أحلام تلحقها خيبات

صفا النعمان

الادارة
طاقم الإدارة
#أحلام_تلحقها_خيبات_الكاتبة_روان_الشبلاق

#واقعية

الجزء الأول والثاني والثالث

‏⁧‫الأنثى‬⁩ ذات الحظ السيء ، هي مٓن يقع قلبها بين أيدي شخص من أشٰباه الرجُال .

ام طلال. يا بنات تعو لعندي بدي احكي معكن
ندى و ليلاس. شو في امي
ام طلال. اتصلت عمتكن ام حسان وعزمتنا ع الغدا بكرا

ليلاس. شو المناسبة ؟
ام طلال. ابنها حسين جايي اجازة من العسكرية وحبت انو نجتمع كلنا سوا وبتوقع بدها تحكي بموضوع ندى وحسان

ندى. انا وحسان !!
ام طلال. اي عمتك حابة تخطبك لأبنها حسان بس بدها ياكن تشوفو بعض بالأول لانو من زمان ما التقيتو فـ شو رأيك

ندى. مابعرف يعني انا مابعرفو وزمان ماشفتو
ام طلال. اي بكرا رح تشوفيه
ندى. ان شاء الله
ام طلال. وانتي حبيبتي ليلاس لا تزعلي اكيد الله رح يعوضك عن خطبتك الأولى والله يسامح الي كان السبب انكن تتركو بعض

ليلاس. بالعكس ليش لأزعل كل شي بالدنيا نصيب

دخلت ليلاس ع الغرفة ولحقتها ندى

ندى. شو رأيك بحسان
ليلاس. بتوقع يكون منيح
ندى. انا بخاف من زواج القرايب يعني شوفي انتي انخطبتي لقرايبنا وبعد ماتعلقتو ببعض صارو يعملولكم مشاكل مشان تتركو

ليلاس. مو كل الناس متل بعض بعدين انا المشكلة فيني واهلو ماكان بدهم ياني لأني سمينة يعني المشكلة فيني انا مو فيهم

ندى. بس خطيبك ماكان عندو مشكلة بجسمك وكان بحبك لولا اهلو ما فسدوه
ليلاس. هلأ هاد الي صار وانتي الله يختارلك الخير
ندى. امين يارب

تاني يوم جهزنا حالنا ورحنا ع بيت عمتي وكانو اولاد عمتي حسان وحسين موجودين
كل الوقت وحسان يتطلع بأختي ندى

تركت الكل قاعدين وطلعت ع البرنده كان الجو كتير حلو
بعد 10 دقائق لحقتني امي

ام طلال. ليلاس شو عم تعملي عندك
ليلاس. ولا شي امي
ام طلال. طيب شو رأيك بـ حسين ابن عمتك
ليلاس. منيح ليش عم تسألي
ام طلال. يعني عجبك
ليلاس. اي منيح بس مو عأساس حسان الي يخطبها لندى

ام طلال. اي مزبوط عمتك طلبت اختك ندى لأبنها حسان
وجوز عمتك قال انو بناخد التنتين خوات ندى لحسان وانتي لحسين وسأل حسين اذا موافق او لا وقال انو موافق
وانا جاية اسألك شو رأيك ؟

ليلاس. بس حسين عسكري ومطول ليتسرح
ام طلال. اي وين المشكلة
ليلاس. كيف حسين قبل وانا بهالوزن هاد
ام طلال. ع كل حال بعدين بنحكي خلينا نفوت هلأ

رجعنا ع البيت وسألتنا امي عن رأينا

ندى. والله يا امي محتارة
ام طلال. ليش بقا
ندى. مابعرف مو مرتاحة
ام طلال. وانتي يا ليلاس
ليلاس. متل ندى محتارة خايفة يكون حسين مو مقتنع فيني و وافق مشان اهلو

ام طلال. ليش انتي شبكي الف شب بيتمناكي
ليلاس. ههههه وانا بهاد الجسم
ام طلال. بس تخطبو بتعملي ريجيم وخلصنا , فكرو من اليوم لبكرا مشان نردلهم خبر
ندى و ليلاس. ان شاء الله

تاني يوم ردت امي خبر لعمتي انو نحنى موافقين
بلشنا تجهيز للخطبة وكل الأمور كانت تمام
يوم الخطبة صارت حفلة كتير حلوة الي ولأختي وكتير كنت مبسوطة ومتفائلة انو الله عوضني بـ حسين بدل خطيبي الي تركني وجرحني لأنو سمينة
مرق اول شهر من الخطبة والتاني وكل شي تمام وبـ هالشهرين اجا حسين اجازاتين وكنا كتير متفاهمين وبنحب بعض وكتير كنت اشتاقلو
بس كنت حس انو اختي ندى مو مبسوطة مع خطيبها حسان وكتير كان يصير بينهم مشاكل بعكسي انا وحسين

وبيوم كنت قاعدة عم اتفرج ع التلفزيون دق باب البيت رحت وفتحت الباب وكان حسان

ليلاس. اهلين حسان تفضل

دخل حسان وكنت رح سكر الباب قالي استني شوي في معي ضيف قلتلو مين الضيف واتطلعت من الباب

ليلاس. مو معقووول حسين
حسين. اي انا
ليلاس. اهلا وسهلا اشتقتلك كتير
حسين. كيفك حبيبتي
ليلاس. الحمدلله تمام , ليش ماخبرتني انك جايي
حسين. حبيت اعملك ياها مفاجئة
ليلاس. ياعمري كتيررر فرحتني

دخلنا ع البيت وسلم حسين ع اهلي ورحت ع الغرفة قلت لندى انو حسان اجا وعم يستناها جهزت حالها وطلعت لعندو
قعدنا كلنا مع بعض وبعد شوي ندى وحسان عليت اصواتهم وهني يتخانقو بعدين حسان ترك ندى وراح
حاولنا نعرف سبب خناقتهم بس مارضيو يحكو شي

حسين. شو صرلهن هدول
ليلاس. والله مابعرف بس هني دائماً بيتخائو وبيتصالحو
حسين. اها

ليلاس. ماقلتلي كم يوم اجازتك
حسين. اليوم وبكرا وبعد بكرا
ليلاس. بس
حسين. اي مابكفو
ليلاس. لا , ياالله ايمتى يجي اليوم الي تسرح فيه لأني كتير عم بشتاقلك
حسين. طولي بالك لسا باقي كتيررر حتى اتسرح

ليلاس. حسين
حسين. عيونو
ليلاس. هلأ جاوبني بصراحة انت عندك مشكلة بوزني الزايد
حسين. حبيبتي كم مرة صرتي سائلتيني هالسؤال وقلتلك لا وانا بحبك متل ما انتي
ليلاس. الله لا يحرمني منك

بالليل بعد ما راح حسين كنا قاعدين بالصالون كلنا

ندى. ابي انا مابدي حسان
ابو طلال. شو هالحكي يا بنتي
ندى. اي بابا انا مابدي ياه
ام طلال. ليش هيك عم تحكي يعني متخانقين
ابو طلال. اذا في مشكلة بيناتكم بتنحل مابصير تقولي مابدك ياه لساكن بأول الطريق

ندى. لا مو هيك بس انا وحسان مالنا متفاهمين ابداً ومستحيل نتفق ع شي وكل مايجي عم يصير مشكلة انا وياه ما اتفقنا ومالنا مناسبين لبعض ومتأكدة مارح نتفق بعد مانتزوج لهيك خلينا ننفصل من هلأ

ام طلال. لك مجنونة انتي حسان شب كتير منيح ليش بدك تتركيه
ندى. بعرف انو شب منيح بس انا مابدي ياه وانا متأكدة انو هوا نفس الشي حاسس انو نحنى مو مناسبين لبعض

