حياة بلا حياة

كانت ورا الباب عم تسمعن وعيونا كلن دموع .. شي من جوا عم يحرقا .. الايام عم تمشي وهي لساتا مطرحا .. ومو طالع بئيدا شي..

ام شمس: اي قلتلكن مليووون مرة ما حزوجا .. رح خليا عندي لتخدمني وتساعدني

سحبت حالا شمس ودموعا بلشو يهرو ودخلت ع غرفتا وبلشت ع بكي ..

شمس: يا ربي شو الزنب يلي ازنبتو انا .. بشو غلطت يا ربي .. انت يلي اخدت اخواتي لتنين .. انا ليش لاتعاقب ع هالشي ليييييش .. يااا ربي خدني وريحني .. ياااا رب

قصتي بلشت من عند امي (شمس).. يلي ربيت بضيعة مع اما وابوها واخواتا الصبيان لتنين واخواتا البنات الاربعة ..

اما جابت قبل منا صبي .. بس هالصبي ما عاش .. ومن بعدا اجت امي .. ومن بعد امي اجا كمان صبي .. وكمان ما عاش ..

وهاد كان سبب تعتيرا لامي وعزابا بكل حياتا .. تحاسبت وتعاقبت ع شي مالا فيه زنب .. عاشت منبوذة ومظلومة من اما ..

الايام عم تمر وهي عم تكبر واما رافضة بانو تزوجا .. وهي عم تخدما وتخدم ابوها المريض واخواتا الشباب وخواتا البنات وولادن من تم ساكت ..

بقيت ع هالحالة ليوم اما ارتمت بالفراش .. وزادت حملا حمل ..

دخلت شمس ع الغرفة وصنية الاكل بئيدا .. حطتا حد اما ع التخت ورفعتلا راسا وسندتو بالمخدة لتطعميها ..
اطلعت اما فيها ومسكتلا ايدا وباستا ..

ام شمس: سامحيني يا امي .. سامحيني يا قلبي .. انا ظلمتك وكتير كمان

كانت شمس عم تطلع باما وهي مانا مستوعبة .. ولا مصدقة يلي عم تشوفو .. مانا متزكرة ولا مرة اما باستا فيها ..
لك وهاي اول مرة بتسمع كلمة منيحة من اما ..

ام شمس: انا خلص يا شمس .. باينتو عمري خلص .. بترجاكي يا امي سامحيني

رمت حالا شمس بحضن اما ونزلو دموعا ع تيابا لاما .. هالحضن يلي عاشت سنين وهي نفسا تحس فيه وبدفاه .. كانت عم تشوف اخواتا قديش بيرتاحو وقت تضمن اما وتتمنى تجي هاللحظة وتكون بمطرحهن ..

مسحت اما ع شعرا وهي عم تبكي ورفعتلا راسا ..
(فتحي خزانتي وعطيني علبة الدهب يا عمري)

مسحت شمس دموعا واطلعت باما .. (حاضر امي)

جابت علبة الدهب وعطتا لاما .. فتحتا اما وعطتا كلشي فيها ..

ام شمس: بعرف هالدهب ما في يعوضك عن شي .. ولا في يمحي الظلم يلي نظلمتيه .. بس ما في حدا احق منك فيه .. خديه يا امي لالك ولا تفرطي فيه لو شو ما صار

اخدت شمس الدهبات من اما وباست ايدا وهي لساتا عم تبكي ..

ام شمس: الله يرضى عليكي يا بنتي ويعوضك عن كلشي مضى

شمس: الله يخليلي ياكي يا امي

حكت هالكلمة ورجعت حطت حالا بحضنا لاما .. كانت بحاجة لهالحضن اكتر من ايا شي تاني .. لاول مرة بحياتا بتحس بالدفا .. كل حياتا كانت برد .. برد ودموع ووجع وقهر ..
استرخت وهي بحضنا لاما وما عرفت كيف غفيت بحضنا .. ووقت فاقت حست ببرد كتير .. رفعت راسا واطلعت باما .. يلي كان جسما كلو ازرق وبارد كتير ..
شمس: امي .. امي .. امييييييييييييي .. لااااا لا تروحي يا امي ... بترجاكي لا تحرميني من حضنك يا امي .. بترجاكي لا تحرميني دفااااكي .. اميييي يا امييي .. ااااخ يا ربي ساعدني .. يااا ربي وقف معي يا الله

وهيك راحت اما لشمس وصفيت شمس لحالا بهالبيت مع اخواتا الشباب وابوها الخرفان ..
حياة (الجزء الثاني)

حست شمس بفراغ كبير من بعدا لاما .. مع كل الظلم يلي ظلمتا اياه الا انها استفقدتا ..

كانت قاعدة لحالا بغرفتا وعم تتزكر بهداك اليوم يلي حطت حالا بحضن اما .. حست بدفا حضن اما عم يتسلل بعظاما .. غمضت عيونا المليانة دموع وضمت اديها ع صدرا بمحاولة منها ما تخلي هالدفا يهرب منها .. ريحة دفاها لاما لساتا بانفا ..

شمس: (تبكي) شتقتلك يا امي شتقتلك .. ليش حرمتيني حضنك ودفاكي طول هالعمر .. ليش يا امي ليش .. ياا رب سامحها وتغمدها برحمتك يا الله

ندق الباب .. مسحت دموعا بسرعة واطلعت ع الباب يلي انفتح ودخل اخوها لكبير علي ..

علي: شو عم تعملي اختي

شمس: ولاشي اخي

قعد علي حدا .. شلبك اديه ببعضن وهو عم يطلع بالارض .. (اختي .. بصراحة ومن غير مقدمات ..في رجال متقدملك .. فشو رايك)

سرحت شمس بخيالا ورجعت لذكرياتا مع اما وقت كان يتقدملا شي رجال .. تبسمت واطلعت باخوها ..

شمس: هلأ اخي ؟!!

علي: اي اختي هلأ .. امك صرلا سنة ميتة .. شو المانع

شمس: اخي انا ع بواب التلاتين

علي: اي لهيك لازم تقبلي .. هاي فرصة اجتك من ربك لا ترفضيها

شمس: والله ما بعرف اخي .. انت شو رايك

علي: انا برايي ما تفوتي هالفرصة لانو ما بعرف ازا رح تتكرر .. الرجال عمرو 52 سنة .. يعني مو كتير كبير بالنسبة لعمرك

شمس: يعني متزوج

علي: اي اختي متزوج .. وعندو احفاد كمان

شمس: ما بعرف اخي .. عميل المناسب

علي: الله يرضى عليكي اختي .. لكن هلأ رح دقلو وقلو يتفضل المسا

هزت شمس براسا وما حكت شي ..
طلع علي من الغرفة وهي بلشت تبكي .. بس كان في امل جواتا .. امل انو تطلع من حياتا يلي عايشتا .. عايشة بس لخدمة اخواتا وولادن .. وخدمة ابوها الخرفان ..

