حين تشرق الشمس

(الجزء الاول )

جنينة كبيرة كتير وبنصها مسبح .. بنت صغيرة عم تنط وتلعب وتتمرجح ع مرجوحة الياسمين ..

ناهد: نسيم امي .. تعي كلي سندويشتك تعي

ركضت نسيم لعند امها واخدت منها السندويشة وبلشت فيها اكل بنهم ...

ناهد: ههههه ع مهلك امي .. ع مهلك

نسيم: رح خلصا بسرعة لارجع العب

خلصت نسيم سندويشتها وامها عم تتامل فيها وتتبسم لوقت خلصت ورجعت تركض وتلعب بالجنينة ..

ماهر: مسا الخير

ناهد: مسا الورد حبيبي

قرب منها وباسا ع جبينا وقعد حدا ..

ناهد: شبك جايي بكير ع غير العادة

ماهر: جايي ريح شوي وجهز شنتايتي .. عندي سفرة المسا

تغير لونا لناهد واطلعت في ..
ناهد: ما غيرت رايك لسا .. والله قلبي مانو مطمن لهالسفرة كلا

تبسم ماهر وحط ايدو ع وشا .. (لا تقلقي يا روحي .. هالصفقة هي صفقة العمر .. رح تطيرنا لفوق الريح )

ناهد: حبيبي وضعنا كتير منيح ومانا بحاجة لصفقات .. بترجاك بلا منا .. والله قلبي مانو مطمن

ماهر: شو بلا منا .. بعدين ليش الخوف .. انا قلتلك الجماعة طمنوني .. يعني كلشي ماشي تمام

تنهدت ناهد وحطت حالا بحضنو وغمضت عيونا ..
ماهر: مو معقولة هالنسيم .. لك مندمجة باللعب بكل حواسها ههههههه .. لسا ما شافتني

ناهد: ههههههه .. لو بتشوفا كيف اكلت ما بتصدق

ماهر: نسيييم .. روح البابا

اطلعت نسيم ع ابوها وركضت لعندو وهي فاتحة ايديها .. (باباااااااااا )

رفعت راسا ناهد من حضنو وفتح ادي ليضما لنسيم .. يلي رمت حالا بحضنو ..
ماهر: رووح البابا .. شو عم تعملي

نسيم: مممم.. عم العب

ماهر: خلصتي دروسك ؟؟

نسيم: اي لكن

ماهر: يؤبرني المجتهد

قعدت ع ركبو ولفت اديها ع رقبتو وهي عم تضحك وتبوس في .. (بس كانو جايي اليوم بكير بابا )

(اي لانو شتقتلك انت والماما )

(وما شتقت لاختي ماسة )

(هههههههه .. ماسة لساتا ببطون الماما .. يعني وقت اشتاق لماما بكون اشتقتلا )

(ممممم .. ماشي )

قعدو سوا بالجنينة ساعة .. بس هالساعة كانت من اجمل لحظات نسيم معن تنيناتن ..

ماهر: رح روح نام لريح .. ناهد حبي جهزيلي شنتايتي

تنهدت ناهد واطلعت عليه بعيون مليانة حزن .. (تكرم .. هلا بجهزا )

قامو كلن سوا .. نسيم ركضت ع غرفتا وبلشت تلعب بلعبتا المفضلة وتخيطلا تياب جديدة .. وناهد جهزت شنتاية ماهر وقلبا ع شوي رح يوقف .. وماهر غط بالنوم ..

*وقت المسا*
ماهر واقف قدام لمراية عم يرتب تيابو .. وناهد قاعدة ع طرف التخت ودموعا عم يهرو ع خدودا ..

اطلع عليها ماهر بالمراية .. (ناهد .. لا تشغليلي بالي بترجاكي )

وقفت ناهد وقربت منو ولفتو من ورا ضهرو وحطت راسا ع ضهرو .. (ماهر بترجاك غير رايك )

لف وشو عليها ومسكلا وشا بئديه التنتين ومسحلا دموعا .. (حبي ما في داعي لخوفك .. انت قلقانة كرمال موعد ولادتك قرب .. لا تخافي بوعدك كون حدك .. لو كنت باخر الدنيا رح اجي ركض لعندك )

زادت ناهد بالبكي وضمتو بكل قوتها ..

ماهر: هههههههه لك بعدي وشك .. وسختيلي تيابي

ضحكت ناهد من بين دموعا .. (ربي يحميك ويرجعك بخير وسلامة )

طلعو سوا ع الصالة وكانت نسيم عم تستناهم .. (بابا .. خلص .. رح تروح )

قرب ماهر منا وحملا بحضنو .. (اووووه .. كبراني بنتي الحلوة .. انتبهي ع ماما وع ماسة بغيابي .. ماشي )

باستو نسيم ع خدو وهي عم تهز راسا .. وضمتو ..

نزلا ماهر من حضنو وضما لناهد .. (ما بدي وصيكي .. اهتمي بحالك منيح .. وقت اوصل بحاكيكي )

نسيم (الجزء الثاني)

*بعد سبع سنوات*
ببيت صغير كتير .. غرفة وصالة صغيرة ومطبخ وحمام ..
نسيم: ماسة .. تعي نامي يالا .. بكرة اول يوم بالمدرسة الك لازم تكوني مصحصحة

ماسة: حاضر ماما نسيم .. ما بتعرفي قديش متشوقة فوت المدرسة

نسيم: لا بعرف .. شعور ما بينوصف

حطت حالا ماسة حدا لنسيم ع التخت لصغير يلي بيجمعن كل ليلة وضمتا .. (ماما .. ما صار الوقت لتخبريني عن امي وابي )

تنهدت نسيم ومسحت ع شعرا لماسة وتبسمت بسمة كلا حزن ..

انا نسيم .. عرفتوني اكيد .. البنت لصغيرة يلي قبل سبع سنين كان عمرا تسع سنين .. يعني هلا صار عمري 16 سنة ..
وهاي اختي ماسة يلي كانت ببطنا لامي بوقتا .. رح خبركن شو صار معي ومع عيلتي بهالسبع سنين ..

سبع سنين من الوجع والعذاب يلي ما بيخلص .. سبع سنين انقلبت فيهن حياتي 180 درجة ..

تحولت من نسيم الطفلة الصغيرة لمدللة والمرفهة .. لنسيم الام .. يلي ما الها بالحياة غير اختا ماسة ..

قبل سبع سنين وقت سافر بابا ..
بابا سافر وامي اعتكفت بغرفتا ع بكي طول الوقت ..
ما كان بئيدي اعملا شي غير انو حط حالي حدا وضما وبوسا لحاول هديها ..

بعد يوم كامل من سفرو لبابا دق لامي ...
ماهر: كيفك يا روحي .. ليكني هلا وصلت للفندق .. بعد نص ساعة اجتماعنا .. دعيلي

بتزكر وقتا كيف تغير وشا لامي وحطت ايدا ع قلبا .. (الله يكون معك .. انتبه ع حالك )

سكر بابا الخط وفرطت امي بالبكي ..
وبعد شي ساعة دق تلفونا لامي ..

ناهد: الوو .. اي .. اي انا .. اهلا استاز عماد ..ليه شو صار .. شو عم تحكي انت .. لا. .. بترجاك عماد لا تقولا .. شو عم تقوول عمااد

وقعت امي بالارض وهي عم تصرخ باسمو لبابا ..
قربت منا وتلقائيا صرت ابكي معا .. ضمتني امي بكل قوتها وكانو عم تتقوى فيني ..
(بابا تركنا وراح يا نسيم .. بابا تركنا وراح .. راح بابا راااح يا امي راااااح )

بابا خسر الصفقة يلي كان دافع فيها كلشي بيملكو .. واجتو جلطة من بعدا وراح .. ومن هالوقت هاد نقلبت حياتنا ..
اندفن بابا واندفنت كل حياتنا معو .. كلشي حلو بحياتنا راح واندفن معو ..

عماد: والله يا مدام ما بعرف شو بدي قلك .. بس كل الاملاك راحت .. كلشي باسمو لماهر راح

ناهد: وهلا ... شو ... شو رح يصير

عماد: ضروري تفضو الفيلا .. ما عندك شي باسمك ؟؟

ناهد: ما عندي غير السيارة والبيت يلي تزوجنا فيه بحي .......

عماد: ما بعرف شو بدي قلك .. يا ريت لو فيني ساعدك .. ازا بتحبي بشفلكن بيت بحي ارقى

ناهد: ولا يهمك .. من بعد ماهر ما في شي مهم

تاني نهار طلعنا من الفيلا وما معنا غير تيابنا .. ولعبتي وتيابا وشنتتي ..
انتقلنا ع بيت صغير .. يلي هلا انا واختي ماسة عايشين فيه .. بحي صغير ما بنعرف في حدا غير خالة فاطمة .. الست لكبيرة وزوجا ..

لسا لهلا بتزكر دمعتا لامي وقت دخلنا البيت .. كانت غير عن كل دموعا .. دمعة مليانة وجع وقهر ..

نفضنا البيت انا وامي وبلشنا بحياتنا لجديدة ..

وتاني نهار .. فقت ع امي بنص الليل وهي عم تتوجع ..

