كيد_السلفات

صفا النعمان

الادارة
طاقم الإدارة
بقولو مركب الضراير سار ومركب السلفات تاه واحتار
‎انا عليا متزوجة من ٤ سنوات وعندي بنت وولد زوجي حسام لا هو منيح ولا هو عاطل يعني بتقدرو تقولو ماشي حاله، عندي سلفتين
‎مرت الكبير هداية بتكون بنت اخوها لحماتي والمفضلة عندها وهي حلوة والمتعلمة الوحيدة فينا يعني شايفة حالها ومو مصدقة وعشان تكمل زوجها متل الخاتم باصبعها روح بروح وتعال بيجي
‎اما سلفتي ريهام بتكون بنت اخوه لحماي وهاي مسكينة مغضوب عليها دايما بتتبهدل وعالطلعة بتسمع كلمة وعالنزلة بتسمع كلمة خاصة انه سلفي محمود زوجها لريهام ابن امه وكلمة امه عنده متل السيف
‎هلأ نيجي لدار حماي ،،،، حماتي ما شاء الله عنها فيها حيل عن عشرة ولسان بقرص قرص اما حماي لا بهش ولا بنش اذا حماتي قالتلو اللبن لونه ابيض بقول ابيض واذا قالتله اخضر كمان بقول اخضر وعندي سلف واحد عزابي اسمه بشار
‎احنا كلنا ساكنين بعمارة وحدة فوق بعض وكانت حياتنا يعني شبه مستقرة اكبر طوشنا كانت على شطف الدرج او عالاولاد الصغار بس ما كنا نحتك ببعض كتير لانه حماتي مفهمة ازواجنا انه هيك احسن واريح لراسنا وبلا ما هاي تنقل حكي لهاي لحد ما حماتي قررت تزوج سلفي بشار طبعا ما خلت حارة ولا شارع ولا بييت الا وفاتته عشان تدور للباشا على عروس وكانت بدها عروس كل جاراتها يحكو عن جمالها ويحكو والله يا ام منذر عرفتي تختاري واهم ايشي بدها وحدة تقهرني انا وسلفاتي فيها او بالاحرى تقهرني انا وريهام فيها
‎رنت ام خليل على حماتي طبعا ام خليل هاي وحدة بتجيبها حماتي بالاسبوع مرة تساعدها بشغل البيت المهم رنت ام خليل على حماتي وبتقلها ام منذر لقيتلك طلبك امبارح في جماعة طلبوني اروح اساعدهم بعزومة وهناك شفتلك بنت بتجنن رح تعجبك بتكون بنتهم للجماعة روحي وشوفيها وهي رقم الناس ولا تنسي تحكيلهم انك من طرفي
‎سكرت حماتي الخط من هون ورنت عالجماعة من هون واخدت موعد من الجماعة تروح هي وبشار وفعلا حماتي جهزت حالها وانطلقت لبيت العروس ....
‎انا كنت مفكرة متل كل مرة حماتي رح ترجع مو عاجبها ايشي بس هالمرة غير رجعت والابتسامة على وجهها وانا قلبي صار يدق من اول ما فاتت ركضت عليها اشلحها الايشار والجاكيت والشنتة والجرابات ورحت جبلتلها كاسة مي مو مشكلة بس احكي انطقي اي شي عن العروس مركزت حالها عالكرسي وحطت اجر على اجر وحكت بتعرفي يا هداية بدي احكيلك عن ماريا العروس
‎طيب ما هو انا الي قاعدة ومهتمة همشتني يلا مو مشكلة المهم اعرف مواصفات العروس ولو انه من اسمها الوضع ما بطمن
‎وبلشت حماتي تسرد بمواصفات السلفة الجديدة( بيضة وشقرة وطويلة ودارسة كمبيوتر وامها اجنبية ولكن ) وانا من الحكي بس اجاني ارتجاج بالمخ وصار عندي القولون العصبي
‎كملت حماتي كلامها وبكرة رايحين عندهم ونوخد ابو منذر يطلبها من ابوها
‎روحنا كل واحد فينا على بيته وانا طول الليل ما نمت وبغني بعقلي اغنية كاظم الساهر ما عمرها ما اسمها ما شكلها ما سرها سمراء ام بيضاء .....
‎وكنت عارفة انه هالسلفة الجديدة رح تكون عبارة عن هم الي ولريهام بس ريهام هي اصلا ورقتها ساقطة عند دار حماي والست هداية عندها مؤهلات ومش خايفة عحالها واصلا لو انقهرت ما بتبين عحالها اموت واعرف كيف جايبة هالثقة بحالها
‎وهلا كملت عراسي وحدة دارسة كمبيوتر يعني بتفهم بالتكنولوجيا والاشياء الحديثة
‎طلع علي النهار وانا طول الليل ادعي انه بشار ما يكون عجبها للعروس
‎طلع زوجي عشغله وانا انتهزت الفرصة ونزلت عند حماتي من الصبح بدي اعرف شو في اخبار جديدة لقيت ام خليل عندها مع اني ما كنت طايقها لهلحرباية بس حاولت ادردش معها شوي بلكي سحبت منها كم شي وكلمة من هون عكلمة من هون قالتلي رقم ماريا عندي عالواتس وهيها حاطة صورتها عليه تعي لافرجيكي اياها قبل ماتنتبه حماتك
‎وانا شفتها من هون وعيوني انحولو من هون وصار شكلي متل الي معه تقلص بعظمات الوجه
‎طلعت عبيتي قبل ما تيجي حماتي وطول ما انا طالعة عالدرجات وانا ادعي على الحية ام خليل ضروري هلأ تصير بتشتغل بامانة ضروي توفق راسين عمخدة
‎ما بتعرف انه المثل قال امشي بجنازة ولا تمشي بزواجة
‎بالاخير استسلمت لقدري انه في كنة بتاخد العقل رح تفوت عالبيت وكنيت وقعدت استنى شر رح يصير .....