وبوقت المسا ندق الباب وكان برهوم هو يلي عم يدق .. ستقبلو علي ودخلو ع الصالون واجا خبرا لشمس يلي كانت عم تجهز حالا لاستقبالو ..

طلعت شمس من غرفتا وراحت ع المطبخ جهزت القهوة ودخلت لعندن ع الصالون ..

(السلام عليكم )

برهوم : وعليكم السلام

رد السلام وهو عم يطع فيها .. اجت عينا بعينو .. رجف قلبا وحست بغصة نغرست بقلبا .. شالت عيونا عنو بسرعة وقدمت القهوة ورجعت ع غرفتها وهي عم ترجف ..

بعد بشوي اجا علي لعندا ..
علي: شبك اختي .. ليش ما قعدتي

شمس: اخي ما ارتحتلو .. قلبي وجعني وقت شفتو

تبسم علي واطلع فيها ..

علي: ههههه شبك اختي .. شي طبيعي لسا ما بتعرفي
شمس: بس اخي في شي بوشو ما بريح .. مانو مريح ابدا

علي: سمعي اختي .. انت حرة انا ما رح اجبرك ع شي .. بس انت حابة حياتك هاي .. خدمة ابي الخرفان واخواتي وولادن .. رح تقضي عمرك بالخدمة .. هيك بدك .. شو ما كان بضل وضعك احسن بعد زواجك .. ستغفري اختي هاد شغل شيطان .. ستغفري الله يرضى عليكي

حطت شمس ايدا ع قلبا وغمضت عيونا .. (ياا رب)

علي: الله يرضى عليكي اختي .. انا سابقك

شمس: ماشي اخي ماشي

طلع علي ولحقتو شمس .. قعدو سوا .. واتفقو ع كلشي بنفس القعدة .. برهوم كان متلهف وبدو اياها لشمس .. وشمس قلبا كان واجعها ومانا طايقتو لبرهوم ..

اتفقو تاني نهار يكتبو كتابن وبعد اسبوع يتم الزواج .. وتم الامر .. وتزوجو بعد باسبوع .. وبلشت معاناة شمس .. عاشت اسوا ايام حياتا .. ما في صفة سيئة الا وكانت بهالرجال ..

ضرب وذل وهانة .. يتركا بالبيت بالايام والاسابيع بلا اكل ولا شرب ولا شي وما يسال فيها ابدا ..

شمس: لك يا رجال انا والله عم خاف لحالي .. ماني متعودة ابقا لحالي .. لك والله روحي رح تطق

برهوم: اي وتطق .. شو اعملك

شمس: لا حول ولا قوة الا بالله

تحملت منو كتير وكل ما كانت تقرر انو خلص لازم تخبر اخواتا وتتركو تتزكر حياتا الماضية .. وتتزكر قديش نفسا بولد تضمو لصدرا ويعوضها سنينها الكئيبة ..

حياة (الجزء الثالث)

مشت حياتا لشمس وهي عم تواسي حالا بانو بكرة وقت يجيها ولد بتنسى كلشي وبتعيش لالو ..

برهوم: شمس .. شو بدي قلك

شمس: اي

برهوم: دهباتك وينن

شمس: ايا دهبات ؟؟

برهوم: لك يلي من امك

شمس: وشو بدك فيهن

برهوم: لجبلك اكل تاكلي .. لك انا طول لنهار عم اشتغل وماني ملحق ع شي .. والدين عم يزيد والناس عم يطالبوني

شمس: اي بس هالدهبات مستحيل فرط فيهن .. بكفي اخدت الدبلة والخاتم يلي جبتلي ياهن .. هدول لالي وذكرى من امي

برهوم: ذكرى من امك ؟؟ اي تعي لهون .. تعيييي

شحطا من شعرا وبلش ضرب فيها ..

شمس: لك ااااخ .. لك بكفييييي .. بكفييييي

ضربا لكسرلا جسما وما قدرت تتحرك من مطرحا .. ونكت خزانتا نكت للقيهون ..

برهوم: هههههه الله يرحمك يا حماتي

اخدن واطلع بشمس .. ( يسلمووو حبي شموسة يسلمووووو ههههههه)

وتركا بدموعا ووجع قلبا وطلع من البيت .. وكمان هالمرة سكتت وما حكت شي لانو اكتشفت بانو هي حامل .. وقتا نسيت كلشي وما هما شي ..

ومشت ايام حملا .. وبيوم رجع برهوم ع البيت بعد غياب اسبوع كامل ..

شمس: واخيرا تزكرت انو عندك بيت .. واخيرااا

برهوم: ششششششش .. هلا برجع هااا سكتيي

شمس: اي رجااع .. بس قبلا عطيني دهباتي لاحسن اشتري اكل لاطعم ابنك يلي ببطني

برهوم: شو امرتي ست شمس .. دهباتك .. باينتك ما بتتربي غير بقتلة موو

شمس: برهوم انا مليييت منك ومن حياتك .. لك انا حامل وبدي تغذية .. لك خاف ربك .. ودهباتي بدي ياهن برهوم .. بدي ياااهن

برهوم: اي تعي لاعطيكي ياهن

مسكا وبلش ضرب فيها وهي عم تصرخ ..

برهوم: اي نقلعي من هون ولي ورجعي لعند ابوكي الخرفان غيريلو وغسليلو .. انقلعي

شمس: حسبيا الله ونعم الوكيل فيك .. الله لا يسامحك .. الله ينتقم منك

ورجعت شمس ع بيت اهلا وخبرت علي بكلشي ..

علي: كل هالشي كنت فيه وما خبرتيني

شمس: (تبكي) ...........