نسيم: امي .. شبك يا روحي

ناهد: نسيم بنتي .. سمعيني

نسيم: عم اسمع امي

ناهد: هالبيت هاد الك ولاختك .. اصحك تتنازلي عنو لو شو ما صار .. وهلا روحي ع الخزانة في صندوق صغير جيبي وتعي لعندي

رحت ع الخزانة ركض جبت الصندوق واجيت .. فتحتو امي وكان في شوية ذهب ومصاري ..

ناهد: هدول الك ولاختك .. الكن التنتين .. ما بدي حدا يعرف فيهن بنوب .. روحي ع المطبخ وحطي هالصندوق ع السقيفة

نسيم: حاضر امي

عملت متل ما قالتلي ورجعت لعندا ركض .. كان كل جسما عم يرجف .. وكلا عرق

ناهد: وهلا روحي دقي ع بيت الجيران .. عند خالة فاطمة .. قليلا امي تعبانة كتير

تركتا لامي وقلبي رح يوقف من خوفي عليها .. دقيت باب الجيران كتير .. لوقت فتحلي زوجا لخالة فاطمة .. (خير يا بنتي .. شو صاير )

(عمو الله يخليك .. بدي خالة فاطمة .. امي تعبانة كتير )

(اي يالا .. يالا )

دخل لجوا .رجع بعد بشوي هو وخالة فاطمة ...
(تعي حبيبتي تعي ..)

رحنا ع البيت كانت امي لساتا ع حالا ..
ووقت شافتا خالة فاطمة بهالحالة ندهتلو لزوجا ورحنا كلنا ع المشفى بسيارة ماما ..

دخلوها لغرفة الولادة .. وبعد نص ساعة سمعت صوتا لاختي ماسة .. نطيت من فرحتي وصرت زقف .. (اجت اختي خالة فاطمة .. اجت اختي )

ضمتني خالة فاطمة وبوستني .. (اي يا روحي .. اجت اختك )

بس نطرت كتير لشوف اختي وامي وما كانو يطلعو .. لبعد شي ساعتين .. وقت طلعت الممرضة ووشا ما بيتفسر ..
اشرت ع خالة فاطمة .. (حضرتك اما ؟؟)

خالة فاطمة: لا .. انا جارتها .. هي ما الها حدا غير هالبنت

اطلعت في الممرضة .. ورجعت اطلعت بخالة فاطمة .. (العمر الكن .. حاولنا نساعدا .. بس للاسف ما قدرنا .. صابا نزيف حاد .. الظاهر كان عندا مشاكل بحملا )

ضربت خالة فاطمة ع وشا واطلعت في .. انا كنت ماني مستوعبة شو عم يصير .. صرت نقل نظري بينن .. بدي ياهن يضحكو ليقولولي نحنا عم نمزح .. ليكا امك جاية ..

بس للاسف ما كانو عم يمزحو .. امي راحت .. راحت وتركتني .. وتركتلي امانة كبيرة كتير .. اختي ماسة ..

نسيم (الجزء الثالث)

ما فيني اوصفو لشعوري بهداك الوقت .. حسيت روحي انطفت من جوا ..

خالة فاطمة اخدتني انا واختي ماسة عندا ع البيت .. كنت عم اطلع باختي ماسة وبوشا الملائكي وحاسة بامل بحياة جديدة رغم كلشي وجع بقلبي..

عشنا معا لخالة فاطمة وزوجا تلت سنين .. رعتنا متل بناتا ..
فاطمة: انا الله عوضني فيكن .. ربنا ما عطاني بنات وعطاني ياكن

ع طول هيك كانت تقول ..
بيتنا كنت روح علي كل يوم نفضو ورتبو وارجع لعند خالة فاطمة .. ع طول ساعدا ع اختي .. اعملا ببرونة وسكتا ونيما واحيانا غيرلا الحفوضة ..

طبعا السيارة زوجا لخالتو فاطمة باعا لانو حالتن المادية كانت كتير سيئة وما فيهن ع مصروفنا وحليب وحفوضات لاختي ماسة ..

وبوقتا كان بدو يبيع كمان البيت بس خالة فاطمة ما قبلت ..

بقينا ع هالحالة لحتى ربنا اخد امانتو وماتت خالتو فاطمة متلا متل كل يلي حبيتن وماتو ..

بكينا كتير انا واختي ماسة ..
بوقتا كان عمري 12 سنة واختي ماسة 3 سنين ..

تركنا بيت خالتو فاطمة ورجعنا ع بيتنا .. وبلشنا حياة الي ولاختي وبس ..

صرت فكر كيف رح عيش انا واختي .. كيف رح طعميها ومن وين رح جيب مصاري لنعيش ..

بلشت اسحب من المصاري يلي امي عطتني ياهن .. كل ليلة كانت تمر علينا كنت موت مليون موتة .. كنت موت من خوفي ع اختي .. موت من خوفي من الايام الجاية .. شو رح نعمل وقت يخلصو المصاري .. من وين رح نجيب لنصرف ونعيش ..

وبلشت المدرسة .. وما كان في مكان لحطا لاختي فيه .. اخدتا بوقتا ع المدرسة معي ..

الانسة : ما بصير تجيبيها لاختك لهون .. ما بصير

نسيم: بترجاكي انسة .. نحنا ما النا حدا .. ما النا غير بعض

مسكت ماسة في وفرطت من البكي .. ضميتا وصرنا نبكي سوا ..

الانسة: هالشي ممنوع وما في نقاش .. رح توقعيني بمشكلة كبيرة

لهيك اختصرت وتركت المدرسة لابقى مع اختي ماسة بالبيت ..

ويوم عن يوم بلشت المصاري تخلص .. بوقتا كان مارق سنة كاملة وعمري 13 سنة ..

بوقتا قررت اطلع من البيت وشوف شي لاشتغلو .. اول يوم لالي .. مسكت بئيد اختي ماسة وطلعنا سوا نتفتل بالشوارع ..

فتت اول شي ع مطعم ..
نسيم: مرحبا عمو

صاحب المطعم: اهلا عمو .. بدك فلافل او شاورما

نسيم: عمو .. انا .. بدي شغل .. عم دور ع شغل

اطلع في صاحب المطعم وفرط ضحك .. (هههههه وشو بدك تشتغلي هون يا عمو .. روحي روحي الله يرضى عليكي )

طلعت من المطعم وكفيت طريقي .. عم نتفتل من شارع لشارع ..

ما خليت مكان وما دقيت بابو .. لوقت ما عاد قدرت وقف ع رجلي ..

ماسة: اختي تعبت كتير .. وجعت كتير

اطلعت فيها وضميتا .. (وانا كمان جعت .. رح شوف عرباية الكعك وجيب لناكل )

رحت ع عرباية الكعك واشتريت كعكتين الي ولاختي .. واكلنا وكملنا طريقنا لوقت بلشت الدنيي تعتم ..

نسيم: صار لازم نرجع ع البيت .. بكرة بنكمل

رجعت انا واختي ع البيت .. وبطريق رجعتنا وبشارع دياق .. مرق شب من حدنا .. وكانت عيونو علينا .. انا خفت كتير من نظراتو شديت ع ايد ماسة وركضت لقدام ..

الشب: لحظة .. لحظة .. وقفي

صرت اركض وابكي من غير وعي .. لوقت حسيت ع ايدو مسكتني .. صرت ارجف وحاول فلت حالي منو ..

الشب: لك شبك خايفة .. اهدي .. اهدي

نسيم: تركني .. تركني

الشب: انت من الصبح عم تتفتلي انت واختك وعم تدوري ع شغل موو

نسيم: هااا .. اي .. اي صح

الشب: تعي معي .. انا رح اعطيكي شي وبعدا بشغلك

فرحت كتير انو لقيت شغل .. مشيت معو لوصلنا لبناية ..
الشب: روحي لجوا .. تحت الدرج في كيس .. جبيبي وتعي

نسيم: كيس شو

الشب: انت روحي .. ما تخافي

مسكت ايدا لماسة ومشيت ..

الشب: لا لا وقفي .. تركيها لاختك وروحي انت

تركت ايدا لماسة ومشيت وانا عيوني عليه .. اطلعت مكان ما قلي ما لقيت شي ..
لفيت وشي لارجع لقيتو ورايي ..

صار كل جسمي يرجف .. شي من جواتي قلي انو في شي غلط رح يصير ..

صرت ارجف وابكي .. (بترجاك تركني .. بترجاك .. هلا اختي بتخاف .. بترجااااك )

الشب: لك ليش خايفة شبك

وصار يقرب مني وانا نزلت ع الارض وضميت ركبي ع صدري وزدت بالبكي ..

الشب: هششش .. سكتي ولا تخافي

بلش نفسي ينقطع من الخوف وغمضت عيوني وانا عم ابكي واترجا فيه .. لوقت سمعت صوت من راس الدرج ..

(مين هون .. شو في )

حسيت بطاقة فرج انفتحتلي .. وصرت صرخ .. (انا خالة .. انا .. انا هوووون )

الشب وقت سمع صوتا .. هرب وما بعرف لوين راح ..

ما بعرف كيف وقفت ع رجلي وجريت حالي جر لوصلت لماسة يلي كانت عم تبكي ع الساكت ..

ضميتا وزدت بالبكي .. وحسيت راسي تقيل كتير وادنيي عم يوزو .. ومن بعدا ما عاد شفت غير سواد ..

نسيم (الجزء الرابع)

سواد كتير .. وضو عم يجي ويروح .. وصدا اصوات .. ما بعرف شو هيي بالزبط .. مسجلة .. ضحك .. صوت رجال وستات ..