ام طلال. شوفي اختك ما احلاها هي وخطيبها وماعم يشكو من شي
ندى. الله يهنيهم مع بعض بس انا مابقدر كمل مع حسان ياريت تخبرو انو كل شي انتهى
ابو طلال. لا تاخدي قرارك هيك بسرعة معك وقت فكري منيح
ندى. ياريت ماتضغطو علي واتركوني ع راحتي يعني احسن انو نتزوج ونتطلق بعد شهر عم قلكن مالنا متفاهمين ع شي
ابو طلال. طيب خلص متل مابدك الزواج مابصير بالغصب ، مابعرف شو رح قول لعمتك
ندى. قوللها الحقيقة

تاني يوم بالليل راح ابو طلال ع بيت اختو ام حسان وفهمها القصة وانو ندى مابدها حسان ونهو الخطبة وحسان وافق ع هالشي وقبل مايروح ابو طلال وقفو ابوحسان

ابوحسان. شوف ابو طلال نحنى خطبنا التنتين خوات وهيك كنا حابين بس اذا انتو لغيتو خطبة حسان وندى انا كمان رح الغي خطبة ليلاس وحسين

حسين. شو
ابو طلال. بس حسين وليلاس شو دخلهن بالشي الي بين ندى وحسان يعني هني كتير متفاهمين وبحبو بعض
ابو حسان. انا هاد الي عندي والله يبعت لبناتك شباب افضل من اولادي

حسين. ابي انت شو عم تحكي مين قلك انو انا بدي اترك ليلاس
ابو طلال. انا مابدي انو نقطع بنصيب تنين بحبو بعض كرمال تنين ماتفاهمو

ابوحسان. كل شي بالدنيا نصيب وياريت مانزعل من بعض
ابو طلال. طيب متل مابدك تصبحو ع خير

طلع ابو طلال من البيت وهوا زعلان بسبب حكي ابو حسان

حسين. ابي ليش هيك حكيت مع خالي شو دخلني انا بحسان
ام حسان. ليش بدك تكسر بخاطر تنين بحبو بعض ورح يتزوجو
ابوحسان. من الاول اتفقنا انو نخطب التنتين بس هني تراجعو يسطفلو هني الخسرانين

حسين. شو الشغلة لعبة لكن ليش من الأساس خطبتلي ياها وهلأ بعد ماحبيتها وتعلقت فيها بدك ياني اتركها

حسان. ابي الانفصال كان صح بالنسبة الي ولندى بس حسين شو ذنبو
ام حسان. حسان الله بيبعتلو بنت احسن من ندى
ابو حسان. وحسين الله بيبعتلو احسن من ليلاس

حسين. بس انا مابدي غيرها
ابوحسان. تسطفل تزوجها بدون رضايي واذا تزوجتها سكنة بهالبيت مافي
حسين. اي رح اتزوجها ومافيك تمنعني
ابوحسان. اي بدي شوف كيف رح تدبر حالك بدوني انا مارح ساعدك بشي اعتمد ع حالك لشوف بتقدر

تاني يوم راح حسين ع بيت خالو وقال لخالو انو بحب ليلاس ومابدو يتركها وانو رح يتزوجها حتى لو بدون رضا ابوه
بس ابو طلال ماوافق وقلو خلص مابدنا مشاكل بس حسين ظل مصر ع حكيو وانو مارح يتخلى عن ليلاس وضغط ع خالو كرمال يوافق انو الخطبة تستمر ومايتركو بعض

ابو طلال. بس كيف رح تدبر حالك وابوك تخلى عنك
حسين. بس اتسرح ببلش شغل وبستأجر بيت وبفرشو وبنتزوج
ابو طلال. صعب هالشي مابعرف كيف رح تمشي الأمور
حسين. لسا بكير ع هالحكي لسا في اكتر من سنة ممكن بهالفترة يقتنع ابي ويتراجع عن حكيو
ابو طلال. ان شاء الله خير

قعدو ليلاس وحسين بغرفة لحالهم

ليلاس. لو تعرف اديش كنت خايفة انو نترك بعض مابتتخيل شو ممكن يصير فيني انا كتير بحبك

حسين. وانا بحبك ومارح اتركك ورح نتزوج قولي ان شاء الله
ليلاس. ان شاء الله

حسين خلصت اجازتو ودع ليلاس وراح
بالليل في غرفة البنات

ندى. كنت خايفة تتركو بعض وكون السبب انا
ليلاس. لا انتي مادخلك بس زوج عمتي عقلو صعب وهوا عصب لأنكن تركتو بعض انتي وحسان بس اكيد بعد فترة رح يروق
ندى. ان شاء الله
ليلاس. حبيتو كتير لـ حسين وهوا كمان بحبني ومامهم عندو اني سمينة بقلي انا بحبك لأنك بنت طيوبة وحساسة وبتدخلي ع القلب

ندى. الله لا يفرقكم
ليلاس. امين

بعد مرور اسبوعين اجا لعندهم ابو حسان وعمللهم مشكلة وكان يقول انا مابدي زوج ابني لبنتكم واذا تزوجها انا غضبان عليه ولا هوا ابني ولا انا بعرفو

انزعج ابو طلال من تصرفو وحاكاه بأحترام لأنو ببيتو

ابو طلال. جايي عم ببهدلنا بنص بيتنا
ام طلال. طول بالك اكيد مع الايام رح يرضى بالأمر الواقع

مرق اسبوعين تانيين واجا لعندهم ابوحسان طلعت ليلاس وسلمت عليه قالتلو اهلين عمي

ابو حسان. لا تقولي عمي انا مو موافق ع زواجكم وجايي حتى قوللكم هالكلمتين

ابو طلال. شوهني
ابو حسان. حسين ابني وبدي زوجو ع كيفي بنتكم مو مناسبة لأبني ياريت تختصرو المشاكل وتنهو الخطبة
ابو طلال. بس الشب بدو ياها ومتعلق فيها

انتهى النقاش بين ابو طلال وابو حسان وماوصلو لنتيجة
ابو طلال مابدو يكسر بخاطر حسين لانو وعدو انو يزوجو ياها

بعد شهر اجا حسين اجازة وصار مشاكل بينو وبين ابوه وحسين ماقبل يترك ليلاس وقال لخالو انو مايرد ع ابوه لو شو ماحكا

بعد شهر وتنين وتلاتة مرق عشر شهور وحسين لساتو عسكري والمشاكل كل يوم عن التاني بتزيد وابو حسان كل مايشوف حدا يحكي ع ابو طلال قدامو ويقول انو غضبان ع ابنو بسببو

ابو طلال. لك لسا بتقلي طول بالك لحد هون وبكفي سيرتنا ع كل لسان لك ابوحسان فضحنا بين الناس وعم بقول انو نحنى عاملين شي لأبنو وانو غضبان عليه بسببنا وحكي كتير غير هيك

ام طلال. لك صار مارق ع خطبتهم سنة ما مل
ابو طلال. ومارح يمل اذا بقول انو لو تزوجو مارح يخليهم يتهنو ورح ينكد عليهم عيشتهم لهيك خلص بس يجي حسين بقلو انو ما الو نصيب عنا اصلاً من الاول كان لازم نعرف انو زواجو بدون موافقة ابوه مابيزبط

ليلاس. بس انا بدي ياه لحسين انا تعلقت فيه
ابو طلال. الله بعوضك بداللو يابنتي

اجا حسين اجازة من العسكرية وحكا معو خالو وخلاه يطلق ليلاس غصباً عنو مع انو حاول كتير معو وماخلى طريقة وماوافق ابو طلال
ليلاس زعلت كتير ع حسين ومانشفت دمعتها

ندى. خلص ليلاس بكفي بكي
ليلاس. يعني خلص كل شي انتهى
ندى. قرار بابا هوا الصح محبتكم لبعض مابتكفي واذا ابوه ما وافق مارح ترتاحو ولا رح تتهنو
بعدين انتي شفتي كل شهر والتاني يجي ويعمللنا مشكلة وطلع علينا حكي وخلى كل الناس تحكي علينا وبابا يظل ساكت ويقول معليش كرمال ليلاس بس هوا ماكان يزوء