علي: شبك سكتي .. ايمت كنت رح تخبريني وقت يدبحك .. وكيف بتفرطي بدهباتك ااه

شمس: والله يا اخي اخدن بالغصب .. ضربني لكسرني ومن بعدا اخدن وطلع من البيت

علي: الله يكسر اديه .. لك هاد واحد حيوان .. انا بورجيه .. رح نرفع عليه قضية طلاق ورح يرجع دهباتك بالغصب هالكلب

بقيت شمس عند اخوها شهر كامل وبرهوم ما اتصل ولا سال فيها .. وبعد هالشهر صارت تنزل ع الحكمة لتمشي وراق الطلاق ..

وهو وقت خبر بانو هي يلي عم تروح ع المحكمة بلش يترصدلا ويتودللا وهي كل مرة تصدو .. لحتى بيوم تسكرت الدنيا بوشا وما لقيت الها مهرب من الرجعة لعندو ..

بوقتا كانت بالمحكمة وخبرا القاضي بانو ازا تم الطلاق ما حيطلعلا شي لانو هي يلي طالبت بالطلاق .. وبلش برهوم يتوددلا ..

(انا كنت غبي وقت تركتك تروحي مني .. انا بحبك يا شمس .. انت احلا شي بحياتي .. ودهباتك رح رجعن كلن .. سمعي مني ورجعي معي ازا مو كرمالي كرمال ابنا يلي ببطنك .. حرام تعيشي بلا اب )

(طيب واهلي .. برجع لعند اهلي وانت بتجي وبتخبرن انك رح ترجعني)

(لك لشو هالحكي هاد .. تعي معي هلا .. بنروح ع بيت خالي وبعدا بروح انا بستاجر بيت وبرجع باخدك بنروح سوا لعند اهلك وبعتزر منن وبنرجع ع بيتنا )

(والله ماني عرفانة )

(شو مانك عرفانة .. مانك واثقة في )

(لا مو هيك .. بس خايفة اهلي يزعلو مني)

(لا تخافي انا براضيهن )

(ماشي .. بروح معك بس لا تتاخر )

(ما حتاخر .. يالا امشي )

راحت معو ع بيت خالو .. فتح الباب خالو .. رحب فيهن ودخلن ..

برهوم: انت خليكي هون لارجع ماشي .. يالا بالازن منك خالي

خالو: الله معك

حياة (الجزء الرابع)

بقيت شمس عند بيت خالو .. ومضت اول ساعة والتانية والتالتة ولسا ما رجع .. بلشت تقلق ..

شمس: كتير تاخر برهوم

مرت خالو : الغايب عزرو معو يا بنتي .. لا تقلقي يمكن عم يخلص بامور البيت

.......................................
«بيت اهلا»
علي: لك شمس كتير تاخرت .. بس ما يكون صاير معا شي

اشرف: قولتك بتكون تصالحت مع برهوم وهربت لعندو

علي: ما بتوقع تعملا

اشرف: وهلا شو رح نعمل

علي: رح روح دور عليها .. رح شوف برهوم واسالو عنها

اشرف: رح اجي معك

*طبعا بهديك الايام ما كان في اتصالات ولا موبايلات *
راحو علي واشرف لعند برهوم ع بيتو التاني ..

برهوم: هلا بالشباب .. خير شو جابكن

علي: وينا شمس

برهوم: نعم !! عم تسالني ؟ شو بدو يعرفني انا وينا

علي: يعني ما،شفتا بالمحكمة

برهوم: لا ما حضرت ولا شفتا

علي: وين بدا تكون راحت

برهوم: اي وانا شو بعرفني

تركو ورجعو ع بيتن وهني جانين ..

اشرف: والله لادبحا باديي .. لك مع مين هربت .. مع مييين قليلة الشرف
.........................
ببيت خالو كانت شمس عم تعد الثواني لرجعة برهوم وعتمت الدنيي وما كان يرجع برهوم .. ولبعد اسبوع لرجع برهوم ..

شمس: واخيرااا .. لك ليش تاخرت .. وين تركتني ورحت

برهوم: تركيها ع الله .. صارت مشكلة كبيرة معي وانحبست وما قدرت لا اجي ولا وصلك خبر .. لليوم لقدرت اجي

شمس: يالا بسيطة .. بس اهلي اكيد هلا غليان قلبن علي .. بتعرفني لا بقرا ولا بكتب ما حسنت روح لعندن

برهوم: اي اهلك قالبين الدنيا عليكي .. وعم يقولو انك هربانة من عندن وبدن يدبحوكي .. هلا ازا بعتك لعندن بتصير مشكلة .. انسي ما رح اخدك لعندن

شمس: يا ربي ع هالمصيبة .. طيب انت بتحكيلن يا برهوم

برهوم: اي اي رح خبرن .. بس مو هلا .. تعي لنرجع ع بيتنا هلا .. وبعدين بحلا

شمس: ماشي يالا

اخدا ع بيت اجار جديد .. وبقي معا بالبيت وما يتركا ابدا ع غير العادة لبعد اربع ايام ..

برهوم: شمس شو بدي قلك

شمس: اي

برهوم: هلا رح يجي صهري لعنا

شمس: جد .. اي اهلا وسهلا

برهوم: الو علي دين كبير وما معي مصاري لسدو .. وبدي مساعدتك

شمس: اي .. وانا كيف رح ساعدك .. دهباتي واخدتن .. كيف رح ساعدك

اطلع فيها وهو عم يتبسم ومسح وشا بئيدو ..

برهوم: فيكي تساعديني بهالوش والجسم الحلو

نصدمت شمس من طريقة حكيو واطلعت فيه ..

(ما فهمت )

(قومي هلا لبسي شي قميص نوم يكون مكشوف كلو .. ورتبي حالك .. ووقت يجي عملي معو اللازم .. انا هلا بطلع من البيت لاخليلكن الجو .. وانتبهي عليه منيح .. لانو بحب النسوان الحركات )

بلش جسما لشمس يرجف ..

شمس: لك تفوووووووو عليك من بين لرجال .. لك لهون وصلت معك يا قليل الشرف .. يا عديم النخوة .. لك الله يلعنك

برهوم: سمعي وليييي ازا ما عملتي يلي بقولو رح ادفنك بارضك .. هلا اهل ما عاد الك خللللص .. ورح خبرن بانو كنت هربانة مع رجال .. ورح يدبحوكي باديهن .. نفزي يلي بقولو من غير ولا كلمة

شمس: فشششرت .. والله لو بدن يقطعوني وانا عايشة ما رح اعملا

برهوم: لكن تعي لهوون

وبلش يضرب فيها متل الوحش .. هربت منو لغرفة النوم .. وهي عم تبكي وترجف .. اطلعت ع الكومدينة كان مقص لخياطة عليها .. هجم برهوم عليها ومسكا من رقبتا وهو عم يصرخ بوشا ..