ما ميزت شي منن .. صوت واحد يلي ميزتو وخلاني فتح عيوني ..

ماسة: ماما نسيم .. فيقي ماما (تبكي)

فتحت عيوني بصعوبة .. سقف مليان شقوق .. حيطان دهانا عم يهر .. تخت صغير حديد .. قاسي .. قاسي كتير ..
واختي ماسة قاعدة حدي وعم تبكي ..

نسيم: م... ما.. ماسة .. اختي شبك .. شو صار .. وين نحنا

ماسة: انا خايفة .. خايفة كتير .. في كتير ناس برا وشكلن بخوف كتير

مديت ايدي بصعوبة ومسكت ايدا لماسة لحاول هديها .. (اهدي اختي اهدي .. هلا رح نرجع ع بيتنا .. اهدي)

انفتح الباب وعليت الاصوات .. اصوات كتير مزعجة .. ودخلت ست شكلا كتير غريب .. وشا كلو مكياج .. بس مو متل مكياجا لامي .. مكياج غريب كتير .. وعم تعلك علكة بتما .. ولابسة فستان اصفر عم يلمع ..

نانا: اااه .. الحلوة فاقت

بلعت ريقي وشددت ع ايد ماسة وما حسنت جاوبا ..

نانا: كيف صرتي هلا

نسيم: م... م.. منيحة

نانا: اي كتير منيح .. جوعانة ؟؟

نسيم: لا .. شكرا .. رح روح .. ع .. البيت

اطلعت في ماسة وكانو عم تعاتبني..

ماسة: بس انا جوعانة كتير

ضحكت الست كتير وبصوت عالي كتير وقربت مني .. (الوقت هلا متاخر كتير .. ما فيكي ترجعي ع البيت .. معك رقم ابوكي او امك )

نسيم: انا .. انا ما الي .. ما الي حدا .. امي وابي ميتين

رفعت الست حواجبا وفتحت عيونا ع وسعهن.. وقرصتني من خدي ..
(ممممم .. كتييير حلوو .. وشو عم تعملي هون )

(خالة .. انا .. كنت عم دور ع شغل )

رفعت راسا وفرطت ضحك .. (خالة !!!.. حبيبتي انا اسمي نانا .. اوك .. نانا .. وانت شو اسمك )

(نسيم .. اسمي نسيم .. واختي .. ماسة )

(حلو كتير .. اطلعي ع الشباك برا .. الدنيي عتمة كتير .. ما فيكي تطلعي لبرا .. رح جبلك اكل لتاكلي انت واختك )

سكتت وما حكيت شي .. تركتني وطلعت وبعد بشوي رجعت ومعا اكل كتير .. وقت شفتو حسيت حالي وكانو من سنة ما اكلت .. وبلشت اكل بجنون انا وماسة .. لوقت ما عاد قدرت اتنفس ..

كانت نانا تطلع فيني وهي عم تتبسم لوقت خلصنا .. (وهلا نامو وبكرة بنتفاهم كرمال شغلك )

ضميتا لماسة ونمت .. فقت الصبح ع صوت نانا ..
(شو يا حلوين .. لسا نايمين )

رفعت راسي وسندت حالي ع التخت .. (خالة .. بدي .. بدي فوت ع الحمام )

نانا: ههههههه لك قلتلك انا نانا .. نانا .. تعي معي ع الحمام

اطلعت بماسة ومسكت بايدا وهي نايمة ..

نانا: ما تخافي عليها .. هلا بترجعيلا ما رح اكلك ههههه .. تعي

طلعت لبرا الغرفة .. كانت صالة كتير كبيرة وكلا طاولات دائرية وحواليها كراسي .. كانو وسخين كتير وكلن سجاير ورماد سجاير .. والارض كلا وسخ .. وغرف كتيرة واضوية كتيرة كتير ومسجلة كتيير كبيرة ..

مشيت مع نانا لوصلت الحمام .. فتت الحمام وانا كتير خايفة .. خلصت وغسلت ورحت ع الغرفة ركض .. وكانت نانا قاعدة وعم تحكي مع ماسة يلي فاقت ..

نانا : تعو معي لتفطرو ومن بعدا رح ورجيكي شغلك

فطرنا فطور ملوكي .. كتير فرحت وانا عم شوفا لماسة كيف عم تاكول ..

نانا: وهلا .. بما انو عم تدوري ع شغل .. انا رح شغلك معي

نسيم: جد .. وشو رح اشتغل

نانا: رح تنضفي طاولات واراضي .. وكل يوم المسا بكون عنا سهرة .. رح تقدمي ضيافة .. شو رايك

نسيم: اكيد موافقة

تبسمت نانا واطلعت في ..
(بس ع هيك رح تبقي هون .. ما فيكي تطلعي من هون كرمال الشغل)

نسيم: مو مشكلة .. المهم اقدر عيش انا واختي

ما كنت عرفانة وقتا انو دخلت لجهنم برجليي ..

نسيم (الجزء الخامس)

بعد لفطور مباشرة بلشت نضف .. وماسة كمان كانت عم تساعدني .. وكان في بنات كتير .. كلن اشكالن غريبة .. ولبسن كلو مكشوف .. نقز قلبي منن وما حبيتن ..

بعد شي تلت ساعات خلصنا شغل ..
نانا: بصراحة .. انت بتجنني يا نسيم .. ما توقعت يكون شغلك حلو متلك .. وهلا تعي لتتغدو وترتاحي كرمال السهرة

تغدينا انا وماسة ونحنا كتير مبسوطين .. وبقيت بالغرفة لوقت المسا ما طلعت منا لوقت اجت نانا..

نانا: مسكي هاد الفستان .. تحممي والبسي

كانت حاملة فستان قصير لون اصفر فاتح وكمامو دانتيل .. وقت شفتو طار عقلي فيه ..

تحممت ولبستو .. وقفت قدام لمراية وحسيت حالي رجعت لنسيم يلي عمرا تسع سنين .. والفساتين الحلوة يلي كانت ماما تشتريلي ياهن ..

ماسة: اختي انت بتجنني .. بدي فستان متل فستانك
نسيم : تكرمي .. اول ما اخد منا مصاري رح اشتريلك احلا فستان

فتحت نانا الباب ودخلت ..
نانا: اووووه .. شو هالجسم يلي بيسحر

نسيم: يسلموو كتير

نانا: لسا ما شفتي شي .. كل ما اشتغلتي منيح رح جبلك شي جديد واحلا .. وهلا رح حطلك شوية مكياج

نسيم: ممممم ... فيني اطلب منك طلب

نانا: هههههه اي فيكي

نسيم: بدي .. من بعد ازنك .. فستان لاختي ماسة .. ورح اخصم حقو من راتبي

نانا: هههههه احلا فستان لماسة .. ولا يهمك

فرحت كتير بوقتا ..
مكيجتني ولبستني كعب عالي .. وطلبت مني اطلع لبرا ..

نسيم: وماسة !؟؟

نانا: ماسة رح تبقى هون لتخلص السهرة .. ماشي ؟؟

هزت ماسة براسا وهي عم تتبسم ..

نسيم: فيني قفل الباب عليها ؟

نانا: ماشي .. عملي يلي بريحك

طلعت لبرا .. وكانو طلعت لعالم تاني .. الطاولات كلن رجال ستات .. كلن عم يضحكو ويدخنو ويتمايلو ..

وقت شفتن هيك نشف الدم بعروقي ووقفت مطرحي .. شدتني نانا من ايدي وهي عم تضحك ..

(شبك ههههههه)

(انا .. انا خايفة كتير )

(لا تخافي .. بكرة بتتعودي )

مشيت معا متل الالة .. وكل حواسي عم تعطي اشارات خوف ورعب ..

عطتني قزازات البيرة وعلب السجاير وطلبت مني وزعن ع الطاولات ..

نانا: انتبهي .. كل ما حسنتي شغلك .. كل ما عطيتك اكتر

مشيت بين الطاولات وانا عم فكر باختي ماسة .. واقنع حالي بانو هالشي رح يعيشنا ويحمينا من العالم يلي برا ..

كنت اتفتل بينن وهني شي يغمزني وشي يبعتلي بوسة ع الهوا وانا مع كل تصرف ينتفض جسمي كلو .. لوقت رجال كبير مسكلي ايدي ..
صرت صرخ وبعد بايدو عني .. وهو عم يضحك .. (هههههه شبو العسل مانا عاجبينوووو )

قلبي من جوا كان رح يوقف ودموعي بلشو يهرو .. اسحب بايدي من ايدو وهو عم يضحك ويشدني اكتر .. لوقت اجت نانا وخلصتني منو ..

نانا: تركا .. لساتا صغيرة

وغمزتو وسحبتني ع المطبخ وانا كل جسمي عم يرجف ...