مرق 6 اشهر ونسيتو لحسين وكملت حياتي عادي وهوا كمان اكيد بهالفترة هي نسيني
هيك افضل الي والو لانو حسين اصلاً ماكان بيقدر يفتح بيت ولا بيقدر يعمل شي بدون ابوه
واخدت قرار انو ما بقا وافق ع شخص بيقربني ابداً
اول مرة انفسخت الخطبة بسبب امو للشب
وتاني مرة تطلقت بسبب ابوه

بعد شهرين اجو ناس طلبوني مرتين وماقبلت

وقت كنت روح لعند رفقاتي بنات جيرانا كتير كانو يكسرو بخاطري ويسمعوني حكي انو انا انخطبت مرتين ومازبطت الخطبة وانو انا سمينة يا الله اديش كنت انقهر شو اعمل اذا هاد حظي وصحيح انا سمينة بس مو بأيدي هالشي وراثة من عماتي من لما كنت صغيرة ولهلأ حاولت ضعف حالي ماخليت وصفة او حب تنحيف وماجربتو بس مامشي الحال

بعد فترة اجت لعنا وحدة هي وبنتا بدهن عروس شافوني وطار عقلهن فيني وقالو مارح ناخد غيرك لأبنا ونحنى حبيناكي من كل قلبنا
انا كتير ارتحتلهن وحبيت حكيهن وقلت اذا مناح بوافق ليش لا

بعد يومين فكرت منيح وردينالهن خبر انو موافقين

يتبع...
الجزء الثاني

#أحلام_تلحقها_خيبات_الكاتبة_روان_الشبلاق

الجزء الثاني

تاني يوم اجا الشب واهلو طلعت ضيفتهن قهوة وقعدت شوي معهن كان باين انهن كتير مناح
بس راحو سألني ابي عن رأيي بـ علاء وقلتلو منيح

ابو طلال. يعني عجبك
ليلاس. اي
ام طلال. باين انو هالجماعة محترمين كتير
ابو طلال. اي والله ، ع كل حال بكرا بسأل عنهم وان شاء الله بصير خير

تاني يوم سأل ابي عن علاء واهلو والكل مدحو فيهن وردلهم خبر انو نحنى موافقين
كتبنا الكتاب وحددنا موعد الخطبة وكل شي تمام

بيوم الخطبة اجا علاء واخدني ع الكوافيرة وكنا كتير متفاهمين

علاء. ايمتى بتخلصي
ليلاس. مو اقل من 4 ساعات وبابا بدو يجي ياخدني
علاء. اي تمام لكن
ليلاس. علاء لا تنسى تجيب كاميرا مشان نتصور
علاء. اي تكرمي
ليلاس. الله يكرمك

بعد 4 ساعات ابو طلال طالع ليلاس من عند الكوافيرة واخدها ع البيت وكان في ناس كتير قرايبهم والجيران وحتى اهل العريس امو وخواتو وقرايبو كانو موجودين لأن بدهن يعملو الحفلة عند العروس

ليلاس طلعت كتير حلوة وكل العيون عليها وقلبها عم يدق متوترة وفرحانة كتير ومتفائلة بأنو الأيام الجاية رح تكون منيحة وكلها سعادة

بعد مرور ساعتين هلكو الصبايا قد مارقصو ودبكو والحفلة حلوة كتير
وقبل مايجي العريس راحو تنتين من قرايب ليلاس وجابو الحلو وصارو يضيفو لكل الناس وبس خلصو ام علاء نادت لأم طلال وقالتلها بدي احكي معك كلمتين

ام طلال. اي تفضلي احكي
ام علاء. بصوت عالي نحنى شبعانين الحلو ومو بعينا بس مو عيب تضيفو كل الناس وتتركو بنتي شيماء لا تنسو انو هي اخت العريس الصغيرة ومابصير هيك تصرف منكن

كل الناس صارت تطلع عليهن وفكرو انو في مشكلة وام طلال مشان تهدي الوضع صارت تعتذر من ام علاء وتقوللها انو حقك علينا واكيد البنات الي ضيفو الحلو مابيعرفو انها اختو للعريس وبكونو نسيوها بالغلط

مرقت القصة وام علاء اتصلت بأبنها علاء وقالتلو لا تجي

علاء. كيف وليش ما اجي مو انا العريس
ام علاء. خلص متل ماعم قلك لا تجي وبعدين بفهمك
علاء. وشو رح تقولو للناس ومين رح يلبسها المحبس
ام علاء. انا بلبسها المحبس واذا اتصلو فيك لا ترد او قوللهن انو طلعلك شغل فجأة
علاء. اي خلص متل مابدك بكون احسن

بعد نص كل الناس بدهن يروحو ع بيوتهن وصارو يسألو وين العريس وتأخر وبدنا نشوفو قبل مانروح
ام طلال سألت ام علاء انو وينو لهلأ قالتلها ام علاء مابعرف وانو ماعم يرد ع تلفوناتها

اتصلت ام طلال بـ علاء مرة وتنتين وتلاتة ومارد رجعت حاولت مرة تانية ورد عليها

ام طلال. الو .. علاء.. وينك انت .. ليش ماعم ترد .. صاير معك شي

علاء. لا لا انا منيح
ام طلال. لكن وينك لهلأ الناس راحت ع بيوتها وانت لهلأ ما اجيت الكل عم يسألو وين العريس

علاء. والله مالي فاضي مارح اقدر اجي
ام طلال. شوو كيف يعني مالك فاضي
علاء. والله يا مرت عمي اجت سيارة البلاط مشان البيت الي عم نعمرو ولازم انا استلمها
ام طلال. لك هلأ وقت البلاط ابعت ايا حدا بدالك

علاء. والله حاولت كتير بس ماقبلو الا انا اكون موجود

حاولت معو ام طلال كتير انو يجي وماقبل
حطها بموقف محرج كتير شو رح تقول للعالم وين العريس
راحت وحكت لأم علاء وقالتلها ام علاء خلص لا تهتمي هلأ بنقول للناس انو صار معو ظرف وماقدر يجي وانا بلبسها المحبس

ام طلال. والله مابعرف كيف يعني خطبة بدون عريس

ام علاء لبست ليلاس المحبس والكل صارو يتسائلو وين علاء بس هي سكتتهن وماخلتلهن مجال يحكو

بعد نص ساعة ماظل حدا واهل العريس راحو
ليلاس كانت تبكي وقالت لأمها طب اذا عندو شغل ليش ما اجا بس خلص ليش هيك حظي وماحدا منهن قالي كلمة مبروك

ام طلال. معليش يابنتي طولي بالك ولا تبكي بكرا اكيد رح يجي بنعرف منو شو القصة

مرق اسبوعين وماحدا اجا لا علاء ولا اهلو ولا حتى اتصلو او سألو
ليلاس واهلها ما كانو يعرفو شو السبب لحتى تاني يوم اتصل ابو طلال بـ ابو علاء وقلو اذا مابدكن ياها للبنت تعو خدو محبسكن وخلص مافي داعي تعملو هيك عيب هالشي اسبوعين وماسألتو ولا حتى شفنا العريس

ابو علاء. لا بالعكس انت شو عم تحكي احنا بدنا ياها لـ ليلاس ومعكن حق تزعلو ونحنى اسفين بس والله مشغولين بعمار البيت وماعم نفضى وبالأخص علاء ، وليلاس صارت بنتنا وغالية علينا

ابو علاء كذب ع ابو طلال وقلو انو مافي شي بس هني زعلانين من الموقف الي صار يوم الخطبة انهن ماضيفو شيماء الحلو

ابو طلال. مابعرف ليش حاسس انو في شي مابدهن البنت عادي يقولو بنفسخ الخطبة

ام طلال. لا شو تفسخها طول بالك لاتنسى انو اذا انفسخت هي الخطبة بكون هاد الطلاق التاني للبنت وقبلو كمان كانت فاسخة خطبتها شو رح يقولو علينا الناس اكيد رح يفكرو انو البنت فيها شي وماحدا رح يسدء انو هيك حظها

ابو طلال. لك انا كل الي بدي ياه انو شوف بناتي مبسوطات ومرتاحات لكن معقولة عريس مايجي يشوف خطيبتو يعني في أن بالموضوع

