي :ماكتير
هبة :طيب سامحتني
لؤي :بسامحك بس بشرط
هبة :شرط .. شرط شوو
لؤي :بكرا بشوفك وبنحكي
هبة : وين
لؤي : بكافيه الكلية
هبة : ماشي .. بس كيف بدي اعرفك
لؤي : هي صورتك يلي ع البروفايل
هبة :اي
لؤي :خلص انا عرفتك
هبة : طيب عن شو بدنا نحكي
لؤي :نحكي حكي
هبة : مابينحكى هون
لؤي :لأ وجه لوجه احسن
هبة : ضرورية هالقعدة كتير
لؤي : خلص لاتجي .. الله معك
هبة : ع وين
لؤي :عندي مكالمة عالفرع
هبة :صدقت عم امزح معك
لؤي : بكرا بشوفك لكن
هبة : ايو ساعة
لؤي : ع العشرة
هبة :ماشي
سكر الموبايل وهو عم يضحك وقال غمزت السنارة .. هههه ياحرام قال صدقت انو الي حدا بالافرع .. بس منيح كذبة حلوة.. والله بكرا لمشيكي على اصابيعي ومتى مابلشت تحوص بهددا بالفرع .. لك انا ابو الافكار
________________
هبة .. رجعت الموبايل بهدوء ع الطاولة وهية شاردة مع خايفة
سرد بصوت هبة : كنت كتير مشوشة وخايفة .. ياترى يلي عم اعملو صح .. بس ليش هيك صار .. شو هاليوم النحس .. ليش هيك انا حظي .. بس قويت قلبي وقلت لازم واجه مشاكلي وماضل خايفة ومترددة عكل شلغة.. وكمان ليش خايفة اذا عنجد حاول يتمادى هاد يلي اسمو لؤي مارح اسكتلو .. ولاهداك الشايف حالو أُسيد .. لك هاد اسييد مو أُسيد
يومتا نمت وانا عم فكر
___________________________
الصبح
فاقت هبة بكير وطلعت وصبحت على اهلا وطلعت بكير
وصلت ع الكلية ودخلت مع رفقاتا ع القاعة .. بس اول محاضرة لدكتور غير اسيد ..
صباح :شو جاي اليوم بكير
هبة :حظي حلو لقيت سرفيس .. بس مبارح الله لايوفقن محدا يوقفلي
صباح :حصل خير
___________________
اسيد طلع من بيتو .. وتوجه ناح سيارتو .. وقف شوي واتطلع لفوق عبيت هبة .. ورجع اتطلع ع الموقف محل ما بتوقف مشان تركب سرفيس .. ركب سيارتو ومشي اتجاه الجامعة
________________
خلص محاضرة الدكتور ..
هبة قامت وصارت تضب كتبها
نهى :ع وين لسه محاضرة تانية
هبة :بعرف .. مارح احضرا
صباح :لساتك ميبسة راسك
هبة :اي
حملت الشنتة وعلقتا بكتفا واخدت كتبها ضمتن وطلعت من المدرج .. وهية ع الباب بيدخل أسيد
اسيد :ع وين
هبة :طالعة
اسيد :والمحاضرة
هبة :مابدي احضرا
اسيد: مابدك تترفعي بالمادة
هبة :لأ
مد ايدو لورا وسكر الباب
اسيد :رجعي ع مكانك
هبة :مابدي .. وبعدلي لو سمحت من قدام الباب
اسيد :انا عندي قاعدة .. اذا تسكر هالباب ممنوع ينفتح لتخلص المحاضرة
هبة : عندك مو عندي
اسيد :مبارح كلون كانو يحمدو منك .. فكرتك خلق وبشر طلعتي قليلة ادب
هبة :حكيك مردود عليك
ماشافت غير رفع ايدو وضربها كف
هبة رفعت راسا وايدا على خدا مكان الكف وقالت :عم تضربني ؟؟ عم تضربني الي .. مابتعرف انو الضرب ممنوع .. والله اذا مابخليهن يفصلوك مابكون انا هبة
دفشتو وطلعت وهو واقف مكانو مصدوم .. كيف هيك عمل .. وكيف ضرب طالبة عندو وهية ..
اتطلع على وجوه الطلاب كلها كانت لوم وعتاب
اسيد : مافي محاضرة اليوم .. بالاذن
طلعو وهو مقهور من القاعة
وصباح ونهى قامو بسرعة ضبو غراضن وطلع يدورو على رفيقتن
وبلشو يدورو عليها بالكلية وماكانو يلاقوها .. وقفو وهنن عم يتطلعو عبغص بحيرة
صباح :وين راحت هي
نهى :اي عرفت .. تعالي
صباح :ع وين
نهى :ع الحمام
راحو ع الحمامات .. دخلو وصارو يبحثو عنها بعيونن .. لحتى سمعو صوت بكي من احد الحمامات .. قربو ودقت صباح ع الباب : هبة انتي
هبة : اهئ... اهئ ..
نهى :هي انتي هون ونحنا برمنا الكلية عليكي .. طلعي
انفتح الباب وطلعت وعيونا مورمين من البكي
صباح :انتي مجنونة .. شو عم تعملي هون
هبة بطريقة طفولية :وين بدي ابكي لكن بدون محدا يشوفني
نهى :بس ما بالحمام .. بعدين بيطلعولك
هبة :مين هدول
نهى :البسم الله
هبة :شووو .. خلونا نطلع بسرعة
طلعو وهبة صارت تمسح دموعا
هبة :شفتو ماأحقرو
صباح :كمان انتي قللتي ادب معو
هبة :بس مايضربني .. شو شايفني طالبة صف اول .. لك انا جامعية .. يعني هلأ اذا بدي اشتكي عليه بيخربو بيتو
صباح : وليش ما اشتكيتي يا ابو عنتر
هبة : وانا عم ابكي فكرت فيها .. واكيد رح يفصلوني الي ويطلوبو ولي امري
هبة :صحي شقد صارت الساعة
نهى اتطلعت بموبايلا وقالت :١٠ و١٠
هبة :شووو .. لك تأخرت ع موعدي
وتقدمت بخطواتا لتمشي .. بس صباح مسكتا من ايدا وقالت :تعي لهون موعد شوو
هبة :موعدي مع لؤي
نهى :ومين هاد لؤي
هبة :هاد حبيبي الاء
صباح :شووو .. وليش رايحة لتقابليه
هبة :هو طلب انو نحكي
نهى :وانت من كل عقلك رايحة تشوفيه
هبة :لا من نصو .. تركوني هلأ ببقا بخبركن شو رح يصير معي
.............
