مو حزن
لكن حزين ..!
مثل ما تنقطع
جوا المطر
شقة ياسمين !
مو حزن .. لكن حزين
مثل صندوق العرس
ينباع خردة عشق
عقب السنين !
مو حزن لكن .. حزين !!
__
خذني يا بحر
خذني خشبة
.. خذني والبحارة لو نسيوك كلهم
ما نسيتك
.. الخشبة عاشت عمر طيب
عشقت كل المخاطر
عاندت .. مشيت بوجه الريح
لكن ما كسرها
وصارت تسافر وحدها
بلا اتجاه !
وارجع احط خدي على خدك
يا بحر
خشبه وبحر
خشبه .. خشبه وكلش حزينه
خشبه لكن حيل
اهيب من سفينه
___
ما بكيتك
فارقت انت السفينه
وانا جايبلك بحر ..!
جبتلك طوفان الحلم
حلم منذور بغياب الشمس
فارقت حلم الناس
ومليت السفينه والسفر ؟
ما بكيتك
انا بكتني السفينه !
منين ما طش الرذاذ .. تريد تبحر !
تدري نوبات السفن لو ضاق خاطرها بجبن قبطانها
تسافر وحدها !
انا ما بكيتك
انا بكتني السفينه !!

مظفر النواب