( رح موتك يا كلبة .. رح موتك )

مسكت المقص وضربتو فيه ع عينو . ..

(اااخ .. لك شو عملتي .. شو عملتي)

بلش الدم يعبي الغرفة وجدرانة .. وهي وقت شافت هالشوفة هربت من البيت ... كانت خايفة كتير وعم تبكي ..

(وين روح يا ربي .. وين)

وما لقيت قداما غير بيت الجيران .. دقت عليهن وفتحولا ..

(دخيلك يا اخي دخيلك .. خبيني عندك رح يدبحني)

الجار: تفضلي اختي تفضلي

حياة (الجزء الخامس)

بعد ما ضربتو شمس بالمقص .. صار يمشي بالبيت وعم يصرخ متل التور .. مانو قدران يشوف شي والوجع عم ياكلو اكل .. وركض بسرعة لبرا البيت واخد تكسي وراح ع المشفى وتعالج ..

بهالوقت هاد شمس كانت عند الجيران بحالة صدمة وهستيريا ..
وقت سمعت صوت صراخو صار جسما كلو يرجف وحطت اديها ع ادنيها وبلشت ع بكي ..

(لك الله ياخدك .. لك سكوووت .. سكوووت يا حيوااان .. لك الله ياخدك ... ياااا ربيييي)

الجارة: اهدي يا بنتي اهدي .. منى بنتي جيبي كاسة ميت

ركضت البنت ع المطبخ وجابت مي .. شربت شمس وايدا لساتا عم تنتفض .. ووقت هديت شوي ..

الجارة: شو صاير يا بنتي .. شبو زوجك

زادت شمس بالبكي وخبرتن كلشي صار معها ..

الجار: الله يلعنو لهالكلب .. الله يحميكي يا اختي

الجارة : ما قصرتي فيه .. خرجو

شمس: بترجاكن مالي حدا .. تركوني عندكن .. بترجاكن ما بدي ارجع عندو

الجار: ما رح رجعك لعندو .. بس ما فيكي تبقي هون .. احتمال كبير يشوفك وما رح نسلم منو ومن شرو .. تركيني فكر .. ولبكرة بكون لقيت حل

شمس: يا ربي ساعدني ومشيها ع خير

الجارة: وكلي ربك حبيبتي

هالليلة كانت كتير صعبة ع شمس .. ما قدرت تنام .. ضلت عم تصلي وتقرا قران لوش الصبح .. وقت فاقو اهل البيت ..
قعدو سوا ليفطرو .. ما قدرت تاكل شي ..

الجارة: كلي اختي .. انت حامل ما بيسوالك هيك

شمس: والله ماني قدرانة

الجار: فطري .. وهلا رح اخدك عند قابلة بعرفا وهي بتساعدك

شمس: لشو القابلة

الجار: بتشتغلي عندا لوقت تولدي

شمس: ورح تقبل ؟

الجار: ما بتوقع ترفض

خلصو فطورن وطلعو سوا .. غطت شمس ع وشا لحتى ما حدا يعرفا ..

..........................
بالهوقت هاد كان برهوم قالب الدنيا ع شمس .. راح لعند اهلا ليسال عنا ..

اشرف: لا مو هون .. ليش هي وين كانت

برهوم : اختكن خانتني .. والولد يلي ببطنا مو ابني .. خانتني مع صهري .. دخلتو لبيتي ونيمتو بفراشي

علي: لك شو عم تحكي ولااااا

برهوم: لا تصرخ وتعمل مراجل علي .. روح تمرجل ع اختك

علي: اي نحنا اختنا ماتتت .. ما النا اخت اسما شمس وانقلع من هون ما بدي شوف وشك

............................
وصلت شمس مع الجار والجارة لعند القابلة وخبروها كلشي ..

القابلة (رضية): ماشي يا بنتي .. لا تاكلي هم .. انا كمان كنت بحاجة لمين يساعدني

شمس: اي بس ... يعني بالنسبة للبيات .. متل ما قلتلك ما الي مكان رحلو

رضية: ولا يهمك .. بتنامي هون بهالغرفة

شمس: ربي يجبر بخاطرك ويسعدك يا رب

وهيك بقيت شمس عند رضية عم تساعدا وتشتغل معا .. لوقت اجا يوم ولادتها

ومن بعد ولادتها تلبكت كتير شمس بالولد (محمد).. ما كان عم يهدا ابدا .. طول الوقت ع بكي ونق وصراخ ..

رضية: بصراحة يا شمس .. هيك ما بيمشي الحال .. انت ما عاد شتغلتي شي وكمان ابنك ما عم يسكت وانا عم يجيني زباين .. هيك رح يطفشو

شمس: والله خجلانة منك .. بس متل مو شايفة .. ما عم بقدر اعمل شي

رضية: سمعي .. ما بدي تزعلي مني .. بس انا شفتلك جماعة لتروحي تشتغلي عندن

شمستبكي)......... .

رضية: ليش عم تبكي .. الجماعة اكابر وكتير محترمين .. هني دكتور ومرتو يلي كمان دكتورة .. رح ترتاحي معن لا تقلقي

شمس: ان شاء الله .. ربي يجزيكي الخير .. معروفك ما رح انساه بحياتي (تبكي)

قربت رضية منها ومسحتلا دموعا وضمتها ..
(والله مو هاين علي فيكي .. بس ما فيني خليكي هون )

شمس: ولا يهمك .. ربي يسعدك

ودعت شمس رضية وتشكرتا وانتقلت ع شغلا لجديد .. كانو عايشين بالبيت دكتور واختو (40 سنة ) ومرتو ..

بلشت شمس حياة جديدة كمان مرة .. كانت تشتغل طول لنهار .. بس اختو للدكتور كانت مانا طايقتا وعم تتعامل معا وهي قرفانة منا ومن ابنا .. وع طول تسمعا حكي بانو ما بتطيق لولاد .. وع طول عم تصرخ بوش ابنا ..

وبيوم حتاجت شمس لحليب لابنا .. لبست تيابا واجت لتخبر الدكتورة بهالشي .. بس الدكتورة ما كانت بالبيت ويلي كانت اختو للدكتور ..