فاتت ع الكافيه وهية عم تتلفت حواليها وتبحث عنو بعيونا
وهية عم تنقل نظرا بين الطاولات .. في شب رفعلا ايدو .. وراحت لعندو
هبة :لؤي ؟؟
لؤي :اي
هبة :وانا هبة
لؤي :تفضلي ارتاحي
قعدت وقالت : تفضل شوفي عندك
كان هو عم يتمعن بملامحها الحلوة
هبة لوحتلو بأيدا قدام وجهو وقالت : هيي عم تسمعني
لؤي : اااه ..اي .. عم اسمعك
هبة :اي حكيلي ليش جبتني لهون
لؤي تبدلت ملامحو لملامح حادة وقال :ليش عم تحكي علي
هبة:اناا ماحكيت على حدا .. وبعدين مابعرفك ليش لحتى احكي عليك
لؤي : بس انا بدي اتأكد بالاول .. اذا انتي حكيانة او لأ
هبة :وكيف بدك تتأكد
لؤي :بدي نمشي مع بعض فترة .. وشوف اذا انتي بتعملي هالحركات او لأ
هبة :بلله شوو .. ليك انا حكياني عليك وروح بلط البحر
لؤي : وانا هاد يلي كنت بدي اوصلو .. واخيرا اعترفتي .. بصراحة انا مابحب اظلم حدا ..بس حقيقتك انكشفت .. وانا رح اعمل اتصالاتي
هبة بخوف : والله ماحكيت عليك .. بس كمان طلبك مو معقول .. انا بحياتي ما مشيت مع شب
لؤي :بتمشي .. وين المشكلة
هبة: بترضاها على اختك
لؤي :خلي اختي عجنب .. انابدي امشي معك هبة:كصحاب او حبيب
لؤي: اعوذ بلله .. بس بدي نصير اصدقاء .. واذا اتأكدت من طيبة قلبك صدقيني انو مارح ازعجك
هبة : طيب موافقة
وقفت وسحبت كتبها وقالت:وهلأ بدك شي
لؤي :ماعطيتيني رقمك
هبة :ببعتلك اياه مسنجر
مشت وهية وراحت صارت تمشي .. حست حالا ضايعة .. انو شو عم يصير معا .. وليش هيك مع بعضن بتجي المشاكل
هبة :هلأ مشي حالي مع لؤي لسه أُسيد .. انا بفرجيك يا اسيد لفرجيك شو عواقب يلي بمدو ايدو علي .. صح انا حساسة ودمعتي بعيني .. بس ماني درويشة ومابسامح
______________________
رجعت ع البيت ..فتحت الباب واول ما فتحتو طلع صوت ابوها وامها عم يتحانقو
هبة بحزن :كل يووم .. كل يووم ..لازم هالاسطوانة
كملت بوجها ع غرفتا بدون ماتشوفن وطبشت الباب
وصوت ابوها وامها واصل لعندا
جلال :ليش هيك القميص مجعلك .. ليش مانك كاويته
ايمان :طوول عمرك بتلبسو مجعلك .. شو عدا مابدا هلأ
جلال :لك قلتلك مليون مرة لاتجاقريني
ايمان :خلص معد جاقرك هات القميص لهون ... لحتى اكويه
جلال :هلأ فطنتي .. صرلو جمعة ملحوش بالخزانة
ايمان :خلصنا هاتو هلأ
جلال عم قلك تركيه
ايمان :عم قلك هااتو
جلال :لك شووو عملتي شقيتيه
ايمان :انت يلي شقيتو ما انا .. عم قلك هاتو
جلال :وانا عم قلك تركيه.. ليش ماتركتيه
ايمان :مابصير .. اذا ماكبرت راس
جلال :عم تحكيني هاد الحكي الي
ايمان :اي الك .. ليش مين في بهل البيت راسو كبير غيرك
جلال :ايمان طلعي من وجهي ماني ناوي ابتلا فيكي
ايمان :ماني طالعة طلااع انت ..
طاااخ
ايمان :رجعت تضربني .. رجعت تضربني ..يا جلال
جلال :بدي كسر راسك كمان
طااخ .. طاااخ
قاعدة ع التخت وحاطة اديها التنتين على ادانها مشان ماتسمع وعم تبكي .. بس لما سمعت صوت الضرب .. طلعت بسرعة وراحت لعندن .. فتحت الباب .. وكان ابوها نازل بأمها ضرب
هبة :بكفيييييي
وقف جلال واتطلع عليها .. وايمان مغطية وجها بين اديها وعم تبكي
جلال :شوبدك انتي ..
هبة :شو بدو يكون بدي .. مشان الله انتو مابتتعبو .. ما بتملو .. وكمان يا بابا .. لسه كل شغلة بتمسك امي وبتصير تضربا .. شو شايفا ولد صغير قدامك .. والله عيب احترمو عمركن
هجم عليها ابوها وشد من شعرا وقال :لمين هاد الحكي يابنت الكلب .. بس لمين بدو يكون لسانك طويل .. لامك .. قامت امها ومسكتلو ايدو وقالت خلص تركا .. بدك تضربا ضربني الي .. بس هية لأ
هبة كانت دموعا عم تحكي وتعبر عن حالتا
ترك شعر هبة ..ونتر ايد ايمان وطلع ع الصالون
رجعت ايمان قعدت ع التخت وضمت المخدة وصارت تبكي
وهبة بملل تركتا وطلعت .. وهية متجه ع غرفتا اندق الباب .. راحت فتحت وكان ايهم
ايهم :الانسة اليوم حطتلي ممتاز
هبة :العالم بتسلم
ايهم :مرحبا .
وراح يركض لعند ابوه .. بابا .. الانسة حطتلي ممتاز اليوم
جلال :روح من وجهي
هبة :تعال فرجيني الي
اجا لعند هبة وعيونو على ابوه بخوف
اخدتو من ايدو ودخلو عغرفتا
ايهم بصوت واطي :شبو بابا
هبة : معصب شوي
ايهم :ههه مامشكلة تعودنا
ضربتو كف صغير على كتفو وقالتلو :عم تضحك ولاه
ايهم : لانو عنجد تعودنا .. انا جوعان
هبة :هلأ ليروقو بنشوف شو عاملين اكل
ايهم :انا قايم بدل تيابي
هبة :مر لعند ماما سلم عليها وقلا انك جيت
ايهم :يلا
اخد شنتو وطلع
____________________
كان اسيد وامو عم ياكلو
اسيد :الحمد لله
امو :شو هالاكل
اسيد :الحمد لله شبعت
امو :انت شبك مانك عاجبني
اسيد :مافي شي ..
قام وراح يغسل ع المغسلة .. وهو عم يغسل شافو حالو على المراي .. وحكي .. شو هالبنت هي .. كيف هيك خلتني اضربا ... وانا بحياتي ما مديت ايدي عحدا ..منيح انو ما اشتكت كانت خربتلي بيتي ... بس مافيها لانو بتخاف ع حالا تنفصل .. خلص انا معد اهتم فيها بتدرس ولا للجهنم ما تدرس .. والمصيبة جارتي
ام اسيد :اسيد ماما .. تعال شوي
نشف اديه وطلع
امو حاملة صحن وقالتو :الله يرضا عليك يا امي خود هالصحن لجيرانا الجدد
اسيد: اناااا
امو :اي انت
اسيد :مستحيل
امو :شو هي مستحيل .. روح .. روح وديلن اياه عيب
اسيد :امي عم تحكي جد
امو :والله
اسيد :هئ .. ماني رايح .. هاد يلي ناقص
امو :اسيد عم قلك طلاع وصلو .. ولابدك اياني انا وصلو
اسيد :ما ضروري تبعتيلين صحن
امو :لأ ضروري .. يلا طلاع
اسيد :اميي .. بنتن تلميذة عندي شوبدو يكون موقفي قداما
امو :اسيدددد
اسيد :ياربي .. امري لالله .. هاتي لشوف
اخد الصحن وهو عم يتأفأف وطلع .. وصل لباب الشقة ودق الباب ..
انفتح الباب و هبة يلي كانت بأستقبالو .. طبعا تفاجئت فيه بس عرفت ليش جلي لما شافت الصحن
هبة :نعم
اسيد : تفضلي
هبة :شو هاد
اسيد :الواضح اكل
هبة :شو المناسبة
اسيد بنافز صبر قال :هاد من امي لوسمحتي خديه .. بدي روح انا مستعجل
هبة :حاططتلي فيه سم
اسيد :لا والله نسيت .. بس ياريت متذكر
اخدتو .. وهو لف ليروح ..
هبة : وقفف
وقف وبرم راسو وقال : نعم
رفعت الصحن وقلبتو على راسو
نقز وصار ينفص راسو من الاكل لانو كان سخن ونزل على راسو
اسيد :شوو عملتي يا مجنونة .. اااخ .. حرقتيني .. وراسي تعبا زيت .. لك انتي شووو
هبة :فاتت وطبشت الباب وهية عم تضحك
وهو اخد الصحن ونزل بسرعة عم ينفض شعرو من الرز بقرف .. ويتمتم عليها
يتبع ...