‎المسا جهز حماي وحماتي وبشار وحكوو لمنذر وهداية يجهزو حالهم حتى يروحو معهم رحت لعند حسام وقعدت عنده قلتله حسام والله انا عندي بشار متل اخوي واعز وحابة افرح فيه يعني مو معقول ما اروح على جاهته اطلع فيي حسام وحكالي انا هاد الكلام اكيد ببسطني بس ما بعرف ليش مو مرتاحلك يا عليا المهم قد ما نقيت على راسه نزل وحكا لحماتي انا وعليا بدنا نروح معكم قالتله حماتي وولادك وين بدك تروح فيهم هلأ بفضحونا قدام الناس وهم ينطو وكل شي بدهم منه اطلع فيني حسام انه شو بسرعة قلتلهم لا خالتو انا معقول احرجك قدام النسايب الجداد بدي اخليهم عند ريهام
‎مسكينة هالريهام قد ما كنا نضغط عليها ولا كانت تحكي
‎حطينا الاولاد عند سلفتي وانا طلعت لبست وتشيكت عاخر طرز حتى حسام ما عرفني ومع كل هالتزبيط طلعت هداية احلى مني قلت بعقلي اذا هداية هيك طلعت مقصوفة العمر ماريا شو بدها تكون
‎وصلنا على بيت الجماعة بصراحة بيت بجنن وعاملينه متل هاد النظام الامريكي وحديقة برا وهم الجماعة مرتبين كتير يعني معها حق حماتي تنبسط عهيك نسب
‎قعدنا شوي ولا هي ماريا حاملة معها القهوة وفايتة مسكينة مشت خطوتين وتعرقلت بفستانها ووقعت
‎عليم الله انها وقعت من عيني صحيح هديت ناري شوي بس حماتي قهرتني قامت ركضت عليها وكأنها حدا من تالي اهلها اما انا بابني سليم لما اجاني الطلق ورحت اولده وقعت عالدرجات طلعت من بيتها تصرخ وتحكيلي قومي قومي هبل النسوان هاد بعرفه منيح اخ بس منهم
‎راحت ماريا رجعت القهوة وقالت هلأ بعمللكم بدالها وانا قمت قلتلها خليني اساعدك بدي استفرد فيها
‎فتنا عالمطبخ نعمل قهوة قلتلها والله الواحد من الصبح لليل شغل وليل نهارنا عند حماتي نساعدها انا قلت هلا بتكش بتنفر بس ابدا طبست فيه لبشار وقالتلي ياي انا كتير بحب حياة المساعدة والتعاون
‎رجعنا قعدنا وبلشت الطلبة وابتدا عمي كلامه بانه احنا حابين القرب منكم وما بتنطلب الا البنت المحترمة وبعد ساعة من المدح ابوها حكالهم البنت بنتك وسميها بس عمي حلف الف يمين الا ابوها يطلب بلسانه وانه هاد المهر من حقها ولشرع هو الي منحها هاد الحق طلب ابوها خمس الاف مقدم وخمسة مؤخر
‎حماي مسكين كان بشرب بمي تشردق بالميات بس سمع الرقم انا قلت لحالي هلأ بفاصله بناقشه بس ابدا بدهم يبينو قدامهم انهم اكابر والمصاري اخر همهم الله يرحم لما ابوي طلب ٣ الاف ليرة قعدتو ساعة تفاصلوهم لحتى ابوي رخصهم ل٢٥٠٠
‎وكلمة من هون وكلمة من هون اتفقو على كل شي وقرأنا الفاتحة وروحنا عبيتنا انا عن نفسي روحت مش شايفة الفضى والشرار بقدح من عيوني قدح طبعا مهرها اغلى وحدة فينا بكرة بتشوف حالها يا خزوتي اذا بتعرف كم مهري ولا تعرف وين عملت عرسي كانت روحي بدها تطق بس طبعا ما بينت لحسام هاد الايشي عشان يظل يوخدني معه مشاورير بينتله انه انا كتير حبيتها للعروس ومبسوطة اكتر لبشار وفرحانة انه عيلتنا بدها تزيد شخص حكالي يا حبيبتي يا عليا الله يخليلي اياكي ضحكتله ضحكة صفرا مع نظرة لولبية ومشيت لغرفة ابني انيمه
‎وصرنا نجهز حالنا لحفلة الخطبة
‎ونفتل من محل لمحل ايشي بيع وايشي اجار ونلف عالصالونات الي عاملة عروض عالتسريحات مع البدلة لانه الوضع المادي كان عقده ما بنقدر نشتري بدلات ونروح صالونات وكان همي اطلع بجنن طبعا ماريا ابوها حجزلها بصالون خمس نجوم عحسابه فكان مو المؤكد انها رح تطلع بتجنن خلصت اموري انا وبلشت اجهز لزوجي بدلة حلوة ورخيصة اما ولادي حكيت مع اختي ودبرتهم عندها تخليهم بوقت الحفلة كنت عم بخطط لهاد اليوم وما بدي ولا ايشي يعكر علي الحفلة او يربطني اتحرك براحتي وكنت انام واصحى وانا احلم بيوم الحفله‎
 