نانا: شبك .. بدك تتعودي ع هيك تصرفات والا ما رح يمشي حالك هيك

نسيم: ما بدي اشتغل .. بترجاكي .. بدي ارجع ع بيتي .. ما بدي اشتغل

ووقفت لروح ع غرفتي ..
مسكتني نانا من ايدي وقربت تما من ادنا .. (يلي بيفوت عند نانا .. ما في يطلع عايش)

انتفض جسمي وبعدت عنا ودموعي عم يهرو .. (بترجاكي .. بترجاكي ارحميني .. انا ما الي حدا .. فقدت اهلي كلون وما بقيلي غير اختي .. تركيني بترجاكي .. ما بدي شي منك ابدا )

نانا: اعقلي .. لوين رح تروحي .. شفتي الشب شو كان رح يعمل فيكي .. العالم برا كلو هيك .. لهيك حطي عقلك براسك واركني

نسيم: مستحيل .. هالشي مستحيل .. ما فيني

نانا: لكن ما رح تعودي تشوفيها لاختك .. رح اخفيها من الوجود

وقت قالت هيك وقعت ع الارض .. وما عاد في قوة لاوقف .. نزلت ع ركبا لعندي ..
(ازا تصرفتي صح رح خليكي تعيشي احلا عيشة انت واختك .. وازا ركبتي راسك رح احرمك اختك وشغلك بتنضيف الحمامات )

نسيم: بترجاكي .. ماسة هي روحي .. بموت ازا فقدتا او صرلا شي

نانا: لكن بتعملي يلي بقلك ياه

نسيم: (تبكي) ماشي .. ماشي

وصرت كل يوم ع نفس الشغل .. تنضيف الصبح وخدمة المسا .. شفت شوفات كتيرة وتعرضت لمواقف كتيرة ..

سنة كاملة مرت بهالعذاب .. وبلغت خلال هالسنة ووضحت ملامحي الانثوية .. وصرت الفت نظر كل مين بيجي .. وتعودت ع هالجو .. وصار فيني اتعامل مع تصرفاتن وحركاتن ..

نسيم (الجزء السادس)

مشت الامور متل ما بدا نانا وصرت اقرب وحدة بالبنات عليها .. وبلشت بعد بفترة تطلب مني ارقص ع المسرح .. اول مرة خجلت .. وتاني مرة كان خجلي اقل وبعدا تعودت ع هالشي ..

وما وقفت ع هيك .. بلشت من بعدا تطلب مني اقعد مع الزباين ع الطوايل وسايرن ..

كل ليلة كانت تمر علي كنت موت الف موتة ... كنت بسجن .. وابشع من السجن ..

وبيوم كنت عم ارقص .. وبنص الرقصة ندهتلي نانا .. نزلت ورحت لعندا ..

نانا: اجاكي زبون صغير وحلو .. ورح يعيشك احلا عيشة.. تعي معي

نسيم: لوين

نانا: صار وقت تكملي شغلك معي .. رح تصيري الكل بالكل هون .. رح دخلك لعند زبون

نسيم: نانا بوس رجلك اعفيني .. ما بقدر .. والله مااا فيني

نانا: نسيم .. ازا خالفتيني رح تخسري كلشي واولن اختك

نزلت ع الارض وانا عم ابكي وبوس باجرا .. (بترجاكي .. اعفيني بترجاكي )

شدتني من ايدي ووقفتني .. (بكفي دراما .. خلص .. جهزي حالك وتعي ورايي فورا )

فتت ع الحمام .. اطلعت بحالي بالمراية ..

(خسارة هالبراءة يلي بعيونك يا نسيم .. كل مالا عم تختفي ويجي مكانا ملامح شيطانية)

فكرت بوقتا انو انتحر .. انو اخنق حالي او احرق المكان بيلي فيه .. بس وقت فكرت بماسة تراجعت ..
رتبت حالي وقربت من تختا لماسة وبستا ع جبينا والدمعة معلقة بعيني .. ورحت لقدري ..

نانا: برافوو عليكي .. هيك بدي ياكي .. دخلي وازا لزبون طلع زعلان رح احرقك

كانت غرفة صغيرة .. فيها تخت مغطى بستارة حمرة واضوية خافتة ..
فتت ودقات قلبي عم تعلا لدرجة انو انزعجت من صوتا ..

اطلعت حوالي .. بعدت لستارة .. كان شب باين عليه انو صغير .. قاعد ع طرف التخت وعم يدخن ..

قعدت ع الطرف التاني من غير ولا كلمة ..
بعد بشي خمس دقايق .. طفى السيجارة ولف وشو علي .. كان التوتر باين عليه كتير ..

قرب مني .. وبلش يمسح بعرقو ..
رامي: انت .. انت .. يعني .. شو اسمك

نسيم: نورة .. اسمي نورة
(طبعا كنا كل وحدة فينا الا اسم تاني تتعامل فيه مع الزباين)

مد ايدو ومسكلي ايدي .. رجف جسمي كلو وما بعرف كيف هرو دموعي ..

رامي: شبك .. ليش عم تبكي

نورة: بترجاك .. والله انا مو متلن .. انا نصيبي بعتني لهون .. وما قدرت اطلع .. بترجاك لا تلمسني

ونزلت ع اجري بوسن وابكي .. بعدني عنو ووقف بسرعة وزاد توترو ..

رامي: خلص .. خلص .. لا تعملي بحالك هيك .. انا .. انا بالاساس ما بعرف كيف اجيت لهون .. وما الي بهيك شي .. خلص لا تخافي وسكتي

مسحت دموعي وحسيت براحة كبيرة .. (بتشكرك من كل قلبي )

رامي: بس كيف وصلتي لهون

نسيم: قصتي طويلة .. كلا وجع بوجع .. واختي كسرتلي ضهري وربطتني

رامي: تعي قعدي حدي واحكيلي .. بنتسلا وبنطلع من جو التوتر ههههه

قعدت حدو لرامي .. وبلشت خبرو بكلشي ..

رامي: يااااه .. كل هاد .. واختك وينا هلا

نسيم: اختي معي .. بغرفتنا ما عم تطلع منا غير وقت التنضيف

رامي: فففففففففف

نسيم: رامي بترجاك ساعدني .. انا عايشة بجحيم .. بكابوس .. والمصيبة انو عم اتعود ع حياتن .. ما بدي كون متلن .. بترجاك

رامي: كيف بدي ساعدك .. يعني انا هاي اول مرة بفوت لهون

نسيم: خبر الشرطة انو انا مخطوفة .. او رح اعطيك اسم شخص .. خبرو لالو .. بترجاك

حط اصابعو بين شعرو وهو عم يتافف .. (لك انا شو جابني لهون )

(يمكن لتساعدني .. وتطلعني من يلي فيه )

(ماشي .. مين هالشخص يلي بدك خبرو .. وشو بقربك .. لانو قلتيلي انو ما الك حدا .. مو )

(صح .. هالرجال كان رفيقو لابي .. ومن وقت مات ابي ما عاد شفنا .. بس اكيد رح يساعدني )

(شو اسمو )

(عماد .. عماد زين الدين .. وهلا رح اكتبلك عنوانو )

(عماد .. ع .. عماد زين الدين )

(اي .. عطيني ورقة وقلم )

توتر بزيادة وعطاني ورقة وقلم كتبتلو العنوان .. اطلع فيه وتغير لونو .. ووقف بسرعة .. (انا صار لازم روح .. انتبهي ع حالك )

مسكتو من ايدو قبل ليطلع .. (رامي بترجاك .. مصيري مرتبط فيك )

اطلع في بعيون متوترة وطلع بسرعة من الغرفة ..

نسيم (الجزء السابع)

طلع رامي من عندي وحسيت براحة كبيرة انو واخيرا رح اخلص من هالجو الشيطاني ..

كنت لسا قاعدة وسرحانة وقت دخلت لعندي نانا وهي عم تضحك ومبسوطة كتير .. (لك والله طلعتي مو قليلة يا بنت .. تعي خبريني شو عملتي لحتى جن فيكي )

انا فتحت تمي وتصفنت فيها .. ما عرفت بشو جاوبا .. .وشي صار بالالوان ..

نانا: ههههه لك شبك .. شوفي شوفي قديش عطاني .. لك والله بتستاهلي احلا بوسة ..تعي تعي

ضمتني وصارت تبوس في وانا قلبي عم يدق طبول ..

نانا: هالشب طلع اكابر وابن ناس .. قلي البنت يلي بلمسا ممنوع غيري يلمسا .. وضاعفلي بالدفع كرمال هيك

نسيم: جد .. هيك قال

نانا: اي هيك قال .. وهلا بما انك شتغلتي صح روحي ع غرفتك وريحي

تركتا لنانا ورحت لغرفتي وانا عقلي عم ياخد ويجيب .. اطلعت بماسة ونزلت دمعة من عيني ..
(معقول يكون الفرج ع ايدو .. اااخ .. ايمت رح اطلع من هوون وطالعك يا روحي)

ومشت هالليلة ومشت من بعدا ليالي وانا ع حالي .. اسبوعين كاملين وانا بكل ليلة انطرو لرامي .. كل ليلة جهز حالي لاطلع من هالجحيم .. بس ما كان يجي رامي .. لوقت فقدت الامل ..

وبعد الاسبوع التاني كنت عم ارقص واتمايل بلا روح وقت لمحتو من بعيد عم يطلع في بعيون ملياني شرار .. رجف قلبي ونزلت بسرعة لعندو ..

ووقت وصلت لعندو كان هو ونانا عم يحكو ..
رامي: اي بس انا خبرتك هي الي وبس وعطيتك اضعاف ما طلبتي

نانا: بس نحنا ما اتفقنا ع الرقص .. يعني بصراحة ما في ولا وحدة بترقص هون متلا

زورني رامي .. ورجع اطلع بنانا.. (ما .. بدي .. ترقص .. وشو ما بدك تعويض طلبي )

اطلعت في وانا ماني مصدقة يلي عم اسمعو ..