ام طلال. يمكن عنجد مشغولين لاتنسى انو بدهم يلحقو يجهزو البيت لأنو العرس بعد شهر ونص هيك اتفقنا

تاني يوم اجا لعنا علاء وصار يعتذر من ابي ويقول انو كان مشغول وماقدر يجي وانو هوا بحبني وبدو ياني
وابي سدء هالحكي
قعدنا انا وعلاء بغرفة لحالنا وكل حكيو كان بموضوع واحد وهوا الريجيم

صار هالموضوع عادي بالنسبة الي وبتقبلو وتعودت اسمعو من ايا شخص لانو مين مايشوفني بقلي ليش هيك وزنك ولازم تنحفي مابيعرفو انو وزني وراثة وقد مانحفت برجع بنصح بسرعة

علاء. شوفي ليلاس صحيح انا بحبك وبدي ياكي بس انتي لازم تنحفي حالك قبل العرس كرمالي

ليلاس. والله عم بحاول قد مابقدر وانا حابة انحف مو بس لانو انت بدك هيك من فترة كان وزني 80 وبعد جهد كبير وتعب لحتى هلأ صار 75

علاء. اي بس لساتك سمينة ولازم تضعفي اكتر من هيك اعملي ريجيم من هلأ للعرس
ليلاس. ان شاء الله

علاء. اكيد هااا مو بس حكي لانو ماظل الا شهر ونص للعرس لازم ينزل وزنك لل 60 اقل شي
ليلاس. اي اكيد

سمعت كلام علاء وبلشت بريجيم قاسي جدا وحطيت هدف انو رح نزل وزني لل 60
صرت ما اكل شي لقمتين فقط بالنهار واشرب مي كتير
لحتى صير متل مابدو علاء

وكل ماكان يجي لعنا كان يحكي بموضوع الريجيم وكل يوم يجبلي وصفة ويقلي هي منيحة وجرييها وليش لساتك هيك ومن هالحكي

صرت العب رياضة وامشي ونط ع الحبل وما اكل لو بموت من الجوع المهم ينزل وزني واخدت حبوب تنحيف
وامي كل يوم تبهدلني انو ليش هيك عم بعمل بحالي لانو كتير قسيت ع حالي وكنت دوخ من الجوع وجهي اصفر وجع راس
ودائما وعلاء يقلي تابعي
بفترة شهر ونص صار وزني 66 بس ماعجبو لعلاء

قبل العرس بكم يوم

علاء. انا قلتلك لازم يصير وزنك 60
ليلاس. لك شو اعمل والله هلكت ماظل شي ماجربتو ومافي رياضة وماعملتها بكفي هيك والله تعبت

علاء. لو بتحبيني كنتي نزلتي وزنك اكتر من هيك
ليلاس. يعني انت مو ملاحظ انو كل مرة بتجي مابتحكي الا عن الريجيم ومابتحكي بشي تاني ابدا وانا لأني بحبك عم رد عليك واعمل كل شي بدك ياه بس والله تعبت

علاء. الي بهمني انو ينزل وزنك اكتر من هيك اختي بدها تجي من السفر وتحضر العرس وبدي ياها تشوفك حلوة ونحيفة مو سمينة خليكي مكملة بالريجيم ليوم العرس

ليلاس. طيب متل مابدك

قبل العرس بيومين رحت حجزت فستان وطلع كتير حلو عليي وفي فرق كبير من الخطبة للعرس صحيح قسيت ع حالي بس صرت حب حالي اكتر وجسمي صار حلو بالنسبة الي

وقالتلي امي اكتر من نصيحة لحتى كون مبسوطة بحياتي والكل يحبوني

ام طلال. يابنتي خوات زوجك هني خواتك وامو بتعتبريها امك وبتحترميهن كلهن وبتحطيهن ع راسك وبس يشوفوكي اديش محترمة وفهمانة رح يحطوكي تاج ع راسن
الله يسعدك يابنتي ويهنيكي بحياتك

يتبع...
الجزء الثالث

#أحلام_تلحقها_خيبات_الكاتبة_روان_الشبلاق

الجزء الثالث

يوم العرس طلعت ليلاس كتير حلوة وبتاخد العقل وكل الي شافوها ماسدئو انو هي ليلاس والكل صارو يسألو انو كيف نحفت بهالسرعة
الي كانو يحبوها فرحولها كتير بس الي كانو يشمتو فيها ويحقدو عليها ماحبو هالشي ابدا

صارت حفلة حلوة وكبيرة وزفوها ع بيتهم هي وعلاء

بيتهم طابق تاني وفي تحتهم اخوه لعلاء ومرتو

علاء. نورتي بيتك ، طالعة حلوة وبتجنني
كانت ليلة حلوة وتاني يوم اجو اهل علاء واهل ليلاس وباركولهن

بعد مرور 10 ايام

علاء. جهزي شنتاية تياب صغيرة الي والك
ليلاس. ليش ؟
علاء. بدنا نروح نبقى عند اهلي كم يوم
ليلاس. بس اهلك بيتهن قريب مننا بنروح وبنرجع بنفس اليوم
علاء. وليش مابدك تبقي عندهم
ليلاس. مو مشان شي بس ببيتنا بنرتاح اكتر ولساتنا عرسان
علاء. لا مو ع كيفك بدنا نروح ونبقى هنيك اسبوع او اكتر يلا قومي جهزي التيب
ليلاس. طيب متل مابدك

رحنا ع بيت حمايي وظلينا عندهم 10 ايام وكنا انام كل واحد بغرفة لانو حماتي قالت انو في سلافي عزابية بالبيت وانو مابصير
وانا نمت عند اختوالصغيرة شيماء بغرفتها وماكان يصيرلي اقعد مع علاء او نحكي وحسيتو مبسوط اني بعيدة عنو
وطول هي الفترة انا الي كنت بلشانة بالبيت من طبخ وتنضيف وجلي وماكنت اشكي ابداً مع انو حماتي كانت تدقق ع كل شغلة
وكل شي اعملو مايعجبها وتصير تحكي وتغلط بالحكي علي
وانا مارد بشي
كنت مفكرتها ملاك بس طلعت غلطانة وكأنها مو حماتي الي كانت بالخطبة انقلبت مئة درجة
وغير هيك شيماء البنت الي عمرا 13 سنة عوفتني حالي اذا بحكي معها كلمة ياويلي شو بصير وكلمتها مابتصير تنتين عند امها
واذا كنت احكي مع علاء كلمة كانت تروح وتوصل الحكي لأمها وكأنو ممنوع احكي مع زوجي او نختلي ببعض
عمي ابوه لعلاء ما كان الو كلمة ابداً مرتو هي الي بتقلو شو يحكي وشو مايحكي وممنوع يخالف اوامرها

رجعنا ع بيتنا ورتحت كتير لانو الواحد مابرتاح غير ببيتو
بس علاء تغير معي كتير من وقت رجعنا من عند اهلو
مرق اسبوع وعلاء عم يتغير معي
بدقق ع كل كلمة بحكيها ومابيعجبو العجب
وكل الوقت بظل يخانئ ومعصب وما كأنو عريس مابيقرب مني وبيحاكيني بنشافة

ليلاس. يلا علاء الفطور جاهز خلينا نفطر

قعدنا نفطر وقالي علاء شو كأنك رجعتي سمنتي لاتاكلي كتير خي وزنك يخف

انسدت نفسي عن الاكل وقمت وتركتو يفطر
وبالفعل انا زاد وزني حوالي 3 كيلات من وقت تزوجنا

بعد الفطور طلع علاء من البيت ومارجع الا بالليل

علاء. خدي هدول الحبوب بتصيري تاخدي منهن
ليلاس. لشو هدول الحبوب للتنحيف يعني !!
علاء. وهوا يتجلئ عليها لا مو للتنحيف هدول حبوب منع الحمل

ليلاس. وليش حتى اخد منهن
علاء. لانو انا مابدي اولاد لا هلأ ولا بعد عشر سنين عم تفهمي ولا عيدلك الحكي ماااابدي اولاد