‎#كيد_السلفات
‎الحلقة التانية

‎حضرت للحفلة فستان بني ولبست عليه شالة لونها اخضر زيتي واتصلت باختي قلتلها بكرة بدي انزل عالسوق اشتريلي كم قطعة ذهب روسي البسهم عالحفلة لانه ذهبي باعه حسام السنة الماضية لما احتاج مصاري حتى نقدر نبني فوق دار عمي بس عالاكيد ما ببين انه مو ذهب قالتلي حطي اجريكي بمي باردة ما ببين وفعلا نزلنا عالسوق اشتريت ٦ سحبات وانجاصتين وسنسال مسبحة واجا يوم الخطبة ناديت ام فوزي الكوفيرة عندي عالبيت مكيجتني ولبست هالفستان وهالدهبات وتوكلت عالله وصلنا عالقاعة اما شو شو صالة حاجزها ابوها لماريا عشان يعمللها فيها حفلة الخطبة ايشي بياخد العقل قعدنا عالطاولات واجت هداية لابسة هالثوب الفلاحي مبين شغل ايد واكيد حقه كوميات
‎اما ريهام كانت لابسة تنورة وقميص اتوقع اني شفتهم عليها قبل هالمرة شوي ولا دخلو العرسان ماريا كانت نافلة شعرها وحاطة طوق ورد عراسها وحاطة مكياج خفيف هلا هي صحيح حلوة من الله بس برضه يعني هاي عروس قرصت ريهام قالتلي وك عليا شو بدك قلتلها عزا ولك هاي رايحة عصالون خمس نجوم والله لو اجت عندي لاعمللها احلى من هيك ولك حتى حمرة حاطة حمرة بصلي وك في عروس بتحط حمرة بصلية قالتلي ولك اسكتي اسكتي هاد بحكو عنه الرقي
‎كنه هدايا سمعت كلامنا اطلعت فينا وزورتنا قالتلي ريهام اسكتي اسكتي لتجيبي اخرتنا اليوم
‎رقصو العرسان وهي يا دوب تحرك حالها شوي وشفت هداية بتحط عطر قالتلي عليا ترشي عطر قلتلها اه والله انا رشيت بالبيت بس هاتي ما بدي افشلك
‎وفجأة الذهب صار لونه سكني ابيض الله لايوفقه صاحب المحل ما حكالي انه بتغير لونه بالعطر طيب كيف بدي اتدارك الموضوع هلا تحججت قدامهم انه انا بتحسس من الذهب وبسرعة شلحته وضبيته
‎حفلة بشار وماريا كانت مثالية من كل النواحي يعني بنقدر نقول منظمة ومرتبة وطلعت متل ما بدهم وزيادة
‎دار حماي كانو متفقين مع اهل ماريا انهم يشيلو بعد شهرين على كتب الكتاب وهون صار كل تفكيرهم كيف بدهم يعمللو بيت غير شكل لبشار هلا صحيح عمي كان مبنيله فوقنا بس لسا البيت لا مشطب ولا معفش وبشار بهالخطبة حط الي فوقه والي تحته قررت حماتي انه كل واحد من اخوانه يساعده بشي انا ما كنت رضيانة بلمرة بهالتوزيع بس ما بطلع بايدي احكي بلشو يروحو عمحل العفش وينقو احلى الاثاث
‎للامانة طول فترة الخطبة ما شفت من ماريا اي شي سيء كانت تبعتلنا احنا سلفاتها مسجات كل فترة والتانية ومرقت فترة الخطبة بسرعة واجا وقت العرس
‎ومتل ما توقعت ابوها لماريا عامللها عرس باحلى مكان وكانو موصين ومشددين انه يمنع اصطحاب الاطفال انا شفت هالجملة مكتوبة بالكرت وبلشت طقية راسي تغلي رحت عند اولادي وقعدت افهمهم كيف يتحزونو لابوهم عشان يروحو لانه انا ما بقدر اقوله خلينا ناخدهم اول كلمة رح يقلي اياها ليش عالخطبة عادي رحتي بدونهم وعالجاهة رحتي بلاهم وهلا لانهم هم كاتبين عالكرت ممنوع صرتي بدك اياهم يجيو المهم لقيت انه افضل طريقة اعملها اقنع الاولاد بالروحة حتى لو بدهم يفقعوني مو مشكلة المهم يفقعو ماريا
‎الاولاد قد ما بكيو ونقو على راس ابوهم قرر ياخدهم على العرس بدون ما يخبر حماتي وحكا الي بده يصير يصير رحنا عالعرس وحماتي اول ما شافت الاولاد فتحت عيونها فيي واخدت نفس طويل ولولا العيب كانت رح تطرني انا والاولاد
‎بس يا حسرة الفرحة ما تمت ابني سليم قد ما قام وقعد كب علي كاسة عصير كبيرة تنكدت طول الحفلة وعشوي دمعتي بدها تنزل وحماتي رايحة جاي تتطلع عفستاني المبقع وتحكيلي بتستاهلي عشان تجيبه لهلقرد معك وانا ابتسملها وادير وجهي