رامي: وهلا سمحيلي رح اخدا لجوا

لفني من خصري وسحبني وراه ع الغرفة .. حسيت هالممر لصغير وكانو امتااار وامتاار ..

وصلنا الغرفة ودخلناها ونانا عيونها علينا ..دخلنا وسكر الباب ..

رامي: ففففف .. بعتزر انو مسكتك هيك .. بس ضروري اقنعا لنانا

انا وشي كان بالالوان وقلبي عم يدق بصورة غريبة ..
(م .. م.. ماشي .. بسيطة .. خبرني شو صار معك بترجاك )

لف وشو عني وقعد ع التخت .. (نسيم .. بصراحة ترددت كتير انو ارجع لهون .. انا ما الي بهيك قصص .. وطلعت من هون وانا مقرر انو ما رح ارجع .. بس .. بس من وقت .. ما تركتك .. ما غبتي عني .. وضميري ما طاوعني اتركك )

(يعني شو .. ما وصلت رسالتي للرجال يلي قلتلك عنو )

رامي: اووووف .. الرجال عطاكي عمرو من سنتين

بلحظة وحدة كل الامال يلي كنت بانيتا نهدمت .. قعدت ع طرف التخت وبلشت ابكي بجنون ..

لف وشو رامي وقرب لعندي .. (سمعي .. مانك متزكرة ابنو لعماد شو كان اسمو )

(ما بعرف .. ما عم اتزكر شي .. خلص كلشي راح .. كلشي .. كلشي )

(نسيم اهدي .. ما بتتزكري لرامي .. رامي يلي كان يشقلك تياب لعبتك وقت يجي لعندك )

رفعت راسي واطلعت فيه وانا ما عم صدق يلي عم اسمعو .. (لك .. لك .. انت رامي .. لك اي رامي ابنو لعمو عماد )

ومن غير وعي ضميتو لرامي وانا عم ابكي واضحك بنفس الوقت ..

ووقت وعيت ع حالي بعدت عنو بسرعة .. (اسفة ... اسفة كتير ما بعرف شو صرلي )

(ولا يهمك .. بسيطة )

(ليش ما خبرتن للشرطة .. ليش ما بعتن من اول يوم )

(فكرت فيها كتير .. ازا اجت الشرطة لهون رح يمسكوكي انت واختك .. وانتو تنيناتكن تحت ال 18.. فاهمة شو يعني .. يعني رح يحطوكن ببيت ايتام .. لهيك فكرت بشي تاني )

(شو .. شو فكرت )

(رح طالعكون من هون .. ومن بعدا خبر الشرطة )

(بس كيف رح نطلع من هون )

(انا بدبرا .. بس بدك تتحملي هالفترة )

(بتحمل .. المهم اطلع من هون )

بقينا انا ورامي شي تلت ساعات ونحنا عم نحكي سوا وخبرتو كلشي صار معنا ..

رامي: ااخ .. الله يرحمن تنيناتن .. صار لازم روح .. بعد اسبوع برجع

نسيم: بترجاك لا تتاخر

رامي: لا تخافي .. ما رح اتركك

حسيت براحة كبيرة رغم الخوف يلي لساتو معشش جواتي .. ونانا كمان هالمرة انبسطت مني كتير وريحتني طول الاسبوع لانو اكرما رامي ..

نسيم (الجزء الثامن)

اجا اليوم يلي رح يجي في رامي .. ما بعرف ازا عملت شي صح بهاليوم .. كنت مكركبة كتير ومتوترة ..

مشى الوقت بطيء كتير لاجا وقت المسا .. لبست وجهزت حالي وطلعت اتفتل بين الطوايل وعيوني عم تدور علي ..

بعد ساعتين لمحتو من بعيد .. دق قلبي وحسيت برعشة دخلت لكل جسمي .. كنت بدي اركض لعندو .. امسك بئيدو واترجاه يطالعني من هون .. ما عاد في اتحمل اكتر ..

ضبطت اعصابي لوقت قرب وقعد ع الطاولة .. مشيت لعندو ونانا عم تراقبني ..
قعدت حدو ع الكرسي وانا عم اتبسم ..

نسيم: كيفك

حسيتو متوتر اكتر من كل مرة .. اطلع في ومسكلي ايدي وباسا .. ( نانا عم تراقبنا .. لا تسحبي ايدك وتضحكي )

هو هيك قلي .. بس انا بالواقع ما كنت بدي اسحبا .. حسيت بشعور كتير غريب .. رجفة بقلبي حسيتا لامست روحي ..

رامي: قومي هلا جيبي شي مشروب وابعتيلي نانا

نسيم: شو رح تعمل

غمزني واتضحك .. (تركيها علي )

تركتو ورحت لعند نانا يلي كانت عم تتبسم .. (لك برافوو يا بنت .. الشب داب فيكي )

نسيم : هههههه .. بدو اياكي

نانا: اي بامرو انا

راحت نانا لعندو وانا جبت المشروب ورحت لعندن .. ووقت وصلت .. حطت نانا ايدا ع كتفي وهي عم تضحك ... (روحي غيري تيابك وجهزي حالك لتطلعي مع رامي)

انا ما صدقت يلي سمعتو .. حسيت حالي عم احلم .. اطلعت فيها واطلعت برامي يلي تبسملي .. (كيف .. ما فهمت ... وين اطلع معو )

(الاستاز مالل من الجو هون .. وحابب يغير )

.(هاا .. اي .. اي ماشي .. بس لالبس وفيق ماسة)

رامي: مين ماسة

نسيم: اختي .. اختي لصغيرة

اطلع رامي بنانا .. (لا .. هيك ما بيمشي الحال .. ما فيني اخدا )

نانا: تركيها لاختك نايمة .. وازا فاقت انا بشوفا

اطلعت برامي وانا ما عم افهم شو عم يعمل ..

نسيم: مااشي .. حاضر

رحت ع الغرفة وانا كتير متوترة .. غيرت تيابي وجهزت حالي وطلعت لعندو ..

لفني من خصري وطلعنا لبرا هالبناية الكئيبة وركبنا بسيارتو ..

حاولت اتمالك حالي وقت شفت العالم برا .. بس ما قدرت .. صرت ابكي بلا صوت ..
حرك رامي السيارة ومشينا ..

رامي: انت منيحة ؟؟

وقت قلي هيك صارو الشهقات يطلعو من بين دموعي يلي ما عم توقف ..

رامي: نسيم اهدي

نسيم: انت شو عم تعمل .. فهمني .. ليش تركنا ماسة هنيك .. انت عم تكزب علي موو

رامي: نسيم اهدي .. انا ما عم اكزب .. بس نانا اكيد رح تراقبنا .. لهيك ما فيني غامر من اول مرة

نسيم: بس انا تعبت .. واعصابي ما عاد تحملت اكتر

رامي: بدك تطولي بالك لتاخدي يلي بدك ياه

اخدني بوقتا رامي ع مطعم كتير فخم اكلنا وسهرنا وانبسطنا ورجعني لجحيمي مرة تانية .. وقبل لانزل من السيارة ..

رامي: نسيم .. هالسهرة كانت اجمل سهرة بحياتي

حمرو خدودي ونزلت راسي بالارض .. (لا تتاخر بترجاك )

حكيت هيك ونزلت من السيارة ركض ..

نسيم (الجزء التاسع)

وهلا من بعد هالحادثة بسنة .. ليكني ببيتي مع اختي .. بيتي البسيط .. يلي ما في ولا شي بالدنيا ممكن يعوضني عنو ..

من بعد ما رامي خبر الشرطة ..
رامي: رح اخدك ع بيتنا لعند امي

نسيم: لا بترجاك ...بدي روح ع بيتي .. بترجاك

رامي: نسيم شو رح تعملي ببيتك .. ما بكفي يلي صار
نسيم: ما في ايا مكان ممكن حس فيه بالامان متل بيتي .. بيت امي

رامي: ماشي .. براحتك

وصلنا رامي ع بيتنا .. وقت دخلتو حسيت براحة كبيرة .. حسيت بجبل من الهموم نشال عن ضهري .. ضميتا لماسة يلي كانت عم تنط من فرحتها ..

رامي: نسيم .. متاكدة رح تبقو هون ؟؟

نسيم: طبعا رح نبقى هون .. هاد بيتنا

رامي: بس .. يعني

نسيم: ما في بس .. ولا تشغل بالك .. بتشكرك كتير رامي .. جد بتشكرك

رامي: هاد اقل شي ممكن اعملو لالك ... رح روح

نسيم: الله معك

مشى خطوتين ولف وشو ورجع لعندي .. (نسيم .. تفضلي هاد هدية لالك )

مدلي صندوق لعندي ..

رامي: هاد تلفون .. لحتى ازا عزتي شي تحاكيني .. سجلتلك رقمي عليه

نسيم: بتشكرك كتير رامي.. بتشكرك ع كلشي

تركنا رامي وراح ..

هالتجربة يلي مريت فيها حسيتا غيرت في كتير اشيا .. او بالاحرى غيرت في كلشي .. رغم كلشي قهر ووجع حسيتو بهالفترة الا انو حسيت حالي صرت اقوى .. طلعت بنسيم القوية يلي رح تحارب كرمال تعيش حياة نضيفة مع اختا ..