ليلاس. انا مارح اخد الحب
علاء. مو ع كيفك غصباً عنك وياويلك اذا بتعلب بعقلك امك وبتقلك احملي وبعدين بتحطيه تحت الأمر الواقع
والله لو بتكوني حامل بالشهر الخامس بدوس ببطنك وبخليكي تنزلي الولد يعني لا تفكري تضحكي عليي

حكيو خوفني كتير وصار يجبرني اخد حبوب منع الحمل مع انو انا بحب الاولاد صغار كتير

مرق شهرين وتعودت ع عقل علاء الصعب
وماكنت مرتاحة ابدا مع انو ساكنة ببيت لوحدي كان علاء كل يوم يروح لعند اهلو وامو تعبيه عليي ويجي معصب ومرات يغلط علي بالحكي ويسبني كنت اتحمل واسكت
وكل مايجو اهلي لعندي فوراً يتصل بأهلو مشان يجو وما اقدر اخد راحتي بالقعدة مع اهلي
مع انو اهلو دائماً عنا ومابيتركونا
كنت اذا بدي فوت ع المطبخ حط ضيافة لأهلي تجي معي اختي ندى لتساعدني وفوراً تلحقنا شيماء وتظل واقفة معنا لنطلع من المطبخ
قبل مايروحو اهلي دخلت انا وندى ع الغرفة كنت بدي اسئلها عن حياتها وشو بصير معها
نفس الشي لحقتنا شيماء وماخلتنا نحكي

ليلاس. حبيبتي شيماء معليش تستنيني شوي برا ومابتأخر
شيماء. لا مابدي بلكي حكيتي شي ع امي او ع علاء انا لازم اسمع شو بتحكو

ندى. خلص ليلاس خلينا نطلع وبعدين بنحكي

راحو اهلي وبعدين راحو بيت حمايي اديش كنت مقهورة معقول عم يجو لعندي لحتى مايسمحولي اقعد مع اهلي ومشان ما احكي عليهن ليش هيك بفكرو فيني مع اني بحترمهن من كبيرهن لصغيرهن ولا مرة شكيت لأهلي او حكيتلهن شي دائماً بقول اني مرتاحة ومبسوطة
بس رغم هيك مابتبين معهن المنيحة لك بكفي اني متحملة شيماء رغم انو بتسب عليي قدام الكل وبتحكي حكي طالع نازل وبتبهدلني قدام علاء وامو وماحدا بيحكي معها شي وانا ممنوع زعلها او رد عليها لانو هي الصغيرة والمدللة

بعد كم يوم اتصلو فيني رفقاتي وقالولي بدهن يجو لعندي وانا قلتلهن انو انا ببيت حمايي وبدي نام عندهن بس ارجع ع البيت بردلهن خبر

كذبت عليهن وماقدرت اعطيهن قرار من حالي قبل ما اسأل علاء اذا مسموح يجو او لا لانو من وقت العرس كانو يتصلو وبدهن يجو يباركولي بس علاء ماكان يقبل ويقلي اعتذري منهن وبس اسألو ليش يقلي انو امو مشغولة
ومابتقدر تجي كنت قلو انو عادي هدول رفقاتي وانا بستقبلهم بس مايقبل ويقول اذا امي مابتكون موجودة ممنوع حدا يجي عليكي وممنوع تستقبلي حدا

خبرت علاء انو بدهن يجو لعندي رفقاتي فوراً اتصل بأمو وسألها اذا فاضية بكرا قالتلو اي خليهن يجو

تاني يوم اجت حماتي وبنتا شيماء واجو رفقاتي
قعدنا مع بعض وما اخدو راحتهن بوجود حماتي
بعد شوي اجا عمي ابوه لزوجي بس شاف رفقاتي نزل قعد ببيت سلفي الي تحتنا ولحقتو حماتي لأنها ملت بس خلت شيماء عنا

صرنا نتذكر ايامنا مع بعض ونضحك ونمزح ومبسوطين
بعدين شغلنا اغاني وصرنا نرقص كنت كتير مشتاقتلهن ومن يوم تزوجت ماشفتهن

بعد شوي صار الباب يدق بقوة طفيت الاغاني ورحت لأفتح طلع عمي اول مافتحت الباب بلش بالبهادل

ابوعلاء. بصوت عالي شو قلة هالزوق شو انتو مابتستحو ع حالكن صرعتونا بصوت الاغاني
حاج بكفي قوليلهن خليهن يروحو ع بيوتهن احسن مايصرعو الناس

رفقاتي سمعو كل الحكي ولبسو تيابهن ليروحو تمنيت الأرض تنشق وتبلعني
شو بدي احكي وشو بدي قول
اعتذرت منهن وراحو

بالليل كنت زعلانة من ىالي صار شافني علاء وسالني شبني مارديت عليه رجع سألني وقلتلو اني زعلانة لانو رفقاتي تقلعو من بيتي

علاء. اي الحق عليهن ليش ماقعدو ربع ساعة وراحو ضروري يقعدو كل النهار

ليلاس. اهااا يعني معك خبر بالقصة لكن ليش عم تسألني شبني وانت بتعرف شو في
علاء. فكرت في شي مهم
ليلاس. يكون بعلمك انو رفقاتي ماقعدو الا ساعة يبدو انو وصلتك المعلومة غلط
علاء. خرسي ولي حيوانة تضربي بهالمنظر
انا طالع نام بالصالون وخليكي لحالك متل الكلبة

صرت ابكي وقول ليش هيك حظي انا شو عاملة لأهلو بشو اذيتهن ليش هيك عم يعملو فيني
كل مشكلة عم بتصير بيني وبين علاء بكونو هني سببها
ماهنوني ولا يوم من وقت تزوجنا كل الوقت ياهني عندي يا نحنى عندهن مافي راحة ابداً
صحيح ساكنة لحالي بس هني بيتحكمو فيني عن بعد

تاني يوم علاء ماحكا معي ولا كلمة وكمان نام بالصالون وكل النهار يقضيه برات البيت ويروح لعند اهلو
وظل هيك اسبوع ينام بالصالون ومايحكي معي وحاكيه مايرد ويقلي اخرسي ولا تحكي معي ولا تدخلي فيني

ظليت اسبوع كأني عايشة لحالي بالبيت وبعدين تصالحنا

كنت اتحمل واسكت عن كل شي وقول الا ماتفرج وبس يشوفوني اديش منيحة معهن اكيد رح يتغيرو بس للأسف ماصار هالشي
حاولت بكتير طرق مع علاء حتى يتغير بس بدون فائدة متل ماهوا

وبيوم طلع علاء من الصبح ومابعرف وين بالليل قبل مايجي جهزت حالي وحطيت مكياج وعطر وقعدت استناه ليجي كرمال نسهر وحاكيه بموضوعنا بلكي بيسمعني وبس اجا اول مشافني صار يضحك

علاء. تفي شو هالمنظر شو ما اتطلعتي ع حالك بالمراية روحي غيري هاللبس لانو مابيلبقلك شوفي كرشك كيف ولا هالمكياج طالعة متل الساحرة

حكى هالكلمتين الي كسرولي قلبي وكسر بخاطري واخد تيابو وطلع ينام بالصالون

ظليت طول الليل ابكي جرحني كتير بكلامو وماقدرت رد عليه لأني مالي متلو

يتبع...
الجزء الرابع
 
#أحلام_تلحقها_خيبات_الكاتبة_روان_الشبلاق

الجزء الرابع والخامس ( انتهت )

تاني يوم صار يحكي معي ومارديت عليه عصب وصار يسب وماخلى كلمة ماحكاها عليي وماترك نوع من الحيوانات الا وشبهني فيه

علاء. اسمعي معك دقيقتين بتقومي بتجهزي اغراضك بدي وديكي لعند اهلي لانو انا بدي روح كم يوم ع اللاذقية مع رفقاتي

وصلني ع بيت اهلو وراح مع رفقاتو
ظل 3 ايام غايب وامو عملتني خدامة وصارت نظايفية اشتغلتلها كل شي من تم ساكت بس ماعجبها ذوقتني الذل بكل انواعو من بهادل ومسبات وحكي من الزنار وتحت
وماكنت سدء ايمتى يجي الليل لانو كون هلكانة وبدي ارتاح