‎وبلا طول سيرة خلص هالعرس عخير وفاتت ماريا على عمارة هالعيلة طبعا من اصول الاتيكيت عندهم انه ياخدها شهر عسل وحملو حالهم وحجزوا وطلعو عبلد لميس التركية
‎وانا يا حسرتي عحالي لما تزوجت قعدت اسبوع كامل اترجى بحسام ياخدني علعقبة وما قبل غير لما قلتله انه اسواق العقبة رخيصة كتير وممكن نجيب من هناك اواعي ونبيعهم خليها على الله بس حتى لو راحت عتركيا اخرتها راجعة لعندي يعني راجعة

‎#كيد_السلفات
‎الحلقة التالتة
‎رن التلفون على حماتي كان بشار عم ببلغها انه بكرة العصر رح يكون هو ومرته عنا
‎حماتي انبسطت وحكتلي عليا يا عليا بكرة بتجيبي ريهام وبتيجي علي الصبح بدنا نحضر غدا لسلفك ومرته
‎طبعا الاخت هداية معفية من هالشغل هاد كله بحكم انها موظفة ويا حرام ما بتقدر تشتغل جوا البيت وبرا
‎المهم طلع النهار تاني يوم وحماتي قسمت علينا الشغل انا قالتلي اعمل ملوخية وجاج محشي وريهام قالتلها حماتي تلف الدواليات وتعمل كوسا محشي قالتلها ريهام بس عمتو الدوالي بده شغل طويل قالتلها ماريا جاي عبالها الدوالي ما بتعرفي يمكن حامل ما بدنا نكسر بخاطرها
‎اما حماتي عليها السلطة والرز
‎انا بصراحة انخنقت يعني هي تروح تشم الهوا واحنا نقعد نعمللها اكل المهم جهزت الطبيخ وريهام عملت الي عليها وقبل ما يوصلو بشوي وبعد ما طلعت ريهام من المطبخ مسكت كومة ملح وحطيتهم عالكوسيات وطلعت
‎حماتي كانت قاعدة بتستنى بالعرسان يشرفو نادت علي وقالتلي اطلعي فوق طعمي ولادك وبعدين بتنزلي انا ما بدي اي شي يعكر مزاج ابني ومرته قلتلها حاضر بتأمري عمتو وطلعت وبعد شي ساعة زمن سمعت اصوات والدنيا قامت ما قعدت عرفت وقتها انهم وصلو كان نفسي انزل عندهم واشوف ماريا شو لابسة وشو عاملة وكان نفسي اعرف شو جايبين هدايا بس خفت انزل اسمعلي كم كلمة قلت بستنى حسام بس يجي وبننزل سوا خاصة اني بدي اعرف شو صار بطبخة ريهام ، اجا حسام وحطيتله غدا بعدين قلتله انه بشار ومرته اجو تحت رتبنا حالنا ونزلنا سلمنا عليهم ولا هم قال جايبين لكل بيت فينا برواز صغير قال فيه صورة تركيا والي قهرني حماتي مبسوطة عليه وحطته منظر عاكبر طاولة بالبيت طيب انا لما رحت عالعقبة حطيت نص نقوطي وانا اجبلكم بيجامات وشراشف ووجوه مخدات ويا ريتني طلعت بريحة طيبة
‎قعدنا شوي وقلتلها اه حبيبتي ماريا ان شاء الله عجبك الغدا قالتلي طبعا عجبني مو انتو طابخات اكيد بده يعجبني
‎طيب احكي عبري ايشي عن الكوسا ابدا ولا حكت عملت حالها من الكناين الهاديات العاقلات الي الها تم ياكل ما الها تم يحكي بس هدول النوعية من النسوان بعرفهم منيح اسألوني انا عنهم
‎وبلشت هالحياة تمشي بينا وبين هالكنة الجديدة طبعا لا كانت تطبخ ولا تنفخ كل اكلها وشربها عند حماتي انا بس انزل ساعة عند حماتي بظلها تقلي اطلعي باولادك فوق اما هاي ٢٤ ساعة عنده وعلى قلبها احلى من العسل وين العدل بالموضوع اي انا من قليل قلبي بده يطق
‎وبيوم من هالايام نزلت عند حماتي اساعدها شوي بشغل البيت لقيت ريهام عم تبكي قعدت جنبها عالطاولة وسألتها مالك شو في قالتلي ماريا بدو يجيها ولد وانا صرلي كم سنة متزوجة وما بجيب الا البنات طيب ليش لسا ابنها ما اجا عالدنيا وصارت عمتو تسمعني كلام كل شوي شو ذنبي انا يا عليا هاد شي من ربنا لا انا ولا انتي ولا اي حدا بقدر يحدده حزنت على ريهام ومسكت ايدها وهديتها مع انه انا مو من النوعية الي ممكن تستعطف قلبي بسهولة وقلتلها وك ريهام انتي دموعك مو غالية عليكي ليش ما ترديلها اياها هلأ بتروحي عند ماريا وبأسلوبك احكيلها عن سمر الي كان بشار قارئ فاتحته عليها وتركته لانه ما بجيبلها هدايا