((سعد امي عسعدي جرى .. رح اكتفي بهي المقدمة لانو هالمتل هو ملخص هالقصة ))
بليل هادئ .. ببيت سوري تقليدي ... قاعدين عيلة مكونة من رجل وزوجتو وابنتن الصبية وابنن الصغير
الاب جلال : شو منيح هالبيت
الام ايمان :ماشي حالو بس ما متل بيتنا
جلال :شفتي بعينك البيت مهدوم ع الاخير
ايمان :مزالو مهدوم ليش ماخليتنا مستأجرين بنص البلد اقرب للولاد ع دوامن
جلال : هون احسن .. وكمان يلي ماعمل طلبة عودة لبيتو مارح يخلوه يفوت ع الحارة نهائيا .. قلت بنقعد بالحارة منو حارتنا وجنب بيتنا ومنو بكرا بيطلعنا تعويض ع البيت وبنرجع بنعمر البيت بأذن الله
ايهم :بابا يعني رح نعمر بيت جديد
جلال :اي بابا
ايهم :يسس
هبة :وعشو مبسوط .. بكرا بترجع بتعلق وبتجيه شي قذيفة
جلال :ان شاء الله لأ
ايمان :الله يسمع منك
هبة :ومين بدو ياخد ايهم ع المدرسة بكرا
ايمان :انتي
هبة :بس بتأخر عمحاضراتي مابكفي صرلي اسبوع معلطة
ايمان :طلعي بكير بتحلقي
هبة : معلش انزل شوي عالدكان يلي تحت جيب شوية غراض .. وكمان الغراض يلي وصيتني عليهن
امها :خدي اخوكي معك
هبة :ماشي .. ولا دب قوم
ايهم :يلا
مسكت ايد اخوها ونزلو ع الدرج .. ع باب البناية بيطلع شخص قدامن ( شب بالعشرينات قريب من ٣٠) .. بتزح مشان تفتلحو طريق هو بزح معا .. بتروح هيك بروح معا بتجي هيك يبجي معا وقفت وقالت :خلصنا مروق
رمقها بنظرة عدم اعجاب وفات
هبة :شو هالعالم هية .
جابت الغراض لامها وطلعت
ام هبة :جبتي الغراض كلن
هبة :اي هدول هنن بالكيس
هبة :ماما انا فايتة جهز غراضي مشان بكرا روح ع الجامعة
ام هبة :ماشي .. روحي الله يرضى عليكي
ايهم :ساعدك اختي
هبة :بشو بدك تساعدني بلله .. روح التهي بدورسك ايهم افندي
ايهم :ماعندي دورس
هبة :كذاب .. يلا جاي علمك انا روح طلع كتبك
ام هبة :الله يرضا عليكن ..
...........................
اخر الليل
قاعدة هبة بالغرفة يلي اختارتا تكون الها .. والها بلكون بطل ع الشارع .. حطت شالها الصوف وطلعت وقفت ع البلكون وصارت تتصفن بالقمر المتكمل وحواليه غيوم متفرقة .. ومن بيناتن عم تضوي النجوم .
هبة : سبحان الخالق .. ياريت لو اعرف ارسم .. كنت بس رسمت السما
رجعت عغرفتا وسكرت باب البلكون ..وراحت ع تختها وتمددت وغضت حالا منيح ونامت
...........................
تاني يوم جهزت هبة حالا لتروح ع الجامعة
هبة :ماما بدك شي
ام هبة :انتبهي ع اخوكي
هبة :حاضر ماما بوصلو ع مدرستو وانا بكمل ع الجامعة
طلع ابوها من الحمام وكان مغسل وجهو
هبة :صباحو بابا
راحت وضمتو وباستلو ايدو
ابوها :الله يرضا عليكي
هبة :تعال ولاه بوس ايد ابوك
قرب ايهم وباس ايد ابوه ..
طلع ابوهن من جيبتو مصاري وعطاهن مصروف
مسكت ايد اخوها وطلعو من البيت .. نزلو عباب البناية وشافت نفس الشخص يلي تصادفت معو مبارح .. حامل شنتةسودة اقترب من سيارتو ركبها ومشي .. وهبة عم تلحقو بعيونا .. عملت نظرة ع البناية يلي قاعدين فيها وكأنو عم تسال حالا هاد عايش هون..
مشت لاول الشارع وقفت سرفيس وركبو
__________________
بالجامعة فايتة عم تركض بدا تلحق محاضراتا .. دفشت باب القاعة .. وتفاجئت بنفس الشخص واقف قدام اللوح وعم يشرح .. ولما انفتح الباب كلن سكتو واتطلعو عليها
رفع ايدو بغرور وشاف الساعةوقال :الساعة ٨ ونص
هبة :بسس
:لبراا
هبة نزلت راسا بخيبة امل وطلعت
وهو رجع يكمل محاضرتو
طلعت وقعدت على مقعد بحديقة الكلية وهية مقهورة
هبة :من وين طلعلي هاد هلأ .. الله لايوفقو .. وكمان من ايمت بدرس عنا هاد .. اوووف ياربي مابكفي صرلي اسبوع معطلة واليوم راحت علي المحاضرة
وهية قاعدة طلعو طلاب قاعتا من البناء وقربو منها بنتين
نهى :هبووشي ..
وقفت وسلمت عليهن
هبة بحزن :كيفكن
نهى :مشتاقيلك
صباح : والله قلنا هي معد تجي ع الكلية
هبة :ليش
نهى : .. كلن بقولو رح نغيب جمعة ونرجع وبروحو يا امابسافرو يا اما بيتزوجو
هبة :اصلا هية هالظروف يلي عم تجبرنا وتمشينا متل مابدا
صباح : اي والله معك حق .. انتي وين هالغيبة
هبة :منطقتنا رجعت امنة وعملنا مصالحة لنرجع عبيوتنا
نهى : صار بعيد عليكي ماهيك
هبة :اي والله مشان هيك هاد الدب مادخلني الله ينتقم منو
صباح :شيلنا منو هلأ واحكيلنا رجعتو عبيتكن
هبة :لا بيتنا مدمر ع الاخير .. بالحي التاني استأجرنا بيت
نهى :مزال بيتكن مهدوم .. ليش رجعتو ليش ماضيلتو هون .. عالقليلة قريبة من الجامعة
هبة :ليش انا يلي بدي ارجع هاد بابا .. قال بدو يضل بالحارة .. وكمان مشان يسجل البيت ويعطونا تعويض ويرجع يرممو.. بدي اعرف شو بدو يرمم ليرمم
صباح :يلا على خير والله يهدي هالوضع
هبة :امين .. المهم هلأ حكوليلي مين هاد الدكتور .. وايمت صار يدرسنا كل يلي غبتن جمعة
صباح :اولا هاد مو دكتور هاد معيد .. وتعيين بهل الجمعة يلي غبتيها
هبة :مبين عليه لئيم ماهيك
نهى :عادي ..بس بفهم كتير بالشرح
هبة :الله لايسامحو روّح علي المحاضرة..
صباح :ولا يهمك هلأ بعطيكي دفتر المحاضرات تبعي
هبة :شكرا كتير حبيبتي .. اي صحي شو اسمو
صباح : أُسيد (بضم الالف)
هبة : أُسيد حلو هالاسم .. بس هو لأ
نهى : والله حلو ومهضوم
هبة : لك شفتي مأحقرو .. لك شافني لما طلعت ع القليلة يقدر وضعي انو بيتي بعيد .. هو شو عبالو معو سيارة
صباح :كيف شافك لما طلعت
هبة :يمكن ساكن بنفس البيت يلي مستأجرين فيه .. شفتو مبارح واليوم
صباح :بيت ؟؟
هبة :هو لابيت ولا بناية .. بيت من ٣ طوابق يمكن هو ساكن بالطابق الارضي .. ونحنا فوقن
صباح :اصبح لازم تتعرفي عليه مشان يدعمك وغمزتا
هبة :يضرب بشكلو .. مانك شايفتيه شو لئيم
نهى :خلص شيلونا من سيرتو وخلونا نقوم نشرب شي
هبة :اي والله .. وانسخ المحاضرات كمان
____________________
خلص الداوم وراجعة هية واخوها ع البيت وعباب البناية رجعت التقت بأسيد
رمقتو بنظرة كره وفاتت .. وهو بادلا نفس النظرة
دخل البيت وكانت امو بأنتظارو
امو : اهلين حبيبي .. تعال الاكل جاهز
قرب وقعد ع الطاولة وحط شتنو ع الكرسي يلي جنبو
امو : ليش ماغسلت
اسيد : والله نسيت
قام غسل ورجع ع السفرة
امو : يلا سمي بلله
اسيد :بسم الله . اخد صحن وسكب فيه وصار ياكل منو
اسيد :صحي ماما .. مين هدول يلي فوقنا
امو :مستأجرين جدد
اسيد :اي
امو : ليش عم تسأل
اسيد : لا مافي شي .. بس شفت حدا منن طالع .. قلت بسألك
امو : والله بدي روح اعملن زيارة واتعرف عليهن
اسيد : اي
وكمل اكلو
_________________
عند هبة
قعدت هية واهلا عسفرة الاكل وصارو ياكلو
ابوها : ليش الاكل مالح
ام هبة اكلت لقمة وقالت :والله مافي شي .. انت هيك عطول مابيعجبك العجب
ابوها :لكن هاد بتسميه اكل
اما :لكن شوو اسمو هاد مانو اكل ..