شمس: من بعد ازنك انسة .. رح روح اشتري حليب لابني

(شو امرتي ؟؟.. ممنوع .. ما فيكي تطلعي )

(وليش ما فيني اطلع )

(عم تردي جواب بوشي .. مننوع وخلص )

(بس انا بحاجة الحليب لطعمي ابني )

(اي وانا ما بهمني ابنك .. ما في طلعة )

(العفو منك .. بس انا بهمني ابني .. وما رح استنى موافقتك لطعمي )

حكتلا هيك شمس ومشيت .. اطلعت فيها بعصبية وصرخت ..
(شمسسسسسس.. ازا طلعتي من هون ما الك رجعة )

(اي وانا ما رح ارجع .. بخاطرك)

لمت شمس تيابا وحملت ابنا وطلعت بكسرتا وحسرة قلبا ..

حياة (الجزء السادس)

طلعت شمس من عندن وهي لافة ابنها بحضنها وعم تمشي بالشوارع ومانا عارفة لوين تروح ..

شمس: (تبكي) يا ربي دخيلك .. ما ضل معي قوة لاتحمل اكتر .. تعبت يا ربي تعبت .. ما عاد فيني اتحمل اكتر

اطلعت بابنها يلي بلش يبكي ويصرخ ونزلت دموعا عليه ..

(شو رح اعمل فيه لهالولد .. من وين رح طعميه .. يا ربي ساعدني .. يا الله)

ضلت تمشي لوقت تعبت وما عادت قدرت توقف ع رجليها .. كان بوشا عمارة .. قعدت ع بابا لترتاح .. والناس شي داخل وشي طالع ..
وبعد بشوي مرو شلة شباب جامعيين ..

الشب: مرحبا اختي.. بيت مين بدك

شمس: ما حدا يا اخي .. انا بس عم ارتاح

الشب: باين عليكي تايهة .. فيني ساعدك

دمعو عيونا وضمت ابنها لصدرها ..
(انا تايهة عن كل الحياة .. انا ما الي حياة .. انا .. انا )

وما قدرت تكمل حكي وفرطت بالبكي ..

الشب: لا حول ولا قوة الا بالله .. اختي عتبريني اخوكي لصغير .. كيف فيني ساعدك

شمس: انا ما الي حدا ابدا .. ولا عندي مكان لرحلو .. ولا معي شغل .. ولا شي .. بدي مكان يسترني ويحميلي ابني ..

الشب: تعي اختي تعي معي

طلعت معو ع الشقة يلي ساكن فيها .. كانت شقة صغيرة غرفتين ومطبخ صغير وحمامات .. كان الشب ساكن فيها مع تلاتة من رفقاتو ..

الشب: تفضلي رتاحي بس لاجي

دخل الشب لعند رفقاتو وخبرن بانو رح يسكنها معهم .. وفهمن بانو هي ما الها حدا .. ومن بعدا رجع لعندها ..

الشب: اختي نحنا مجموعة شباب بندرس بالجامعة .. ورح نساعدك ع قد ما فينا .. مبدئيا نحنا رح انام بهالغرفة (واشرلا باصبعتو ع غرفة ).. وانت رح تنامي بالغرفة التانية (اشرلا ع غير غرفة )

شمس: رح تقل عليكن هيك

الشب: ولا يهمك .. نحنا اغلب وقتنا بالجامعة .. يعني ما رح تفرق كتير .. وبالمقابل انت عليكي بس تنضفيلنا غرفتنا وتطلخيلنا شي طبخة زاكية

شمس: الله يجزيك الخير يا اخي

وهيك شمس بلشت مرحلة ماساة ومعاناة جديدة بحياتها ..
عاشت مع هالشباب متل اختن .. وبعد باسبوع صارت تلف ع البيوت والعمارات تدور ع شغل .. وصارت تتنقل من بيت لبيت ومن دراج لدراج لتنضفن وتاخد بالمقابل كام ليرة لتقوت ابنها لصغير ..

وما وقفت معها لهون .. لسا ضرباتا بهالحياة ما خلصت ..
بيوم كانت رايحة ع شغلا .. وقفت الميكرو وطلعت فيه .. ما كان فيه حدا غيرا لانو الوقت كان بكير كتير ..
السواق: شو يا حلوة ع وين

اطلعت شمس فيه بقرف .. وسحبت نفس وهدت اعصابارواعطتو العنوان ..

مشي بالميكرو .. وطول الوقت عم يطلع فيها بالمراية ويضحك .. وبلش يزتلا بحكي طالع ونازل ..

شمس: ضب لسانك يا قليل الشرف ..و وقف هون رح انزل

ومسكت ايد الباب لتفتحو وتنزل .. مسكلا ايدا التانية وشدا من كرستو يلي قدام ..

السواق: لك لوين يا حلووو .. والله انت ما بيتفرط فيكي .. خليكي بس لنتسلا شوي

انتفض جسما كلو لشمس واطلعت حواليها شافت حد كرسي السواق كاسة قزاز ..مسكتا وضربتو ع راسو ونزلت بسرعة من السيارة ..

السواق: ااخ .. الله لا يعطيكي العافية

شمس: لك تفووو عليك يا قليل الشرف

كانت عم تصرخ ودموعا ع خدودا وابنها بحصنها .. التمو الناس عليهن .. وبلشو يسالوها شو صاير ..

شمس: قليل هالشرف عم يتحركش فيني .. لك اتفوووو الله يلعنك

مسكو الناس وجرو ع المخفر وراحت شمس معهن واشتكت عليه ..
ومن بين هالناس يلي كانت معها .. امين ..

وبعد ما خلصت مع الشرطة ..
امين: لو سمحتي مدام

اطلعت فيه شمس بخوف .. (خير اخي .. شو صاير)

(بصراحة .. ولا تفهميني غلط .. انا كتير اعجبت فيكي وبشخصيتك .. ومتل ما عرفت انو انت مطلقة .. وانا بصراحة حاسس بانو ربنا بعتلي ياكي)

(ما فهمت)

(اختي انا رجال ماتت مرتي من شي خمس شهور وعم دور لام لولادي .. فحابب اخد عنوان بيت اهلك لاطلبك منن من بعد ازنك)

حطت شمس عنيها بالارض وكملت (انا ما الي اهل .. ولا الي بيت .. ولااا شي)

(جد .. طيب فيني اتعرف عليكي اكتر .. من بعد ازنك)

خبرتو شمس بكل قصتها ..