‎ريهام خافت وقالتلي لك عليا انتي بدك تخربي بيتي اكون بمصيبة اصير بمصيبة تانية قلتلها بلا هبل كوني قوية طول ما انتي ضعيفة هيك بعمره ما رح يصيرلك قيمة وتركت ريهام تفكر لتاني يوم
‎وقمت من عندها قبل ما تيجي حماتي وتشوفنا بنحكي قال تيجي تشوفنا بنحكي هي فاضية تجيلنا عم بتدلل بست الحسن كأنه حدا من حمل غيرها او كأنها بدها تجيب الي بده يحرر الاقصى كل شوي ماريا ارتاحي ماريا كلي ماريا اشربي وانا اطلع واتحسر ونقط الدم بقلبي عم تنزل بالقطارة من كتر الحسرة اما انا كل شوي كانت تحكيلي ما حدا حمل غيرك يا ست عليا عادي كلنا حملنا اطمني انتي متل القردة بسبع ارواح الله يرحم لما كانت تخليني اشطف كل درج العمارة وانا بطني لحلقلي بس شو الواحد بده يحكي الي ما اله حظ لا يتعب ولا يشقى
 
‎كيد_السلفات
‎الحلقة الرابعة
‎واجا تاني يوم وريهام ما كذبت خبر حملت حالها وراحت على ماريا وخبرتها بكل شي بس ماريا ما علقت الموضوع ضيفت ريهام وما حكت ولا كلمة المسا سمعنا صوت ماريا وبشار طالع وواصلة بينهم للشيطان الرجيم وحماتي متدخلة لحتى تحل هالقصة وبعد الضغط على ماريا قالتلهم انه ريهام هي الي حكتلي عن الموضوع حماتي راحت على محمود وقالتله مرتك ريهام لسانها طويل وبده قص بنفس الليلة صوت ريهام ومحمود كان معبي العمارة والي عرفناه بعدين انه مطلقها ومتصلة على ابوها يجي ياخدها بنص الليل بس الله يكسر خاطره ابوها ما قبل ياخد بناتها معاها والله قطعو قلبي البنات وهم يبكو على امهم لما طلعت بالسيارة ويصرخو ويقولولها ماما لا تروحي لا تتركينا
‎يعني انا حسيت بشوية تأنيب ضمير اتجاه ريهام بس هي هبلة ما بتعرف تدبر راسها
‎بعد هاي الحادثة بتقدرو تحكو انه علاقتنا احنا السلفات توترت وصرنا ممنوع نجتمع الا بوجود زوج كل وحدة والمسافة تكون بين كل وحدة ووحدة فينا لا تقل عن عشر امتار
‎بالنسبة لبنات ريهام انا الي انطبلت فيهم غسليلهم يا عليا طعميهم يا عليا نيميهم يا عليا هو انا ولادي دوبني اقوم فيهم ولما شكيت لحسام حكالي هاد الموجود مش عاجبك بتلحقي ريهام وانا والله نار حسام واهله ولا جنة اهلي
‎كان اكتر شي بنفسي اشوفه حماتي وماريا شو جهزو للبيبي وشو حضرو اشياء وعند اي دكتورة بتراجع وبأي مستشفى بدها تولد بس كل هاي الاشياء كنت مو مسترجية اسأل عنها لانه ممنوع اقترب مجرد اقتراب من ماريا
‎واجا الوقت الي راحت فيه ماريا عالمستشفى لتولد وانا طبعا لازم اقوم بالواجب حكيت لحسام خليني اروح وقد ما ترجيته وافق ياخدني نص ساعة زمن عندها اما شو هالمستشفى الخاص بشرح القلب بينفع تروحي عليه رحلة مو وانتي مريضة ولا الزينة الي حاطينها عباب الغرفة ولا الضيافة
‎اخ بس انا بولادي التاني ولدوني بمستشفى حكومي تقولي رايحة اموت مو اولد وجابو علبة سيلفانا ام الليرتين قدمو منها للضيوف لقينا هناك عندها امها عاملتلها شوربات وجايبتلها عصاير طبيعية حكينا احنا واهلها شوي ودردشنا وطلبت اشوف الولد ما شاء الله حتى الولد بفتح النفس ابيض ابيض وحلو قلتلهم بس ما يتغير ترا بعرف البيبي الي بيجي ابيض بقلب اطلعت فيي حماتي وقالتلي انتي اركي باردوتك وما عليكي
‎روحنا عالبيت وما حكيت ولا كلمة حتى حسام لاحظ علي اني صافنة وسرحانة حكالي عليا خير فيكي شي قلتله لا والله بس بحكي لحالي يا ترا قديش بدك تنقط ابن اخوك حكالي لسا ما بعرف اليوم بسأل امي وبحكيلك