ابوها :والله لونو مانو نعمة لقوم ارشقو بنص خلقتك
امها : يعني انت عطول هيك مستحيل تهنينا بشي .. عكلشي بدو يعلق .. كل هالزلم بتاكل ومابتحكي شي الا عندي .. ولسه داوشنا بطبخ امو
ابوها :ولا بيطلعلك تطبخي متلا
امها :الله ياخدك لعندا لكن
جلال :عم تدعي علي بالموت
ايمان : لانو والله هالعيشة معك معد تنطاق
هبة وايهم قاعدين وخايفين
جلال :ليش انا يلي طايقا ..
ايمان :كلو امي كلو .. شوبدكن فيه
جلال :لانو انا مجنون .. كلو شوبدكن فيه .وقف وقلب هالطاولة والاكل كلو صار ع الارض .. هبة قامت بسرعة هية واخوها وقفوا بالزاوية وضمو بعض وهنن خايفين من ابوهن
ايمان : لاحول ولاقوة الابلله .. هيك انت بدك تمضي هالعمر .. الولاد صار عندن عقدة نفسية من ورا جنانك
جلال عصب وقال: انا مجنون يابنت الكلب
رفع ايدو وضربها كف .. وقعت ع الارض ونزل وصار يضرب فيها .. هجمت عليه هبة وايهم يبعدوه عن امون
هبة عم تبكي :مشاان الله يا بابا.. مشان الله تركها
وتشدو من ايدو دفشها لورا وقام وفات وسكر عحالو الباب
نزلو لعند امون ضموها وصارو يبكو وهية تبكي معن
وهنن عم يبكو انفتح الباب يلي دخل عليه جلال وطلع ومرق من قدامن وصار يرفس صحون الاكل برجليه وضل طالع
ايمان :الله لايردك .. ان شاء الله بجيبولي اياك محمل
هبة وهية عم تبكي :ماما مشان الله لاتحكي هيك ..
ايمان :طول عمرو حقير وجحش
هبة :ماما مشاان الله حاج
ايمان : قومي بالطنجرة ضل شوية اكل اسكبيهن لاخوكي ..
هبة :يلا قايمة
قامت ع المطبخ سكبت لاخوها صحن وندهلتو ع المطبخ يروح ياكلو وجابت مكنسة وصارت تكنس مكان الاكل وتجمع الازاز
هبة :ماما قومي عن الارض هلأ بتاخدي برد
قامت ايمان بهدوء وقعدت على كرسي والدمعة عالقة على خدا
خلصت هبة .. وقعدت حد امها وحزينة عليها وقالت :طيب انتو ليش هيك .. الصبح ماكان فيكن شي .. ليش بتضلو نقار نقار .
ايمان :ماشفتيه متل المجنون بس بدو كلمة يقب
هبة :كمان الحق عليكي .. يعني ماضروري تجائريه كل كلمة بكلمتا
ايمان :ماني ناقصتك قومي انقلعي من وجهي
هبة : والله ماقصدي .. بس بدكن تضلو هيك طول عمركن
ايمان :كل هالزلم شايفة نسوانا ومانا مصدقة الا عندي بضل معصب ع الطالعة والفايتة .. الله وكيلك بنت عمتي نجوى طبخا ما بيتاكل وجوزا شايفا ومانو مصدق .. بس الله الي بالني .. هنن بيت عمي كلن هيك من عمي وجر .. والله ابي بحياتو ماسمعا لامي كلمة تزعجا .. مع انون اخوة .. بس عمي شيطان وابي ملاك قدامو .. الله يسامحكن يا اهلي قلتلكن مابدي اياه .. جبروني اتزوجو قال ابن عمك ومنا وفينا .. ومن هالحكي .. الله يسامحن ويرحمن ..
هبة :يعني انتي ماكنتي بتحبي ابي
ايمان :هه ابوكي بدو ينحب .. ومين هي المجنونة يلي بدا تحبو لابوكي .. بس نصيب يلعن ابو هالنصيب
هبة :وابي ماكان يحبك
ايمان :ههههه ابوكي لا بحب ولابيعرف يحب .. حتى هو تزوجني غصب عنو .. ومضينا هالعمر متل مانك شايفة عكل شغلة بقوم بيضربني .. وبتقوليلي سايريه .. انا بالزمنات كنت ساير كنت اكل قتل اكتر من هلأ .. بعدين قلت معد اسكت القتلة بدي اكلا بدي اكلا ...
هبة :خلص ماما طولي بالك ..
ايمان : وكمان انتي ياحسرتي عليكي حظك بدو يطلع متل حظي .. قاريين فاتحتك ع ابن عمك حاتم قال
هبة : ليش شبو حاتم
اسمان :لسه اجحش من ابوكي وعمك .. هادك حمار نظامي .. ان شاء الله بتجيه شي رصاصة وبموت ومابنشوف خلقتو
هبة :حرام ماما تدعي عليه
ايمان :استغفر الله العظيم .. استغفر الله العظيم .. يارب سامحني .. يارب سامحني .. بس والله من حرقة قلبي عليكي انو يصير فيكي متل ماصار فيني .. بس مابكون اسمي ايمان اذا بخلي هالشي يصير
هبة خافت من جواها من حديث اما
هبة :شوبدك تعملي
ايمان :مرت عمك درويشية وبينضحك عليها بكلمتين .. بكرا بدي روح لعندا وقلا انو عم يجي عرسان كتير لهبة .. وحاتم الله يردو بخير وسلامة محدا بيعرف عنو شي ولا حتى عم يخبرو شي .. من وقت راح ع الجيش وانفقد وانو هالبنت بدا تضل تستنا .. واكيد رح تحكي مع عمك وعمك يحكي مع ابوكي اذا اجا نصيبك مايوقفك ... اصلا هو بكون مدفوس من زمان
هبة :ماما حرام عليكي
ايمان :ياربي .. سامحني .. اااخ من هالعيلة رح تجنني
هبة :وبابا وين بكون راح
ايمان :اطمني هلأ بيجي
هبة :مشان الله ياماما طولي بالك ولاتعصبيه اذا اجا والله نحنا مابنحبكن تتقاتلو .. والله عم خاف كتير اذا انا عم خاف شو حالة ايهم
مسحت دموعا وقالت انا فايتة ارتاح .. اهتمي بأخوكي
قامت فاتت عغرفتا وسكرت الباب وهبة قامت لعند ايهم كان مخلص اكلو وحامل الصحن وعم يرفع رجليه ليطول المجلى ويحط الصحن بالمجلى .. ابتسمت على برائة اخوها وراحت اخدت منو الصحن وحطتو بالمجلى
ايهم :اجا بابا
هبة :لا .. تعال نام شي ساعة
اخدت اخوها عغرفتو ونميتو عتختو .. وراحت عغرفتا
السرد بصوت هبة : مابعرف ليش خفت من حديث امي ..معقول كون انا متل امي .. واتزوج واحد ع اي غلطة يضربني .. وحاتم انا ليش ماكنت فكر فيه مع انو بعرف من زمان انو مقرية فاتحتي عليه .. بس هالموضوع ماكنت فكر فيه نهائيا وكأنو مابخصني
.. فكرت فيها منيح .. وقلت انا ليش خايفة ع الفاضي .. اصلا حاتم مفقود ومحدا بيعرف عنو شي من وقت راح ع الجيش ..ليش بدي خاف من شي مجهول .. وحتى لو رجع اذا ماعجبني رح ارفض ابي مرة قلي انو مارح اجبرك على شي بحياتك .. صح بابا عصبي وبتطلع خلاقو بسرعة وبيضرب .. بس بيحترم قرارتنا وبخلينا نحنا يلي نمشي بالطريق يلي بدنا اياه .. طبعا بحدود
_____________________
الصبح فاقت هبة .. وطلعت من غرفتها وشافت ابوها قاعد وعم يقرا الجريدة اليومية .. وامها طالعة من المطبخ حطتلو فنجان القهوة على الطاولة وبرمت ضهرا لتمشي
جلال :ليش مانك جايبة فنجان الك
ايمان :مابدي
جلال : اي يلا روحي جيبي فنجان قهوة وتعي .. قهوة الصبح مابتحلى الا معك
ايمان : هه رح صدق ..