من تاني نهار وبعد ما نفضنا البيت .. مسكت بايدا لماسة وطلعت لشوف شي شغلة نضيفة .. بس هالمرة كنت مقررة شو رح اشتغل ووين رح روح ..

بقيت ماشية بالشوارع لوصلت مشغل خياطة .. سحبت نفس طويل ودخلت ..

نسيم: مرحبا خالة

رجاء: اهلا يا حلوة .. تفضلي

نسيم: خالة انا جاية وحابة اتعلم لخياطة .. من وانا صغيرة عم احلم بهالشي

رجاء: قديش عمرك انت

نسيم: 15 سنة

رجاء: وفيكي تشتغلي هيك شي؟

نسيم: اختبريني .. وازا ما نجحت طالعيني

رجاء: باينتك بنت ذكية .. وانا بحب هالشخصية .. رح شغلك معي .. معك مهلة شهر تثبتي جدارتك

نسيم: بتشكرك كتير .. بس .. اختي .. ما الها غيري .. رح تبقى معي بعد ازنك .. وفيها تساعد بالتنضيف او ايا شي بدك ياه

رجاء: هههههههه ماشي .. تكرمي يا .....

نسيم: نسيم .. اسمي نسيم .. واختي ماسة

رجاء: اول شي رح تعطيني كل معلوماتك لاعرف مين بشغل عندي

ومن هاليوم انفتحتلي طاقة النور ..
بلشت معن بشغل بسيط من تركيب زرار وهيك شي .. وكنت كل ما اتقن شي تكلفني بشي جديد .. وخلال شهر كنت مبلشة بشغل ع الماكنة ..

رجاء: بصراحة يا نسيم .. ما توقعت انو تبدعي هيك .. انت كتير ذكية

نسيم: شكرا كتير لالك .. هالشغلة كانت حلمي من وانا صغيرة

وخلال هالفترة ما نسيتو لرامي .. او بالاحرى ما تركلي مجال لانسى .. لحتى صار جزء مهم من يومي .. او الجزء الاهم من يومي ..

كنت وقت حاكيه بحس دقات قلبي عم تتمايل مع كل كلمة يحكيها .. همساتو .. صوتو .. نفسو .. كلشي فيه كان يحرك مشاعري وياخدني ع عالم كتير حلو ..

وهلا بالي مشغول ع ماسة .. يا ترى رح تقدر تتاقلم بمدرستا .. رح تقدر تبعد عني .. رح يكون حظا من الدنيا احسن من حظي .. هاد كلشي بتمناه ..

ماسة: ماما نسيم انا بحبك كتير ورح اشتقلك

نسيم: وانا رح اشتقلك .. ما تنسي شو وصيتك .. بتبقي بالساحة لوقت اجي واخدك .. مفهوم

هزت ماسة براسا .. (مفهوم)

ضمتا نسيم والدموع بعيونا ..

رجعت نسيم ع المشغل .. وكان في ضجة كبيرة بالمشغل وصريخ ..

الست: لك انت نزعتي .. انا دافعة في مبلغ وقدرو لحتى تعملي فيه هيك

رجاء: لو سمحتي اهدي .. رح اعملك بدالو .. بس اهدي

الست: لك بدالووو .. لك انت عارفة هالقماش قديش سعرو .. لك هاد مترو براتب شهر لالك .. وغير انو ما في منو هون

قربت نسيم منن واطلعت برجاء .. (خالة رجاء لو سمحتي فيني ساعدكن ؟؟)

رجاء: بشو رح تساعدينا بنتي

نسيم: خالة .. انا فيني عدلو

اطلعت الست فيني من فوق لتحت وضحكت بمسخرة .. (ههههه رح تعدلي ؟؟)

تبسمت بوشا .. (تركيني جرب .. ما حتخسري شي)

(قولتك .. ما رح اخسر اكتر من يلي خسرتو )

مسكت اول شي ورقة وقلم ورسمت الفستان بنفس تفصيلو ورجاء عم تطلع فيني باستغراب..

الست: لك شو عم تعملي .. اه .. شو عم تعملي

كملت شغلي .. وبلشت ارسم بالتعديلات يلي رح اعملا .. ووقت شافو شو رح عدل فتحو عيونن ع وسعهن ..
الست: هلا .. فيكي تعملي هيك ؟ لك هاد التصميم يلي كنت طالبتو انا

نسيم: وانا رح عدلك ياه .. بس رح ياخد مني شوية وقت ورح يلزمني قماش شيفون ودانتيل

الست: لك خدي اليوم بطولو .. وازا صار وعدلتي رح اعطيكي يلي بدك ياه

رجاء: كلشي قماش بدك ياه موجود هون ..باشري فورا

بقيت اربع ساعات متواصلة واناعم عدل عليه للفستان ..

نسيم (الجزء العاشر)

رجاء: لك نسيم انت معجزة ...جد معجزة .. رح دق لصاحبتو فورا

نسيم: ههههه .. انا رح روح جيبا لماسة واجي

رجاء: ما تتاخري

جبتا لماسة من المدرسة ودخلت كانت الست لابسة الفستان وهي كتير مبسوطة .. ووقت شافتني اجت لعندي وضمتني . .. (طلبي يلي بدك ياه .. شو ما بدك)

وبعد ما رفضت اطلب شي عطتني اكرامية كبيرة .. (ما رح اتعامل مع غيرك )

واطلعت برجاء وهي عم تضحك ..

وبلشت من هون بعالم التصميم .. صرت تابع كلشي تصاميم جديدة واعمل متلا واحيانا عدل عليها ..

رامي: انا كتير فخور فيكي .. وقت نتزوج رح اسسلك مشغلك لالك انت .. مشغل النسيم

نسيم: نت .. نت.. نتزوج

رامي: اي طبعا نتزوج .. نسيم صرلنا سنة سوا .. وانت نفسيتك رتاحت وما عاد في داعي للتاجيل .. انا .. انا خبرتا لامي عنك .. بس ما حسنت خبرا كيف وصلتلك وهي متشوقة كتير لتشوفك

نسيم: ممممم

رامي: شبك !! ما بدك ياني

نسيم: لا لا .. قصدي اي

رامي: هههههه .. لكن اليوم المسا جهزي حالك رح اجي اخدك لعند امي

وبوقت المسا ..
نسيم لابسة فستان فستقي يلي عكس ع لون عيونا .. وشعرا مرفوع بديل حصان مع مكياج خفيف .. وعم تستنا .. وحدا ماسة ماسكة بايدا وهي كتير مبسوطة بفستانا لجديد يلي متل فستانا لنسيم ..

وبعد بوقت اجا رامي .. وقف السيارة وحس بقلبو رح يوقف وقت شافا .. قمة بالجمال والانوثة ..

فتحت نسيم بابا السيارة الخلفي ودخلت ماسة .. وفتحت الباب الامامي وقعدت حدو لرامي ..

نسيم: مسا الخير

اطلع فيها بعيونو المليانة وله وعشق .. (طالعة بتجنني)

حمرو خدودا ونزلت عيونا بالارض .. (شكرا كتير )

وراحو سوا لبيتن ..
دخلت نسيم بيتن يلي كان اقرب للفيلا منو للبيت .. كانت عم تتفتل بعيونا ع البيت وشعور بالحنين عم يقتلا قتل ..

شردت لعالم تاني .. العالم يلي كانت في بعمر ال 9 سنين .. وقت كانت بحضن اما وابوها ..

قطعلا شرودا صوت امو لرامي .. (اهلا وسهلا .. اهلا وسهلا )

نقزت ومسحت دمعة كانت بعينا من غير ما تنتبهلا .. (اهلين فيكي خالة )

قربت منا امو لرامي وضمتها لصدرا .. (اسم الله يحميكي يا بنتي )

سهرت معن سهرة حلوة كتير .. لاول مرة من سنين نسيم بتحس بجو العيلة .. هالجو يلي بحرك كلشي فيها ...

ام رامي: بس ما قدرت افهم انو ليش لتكفي دراستك هون ... ليش ما كفيتيها باوروبا حد اهلك

رمشت نسيم بعيونا لتقدر تستوعب واطلعت فيها ..
(ما فهمت ؟؟ ايا دراسة وايا اهل ؟؟؟)

اطلعت ام رامي بابنا ورجعت اطلعت بنسيم .. (دراستك .. انت مو عم تدرسي )

نسيم: هااا .. انا صار لازم روح

اطلعت بماسة ومسكت ايدا ليمشو ...

ام رامي: بعد بكير حبيبتي

نسيم: الوقت تاخر وصار لازم روح

وشو لرامي صار بالالوان .. حمل مفاتيح سيارتو ولحقا لبرا ..

رامي: نسيم .. لحظة .. رح وصلك

اطلعت في نسيم بعيون شعلانة نار ..
(انت خجلان فيني .. مو هيك )

(نسيم .. ما تفهميني غلط حبيبتي )

رفعت اصبعتا بوشو وهي حاسة حالا رح يغط ع قلبا من الوجع والقهر ..
(لااااا تقلي حبيبتي )

(نسيم ما تكبري القصة .. كل القصة انو امي بدا وحدة دارسة )

(اي .. وليكني قدامك .. ماني دارسة ولا الي اهل .. فخلص .. لهون وبكفي .. معروفك ما رح انساه .. وبتمنالك السعادة )

مسكلا ايدا ليوقفا .. نفضت ايدا منو ومسكت بايد ماسة ومشيت ..