‎المسا نزل عند حماتي وتشاور هو واياها ولما طلع عندي حكالي بدي انقط ابن اخوي ١٠٠ دينار هيك امي امرت هالمرة ما قدرت اسكت قلتله ول عشو ١٠٠ ابني سليم لما جبته كل اخوانك نقطوني عشرات حكالي هاد اخوي الصغير وصرف كتير ولازم نساعده بعدين هاد شي ما بخصك ولا اشتقتي لريهام ضبيت لساني بحلقي وسكتت
‎طلعت ماريا من المستشفى وسمو الولد بهجت عاسم حماي كانت مطهرة ابنها وابوها عامللها عقيقة لابنها عحسابه وعزمنا كلنا عاكلة مشاوي عندهم بالمزرعة
‎لبست انا والاولاد ولبست بنات ريهام وجهزنا حالنا لنروح عالمزرعة وصلنا هناك واكلنا وشربنا وما خلينا ايشي بخاطرنا بس كل هالعز الي عايشة فيه سلفتي حرقلي قلبي حرق وشعل مية نار بقلبي وبصدري وصرت انام واقوم وانا افكر كيف بدي ازخلق ماريا واخليها هي الي تلحق ريهام

‎17/‏1 10:08 م] : #كيد_السلفات
‎الحلقة الخامسة
‎فكرت كتير شو ممكن الطريقة الي تخليني اتخلص من ماريا بدون ما اطلع بسوادة وجه لقيت افضل حل اني احلس لحماتي وصرت انزل عندها كل شوي وما اخليها تعمل ايش بالبيت كل شي علي انا واقولها عمتو انتي بس ارتاحي علاقتي بعمتي كتير قويت وصرت انا واياها متل السمنة عالعسل بس لسا ماريا ماخدة عقلها وماخدة جزء كبير من قلبها وهداية كمان الها مطرح كبير عندها
‎وليوم نزلت عليها سهرة حضرت صينية عليها صحنين بزر وصحن شوكلاتة وكاستين شنينة ونزلت عأساس اسهر معها كان مبين علي انه في كلام بتمي وبدي احكيه قالتلي عليا انتي مو على طبيعتك خير في شي قلتلها لا والله عمتو قالتلي انا بعرفك منيح قلتلها بحكيلك بس بتوعديني الكلام الي بدي اقلك اياه يظل بينا مسكينة قلبها وقع بين اجريها قالتلي عليا احكي خوفتيني قلتلها هو صحيح الفتنة اشد من القتل بس انا بصراحة مو قادرة اسكت اكتر من هيك ماريا طالعة نازلة تحكي عليكي انك مو نظيفاية وانك لولا ام خليل عليكي بعمره بيتك ما بصير نظيف وكانت عم بتحاول تلعب براسي انه اصير متلها ما اساعدك ولا اسأل فيكم بحجة اولادي انا من الناس الي عندي قدرة بالاقناع وصرت كل يوم اوصللها حكي ايشي صار وايشي ما صار او بالأحرى كله ما صار حماتي صارت تتغير وتعاملها مع ماريا تغير حتى انه سألتها ماريا اكتر من مرة عمتو مالك انا مزعلتك بشي ليوم بتذكر وكأنه الموقف هلأ صار قدامي ولا بنساه كنا طابخين كرشات ومن الصبح للمسا واحنا بنحرث اجت ماريا تساعدنا وحماتي ما قبلت تخليها تصيب شي مع فوتت بشار عالمطبخ حس انه في ايشي وحاول يفهم من حماتي شو في وحكالها يما ماريا قالتلي انك الك فترة متغيرة معها وهاي الكلمة كانت متل غزة ابرة لبالون منفوخ كتير وفقع بوجه بشار حماتي يومها ما خلت عليه ستر مغطى وقالتله حتى هاي نقلتلك اياها روح شوف مرتك الي حبيتها وعاملتها متل بنتي شو دايرة بتحكي عني ومتل اي زلمة حمش ما تحمل الكلام واخد مرته عبيتهم وهناك ولعت بينهم وماريا يا عيني متعودة عالترباية الحديثة ما تحملت هالاتهامات وتظل ساكتة وكلمة منها عكلمة منه مد ايده عليه وطلبت الطلاق وروحت عبيت اهلها
‎حاول بعدها بشار كتير يرجعها ويصلحها بس ماريا كان شرطها لترجع انه حماتي تروح عندها وتتفاهم معها واذا الها حق عندها قال بتاخده من عيونها بس الحمد لله حماتي ما رضيت ابدا وقالت لبشار بدك اياها روح جيبها انت وابوك اما انا لو تموت هي وكل اهلها ما بعتب بيتها
‎والله حزنت عليه لبشار وهو واقع بين نارين نار امه من جهة ونار مرته وابنه من جهة الي صار ما يقدر يشوفه الا مرة بالاسبوع
‎بتقدرو تقولو اني ارتحت من هم كبير كان قاعد ومتربع عصدري وعلاقتي قويت اكتر واكتر مع حماتي وصارت كل شوي تعالي يا عليا اذا بدها تطبخ تنادي عليا هييي يا عليا شو نطبخ اليوم اذا عندها مشوار تنادي علي وتسألني شو البس بس لا ظايل هداية ولازم اطيرها متل ما طيرت رفيقاتها من قبلها