جلال : اذا مشان مبارح انا بعتذر .. بس مليون مرة قلتلك لما بكون معصب لاتردي بوجهي وتجائريني
ايمان :وهاد يلي عندي
جلال :طيب روحي جيبي فنجان قهوة وتعي .. يلا ولوو
هبة واقفة وعم تتطلع عليهن وتبتسم ابتسامة دافية .. وعم تترجا اما بعيونا انوو توافق .. هية امنية كل طفل او كل ولد بحب يشوف اهلو متفقين وما يدخل الزعل بيناتن
ايمان التفتت ناح هبة وشافتا واقفة ع الباب وعم تتفرج عليهن .. وشافت بعيونا كيف عم تترجها توافق تقعد مع ابوها ويتصالحو
ابتسمت هبة ابتسامة مع دمعة بعينا .. وايمان بادلتا ابتسامة حلوة
ايمان : هبة تعالي جيبلي فنجان قهوة من جوا
جلال : وينا هبة فاقت ( والتفت ليشوفا
قربت هبة وقالت :صباح الخير
جلال :صباح النور حبيبتي
ايمان :صباح النور
جلال :بابا الله يرضى عليكي روحي جيبي فنجان قهوة لامك وتعي
هبة :ماتكرم عيونك وعيون امي .. يلا ثواني
راحت بسرعة جابت فنجان قهوة وعطتولامها
ايمان :حبيتي جهزي الفطور
هبة :من عيوني
بلشت هبة تجهز الفطور وكل شوي تلقي نظرة على ابوها واما يلي قاعدين جنب بعض .. ورجعو يتصرفو طبيعي وكأنو ماصار شي مبارح
قعدو كلن عسفرة الاكل بعد ما فيقو ايهم
هبة :بابا ايو ساعة جيت مبارح .. ماحسيت عليك
جلال :تأخرت شوي
هبة : اممم
ايمان :كنت بدي قوم اقفل هالباب .. لانو يلي بيتأخر بالسهرة مالو فوتة على هالبيت
هبة : لاتصدق بابا مابتعملا .. بتذكر انو انا نمت وهية ضلت عم تستناك
ايمان :هبةة
هبة : عم احكي الصدق
جلال :صح امك هيك بتحكي .. بس بعرف قلبا طيب
هبة :وانت كمان قلبك طيب .. الله يخليلي اياكن ومايحرمني منكن
جلال : وانتو كمان الله لايحرمني منكن
خلصت هبة اكل وقالت :الحمد لله شبعت قوم ايهم لوصلك
جلال :لا ايهم في اوتوكار جاي ياخدو
هبة :عنجد ؟؟
جلال :اي
هبة :طيب منيح ..لكن انا لروح مشان لحق محاضراتي
طلع من جيبتو مصاري وعطاها وقال :خدي بابا
اخدتن وباستلو ايدو وطلعت
نازلة على الدرج والابتسامة على وجها .. هبة من النوع الحساس جدا .. وبتفرح لامور بسيطة .. وبتزعل من امور بسيطة لدرجة التفاهة
عباب شقة اسيد انفتح الباب وتصادفو مع بعض ع الباب .. ما وجهتلو اي كلمة وكملت لبرا وهو صار يتطلع عليها بطرف عينو .. سحب الباب وطبشو ونزل
ركب بسيارتو ومشي ليطلع من الشارع .. كانت واقفة وعم تأشر للسرافيس يلي عم تمرق .. بس محدا عم يوقفلا .. نفخت واتطلعت ع الساعة .. ورجعت مدت ايدا تأشر للسرافيس
هو مرق من جنبا .. وعلى وجهو ابتسامة جانبية
اسيد :ان شاء الله اليوم كمان تتأخري .. لانو مارح دخلك
ليش هيك عم يحس بالكره تجاها مابيعرف... مع انو ماعملتو شي
________________________
بالقاعة
دخل اسيد .. بكل غرور
اسيد :صباح الخير
الكل :صباح النور
عمل نظرة ع الطلاب ومالقاها
فجأة انفتح الباب .. وكانت هبة .. وقفت بدون ماتحكي
رفع ايدو ليشوف الساعة
هبة :شوو
اسيد :لبرا
هبة :والله جيت بكير
اسيد : متأخرة خمس دقايق
هبة : بس لسه مابلشت
اسيد : حتى والو ... متى مادخلت هاد الباب بيتسكر وراي وممنوع حدا يدخل
هبة عم تحبس الدمعة وحكت بغصة : والله مانو عدل .. وانت شفتني كيف واقفة عالطريق وماعم لاقي مركوب
اسيد :ما مشكلتي
هبة :الله لا يسامحك .. ومادتك معد احضرا وان شاء الله برسب فيها وخطيتي برقبتك
طلعت وطبشت الباب وراها
طالب :استاذ والله حرام .. ليش مادخلتا
حس انو غلط معا وقسي عليها .. وشفق عليها
اسيد :مشان تتعلم ما تتأخر .. لوشي مهم بتكون مزروعة من الصبح .. اما ع المحاضرات بتماطلو
صباح : بعتذر استاذ ع المقاطعة .. بس فيك تحكي عنا كلنا هيك معلش اما هبة لأ .. لانو هبة اكتر وحدة منتظمة بالوقت هون .. بس من جديد منتقلة عبيت جديد .. ولسه ماعرفت كيف طريقة المواصلات مشان هيك عم تتأخر
اسيد : خلص ماشي .. من بكرا بتخبريها بتجي تحضر المحاضرة .. بس انو تتأخر اكتر من عشر دقايق ممنوع
صباح :شكرا استاذ
اسيد :اي وين وصلنا مبارح
_________________
طلع اسيد من القاعة وشافا كانت قاعدة عكرسي جنب باب القاعة .. ولما شافتو طلع قامت ودخلت لتحضر المحاضرة التانية .. مشت من جنبو بتجاهل .. ومبين على عيونا بكيانة
ضل واقف شوي مكانو وحس بتأنيب الضمير عليها .. وكمل مشيو
فاتت وقعدت جنب رفقاتا صباح ونهى
هبة :الله لايوفقو
صباح لاحظت انو عيونا مورمين وسألتا :بكيانة
هبة :انا .. لا
نهى :كذابة
هبة :ماشفتي كيف احرجني قدام الطلاب ..
صباح :خلص طولي بالك مو مستاهلة
هبة :انا اي حدا بحكيني كلمة صغيرة بتقهر .. بتحز بقلبي ومابقدر مرقها عادي
نهى :شو بتعملي
هبة :ههه ببكي
صباح :لك تضربي .. بس نحنا حكيناه وقلنالو وضعك
هبة :ليش مابيعرف وضعي
نهى :المهم قال رح يسمحلك تدخلي بس بشرط ما تتأخري اكتر من عشر دقايق
هبة :لا عشر دقايق ولاساعة انا محاضراتو معد احضرا
صباح :لا تجني .. وكمان هي المادة صعبة وبدا شرح لتدخل ع الدماغ
هبة :بتدخل ولا عمرا ما تدخل.. انا على محاضرتو معد ادخل
نهى :مابطالعيها للمادة
هبة :وبلا ما طالعها .. خليني ارسب بكون احسن
صباح :بس ياهبة
هبة :انا حكيت كلمة ومابتراجع فيها .. ومو هبة يلي بترجع بكلاما
صباح :الله حيوو ابو شهاب
ضحكت وقالت :شكلين مابحكي
نهى :بس عنجد مارح تحضري .. ولا عم تمزحي
هبة :والله معد احضر .. بدك يقول عني رجعت بكلاما
صباح :يقول شو مابدو يقول .. المهم ترفعي المادة
هبة :خلص .. سكتو اجا الدكتور .. بنكمل حكينا بعدين
الدكتور:مرحبا
الكل :اهلين دكتور
______________________
طلعو وصارويتمشو بالحديقة .. هبة كانت ضامة الكتب عصدرها وماشية جنب صباح ونهى
صباح : اي هبوش .. شو قررتي
هبة :خلص انا قررت .. ومعد اتراجع بقراري
نهى :ياربي ع يباسة هالراس
هبة :طيب انتو شو بدكن مني
صباح :بدنا مصلحتك يا مجنونة
هبة :مصلحتي وبعرفا
اجت صبية لعندن مستعجلة :هبة منيح يلي لقيتك
هبة :اهلين اسماء .. شوفي ليش عم تدوري علي
اسماء :في مصيبة
هبة :مصيبة شوو
اسماء :بتعرفي الاء
هبة :مين الاء
اسماء :الاء الرافع
هبة : اي عرفتا شبا
اسماء : انتي لما غبتي اسبوع فكرناكي معد ترجعي
هبة :ايي
اسماء : هية البنت كانت تحب واحد .. بس اخر فترة صارت بدا تطفشو ..قام قالتلو انت مطلوب
هبة :انا ماعم افهم شي .. حدا عم يفهم شي ياصبايا
صباح :لا
اخدت اسماء نفس وقالت :لك خلونا نقعد ونحكي
هبة :هاد مقعد فاضي
راحو وقعدو عليه واسماء تابعت حديثا
اسماء : الاء بدا تطفشو .. قام قالتلو انو انت مطلوب وعم تشتغل مع الجيش الحر والمسلحين وانا معد فيني كمل معك .. طبعا الشب لا مطلوب ولا بيمشي مع حدا
هو هون بدو يسألا مين خبرك قام هية قالتلو رفيفتي وتذكرت انك معطلة وفكرتك معد ترجعي قام قالتلو رفيفتي هبة وعطتو اسمك الكامل
هبة :شوووووو
اسماء : والله هاد يلي صار وانا جيت حذرك لانو الشب حاطك ببالو وعم يدور عليكي لينتقم
هبة :لك انا شو دخلني .. واصلا هي الاء بحياتي ماوقفت معا .. ليش عم تتبلاني .. ياربي على هالمصيبة
صباح : وينا هي الاء هلأ .. لروح معصرا تحت رجلي
اسماء :راحت ومعد ترجع
نهى :مشان ماتنكشف
اسماء :لا سافرت عتركيا لتتزوج ابن عمتا
هبة :الله لايوفقك يا الاء .. لك انا من وين عم تجيني هالمصايب .. ياربي .. وشو الحل هلأ
نهى :نشوف الشب ونفهو القصة
هبة :مشان اذا ماكان متأكد يتأكد اكتر ..