(مممم .. لكن خلينا نروح هلا ع المحكمة ونكتب كتابنا وبنروح ع بيتي سوا)

(وابني؟؟!! )

(لا تخافي .. انت رح تربيلي ولادي .. وابنك بيربا معن)

فرحت كتير شمس وحست بانو طاقة الفرج واخيرا نفتحتلا من بعد هالسنين .. ما كانت دريانة شو لسا مخبالا..

راحو سوا كتبو كتابن ومن بعدا راحو سوا ع بيتو لامين .. دخلو ع البيت واستقبلو ولادو ..

اربع شباب وبنات تنتين .. من وقت شافتهن ما ارتاحت لنظراتن .. بس قالت بينا وبين حالا اكيد مع الوقت رح تتغير هالنظرة ..

حياة (الجزء السابع)

بلشت حياة شمس مع زوجا امين وولادو وابنها محمد .. امين كان رجال قلبو طيب .. حن عليها كتير وعامل محمد معاملة الاب متلو متل ولادو ..

امين: شمس يا عيوني .. ما شتقتي لاهلك

شمس: اااخ .. والله عم موت من شوقي لاخواتي وولادن .. بس شو طالع بالايد

اطلع فيها امين وهو عم يتبسم ..

امين: اي وازا قلتلك انو انا طلع بئيدي

تصفنت فيه وسالتو باستغراب..

شمس: كيف يعني .. ما فهمت !!

امين: انا رحت لعند اخواتك .. علي واشرف .. وشرحتلن كلشي .. وخبرتن انو رح نزورن

رجف قلبا لشمس .. وركضت لعندو وقعدت حدو ومسكت ايدو وعيونا مليانين دموع..

شمس: ايييييي .. وشو كماان

امين: ههههههه .. جهزي حالك المسا لنزورن

ضمتو شمس وفرطت بالبكي ع كتفو ..

شمس: ربي ما يحرمني منك ومن حنيتك

امين: ههههههه .. لك وسختيلي القميص .. تعي لشوف
مسك وشا باديه التنتين واطلع بعيونا الدبلانة والمليانة تجعيد رغم صغر سنا .. ومسحلا دموعا ..

امين: انت كتير طيبة يا شمس وما بتستاهلي غير كل خير

زادت شمس بالبكي وبلشت الشهقات تطلع تلقائيا مع بكاها ..

شمس: تعبت يا امين .. وكانو هالحياة ما الا غيري لتعزبو .. صدقا عم قلك ما شفت يوم حلو بحياتي .. لا وانا طفلة ولا وقت كبرت .. كل ما تنفتحلي طاقة فرج ما بعرف كيف بتتسكر .. تعبت وربي تعبت

امين: لااااا .. رح ازعل منك هاا .. وانا وين رحت

شمس: ربي يخليلي ياك .. ما في منك انت

وهيك جهزو حالن وقت المسا وراحو لعند اهلا .. وقت دخلت لعندن توقعت يكونو ملهوفين لشوفتها .. بس تفاجات بانو سلامن كان بارد كتير .. تجاهلت هالشي وسلمت عليهن وسهرو سوا ..

وهني طالعين مسكا علي ع جنب ..
(لا تفكري انو صدقنا انك شريفة .. بس كرمال تضلي مستورة ببيت رجال وما نرجع نبتلا فيكي سكتنا )

غصت شمس واطلعت بعلي والدمعة معلقة بطرف عينا .. (الله يسامحك اخي .. الله يسامحك)

وتركتو وطلعت من عندن ركض ..

كل هالحنان يلي كان من امين حسسا لشمس بوجودا وكيانا وانو هي انسانة طبيعية من حقا تفرح وتعيش حياتا ..

بس ولادو لامين وبناتو بوجه الخصوص ما قدرو يتقبلوها لشمس كبديلة لامن .. بلشو ع الطالعة والنازلة يعملولا مشاكل ويشكوها لابوهن ..

ظلموها كتير .. وامين بلشت تتغير معاملتو لالها بسبب هالشي .. وصار ع الطالعة والنازلة ع صريخ وبهادل وضرب كمان .. ورجعت شمس لحياة العزاب والبهدلة كمان مرة ..

تحملت شمس وبقيت عم تخدمن وتتحمل طلباتن يلي مالا لزوم من تم ساكت .. لانو بتعرف ما الها مهرب .. بدا تتقبلا لهالحياة بحلوها ومرها ..

وبعد بفترة حملت شمس .. ووقت حست بروح جديدة جواتها .. حست بشي حلو كتير تسلل جواتها .. حست بانو ربنا وهبها حياة جديدة ..

شمس: امين .. انا حامل

امين: جد عم تحكي .. كتير منيح .. انتبهي منيح ع حالك

خفت قسوة امين عليها وقت عرف بحملها .. هالشي يلي خلا بنتو لكبيرة تجن .. وبلشت تعملا مشاكل بزيادة ووصلت معها انو ضربتها وطردتها من البيت ..

كانت الدنيي برد كتير ومطر .. وشمس حامل بالشهر السابع .. نزلت ع الشارع عم تمشي وهي ماسكة ايد محمد وعم تبكي وجع وغصة وقهر .. ومانا عرفانة لوين تروح وشو تعمل .. بلشت تمشي بالشوارع .. وهي ماشية حست بوجع كبير ببطنها .. وعرفت بانو عم تطلق ..

وما لقيت حالا غير وقفت بنص الشارع ووقفت تكسي ..

السواق: خير يا اختي .. شبك

شمس: دخيلك .. تع .. تع.. تعبانة كتير

نزل السواق بسرعة من السيارة وطلعها معو وراح فيها ع المشفى .. وهنيك ولدت واجيت انا (روح) ع الدنيي ..

حياة (الجزء الثامن)

بهالوقت كان ابي قالب الدنيي ع امي .. وامي خبرتن بالمشفى عن عنوانو ووصلولو خبر بانو امي بالمشفى وولدت ..

اجا ابي ركض ع المشفى .. وكان كتير زعلان عليها لامي ..

امين: الحمد لله ع سلامتك .. كيف هيك صار

خبرتو امي بيلي صار ..

(انا ما فيني اتحملن اكتر .. حطلن حد بترجاك .. خلص .. لك كنت رح افقد بنتي بسببن )

(طولي بالك .. رح روح استاجر بيت ونسكن فيه انا وانت وولادك وبس)

وبالفعل طلعو وسكنو لوحدن .. رتاحت امي فترة من العزاب .. بس ما كملت معا .. بابا تعرف ع جماعة حشيش ومخدرات .. وصار كل مصاري ع هالشي ..

