ارجع يا شتا

ارجع يا شتا
روحت فين
لو بأيدي كنت اجيبك بدري شهرين
وابوس راسك واقولك اقعد متقومش
ولا تروح شمال ولا يمين
ولا تتحرك من مكانك
وبدل السنة
خليك سنتين
وان رجع الصيف قوله مش عايزين
شبعنا ومستكفيين
صحيح بلدنا بتغرق في شبر ميه
وبتبقي عوصة وطين
بس شمسك دافا وكلك طيبة وحنين
أرجع يا شتا
اشتقنا للبطاطين
اشتقنا لهواك اللى يرد الروح ويشفي العليل
مش قاسي زي الصيف اللي عملنا صوماليين
ومعدناش مستحملين
يا بخت اللى عنده تكييف
يا صيف خليك خفيف
عشان خاطر الشقيانين
وربنا يخفف عنا ويرحمنا في الدنيا وفي الاخرة
فهو خير الراحمين



الشاعر
عبد الحميد بدوي


ليتك تعود ايتها الشتاء 1428923885453.gif