سالني ابني انت من اي بلد :

صفا النعمان

الادارة
طاقم الإدارة
.سالني ابني انت من اي بلد :
قلت له انا من بلد بيعرف كل بيت فيه بالحارة شو طابخين كل الجيران ؟؟
هاد البيت طابخ ملوخّية.....وهاد البيت عم يقلي بيتنجان
وريحة الخيار يعني سلطة.. والسمك شارح حالو لحالو
ودبح البطيخة فضيحة ... وبتوصل ريحتها لاخر الدنيا ؟؟........
أنا من بلد كان القمر فيه بالصيف يعني سيران.....
وكل عرس يعني تلبيسة.. .. ..
وكتب الكتاب يعني ملبس....
انا من بلد كانت أمي تقول يا ابني
“ غسل وجهك لأنك ما بتعرف مين بيبوسو، و كّنس بيتك لأنك ما بتعرف مين بيدوسو”
وأبي يقول:
“جارك أخاك.. إذا ما شاف وجهك بيشوف قفاك”

انا من بلد لما بيندق فيه الباب منتحذر بين بعضنا مين وبنقول: يا ترى مين إجانا؟
هي نقرة الجارة.. سريعة وقصيرة، هي دقة عمتي...... ناعمة وخفيفة
هي خبطة ابن الجيران ببوز صباطو ع الباب....، وهي خشخشة المفاتيح ..وبابا عم ينادي: يالله .. ليتغّطوا النسوان
انا من بلد......الأساور الرفيعة والمبرومة والحيّة.....
انا من بلد كاسات الليمون الجامد، والتمر الهندي، و”الكاظوظة” الأورانج والكولا والقمر دين...
بلد الفول المقّألى بأيام الفول، والمدّمس كل أيام الجمعة، والتسقّية والسوس عافطار رمضان ......

بلد كل شي بيصير فيه بيستاهل يكون خبريّة.....
ولدت القطة، فتّحت الفلّة، نزلت العوجة، فّتح زهر نيسان،...

بلد حتى حبال الغسيل فيه بتحكي قصص، ولقّاطات الغسيل بتنقل رسائل بينا وبين الجيران، ونشر الغسيل إله أصوله مشان ما يقوله عن الست شرنه أو عفشه...
بلد كانت الست تقول: “لو كانت أسوارتي وقيّة ما لي عن جارتي غنيّة”
بيت الجيران أول باب بيندق لما بيخلص الخبز على غفلة، ولّما ما بيلتقى ليمونة.....

بيت الجيران مصدر قالب البوظ بالصيف لما بيجوا الضيوف فجأة والبيت ما فيه بوظ...
بيت الجيران أول بيت بنزوره بالعيد
والبيت يلي بيتحمل ولدنتنا وقت ندق على سقّاطته وبنهرب ....
ومنرش عتبته بالمي لما بندير الخرطوم لنرش الحارة بالصيف
والبيت يللي بنوقف قدامه لنوصّله سكبة اليوم ...كل مغرب برمضان ...

ببلدي ما فيه قطّة جوعانة.. وكلاب الشوارع شبعانة
وبكل أرض ديار... بحرة ونافورة وفّلة ودالية وكّبادة ونارنجة وياسمينة عراتلية بكل مطبخ قطرميز مكدوس وتنكة جبنة ونملّية ...
ببلدي... كانت ايام الشتا.... ياعيني على أيامها..
كانت الصوبيا... ولهبها... عم يقمر الخبزات ويشوي الكستنا....
وكاسة الشاي يلي عم تتنقل من إيد ﻷيد بجلسة فيها طنة ورنة.. ..

ببلدنا الغيرة بتشعل فينا مو بس اذا حدا اطلع أو لطش اختنا كل بنات الحارة إخواتنا .
نسيت خبركن.. إنه بعد كل سيران لازم نتحمم قبل ما نطلع ع التخت ﻷن الشراشف نظيفة و وجاه المخدات مغيرين..
وإذا طلعت كانت أمي تقيم قيامتنا
انا ياابني من بلد اسمها سورية
بحبك يابلدي

 

مواضيع ذات صلة

الوسوم
ابني انت اي بلد سالني من
عودة
أعلى