‎هالمرة اتخدت خطة جديدة وسلكت منهج جديد رافقت هداية وصرت قال كل يوم اعمللها الغدا عشان لما تروح من وظيفتها تلاقي غداها جاهز وكل شوي اطلطل عليها علاقتي قويت فيها كتير وعملت حالها بتحبني انا بعرف مزبوط هاد الحكي كله كذب هو في سلفة بتحب سلفتها
‎نادت علي هداية مرة قالتلي عليا حبابة منذر جاي عباله ششبرك وانا ما بزبطه متلك تعالي ساعديني فيه ومنه بنحسب حساب دار عمي نزلت عندها وبلشنا شغل مع انه عايفة شغل بيتي بس لازم اكسب ودها ومن حديث لحديث قلتلها وك كيف منذر هيك بعزك وكلمتك ما بتصير عنده تنتين سكتت شوي وقالتلي المحبة من الله بس انا حسيت بنبرة صوتها انه في شي مو طبيعي وظليت الح عليها لحتى قالتلي منذر عليه ديون بالهبل وانكسر مرة لشركة قبل ما نتزوج وانا حاليا الي قاعدة بسد عنه واذا ما بدفع بقضي عمره بالحبوس قلتلها غريب انه ما بنعرف بهالحكي قالتلي وقتها انه ما حدا بعرف غير منذر وهي وحماتي وقالتلي امانة عليا ما حدا يعرف بهالموضوع ترا منذر حالف علي يمين طلاق ما اخبر حدا قلتلها لا تحافي لا تخافي سرك ببير وحكيت بعقلي والله لاخلي حماتي اول وحدة تشرب من هالبير )
‎وطلعت من عندها وقبل ما اوصل بيتي مرقت على عمتي وقلتلها انه هداية بتحكي لولا فضلها على منذر كان هلا مترمط بالسجن
‎مسكينة انصدمت وما عرفت شو تحكيلي بعدين قالت حتى هداية طلعت هيك بنت قلتلها لا عمتو لا تكملي ما بدنا نكسب سيئات من وراها
‎الي سمعته وعرفته بعدين انه منذر لما عرف ما ترك عليها ستر مغطى ماسح الارض بكرامتها خصوصا انه ساند حاله هلأ وهداية تقريبا سدت عنه كل دينه وهالمرة منذر هو الي موصلها لاهلها
‎ما صدقت انه خلصت من هالحيتين بهالسهولة حسيت حالي انجزت شي عظيم
‎بتقدرو تقولو بعد كل هالمشاكل صرت الكل بالكل وانا الاساس حتى حسام شاف حاله فيني بين اخوانه انه مرتي طلعت بنت حلال ومربية بيبت اهلها والقط بياكل عشاها صحيح كنت اتعب شغل هون وهون وساعدي هاد واعملي لهاد بس مو مشكلة كونه حاليا الكل عاملي قيمة
‎[17/‏1 10:19 م] ياسمين: كيد_السلفات
‎الحلقة الاخيرة
‎يا عيني عشمات الهوا الي كان ياخدني عليهم حسام انا وحماتي مسكين حس حاله انه هو مالك جوهرة ما حدا قدر يملكها او يمكن حس حاله هو الزلمة الوحيد بخوانه وبعد ما صار الكل يححلف بحياة ام سليم قررت اجيب بيبي جديد وكنت احكي يارب اجيب ولد واقهر سلفاتي واجلطهم رحت عند الدكتورة قالتلي وقتها عندك مشاكل كتيرة ويمكن ما ترجعي تصيري ام للمرة التالتة
‎روحت عالبيت الدنيا مسودة بعيوني بس طبعا ما خبرت لا حماتي ولا حسام واقنعت نفسي انه هاي الدكتورة غبية وما بتفهم شي واكيد بس بدها تحبطني ونزلت عند حماتي وقلتلها الدكتورة قالتلي كل امورك تمام لا تخافي حضنتني وقالتلي ان شاء الله يا اصيلة انتي
‎سلافي كانو مقررين انه كل واحد بده يشوف حياته وما حدا بده لا يرجع مرته ولا يعيد الكرة مرة تانية
‎وبعد فترة بسيطة كنت قاعدة المغرب عم بعمل طبق حلو افرفح قلب حماتي فيه وعشان اخليها دايما تحبني وبدها اياني سمعت صوت الجيران بصرخو وحماتي بتنادي يا عليا يا عليا وبتبكي نزلت بسرعة ببيجامتي حتى نسيت البس حجاب عراسي لقيتهم كلهم متجمعين بالشارع دخلت من بينهم لقيتهم متجمعين على سليم ابني والله هاد ابني سليم صرخت فيهم ماله سليم ليش هيك دمه حميمو شو عملتوله يا اوباش حاولو يهدوني وحكولي انه سليم لما نزل يشتريلي شوية اغراض كانت لازميتني للكيكة من الدكان كان ماشي ومو منتبه وضربته سيارة اخدناه عالمستشفى بس ما لحقناه الدكتور حكالنا سليم راح مات ما عاد يرجع سليم انتهى نور عيوني ما عاد موجود فرحتي الي انا كنت عايشة عشانها انتهت طيب ليش ابني ما اله ذنب ابني ما اله ذنب