رامي: وقفي .. نسيم .. وقفي

نسيم: رامي بكفي خلص .. كلشي انتهى هون

وقفت تكسي ورجعت ع البيت .. نار شاعلة بقلبا .. ما عم تقدر تسحب نفس .. عم تقاوم بدموعا ..

نسيم: ما لازم ابكي .. انا قوية .. رح اتجاوز هالوجع .. اي رح اتجاوزو
نسيم (الجزء الحادي عشر)

كل ضربة نضربتا من الحياة كسرت شي من روحي وبنفس الوقت قوتني اكتر ..

ضربة رامي كانت اقوى الضربات ع قلبي .. بس حرك شي من جواتي وعطاني طاقة جديدة لاتحدى الحياة وضرباتا ..

الست يلي خبرتكن عنا يلي عدلتلا الفستان عرفتني ع كتير ناس اكابر .. واحيانا كنت روح عندن ع بيوتن لاخد قياساتن .. هالشي يلي كان يوفرلي اكراميات بزيادة وكلن كنت صمدن ..

بعد هالضربة قررت اثبت لرامي انو فيني كون متلن واحسن ..

لهيك قررت اخد شهادة رسمية بالتصميم .. وسجلت بمعهد للتصميم وبلشت .. وكنت من المتفوقات في ..

رامي ما تركني بحالي .. كل يوم والتاني يدقلي بس ما كنت جاوبو .. لبيوم كنت طالعة من المعهد وتفاجات فيه ع باب المعهد ..

وقت شفتو قلبي بلش يدق بصورة جنونية .. كنت كتير مشتاقتلو .. مشتاقة لشوفو وحاكيه ..

تركتو واقف ومشيت ..
رامي: نسيم .. نسيم

وركض لعندي ومسكني من ايدي ..
حسيت برعشة بجسمي كلو .. غمضت عيوني لاتمالك اعصابي واطلعت فيه ..

نسيم: شو بعد في رامي

رامي: شتقتلك

جوابو اربكني ووترني اكتر .. بس ما كان في مجال لاتراجع وسلم لمشاعري ..

رامي: نسيم .. انا بحبك كتير .. بترجاكي فهميني

نسيم: شو بدي افهم ؟!!

رامي: نسيم نحنا عيلة كبيرة .. وامي ما كانت رح توافق عليكي غير بالوضع يلي خبرتا عليه

كنت متاملة يكون جايي ليعتزر مني او ليغير رايو .. ووقت قلي هيك حسيت بجبال من جواتي عم تنهار قدامي .. ما قدرت جاوبو .. تبسمت بوشو ومشيت بسرعة قبل ليشوف دمعتي ..

رجع ركض ورايي ومسكني ..

رامي: نسيم بكفي .. لا تعملي متل لصغار

نسيم: (بعصبية) لك انت يلي بكفييي .. بكفيييي .. انت انسان نفسية ومريض .. ومانك بوعيك .. انا ما فيني ابني حياتي ع اساس الكزب
بدك ياني بتتقبلني بكلشي فيني وما بتخجل مني .. غير هيك ما فيني ارتبط فيك .. وخلص .. ما عاد في شي يتناقش .. بكفي

تركتو مصدوم من عصبيتي يلي لاول مرة بشوفا ومشيت وانا مقررة انو خلص .. لهون وبكفي ...

ايام مشيت وقلبي وجعو ما عم يطيب .. لوقت اجا هداك اليوم وتبدل الاستاز بالمعهد .. واجا الاستاز مروان ..

مروان: اليوم بدي من كل واحد فيكن تصميم .. بدي بكرة يكون جاهز وبناءا عليه رح اختار يلي رح يشتغل معي ورح ادعمو شخصيا ليكون شغل خاص في

وقت قال هيك حسيت بروح تحدي كبيرة .. رجعت ع البيت وبلشت اشتغل ع التصميم ..

وتاني نهار ..
مروان: هاد تصميمك ؟؟

نسيم: اي استاز .. تصميمي

مروان: انت شو بتشتغلي

نسيم: انا بشتغل بمعمل خياطة

مروان: نسيم انت موهبة نادرة .. تصميمك بياخد العقل

نسيم: بتشكرك كتير استاز

مروان: ما تتشكريني .. انت رح يكون الك مستقبل كبير بعالم التصميم .. وهلا ازا بتسمحيلي رح ابعت تصميمك لشركتي لينفذو فورا

ما بعرف شو هداك الشعور يلي شعرت فيه .. لاول مرة بحياتي بحس بفرحة صادقة من قلبي .. فرحة النجاح

بلشت شغل مع مروان بشركتو ..
مروان الشب يلي عمرو 30 سنة .. طويل واسمر وبعيون خضر ..

ويلي حبني من كل قلبو .. حب شخصيتي وطموحي قبل ليحب شكلي ..

مشت الايام وبلشت حس براحة كبيرة معو .. حسو قريب مني وبيفهمني منيح ..

مروان: نسيم .. بصراحة .. انا حابب اتعرف ع اهلك

نسيم: هههههه .. بتعرفا لاختي لصغيرة مو

مروان: ماسة العسل .. اي بعرفا

نسيم: هاي هي كل اهلي

مروان: كيف يعني

بلشت احكيلو بقصة حياتي كلا .. ما خبيت علي شي .. وهو عم يطلع فيني ومصدوم ..

نسيم: وهاي هي نسيم وعيلتا

مروان: يلي بشوفك مستحيل يشك للحظة انو مارقة بهيك ظروف

نسيم : ههههههه

مروان: ما زال هيك .. لكن رح اطلب ايدك منك

انصدمت واطلعت فيه ..
مروان: شبك ... هههههه .. انا بصراحة معجب فيكي كتير من ايام المعهد .. وهلا زاد اعجابي فيكي اكتر .. ما فيني قلك هلا انو بحبك .. بس جد انا بحسك قريبة كتير مني وبرتاح كتير بشوفتك

نسيم: استاز مروان لا تتسرع .. وفكر منيح بكلشي قبل لتقرر .. يمكن اهلك ما يوافقو علي او .. يمكن تكتشف انو هاي نزوة

مروان: هههههههه .. انت لسا ما بتعرفيني ولا بتعرفي اهلي .. نحنا مرينا بظروف اقسى من الصوان وعانينا من الفقر سنين طويلة .. بس امي كانت موهوبة متلك وبلشت شغلا ع البسيط .. وكانت تتنقل بين لبيوت وتاخد قياسات الستات .. وانا اخدت هالموهبة عنا وبنيت حالي ورفعت عيلتي .. لهيك ظروفك مو جديدة علي

نسيم: ما بعرف شو بدي قلك

مروان: لا تقولي شي .. كل يلي رح اطلبو منك تشيلي رامي من قلبك .. وتسلميني ياه

نسيم: رامي شلتو من زمان وما الو مكان بحياتي غير معروفو يلي قدملي ياه

مروان: لكن ع بركة الله

نسيم: استاز مروان .. الدنيا قسيت علي كتير وبصراحة خلت ثقتي بالناس قليلة .. ما عم عمم ولا عم اتهمك بشي .. انت انسان ناجح وواضح .. وهالشي بخليني ارتحلك كتير .. بس .. بس .. يعني بقصد انا حابة ابني حالي قبل .. بدي كمل دراستي بالمعهد وحاول يكون الي شغل خاص فيني .. وهالفترة بتكون انت محدد مشاعرك اتجاهي ومقرر .. وشو ما كان القرار وقتا ما رح ازعل

مروان: كل يوم عن يوم عم تشديني لالك اكتر وعم بعجب بشخصيتك اكتر .. رح انطرك .. بس بتمنى تسمحيلي كون حدك وساندك

نسيم: بتشكرك كتير

*بعد سنتين*

بالفيلا لكبيرة رامي وامو سهرانين .. ورامي مشغول بجوالو ..

النشرة الفنية .. يتقدم معرض ماسة للابسة الستاتية بدعوتكم لحضور العرض الاول للمصممة نسيم ..

ام رامي: لك رامي .. هاي مو نسيم ما غيرا

رفع رامي راسو واطلع بالتلفزيون وانصدم وقت شاف صورتها .. .يلي صدمو بزيادة هو عنوان المعرض ويلي هو نفس عنوان بيتها ..

رامي: هاا .. يمكن امي .. ما بعرف

ام رامي: والله ما بعرف ليش تركتا لهالبنت .. بنت كاملة مكملة وليكا ناجحة بحياتا .. ليش لتتركا

رامي: امي انا نعست رح روح نام

دخل رامي لغرفتو ومسك جوالو ودقلا لنسيم ..

رامي: فتحي الخط نسيم .. فتحيييي

نسيم (الثاني عشر )

نسيم ومروان وماسة بمعرضها لنسيم .. ويلي هو بيتا القديم لصغير يلي حولتو بافكارها لجنة ..

مروان: بصراحة ما تخيلت البيت لصغير يتحول لمعرض هيك .. جد انت فنانة .. خرجك تصيري كمان مصممة ديكور

نسيم: ههههههههه

ماسة: لااا هاي شغلتي انا .. نسيم مصممة ازياء وانا مصممة ديكور او .. او. .. مهندسة معمارية

نزلت نسيم ع ركبا وضمتا لماسة .. (احلا مهندسة يا روحي )

دق جوالا لنسيم .. طالعتو من شنتتا واطلعت بالرقم .. تفاجات كتير وتبسمت .. ورجعتو ع شنتتا ..