صباح :انتي بتعرفيه للشب
اسماء :اي بعرفو .. اسمو لؤي من شوي شفتو بالكلية
هبة بخوف :شو كان عم يعمل
اسماء بحزن :عم يدور عليكي
هبة :لك انا شوو دخلني .. ياربيي ..
نهى : وماعرفتي.. شو بدو يعمل مع هبة
اسماء :مابعرف .. بس حاطط الشر بين عيونو .. وخصوصا بعد ماعرف انو الاء سافرت لتتزوج .. حاطط كل الحق على هبة
هبة :لك يضرب منو لألاء لحظي البهوي .. انا شوبدي اعمل بحالي هلأ .. اكيد بكون جانن وممكن يقتلني لتهدى النار جواتو
اسماء : احسن الشي .. تغيبي فترة عن الجامعة .. لحتى يهدى
هبة : طيب كيف بدنا نوصلو لهاد الشب
اسماء :بعطيكي اسمو ع الفيس
هبة :قولولي صبايا شو اعمل
صباح : حاليا خلينا نهدى .. بس اسماء عطينا اسمو
اسماء : ببعتلكن الرابط ع الفيس .. وانا اذا شفتو رح فهمو الموضوع بركي بصدق مني .. لانو انا رفيقتا لألاء
هبة :تضربي منك لألاء
اسماء :انا مادخنلي .. لما قالتلو هيك ماكنت موجودة انا
نهى :حصل خير
اسماء :انا رايحة هلأ .. بدكن شي
هبة :لا .. الله معك
رحت اسماء وهبة حكت : مشان الله يا صبايا قولولي شو اعمل
صباح : انا قلبي بارد اطمني ان شاء الله مايكون في شي
هبة : يارب
صباح شافت الساعة وقالت : رح نتأخر ع المحاضرة .. يلا قومو
هبة : مابدي مالي نفس
نهى : عرحتك
صباح : ليك التانية عم تقلا عراحتك ..قومي خلصينا
نهى :خلص تركيها اذا فاتت مارح تركز .. وبركي سألها شي الدكتور وهية مو منتبهة .. بيطردا برات القاعة
صباح :متل مابدكن انا رايحة يلي بدو يجي يلحقني
نهى :انا جاي
_________________________
بجنب تاني من الكلية .. واقف لؤي مع واحد
شافتو اسماء وراحت لعندو
اسماء :لؤي ..ممكن نحكي
لؤي :لقيتلي البنت
اسماء :قلتلك البنت مادخلا .. هي الاء كذبت عليك
لؤي :شو الدليل
اسماء :لك البنت مابتعرفك .. ولاحتى بتعرف الاء منيح .. بس الاء لزقت الكذبة فيها مشان تبعد عنك .. وكمان بالكلية كلا محدا معو خبر بشي .. يعني لو هبة حكيانة كنت لقيت كل الكلية بتعرف وماكنت ضليت لهلأ بالكلية
لؤي :وين بدي كون
اسماء :ببيت خالتك
سكت وكأنواقتنع بحكيا وقال :مامشكلة روحي
اسماء :يعني لسه بدك تأذيها للبنت
لؤي :بدي اتأكد بالاول
اسماء : اتأكد عمهلك بس البنت والله مادخلا
لؤي :خلص .. خلص روحي هلأ
اسماء :باي
لفت اسماء ضهرا ومشت
ولؤي رجع لعند رفيفو يلي كان واقف معو
رفيقو :شو بدا
لؤي :لك هي رفيفتا لألاء
:وشوبدا
لؤي :لك تضرب الاء ورفيقتا .. عنجد البنات بنص عقل
:ههه عنجد شوفي احكيلي
لؤي :الاء مفكرتني بحبا .. وانا كلا ماني شايلا من ارضا .. المهم حسب مافهمت جايها عريس بتركيا .. وبدا تلاقي طريقة تهرب .. قام قالتلي انو انت عم يحكو عليك بالكلية انو انا بطلع مع الجيش الحر وانا مطلوب .. وقال هية مافيها تكمل معي ..
: ايي .. وبعدين
لؤي :انا ماني شايلا من ارضا .. بس لما سمعت هيك جن جنوني .. يعني حلو هالسيط ..