‎قلبو حبطان البيت سود ما عاد الهم لون حتى الفرح انتهى من حياتي
‎عملنا لسليم بيت اجر انا ما كنت واعية كتير يومها بس شفت سلفاتي التلات جايات قال يعزوني وقفت وقلتلهم انتو شو جابكم لهون اكيد جايات تشمتو فيني بس لا ما حزرتو فشرت عينكم تشمتو فيني ابني ما مات ابني لسا موجود حاولو كل النسوان الموجودات يهدوني ويحكولولي يا بنتي ما بصير هالحكي وكلي امرك لربنا
‎انتهى بيت الاجر وبلشت حياة العيلة عنا ترجع طبيعية بس انا ابدا ما قدرت ارجع طبيعية بعد الي صار
‎كنت قاعدة بالغرفة وسامعة حسام واخوانه وامه وابوه برا عم يتشاورو كيف ممكن حسام يطلعني من هالحالة النفسية الي انا فيها طلعت لعندهم وقلتله حسام طلقني اطلع فيني حكالي انتي انجنيتي مستحيل انتي عليا حبيبتي الي برفع راسي فيكي ضحكت ضحك هستيري وقلتله تشوف حالك فيني انا عشو حملت حالي وقمت وقبل ما اطلع لفيت راسي عليهم وقلتله محمود ترا ريهام ما الها ذنب بشي انا الي لعبت براسها وخليتها تحكي لماريا عن خطيبة بشار
‎وصحيح بشار مرتك ما حكت ولا اي شي عن حماتي ولا عن اهلك كله هاد الحكي من راسي
‎وانت كمان يا منذر هداية ما جابت سيرتك الا بالخير انا الي كنت الحية فيكم انا الي كنت اخبص حكي وانقل اشياء كتيرة ما صارت اكيد هلأ انتو بتطلعو فيني وبتحكو لحالكم ليش هيك عملتي بس انا بقلكم الكيد قتلني خنقني تميزكم بالمعاملة بين فلانة وعلانة عمل جواتي حقد رهيب انتو السبب انتو الي عملتو عليا لئيمة
‎تركتهم وراي ومشيت وليا بدي اوصل الباب نادى علي حسام وحكالي عليا انتي طالق
‎الي صار بعد هيك انه محمود رجع ندمان لريهام واعتذرلها وطلب منها تسامحو عكل شي غلطو بحقها زمان ووعدها انه يتغير ويصير انسان تاني
‎اما بشار اخد حماتي وراح عند ماريا وحماتي اعتذرتلها وصلحت الامور بينهم
‎ومنذر كمان مو اقل من اخوانه بحبها لهداية كأنه كان مستني عدقرة ليرجعلها
‎اكيد هلا بتحكو وانتي يا عليا شو صار فيكي َما رح طول عليكم الي صار سلافاتي كلهم حطو شرط حتى يرجعو ي اما بترجع عليا معنا يا اما كلنا بنتطلق
‎حسام كان مخزي من اهله ومن عاميلي السودة بس حماتي قعدت معه وقالتله كلمة احنا بشر وكلنا بنغلط معلش يما اكيد هلأ رح ترجع عليا تانية لا تجرحها يما بكفيها موتت ابنها
‎رجعنا اربع سلفات ورجعت كل وحدة عبيتها هداية ترقت بالشغل وصار عندها ولدين وبنت وماريا جابت كمان بنت ووقفت مو قلتلكم ترباية حديثة ما بتحب الخلف الكتير وريهام ربنا طعمها الولد وتغربت هي وزوجها عقطر اما انا تعالجت والله طعمني ولد سميته سليم وبنت وحماي عطاكم عمره الله يرحمه ويخليلنا حماتي تاج عراسنا
‎انا تغيرت وكتير كمان ما عاد حقدت عحدا وما عاد كيدت لحدا صرت احب الكل والكل بحبني وتعلمت انه الانسان المكيود ما بجني الا عحاله ويا ريت دايما ما نطلع على الي بايد غيرنا ونكون قنوعين بحياتنا والي بده يعيش بعيش حتى لو عخبزة وبصلة وصرت احب هداية وماريا هو صحيح احيانا بنقهر من العيشة الي عايشيتها ريهام تغربت وراتاحت واحنا هون بهالبلد بس لا لا لا ممستحيل ادايقها بكلمة طبعا بمزح الله يهنيها ويريح بالها وكل وحدة بدها تتزوج او بدها تزوج بنتها تحكيلها قصة كيد السلفات ولا تخلوها تغلط متل عليا السلفة المكيودة
‎#حنين_طه
 
الوسوم
كيدالسلفات
عودة
أعلى