وهاد كلو غير اول ليلة لما نمنا انا وشيماء بنفس الغرفة قلتلها معليش نقفل الباب لانو اخوتك العزابية يمكن مابيعرفو اني نايمة معك بنفس الغرفة بخاف يفوتو بالغلط قالتلي اي وقفلنا الباب وتاني يوم راحت خبرت امها انو انا خايفة من اخوتها ليعملولي شي قالتلي حماتي لتكوني مفكرة حالك شي شغلة او مفكرة حالك حلوة اتطمني اولادي مارح يتطلعو بوجهك اصلاً هه من حلاتك

ليلاس. بس انا ماكان هيك قصدي
ام علاء. شو مايكون قصدك حبيبتي هاد البيت بيتنا ونحنى حرين وماعنا عادت قفل الأبواب يمكن هالشي متعلمتيه ببيت اهلك بس مابيمشي الحال عنا ايوااا

بس اجا علاء رجعنا ع بيتنا وماحكيتلو شي لأن لو حكيت مابستفيد شي وكل شي بقلو ياه بروح يقولو لأمو

تاني يوم كان قاعد بالبيت

ليلاس. علاء هلأ ليش انت بتطلع مع رفقاتك بتسهر وبتنبسط
وبتشتري الك شو مابدك وانا كل شي ممنوع
واذا طلبت منك شي لازمني مابتجبلي ياه وبتطنش ليش بخيل علي
مع انو انا منيحة معك وشو مابتطلب مني بقلك اي

علاء. شو مناسبة هالحكي هلأ
ليلاس. ولا شي
علاء. قومي البسي خلينا نروح لعند اهلك
ليلاس. عنجد بتحكي انا اشتقتلهن كتير
علاء. اي يلا

وصلنا ع بيت اهلي وقبل مانفوت قالي علاء ممنوع تقومي من جنبي ابداً حتى لو بدك كاسة مي بتخلي اختك تجبلك ياها

ليلاس. ليش خايف اني احكي عليك او ع اهلك
علاء. لا بس مشان امك ماتعبي براسك علي

كنت بدي قلو مفكر كل الناس متل امك بس اختصرت المشاكل لأني بعرفو مجنون ومابدي يعمل مشكلة قدام اهلي

بعد فترة رجع وزني زاد لل 72 مع انو ماباكل كتير وعلاء ماعجبو هالشي وخلاني بلش ريجيم قاسي وكان يراقبني ويقلي بكفي اكل هاد ممنوع وهاد مابصير تاكليه
وقومي ماشبعتي

ظليت فترة عاملة ريجيم وبدل ماينقص وزني عم يزيد

علاء. اسمعي ليلاس اذا بصير وزنك 75 بتروحي ع بيت اهلك ومابتلزميني

ليلاس. لك حرام عليك شو اعمل بحالي لك الاكل وانحرمت منو قلي شو في شي بينزل الوزن وماعملتو لسا كل يوم والتاني عم تجبلي وصفة وتقلي جربيها

علاء. من بكرا بتنظفي البيت كلو وسطح البيت وبتسقي الزرع وبتعملي تنظيف كامل للمطبخ وممنوع تنامي بعد ماروح ع الشغل بتقومي وبتلعبي رياضة بلكي بخف وزنك

عملت متل مابدو وصرت كل يوم اشتغل بالبيت وبس يجي من شغلو يعمل فحص كامل للبيت واوقات مايسدء انو بلعب رياضة الصبح كان يطلع ع شغلو ويرجع بعد نص ساعة ليتأكد اني مانمت ويشوفني شو عم بعمل
واذا شافني نايمة ياويلي
يبلش يسب ويطلع من تمو حكي وسخ

وبيوم كنا سهرانين عم نتفرج ع التلفزيون والأضوية مطفية شفت خيال حدا طلع من المطبخ قلت لعلاء وماسدئني قال اكيد عم تتوهمي قلتلو اي يمكن ونسيت القصة

بعد كم يوم قالي علاء بتذكري وقت شفتي خيال حدا طالع من المطبخ
ليلاس. اي متذكرة
علاء. هاد كان ابي
ليلاس. شو كيف يعني ابوك الباب كان مقفول وليش ليجي بهالوقت
علاء. ابي معو نسخة من مفتاح البيت احتاجو اغراض من الفريزة واجا لياخدهن

ليلاس. طيب هيك بيدخل بدون مايدق الباب يعني بلكي ماكنت لابسة او كنت طالعة من الحمام كيف بيدخل بدون حس ولا خبر

علاء. فكرنا نايمين وماحب يزعجنا بعدين هاد ابي وبيجي ايمتى مابدو انتي ما الك علاقة

مرقت ايام وعلاء ماتغير وكان يعملي مشاكل ع اتفه الأسباب هوا واهلو وصار ينام لحالو بالصالون ومابيحكي معي الا للضرورة
والوضع زاد عن حدو واهلو ماخلوني بحالي
حتى كانو يجو اهلي لعندي ويمنعني اني ضيفهن شي حتى كاسة عصير الا بأمرو
بس وقت يجو اهلو مايخلي شي ما يجيبو فواكه ومكسرات وحلويات

بعدين زاد لوضع وقررت خبر امي بكل شي عم بصير وقوللها اني بدي اتطلق
وبالفعل خبرت امي بس هي ماتخيلت الوضع الي انا فيه وقالتلي معليش واصبري يابنتي ومافي بنت الا مابتمر بهاد الشي ومشاكل بيت الأحمى مابتخلص وانتي خليكي منيحة معهن والله يهديهن وقالتلي كلمة الطلاق ممنوعة هي مشاكل صغيرة وبتنحل مع الأيام

بعد مرور فترة قالتلي امي اسألي زوجك اذا مشتهي شي اكلة بجي وبعمللكن ياها
سألت علاء وقال اي مشتهي الكبة قلت لأمي وتاني يوم اجت تعمللنا ياها وجابلي كل الأغراض بس كان ناقصنا قالب لماكينة الكبة قلت لعلاء يروح يجيبو من عند امو بس مارضي قال بلا ماتعرف امي قلتلو في عند خالتك اذا بدك جيب من عندها
راح لعند خالتو واعطتو القالب وقالتلو امك عندها واحد ليش ما اخدتو من عندها قاللها انو مابيعرف اذا في عند امو

بعد شوي اتصلت خالتو بأمو وخبرتها انو علاء راح لعندها واخد قالب الكبة حماتي استغربت انو ليش بدي ياه وانا مابعرف اعمل كبة لبست تيابها فوراً واجت لعنا والشر بعيونها وعلاء كان طالع من البيت
بس شافت امي عرفت انو هي الي رح تعمللنا الكبة وقالت ليش ماقلتيلي كنت اجيت انا مو احسن ماتغلبي امك وبعدين ليش ما اجيتو اخدتو الي بدكن ياه من عندي شو رح يحكو عني العالم اني بمنع ابني من انو ياخد اغراض من بيتي
صارت تعيط وتحكي حكي من الزنار وتحت حكي لأول مرة بسمعو
وصارت تحكي ع امي وتقول شوفي عند ابني كل يوم والتاني وهي جاية وقالتلا البيت الك ووهبينا ياه

مع انو امي قليل كتير لحتى تجي لعندي

ام طلال. شو وجعك انتي بس فهميني لك بنتي غلطت عليكي شي او بحياتها رفعت صوتها عليكي بس انتو مابتلبقلكم المعاملة المنيحة
ابنك هوا الي طلب مني اني اجي وهو الي قلا لبنتي مابدنا نخبر امي الحق ع ابنك بس عيب عليكي هالحكي يلي قلتيه

سكتت حماتي وماحكت ولا كلمة وكأنو انخرست
راحت امي تلبس تيابها بدها تروح وقفتها حماتي وقالتلها والله مابتروحي وحقك علي كل شي الا زعلك
امي ماقبلت واصرت انو تروح قبل ما تطلع دخل علاء ع البيت وسمع اصواتهن وماعرف شو القصة شاف امي بدها تروح وحلف يمين مابتطلع من البيت الا لتعملو كبة ويتغدو كلهن سوا وبقيت امي كرمالي وقد ما اصر عليها علاء