بلشت حياتا لامي تقلب لجحيم .. انا كنت لساتني صغيرة وما بزكر شي من هاد ..
صار ابي ع الطالعة والنازلة يضربا لامي ويعزبا .. ووقت ما عاد معو مصاري ليدفع اجار البيت رجعنا مع امي ع بيت ابي عند اخواتي لكبار .. ورجعت امي للعزاب ..

كانت اختي لكبيرة تشتغل .. بس ما كانت امي تعرف بشو عم تشتغل ..

صار ابي طول النهار بالبيت ..

امينن: سمعي شمس .. من بكرة بتروحي بتدوري ع شي شغلة .. وما تضلي قاعدة بخلقتي .. فهمااانة

شمس: لا اله الا الله .. لا اله الا الله

وهيك رجعت امي ع تنضيف لبيوت والدراج .. بهالوقت كان عمري سبع سنين .. وبتزكرا لهالاحداث منيح ..

كل حياتنا كانت بتخجل .. شغل امي ووضع ابي .. ويلي زادا الفضيحة يلي عملتا اختي لكبيرة ..

ويلي مسكوها ببيت دعارة .. كانت صرلا فترة تشتغل بالملاهي الليلية مع زوجا وببيوت الدعارة .. وجرت اختي يلي اصغر منا معا .. والادهى والامر بانو اخواتي الشباب كان الن علم بهالشي وما منعوهن كرمال الكام ليرة يلي بيسكتوهن فيهن واجار البيت ..
بوقتا بتزكر نحبسو اخواتي التنتين .. وبنفس هالفترة اخواتي الشباب عملو مشكلة كبيرة مع شب وقتلوه .. ونحبسو هني كمان .. وبعد تحقيقات كتيرة لبسو التهمة لاخي لصغير يلي ما كان معن اصلا وطلعو كلن ..

كتير كنت حس بالنقص واخجل من حالي .. كنت اسمع البنات وهني عم يتفاخرو بحالن وبعيلتن .. وانا بشو رح اتفاخر .. بامي الشغالة ببيوت الناس او اخواتي يلي بالحبس .. او بابي يلي كل يوم عم يدوق قتلة من اخواتي بسبب المشروب ..

يمكن تقولو هالبنت بتبالغ .. بس جد ما شفت يوم حلو بحياتي .. وعيت ع هالوضع هاد .. وع الفقر والذل هاد ..
وما وقفت ع هيك .. تعرضت لمواقف كتيرة حطمتني بحياتي واول موقف كان ..

راجي (اخي لكبير) : روح .. رووووح

روح: اي اخي

راجي: تعي لقلك

رحت لعندو وحسيتو مانو طبيعي .. (نعم اخي)

(فوتي لهون ) .. جرني لغرفتو جوا وسكر الباب .. انا صرت ارجف من جوا .. وع شوي رح ابكي ..

(شبك اخي .. والله ما اخدت شي منك .. والله ما اخدت شي)

(لك شبك .. لا تخافي .. تعي تسطحي حدي )

وقت قلي هيك ستغربت كتير .. بس فرحت انو ما رح اكل قتلة متل كل مرة ..
تسطحت ع التخت وهو اجا وتسطح حدي .. وبلش يعملي بحركات لاول مرة بشوفا ..
كان عم يمرر ايدو ع جسمي كلو .. ويمرر اصابعو ع شفايفي ..

انا ما كنت فاهمة شو عم يعمل .. بس كنت عرفانة انو شي غلط وعيب وما بيجوز ..
ومع هيك ما تحركت من خوفي ولا حكيت ولا كلمة .. وفجاة ...

راجي: (صراخ) قومي نقلعي من هووون .. قوووومي

انا وقفت بسرعة وركضت براة الغرفة .. كان قلبي ع شوي رح يوقف .. وبقي هالسر معي لهاليوم وما سترجيت خبر حدا فيه .. بس هالسر كان عاملي حالة رعب .. كل ما شوفو لاخي اهرب وسكر ع حالي ..

وقت كان عمري شي 9سنين .. تعب ابي كتير .. وبوقتا اخدو ع المشفى ..

الدكتور: لازمو فحوصات وضروري هلا تعملوهن

عملو بوقتا لفحوصات ورجعو لعند الدكتور يلي خبرهن بانو ابي معو سرطان ..

ومن بعد هاليوم ابي تغير كتير .. ترك كلشي سيئ والتزم بالصلاة والصوم لوقت راح لعند ربو ..

بكيت كتير عليه وانحرق قلبي .. صح ما كان اب لالي .. بس ما قدرت انو ما ازعل عليه ...

حياة (الجزء التاسع)

موت ابي كسرنا انا وامي .. صح كان كتير قاسي .. بس وجودو كان مقوينا ومعطينا شوية امل ..

بيوم عزاه لابي اجو عمامي وطردونا من البيت ..

عمي: انقلعو من هون .. مالكن مطرح عنا وما بشرفنا ناس عايبين متلكن

شمس: اتقو الله فينا .. وين بدنا نروح .. انتو عارفين ما النا دخل ودوبنا عايشين

عمي: مو شغلتنا هاي .. اخي يلي كان مسكتنا ومربطنا خلص مات .. نقلعو بقى من هون

بوقتا حترنا شو بدنا نعمل .. ما النا حدا بنوب .. خالي علي وقت عزا ابي اجا عطا امي كام ليرة وراح .. وما عاد سال ..

تفرقنا بوقتا .. اخواتي لكبار كلن هربو من لفضيحة ع تركيا .. وبقيت انا واخي محمد مع امي .. نقلنا ع غير منطقة ما حدا بيعرفنا فيها .. وصرنا نلف من مكان لمكان لوقت رسينا ع غرفة لناطور ببناية ..

عشنا فيها كم يوم .. ومن بعدا امي عرفت عنوان بنت عما يلي عايشة بنفس المنطقة وراحت لعندا وطلبت منا تدبرلا بيت ..

كانت ست غنية كتير وبيتا كتير كبير واشبه بالفيلا من كبرو وجمالو .. وكان عندا تلت شباب عايشين معا بالبيت ..