مروان: شبك .. ليش ما رديتي

نسيم: الظاهر الاعلان وصل لناس كتير هههههه

مروان: مين ؟؟

نسيم: رامي

شعلت عيونو لمروان نار .. (شو بدو هلا )

نسيم: انسى .. خلينا نكفي شغلنا

*تاني نهار *
ناس كتير وتجمعات كبيرة .. صحافة وكلو عيونو ع نسيم .. يلي كانت متل الملاك بفستانا المميز يلي صممتو بايديها خصوصي الها وبس ..

ع يمينا مروان عم يطلع فيها بفخر .. وع يسارا ماسة عم تطلع فيها ببراءة وعيون مليانة حب ..

ومن بعيد عيون مليانة قهر وندم عم تطلع فيها وتتحسر .. رامي

خلص المعرض وراحت الناس .. وبقي مروان مع نسيم وماسة ..
مروان: نسيم .. سمحيلي احتفل بيكي بهالليلة .. تفضلي

ومدلا ايدو لتمشي قدامو ..
مدت ايدا لماسة مسكتا ومشيو سوا .. ركبو بسيارتو وهي حاسة حالا عم تطير لعالم تاني .. حلمها واخيرا تحقق .. حلم الطفولة يلي كان شبه مستحيل حققتو .. وهلا حياتا عم تركز وتستقر ...

شغل مروان السيارة وقبل لتمشي السيارة طل رامي من شباك السيارة يلي حدا لنسيم ..

رامي: نسيم

تفاجات نسيم بوجودو بس حاولت تهدي حالا وترسم بسمة حلوة ع شفافا ..

نسيم: اهلا رامي

رامي: بدي حاكيكي

نسيم: بس انا مشغولة متل مو شايف .. بعتزر منك

ولفت وشا عنو ..
مروان عم يطلع فيه بعيون شعلانة نار وعم يحاول يهدي حالو قدر الامكان ..

خبط رامي خبطات قوية ع شباك السيارة وهو معصب ...
رامي: نسيم نزلي عم قلك .. نزلي

فتح مروان الباب ونزل لعندو وقلبو عم يغلى غلي .. قرب منو وضربو بنص وشو .. وتشابكو تنيناتن ..

شهقت نسيم وحطت ايدا ع تما ونزلت ركض من السيارة ..

نسيم: بكفييي

ووقفت بيناتن واطلعت بمروان .. (مروان لو سمحت .. بس دقيقة وحدة )

اطلع فيها مروان وهو عم يتنفس بغضب .. وهي تطلع فيه وتترجاه بعيونها ..

سحب نفس قوي وغمض عيونو .. (ماشي .. ليكني قدام السيارة )

لفت وشا ع رامي يلي كان يتبسم بقهر ومسخرة ..
نسيم: (بعصبية) شو زكرك في هلا .. شوو .. شو بدك في .. فهمني شوو

رامي: لك انا بحبك .. من وقت تركتك ما ارتحت ابدا

تبسمت بقهر واطلعت بعيونو . .. (وهلا لتزكرتني .. هلا؟؟ .. لاخر مرة رح قلك .. بعد عني وعن حياتي .. كلشي بينا خلص قبل ليبلش)

ومشت لتركب بالسيارة ..

رامي: ويا ترى خبرتي لحبيب القلب لجديد عن الست نانا

تمسمرت مكانا وهي مصدومة من موقفو الندل .. سكتو تلاتن لفترة .. لوقت مشى مروان لعندو وبكل هدوء .. (سمعني يا .. رامي .. كلشي .. كلشي بخصا لنسيم انا بعرفو وبكل تفاصيلو .. فلا اتعب حالك حبيب .. بالازن منك .. عنا احتفال مميز الليلة وما رح نترك واحد متلك ينزعو )

ومشى بكل هدوء وركب بالسيارة ومشى ورامي واقف مكانو من غير ولا كلمة ..

طول الطريق ونسيم ساكتة وسرحانة بعيون دبلانة وحزينة .. ومروان كل شوي يطلع فيها بطرف عينو .. لوقت وصلو للمطعم ..

مروان: تفضلو يا انساتي

نزلت ماسة وبقيت نسيم بالسيارة ..

نسيم: مروان .. بتشكرك ع كلشي .. من كل قلبي بتشكرك

مروان: ههههههه بعد بكير ع الشكر .. نزلي لقلك

دخلو المطعم ويلي هو من افخم مطاعم البلد .. استقبلن الجرسون ومشاهن لطاولتن ..

الجرسون: تفضلو

اطلعت نسيم بمروان .. (وين ؟؟؟ )

كانت قرنة باخر المطعم ومغطاية بستارة حمرا ..
تبسم مروان واشرلا .. (تفضلي )

بعد لستارة ودخلو .. شهقت ماسة وحطت اديها التنتين ع تما .. (واااو عمو مروااان )

كانت الارض كلا ورد جوري وشموع ملونة .. وطاولة عليها فاز صغير وورود حمرا وشمعدان .. وبلالين معلقة بالسقف ..

اطلعت نسيم بمروان ودمعو عيونا .. (ما كان في داعي تعزب حالك ... شكرا لالك )

(انا يلي بدي اتشكرك .. نسيم .. انت دخلتيني لحياة روحانية .. حياة تانية ما كنت متخيل انو هي موجودة ... طيبة قلبك .. اصرارك ع النجاح .. حس الامومة والمسؤولية اتجاه اختك .. كل هالاشياء عم تشدني لالك وتدخلني لعالم روحاني اسمو نسيم .. نسيم وبس )

فتح جاكيتو وطلع منو علبة صغيرة .. فتحا وطالع خاتم الماس ..
(بتمنى ما تكوني نسيتي وعدك لالي .. وتقبلي فيني)

نزلو دموعا من كلماتو وتصرفو .. وتصفنت فيه ما عم تقدر تجاوب ..

مروان: لكن رح اسال الانسة ماسة وما رح اسالك

لف وشو لعند ماسة ونسيم عم تضحك من بين دموعا ..
(رح اطلب ايد الانسة نسيم منك .. يا ترى انت موافقة )

نطت ماسة لفوق ببراءة طفولة وصفقت بايدا .. (طبعا موافقة طبعاا)

قرب مروان من نسيم .. مسك ايدا ولبسا الخاتم وباس ايدا وجبهتها..

وهي ما عم تقدر تثبت دموعا ..

كل شريط حياتها مر من قداما بهاللحظة .. من نسيم لصغيرة يلي عم تنط بجنينة الفيلة .. لموت ابوها .. لتركن الفيلا .. لبيتن لصغير .. لموت اما .. للشب يلي حاول يعتدي عليها .. للست نانا وجحيما .. لرامي .. لكسرة قلبا برامي .. للخالة رجاء ومشغلها ..
للمعهد ولمروان ..

مروان ... يلي كان راحتها من بعد سنين عذاب ووجع .. لهالخاتم الالماس يلي عم يلمع بايدا ..

ومرت السنين ونشال الشوك ونزرع مكانو ورود .. ونسيم من نجاح لنجاح اكبر ..
ومروان حدا وداعما لوقت صار هو نفسها يلي عم تتنفسو وراحتها وكلشي بحياتها ..

ماسة لصغيرة .. يلي تربت ع اديها اليوم واقفة قداما ع منصة التخرج .. بروبها الاسود وعم تلوحلا بايدا ..

عريف الحفل: ماسة .. الاولى ع دفعة الهندسة .. رح قدملك وردة وبدي ياكي تهديها لشخص من الحضور

مسكت ماسة الوردة بيمينا والميكروفون بشمالا .. قربتو ع تما وايدا عم ترجف وما قدرت تحكي بسبب دموعا يلي غلبتا قدام الكل ..

ماسة: (بصوت مبحوح) لو بقدملا كل ورود العالم وكل الماسو مستحيل اوفيها حقا .. الانسانة يلي كانت لالي الام والاب والاخت ولرفيقة .. يلي ما تركت ايدي ولو للحظة وحدة ودعمتني وساندتني بكل خطوة من حياتي .. اختي وامي حبيبة قلبي نسيم

نسيم عم تطلع فيها ومانا قدرانة تشوفا منيح بسبب لدموع .. مسحتن بعصبية لانو ما بدا شي يمنعا من شوفة ماسة ونجاحها..

مشت نسيم للمسرح بخطوات حستا بطيئة كتير وكانو هالمسافة بينا وبين اختا ما عم تخلص... ضمتا لماسة وفرطو تنيناتن بالبكي ..

والجمهور كلو عم يصفر ويزقف ويطلع ع المعجزة يلي واقفة قدامن .. يلي حققت حلما وحلم اختا وصانت حالا وصانت اختا .. المعجزة نسيم يلي من حلم صغير بنت مستقبل كبير ..

انتهت

بقلم امل احمد

كل انسان بيواجه مشاكل بحياتو .. ما في شخص بلا مشاكل .. والفرق بين الانسان الناجح والانسان الفاشل هو طريقة مواجهة هالمشاكل .. شو ما صار ما لازم نياس ونسلم .. بدنا نحارب ونحارب ونحارب وبعد كل سقوط بدنا نوقف ونرجع اقوى لنكفي حياتنا ولنحقق حلمنا .. وما بدنا نسمح لايا شي يوقف بوش هالحلم ..