بالليل حكيت لعلاء الي عملتو امو بأمي وقلي معليش امي بسعر امك لا تزعلي منها كانت معصبة وانا رح اعتذر من امك

بعد كم يوم اجا علاء ع البيت وسألني اذا لساتني باخد حبوب منع الحمل
ليلاس. اي باخدهن مو انت هيك بدك
علاء. اي خلص وقفيهن
ليلاس. وبلكي حملت
علاء......
ليلاس. ليش بدك وقفهن
علاء. رفيقي حكالي انو مرتو كانت تاخد من هي الحبوب ومرضت بسببهن خلص وقفيهن

كنت استنى هاللحظة بفارغ الصبر رغم انو علاء مو منيح معي بس كان دايب قلبي لحتى يجيني ولد بلكي بتتغير حياتي

بعد فترة علاء اخد كل الذهب الي معي والي اعطوني ياه اهلي بحجة انو بدو يشتري محل وانو لزمو مصاري وقالي انا برجعلك ياهن بعدين بس يصير معي انا سدئتو واعطيتو كل شي معي وماسألت قلت بلكي بتبين معو

بعد كم يوم مرضت كتير وضليت بالفرشة يومين وما اقدر اتحرك وحرارتي مرتفعة قلتلو لعلاء اتصل بأمي خليها تجي لعندي حسيت اني بحاجتها

اجت لعندي وشافت وجهي اصفر وتعبانة سألتني شو صاير معك ومن ايمتى مرضانة قلتلها مابعرف صرلي يومين
قالتلي قومي البسي خليني اخدك ع الدكتور

علاء. شو هالحكي وانا شو عم بعمل هون انا باخدها
ام طلال. صرلها يومين مرضانة مو شايف حالتها كيف شو كنت عم بتستنى

ليلاس. رح قوم البس تيابي
ام طلال. وانا رح ساعدك

انتبهت امي ع ايدي مافي محبس ونفس الشي ايدي مافيهن الأساور وسألتني عنهن قدام علاء

ليلاس. علاء احتاج مصاري وانا اعطيتو ياهن
ام طلال. الذهب من حقها ليش بعتو
علاء. الذهب الي وانا ايمتى مابدي باخدو ومافي داعي اخد اذن من حدا

ام طلال. ع كل حال انا هلأ رح اخدها ومابقى تشوف وجها
يلا ليلاس امشي معي

علاء. ليلاس سمعتي امك شو قالت فكري منيح وعملي حسابك اذا بتطلعي خطوة وحدة برات البيت ما الك رجعة عليه

احترت كتير بين امي وزوجي

يتبع...
الجزء الخامس الأخير

#أحلام_تلحقها_خيبات_الكاتبة_روان_الشبلاق

الجزء الخامس الأخير

ام طلال. يلا ليلاس امشي
ليلاس. مابدي روح معك انا رح ابقى ببيت زوجي بما انو نحنى متفاهمين مافي داعي روح معك ويصير مشاكل خلص بعدين بنجي زيارة

ام طلال. عم قلك امشي معي ورح طلقك منو شو عم تستني شوفي حالتك كيف شو ناطرة لسا

حاولت كتير امي انو تاخدني معها وماقبلت وقالتلي وهي عيونها مدمعين انسي انو الك ام زعلت مني وراحت وقالت هيك من حرقة قلبها علي
هي اول مرة بكسر كلمتها
بس ماكان بدي اخرب بيتي وقلت في امل يتحسن

المسا اخدني علاء ع الدكتور وطلع معي فقر دم شديد ونقص حديد ونقص فيتامين كتبلي ع دوا وانتبه الدكتور انو شفايفي زرق واظافري كمان قالي لازم تروحي ع دكتور قلب

بعد كم يوم رحنا ع الدكتور وعملي تخطيط وطلع معي تسرع بالقلب وقال الدكتور لزوجي لازم تتغذا منيح معا فقر دم شديد

علاء. كل هالصحة ومعا فقر دم
الدكتور. لا تغرك صحتا بعدين وزنا ماكتير وانا ماشفت انها سمينة

علاء ماعجبو حكي الدكتور وماشالو من ارضو ومقتنع اني سمينة

بعد اسبوع كنت ببيت حمايي واجو امي وابي لعنا فرحت كتير بشوفتهن بس هني كانو جايين لياخدوني لانو امي خبرت ابي كيف بعاملوني ماقبلت روح معهن
وعمي حكا مع ابي وقلو بين ايا تنين بصير مشاكل وبتنحل وابي ماوافق يخليني وقال انا مابقبل بنتي تنهان ببيت زوجها
رفضت اني روح معهن لانو كنت مقتنعة انو هاد نصيبي ورضيت فيه ورح عيش حياتي كيف ماكان
قلت لأبي اني مرتاحة مع زوجي ومافي مشاكل قال يعني رح تكسري كلمتي عصب ابي وطلع هوا وامي من البيت وهني زعلانين مني

علاء كان شمتان بأهلي لأني كسرت كلمة ابي وفضلتو عليهن

رجعت ع البيت ومانشفت دمعتي وانا ابكي ع اهلي وخصوصي اني زعلتهن وبشهر رمضان

علاء. خلص طولي بالك كم يوم وبروقو مارح يبقو زعلانين منك

خلص رمضان واجا العيد وانا لا شفت اهلي ولا حكيت معهن بالعيد دق باب البيت فتحت وطلعت امي ضميتها وصرنا نبكي وقالتلي كيف سخيتي فيني وبقيت اعتذر منها وبوس ايديها لتسامحني وقالتلي انو ابي مابدو ياها تجي لعندي لانو لساتو زعلان

بعد فترة علاقتي مع علاء واهلو صارت اسوء وظليت متحملة وصابرة وبيوم تخانئنا انا وياه وقلي مابقى قادر اتحملك انقلعي ع بيت اهلك انا بدي طلقك

اديش ندمت اني فضلتو ع اهلي وزعلتهن مني كرمالو ومابين معو هالشي
طلع من البيت وانا اتصلت بأمي تجي تاخدني
رحت ع بيت اهلي وحكيتلهن الي صار وامي قالتلي بعتي اهلك كرمالو وهي هوا رماكي وماسأل

بالليل اتصل علاء وقلا لأمي انو بدو يرجعني وانو ندمان ماردت عليه امي وقالتلو مشان يطلقني قلا لكن رجعو المصاري الي اخدتوهن كانو تحت الفرشة 200 الف

ام طلال. انتبه لكلامك نحنى ما اخدنا شي
علاء. بتكون بنتك اخدتهن
ام طلال. بنتي مو بحاجة مصاريك

وسكرت الخط بوجهو وهوا كذاب ماكان في مصاري بالبيت اصلاً من وين الو هالمبلغ

بعد فترة رفعنا دعوة طلاق وبلش علاء يحط واسطات لنرجع لبعض اكيد خاف من المأخر الي بدو يدفعو لانو وضعو المادي تعبان هالفترة

وصار كل يوم يجي ويتصل ويجيب واسطات وابي مايقبل ويقلو نحنى بدنا تطلق
بس رغم هيك مارد وجاب ناس كتير واسطة لحتى يرجعني وحكا قدام الكل وقال انا ندمان كتير وغلطت بحقها وماعرفت قيمتها لحتى خسرتا واهلي هنن السبب ومابقى خليهن يتدخلو بحياتي ابداً وانا تغيرت وصرت انسان تاني وبتشوفو هالشي
والله لحطها ع راسي من فوق وعوضها عن كل الأيام

بس سمعت حكيو هيك من طيبة قلبي سدئتو وقلت لأبي اني بدي ارجعلو وبصعوبة حتى وافق ابي وقلو بترجعلها الذهب الي بعتو بعدين بترجعها