بنت عما لامي (ختام) : حبيبتي شمس والله حضك حلو .. في بيت حد بيتي .. هلا رح دق لصحابو وانت جهزي ولادك وتعي فورا

بوقتا شفتن لدموع الكسرة والذل بعيونا لامي .. (الله يجبر بخاطرك يا رب)

رجعنا ع الغرفة ولمينا تيابنا ورحنا لعندن ع بيتن .. وامي رجعت ع شغل تنصيف لبيوت ولدراج كمان بهالمنطقة ..

كنت ابقى انا واخي بالبيت لوقت تجي .. كانت ختام كل يوم تبعت ورايي .. انا بالبداية كنت افرح كتير انو رح روح لعندا ع هالبيت لكبير ولمرتب ..
بس كانت عم تستغلني كتير .. كنت قضيها طول لنهار ع شغل وتنضيف وترتيب وما احكي ولا شي ..

وكان ابنا لكبير غالي ع طول يندهلي بعد ما خلص شغلي ع غرفتو ..

غالي: لك روح الحلوة .. تعي نلعب سوا

بوقتا دخلني ع الغرفة وبلش يبوس بجسمي ويمرر ايدو علي ويضمني بحجة انو عم يلاعبني

عقدوني وكرهوني بجنس ادم .. صرت اكره شي اسمو رجال واقرف منن .. تعبونيي وعزبوني ..

كانت ختام تقلا لامي انو ساعدتا شوي وبعدا تفرجت ع التلفزيون وانا ضل ساكتة وما احكي لشي .. ليوم ..
ختام: روح .. تعي تعي

روح: اي خالة

ختام: وطي مسحيلي كندرتي

تصفنت فيها شوي .. ووطيت ومسحتلا كندرتا .. بس لاول مرة بحس بهالكم من الزل والاحتقار ..

بوقتا مسحتلا اياها وركضت ع بيتنا .. قفلت ع حالي وفرطت بكي ..

روح: يا ربي ليش هالزل كلو يا الله .. ليييش .. شو زنبي لاتعزب هيك ياااا ربي .. شو زنبي

ومن بعدا صرت اتهرب منا وما عدت رحت لعندا ..

ما بعرف شو بدي عدد مواقف لعدد .. اخي محمد يلي صار نسخة عن اخواتي .. ع طول الوقت صريخ وضرب وما عم يشتغل شي .. كل حياتي كانت كسر وزل .. تيابي يلي كنت البسن واخجل فيهن كانو لحالن قصة ..

نبذ البنات لالي .. خوفي من شي فضيحة ويلي كان ع طول يخليني اسكت عن حقي ..
وباليوم يلي قررت دافع فيه عن حالي ..

روح: سما بكفي لا عاد تكبري بالحكي والا رح تندمي

سما (رفيقتي) : هههههههههه لك شو رح تعملي ولي جدبة .. يلي متلك مالن اب ما فيهن يعملو شي

هالكلمة يلي حفرت بقلبي وكسرتني .. ومستحيل انساها لليوم ..

حياة (الجزء العاشر )

هاي كانت طفولتي .. يتم وذل وكسرة وتحرش وخيبات ورا بعضا ..

وكبرت وصرت صبية .. ودق قلبي .. حبيتو من كل قلبي لادم .. عشقتو بكل تفاصيلو .. شكلو .. جسمو .. حنيتو .. كلشي فيه عشقتو .. وتعلقت فبه ..

كنت شوفو طوق النجاة لالي ..

ادم: هلا انت مين سماكي روح

روح: امي

ادم: لك ااخ شو بحبا لامك .. لك انت فعلا روح .. انت روحي وروح كلشي حلو بالحياة .. لك انا بعشقك ولووو .. جد بعشقك

روح: وانا بعشقك حبيبي .. بس ...

ادم: اهاااا بلشنا نكد .. بس شو

روح: بصراحة خايفة تتركني

ادم: لك انت جدبة شي .. مستحيل اترككك .. لك ما فيني .. ولحتى اثبتلك انا رح حاكي امي المسا لنجي ونطلب ايدك

روح: ع..... ع... عم تحكي جد

ادم: اي طبعا جد .. يالا ضحكي شوي .. لك والله ما بيلبقلك الزعل

بكيت كتيير من فرحتي وركضت لعند امي ..

روح: امييي .. اميييي

شمس: شبك شو في

ضميتا وصرت بوس فيها .. بعدتني عنا كالعادة بنفرزة .. (لك شبك .. بعدي مالي خلق)

(امي .. ادم رح يجي يطلبني)

(عم تحكي جد .. ان شاء،الله يا امي)

بس للاسف .. الظاهر يلي متلي ومتل امي بس للتعتير والشقا .. ما لن نصيب بالحب والفرحة .. امو لادم رفضت تخطبني لالو .. لانو نحنا مو من مستواهن ..

وهالحادثة كانت اكبر ضربة من الحياة لالي .. واخر ضربة .. ولسا الله اعلم شو رح اتلقى ضربات زيادة ..

حكيتلكن قصتي وبعرف بانو مشكلتي مالا حل .. بس حكيت لفضفض .. ولاعرف رايكون في وفامي وفاهلي وحياتي كلا .. يمكن لاقي كلمة مناسبة لاوصف حياتي . ..

عم حاول اقلم حالي ع هالحياة .. لك اصلا ما عم حس حالي عايشة .. مشاعري واحاسيسي خلص .. ماتو ودفنتن .. عم اضحك واحكي بس كلو هيك من غير نفس .. مالي خلق لشي ولا حتى للحياة ..

هاي هي انا (روح) ... يلي امي (شمس) ورتتني الشقا والتعتير .. انا روح اليتيمة يلي ما الها سند ويلي خلا كل مين يشوفني يحاول يستغلني .. انا روح بنت ال 16 سنة ويلي ما بقي شي ما شفتو ..
انا روح بنتا لشمس ..

كلمة من الصبية لالكن ...
(بترجاكي يا .... بدي توصلي رسالة لكل بنت بوضعي .. اياكي تنكسري وتضعفي .. خليكي قوية .. انا كلن عم يستغلوني لانن عارفيني بلا سند و ضعيفة .. ضعيفة كتير لدرجة انو ما فيني اتحكم بدموعي ..
وصلي رسالة لكل ام تقوي بنتا وما تكون هي والزمن عليها .. امي اكتر شخص عم يضعفني بصدا لالي وبعدا عني .. بحكيا علي انو بشي يوم رح كون متل اخواتي ..
لهيك اسندو حالكن بحالكن ... حاربو لتعيشو بشوية كرامة )

انتهت