:بس لاتخاف لو في هيك شي ماكنت لهلا واقف معي
لؤي :نفس حكي اسماء
:مين اسماء
لؤي :هي يلي كانت معي .. عم تقلي كلا كذب ومحد خبر بهل الاشاعة
: وانا حكيي من حكيا
لؤي :امشي شوبدك فيهن بنات بنص عقل
__________________
المسا
هبة بغرفتا رايحة جاي وعم تفرك باديها بتوتر
هبة :ياربي شو اعمل .. بركي طلع عنجد مع المعارضة واجا خطفني .. ياربي شو اعمل
راحت قعدت على تختا وحملت موبايلا وفتحت ع اسم بالفيس .. وبعتتلو طلب صداقة الاسم كان لؤي المحمد
هبة : ياريت يقبل الطلب لحتى احكيلو الحقيقة .. وكمان ان شاء الله يصدقني
____________________
لؤي قاعد عم يدرس اجاه اشعار فيس .. فتح موبايلو ع الفيس
لؤي : هبة حمدان ؟؟.. مين هي .. وليش باعتلي طلب صداقة
دخل على بروفايلا وقعد وشاف صورتا وصار يتمعنا .. لؤي :مين هي .. والله حلوة .. اي دخيل هالعيون .. والشعر الخرنوبي .. وهي قبول
كبس على قبول الطلب
عمل قبول ودخل ع المنسجنر وبعتلا اشارة ترحيب
وهبة فورا ردت عليه : مسالخير
لؤي :هلا مسالنور
هبة :انا هبة
لؤي :وانا لؤي
هبة :قصدي انا هبة
لؤي :وانا كمان لؤي
هبة :انا هبة يلي قالتلك عليها الاء
لؤي :ايه .. ايه .. انتي يلي عم تحكي علي
هبة :لا والله ماعم احكي عليك في سوء تفاهم انا اصلا مابعرفك نهائيا لحتى احكي عليك
لؤي حكي وقال : لك حتى لو حاكية علي انا سامحتك .. لك يقبرني جمالك .. هي بنت والاء بنت .. لك ياعيني عليكي
هبة :وين رحت
لؤي :اي اي معك
هبة :صدقتني
لؤي :لأ .. اناصرت خاف امشي بالشارع بعد ما طلعت هالاشاعة علي .. واليوم اجاني انزار من الفرع
هبة :والله انا مادخلني .. صدقني يا اخي .. بترجاك تتفهمني .. والله انا ماحكيت شي .. الاء هية يلي حطت هالكذبة بضهري لانو كنت معطلة
لؤي :انا هالحكي مابيمرق علي .. انا الي جماعة بالفرع وهنن يلي خبروني انو في حكي .. يعني ممكن بكل بساطة حط اسمك عندن وبكرا بخليهن يجو يشحطوكي
هبة : مشان الله انت شو عم تحكي
لؤي :لكن انا تطالعو علي هالسيط .. وانا بمشي الحيط الحيط وبقول ياربي السترى
هبة :طيب شوبدك وانا جاهزة .. بس بترجاك بلاها فوتت الفروعا .. انا بنت وانت بتعرف شو يعني بنت تفوت ع افرع امنية .. مشان الله يا اخي .. والله انا مظلومة .. حط اختك محلي
لؤي :خلص .. خلص .. قطعتيلي قلبي
هبة :صدقت انو مظلومة
لؤي :ماكتير
هبة :طيب سامحتني
لؤي :بسامحك بس بشرط
هبة :شرط .. شرط شوو
لؤي :بكرا بشوفك وبنحكي
هبة : وين
لؤي : بكافيه الكلية
هبة : ماشي .. بس كيف بدي اعرفك
لؤي : هي صورتك يلي ع البروفايل
هبة :اي
لؤي :خلص انا عرفتك
هبة : طيب عن شو بدنا نحكي
لؤي :نحكي حكي
هبة : مابينحكى هون
لؤي :لأ وجه لوجه احسن
هبة : ضرورية هالقعدة كتير
لؤي : خلص لاتجي .. الله معك
هبة : ع وين
لؤي :عندي مكالمة عالفرع
هبة :صدقت عم امزح معك
لؤي : بكرا بشوفك لكن
هبة : ايو ساعة
لؤي : ع العشرة
هبة :ماشي
سكر الموبايل وهو عم يضحك وقال غمزت السنارة .. هههه ياحرام قال صدقت انو الي حدا بالافرع .. بس منيح كذبة حلوة.. والله بكرا لمشيكي على اصابيعي ومتى مابلشت تحوص بهددا بالفرع .. لك انا ابو الافكار
________________
هبة .. رجعت الموبايل بهدوء ع الطاولة وهية شاردة مع خايفة
سرد بصوت هبة : كنت كتير مشوشة وخايفة .. ياترى يلي عم اعملو صح .. بس ليش هيك صار .. شو هاليوم النحس .. ليش هيك انا حظي .. بس قويت قلبي وقلت لازم واجه مشاكلي وماضل خايفة ومترددة عكل شلغة.. وكمان ليش خايفة اذا عنجد حاول يتمادى هاد يلي اسمو لؤي مارح اسكتلو .. ولاهداك الشايف حالو أُسيد .. لك هاد اسييد مو أُسيد
يومتا نمت وانا عم فكر
___________________________
الصبح
فاقت هبة بكير وطلعت وصبحت على اهلا وطلعت بكير
وصلت ع الكلية ودخلت مع رفقاتا ع القاعة .. بس اول محاضرة لدكتور غير اسيد ..
صباح :شو جاي اليوم بكير
هبة :حظي حلو لقيت سرفيس .. بس مبارح الله لايوفقن محدا يوقفلي
صباح :حصل خير
___________________
اسيد طلع من بيتو .. وتوجه ناح سيارتو .. وقف شوي واتطلع لفوق عبيت هبة .. ورجع اتطلع ع الموقف محل ما بتوقف مشان تركب سرفيس .. ركب سيارتو ومشي اتجاه الجامعة
________________
خلص محاضرة الدكتور ..
هبة قامت وصارت تضب كتبها
نهى :ع وين لسه محاضرة تانية
هبة :بعرف .. مارح احضرا
صباح :لساتك ميبسة راسك
هبة :اي
حملت الشنتة وعلقتا بكتفا واخدت كتبها ضمتن وطلعت من المدرج .. وهية ع الباب بيدخل أسيد
اسيد :ع وين
هبة :طالعة
اسيد :والمحاضرة
هبة :مابدي احضرا
اسيد: مابدك تترفعي بالمادة
هبة :لأ
مد ايدو لورا وسكر الباب
اسيد :رجعي ع مكانك
هبة :مابدي .. وبعدلي لو سمحت من قدام الباب
اسيد :انا عندي قاعدة .. اذا تسكر هالباب ممنوع ينفتح لتخلص المحاضرة
هبة : عندك مو عندي
اسيد :مبارح كلون كانو يحمدو منك .. فكرتك خلق وبشر طلعتي قليلة ادب
هبة :حكيك مردود عليك
ماشافت غير رفع ايدو وضربها كف
هبة رفعت راسا وايدا على خدا مكان الكف وقالت :عم تضربني ؟؟ عم تضربني الي .. مابتعرف انو الضرب ممنوع .. والله اذا مابخليهن يفصلوك مابكون انا هبة
دفشتو وطلعت وهو واقف مكانو مصدوم .. كيف هيك عمل .. وكيف ضرب طالبة عندو وهية ..
اتطلع على وجوه الطلاب كلها كانت لوم وعتاب
اسيد : مافي محاضرة اليوم .. بالاذن
طلعو وهو مقهور من القاعة
وصباح ونهى قامو بسرعة ضبو غراضن وطلع يدورو على رفيقتن
وبلشو يدورو عليها بالكلية وماكانو يلاقوها .. وقفو وهنن عم يتطلعو عبغص بحيرة
صباح :وين راحت هي
نهى :اي عرفت .. تعالي
صباح :ع وين
نهى :ع الحمام
راحو ع الحمامات .. دخلو وصارو يبحثو عنها بعيونن .. لحتى سمعو صوت بكي من احد الحمامات .. قربو ودقت صباح ع الباب : هبة انتي
هبة : اهئ... اهئ ..
نهى :هي انتي هون ونحنا برمنا الكلية عليكي .. طلعي
انفتح الباب وطلعت وعيونا مورمين من البكي
صباح :انتي مجنونة .. شو عم تعملي هون
هبة بطريقة طفولية :وين بدي ابكي لكن بدون محدا يشوفني
نهى :بس ما بالحمام .. بعدين بيطلعولك
هبة :مين هدول
نهى :البسم الله
هبة :شووو .. خلونا نطلع بسرعة
طلعو وهبة صارت تمسح دموعا
هبة :شفتو ماأحقرو
صباح :كمان انتي قللتي ادب معو
هبة :بس مايضربني .. شو شايفني طالبة صف اول .. لك انا جامعية .. يعني هلأ اذا بدي اشتكي عليه بيخربو بيتو
صباح : وليش ما اشتكيتي يا ابو عنتر
هبة : وانا عم ابكي فكرت فيها .. واكيد رح يفصلوني الي ويطلوبو ولي امري
هبة :صحي شقد صارت الساعة
نهى اتطلعت بموبايلا وقالت :١٠ و١٠
هبة :شووو .. لك تأخرت ع موعدي
وتقدمت بخطواتا لتمشي .. بس صباح مسكتا من ايدا وقالت :تعي لهون موعد شوو
هبة :موعدي مع لؤي
نهى :ومين هاد لؤي
هبة :هاد حبيبي الاء
صباح :شووو .. وليش رايحة لتقابليه
هبة :هو طلب انو نحكي
نهى :وانت من كل عقلك رايحة تشوفيه
هبة :لا من نصو .. تركوني هلأ ببقا بخبركن شو رح يصير معي
.............