واهلك ما الهن علاقة فيها قال علاء الذهب برجعو بعدين هلأ ما معي وقلو ابي مو مشكلة
والي بشوفو كيف كان قاعد وبسمع حكيو بقول عنجد هاد تغير وصار انسان تاني
توكلت ع الله ورجعتلو

رجعت ع البيت مع علاء بس لقيت البيت فاضي واغلب الاغراض الي فيه مو موجودين سألتو عنهن

علاء. احتجت مصاري وبعتهن
ليلاس. لك كيف بتبيعهن معقول انت في حدا ببيع اغراض بيتو
علاء. بس الله يرزقني بجيب بدالهن

بعد فترة كانت حماتي وشيماء عندي واجو امي واختي لعندي طار عقلها امي بس شافت البيت بدون فرش وسألتني وينهن ماكانت بتعرف انو حماتي عندي
طلعت حماتي من الغرفة وقالت لأمي شو جابك انتي وكمان جايبة معك التحري قصدها عن اختي قالت هاد بيت ابني وانتي مادخلك ان شاء الله بيقعدو ع الأرض لا تتدخلي

ام طلال. هاد بيت بنتي ومن حقي اعرف شو ناقصو

امي عرفت انو المشاكل لساتها بحياتي وانو ماتغير شي وحكي علاء كان كلو كزب

قررت احكي مع علاء بلكي بحن قلبو علي
بالليل عملت جو هادي للغرفة وقلت بنحكي بهدوء رح حاول اشرحلو الي بدي ياه واكيد مارح يعصب
بس اجا متل العادة جرحني بكلامو بس ظليت مصرة انو نحكي

ليلاس. علاء خلي كل واحد فينا يحكي الي بقلبو اسمعني لمرة وحدة بس
علاء. احكي سامعك
ليلاس. ليش عم تعاملني بهي الطريقة انا شو عملتلك

علاء. لأنك خبيتي عليي انك كنتي مخطوبة مرتين قبلي
ليلاس. امك هيك بدها نبهت علينا انو ممنوع نقلك وهي بعدين بتخبرك وهي طلعت بتعرف خبرني بالسبب الحقيقي ليش عم تعمل هيك

علاء. عنجد حابة تعرفي ؟
ليلاس. اي اكيد
علاء. انا مابحبك وبحياتي ماحبيتيك انا خطبتك غصباً عني وماكنت مقتنع فيكي امي وخواتي هني الي اقنوعني وضغطو علي كتير لأتزوجك
انا كنت بحب بنت خالتي ولساتني بحبها وطلبتها الف مرة وابوها مايوافق ظلينا نحب بعض 3 سنين بعدين امي فقدت الأمل وقررت تخطبلي وشافت عشر بنات قبلك وماعجبوها لحتى شافتك انتي وعجبتيها بس ماعجبتيني الي انا ع الأقل كنت بتمنى بنت نحيفة

ليلاس. تزوجتني غصباً عنك ومابتحبني وانا متل الغبية كنت قول لحالي مع الأيام بتزبط حياتنا
لك كنت اعمل كل شي بس لأرضيك وارضي اهلك وبالأخر طلعت مابعجبك
لك ليش من الاول ماقلتلي ليش ماخبرتني انو مابتحبني ليش تزوجتني اذا مابدك ياني
كل الوقت كنت تعاملني متل الخدامة ماتهنيت معك ولا بيوم ماخليتني شوف يوم حلو
سب وحكي طالع نازل وبهادل لك خليتني احرق جسمي كرمالك حبوب منع حمل وحبوب ريجيم ووصفات وبالأخر طلعت مابتحبني لك بديتك ع اهلي وتحملتك كتير وصبرت كتير وبالأخير هي جزاتي وعم تقولها بكل عين وقحة انك ماحبيتني
طب ليش ماطلقتني واذا المشكلة فيك انت ليش اهلك كانو يعاملوني بهي الطريقة مو هني الي بدهن ياني

علاء. اي فكروكي منيحة بس طلعتي مابتحبيهن
علاء. لك بعد كل شي قدمتلهن ياه وعم تقول ماني منيحة
علاء. انتي ماقدميتلهن شي الي بتعمليه كل كنة بتعملو ببيت حماها

ليلاس. لك اااااالله لا يسامحك

تركني بالغرفة وطلع ينام بالصالون كان الوقت متأخر تاني يوم اتصلت بأمي وقلتلا تجي تاخدني جهزت شنتايتي واجت امي قالي علاء لا تطلعي من البيت

ام طلال. مو ع كيفك ونحنى كنا غلطانين لما وثقنا فيك ورجعناها بس ياحيف طلعت ما بتستاهل

علاء. اي اي بكفي انقلعي من بيتي انتي وبنتك يا وسخة يا فلتانة
وحكي بصوت عالي ومن الزنار وتحت ورفع ايدو ع امي بدو يضربها نزلتلو ياها وقلتلو ان شاء الله بتنكسر هالأيد
مسك امي من كتفها وهوا قرفان ودفشها لورا وقلا يلا انقلعي

ليلاس. الله لا يوفقك يا كلب لك انت مريض نفسي
ام طلال انصدمت فيه وماتوقعتو بهالنذالة
مشيو ولحقهن ع الشارع وهوا يسب ويقول بنتك فلتانة كانت من واحد لواحد

رفعنا دعوة طلاق ومتل العادة اجا يبكي انو ندم وبدو يرجعني وجاب اعمامي كلهن معو
ابي دخلو ع البيت وما قلعو بس لانو اعمامي معو
وصار يقول انو كان معصب
قالتلو امي برجعها بس بشرط

علاء. موافق شو ماكان
ام طلال. كل الحكي الي قلتلي ياه اخر مرة بتقولو بنتي لأمك بالحرف الواحد

علاء. قلتلكن كنت معصب
ام طلال. واعتبر انو بنتي معصبة وحكت هيك مع امك شو موافق ؟
علاء.........
وهلأ فيك تنقلع من بيتنا وفشرت بنص عينك اني رجعلك ياها

تطلقت من علاء وكان يوم عيد ميلادي ال 19 بقيت عندو 6 شهور وشفت من الذل اشكال والوان وكان قلبي مكسور ليش صار فيني هالشي لو كنت بعرف من الاول انو مابحبني ماكنت ببقى عندو دقيقة بس كنت اصبر وقول بلكي الله بيهديه

بعد سنة من لما تطلقت مابقى شفتو ابداً لحتى مرة احتجنا اخراج قيد يثبت اني مطلقة وراحت جابتو امي واعطتني الورقة شفتها وعرفت انو تزوج بنت خالتو الي كان يحبها
لما شفتها حسيت سكينة وانغرزت بقلبي مع اني ماكنت زعلانة عليه ابداً بس صعب شوف الشخص الي اذاني وخرب حياتي والي كان سبب بتعاستي عايش ومبسوط مع الي بحبها
وانا خسرت كل شي وغير نظرة المجتمع عني بأني مطلقة يا الله اديش عانيت من هالقصة ومن حكي الناس
حتى في وحدة بتقربني كانت عروس وبدها تروح تودي الجهاز ع بيت العريس طلبت انو انا ماكون موجودة حتى ما احسدها وصيبها بالعين وهي من اقرب الناس الي

يا الله شو سمعت حكي لك شو ذنبي انا لك هاد نصيبي
انا كمان كنت بتمنى لو علاء طلع شخص منيح وحبينا بعض وعملنا عيلة بس قدري ونصيبي وهلأ عمري 26 سنة ولساتني ع حالي
وهلأ وزني رجع زاد
وبسبب علاء صرت اكره كل شي اسمو ريجيم ومجرد ماحدا يقلي ضعفي حالك عصب عليه وقلن مارح ضعف حالي انا هيك يلي بدو يحبني بحبني متل ما انا ويلي مو عاجبو يسطفل

( انتهت ) هي القصة صرلا 7 سنين ومن 7 سنين كان الطلاق قرار صعب وكانو البنات ينظلمو ويتحملو مو متل هلأ ايا سبب بسيط بصير طلاق لهيك لا تلوموها لـ ليلاس و
 
الوسوم
أحلام تلحقها خيبات
عودة
أعلى