فاتت ع الكافيه وهية عم تتلفت حواليها وتبحث عنو بعيونا
وهية عم تنقل نظرا بين الطاولات .. في شب رفعلا ايدو .. وراحت لعندو
هبة :لؤي ؟؟
لؤي :اي
هبة :وانا هبة
لؤي :تفضلي ارتاحي
قعدت وقالت : تفضل شوفي عندك
كان هو عم يتمعن بملامحها الحلوة
هبة لوحتلو بأيدا قدام وجهو وقالت : هيي عم تسمعني
لؤي : اااه ..اي .. عم اسمعك
هبة :اي حكيلي ليش جبتني لهون
لؤي تبدلت ملامحو لملامح حادة وقال :ليش عم تحكي علي
هبة:اناا ماحكيت على حدا .. وبعدين مابعرفك ليش لحتى احكي عليك
لؤي : بس انا بدي اتأكد بالاول .. اذا انتي حكيانة او لأ
هبة :وكيف بدك تتأكد
لؤي :بدي نمشي مع بعض فترة .. وشوف اذا انتي بتعملي هالحركات او لأ
هبة :بلله شوو .. ليك انا حكياني عليك وروح بلط البحر
لؤي : وانا هاد يلي كنت بدي اوصلو .. واخيرا اعترفتي .. بصراحة انا مابحب اظلم حدا ..بس حقيقتك انكشفت .. وانا رح اعمل اتصالاتي
هبة بخوف : والله ماحكيت عليك .. بس كمان طلبك مو معقول .. انا بحياتي ما مشيت مع شب
لؤي :بتمشي .. وين المشكلة
هبة: بترضاها على اختك
لؤي :خلي اختي عجنب .. انابدي امشي معك هبة:كصحاب او حبيب
لؤي: اعوذ بلله .. بس بدي نصير اصدقاء .. واذا اتأكدت من طيبة قلبك صدقيني انو مارح ازعجك
هبة : طيب موافقة
وقفت وسحبت كتبها وقالت:وهلأ بدك شي
لؤي :ماعطيتيني رقمك
هبة :ببعتلك اياه مسنجر
مشت وهية وراحت صارت تمشي .. حست حالا ضايعة .. انو شو عم يصير معا .. وليش هيك مع بعضن بتجي المشاكل
هبة :هلأ مشي حالي مع لؤي لسه أُسيد .. انا بفرجيك يا اسيد لفرجيك شو عواقب يلي بمدو ايدو علي .. صح انا حساسة ودمعتي بعيني .. بس ماني درويشة ومابسامح
______________________
رجعت ع البيت ..فتحت الباب واول ما فتحتو طلع صوت ابوها وامها عم يتحانقو
هبة بحزن :كل يووم .. كل يووم ..لازم هالاسطوانة
كملت بوجها ع غرفتا بدون ماتشوفن وطبشت الباب
وصوت ابوها وامها واصل لعندا
جلال :ليش هيك القميص مجعلك .. ليش مانك كاويته
ايمان :طوول عمرك بتلبسو مجعلك .. شو عدا مابدا هلأ
جلال :لك قلتلك مليون مرة لاتجاقريني
ايمان :خلص معد جاقرك هات القميص لهون ... لحتى اكويه
جلال :هلأ فطنتي .. صرلو جمعة ملحوش بالخزانة
ايمان :خلصنا هاتو هلأ
جلال عم قلك تركيه
ايمان :عم قلك هااتو
جلال :لك شووو عملتي شقيتيه
ايمان :انت يلي شقيتو ما انا .. عم قلك هاتو
جلال :وانا عم قلك تركيه.. ليش ماتركتيه
ايمان :مابصير .. اذا ماكبرت راس
جلال :عم تحكيني هاد الحكي الي
ايمان :اي الك .. ليش مين في بهل البيت راسو كبير غيرك
جلال :ايمان طلعي من وجهي ماني ناوي ابتلا فيكي
ايمان :ماني طالعة طلااع انت ..
طاااخ
ايمان :رجعت تضربني .. رجعت تضربني ..يا جلال
جلال :بدي كسر راسك كمان
طااخ .. طاااخ
قاعدة ع التخت وحاطة اديها التنتين على ادانها مشان ماتسمع وعم تبكي .. بس لما سمعت صوت الضرب .. طلعت بسرعة وراحت لعندن .. فتحت الباب .. وكان ابوها نازل بأمها ضرب
هبة :بكفيييييي
وقف جلال واتطلع عليها .. وايمان مغطية وجها بين اديها وعم تبكي
جلال :شوبدك انتي ..
هبة :شو بدو يكون بدي .. مشان الله انتو مابتتعبو .. ما بتملو .. وكمان يا بابا .. لسه كل شغلة بتمسك امي وبتصير تضربا .. شو شايفا ولد صغير قدامك .. والله عيب احترمو عمركن
هجم عليها ابوها وشد من شعرا وقال :لمين هاد الحكي يابنت الكلب .. بس لمين بدو يكون لسانك طويل .. لامك .. قامت امها ومسكتلو ايدو وقالت خلص تركا .. بدك تضربا ضربني الي .. بس هية لأ
هبة كانت دموعا عم تحكي وتعبر عن حالتا
ترك شعر هبة ..ونتر ايد ايمان وطلع ع الصالون
رجعت ايمان قعدت ع التخت وضمت المخدة وصارت تبكي
وهبة بملل تركتا وطلعت .. وهية متجه ع غرفتا اندق الباب .. راحت فتحت وكان ايهم
ايهم :الانسة اليوم حطتلي ممتاز
هبة :العالم بتسلم
ايهم :مرحبا .
وراح يركض لعند ابوه .. بابا .. الانسة حطتلي ممتاز اليوم
جلال :روح من وجهي
هبة :تعال فرجيني الي
اجا لعند هبة وعيونو على ابوه بخوف
اخدتو من ايدو ودخلو عغرفتا
ايهم بصوت واطي :شبو بابا
هبة : معصب شوي
ايهم :ههه مامشكلة تعودنا
ضربتو كف صغير على كتفو وقالتلو :عم تضحك ولاه
ايهم : لانو عنجد تعودنا .. انا جوعان
هبة :هلأ ليروقو بنشوف شو عاملين اكل
ايهم :انا قايم بدل تيابي
هبة :مر لعند ماما سلم عليها وقلا انك جيت
ايهم :يلا
اخد شنتو وطلع
____________________
كان اسيد وامو عم ياكلو
اسيد :الحمد لله
امو :شو هالاكل
اسيد :الحمد لله شبعت
امو :انت شبك مانك عاجبني
اسيد :مافي شي ..
قام وراح يغسل ع المغسلة .. وهو عم يغسل شافو حالو على المراي .. وحكي .. شو هالبنت هي .. كيف هيك خلتني اضربا ... وانا بحياتي ما مديت ايدي عحدا ..منيح انو ما اشتكت كانت خربتلي بيتي ... بس مافيها لانو بتخاف ع حالا تنفصل .. خلص انا معد اهتم فيها بتدرس ولا للجهنم ما تدرس .. والمصيبة جارتي
ام اسيد :اسيد ماما .. تعال شوي
نشف اديه وطلع
امو حاملة صحن وقالتو :الله يرضا عليك يا امي خود هالصحن لجيرانا الجدد
اسيد: اناااا
امو :اي انت
اسيد :مستحيل
امو :شو هي مستحيل .. روح .. روح وديلن اياه عيب
اسيد :امي عم تحكي جد
امو :والله
اسيد :هئ .. ماني رايح .. هاد يلي ناقص
امو :اسيد عم قلك طلاع وصلو .. ولابدك اياني انا وصلو
اسيد :ما ضروري تبعتيلين صحن
امو :لأ ضروري .. يلا طلاع
اسيد :اميي .. بنتن تلميذة عندي شوبدو يكون موقفي قداما
امو :اسيدددد
اسيد :ياربي .. امري لالله .. هاتي لشوف
اخد الصحن وهو عم يتأفأف وطلع .. وصل لباب الشقة ودق الباب ..
انفتح الباب و هبة يلي كانت بأستقبالو .. طبعا تفاجئت فيه بس عرفت ليش جلي لما شافت الصحن
هبة :نعم
اسيد : تفضلي
هبة :شو هاد
اسيد :الواضح اكل
هبة :شو المناسبة
اسيد بنافز صبر قال :هاد من امي لوسمحتي خديه .. بدي روح انا مستعجل
هبة :حاططتلي فيه سم
اسيد :لا والله نسيت .. بس ياريت متذكر
اخدتو .. وهو لف ليروح ..
هبة : وقفف
وقف وبرم راسو وقال : نعم
رفعت الصحن وقلبتو على راسو
نقز وصار ينفص راسو من الاكل لانو كان سخن ونزل على راسو
اسيد :شوو عملتي يا مجنونة .. اااخ .. حرقتيني .. وراسي تعبا زيت .. لك انتي شووو
هبة :فاتت وطبشت الباب وهية عم تضحك
وهو اخد الصحن ونزل بسرعة عم ينفض شعرو من الرز بقرف .. ويتمتم عليها
يتبع ...
